ହତ୍ତି 17 - New Testament in Pengo Parja Languageବାବିଲନ୍ ସହର୍ ଆରେ ପଶୁ 1 ତାପାଚେ ସାତ୍ଗଟା ଗିନା ଆସ୍ତିମାନି ସାତ୍ଗଟା ଦୁତ୍କୁତାଙ୍ଗ୍ ରଞ୍ଜାଙ୍ଗ୍ ଦୁତ୍ ନା ଲାଗାୟ୍ ୱାଜି ୱେଚ୍ଚାତାତ୍, “ନା ହୁଦାଙ୍ଗ୍ ୱା! ଆରେ ଦାରି କାମାୟ୍ କିନିଲେକେ ବାବିଲନ୍ ସହର୍ତିଙ୍ଗ୍ ଈଶ୍ୱର ଇନେସ୍ ଦଣ୍ଡ୍ ହିନାନ୍ ହେଦାଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଚଚ୍ଚାନାଙ୍ଗ୍, ହେ ସହର୍ ହାମ୍ଦୁର୍ କାଣ୍ଡିତାକେ ମାନାତ୍। 2 ଆରେ ପୁର୍ତିନି ସାସନ୍ କିନାକାର୍ ହେ ସହର୍ ହୁଦାଙ୍ଗ୍ ଦାରି କାମାୟ୍ କିତିଲେକେ ରୱାଣ୍ ଇଡ଼୍ଜି ମାଚାର୍, ଆରେ ପୁର୍ତିନି ମାନାୟାର୍ ଅଙ୍ଗୁର୍ ରାସ୍ନି କାଲିଙ୍ଗ୍ ଉଟି ମାନାୟ୍ ଲେକେ ହେୱାର୍ ହୁଦାଙ୍ଗ୍ ମାହାଆଜି ପାପ୍ କାମାୟ୍ କିଜି ମାଚାର୍।” 3 ଲାଗିଙ୍ଗ୍ ଏଚେପାଦ୍ନା ନାଙ୍ଗେଙ୍ଗ୍ ପବିତ୍ର ଆତ୍ମା କଣ୍ଟ୍ରୁଲ୍ କିତ୍ତାତ୍, ହେଦାପ୍ରେ ହେ ଦୁତ୍ ଟାଙ୍ଗ୍ରାବାହାତାକେ ନାଙ୍ଗେଙ୍ଗ୍ ଅସା ହାନ୍ଞ୍ଚାତ୍। ହେବେ ରଞ୍ଜାଙ୍ଗ୍ କଗ୍ଲେ ରାତା କଲର୍ ପଶୁ ଜପି କୁଚ୍ଚାକାଦିଙ୍ଗ୍ ଆନେଙ୍ଗ୍ ହୁଡ଼୍ତାଙ୍ଗ୍, ଆରେ ହେ ପଶୁତିଙ୍ଗ୍ ସାତ୍ଗଟା କାପ୍ଡ଼ାଙ୍ଗ୍ ଆରେ ଦଶ୍ଗଟା କମଙ୍ଗ୍ ମାନିକ୍ ଆରେ ତା ଗାଗାଡ଼୍ ବାର୍ତି ଈଶ୍ୱରତିଙ୍ଗ୍ ନିନ୍ଦାକିନି ତର୍ ଲେକାଆଜି ମାଚାତ୍। 4 ହେ କଗ୍ଲେ ୱାଙ୍ଗା କଲର୍ ଆରେ ରାତା କଲର୍ନି ହେନ୍ଦ୍ରା ଉସ୍ପି ମାଚାତ୍, ଆରେ ହେଦେଲ୍ ହନା, ରୁପା, ହିରାତାଙ୍ଗ୍ ଜାର୍ତିଙ୍ଗ୍ ରଞ୍ଜ୍ଞ୍ଜି ମାଚାତ୍। ହେଦେଲ୍ ତା କେଇଦ ହନାତାଙ୍ଗ୍ ରସ୍ତି ଗିନା ଆସ୍ତି ମାଚାତ୍, ହେ ଗିନାତାକେ ଗିଣ୍ ଆନି ତା କରାପ୍ କାମାୟ୍ ୱିଜୁ ବାର୍ତିଆଜି ମାଚାତ୍। 5 ଆରେ ତା ନିଦାଣ୍ତାକେ ଚାନିଆଆନି ତର୍ ଲେକାଆଜି ମାଚାତ୍, ହେ ତର୍ ଇଲେକେ ଲେକାଆଜି ମାଚାତ୍, “ଆନେଙ୍ଗ୍ ଗାଜା ବାବିଲନ୍ ସହର୍, ଦାରି କାମାୟ୍ କିନାକାରିଙ୍ଗ୍ ଆରେ ପୁର୍ତିନି ଗିଣ୍ କାମାୟ୍ କିନି ମାନାୟାର୍ ତେହିତଙ୍ଗ୍।” 6 ଆନେଙ୍ଗ୍ ହୁଡ଼୍ଜି ମାଚାଙ୍ଗ୍ ଯେ, ହେ କଗ୍ଲେଙ୍ଗ୍ କାଲିଙ୍ଗ୍ ଉଣିଲେକେ ଈଶ୍ୱର ପବିତ୍ର ମାନାୟାର୍ ନେତେର୍ତିଙ୍ଗ୍ ଉଣ୍ଜି ମାଚାତ୍। ଇମ୍ଣି ମାନାୟାରିଙ୍ଗ୍ ଯୀଶୁ କାଜିଙ୍ଗ୍ ମାର୍ନେ ଅସ୍ତି ମାଚାର୍, ଇନେସ୍କି ହେୱାର୍ ଖ୍ରୀଷ୍ଟ କାତା ମାନିକିଜି ମାଚାର୍। ଆରେ ହେ କଗ୍ଲେଙ୍ଗ୍ ହୁଡ଼୍ଜି ଆନେଙ୍ଗ୍ ଚାନିଆ ଆତାଙ୍ଗ୍। 7 ତାପାଚେ ହେ ଦୁତ୍ ନାଙ୍ଗେଙ୍ଗ୍ ୱେନ୍ବା ଆତ୍ତାତ୍, “ଇନାକିଦେଙ୍ଗ୍ ଏନେଙ୍ଗ୍ ଏଚେକ୍ ଚାନିଆ ଆତାୟ୍ନା। ଆନେଙ୍ଗ୍ ନିଙ୍ଗେଙ୍ଗ୍ ସାତ୍ଗଟା କାପ୍ଡ଼ା ଆରେ ଦଶ୍ଗଟା କମଙ୍ଗ୍ ମାନି ପଶୁ ଜପି କୁଚ୍ଚି କଗ୍ଲେତି ଆରେ ପଶୁ ବିଷୟରେ ଚାନିଆ ଆନାକା ନିଙ୍ଗେଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗ୍।” 8 ନଙ୍ଗୟ୍ ଏନେଙ୍ଗ୍ ଇମ୍ଣି ପଶୁତିଙ୍ଗ୍ ହୁଡ଼୍ତାୟ୍ନା, ହେଦାଙ୍ଗ୍ ଆଗେ ଜିବୁନ୍ ମାଚାତ୍, ଆରେ ନଙ୍ଗୟ୍ ହେ ପଶୁ ହାଃତାତ୍ନା। ମାତର୍ ହେ ପଶୁ ପାତାଳ୍ ବିତ୍ରେତାଙ୍ଗ୍ ବେଗି ୱାନାତ୍ ଆରେ ଈଶ୍ୱର ତାଙ୍ଗେଙ୍ଗ୍ ପୁରାପୁରି ବାବ୍ରେ ବିନାସ୍ କିନାନ୍। ଇମ୍ଣି ମାନାୟାର୍ ଇ ପୁର୍ତିତାକେ ମାନାରା, ଇନେର୍ ତର୍ ପୁର୍ତି ଉବ୍ଜା ଆୱି ଆଗେ ଜିବୁନ୍ ମାନି ବହିତାକେ ଲେକାଆୱାତାତ୍ନା, ହେୱାର୍ ହେ ପଶୁତିଙ୍ଗ୍ ହୁଡ଼୍ଜି ଚାନିଆ ଆନାର୍। ଇନେସ୍କି ହେ ପଶୁ ହାଃତିତାଙ୍ଗ୍ ଆରେରଗ ଜିବୁନ୍ଆଜି ମାନ୍ଗାନାତ୍। 9 ଲାଗିଙ୍ଗ୍ “ଏପେଙ୍ଗ୍ ନଙ୍ଗୟ୍ ଇ ବିଷୟତିଙ୍ଗ୍ ବୁଜାଆଡ, ହେ ପଶୁ ସାତ୍ଗଟା କାପ୍ଡ଼ାଙ୍ଗ୍ ଅର୍ତ ହେ କଗ୍ଲେ ସାସନ୍ କିନି ସାତ୍ଗଟା କୁପ୍ଲିଙ୍ଗ୍। ହେଦାଙ୍ଗ୍ ପା ସାତ୍ଜାଣ୍ ରାଜାର୍ଲେକେ। 10 ହେୱାର୍ତାଙ୍ଗ୍ ପାଞ୍ଚ୍ଜାଣ୍ ରାଜାର୍ ହାଃତାରେ, ରକାନ୍ ନଙ୍ଗୟ୍ ସାସନ୍ କିନାନା ମାତର୍ ସାତ୍ ନମ୍ବର୍ ରାଜା ନଙ୍ଗୟ୍ ପାତେକ୍ ୱାଉନେ, ହେୱାନ୍ ସାସନ୍ କିଦେଙ୍ଗ୍ ବେଗି ୱାନାନ୍, ଆରେ ହେୱାନ୍ ବେସିଦିନ୍ ସାସନ୍ କିଦେଙ୍ଗ୍ ଆଡୁନ୍। 11 ଆରେ, ଇମ୍ଣି ପଶୁ ଆଗେ ଜିବୁନ୍ ମାଚାତ୍ ଆରେ ନଙ୍ଗୟ୍ ହାଃତାତ୍ନା ହେ ସାତ୍ଜାଣ୍ ରାଜାର୍ତାଙ୍ଗ୍ ଇୱାନ୍ନେ ଆଟ୍ ନମ୍ବର୍ ରାଜା। ଆରେ ବେସି ଆଗେ ହାଃନାନ୍। 12 ଆରେ ଏପେଙ୍ଗ୍ ହୁଡ଼୍ଜି ମାଚି ଦଶ୍ଗଟା କମ୍ଙ୍ଗ୍ନି ଅର୍ତ ଦଶ୍ଜାଣ୍ ରାଜାର୍। ହେୱାର୍ ନଙ୍ଗୟ୍ ପାତେକ୍ ସାସନ୍ କିୱାତାର୍ନା। ମାତର୍ ହେ ପଶୁ ହୁଦାଙ୍ଗ୍ ସାସନ୍ କିନି କାଜିଙ୍ଗ୍ ର ଗଣ୍ଟା କାଜିଙ୍ଗ୍ ଅଦିକାର୍ ପାୟାଆନାର୍। 13 ହେ ଦଶ୍ଜାଣ୍ ରାଜାର୍ ସାସନ୍ କିନି ତା ଅଦିକାର୍ ଆରେ ଶାକ୍ତି ହେ ପଶୁତିଙ୍ଗ୍ ହିଦେଙ୍ଗ୍ ରାଜି ଆନାର୍। 14 ହେ ୱିଜାର୍ ରାଜାର୍ ମାହାଆଜି ମେଣ୍ଢା ଇନେର୍କି ଯୀଶୁ ହୁଦାଙ୍ଗ୍ ଯୁଜ୍ କିନାର୍। ମାତର୍ ହେ ମେଣ୍ଢା ଇନେର୍କି ଯୀଶୁ ଆରେ ହେୱାନ୍ ହିର୍ବାତାକାର୍, ତା ବାଚିକିତି ମାନାୟାର୍, ଆରେ ତା ଦରମ୍ ମାନାୟାର୍ ହୁଦାଙ୍ଗ୍ ମାହାଆଜି ହେୱାରିଙ୍ଗ୍ ଆରାୟ୍ କିତାର୍, ଇନେସ୍କି ହେୱାନ୍ ନେ ୱିଜୁ ମାପୃତାଙ୍ଗ୍ ମାପୃ ଆରେ ୱିଜୁ ରାଜାର୍ତାଙ୍ଗ୍ ରାଜା। 15 ତାପାଚେ ଆରେ ର ଦୁତ୍ ନାଙ୍ଗେଙ୍ଗ୍ ୱେଚ୍ଚାତାତ୍, ଇମ୍ଣି ନାଗୁଡ଼୍ତାକେ ହେ ଦାରି କଗ୍ଲେଙ୍ଗ୍ ହୁଡ଼୍ଜି ମାଚାଦେର୍, ନାଗୁଡ଼୍ନି ଅର୍ତ ୱିଜୁଜାତି ଆରେ ୱିଜୁ ବାଷାନି ମାନାୟାର୍। 16 ଏପେଙ୍ଗ୍ ଇମ୍ଣି ପଶୁତିଙ୍ଗ୍ ଦଶ୍ଗଟା କମଙ୍ଗ୍ ମାନାକା ହୁଡ଼୍ଜି ମାଚାଦେର୍ ତା ଅର୍ତ ଦଶ୍ଜାଣ୍ ରାଜାର୍, ଏଚେପାଦ୍ନା ଟିକ୍ ସମୟ୍ ୱାନାତ୍, ହେ ପଶୁ ଆରେ ଦଶ୍ଗଟା ରାଜାର୍ ଦାରି କାମାୟ୍ତିଙ୍ଗ୍ ଗିଣ୍ କିନାର୍। ହେୱାର୍ ତାବେତାଙ୍ଗ୍ ଜେଲ୍ଜି ଅଜି ନାଗ୍ଡ଼ା କିନାର୍, ଆରେ ତା ଜାଇତିଙ୍ଗ୍ ଉକ୍ଚି ଅନାର୍ ଆରେ ତାଙ୍ଗେଙ୍ଗ୍ ନାଣିତାକେ କାଡିକିନାର୍। 17-18 ଇମ୍ଣି କଗ୍ଲେଙ୍ଗ୍ ନାଗୁଡ଼୍ କାଣ୍ଡିତାକେ କୁଚ୍ଚାକା ଏନେଙ୍ଗ୍ ହୁଡ଼୍ଜି ମାଚାୟ୍, ହେଦାଙ୍ଗ୍ ରଞ୍ଜାଙ୍ଗ୍ ଗାଜା ସହର୍ ହେ ସହର୍ ପୁର୍ତିନି ୱିଜାର୍ ରାଜାରିଙ୍ଗ୍ ସାସନ୍ କିନାତା। ଇ ୱିଜୁ ବିଷୟ ହେ କଗ୍ଲେଙ୍ଗ୍ ଗଟାଆତାତ୍ନା, ଇନେସ୍କି ଇ ୱିଜୁ କିନି କାଜିଙ୍ଗ୍ ହେୱାର୍ ମାନ୍ତ ଈଶ୍ୱର ଉପାୟ୍ ହିତାନ୍ନା। ହେଦାଙ୍ଗ୍ କାଜିଙ୍ଗ୍ ଈଶ୍ୱର ୱେଚ୍ଚି ୱିଜୁ କାତା ପୁରା ଆୱି ପାତେକ୍, ହେୱାର୍ ଦଶ୍ଜାଣ୍ ରାଜାର୍ ତା ଅଦିକାର୍ ହୁଦାଙ୍ଗ୍ ସାସନ୍ କିନି କାଜିଙ୍ଗ୍ ହେ ପଶୁତିଙ୍ଗ୍ ହିନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation