ହତ୍ତି 2 - New Testament in Pengo Parja Languageଏପିସ ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 1 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ଏପିସ ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ନା ତିନି କେଇଦ ସାତ୍ଗଟା ହୁକାଙ୍ଗ୍ ଆସ୍ତାଙ୍ଗ୍ନା। ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ସାତ୍ଗଟା ହନାତାଙ୍ଗ୍ ରସ୍ତି ବଇଟା ଇଟ୍ନି ମାଦି ବୁଲା ଆନାଙ୍ଗା। ଇଦାଙ୍ଗ୍ ନେ ଆନେଙ୍ଗ୍ ୱେଚ୍ଚାନାଙ୍ଗା। 2 ଆନେଙ୍ଗ୍ ମି ୱିଜୁ କାମାୟ୍ତିଙ୍ଗ୍ ପୁଚାଙ୍ଗ୍ନା। ଏପେଙ୍ଗ୍ ଜାଗ୍ରତ୍ ଆଜି ଦୁଃକ୍ କଷ୍ଟ ସମ୍ବାଲି କିଜି ନା କାମାୟ୍ କିନାଦେରା, ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ନାଦେରା। ଆନେଙ୍ଗ୍ ଇଦାଙ୍ଗ୍ ପା ପୁଚାଙ୍ଗ୍ନା ଯେ, ଏପେଙ୍ଗ୍ କରାପ୍ ମାନାୟାର୍ କାମାୟ୍ତିଙ୍ଗ୍ ସମ୍ବାଲି କିଦେଙ୍ଗ୍ ଆଡୁଦେରା। ଇମ୍ଣି ମାନାୟାର୍ ଜାର୍ତିଙ୍ଗ୍ ବାଚିକିତି ଚେଲାଇଞ୍ଜି ୱେଚ୍ନାରା ମାତର୍ ସତ୍ ବାଚିକିତି ଚେଲା ଆକାୟ୍, ହେୱାର୍ ମିଚ୍ ୱେଚ୍ନାରା ଇଞ୍ଜି ଏପେଙ୍ଗ୍ ପୁନି କିନାଦେରା। 3 ଏପେଙ୍ଗ୍ ସାସ୍ ଆଜି ଦୁଃକ୍ କଷ୍ଟ ସମ୍ବାଲି କିନାଦେରା ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ନାଦେରା। 4 ମାତର୍ ଏପେଙ୍ଗ୍ ର ବୁଲ୍ କିନାକା ଆନେଙ୍ଗ୍ ହୁଡ଼୍ନାଙ୍ଗା। ହେଦାଙ୍ଗ୍ ଇଲେକେ ଏପେଙ୍ଗ୍ ପାର୍ତୁମ୍ ନାଙ୍ଗେଙ୍ଗ୍ ପାର୍ତି କିତ୍ତିହିଙ୍ଗ୍ ଇନେସ୍ ନାଙ୍ଗେଙ୍ଗ୍ ଲାଡ୍କିଜି ମାନ୍ଞ୍ଚାଦେର୍, ହେଲେକେ ଲାଡ୍ ଏପେଙ୍ଗ୍ ନଙ୍ଗୟ୍ ନାଙ୍ଗେଙ୍ଗ୍ କିଦୁଦେରା। 5 ଏପେଙ୍ଗ୍ ଏତୁକିୟାଟ୍ ଆଗେ ନାଙ୍ଗେଙ୍ଗ୍ ଇନେସ୍ ଲାଡ୍କିଜି ମାନ୍ଞ୍ଚାଦେର୍, ମାତର୍ ନଙ୍ଗୟ୍ ଏପେଙ୍ଗ୍ ହେଲେକେ ଲାଡ୍ ନାଙ୍ଗେଙ୍ଗ୍ କିଦୁଦେରା। ଲାଗିଙ୍ଗ୍ ଏପେଙ୍ଗ୍ ମି ମାନ୍ତିଙ୍ଗ୍ ବାଦ୍ଲାୟ୍ କିୟାଟ୍ ଆରେ ଆଗେ ଇନେସ୍ ନାଙ୍ଗେଙ୍ଗ୍ ଲାଡ୍କିଜି ମାନ୍ଞ୍ଚାଦେର୍ ହେଲେକେ ନାଙ୍ଗେଙ୍ଗ୍ ଲାଡ୍ କିଦ୍ନାକା ଆରମ୍ କିୟାଟ୍। ଯଦି ଏପେଙ୍ଗ୍ ପାପ୍ କାମାୟ୍ କିନାକା ବନ୍ଦ୍ କିଉଦେର୍ ଲାଗିଙ୍ଗ୍ ଆନେଙ୍ଗ୍ ୱାତିସ୍ ମି ମଣ୍ଡ୍ଲିତାଙ୍ଗ୍ ବଇଟା ଇଟ୍ନାକା ଗୁଚାୟ୍ କିନାଙ୍ଗ୍। 6 ମାତର୍ ଏପେଙ୍ଗ୍ ର ହାର୍ କାମାୟ୍ କିନାଦେରା, ହେଦାଙ୍ଗ୍ ନିକଲାତିୟ ନିକାର୍ ଇମ୍ଣି ୱିଜୁ କାମାୟ୍ ଆନେଙ୍ଗ୍ ଗିଣ୍ କିନାଙ୍ଗା, ଏପେଙ୍ଗ୍ ପା ହେ ୱିଜୁ କାମାୟ୍ତିଙ୍ଗ୍ ଗିଣ୍ କିନାଦେରା। 7 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। ଇମ୍ଣି ମାନାୟାର୍ କରାପ୍ କାମାୟ୍ କିଉର୍ ଆରେ ଈଶ୍ୱର କାଜିଙ୍ଗ୍ ଦରମ୍ଆଜି ମାନାର୍, ଆନେଙ୍ଗ୍ ହେୱାରିଙ୍ଗ୍ ଜିବୁନ୍ହିନି ମାର୍ତି ପାଡ଼୍ ଚିଞ୍ଜେଙ୍ଗ୍ ହିନାଙ୍ଗ୍, ହେଦାଙ୍ଗ୍ ଈଶ୍ୱର ବଗିଚା ସରଗ୍ତାକେ ଗାଜା ଆନାତା।” ସ୍ମର୍ଣ୍ଣା ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 8 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ସ୍ମର୍ଣ୍ଣା ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ୱିଜୁ ଜିନିଷ୍ତିଙ୍ଗ୍ ଆରମ୍ କିତାଙ୍ଗ୍ନା। ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ୱିଜୁ ଜିନିଷ୍ତିଙ୍ଗ୍ ସେସ୍ କିଦେଙ୍ଗ୍ ଆଡ୍ନାଙ୍ଗ୍। ଆନେଙ୍ଗ୍ ରଗ ହାଃଜି ମାଚାଙ୍ଗ୍, ମାତର୍ ନଙ୍ଗୟ୍ ଆନେଙ୍ଗ୍ ଜିବୁନ୍ ମାନାଙ୍ଗ୍ ଆରେ ଆନେଙ୍ଗ୍ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନ୍ଗାନାଙ୍ଗ୍।” 9 “ଆନେଙ୍ଗ୍ ପୁଚାଙ୍ଗ୍ନା ଯେ, ମାନାୟାର୍ ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାରା ଆରେ ଏପେଙ୍ଗ୍ ଗରିବ୍। ମାତର୍ ଏପେଙ୍ଗ୍ ଗରବ୍ତାକେ ହାଉକାର୍। ଆନେଙ୍ଗ୍ ପୁଚାଙ୍ଗ୍ନା ଯେ, ଇମ୍ଣି ଯିହୁଦି ଜାତିନି ମାନାୟାର୍ ଜାର୍ତିଙ୍ଗ୍ ଈଶ୍ୱର ବାଚି କିତ୍ତି ମାନାୟ୍ ଇଞ୍ଜି ଚଞ୍ଜିଆ ଆନାରା, ମାତର୍ ହେୱାର୍ ଆକାୟ୍। ହେୱାର୍ ମି ବିରଦ୍ତାକେ କରାପ୍ କାତା ଇନାରା, ଇନେସ୍କି ହେୱାର୍ ଶୟତାନ ଦଳ୍ନି ମାନାୟାର୍। 10 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଦୁଃକ୍ କଷ୍ଟ ପାୟାଆନାପା ଇଞ୍ଜି ପାଣ୍ଡ୍ରା ଆମାଟ୍। ମି ବିତ୍ରେତାଙ୍ଗ୍ କେତ୍ଜାଣ୍ତିଙ୍ଗ୍ ଶୟତାନ୍ ବନ୍ଦିକିଜି ଜଇଲ୍ ଇଞ୍ଜ ଇଡ଼୍ଦାନାତ୍ ଆରେ ମିଙ୍ଗେଙ୍ଗ୍ ପରିକ୍ଷା କିଦ୍ନାତ୍। ଏପେଙ୍ଗ୍ ଦଶ୍ଦିନ୍ ପାତେକ୍ ବେସି ଦୁଃକ୍ କଷ୍ଟ ପାୟାଆନାଦେର୍। ମାତର୍ ଯଦି ହେୱାନ୍ ମିଙ୍ଗେଙ୍ଗ୍ ମାର୍ନେ ଅସ୍ତିତିସ୍ ପା ନାଙ୍ଗେଙ୍ଗ୍ ପାର୍ତି କିଦ୍ନାକା ବନ୍ଦ୍ କିମାଟ୍, ଇନେସ୍କି ଏପେଙ୍ଗ୍ ଜିତାଆତି କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱିଜୁଦିନ୍ ମାନି ଜିବୁନ୍ ପୁରଷ୍କାର୍ ହିଦ୍ନାଙ୍ଗ୍।” 11 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, “ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। ଇମ୍ଣି ମାନାୟାର୍ କରାପ୍ କାମାୟ୍ କିଉର୍ ଆରେ ଖ୍ରୀଷ୍ଟ କାଜିଙ୍ଗ୍ ଦରମ୍ଆଜି ମାନାର୍। ହେୱାରିଙ୍ଗ୍ ଈଶ୍ୱର ସେସ୍ ବିଚାର୍କିନି ନାଞ୍ଜିଙ୍ଗ୍ ଦୁଇ ନମ୍ବର୍ ମାରାଣ୍ ଦଣ୍ଡ୍ ହିଉନ୍।” ପର୍ଗମ ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 12 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ପର୍ଗମ ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ତାକେ ରିକଣ୍ଡାଙ୍ଗ୍ ଦାରା ମାନି କାଣ୍ଡା ମାନାତ୍।” 13 ଆନେଙ୍ଗ୍ ପୁଚାଙ୍ଗ୍ନା ଯେ, ଶୟତାନ ମି ସହର୍ତିଙ୍ଗ୍ କଣ୍ଟ୍ରୁଲ୍ କିନାତା, ମାତର୍ ଆନ୍ତିପାଙ୍ଗ୍ ବେସି ଆଗେ ମାର୍ନେ ଅସ୍ତି ମାଚାର୍। ହେୱାନ୍ ପା ମି ଲେକେ ନାଙ୍ଗେଙ୍ଗ୍ ପାର୍ତି କିଦ୍ନାକା ବନ୍ଦ୍ କିୱାତାନ୍ନା ଆରେ ଆନେଙ୍ଗ୍ ହିକାୟ୍ କିତ୍ତି ହିକ୍ଷାତିଙ୍ଗ୍ ବାଣା ଆୱାତାଦେର୍ନା। ହେୱାନ୍ ଦରମ୍ଆଜି ମି ସହର୍ତାକେ ନା ହାର୍ଦିକାବୁର୍ ଶୁଣାୟ୍ କିତି କାଜିଙ୍ଗ୍ ତାଙ୍ଗେଙ୍ଗ୍ ମାର୍ନେ ଅସ୍ତାର୍ ଇନେସ୍କି ମି ସହର୍ତିଙ୍ଗ୍ ଶୟତାନ କଣ୍ଟ୍ରୁଲ୍ କିନାତା। 14 ମାତର୍ ଏପେଙ୍ଗ୍ କେତ୍ଗଟା ବୁଲ୍ କାମାୟ୍ କିନାକା ଆନେଙ୍ଗ୍ ହୁଡ଼୍ନାଙ୍ଗା। ଏପେଙ୍ଗ୍ ଆଗେ ହିକାୟ୍ କିଜି ମାନ୍ଞ୍ଚି ବିଲିୟମ ଭବିଷ୍ଯତବକ୍ତା ଲେକେ ମିଚ୍ ହିକ୍ଷାହିନି ମାନାୟାରିଙ୍ଗ୍ ମି ମଣ୍ଡ୍ଲିତାକେ ବିରଦ୍ କିଉଦେରା। ହେୱାନ୍ ଇସ୍ରାଏଲନି ମାନାୟାରିଙ୍ଗ୍ ପାପ୍ କାମାୟ୍ କି କିନି କାଜିଙ୍ଗ୍, ହେୱାରିଙ୍ଗ୍ ମୁର୍ତିତିଙ୍ଗ୍ ପୁଜାକିତି କାଦି ଚିଞ୍ଜେଙ୍ଗ୍ ଆରେ ଦାରି କାମାୟ୍ କିଦେଙ୍ଗ୍ ରାଜା ବାଲାକତିଙ୍ଗ୍ ହିକାୟ୍ କିଜି ମାଚାନ୍। 15 ହେଲେକେ ମି ବିତ୍ରେ କେତେକ୍ ନିକଲାତିୟ ମାନାୟାର୍ ମାନାର୍, ହେୱାର୍ ହେ ହିକ୍ଷାତିଙ୍ଗ୍ ମାନି କିନାରା ଆରେ ହେଲେକେ ପାପ୍ କାମାୟ୍ କିନାରା। 16 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଜି ଈଶ୍ୱରତାକେ ୱାଡ, ଯଦି ଏପେଙ୍ଗ୍ ହେଲେଗ୍ଦି କରାପ୍ କାମାୟ୍ କିନାକା ବନ୍ଦ୍ କିଉଦେର୍। ଲାଗିଙ୍ଗ୍ ଆନେଙ୍ଗ୍ ବେଗି ୱାନାଙ୍ଗ୍ ଆରେ ହେଲେକେ ମିଚ୍ ହିକ୍ଷାହିନି ମାନାୟାର୍ ବିରଦ୍ତାକେ ନା କାତାହୁଦାଙ୍ଗ୍ ଯୁଜ୍ କିନାଙ୍ଗ୍। ହେ ନା କାତା ରିକଣ୍ଡା ଦାରା ମାନି କାଣ୍ଡା ଲେକେ। 17 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା। ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। ଇମ୍ଣି ମାନାୟାର୍ କରାପ୍ କାମାୟ୍ କିଉର୍ ଆରେ ଖ୍ରୀଷ୍ଟ କାଜିଙ୍ଗ୍ ଦରମ୍ଆଜି ମାନାର୍। ଆନେଙ୍ଗ୍ ହେୱାରିଙ୍ଗ୍ ଚିଞ୍ଜେଙ୍ଗ୍ ସରଗ୍ନି କେତେକ୍ ମାନ୍ନା ତର୍ଦି କାଦି ହିନାଙ୍ଗ୍, ହେଦାଙ୍ଗ୍ ଡ଼ୁକ୍ଚି ଇଡ଼୍ତାନ୍ନା ଆରେ ପା ଆନେଙ୍ଗ୍ ହେୱାରିଙ୍ଗ୍ ଡ଼ିଞ୍ଜ୍ନି କାଲ୍ ହିନାଙ୍ଗ୍ ଇମେତାକେ ହେୱାର୍ ପୁନି ତର୍ ଲେକାଆତାତ୍ନା। ଇନେର୍ ପା ହେ ତର୍ତିଙ୍ଗ୍ ବୁଜା ଆଦେଙ୍ଗ୍ ଆଡୁର୍, ମାତର୍ ଇନେର୍ ହେ ତର୍ ପାୟାଆତାର୍ନା ହେୱାର୍ ନେ ବୁଜା ଆନାର୍। ଥୁୟତୀରା ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 18 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ଥୁୟତିରା ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ, ଆନେଙ୍ଗ୍ ଈଶ୍ୱର ମେହିତଙ୍ଗ୍ ଇ ୱିଜୁ ବିଷୟ ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାନାଙ୍ଗା। ଇନେର୍ କାଣ୍କୁ ନାଣି ଲେକେ ଚମ୍କା ଆଜିମାଚାତ୍, ଆରେ ଜାର୍ କାଲ୍ପାନା ନାଣିତାକେ ଦେସ୍ତି ପିତାଡ଼୍ ଲେକେ ଚମ୍କା ଆଜି ମାଚାତ୍।” 19 ଏପେଙ୍ଗ୍ କିତି କାମାୟ୍ ୱିଜୁ ଆନେଙ୍ଗ୍ ପୁଚାଙ୍ଗ୍ନା, ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାଦେରା, ଆରେ ନାଙ୍ଗେଙ୍ଗ୍ ବେସି ପାର୍ତି କିଦ୍ନାଦେରା। ଆନେଙ୍ଗ୍ ପୁଚାଙ୍ଗ୍ନା ଯେ, ଏପେଙ୍ଗ୍ ଜାର୍-ଜାର୍ବିତ୍ରେ ସାଇଜ କିନାଦେରା ଆରେ ମିଙ୍ଗେଙ୍ଗ୍ ସମ୍ବାଲି କିନି ଶାକ୍ତି ମାନାତ୍। ଆନେଙ୍ଗ୍ ପୁଚାଙ୍ଗ୍ନା ଯେ, ଏପେଙ୍ଗ୍ ପାର୍ତୁମ୍ ନାଙ୍ଗେଙ୍ଗ୍ ପାର୍ତି କିତ୍ତିହିଙ୍ଗ୍ ଇମ୍ଣି ୱିଜୁ କାମାୟ୍ କିଜି ମାଚାଦେର୍ ହେ କାମାୟ୍ତାଙ୍ଗ୍ ନଙ୍ଗୟ୍ ଏପେଙ୍ଗ୍ ଆଦିକ୍ ହାର୍ କାମାୟ୍ କିନାଦେରା। 20 ମାତର୍ ଏପେଙ୍ଗ୍ ର ବୁଲ୍ କାମାୟ୍ କିନାକା ଆନେଙ୍ଗ୍ ହୁଡ଼୍ନାଙ୍ଗା। ଏପେଙ୍ଗ୍ ଯିଜେବଲ ତର୍ଦି କଗ୍ଲେ ମିଚ୍ ହିକ୍ଷାତିଙ୍ଗ୍ ଆହ୍ନାଦେରା ହେଦେଲ୍ ଜାର୍ତିଙ୍ଗ୍ ଭବିଷ୍ଯତବକ୍ତା ଇଞ୍ଜି ୱେଚ୍ନାତା। ମାତର୍ ନା ଲକ୍ବାକ୍ ମୁର୍ତିକାଙ୍ଗ୍ ହିତି କାଦି କିନାକା, ମୁର୍ତିକାଙ୍ଗ୍ ପୁଜା କିନାକା ଆରେ ଦାରି କାମାୟ୍ କିନି ପାପ୍ କାମାୟ୍ କିନାକା ହିକାୟ୍ କିନାତା। 21 ଆନେଙ୍ଗ୍ ହେ କଗ୍ଲେଙ୍ଗ୍ ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଜି ଈଶ୍ୱରତାକେ ୱାଦେଙ୍ଗ୍ ସୁଯଗ୍ ହିତାଙ୍ଗ୍ନା, ମାତର୍ ହେଦେଲ୍ ହେଲେଗ୍ଦି କରାପ୍ କାମାୟ୍ କିନାକା ବନ୍ଦ୍ କିନି କାଜିଙ୍ଗ୍ ମୁନା କିନାତା। 22 ଲାଗିଙ୍ଗ୍ ହେ କଗ୍ଲେଙ୍ଗ୍ ଆନେଙ୍ଗ୍ ରଗ୍ ହିନାଙ୍ଗ୍, ଆରେ ତା ହୁଦାଙ୍ଗ୍ ମାହାଆଜି ଦାରି କାମାୟ୍ କିନି ମାନାୟାରିଙ୍ଗ୍ ବେସି ଦୁଃକ୍ କଷ୍ଟ ହିନାଙ୍ଗ୍, ଇମ୍ଣି ପାତେକ୍ ହେୱାର୍ ହେ କଗ୍ଲେ ହୁଦାଙ୍ଗ୍ ଦାରି କାମାୟ୍ କିନାକା ବନ୍ଦ୍ କିଉର୍। 23 ଆନେଙ୍ଗ୍ ତା ହିକ୍ଷାତିଙ୍ଗ୍ ମାନି କିନାକାରିଙ୍ଗ୍ ମାର୍ନେ ଅହ୍ନାଙ୍ଗ୍, ଲାଗିଙ୍ଗ୍ ୱିଜୁ ମଣ୍ଡ୍ଲିନି ମାନାୟାର୍ ପୁନାର୍ ଯେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ ୱିଜାର୍ ମାନ୍ତି ବାବ୍ନାତିଙ୍ଗ୍ ଆରେ ଚିନ୍ତାତିଙ୍ଗ୍ ପୁନି ମାନାୟ୍। ଆରେ ଆନେଙ୍ଗ୍ ମି ଜାର୍-ଜାର୍ କାମାୟ୍ ଅନୁସାରେ ମିଙ୍ଗେଙ୍ଗ୍ ପୁରଷ୍କାର୍ ହିଦ୍ନାଙ୍ଗ୍। 24 ମାତର୍ ଥୁୟତିରା ସହର୍ତାକେ ମାନି ବାକି ଲକାର୍ କାଜିଙ୍ଗ୍ ପା ଆନେଙ୍ଗ୍ ର କାତା ୱେଚ୍ଚାନାଙ୍ଗା, ହେୱାର୍ ହେ ମିଚ୍ ହିକ୍ଷାତିଙ୍ଗ୍ ମାନି କିଉରା। ହେ କଗ୍ଲେ ଚେଲାହିର୍ ଇଦାଙ୍ଗ୍ ନେ ମୁକ୍ୟ ଜିନିଷ୍ ଇଞ୍ଜି ୱେଚ୍ଚାନାରା ଇମ୍ଣାକା ଶୟତାନତାଙ୍ଗ୍ ୱାତାତ୍ନା। ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଯେ, ଆନେଙ୍ଗ୍ ୱାନି ପାତେକ୍ ଏପେଙ୍ଗ୍ ନାଙ୍ଗେଙ୍ଗ୍ ଆଦିକ୍ ପାର୍ତିକିଜି ମାନି ଆଦେସ୍ ପିସ୍ତି ଆରେ ଜେକନି ମୁକ୍ୟ ଆଦେସ୍ ହିଦୁଙ୍ଗା। 25 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱାନି ପାତେକ୍ ଏପେଙ୍ଗ୍ ନାଙ୍ଗେଙ୍ଗ୍ ଆଦିକ୍ତାଙ୍ଗ୍ ଆଦିକ୍ ପାର୍ତି କିଜି ମାନାଟ୍। 26 ଇମ୍ଣି ମାନାୟାର୍ କରାପ୍ କାମାୟ୍ କିଉର୍ ଆରେ ନା କାଜିଙ୍ଗ୍ ସେସ୍ ପାତେକ୍ ଦରମ୍ଆଜି ମାନାର୍, ଆନେଙ୍ଗ୍ ହେୱାରିଙ୍ଗ୍ ୱିଜୁ ଜାତିନି ମାନାୟାରିଙ୍ଗ୍ ସାସନ୍ କିଦେଙ୍ଗ୍ ଅଦିକାର୍ ହିନାଙ୍ଗ୍। 27 ଆନେଙ୍ଗ୍ ହେୱାରିଙ୍ଗ୍ ନା ଲେକେ ସାସନ୍ କିନି ଅଦିକାର୍ ହିନାଙ୍ଗ୍, ଇମ୍ଣାକା ଆନେଙ୍ଗ୍ ନା ଆବାତାଙ୍ଗ୍ ପାୟାଆତାଙ୍ଗ୍ନା। ଡ୍ରିଙ୍ଗ୍ୱି ଲୱାଲେକେ ହେୱାର୍ ସାସନ୍ କିନାର୍ ଆରେ ହେୱାର୍ ଚିକ୍ଲା ଟାଣ୍ଡିତିଙ୍ଗ୍ ଡ୍ରିକ୍ତିଲେକେ ତା ଶତୃରିଙ୍ଗ୍ ବିନାସ୍ କିନାର୍। ହେୱାର୍ ସାସନ୍ କିନିହିଙ୍ଗ୍ ଦୟା କିଉର୍, ଆରେ ହେୱାର୍ ଚିକ୍ଲା ଟାଣ୍ଡିତିଙ୍ଗ୍ ଗୁଣ୍ଡ୍ଗୁଣ୍ଡା କିତିଲେକେ ହେୱାରିଙ୍ଗ୍ ଗୁଣ୍ଡ୍ଗୁଣ୍ଡା କିନାର୍। 28 ଆନେଙ୍ଗ୍ ପା ହେୱାରିଙ୍ଗ୍ ଚଚ୍ନି କାଜିଙ୍ଗ୍ ନାଣାଙ୍ଗେନି ଅଜଡ଼୍ ହୁକା ହିନାଙ୍ଗ୍, ଇନେସ୍କି ହେୱାର୍ ଶୟତାନତାଙ୍ଗ୍ ଜିତା ଆତାର୍ନା। 29 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation