ହତ୍ତି 18 - New Testament in Pengo Parja Languageବାବିଲନ୍ ସହର୍ ବିନାସ୍ଆତି ବିଷୟ 1 ତାପାଚେ ଆରେ ର ଦୁତ୍ ସରଗ୍ତାଙ୍ଗ୍ ଜୁଜି ୱାନାକା ଆନେଙ୍ଗ୍ ହୁଡ଼୍ତାଙ୍ଗ୍, ହେ ଦୁତ୍ ବେସି ଗୌରବମାନି କାଜିଙ୍ଗ୍ ତାବେ ଗାଜା ଆଦିକାର୍ ମାଚାତ୍ ଆରେ ହେ ଦୁତ୍ ପୁର୍ତିତାକେ ୱାତି କାଜିଙ୍ଗ୍ ପୁର୍ତିତିଙ୍ଗ୍ ଅଜଡ଼୍ କିତାତ୍। 2-3 ହେ ଦୁତ୍ ଗାଜାକାଟ୍ କିଜି ୱେଚ୍ଚାତ୍, ବାବିଲନ୍ ସହର୍ ବିନାସ୍ ଆତାତ୍-ଗାଜା ବାବିଲନ୍ ସହର୍ ବିନାସ୍ ଆତାତ୍, ହେଦାଙ୍ଗ୍ ବୁତ୍ଆତ୍ମାଙ୍ଗ୍ ମାନି ବାହାଲେକେ ମାଚାତ୍। ଇନେସ୍କି ଇ ବାବିଲନ୍ ସହର୍ ୱିଜୁ ଜାତିନି ମାନାୟାରିଙ୍ଗ୍ ଅଙ୍ଗୁର୍ ରାସ୍ନି କାଲିଙ୍ଗ୍ ଉଣିଲେକେ ମୁର୍ତି ପୁଜା କିନାକା ହିକାୟ୍ କିତାତ୍। ପୁର୍ତିନି ୱିଜୁ ରାଜାର୍ ତା ହୁଦାଙ୍ଗ୍ ମାହାଆଜି ଗିଣ୍ କାମାୟ୍ କିତାର୍। ଇ କଗ୍ଲେ ଦାମିକା ଜିନିଷ୍ତିଙ୍ଗ୍ ଇଚାକିଜି ମାଚି କାଜିଙ୍ଗ୍ ପୁର୍ତିନି ୱିଜୁ ବେପ୍ରିଆର୍ ହାଉକାର୍ ଆତାର୍। ମାତର୍ ଇ ଲାଜ୍ ହିଲ୍ୱି ଦାରି କଗ୍ଲେଙ୍ଗ୍ ଈଶ୍ୱର ପାଗ୍ନାନ୍। ହେବେ ୱିଜୁ ପର୍କାର୍ ଶୟତାନ୍ ଆତ୍ମା ହାଲ୍ଜି ମାନ୍ଗିନିକ୍ ଆରେ ହେଦାଙ୍ଗ୍ କରାପ୍ ଆରେ ଅବସ୍ତା ପଟିଗୁଡା ଲେକେ ଆନାତ୍।” 4 ତାପାଚେ ଆରେ ରକାନ୍ ସରଗ୍ତାଙ୍ଗ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍, “ଏ ନା ମାନାୟ୍ କାଦେର୍ ହେ ସହର୍ତାଙ୍ଗ୍ ହନ୍ଞ୍ଚି ୱାଡ। ହେ ସହର୍ନି ମାନାୟାର୍ ପାପ୍ କାମାୟ୍ କିତିଲେକେ ଯଦି ଏପେଙ୍ଗ୍ କିନାଦେର୍, ଲାଗିଙ୍ଗ୍ ହେ ସହର୍ନି ମାନାୟାର୍ ଦଣ୍ଡ୍ ପାୟା ଆତିଲେକେ ଏପେଙ୍ଗ୍ ପା ତା ହୁଦାଙ୍ଗ୍ ମାହାଆଜି ଦଣ୍ଡ୍ ପାୟାଆନାଦେର୍। 5 ଇନେସ୍କି ହେ ସହର୍ନି ମାନାୟାର୍ ସରଗ୍ ପାତେକ୍ ହାଚି ଲେକେ ବେସି ପାପ୍ କାମାୟ୍ କିତାର୍ନା, ଆରେ ତା ପାପ୍ କାମାୟ୍ କାଜିଙ୍ଗ୍ ଦଣ୍ଡ୍ ହିଦେଙ୍ଗ୍ ଈଶ୍ୱର କାତାନ୍ନା। 6 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଏପେଙ୍ଗ୍ ବାବିଲନ୍ ସହର୍ନି ମାନାୟାରିଙ୍ଗ୍ ଦଣ୍ଡ୍ ହିୟାଟ୍, ଇନେସ୍ ହେୱାର୍ ଜେକନିକାରିଙ୍ଗ୍ ଦଣ୍ଡ୍ହିଜି ମାଚାର୍। ହେୱାର୍ ମିଙ୍ଗେଙ୍ଗ୍ ଇନେସ୍ ଦଣ୍ଡ୍ହିଜି ମାନ୍ଞ୍ଚାର୍ ହେଲେକେ ଡବଲ୍ ଦଣ୍ଡ୍ ହେୱାରିଙ୍ଗ୍ ହିୟାଟ୍। ହେ ସହର୍ନି ମାନାୟାର୍ ହେୱାର୍ ଜାର୍କିନି କରାପ୍ କାମାୟ୍ତିଙ୍ଗ୍ ହିକାୟ୍ କିଜି ମାନ୍ଞ୍ଚାର୍, ଲାଗିଙ୍ଗ୍ ହେ ସହର୍ନି ମାନାୟାର୍ ପା ଈଶ୍ୱର ଦଣ୍ଡ୍ ଡବଲ୍ ପାୟାଆନି ଦର୍କାର୍। 7 ହେ ସହର୍ନି ମାନାୟାର୍ ଜାର୍ତିଙ୍ଗ୍ ହାଉକାର୍ ଆରେ ଆରାମ୍ସେ ମାନାରା, ଲାଗିଙ୍ଗ୍ ହେଦେଲ୍ ଇନେସ୍ ହାଉକାର୍ ହେଲେକେ ହାମାନ୍ ଏପେଙ୍ଗ୍ ହେଦେଲିଙ୍ଗ୍ ଦୁକ୍ ଆରେ କଷ୍ଟ ହିୟାଟ୍। ହେଦେଲ୍ ଜାର୍ତିଙ୍ଗ୍ ୱେଚ୍ନାତା ଆନେଙ୍ଗ୍ ରଞ୍ଜେଲ୍ ରାଣି ଲେକେ ମାନାୟାରିଙ୍ଗ୍ ସାସନ୍ କିନାଙ୍ଗ୍ ଆରେ ଆନେଙ୍ଗ୍ ରଞ୍ଜେଲ୍ ରାଣ୍ଡି କଗ୍ଲେ ଆକାୟ୍ ଆରେ ନାଙ୍ଗେଙ୍ଗ୍ ଇନାୱେଡ଼ାଙ୍ଗ୍ ପା ଦୁକ୍ ୱାଉତ୍। 8 ହେଦାଙ୍ଗ୍ କାଜିଙ୍ଗ୍ ହେଦାପ୍ରେ ହେ ସହର୍ନି ମାନାୟାର୍ ଜପି ଇୱିଜୁ ବିପତ୍, ମାରାଣ୍, ଦୁଃକ୍, କାତାର୍, ଆନାତ୍। ଆରେ ଈଶ୍ୱର ହେଦେଲିଙ୍ଗ୍ ନାଣିତାକେ କାଡି କିନାନ୍, ଇନେସ୍କି ମାପୃ ଈଶ୍ୱର ଶାକ୍ତିମାନି ମାନାୟ୍ ଆରେ ହେୱାନ୍ ହେଦେଲିଙ୍ଗ୍ ଦଣ୍ଡ୍ ହିନାନ୍।” 9 ଆରେ ଏଚେପାଦ୍ନା ପୁର୍ତିନି ହେ ରାଜାର୍ ସହର୍ନି ମାନାୟାର୍ ନାଣିତାକେ କାଡ୍ନାକା ହୁଡ଼୍ନାର୍, ହେୱାର୍ ଆଡ଼୍ବାନାର୍ ଇମ୍ଣି ରାଜାର୍ ତା ହୁଦାଙ୍ଗ୍ ମାହାଆଜି ପାପ୍ କାମାୟ୍ କିଜି ଆରାମ୍ସେ ଜିବୁନ୍ କାଟିକିଜି ମାନ୍ଗାନାର୍। 10 ହେ ସହର୍ନି ମାନାୟାର୍ କଷ୍ଟ ପାୟାଆନାକା ହୁଡ଼୍ଜି ଇ ରାଜାର୍ ଲାଗେ ହାଞ୍ଜେଙ୍ଗ୍ ପାଣ୍ଡ୍ରା ଆନାର୍, ଆରେ ଦେହା ନିଲ୍ଚି ଇଲେକେ ୱେଚ୍ଚି ମାଚାର୍। “ହାୟ୍, ହାୟ୍, ଗାଜା ସହର୍, ବୟଙ୍କାର୍ ବାବିଲନ୍ ସହର୍, ର ଘଣ୍ଟା ବିତ୍ରେ ନିଙ୍ଗେଙ୍ଗ୍ ବିପତ୍ ୱାତାତ୍।” 11 ପୁର୍ତିନି ୱିଜୁ ବେପ୍ରିଆର୍ ହେ ସହର୍ କାଜିଙ୍ଗ୍ ଦୁଃକ୍ ଆଜି ଆଡ଼୍ବାନାର୍, ଇନେସ୍କି ହେୱାର୍ ଜିନିଷ୍ତିଙ୍ଗ୍ କଡ଼୍ନି କାଜିଙ୍ଗ୍ ଇନେର୍ ପା ହିଲ୍ଗୁର୍। 12 ହେୱାର୍ ପନି ଜିନିଷ୍ ବାରବିନି ମାଚାତ୍। ହେଦାଙ୍ଗ୍ ଇଲେକେ ହନା, ରୁପା, ହିରା, ବେସି ଦାମ୍ନି କାଲ୍। ଆରେ ବେସି ଦାମ୍ନି ଡ଼ିଞ୍ଜ୍ନି ହେନ୍ଦ୍ରା, ବେସି ଦାମ୍ନି ରାତା ଆରେ ୱାଙ୍ଗା କଲର୍ ହେନ୍ଦ୍ରା ଆରେ ଚନ୍ଦନ୍ ମାର୍ତାଙ୍ଗ୍ ରସ୍ତି ବିନ୍-ବିନ୍ ପର୍କାର୍ ସେଣ୍ଟ୍। ଆରେ ଆତି ଟାଡାଙ୍ଗ୍ତାଙ୍ଗ୍ ରସ୍ତି ବିନ୍-ବିନ୍ ଜିନିଷ୍, ବେସି ଦାମ୍ନି ମାର୍, ପିତାଡ଼୍, ଲୱା ଆରେ ବେସି ଦାମ୍ନି ମାର୍ବଲ୍ କାଲ୍ଦାଙ୍ଗ୍ ରସ୍ତି ବିନ୍-ବିନ୍ ଜିନିଷ୍। 13 ଆରେ ଡାଲ୍ଚିନି, ମସ୍ଲା ସାମାନ୍, ଦୁପ୍, ବାସ୍ନା ଚିକାଣ୍, ବାସ୍ନା ସେଣ୍ଟ୍, ଅଙ୍ଗୁର୍ ରାସ୍ନି କାଲିଙ୍ଗ୍, ଚିକାଣ୍, ମଇଦା, ଗହମ୍, କଡିଙ୍ଗ୍, ମେଣ୍ଢା, ଗଡ଼ା, ରତ, ହଲିଆ ଆରେ ମାନାୟାର୍ ଜିବୁନ୍। 14 ୱିଜୁ ବେପାର୍ କିନାକାର୍ ହେ କଗ୍ଲେଙ୍ଗ୍ ୱେଚ୍ନାର୍, “ଏନେଙ୍ଗ୍ ଇଚାକିତି ୱିଜୁ ଜିନିଷ୍ ନଙ୍ଗୟ୍ ହିଲୁଦ୍ଦେ, ଏନେଙ୍ଗ୍ ଇଚାକିତି ହାର୍ ବାସ୍ନା ଜିନିଷ୍ ଆରେ ନି ଗାଗାଡ଼୍ତିଙ୍ଗ୍ ହଲି କିନି ୱିଜୁ ଜିନିଷ୍ ନଙ୍ଗୟ୍ ନଷ୍ଟ ଆତାତ୍ନା। ଆରେ ଏନେଙ୍ଗ୍ ହେ ୱିଜୁ ଜିନିଷ୍ତିଙ୍ଗ୍ ଆରେରଗ ପାୟା ଆଦେଙ୍ଗ୍ ଆଡୁୟ୍।” 15 ଇମ୍ଣି ବେପ୍ରିଆର୍ ତାଙ୍ଗେଙ୍ଗ୍ ୱିଜୁ ଜିନିଷ୍ ପସି ମାଚାର୍, ହେୱାର୍ ଦେହା ନିଲ୍ଚି ଦୁଃକ୍ ଆଜି ଆଡ଼୍ବି ମାଚାର୍। 16 ହେୱାର୍ ୱେଚ୍ଚି ମାଚାର୍, ର ହଲ୍ନି କଗ୍ଲେ ରାତା କଲର୍, ଡ଼ିଞ୍ଜ୍ନି କଲର୍ ଆରେ ହଲ୍ନି ହେନ୍ଦ୍ରା ଉସ୍ପିତିଲେକେ ମାଚାତ୍, ଆରେ ହନା, ରୁପା, ହିରା ବେସି ଦାମ୍ଦି କାଲ୍ ତୁସ୍ଦି ମାଚାତ୍। “ହାୟ୍, ହାୟ୍, ଏଚେ ଗାଜା ସହର୍ ବିନାସ୍ ଆତାତ୍। 17 ମାତର୍ ର ଗଣ୍ଟା ବିତ୍ରେ ହେ ସହର୍ନି ୱିଜୁ ଜିନିଷ୍ ବିନାସ୍ ଆତାତ୍, ଆରେ ଜାଜ୍ ଚାଲାଇ କିନି ଡାଇବରାର୍, ପାସିଞ୍ଜେର୍, ଜାଜ୍ ମାଲିକାର୍ ଆରେ ହାମ୍ଦୁର୍ତାକେ ବେପାର୍ କିନାକାର୍ ଦେହା ନିଲ୍ଚି ମାଚାର୍।” 18 ଆରେ ହେ ସହର୍ ନାଣିତାକେ କାଡ୍ନାକା ହୁଡ଼୍ଜି ହେୱାର୍ ଦୁଃକ୍ ଆଜି ୱେଚ୍ଚି ମାଚାର୍, “ଇ ଗାଜା ସହର୍ଲେକେ ଇ ପୁର୍ତିତାକେ ଇମେତାକେ ପା ଗାଜା ସହର୍ ହିଲେତ୍।” 19 ହେୱାର୍ ତା କାପ୍ଡ଼ାକାଙ୍ଗ୍ ଦୁଡ଼ି ୱାକ୍ୟା ଆଜି ବେସି ଦୁଃକ୍ ଆଜି ୱେଚ୍ଚି ମାଚାର୍, “ଏଚେ ବୟ୍ଙ୍କାର୍ ଏଚେ ବୟ୍ଙ୍କାର୍ ଗାଜା ସହର୍! ହେ ସହର୍ ତା ଦନ୍ ସମ୍ଫତିତାଙ୍ଗ୍ ଜାଜ୍ନି ମାଲିକାରିଙ୍ଗ୍ ହାଉକାର୍ କିଜି ମାଚାତ୍। ମାତର୍ ର ଗଣ୍ଟା ବିତ୍ରେ ୱିଜୁ ବିନାସ୍ ଆତାତ୍।” 20 ଏ ସରଗ୍ତାକେ ମାନି ମାନାୟାର୍ ହେ ସହର୍ ବିନାସ୍ଆତି କାଜିଙ୍ଗ୍ ୱାରିୟା ଆଡ। ହେ ସାଦୁ ମାନାୟ୍ କାଦେର୍, ଏ ବାଚିକିତି ଚେଲା କାଦେର୍, ଇ ଭବିଷ୍ଯତବକ୍ତା ୱାରି କିୟାଟ୍, ଇନେସ୍କି ବାବିଲନ୍ ସହର୍ନି ମାନାୟାର୍ ମି ବିରଦ୍ତାଙ୍ଗ୍ କିଜିମାଚି ପାପ୍ କାଜିଙ୍ଗ୍ ଈଶ୍ୱର ହେ ସହର୍ତିଙ୍ଗ୍ ବିନାସ୍ କିତାନ୍। 21 ତାପାଚେ ର ବେସି ଶାକ୍ତିମାନି ଦୁତ୍ ଜାତାଲେଗ୍ଦି ର ଗାଜା କାଲ୍ଦିଙ୍ଗ୍ ହାମ୍ଦୁର୍ତାକେ ତୁସିହିତାତ୍ ଆରେ ଗାଜାକାଟ୍ କିଜି ୱେଚ୍ଚାତ୍, “ଇଲେକେ ଇ ବାବିଲନ୍ ସହର୍ ବିନାସ୍ ଆନାତ୍, ଆରେ ତାଙ୍ଗେଙ୍ଗ୍ ଇନାୱେଡ଼ାଙ୍ଗ୍ ହୁଡ଼ିଆ ଆଉତ୍।” 22 ଆରେ ହେ ବାବିଲନ୍ ସହର୍ତାଙ୍ଗ୍ ବାଜା ଆଡ଼୍ନାକା ଆରେ କେର୍କଣ୍ କେର୍ନାକା ୱେନ୍ୟା ଆଉତ୍, ହେବେ ମରି ତୁବ୍ନାକା ଆରେ ହୁର୍ଡ଼ି ତୁବ୍ନାକା ପା ୱେନ୍ୟା ଆଉତ୍। ହେ ସହର୍ତାକେ ୱିଜୁ ଜିନିଷ୍ତିଙ୍ଗ୍ କେଇଦାଙ୍ଗ୍ ରହ୍ନାକାର୍ ଆରେ ହିଲ୍ଗୁର୍ ଆରେ ହେ ସହର୍ନି ମିଲୁତାକେ ମିଲୁକିଦେଙ୍ଗ୍ ତାସ୍ ପା ମାନ୍ଗୁତ୍। 23 ହେବେନି ମାନାୟାର୍ ଇନାୱେଡ଼ାଙ୍ଗ୍ ପା ବଇଟା ଅଜଡ଼୍ ହୁଡ଼୍ଦେଙ୍ଗ୍ ଆଡୁର୍, ଆରେ କାଡ଼୍ଦେ କି ଗାଡ଼୍ଚେ ବିବାଆନି ୱାରି କାବୁର୍ ୱେନ୍ୟା ଆଉତ୍। ଇନେସ୍କି ହେ ସହର୍ନି ବେପ୍ରିଆର୍ ବେସି ଶାକ୍ତି କାଟାକାର୍ ଆଜି ମାନାର୍, ଆରେ ପୁର୍ତିନି ୱିଜୁ ଜାତିନି ମାନାୟାରିଙ୍ଗ୍ ଗୁରୁ ଗୁଣିଆଁ କିଜି ଟକାୟ୍ କିଜି ଦେହା ଇଡ଼୍ଜି ମାନାର୍। 24 ଈଶ୍ୱର ହେ ସହର୍ତିଙ୍ଗ୍ ଦଣ୍ଡ୍ ହିତାନ୍ ଭବିଷ୍ଯତବକ୍ତାରିଙ୍ଗ୍, ଈଶ୍ୱର ଲକ୍ତିଙ୍ଗ୍ ଆରେ ପୁର୍ତିନି ବିନ୍-ବିନ୍ ବାହାନି ମାନାୟାରିଙ୍ଗ୍ ପା ମାର୍ନେ ଅସ୍ତି ନେତେର୍ ଚଚ୍ଚି ମାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation