ହତ୍ତି 22 - New Testament in Pengo Parja Languageଜିବୁନ୍ହିନି ନାଗୁଡ଼୍ନି ଏଜୁଙ୍ଗ୍ 1 ତାପାଚେ ହେ ଦୁତ୍ ନାଙ୍ଗେଙ୍ଗ୍ ର ନାଗୁଡ଼୍ ଚଚ୍ଚାତାତ୍, ହେ ନାଗୁଡ଼୍ନି ଏଜୁଙ୍ଗ୍ ଉଟିସ୍ ଜିବୁନ୍ ଗାଟାଆଦ୍ନାତ୍ ଆରେ ହେ ଏଜୁଙ୍ଗ୍ କାଚ୍ ଗିଲାସ୍ଲେକେ କିଲେର୍ ମାଚିକ୍। ହେ ନାଗୁଡ଼୍ ଈଶ୍ୱର ଆରେ ମେଣ୍ଢା ଇନେର୍କି ଯୀଶୁ ସିଙ୍ଗାସନତାଙ୍ଗ୍ ୱାଜି ମାଚାତ୍। 2 ହେ ନାଗୁଡ଼୍ ଈଶ୍ୱର ଆରେ ମେଣ୍ଢା ଇନେର୍କି ଯୀଶୁ ସିଙ୍ଗାସନତାଙ୍ଗ୍ ୱାଜି ସହର୍ନି ଅହାର୍ ରାସ୍ତା ହିଜି ହାଲ୍ଜି ମାଚାତ୍। ହେ ନାଗୁଡ଼୍ତାକେ ରି କାଣ୍ଡିକାଙ୍ଗ୍ ବାର ମାସ୍ ପାଡ଼୍ ୱାନି ଜିବୁନ୍ହିନି ମାର୍ ମାଚାତ୍। ଇ ପୁର୍ତିନି ୱିଜୁ ଜାତିନି ମାନାୟାର୍ ହେ ମାର୍ତି ଆକିଙ୍ଗ୍ ବ୍ୟବହାର୍ କିଜି ଗାଅକୁ ହାର୍ କିଜି ମାଚାର୍। 3 ହେ ସହର୍ନି ୱିଜୁ ଜିନିଷ୍ ଜପି ଆରେ ୱିଜାର୍ ମାନାୟାର୍ ଜପି ଈଶ୍ୱରତି ଅବିଶାପ୍ ମାନ୍ଗୁତ୍। ଇନେସ୍କି ହେ ସହର୍ତାକେ ଈଶ୍ୱରତି ଆରେ ମେଣ୍ଢା ଇନେର୍କି ଯୀଶୁ ସିଙ୍ଗାସନ ମାନ୍ଗାନାତ୍ ଆରେ ଈଶ୍ୱର ଦାସ୍କୁ ତା ପୁଜାକିଜି ମାନାର୍। 4 ହେୱାର୍ ଈଶ୍ୱର ମୁମ୍ତିଙ୍ଗ୍ ହୁଡ଼୍ଦେଙ୍ଗ୍ ଆଡ୍ନାର୍, ଆରେ ତା ତର୍ ହେୱାର୍ ନିଦାଣ୍ତାକେ ଲେକା ଆଜିମାନାତ୍। 5 ହେ ସହର୍ତାକେ ଇନାୱେଡ଼ାଙ୍ଗ୍ ପା ମାଜ୍ଗା ହିଲାତାତ୍ ଆରେ ହେବେନି ମାନାୟାରିଙ୍ଗ୍ ବଇଟା କି ୱେଡ଼ା ଅଜଡ଼୍ କିଦେଙ୍ଗ୍ ଦର୍କାର୍ ଆୱାଦାଙ୍ଗ୍ ମାଚାତ୍, ଇନେସ୍କି ମାପୃ ଈଶ୍ୱରତି ନେ ହେୱାରିଙ୍ଗ୍ ଅଜଡ଼୍ କିଜି ମାଚାତ୍। ଆରେ ହେୱାର୍ ରାଜା ଲେକେ ସାସନ୍ କିଜି ମାଚାର୍। ଯୀଶୁ ବେଗି ୱାନାନା 6 ତାପାଚେ ହେ ଦୁତ୍କୁକାଙ୍ଗ୍ ୱେଚ୍ଚାତ୍, “ଆନେଙ୍ଗ୍ ୱେଚ୍ଚିତି ଇ ୱିଜୁ କାତା ପାର୍ତି କିୟାଆନାତ୍ ଆରେ ସତ୍, ଇନେସ୍କି ହେୱାନ୍ ତା ଦାସ୍ ଭବିଷ୍ଯତବକ୍ତାରିଙ୍ଗ୍ ପୁନିକିଦେଙ୍ଗ୍ ଆଡ୍ନାନ୍। ଲାଗିଙ୍ଗ୍ ଈଶ୍ୱର ତା ଦାସ୍ ଯୋହନତିଙ୍ଗ୍ ଇ ୱିଜୁ ବିଷୟ ଚଚ୍ନି କାଜିଙ୍ଗ୍ ହେୱାନ୍ ତା ଦୁତ୍ତିଙ୍ଗ୍ ପକ୍ତାତାନ୍। 7 ହୁଡ଼ାଟ୍, ଆନେଙ୍ଗ୍ ବେଗି ୱାନାଙ୍ଗା, ଇ ବହିତାକେ ଲେକାଆଜି ମାଚି ଈଶ୍ୱର କାତା ଇନେର୍ ମାନି କିନାନ୍ ଈଶ୍ୱର ତାଙ୍ଗେଙ୍ଗ୍ ଆଶ୍ରିବାଦ୍ କିନାନ୍।” 8 ଆନେଙ୍ଗ୍ ଯୋହନ, ଆନେଙ୍ଗ୍ ନେ ୱିଜୁ ବିଷୟ ହୁଡ଼୍ତାଙ୍ଗ୍ ଆରେ ୱେଚାଙ୍ଗ୍ନା। ଆରେ ଏଚେପାଦ୍ନା ଆନେଙ୍ଗ୍ ଇ ୱିଜୁ ବିଷୟ ୱେଚାଙ୍ଗ୍ ଆରେ ହୁଡ଼୍ତାଙ୍ଗ୍ନା, ନାଙ୍ଗେଙ୍ଗ୍ ଇ ୱିଜୁ ବିଷୟ ଚଚ୍ଚିତି ଦୁତ୍ତିଙ୍ଗ୍ ମୁଣ୍ଡିଆ ଇଡ଼୍ଜି ପୁଜା କିଦେଙ୍ଗ୍ ଇଚା କିଜି ମାଚାଙ୍ଗ୍। 9 ମାତର୍ ହେ ଦୁତ୍ ନାଙ୍ଗେଙ୍ଗ୍ ଆରେରଗ ୱେଚ୍ଚାତାତ୍, “ଆକାୟ୍, ନାଙ୍ଗେଙ୍ଗ୍ ମୁଣ୍ଡିଆ ଇଡ଼୍ଦାମା। ଇନେସ୍କି ଆନେଙ୍ଗ୍ ପା ନିଲେକେ ଆରେ ଜେକନି ଟଣ୍ଡାର୍ଲେକେ ଇ ଈଶ୍ୱର ସାସ୍ତର୍ତିଙ୍ଗ୍ ମାନିକିଜି ଭବିଷ୍ଯତବକ୍ତା ଇମ୍ଣି ମାନାୟାର୍ ଯୀଶୁଙ୍ଗ୍ ପାର୍ତିକିନାରା ଇଞ୍ଜି ପୁନିକିନାତା ଲାଗିଙ୍ଗ୍ ଏନେଙ୍ଗ୍ ଈଶ୍ୱରତିଙ୍ଗ୍ ପୁଜାକିୟା।” 10 ତାପାଚେ ହେ ଦୁତ୍ ନାଙ୍ଗେଙ୍ଗ୍ ଆରେରଗ ୱେଚ୍ଚାତାତ୍, ଏପେଙ୍ଗ୍ ଲେକିକିତି ଇ ବହିନି ଈଶ୍ୱର କାତାତିଙ୍ଗ୍ ଡ଼ୁକ୍ଚି ଇଟ୍ମାଟ୍, ଇନେସ୍କି ଇ ୱିଜୁ ବିଷୟ ବେଗି ପୁରା ଆନାତ୍ଦେ। 11 ଲାଗିଙ୍ଗ୍ ଇମ୍ଣି ମାନାୟ୍ କରାପ୍ କାମାୟ୍ କିନାନା, ହେୱାନ୍ କରାପ୍ କାମାୟ୍ କିଜି ମାନେନ୍। ଇମ୍ଣି ମାନାୟ୍ ଅଦରମ୍ କାମାୟ୍ କିନାନା, ହେୱାନ୍ ଅଦରମ୍ କାମାୟ୍ କିଜି ମାନେନ୍। ଇମ୍ଣି ମାନାୟ୍ ହାର୍ କାମାୟ୍ କିନାନା, ହେୱାନ୍ ହାର୍ କାମାୟ୍ କିଜି ମାନେନ୍ ଆରେ ଇମ୍ଣି ମାନାୟ୍ ପବିତ୍ର ଆତାନ୍ନା ହେୱାନ୍ ପବିତ୍ର ଆଜି ମାନେନ୍। 12 “ତାପାଚେ ମାପୃ ଯୀଶୁ ୱେଚ୍ଚାନ୍, ହୁଡ଼ାଟ୍ ଆନେଙ୍ଗ୍ ବେଗି ୱାନାଙ୍ଗା, ୱିଜାର୍ ମାନାୟାର୍ କାମାୟ୍ ଅନୁସାରେ ଆନେଙ୍ଗ୍ ହେୱାରିଙ୍ଗ୍ ପୁରଷ୍କାର୍ ଆୱିତିସ୍ ଦଣ୍ଡ୍ ହିନାଙ୍ଗ୍।” 13 ମା ମାପୃ ଈଶ୍ୱର ଇଲେକେ ୱେଚ୍ନାନା, ଆନେଙ୍ଗ୍ ଆଲ୍ପା ଆରେ ଅମେଗା, “ଇ ଅର୍ତ ଆନେଙ୍ଗ୍ ଇ ୱିଜୁ ବିଷୟତିଙ୍ଗ୍ ଆରମ୍ କିତାଙ୍ଗ୍ ଆରେ ଆନେଙ୍ଗ୍ ୱିଜୁ ବିଷୟତିଙ୍ଗ୍ ସେସ୍ କିଦେଙ୍ଗ୍ ଆଡ୍ନାଙ୍ଗ୍।” 14 ଆରେ ଇମ୍ଣି ମାନାୟାର୍ ତା ହେନ୍ଦ୍ରାଙ୍ଗ୍ ମେଣ୍ଢା ଇନେର୍କି ଯୀଶୁ ନେତେର୍ତାକେ ନେ ନୁଜ୍ଦି ଡ଼ିଚ୍ଚାର୍ନା। ତା ଅର୍ତ ଇମ୍ଣି ମାନାୟାର୍ ତା ପାପ୍ ୱିଜୁ ନୁସ୍ତାର୍ନା, ଈଶ୍ୱର ହେୱାରିଙ୍ଗ୍ ଆଶ୍ରିବାଦ୍ କିତାନ୍ନା। ହେୱାର୍ ସହର୍ନି ଗେଟ୍ତିଙ୍ଗ୍ ହାଞ୍ଜେଙ୍ଗ୍ ଆଡ୍ନାର୍ ଆରେ ଜିବୁନ୍ହିନି ମାର୍ତାଙ୍ଗ୍ ପାଡ଼୍ତିଙ୍ଗ୍ ଚିଞ୍ଜେଙ୍ଗ୍ ଆଡ୍ନାର୍। 15 ମାତର୍ ନିକୁଡ଼୍ଲେକେ ଇମ୍ଣି ମାନାୟାର୍ କରାପ୍ କାମାୟ୍ କିନାର୍, ଯାଦୁ ମନ୍ତର୍ କିନାର୍, ଦାରି କାମାୟ୍ କିନାର୍, ମାନାୟାରିଙ୍ଗ୍ ଅହ୍ନାର୍, ମୁର୍ତି ପୁଜାକିଜି ମାନାର୍ ଆରେ ମିଚ୍ ୱେଚ୍ନି ମାନାୟାର୍ ସହର୍ ବାର୍ତ ମାନାର୍। 16 “ଆନେଙ୍ଗ୍ ଯୀଶୁ, ୱିଜୁ ମଣ୍ଡ୍ଲିକାଙ୍ଗ୍ ଇ କାବୁର୍ ଶୁଣାୟ୍ କିଦେଙ୍ଗ୍ ଆନେଙ୍ଗ୍ ନା ଦୁତ୍କୁକାଙ୍ଗ୍ ପକ୍ତାତାଙ୍ଗ୍ନା। ଆନେଙ୍ଗ୍ ଦାଉଦ ରାଜା ମୁଡ଼୍ ଚିରାନି କୁଟୁମ୍ତାଙ୍ଗ୍ ଜନମ୍ ଆତାଙ୍ଗ୍ନା, ଆରେ ତା ରାଜ୍ ଗାଦିତାକେ କୁଚ୍ଚେଙ୍ଗ୍ ନା ଅଦିକାର୍ ମାନାତ୍। ଆନେଙ୍ଗ୍ ନେ ଅଜଡ଼୍ ହୁକା।” 17 ତାପାଚେ ପବିତ୍ର ଆତ୍ମା ଆରେ ମେଣ୍ଢା ଇନେର୍କି ଯୀଶୁ ବିବାଆନି କଗ୍ଲେ ୱେଚ୍ଚାତ୍, “ୱାଡ” ଆରେ ୱିଜୁ ୱେନାକାର୍ ପା ୱେଚ୍ଚାର୍ “ୱାଡ।” ଇମ୍ଣାକାର୍ ଏସ୍କି ଆନାରା ଆରେ ଉଣ୍ଡେଙ୍ଗ୍ ଇଚାକିନାର୍ ହେୱାର୍ ୱାଏର୍ ଆରେ ଉପ୍କା ଜିବୁନ୍ହିନି ଏଜୁଙ୍ଗ୍ ଉଣେର୍। 18 ଆନେଙ୍ଗ୍ ଯୋହନ, ଇମ୍ଣି ମାନାୟାର୍ ଆନେଙ୍ଗ୍ ଲେକିକିତି ବହିନି ଈଶ୍ୱର କାତାତିଙ୍ଗ୍ ୱେନାରା, ଇମ୍ଣାକା ନଙ୍ଗୟ୍ ଗଟାଆନାତା ଆରେ ପାଚେ ଗଟାଆନାତ୍ ଆନେଙ୍ଗ୍ ହେୱାରିଙ୍ଗ୍ ସାବ୍ଦାନ୍ କିନାଙ୍ଗା। ଯଦି ହେୱାର୍ ଇ ଈଶ୍ୱର କାତାତାକେ ତା କାତା ମାହାୟ୍ କିଜି ୱେଚ୍ନାର୍, ଲାଗିଙ୍ଗ୍ ଈଶ୍ୱର ପା ଦଣ୍ଡ୍ ପାୟାଆନି ମାନାୟାର୍ ହୁଦାଙ୍ଗ୍ ହେୱାରିଙ୍ଗ୍ ମାହାୟ୍ କିନାନ୍। ହେୱାନ୍ ହେୱାରିଙ୍ଗ୍ ଇ ବହିତାକେ ଲେକାଆତି ଦଣ୍ଡ୍ ୱିଜୁ ହିନାନ୍। 19 ଆରେ, ଇନେର୍ ଯଦି ଇ ଈଶ୍ୱର କାତା ଲେକାଆତି ବହିତାଙ୍ଗ୍ ଇନାକା ହପ୍ନାନ୍, ଈଶ୍ୱର ହେୱାନିଙ୍ଗ୍ ହେ ଜିବୁନ୍ହିନି ମାର୍ତି ପାଡ଼୍ ଚିଞ୍ଜେଙ୍ଗ୍ ହିଉନ୍। ଆରେ ଇ ବହିତାକେ ଲେକାଆତି ପବିତ୍ର ସହର୍ତାକେ ହାଞ୍ଜେଙ୍ଗ୍ ହିଉନ୍। 20 ଯୀଶୁ ନିଜେ ଇ ୱିଜୁ ବିଷୟ କାଜିଙ୍ଗ୍ ସାକି ହିଜି ୱେଚ୍ନାନା, “ଆଁ, ଆନେଙ୍ଗ୍ ବେଗି ୱାନାଙ୍ଗା। ଆନେଙ୍ଗ୍ ଯୋହନ ଉତର୍ ହିତାଙ୍ଗ୍, ଆମେନ୍! ମାପୃ ଯୀଶୁ ଏନେଙ୍ଗ୍ ବେଗି ୱା।” 21 ମା ମାପୃ ଯୀଶୁ ଦୟା ମି ୱିଜାକାର୍ ଜପି ଆଏତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation