ହତ୍ତି 16 - New Testament in Pengo Parja Languageଈଶ୍ୱରତି ଦଣ୍ଡ୍ ମାନି ପାର୍ତୁମ୍ ଗିନା 1 ତାପାଚେ ସରଗ୍ତାକେ ମାନି ମନ୍ଦିର୍ତାଙ୍ଗ୍ ହେ ସାତ୍ଗଟା ଦୁତ୍କୁକାଙ୍ଗ୍ ଗାଜାକାଟ୍ କିଜି ରକାନ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍, “ହାଲାଟ୍ ହେ ସାତ୍ଗଟା ଗିନାକାଙ୍ଗ୍ ମାନି ଈଶ୍ୱର ଦଣ୍ଡ୍ତିଙ୍ଗ୍ ପୁର୍ତିନି ମାନାୟାର୍ ଜପି ୱାକାଟ୍।” 2 ଲାଗିଙ୍ଗ୍ ପାର୍ତୁମ୍ ଦୁତ୍ ମନ୍ଦିର୍ତାଙ୍ଗ୍ ୱାଜି ଗିନାତାକେ ମାଚି ଈଶ୍ୱର ଦଣ୍ଡ୍ତିଙ୍ଗ୍ ପୁର୍ତିତାକେ ୱାକ୍ତାତ୍। ଆରେ ହେଦାପ୍ରେ ଇମ୍ଣି ମାନାୟାର୍ ପଶୁନି ଚିନ୍ ଅଜିମାଚାର୍ ଆରେ ତା ମୁର୍ତିତିଙ୍ଗ୍ ପୁଜାକିଜି ମାଚାର୍, ହେୱାର୍ ଗାଗାଡ଼୍ତାକେ ବେସି ବିସ୍ କିନି ଗାଅ ଆତାତ୍। 3 ତାପାଚେ ଦୁଇ ନମ୍ବର୍ ଦୁତ୍ ତା ଗିନାତାକେ ମାନି ଈଶ୍ୱର ଦଣ୍ଡ୍ ହାମ୍ଦୁର୍ ଜପି ୱାକ୍ତାତ୍। ହେଦାପ୍ରେ ହାମ୍ଦୁର୍ନି ଏଜୁଙ୍ଗ୍ ହାଃତି ମାନାୟାର୍ ନେତେର୍ ଲେକେ ଆତାତ୍, ଆରେ ହାମ୍ଦୁର୍ତାକେ ମାନି ଜାତୁଙ୍ଗ୍ ୱିଜୁ ହାଃତିକ୍। 4 ତାପାଚେ ତିନ୍ ନମ୍ବର୍ ଦୁତ୍ ତା ଗିନାତାକେ ମାଚି ଈଶ୍ୱର ଦଣ୍ଡ୍ତିଙ୍ଗ୍ ନାଗୁଡ଼୍ ଆରେ ଜାରାଣ୍ତାକେ ୱାକ୍ତାତ୍, ଆରେ ହେ ୱିଜୁ ଏଜୁଙ୍ଗ୍ ନେତେର୍ ଆତିକ୍। 5 ହେପାଦ୍ନା ୱିଜୁ ଏଜୁଙ୍ଗ୍ ଜପି ଅଦିକାର୍ ମାନି ଦୁତ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍, “ହେ ପବିତ୍ର ଈଶ୍ୱର, ଏନେଙ୍ଗ୍ ନଙ୍ଗୟ୍ ମାନାୟ୍ ଆରେ ୱିଜୁଦିନ୍ କାଜିଙ୍ଗ୍ ମାନ୍ଙ୍ଗାନାୟ୍, ଏନେଙ୍ଗ୍ ଟିକ୍ ଦଣ୍ଡ୍ ହିନାୟା। 6 ଇନେସ୍କି ନି ପବିତ୍ର ମାନାୟାରିଙ୍ଗ୍ ଆରେ ନି ଭବିଷ୍ଯତବକ୍ତାରିଙ୍ଗ୍ ମାର୍ନେ ଅସ୍ତି ମାଚାର୍, ଆରେ ହେୱାର୍ ନେତେର୍ ପୁର୍ତିତାକେ ୱାକ୍ୟା ଆଜିମାଚାତ୍। ହେଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ନଙ୍ଗୟ୍ ହେୱାର୍ ଉଣି ଏଜୁକାଙ୍ଗ୍ ନେତେର୍ କିନାୟ୍ ଆରେ ହେଦାଙ୍ଗ୍ ନେ ହେୱାର୍ତି ପୁରଷ୍କାର୍।” 7 ତାପାଚେ ଆରେ ରକାନ୍ ସରଗ୍ନି ବେଦିତାଙ୍ଗ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍, ହେୱାନ୍ ଇଲେକେ ୱେଚ୍ଚି ମାଚାନ୍, “ଆଁ, ମାପୃ, ୱିଜୁ ଶାକ୍ତିମାନି ଈଶ୍ୱର, ଏନେଙ୍ଗ୍ ଟିକ୍ ଆରେ ନ୍ୟାୟ୍ ବିଚାର୍ କିନାୟା।” 8 ତାପାଚେ ଚାରି ନମ୍ବର୍ ଦୁତ୍ ତା ଗିନାତାକେ ମାନି ଈଶ୍ୱର ଦଣ୍ଡ୍ତିଙ୍ଗ୍ ୱେଡ଼ା ଜପି ୱାକ୍ତାତ୍, ହେଦାଙ୍ଗ୍ କାଜିଙ୍ଗ୍ ୱେଡ଼ା ବେସି ଗରମ୍ ଆଜି ମାନାୟାରିଙ୍ଗ୍ କାଡିକିତାତ୍। 9 ହେପାଦ୍ନା ମାନାୟାର୍ ୱେଡ଼ା ବେସି ଗରମ୍ ଆଜି ହେୱାର୍ କାଡ଼୍ତାର୍, ଆରେ ଇମ୍ଣି ଈଶ୍ୱର ଇ ୱିଜୁ ଦଣ୍ଡ୍ ହିନାନା ହେୱାନିଙ୍ଗ୍ ହେୱାର୍ ଅବିଶାପ୍ ହିଜି ନିନ୍ଦା କିତାର୍। ହେୱାର୍ ପାପ୍ କାମାୟ୍ ପିସ୍ତି ମାନ୍ ବାଦ୍ଲାୟ କିୱାତାର୍ ଆରେ ତାଙ୍ଗେଙ୍ଗ୍ ଗୌରବ ହିୱାତାର୍। 10 ତାପାଚେ ପାଞ୍ଚ୍ ନମ୍ବର୍ ଦୁତ୍, ତା ଗିନାତାକେ ମାନି ଈଶ୍ୱର ଦଣ୍ଡ୍ ପଶୁଙ୍ଗ୍ ସିଙ୍ଗାସନ ଜପି ୱାକ୍ତାତ୍, ଆରେ ହେ ପଶୁଙ୍ଗ୍ ମାନି ଦେସ୍ ମାଜ୍ଗା ଆତାତ୍। ଆରେ ମାନାୟାର୍ ବେସି କଷ୍ଟ ଆତି କାଜିଙ୍ଗ୍ ୱେନ୍ଦୁଲ୍ କାପ୍ତେଙ୍ଗ୍ ଲାଗାତାର୍। 11 ଆରେ, ହେୱାର୍ ଗାଗାଡ଼୍ତାକେ ବେସି ଗାଅକୁ ଆଜି ଦୁଃକ୍ କଷ୍ଟ ପାୟାଆଜି ମାଚି କାଜିଙ୍ଗ୍ ସରଗ୍ତାକେ ମାନି ଈଶ୍ୱରତିଙ୍ଗ୍ ଅବିଶାପ୍ ହିଜି ନିନ୍ଦା କିତାର୍। ମାତର୍ ଇଲେକେ ଦୁଃକ୍ କଷ୍ଟ ପାୟାଆଜି ମାଚିସ୍ ପା ହେୱାର୍ ପାପ୍ କାମାୟ୍ କିନାକା ପିସ୍ତି ମାନ୍ବାଦ୍ଲାୟ୍ କିଦେଙ୍ଗ୍ ମୁନା କିତାର୍। 12 ତାପାଚେ ଚଅ ନମ୍ବର୍ ଦୁତ୍ ତା ଗିନାତାକେ ମାନି ଈଶ୍ୱର ଦଣ୍ଡ୍ତିଙ୍ଗ୍ ୟୁଫ୍ରେଟିସ୍ ଗାଜା ନାଗୁଡ଼୍ତାକେ ୱାକ୍ତାତ୍। ହେଦାପ୍ରେ ନାଗୁଡ଼୍ ୱାଚ୍ଚାତ୍ ଆରେ ପୁର୍ବ ଦେସ୍ତି ରାଜାର୍ ତା ସେନାରିଙ୍ଗ୍ ଆସ୍ତି ୱାଦେଙ୍ଗ୍ ସୁବିଦା ଆତାତ୍। 13 ତାପାଚେ ପାଣାଙ୍ଗ୍ଲେକେ ଚଞ୍ଜ୍ନି ତିନ୍ଗଟା ବୁତ୍ଆତ୍ମାଙ୍ଗ୍ ଆନେଙ୍ଗ୍ ହୁଡ଼୍ତାଙ୍ଗ୍, ଆରେ ରଞ୍ଜି ପାଣାଲେକେ ଚଞ୍ଜ୍ନି ବୁତ୍ଆତ୍ମା ହେ ଗାଜା ରାଚ୍ ୱେଇଦାଙ୍ଗ୍ ହତ୍ତାତ୍ ରଞ୍ଜି ପାଣାଲେକେ ଚଞ୍ଜ୍ନି ବୁତ୍ଆତ୍ମା ପାର୍ତୁମ୍ ପଶୁ ୱେଇଦାଙ୍ଗ୍ ହତ୍ତାତ୍। ଆରେ ଦୁଇ ନମ୍ବର୍ ପଶୁନି ୱେଇଦାଙ୍ଗ୍ ପା ରଞ୍ଜି ବୁତ୍ଆତ୍ମା ହସି ୱାତାତ୍, ହେୱାର୍ ୱିଜାକାରିଙ୍ଗ୍ ମିଚ୍ ହିକ୍ଷାହିଜି ମାଚାର୍। 14 ଇ ଶୟତାନ୍ନି ଆତ୍ମାକାଙ୍ଗ୍ ଚାନିଆ କାମାୟ୍ କିନି ଶାକ୍ତି ମାଚାତ୍, ଆରେ ହେୱାର୍ ପୁର୍ତିନି ୱିଜୁ ଦେସ୍ତିଙ୍ଗ୍ ସାସନ୍ କିନି ମାନାୟାରିଙ୍ଗ୍ ମାପୃ ୱିଜୁ ଶାକ୍ତିମାନି ଈଶ୍ୱର ବିଚାର୍କିନି ନାଞ୍ଜିଙ୍ଗ୍ ରୁଣ୍ଡାୟ୍ କିତାର୍। ହେୱାର୍ ଈଶ୍ୱର ବିରଦ୍ତାକେ ଯୁଜ୍ କିଦେଙ୍ଗ୍ ରୁଣ୍ଡାଆଜି ମାଚାର୍। 15-16 “ହେ ଶୟତାନ୍ ଆତ୍ମାଙ୍ଗ୍ ୱିଜୁ ଦେସ୍କୁକାଙ୍ଗ୍ ସାସନ୍ କିନି ମାନାୟାର୍ ଆରେ ତା ସେନାରିଙ୍ଗ୍ ଏବ୍ରୀ ବାଷାତାଙ୍ଗ୍ ଇନି ଆର୍ମାଗିଡନ୍ ତର୍ନି ବାହାତାକେ ରୁଣ୍ଡାୟ୍ କିତାର୍। ହେଦାଙ୍ଗ୍ କାଜିଙ୍ଗ୍ ମାପୃ ଯୀଶୁ ଇଲେକେ ୱେଚ୍ଚି ମାଚାନ୍ ନା ଇ ବେଣ୍ତିଙ୍ଗ୍ ୱେନାଟ୍। ଆନେଙ୍ଗ୍ ତିପ୍କୁ ର ଚରେନ୍ ୱାନିଲେକେ ୱାନାଙ୍ଗା। ଲାଗିଙ୍ଗ୍ ଇମ୍ଣି ମାନାୟାର୍ ଆନେଙ୍ଗ୍ ୱାନିହିଙ୍ଗ୍ ଚେତ୍ନା ମାନାଙ୍ଗାନାର୍ ଆରେ ତା ହେନ୍ଦ୍ରାତିଙ୍ଗ୍ ଜାଗ୍ରତ୍ କିଜି ଇଡ଼୍ଜି ମାନାର୍ ହେୱାର୍ ଆଶ୍ରିବାଦ୍ ପାୟାଆନାର୍। ହେୱାର୍ ନାଗ୍ଡ଼ା ମାନ୍ଗୁର୍ ଆରେ ହେୱାର୍ ବେସିହେନି ମାନାୟାର୍ତାକେ ହାଚିସ୍ ପା ଇନେର୍ ପା ହେୱାରିଙ୍ଗ୍ ଲାଜ୍ କିଦେଙ୍ଗ୍ ଆଡୁର୍।” ଈଶ୍ୱରତି ଦଣ୍ଡ୍ ମାନି ସାତ୍ ନମ୍ବର୍ ଗିନା 17 ତାପାଚେ ସାତ୍ ନମ୍ବର୍ ଦୁତ୍ ତା ଗିନାତାକେ ମାନି ଈଶ୍ୱର ଦଣ୍ଡ୍ତିଙ୍ଗ୍ ବାଦାଡ଼୍ଜପି ମାହାଇ କିତାତ୍ ଆରେ ସରଗ୍ତାକେ ମାନି ମନ୍ଦିର୍ନି ସିଙ୍ଗାସନତାଙ୍ଗ୍ ରକାନ୍ ଗାଜାକାଟ୍ କିଜି ୱେଚ୍ଚି ମାଚାନ୍, “ଇ ୱିଜୁ ସେସ୍ ଆତାତ୍।” 18 ହେଦାପ୍ରେ ବିଜ୍ଲି ଚମ୍କା ଆତାତ୍, ବାଦାଡ଼୍ ଗାର୍ଜା ଆତାତ୍ ଆରେ ର ଗାଜା ବୁମିକମ୍ପ୍ ଆତାତ୍। ହେଲେକେ ବୁମିକମ୍ପ୍ ପୁର୍ତିତାକେ ମାନାୟ୍ ଉବ୍ଜାଣ୍ ଆତିତାଙ୍ଗ୍ ଇନେୱାଡ଼ାଙ୍ଗ୍ ପା ଆୱାଦାଙ୍ଗ୍ ମାଚାତ୍। 19 ବାବିଲନ୍ ଗାଜା ଦେସ୍ ତିନ୍ ବାଗ୍ ଆତାତ୍ ଆରେ ପୁର୍ତିନି ୱିଜୁ ଜାତିନି ସହର୍ ବିନାସ୍ ଆତାତ୍। ଇନେସ୍କି ବାବିଲନ୍ ସହର୍ତାକେ ମାନି ମାନାୟାରିଙ୍ଗ୍ ଦଣ୍ଡ୍ ହିନି କାଜିଙ୍ଗ୍ ଈଶ୍ୱର ଇମ୍ଣି ପାର୍ମାଣ୍ କିଜି ମାଚାନ୍ ହେଦାଙ୍ଗ୍ ଈଶ୍ୱର ନଙ୍ଗୟ୍ ପୁରା କିତାନ୍। ହେୱାରିଙ୍ଗ୍ ଈଶ୍ୱର ବୟଙ୍କାର୍ କିଜି ଦଣ୍ଡ୍ ହିତାନ୍, ଈଶ୍ୱର ନିଜେ ଗିନାତାକେ ଅଙ୍ଗୁର୍ ରାସ୍ତିଙ୍ଗ୍ ଉଟ୍ପିତିଲେକେ କେନି କାଲିଙ୍ଗ୍ ୱାକ୍ଚି ହେୱାରିଙ୍ଗ୍ ଉଟ୍ପିତିଲେକେ ହେ ଦଣ୍ଡ୍ ଇଲେକେ ଆତାତ୍। 20 ଆରେ ୱିଜୁ ହାମ୍ଦୁର୍ନି ଦ୍ୱିପ୍ ବୁଡା ଆତାତ୍ ଆରେ ୱିଜୁ ମାଡ଼ି ବାଟା ଆତାତ୍। 21 ଆରେ ପଚାସ୍ କେଜିନି ଆଞ୍ଜ୍ଗା ମାନାୟାର୍ ଜପି ବାଦାଡ଼୍ତାଙ୍ଗ୍ ଆର୍ତାତ୍, ଲାଗିଙ୍ଗ୍ ଇ ବୟଙ୍କାର୍ ବିପତ୍ କାଜିଙ୍ଗ୍ ମାନାୟାର୍ ଈଶ୍ୱରତିଙ୍ଗ୍ ଅବିଶାପ୍ ହିଜି ନିନ୍ଦା କିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation