ହତ୍ତି 19 - New Testament in Pengo Parja Languageବେସିହେନି ମାନାୟାର୍ ସରଗ୍ତାକେ ୱାରି କିତାର୍ 1 ତାପାଚେ ବେସିହେନି ମାନାୟାର୍ ସରଗ୍ତାକେ ଗାଜାକାଟ୍ କିଜି ୱେଚ୍ନାକା ୱେଚାଙ୍ଗ୍, ହେୱାର୍ ୱେଚ୍ଚି ମାଚାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିୟାଟ୍। ଇନେସ୍କି ଈଶ୍ୱର ଉଦାର୍ କିଦ୍ନାନ୍, ହେୱାନ୍ ଗୌରବ ପାୟାଆନି ଜଗ୍ୟ ଆରେ ହେୱାନ୍ ୱିଜୁତାଙ୍ଗ୍ ଶାକ୍ତି କାଟାକାନ୍। 2 ଇନେସ୍କି ହେୱାନ୍ ସତ୍ ବିଚାର୍ କିନାନ୍ ହେୱାନ୍ ଗାଜା ଦାରି କାମାୟ୍ କିନି କଗ୍ଲେଙ୍ଗ୍ ମାର୍ନେ ଅସ୍ତାର୍, ଇନେସ୍କି ପୁର୍ତିନି ୱିଜାର୍ ମାନାୟାରିଙ୍ଗ୍ ପାପ୍ କାମାୟ୍ କିଜି ମାଚାର୍। ହେ ସହର୍ନି ମାନାୟାର୍ ଈଶ୍ୱରନି ମାନାୟାରିଙ୍ଗ୍ ପା ହେ ସହର୍ତିଙ୍ଗ୍ ବିନାସ୍ କିତାନ୍। ହେଦାଙ୍ଗ୍ କାଜିଙ୍ଗ୍ ହେ ସହର୍ନି ମାନାୟାରିଙ୍ଗ୍ ପା ଈଶ୍ୱର ବିନାସ୍ କିତାନ୍। 3 ହେୱାର୍ ବାରମ୍-ବାରମ୍ ହେ କେର୍କଣ୍ କେର୍ଜି ମାଚାର୍, “ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍, ନାଣିତାକେ କାଡ଼୍ଜି ମାଚି ବାବିଲନ୍ ସହର୍ନି ଦୁଆଁ ସରଗ୍ତାକେ ୱାନାକା ଇନାୱେଡ଼ାଙ୍ଗ୍ ପା ବନ୍ଦ୍ ଆମେତ୍।” 4 ତାପାଚେ ଚବିଶ୍ ଜାଣ୍ ପ୍ରାଚିନ୍ ଆରେ ଚାରିଗଟା ଜିବୁନ୍ ମାନି ପଶୁ ସିଙ୍ଗାସନ୍ତାକେ କୁଚ୍ଚି ଈଶ୍ୱରତିଙ୍ଗ୍ ଜୱାର୍କିଜି ୱେଚ୍ଚାର୍ “ଆମେନ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିୟାଟ୍।” 5 ତାପାଚେ ସିଙ୍ଗାସନତାଙ୍ଗ୍ ର ମାନାୟ୍ ଇଲେକେ ୱେଚ୍ଚି ମାଚାନ୍, “ତାଙ୍ଗେଙ୍ଗ୍ ସନ୍ମାନ୍ ହିନି ମାନାୟାର୍ ଗାଜା ହିରୁକାର୍ ପାତେକ୍ ଆରେ ତାଙ୍ଗେଙ୍ଗ୍ ହେବା କିନାକାରିଙ୍ଗ୍ ମା ଈଶ୍ୱରତିଙ୍ଗ୍ ଜୟ୍-ଜୟ୍ କିୟାଟ୍।” 6 ତାପାଚେ ର ଗାଜା ଦଳ୍ନି ମାନାୟାର୍ ଆଲା ଆନିଲେକେ ସବଦ୍ ଆନେଙ୍ଗ୍ ୱେଚାଙ୍ଗ୍, ହେ ସବଦ୍ ର ଗାଜା ଜାରାଣ୍ ଏଜୁଙ୍ଗ୍ ସବଦ୍ ଲେକେ ମାଚାତ୍, ଆରେ ବାଦାଡ଼୍ ଗାର୍ଜାଆନିଲେକେ ସବଦ୍ ମାଚାତ୍। ହେୱାର୍ ୱେଚ୍ଚି ମାଚାର୍, “ୱାଡ ଆସେଙ୍ଗ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିନାସ୍, ଇନେସ୍କି ୱିଜୁ ଶାକ୍ତିମାନି ଈଶ୍ୱର ନେ ରାଜା।” 7 ୱାଡ ଆସେଙ୍ଗ୍ ୱାରିୟା ଆନାସ୍, “ୱାରି କିନାସ୍ ଆରେ ତାଙ୍ଗେଙ୍ଗ୍ ସନମାନ୍ କିନାସ୍, ଇନେସ୍କି ମେଣ୍ଢା ଇନେର୍କି ଯୀଶୁ ବିବାଆନି ଦିନ୍ ଇକାୱାତାତେ ଆରେ ତା ଡକୃହି ରେଡି ଆତାତ୍ନା। 8 ତାଙ୍ଗେଙ୍ଗ୍ ଉସ୍ପେଦେଙ୍ଗ୍ ଈଶ୍ୱର ସପା ଆରେ ଡ଼ିଞ୍ଜ୍ନି ହେନ୍ଦ୍ରା ହିତାନ୍ନା।” ହେ ଡ଼ିଞ୍ଜ୍ନି ହେନ୍ଦ୍ରାନି ଅର୍ତ ତା ମାନାୟାର୍ ହାର୍ କାମାୟ୍। 9 ତାପାଚେ ହେ ଦୁତ୍ ନାଙ୍ଗେଙ୍ଗ୍ ଇ ୱିଜୁ ବିଷୟ ଲେକିକିଦେଙ୍ଗ୍ ୱେଚ୍ଚାତାତ୍, “ଇ ୱିଜୁ ମାନାୟାର୍ ଇମ୍ଣି ମାନାୟାରିଙ୍ଗ୍ ମେଣ୍ଢାଗଡ଼ିଆ ବିବା ବଜି ଚିଞ୍ଜେଙ୍ଗ୍ ଈଶ୍ୱର ହିର୍ବାତାନ୍ନା। ହେୱାରିଙ୍ଗ୍ ହେୱାନ୍ ଆଶ୍ରିବାଦ୍ କିତାନ୍ନା, ଇ ୱିଜୁ ସତ୍ କାତା ଆରେ ଇଦାଙ୍ଗ୍ ଈଶ୍ୱର ୱେଚ୍ନାନା।” 10 ତାପାଚେ ଆନେଙ୍ଗ୍ ହେ ଦୁତ୍ କାଲ୍ପାନାତାକେ ମୁଣ୍ଡିଆ ଇଡ଼୍ଜି ପୁଜା କିତାଙ୍ଗ୍, ମାତର୍ ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାତ୍, “ଆକାୟ୍ ନାଙ୍ଗେଙ୍ଗ୍ ମୁଣ୍ଡିଆ ଇଡ଼୍ଦାମା। ଇନେସ୍କି ଆନେଙ୍ଗ୍ ପା ନିଲେକେ ଆରେ ଜେକନି ଟଣ୍ଡାର୍ଲେକେ ଈଶ୍ୱର ଦାସ୍ ଇମ୍ଣି ମାନାୟାର୍ ଯୀଶୁଙ୍ଗ୍ ପାର୍ତିକିନାରା ଇଞ୍ଜି ପୁନାରା ଲାଗିଙ୍ଗ୍ ଏନେଙ୍ଗ୍ ଈଶ୍ୱରତିଙ୍ଗ୍ ପୁଜାକିୟା। ଇନେସ୍କି ପବିତ୍ର ଆତ୍ମା ହେ ମାନାୟ୍ ଇନେର୍ ମାନାୟାରିଙ୍ଗ୍ ଯୀଶୁ ଖ୍ରୀଷ୍ଟ ସତ୍ ବିଷୟ ଶୁଣାୟ୍ କିଦେଙ୍ଗ୍ ସାଇଜ କିନାତା।” 11 ତାପାଚେ ସରଗ୍ତାକେ ମାନି କାପାଟ୍ ଜେୟା ଆତାକା ଆନେଙ୍ଗ୍ ହୁଡ଼୍ତାଙ୍ଗ୍, ହେବେ ରଞ୍ଜାଙ୍ଗ୍ ଡ଼ିଞ୍ଜ୍ନି ଗଡ଼ା ନିଲ୍ଚି ମାଚାତ୍। ଆରେ ହେ ଗଡ଼ା ଜପି କୁଚ୍ଚି ମାଚି ମାନାୟ୍ ତର୍ ଦରମ୍ ଆରେ ସତ୍ ମାଚାତ୍। ଇନେସ୍କି ହେୱାନ୍ ତା ଶାତ୍ରୁରିଙ୍ଗ୍ ଟିକ୍ ବିଚାର୍ କିନାନ୍ ଆରେ ପାଚେ ହେୱାର୍ ହୁଦାଙ୍ଗ୍ ଯୁଜ୍ କିଦେଙ୍ଗ୍ ହାନାନ୍। 12 ତା କାଣ୍କୁ ନାଣି ଲେକେ ଅଜଡ଼୍, ଆରେ ତା କାପ୍ଡ଼ାତ ବେସି ମୁକୁଟିଙ୍ଗ୍ ମାଚିକ୍। ତା ଜପି ରଞ୍ଜି ତର୍ ଲେକାଆଜି ମାଚାତ୍, ଆରେ ହେ ତର୍ ଅର୍ତ ହେୱାନ୍ ନେ ପୁନ୍ଞ୍ଜି ମାଚାନ୍। 13 ତା ହେନ୍ଦ୍ରା ନେତେର୍ତାକେ ମୁଚ୍ଚି ହେନ୍ଦ୍ରା ଲେକେ ମାଚାତ୍, ଆରେ ତା ତର୍ ଈଶ୍ୱରତି କାତା ମାଚାତ୍। 14 ସରଗ୍ତାକେ ମାନି ବେସିହେନି ସେନାର୍ ସପା ଡ଼ିଞ୍ଜ୍ନି ହେନ୍ଦ୍ରା ଉସ୍ପି ଡ଼ିଞ୍ଜ୍ନି ଗଡ଼ା ଜପି କୁଚ୍ଚି ତାପାଚେ ହାଲ୍ଜି ମାଚାର୍। 15 ତା ୱେଇଦାଙ୍ଗ୍ ବେସି ଦାରା ମାନି କାଣ୍ଡା ହସିମାଚାତ୍, ଆରେ ହେ କାଣ୍ଡା ସାଇଜତାଙ୍ଗ୍ ପୁର୍ତିନି ୱିଜୁ ଜାତିନି ମାନାୟାର୍ ହୁଦାଙ୍ଗ୍ ଯୁଜ୍ କିଜି ଆରାୟ୍ କିତାନ୍। ହେୱାନ୍ ହେୱାରିଙ୍ଗ୍ ଲୱା ବେଡ୍ଗା ହୁଦାଙ୍ଗ୍ ସାସନ୍ କିନାନ୍। ହେ ୱିଜୁ ଶାକ୍ତିମାନି ଈଶ୍ୱର ତା ଶାତ୍ରୁରିଙ୍ଗ୍ ଅଙ୍ଗୁର୍ କୁଣ୍ଡ୍ତାକେ ଅଙ୍ଗୁର୍ ରାସ୍ତିଙ୍ଗ୍ ଉସ୍ତିଲେକେ ହେୱାରିଙ୍ଗ୍ ପା ଦଣ୍ଡ୍ ହିନାନ୍। 16 ତା ହେନ୍ଦ୍ରାତାକେ ଆରେ ତା କୁଟାତ ରାଜା ବିତ୍ରେ ରାଜା ଆରେ ମାପୃ ବିତ୍ରେ ମାପୃ ଇଞ୍ଜି ଲେକାଆଜି ମାଚାତ୍। 17 ତାପାଚେ ଆରେ ରଞ୍ଜି ସରଗ୍ନି ଦୁତ୍ ୱେଡ଼ାତାକେ ନିଲ୍ଚି ଗାଜାକାଟ୍ କିଜି ବାଦାଡ଼୍ତାକେ ଉମ୍ନି ପଟିକାଙ୍ଗ୍ ୱେଚ୍ଚି ମାଚାତ୍, “ୱାଡ, ଈଶ୍ୱର ରେଡି କିତି ଗାଜା ବଜିତାକେ ଚିଞ୍ଜେଙ୍ଗ୍ ୱିଜାଦେର୍ ରବେ ରୁଣ୍ଡା ଆଡ।” 18 ହେବେ ରାଜାର୍ତି, ହେୱାର୍ ନେତାର୍, ବେସି ଶାକ୍ତିମାନି ସେନାର୍ତି, ଗଡ଼ାତିଙ୍ଗ୍, ଆରେ ଗଡ଼ାଙ୍ଗ୍ ଚାଲାଇ କିନାକାର୍, ହାଃତି ଗାଗାଡ଼୍ନି ଜାଇତିଙ୍ଗ୍ ୱାଜି ତିନାଟ୍। ଏପେଙ୍ଗ୍ ହେବେ ୱିଜୁ ମାନାୟାର୍ ହାଃତି ଗାଗାଡ଼୍ନି ଜାଇ, ଚାକର୍ ଆତି ମାନାୟାର୍ ଜାଇ କି ଚାକର୍ ଆୱିତି ମାନାୟାର୍ ଜାଇ, ଗାଜା କି ହିରୁ ୱିଜୁ ମାନାୟାର୍ ହାଃତି ଗାଗାଡ଼୍ନି ଜାଇତିଙ୍ଗ୍ ଚିଞ୍ଜେଙ୍ଗ୍ ଆଡ୍ନାଦେର୍। 19 ତାପାଚେ ହେ ପଶୁତିଙ୍ଗ୍ ହାମ୍ଦୁର୍ତାଙ୍ଗ୍ ହସି ୱାନାକା ଆନେଙ୍ଗ୍ ହୁଡ଼୍ତାଙ୍ଗ୍। ଆରେ ହେ ପଶୁ ଡ଼ିଞ୍ଜ୍ନି ଗଡ଼ା ଜପି କୁଚ୍ଚି ମାନାୟ୍ ବିରଦ୍ତାକେ ଆରେ ତା ସେନାର୍ ବିରଦ୍ତାକେ ଯୁଜ୍ କିନି କାଜିଙ୍ଗ୍ ପୁର୍ତିନି ୱିଜୁ ରାଜାରିଙ୍ଗ୍ ଆରେ ରାଜାର୍ ସେନାରିଙ୍ଗ୍ ରବେ ରୁଣ୍ଡାୟ୍ କିତାତ୍। 20 ହେ ଯୁଜ୍ତାକେ ପାର୍ତୁମ୍ ପଶୁ ଆରେ ହେ ଦୁଇ ନମ୍ବର୍ ପଶୁ, ଇନେର୍କି ମିଚ୍ ଭବିଷ୍ଯତବକ୍ତା। ଇନେର୍ ପାର୍ତୁମ୍ ପଶୁ ବାଦୁଲ୍ରେ ଚାନିଆ କାମାୟ୍ କିଜି ହେ ପଶୁ ଚିନ୍ ଅତି ମାନାୟାରିଙ୍ଗ୍ ଟକାୟ୍ କିଜି ମାଚାନ୍, ଆରେ ଇନେର୍ ତା ମୁର୍ତିତିଙ୍ଗ୍ ପୁଜାକିଜି ମାଚି ମାନାୟାରିଙ୍ଗ୍ ବନ୍ଦିକିତାର୍। ଆରେ ଇମ୍ଣି ମାନାୟାର୍ ହେ ପଶୁ ଚିନ୍ ଅତାକାର୍ ଆରେ ତା ୱିଜୁ ମିଚ୍ ୱେଚ୍ନି ଭବିଷ୍ଯତବକ୍ତାରିଙ୍ଗ୍ ଜିବୁନ୍-ଜିବୁନ୍ ବାସ୍ନା ମାନି ନାଣି କୁଣ୍ଡ୍ତାକେ ପକାୟ୍ କିତାର୍। 21 ଆରେ ହେ ପଶୁ ୱିଜୁ ସେନାରିଙ୍ଗ୍ ଡ଼ିଞ୍ଜ୍ନି ଗଡ଼ା ଜପି କୁଚ୍ଚି ମାଚି ମାନାୟ୍ ତା ୱେଇଦାଙ୍ଗ୍ ହସିମାଚି ଦାରା କାଣ୍ଡା ହୁଦାଙ୍ଗ୍ ମାର୍ନେ ଅସ୍ତାନ୍। ଆରେ ବାଦାଡ଼୍ତାକେ ଉମ୍ନି ୱିଜୁ ପଟିଙ୍ଗ୍ ୱାଜି ହେୱାର୍ ହାଃତି ଗାଗାଡ଼୍ତିଙ୍ଗ୍ ପଟ ବାର୍ତି ଆନି ପାତେକ୍ ଚିଚିକ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation