ହତ୍ତି 15 - New Testament in Pengo Parja Languageବାଦାଡ଼୍ତାକେ ସାତ୍ଗଟା ଦୁତ୍କୁ ସାତ୍ଗଟା ବେମାର୍ତିଙ୍ଗ୍ ଆସ୍ତି ବିଷୟ 1 ତାପାଚେ ସରଗ୍ତାକେ ଆରେ ରଞ୍ଜାଙ୍ଗ୍ ଗାଜା ଆରେ ଚାନିଆଆନି ଚିନ୍ ଗଟାଆନାକା ଆନେଙ୍ଗ୍ ହୁଡ଼୍ତାଙ୍ଗ୍। ହେଦାଙ୍ଗ୍ ଇଲେକେ ମାଚାତ୍ ସାତ୍ଗଟା ବିପତ୍ତିଙ୍ଗ୍ ସାତ୍ଗଟା ଦୁତ୍କୁ ଆସ୍ତି ମାଚିକ୍। ଆରେ ହେ ସାତ୍ଗଟା ବିପତ୍ ନେ ସେସ୍ ବିପତ୍, ଏଚେକାଡ଼୍ଦ ହେ ସାତ୍ଗଟା ବିପତ୍ ସେସ୍ ଆନାତ୍ ଈଶ୍ୱର ରିସା ଶାନ୍ତି ଆନାତ୍। 2 ତାପାଚେ ଆନେଙ୍ଗ୍ ରଞ୍ଜାଙ୍ଗ୍ ନାଣିତାକେ ମାହାଆତି କାଚ୍ଲେଗ୍ଦି ହାମ୍ଦୁର୍ତିଙ୍ଗ୍ ହୁଡ଼୍ତାଙ୍ଗ୍। ଆରେ ପା ଆନେଙ୍ଗ୍ ହେ ପଶୁତିଙ୍ଗ୍ ଆରାୟ୍ କିଜି ଜିତାଆତାକାଙ୍ଗ୍, ତା ମୁର୍ତିତିଙ୍ଗ୍ ପୁଜା କିୱିତି ମାନାୟାରିଙ୍ଗ୍ ଆରେ ତା ତର୍ଦିଙ୍ଗ୍ ଆରେ ଚିନ୍ତିଙ୍ଗ୍ ଅୱିତି ମାନାୟାରିଙ୍ଗ୍ ହେ କାଚ୍ଲେଗ୍ଦି ହାମ୍ଦୁର୍ କାଣ୍ଡିତ ନିଲ୍ତାକା ହୁଡ଼୍ତାଙ୍ଗ୍। ହେୱାର୍ ଈଶ୍ୱର ହିତି ଡୁଡୁଙ୍ଗା ଆସ୍ତି ମାଚାର୍। 3 ଆରେ ହେୱାର୍ ଈଶ୍ୱର ଦାସ୍ ମୋଶା ହିକାୟ୍ କିତି କେର୍କଣ୍ ଆରେ ମେଣ୍ଢା ଇନେର୍କି ଯୀଶୁ ଲେକେ, ତା କେର୍କଣ୍ କେର୍ଜି ମାଚାର୍। “ହେ ମାପୃ ୱିଜୁ ଶାକ୍ତିମାନି ଈଶ୍ୱର, ଏନେଙ୍ଗ୍ କିନି ୱିଜୁ କାମାୟ୍ ଗାଜା ଆରେ ମାଙ୍ଗେଙ୍ଗ୍ ଚାନିଆ କିଦ୍ନାୟା, ଏନେଙ୍ଗ୍ନେ ୱିଜୁ ଦେସ୍ତି ରାଜା, ଏନେଙ୍ଗ୍ କିନି ୱିଜୁ କାମାୟ୍ ଟିକ୍ ଆରେ ଦରମ୍। 4 ହେ ମାପୃ, ୱିଜୁ ଜାତିନି ମାନାୟାର୍ ନିଙ୍ଗେଙ୍ଗ୍ ପାଣ୍ଡ୍ରା ଆଦ୍ନାର୍, ଆରେ ୱିଜାର୍ ମାନାୟାର୍ ନିଙ୍ଗେଙ୍ଗ୍ ସନ୍ମାନ୍ ହିଦ୍ନାରା, ଇନେସ୍କି ଏନେଙ୍ଗ୍ନେ ରକାୟ୍ ପବିତ୍ର ଈଶ୍ୱର। ୱିଜୁ ଦେସ୍ତି ମାନାୟାର୍ ନି ଲାଗେ ୱାନାରା ଆରେ ନିଙ୍ଗେଙ୍ଗ୍ ପୁଜା କିଦ୍ନାରା, ଇନେସ୍କି ହେୱାର୍ ପୁଚାର୍ନା ନି କାମାୟ୍ ୱିଜୁ ଦରମ୍।” ସାତ୍ଗଟା ବିପତ୍ନି ସାତ୍ଗଟା ଗିନା 5 ତାପାଚେ ଆନେଙ୍ଗ୍ ସରଗ୍ନି ମନ୍ଦିର୍ ଦୁୱେର୍ ଜେୟାଆନାକା ହୁଡ଼୍ତାଙ୍ଗ୍, ହେବେ ଈଶ୍ୱର ନିୟମ୍ ପେଡ଼ି ଜେୟା ଆଜିମାଚାତ୍। 6 ହେ ମନ୍ଦିର୍ତାଙ୍ଗ୍ ସାତ୍ଗଟା ବିପତ୍ ଆସ୍ତିମାଚି ଦୁତ୍ ହସି ୱାତିକ୍। ହେୱାର୍ ତେରେନ୍ତାଙ୍ଗ୍ କାପ୍ଡ଼ା ପାତେକ୍ ଚମ୍କା ଆନି ଡ଼ିଞ୍ଜ୍ନି ହେନ୍ଦ୍ରା ଉସ୍ପି ମାଚିକ୍ ଆରେ ହେୱାର୍ ତା ନେଞ୍ଜାଡାକିତାକେ ହନାତାଙ୍ଗ୍ ରସ୍ତି ବେଲ୍ଟ୍ ଉସ୍ପି ମାଚାର୍। 7 ଆରେ ତାପାଚେ ଚାରିଗଟା ଜିବୁନ୍ ମାନି ପଶୁ ବିତ୍ରେତାଙ୍ଗ୍ ର ପଶୁ ହେ ସାତ୍ଗଟା ଦୁତ୍କୁକାଙ୍ଗ୍ ହନାତାଙ୍ଗ୍ ରସ୍ତି ସାତ୍ଗଟା ଗିନା ହିତାତ୍, ଆରେ ହେ ଗିନାତାକେ ୱିଜୁଦିନ୍ ମାନି ଈଶ୍ୱର ଦଣ୍ଡ୍ ମାଚାତ୍। 8 ହେ ମନ୍ଦିର୍ତାକେ ଈଶ୍ୱର ଗୌରବ ଆରେ ଶାକ୍ତି କାଜିଙ୍ଗ୍ ଦୁଆଁ ବାର୍ତିଆଜି ମାଚାତ୍। ହେ ମନ୍ଦିର୍ ବିତ୍ରେ ଇନେର୍ ପା ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍, ଇମ୍ଣି ପାତେକ୍ ହେ ସାତ୍ଗଟା ଗିନାନି ଦଣ୍ଡ୍ତିଙ୍ଗ୍ ସାତ୍ଗଟା ଦୁତ୍କୁ ସେସ୍ କିଉର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation