ହତ୍ତି 21 - New Testament in Pengo Parja Languageପୁନି ଯିରୁଶାଲାମ ସହର୍ 1 ତାପାଚେ ଆନେଙ୍ଗ୍ ପୁନି ବାଦାଡ଼୍ ଆରେ ପୁନି ପୁର୍ତି ହୁଡ଼୍ତାଙ୍ଗ୍, ଇନେସ୍କି ପାନି ସରଗ୍ ଆରେ ପାନି ପୁର୍ତି ଡ଼ୁକ୍ତାତ୍ ଆରେ ହାମ୍ଦୁର୍ ପା ଚଞ୍ଜ୍ଞ୍ଜାୱାତାତ୍ଦେ। 2 ଆରେ, ର ବିବାଆନି ହଲ୍ନି କଗ୍ଲେ ତା ଡକ୍ରାହିଙ୍ଗ୍ ଗିଟାଆଦେଙ୍ଗ୍ ରେଡି ଆଜିମାନାତ୍, ହେଲେକେ ଈଶ୍ୱର ମାନି ସରଗ୍ତାଙ୍ଗ୍ ପବିତ୍ର ସହର୍ ଇମ୍ଣାକା କି ପୁନି ଯିରୁଶାଲାମ ଜୁଜି ୱାନାକା ଆନେଙ୍ଗ୍ ହୁଡ଼୍ତାଙ୍ଗ୍। 3 ଆରେ ସରଗ୍ନି ସିଙ୍ଗାସନତାଙ୍ଗ୍ ରକାନ୍ ଗାଜାକାଟ୍ କିଜି ୱେଚ୍ନାକା ଆନେଙ୍ଗ୍ ୱେଚାଙ୍ଗ୍, “ହୁଡ଼ା, ଈଶ୍ୱର ମନ୍ଦିର୍ ତା ମାନାୟାର୍ତାକେ ୱାନାନା, ହେୱାନ୍ ହେୱାର୍ ହୁଦାଙ୍ଗ୍ ମାନାନ୍ ଆରେ ହେୱାର୍ ତା ଲକ୍ ଆନାର୍। ଈଶ୍ୱର ନିଜେ ହେୱାର୍ ହୁଦାଙ୍ଗ୍ ମାନାନ୍। 4 ହେୱାନ୍ ତା ମାନାୟାର୍ ୱିଜୁ ଦୁଃକ୍ତିଙ୍ଗ୍ ଦେହା କିନାନ୍, ଆରେ ହେୱାରିଙ୍ଗ୍ ଇନାୱେଡ଼ାଙ୍ଗ୍ ପା ମାରାଣ୍ ୱାଉତ୍, କି ଦୁଃକ୍ ପାୟା ଆଉର୍, କି ଆଡ଼୍ବୁର୍ କି ଇନାକା ନନାକା ପା ୱାଉତ୍। ଇନେସ୍କି ହେ ପାନି ପୁର୍ତି ଆରେ ହେବେନି ୱିଜୁ ଜିନିଷ୍ ୱିଜୁଦିନ୍ କାଜିଙ୍ଗ୍ ଡ଼ୁକ୍ତାତ୍ ଆରେ ଚନ୍ଞ୍ଜୁତ୍।” 5 ଆରେ ହେ ସିଙ୍ଗାସନ ଜପି କୁଚ୍ଚାକାନ୍ ୱେଚ୍ଚାନ୍, “ହୁଡ଼ାଟ୍, ଆନେଙ୍ଗ୍ ୱିଜୁ ଜିନିଷ୍ତିଙ୍ଗ୍ ପୁନାକା କିନାଙ୍ଗା।” ତାପାଚେ ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, “ଇ ୱିଜୁ ବିଷୟତିଙ୍ଗ୍ ଲେକିକିୟା, ଇନେସ୍କି ଆନେଙ୍ଗ୍ ୱେଚ୍ନି ୱିଜୁ କାତାତିଙ୍ଗ୍ ପାର୍ତି କିୟାଆନାତ୍ ଆରେ ହେଦାଙ୍ଗ୍ ସତ୍।” 6 ଆରେ ପା ହେୱାନ୍ ୱେଚ୍ଚାନ୍, “ଇଦାଙ୍ଗ୍ ସେସ୍ ଆତାତ୍! ଆନେଙ୍ଗ୍ ନେ ଆଲ୍ପା ଆରେ ଅମେଗାନି ଅର୍ତ, ଆରମ୍ ଆରେ ସେସ୍। ଇନେର୍ ୱିଜୁ ଜିନିଷ୍ତିଙ୍ଗ୍ ଉବ୍ଜାଇ କିତାନ୍ନା ଆରେ ୱିଜୁ ଜିନିଷ୍ତିଙ୍ଗ୍ ସେସ୍ କିଦେଙ୍ଗ୍ ଆଡ୍ନାନ୍। ଇମ୍ଣାକାରିଙ୍ଗ୍ ଏସ୍କି ଆନାରା ଆନେଙ୍ଗ୍ ହେୱାରିଙ୍ଗ୍ ଉପ୍କା ଉଣ୍ଡେଙ୍ଗ୍ ଜାରାଣ୍ ଏଜୁଙ୍ଗ୍ ହିନାଙ୍ଗ୍ ହେ ଏଜୁଙ୍ଗ୍ ହେୱାରିଙ୍ଗ୍ ୱିଜ୍ୱି ଜିବୁନ୍ ହିନାତ୍। 7 ଇମ୍ଣି ମାନାୟାର୍ ଶୟତାନତିଙ୍ଗ୍ ଆରାୟ୍ କିଜି ଜିତାଆଜି ମାନାର୍, ହେୱାର୍ ଇ ୱିଜୁ ଆଶ୍ରିବାଦ୍ତିଙ୍ଗ୍ ପାୟାଆନାର୍, ଆନେଙ୍ଗ୍ ହେୱାର୍ ଈଶ୍ୱର ଆନାଙ୍ଗ୍ ଆରେ ହେୱାର୍ ନା ହିମ୍ଣାୱାକ୍ଡ଼ା ଆନାର୍। 8 ମାତର୍ ଇମ୍ଣାକାର୍ ନାଙ୍ଗେଙ୍ଗ୍ ପାର୍ତି କିଦ୍ନାକା ବନ୍ଦ୍ କିତାର୍ନା, ମାନାୟାରିଙ୍ଗ୍ ଟକାୟ୍ କିନାରା। ଈଶ୍ୱରତିଙ୍ଗ୍ ପୁନ୍ୱିତି ମାନାୟାର୍, କରାପ୍ କାମାୟ୍ କିନାର୍, ମାନାୟାରିଙ୍ଗ୍ ମାର୍ନେ ଅହ୍ନାର୍। ଦାରି କାମାୟ୍ କିନାର୍, ଯାଦୁ ମନ୍ତର୍ କିନାରା, ମୁର୍ତି ପୁଜା କିନାରା ଆରେ ମିଚ୍ ୱେଚ୍ନାରା। ହେୱାରିଙ୍ଗ୍ ଆନେଙ୍ଗ୍ ଗନ୍ଦକ ନାଣି ଆହ୍ନି କୁଣ୍ଡ୍ତାକେ ତୁସି ହିନାଙ୍ଗ୍ ଇଦାଙ୍ଗ୍ ନେ ଦୁଇ ନମ୍ବର୍ ମାରାଣ୍।” 9 ତାପାଚେ ସାତ୍ଗଟା ଗିନାତାକେ ଈଶ୍ୱର ଦଣ୍ଡ୍ ଆସ୍ତିମାଚି ସାତ୍ଗଟା ଦୁତ୍କୁତାଙ୍ଗ୍ ର ଦୁତ୍ ନା ଲାଗେ ୱାଜି ୱେଚ୍ଚାତାତ୍, “ନା ହୁଦାଙ୍ଗ୍ ୱା, ମେଣ୍ଢା ଇନେର୍କି ଯୀଶୁଙ୍ଗ୍ ବିବାଆନି ତା ଡକୃହିଙ୍ଗ୍ ଆନେଙ୍ଗ୍ ଚଚ୍ଚାନାଙ୍ଗ୍।” 10 ପାଚେ ଈଶ୍ୱର ଆତ୍ମା ନାଙ୍ଗେଙ୍ଗ୍ କଣ୍ଟ୍ରୁଲ୍ କିଜି ହେ ଦୁତ୍ ନାଙ୍ଗେଙ୍ଗ୍ ଗାଜା ପାନ୍ତି ମାଡ଼ିତାକେ ଅସା ହାନ୍ଞ୍ଚାତ୍, ହେୱାନ୍ ନାଙ୍ଗେଙ୍ଗ୍ ଈଶ୍ୱର ମାନି ସରଗ୍ତାଙ୍ଗ୍ ପୁନି ପବିତ୍ର ଯିରୁଶାଲାମ ସହର୍ ଜୁଜି ୱାନାକା ଚଚ୍ଚାତାତ୍। 11 ହେ ସହର୍ତାକେ ଈଶ୍ୱର ଗୌରବ ବାର୍ତିଆଜି ମାଚାତ୍, ଆରେ ହେଦାଙ୍ଗ୍ ବେସି ଦାମ୍ଦି କାଲ୍ ଆରେ କାଚ୍ ଗିଲାସ୍ଲେକେ ଚମ୍କା ଆଜି ମାଚାତ୍। 12 ହେ ସହର୍ନି ବାଉଣ୍ଡ୍ରି ଅହାର୍ ଆରେ ଉଚା ମାଚାତ୍, ହେ ସହର୍ତାକେ ବାରଗଟା ଗେଟ୍କୁ ମାଚିକ୍। ଆରେ ହେ ଗେଟ୍କୁକାଙ୍ଗ୍ ବାରଗଟା ଦୁତ୍କୁ କାସି ମାଚିକ୍। ହେ ବାରଗଟା ଗେଟ୍କୁକାଙ୍ଗ୍ ଇସ୍ରାଏଲ ଜାତିନି ବାରଗଟା କୁଟୁମ୍ନି ବାରଗଟା ତର୍ ଲେକାଆଜି ମାଚାତ୍। 13 ହେ ସହର୍ତାକେ ଆଗ୍ବାଗାୟ୍, ପାଚ୍ବାଗାୟ୍, ତିନାନିପଣ୍ ଆରେ ଡେବ୍ରିନିପଣ୍ ତିନ୍ଗଟା ଲାକା ଗେଟ୍କୁ ମାଚିକ୍। 14 ହେ ସହର୍ନି ବାଉଣ୍ଡ୍ରି ବାରଗଟା କାଲ୍କୁକାଙ୍ଗ୍ ପାଉଣ୍ଡେସେନ୍ ଆଜି ମାଚାତ୍, ଆରେ ପାଉଣ୍ଡେସେନ୍ ଜପି ମେଣ୍ଢା ଇନେର୍କି ଯୀଶୁ ବାଚିକିତି ଚେଲା ବାରଜାଣ୍ ତର୍ ଲେକାଆଜି ମାଚାତ୍। 15 ତାପାଚେ ନା ହୁଦାଙ୍ଗ୍ ବେଣ୍ କିଦ୍ନି ଦୁତ୍ କେଇଦ ହନାତାଙ୍ଗ୍ ରସ୍ତି ଲାଚ୍ନି ବେଡ୍ଗା ମାଚାତ୍, ହେ ଦୁତ୍ ହେ ସହର୍ତିଙ୍ଗ୍, ବାଉଣ୍ଡ୍ରିତିଙ୍ଗ୍ ଆରେ ଗେଟ୍ତିଙ୍ଗ୍ ଲାଜ୍ଜେଙ୍ଗ୍ ହେ ବେଡ୍ଗା ଆସ୍ତି ମାଚାତ୍। 16 ଏଚେପାଦ୍ନା ହେ ଦୁତ୍ ହେ ସହର୍ତିଙ୍ଗ୍ ଲାଚ୍ଚାତ୍, ଅହାର୍ତିଙ୍ଗ୍, ଡେଙ୍ଗାତିଙ୍ଗ୍ ଆରେ ଉଚାତିଙ୍ଗ୍ ହାମାନ୍ ମାଚାତ୍। ତା ଅର୍ତ ଏଚେପାଦ୍ନା ହେ ଦୁତ୍ ତା ଲାଚ୍ନି ବେଡ୍ଗା ହୁଦାଙ୍ଗ୍ ହେ ସହର୍ତିଙ୍ଗ୍ ଲାଚ୍ଚାତ୍, ହେ ସହର୍ ଦୁଇହାଜାର୍ ଚାରିଶ କିଲମିଟର୍ ପାତେକ୍ ଡେଙ୍ଗା ମାଚାତ୍, ହେଲେକେ ସହର୍ନି ଅହାର୍ ଆରେ ଉଚା ହାମାନ୍ ଦୁଇହାଜାର୍ ଚାରିଶ କିଲମିଟର୍ ମାଚାତ୍। 17 ତାପାଚେ ହେ ଦୁତ୍ ସହର୍ନି ବାଉଣ୍ଡ୍ରିତିଙ୍ଗ୍ ଲାଚ୍ଚାତ୍, ଆରେ ହେ ବାଉଣ୍ଡ୍ରି ଦୁଇଶ ଶଉଲ ପୁଟ୍ ଅହାର୍ ମାଚାତ୍। ହେ ଦୁତ୍ ମାନାୟାର୍ ଲାଚ୍ନିଲେକେ ଲାଜ୍ଜି ମାଚାତ୍। 18 ହେ ସହର୍ନି ବାଉଣ୍ଡ୍ରି ବେସି ଦାମ୍ଦି କାଲ୍କୁତାଙ୍ଗ୍ ରହ୍ୟା ଆଜିମାଚାତ୍, ଆରେ, ହେ ସହର୍ କିଲେର୍ କାଚ୍ ଗିଲାସ୍ଲେକେ ଅର୍ଜିନାଲ୍ ହନାତାଙ୍ଗ୍ ରହ୍ୟା ଆଜିମାଚାତ୍। 19 ହେ ସହର୍ନି ବାଉଣ୍ଡ୍ରିନି ବାରଗଟା ପାଉଣ୍ଡେସେନ୍ ବେସି ଦାମ୍ଦି କାଲ୍କୁ ହୁଦାଙ୍ଗ୍ ରହ୍ୟା ଆଜି ମାଚାତ୍। ହେ କାଲ୍କୁ ତର୍ ଇଲେକେ, ପାର୍ତୁମ୍ନି କାଲ୍ ତର୍ ହିରା ମାଚାତ୍, ଦୁଇ ନମ୍ବର୍ ନିଲି କଲର୍ ଦାମ୍ଦି କାଲ୍ ମାଚାତ୍, ତିନ୍ ନମ୍ବର୍ କାଲ୍ ପେଜେ ଆକି କଲର୍ ମାଚାତ୍, ଆରେ ଚାରି ନମ୍ବର୍ କାଲ୍ ପେଜେ ଆକି କଲର୍ ମରକତ କାଲ୍ ମାଚାତ୍। 20 ଆରେ ପାଞ୍ଚ୍ ନମ୍ବର୍ କାଲ୍ ଡ଼ିଞ୍ଜ୍ନାକା ଆରେ ମାଟିଆ କଲର୍ ପୁଲକ କାଲ୍, ଚଅ ନମ୍ବର୍ନି କାଲ୍ ରାତା କଲର୍ନି ମାଣିକ୍ୟମଣି କାଲ୍। ଆରେ ସାତ୍ ନମ୍ବର୍ କାଲ୍ ଗେର୍କା କଲର୍ନି ପୁଷ୍ପାରାଗମଣି କାଲ୍, ଆଟ୍ ନମ୍ବର୍ନି କାଲ୍ ଆକି କଲର୍ ପିରଜ୍ମଣି କାଲ୍, ନଅ ନମ୍ବର୍ କାଲ୍ ଗେର୍କା କଲର୍ନି ଗୋମେଦକମଣି କାଲ୍, ଦଶ୍ ନମ୍ବର୍ ଆକି କଲର୍ନି ଲଶୁନିୟମଣି କାଲ୍। ହେଲେକେ ଏଗାର୍ ନମ୍ବର୍ ନିଲିଆ କଲର୍ନି କାଲ୍ ଆରେ ବାର ନମ୍ବର୍ ସୁଗନ୍ଧମଣିନି କାଲ୍ ମାଚାତ୍। 21 ହେ ସହର୍ନି ବାରଗଟା ଗେଟ୍ ମତିତାଙ୍ଗ୍ ରହ୍ୟା ଆଜି ମାଚାତ୍, ୱିଜୁ ଗେଟ୍ ରଞ୍ଜି ମତି ହୁଦାଙ୍ଗ୍ ରହ୍ୟା ଆଜିମାଚାତ୍, ଆରେ ସହର୍ନି ମୁଡ଼୍ଦି ଗେଟ୍ କିଲେର୍ କାଚ୍ ଗିଲାସ୍ଲେକେ ଅର୍ଜିନାଲ୍ ହନା ହୁଦାଙ୍ଗ୍ ରହ୍ୟା ଆଜି ମାଚାତ୍। 22 ହେ ସହର୍ତାକେ ରଞ୍ଜାଙ୍ଗ୍ ପା ମନ୍ଦିର୍ ହୁଡ଼୍ୱାତାଙ୍ଗ୍, ଇନେସ୍କି ମାପୃ ୱିଜୁ ଶାକ୍ତିମାନି ଈଶ୍ୱର ଆରେ ତା ମେଣ୍ଢା ଇନେର୍କି ଯୀଶୁ ନେ ହେୱାର୍ ମନ୍ଦିର୍ ମାଚାର୍। 23 ହେ ସହର୍ତିଙ୍ଗ୍ ଅଜଡ଼୍ କିଦେଙ୍ଗ୍ ବଇଟା କି ୱେଡ଼ା କି ଲେଞ୍ଜ୍ ଦର୍କାର୍ ଆକାୟ୍, ଇନେସ୍କି ଈଶ୍ୱର ଗୌରବ ନେ ହେ ସହର୍ତାକେ ଚମ୍କା ଆଜିମାଚାତ୍ ଆରେ ମେଣ୍ଢା ଇନେର୍କି ଯୀଶୁ ନେ ହେ ସହର୍ତିଙ୍ଗ୍ ଅଜଡ଼୍ କିଜି ମାଚାନ୍। 24 ହେ ସହର୍ନି ଅଜଡ଼୍ ପୁର୍ତିତାକେ ମାନି ୱିଜୁ ମାନାୟାର୍ କାଜିଙ୍ଗ୍ ଗୌରବ ଆନାତ୍, ଆରେ ପୁର୍ତିନି ୱିଜୁ ଜାତିନି ରାଜାର୍ ଜାର୍ ଦନ୍ ସମ୍ପତି ହେ ସହର୍ତାକେ ତାସିହିନାର୍। 25 ହେ ସହର୍ନି ଗେଟ୍ ୱେଡ଼ାବୁଡି କଲା ମାନ୍ଗାନାତ୍। ଇନାୱେଡ଼ାଙ୍ଗ୍ ପା ବନ୍ଦ୍ ଆଉତ୍, ଇନେସ୍କି ହେବେ ଇନାୱେଡ଼ାଙ୍ଗ୍ ପା ନାଣା ଆଉତ୍। 26 ଇ ପୁର୍ତିନି ୱିଜୁ ଜାତିନି ମାନାୟାର୍ ଗୌରବ ଆରେ ସନ୍ମାନ୍ ପାୟାଆନି ହଲ୍ନି ଜିନିଷ୍ ଆରେ ତା ଦନ୍ ସମ୍ପତି ହେ ସହର୍ତାକେ ତାନାର୍। 27 ମାତର୍ କରାପ୍ ମାନାୟାରିଙ୍ଗ୍ କି, ପାପ୍ କାମାୟ୍ କିନାକାରିଙ୍ଗ୍ କି, ମିଚ୍ ୱେଚ୍ନାକାର୍ ଆଏର୍, ଇଲେକେ ଗିଣ୍ କାମାୟ୍ କିନାକାରିଙ୍ଗ୍ ଇନାୱେଡ଼ାଙ୍ଗ୍ ପା ହେ ସହର୍ତାକେ ହାଞ୍ଜେଙ୍ଗ୍ ହିଉର୍। ଇଲେଗ୍ଦି ମାନାୟାର୍ ହେ ସହର୍ତାକେ ହାନାର୍ ଯେ, ଇନେର୍ ତର୍ ମେଣ୍ଢା ଇନେର୍କି ଯୀଶୁ ବହିତାକେ ଲେକାଆଜି ମାନ୍ଗାନାତ୍, ହେ ବହିତାକେ ଜିବୁନ୍ ମାନି ମାନାୟାର୍ ତର୍ ଲେକାଆତାତ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation