ହତ୍ତି 14 - New Testament in Pengo Parja Languageମେଣ୍ଢା ଇନେର୍କି ଯୀଶୁ ଆରେ ତା ୧, ୪୪,୦୦୦ ମାନାୟାର୍ 1 ତାପାଚେ ମେଣ୍ଢା ଇନେର୍କି ଯୀଶୁ ସିୟୋନ ମାଡ଼ିଜପି ନିଲ୍ଚି ମାନାକା ହୁଡ଼୍ତାଙ୍ଗ୍, ଆରେ ତା ହୁଦାଙ୍ଗ୍ ୧, ୪୪,୦୦୦ ତା ଲକ୍ ମାଚାର୍ ହେୱାର୍ ନିଦାଣ୍ତାକେ ତା ତର୍ ଆରେ ତା ଲାତ୍ରାହି ତର୍ ଲେକାଆଜି ମାଚାତ୍। 2 ଆରେ, ଆନେଙ୍ଗ୍ ସରଗ୍ତାକେ ର ସବଦ୍ ୱେଚାଙ୍ଗ୍ ଯେ, ହେଦାଙ୍ଗ୍ ର ଗାଜା ଜାରାଣ୍ ଏଜୁଙ୍ଗ୍ ଆର୍ଜି ଗାର୍ଜା ଆତିଲେକେ କି ବାଦାଡ଼୍ ଗାର୍ଜା ଆତିଲେକେ ସବଦ୍ ଆତାତ୍। ଆରେ ପା ବେସିହେନି ମାନାୟାର୍ ରମାଟ୍ ଡୁଡୁଙ୍ଗା ଇସ୍ତିସ୍ ସବଦ୍ ଆନାତ୍ ହେଲେକେ ସବଦ୍ ଆତାତ୍। 3 ହେ ୧, ୪୪,୦୦୦ ମାନାୟାର୍, ଈଶ୍ୱର ସିଂହାସନ୍, ଚାରିଗଟା ଜିବୁନ୍ ମାନି ପଶୁ ଆରେ ୨୪ ଜାଣ୍ ପ୍ରାଚିନାର୍ ମୁମ୍ଦ ନିଲ୍ଚି ମାଚାର୍। ହେୱାର୍ ନେ ହେ ମାନାୟାର୍ ଇମ୍ଣାକାରିଙ୍ଗ୍ ଈଶ୍ୱର ପୁର୍ତିନି ମାନାୟାର୍ତାଙ୍ଗ୍ ଉଦାର୍ କିତାନ୍ନା। ହେୱାର୍ ରଞ୍ଜି ପୁନି କେର୍କଣ୍ କେର୍ଜି ମାଚାର୍ ହେ କେର୍କଣ୍ତିଙ୍ଗ୍ ଇନେର୍ ପା ହିକାଆଦେଙ୍ଗ୍ ଆଡୁର୍। 4 ଇନେସ୍କି ହେୱାର୍ ଇନାୱେଡ଼ାଙ୍ଗ୍ ପା ଦାରି କାମାୟ୍ କିୱି ଆଣ୍ଡ୍ରେନ୍ଲେକେ ପବିତ୍ର ଜିବୁନ୍ କାଟିକିଜି ମାଚାର୍। ହେୱାର୍ ମେଣ୍ଢା ଇନେର୍କି ଯୀଶୁଙ୍ଗ୍ ପିସ୍ତି ଇନେରିଙ୍ଗ୍ ପା ପୁଜା କିୱାତାର୍ନା। ହେୱାର୍ ମେଣ୍ଢା ଇନେର୍କି ଯୀଶୁ ଇମେ ହାଚିସ୍ ହେଇନି ହାଲ୍ଜି ମାଚାର୍। ହେୱାର୍ ନେ ହେ ମାନାୟାର୍ ଇନେରିଙ୍ଗ୍ ଈଶ୍ୱର ପୁର୍ତି ୱିଜୁ ପର୍କାର୍ ମାନାୟାର୍ତାଙ୍ଗ୍ ଉଦାର୍ କିତାନ୍ନା। ମାନାୟାର୍ ଇନେସ୍ ତା ବଗିଚାତାଙ୍ଗ୍ ପାର୍ତୁମ୍ ପାଡ଼୍ ଈଶ୍ୱରତିଙ୍ଗ୍ ହିନାର୍, ହେଲେକେ ହେୱାର୍ ପା ଈଶ୍ୱର ଆରେ ମେଣ୍ଢା ଇନେର୍କି ଯୀଶୁ କାଜିଙ୍ଗ୍ ବଗିଚାନି ପାର୍ତୁମ୍ ପାଡ଼୍ଲେକେ ଆତାର୍ନା। 5 ହେୱାର୍ ଇନାୱେଡ଼ାଙ୍ଗ୍ ପା ମିଚ୍ ୱେଚ୍ୱାତାର୍ନା, ହେୱାର୍ ଇନାୱେଡ଼ାଙ୍ଗ୍ ପା ବୁଲ୍ କିୱାତାର୍ନା। ଆରେ ହେୱାରିଙ୍ଗ୍ ଇନେର୍ ପା ବୁଲ୍ କିତାର୍ନା ଇଞ୍ଜି ଦସ୍ ହିଦେଙ୍ଗ୍ ଆଡୁର୍। ତିନ୍ଗଟା ଦୁତ୍କୁନି ବିଷୟ 6 ତାପାଚେ ଆରେ ରଞ୍ଜି ଦୁତ୍ ବାଦାଡ଼୍ତାକେ ଉମ୍ଜି ବୁଲା ଆନାକା ଆନେଙ୍ଗ୍ ହୁଡ଼୍ତାଙ୍ଗ୍। ହେୱାନ୍ ପୁର୍ତିନି ୱିଜୁ ଦେସ୍ତି ମାନାୟାର୍, ୱିଜୁ ଜାତିନି ମାନାୟାରିଙ୍ଗ୍ ଆରେ ୱିଜୁ ବାଷାନି ମାନାୟାରିଙ୍ଗ୍ ଶୁଣାୟ୍ କିନି କାଜିଙ୍ଗ୍ ୱିଜୁଦିନ୍ ମାନି ହାର୍ଦିକାବୁର୍ତିଙ୍ଗ୍ ଆସ୍ତି ମାଚାନ୍। 7 ହେୱାନ୍ ଇଲେକେ ଗାଜାକାଟ୍ କିଜି ୱେଚ୍ଚାନ୍ “ଏପେଙ୍ଗ୍ ଈଶ୍ୱରତିଙ୍ଗ୍ ପାଣ୍ଡ୍ରାଆଡ ଆରେ ହେୱାନିଙ୍ଗ୍ ଗୌରବ କିୟାଟ୍। ଇନେସ୍କି ହେୱାନ୍ ବିଚାର୍କିନି ବାହାତାକେ କୁଚ୍ଚି ବିଚାର୍କିନି ଦିନ୍ ୱାତାତେ। ଏପେଙ୍ଗ୍ ତାଙ୍ଗେଙ୍ଗ୍ ପୁଜା କିୟାଟ୍, ଇନେସ୍କି ହେୱାନ୍ ବାଦାଡ଼୍, ପୁର୍ତି, ହାମ୍ଦୁର୍ ଆରେ ଜାରିଆ ଏଜୁଙ୍ଗ୍ ଉବ୍ଜାଇ କିତାନ୍ନା।” 8 ତାପାଚେ ଆରେ ରଞ୍ଜି ଦୁଇ ନମ୍ବର୍ ଦୁତ୍ ପାର୍ତୁମ୍ ଦୁତ୍ ପାଚେ-ପାଚେ ଗାଜାକାଟ୍ କିଜି ୱେଚ୍ଚି ମାଚାତ୍, “ବାବିଲନ୍ ସହର୍ ବିନାସ୍ ଆତାତ୍, ଗାଜା ବାବିଲନ୍ ସହର୍ ୱିଜୁ ବିନାସ୍ ଆତାତ୍। ହେୱାନ୍ ୱିଜାର୍ ଜାତିନି ମାନାୟାରିଙ୍ଗ୍ ଅଙ୍ଗୁର୍ ରାସ୍ନି କାଲିଙ୍ଗ୍ ଉଟ୍ପାତାତ୍ ଇ ଅର୍ତ ବାବିଲନ୍ ସହର୍ନି ୱିଜାର୍ ମାନାୟାରିଙ୍ଗ୍ ମୁର୍ତି ପୁଜା, ଦାରି କାମାୟ୍ କିନାକା ଆରେ ମିଚ୍ ଦରମ୍ କିନାକା ହିକାୟ୍ କିତାତ୍।” 9 ତାପାଚେ ହେ ଦୁଇ ନମ୍ବର୍ ଦୁତ୍ ୱେଚ୍ଚି ପାଚେ ତିନ୍ ନମ୍ବର୍ ଦୁତ୍ ୱାଜି ୱେଚ୍ଚାତ୍, “ଇମ୍ଣି ମାନାୟାର୍ ହେ ପଶୁତିଙ୍ଗ୍ ତା ମୁର୍ତିତିଙ୍ଗ୍ ପୁଜା କିନାର୍ କି ତିନା କେଇଦ କି ନିଦାଣ୍ତାକେ ତା ଚିନ୍ ଅନାର୍।” 10 ଈଶ୍ୱର ହେୱାରିଙ୍ଗ୍ ବେସି ରିସା ଆନାନ୍ ଆରେ ହେୱାରିଙ୍ଗ୍ ଦଣ୍ଡ୍ ହିନାନ୍, ଆରେ ପା ଇଲେକେ କାମାୟ୍ କିନାକାରିଙ୍ଗ୍ ଈଶ୍ୱର ମେଣ୍ଢା ଇନେର୍କି ଯୀଶୁ ଆରେ ସରଗ୍ତାକେ ମାନି ପବିତ୍ର ଦୁତ୍କୁ ମୁମ୍ଦ ନାଣି ଆରେ ଗନ୍ଦକତାକେ ନରକ୍ତାକେ କାଡିକିନାତ୍। 11 ହେୱାରିଙ୍ଗ୍ କଷ୍ଟ ହିନି ନାଣିନି ଦୁଆଁ ୱିଜୁଦିନ୍ ବାଦାଡ଼୍ତାକେ ହାଲ୍ଜି ମାନାତ୍। ହେୱାର୍ ୱେଡ଼ା ନାଣା ଦୁଃକ୍ କଷ୍ଟ ପାୟାଆଜି ମାନାର୍, “ଇନେସ୍କି ହେୱାର୍ ହେ ପଶୁତିଙ୍ଗ୍ ଆରେ ତା ମୁର୍ତିତିଙ୍ଗ୍ ପୁଜା କିତାର୍, ଆରେ ହେୱାର୍ ପଶୁତି ଚିନ୍ତିଙ୍ଗ୍ ପା ଆସ୍ତାର୍। 12 ହେଦାଙ୍ଗ୍ କାଜିଙ୍ଗ୍ ଈଶ୍ୱର ୱିଜୁ ମାନାୟାରିଙ୍ଗ୍ ଇଲେକେ ଦୁଃକ୍ କଷ୍ଟ ୱାତିସ୍ ପା ସାସ୍ ଆଜି ମାନି ଦର୍କାର୍। ଈଶ୍ୱର ହେୱାରିଙ୍ଗ୍ ଇମ୍ଣି ଆଦେସ୍ ହିତିସ୍ ପା ହେ ଆଦେସ୍ତିଙ୍ଗ୍ ମାନିକିନି ଦର୍କାର୍ ଆରେ ଯୀଶୁଙ୍ଗ୍ ପାର୍ତି କିନାକା ବନ୍ଦ୍ କିୱି ଦର୍କାର୍।” 13 ତାପାଚେ ସରଗ୍ତାକେ ଆରେ ରକାନ୍ ୱେଚ୍ଚାକା ଆନେଙ୍ଗ୍ ୱେଚାଙ୍ଗ୍, “ଇ ୱିଜୁ ବିଷୟତିଙ୍ଗ୍ ଲେକିକିୟାଟ୍। ନଙ୍ଗୟ୍ତାଙ୍ଗ୍ ଇମ୍ଣି ମାନାୟାର୍ ମାପୃଙ୍ଗ୍ ପାର୍ତି କିଜି ହାଃନାର୍ ହେ ମାନାୟ୍ ଦନ୍ୟ, ଲାଗିଙ୍ଗ୍ ଆଁ, ଟିକ୍ କାତା ଇଞ୍ଜି ପବିତ୍ର ଆତ୍ମା ୱେଚ୍ଚାତ୍। ହେୱାର୍ ଦନ୍ୟ ଆନାର୍, ଇନେସ୍କି ହେୱାର୍ ତା କଷ୍ଟତାଙ୍ଗ୍ ଶାନ୍ତି ପାୟାଆନାର୍। ଆରେ ହେୱାର୍ ହାର୍ କାମାୟ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ପୁରଷ୍କାର୍ ହିନାନ୍।” ପୁର୍ତିତାକେ ତାସ୍ ରୁଣ୍ଡାଇ କିନି ଦିନ୍ 14 ତାପାଚେ ଆନେଙ୍ଗ୍ ହୁଡ଼୍ତାଙ୍ଗ୍, ଡ଼ିଞ୍ଜ୍ନି ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇନେର୍କି ଯୀଶୁ କୁଚ୍ଚି ମାଚାନ୍। ହେୱାନ୍ ତା କାପ୍ଡ଼ାତ ହନାତାଙ୍ଗ୍ ରସ୍ତି ମୁକୁଟ୍ ତୁସ୍ଦି ମାଚାନ୍ ଆରେ ତା କେଇଦ ଦାରା ମାନି କୱେସ୍ ମାଚାତ୍। 15 ତାପାଚେ ମନ୍ଦିର୍ତାଙ୍ଗ୍ ର ଦୁତ୍ ହସି ୱାଜି ଡ଼ିଞ୍ଜ୍ନି ବାଦାଡ଼୍ତାକେ କୁଚ୍ଚାକାନିଙ୍ଗ୍ ଗାଜାକାଟ୍ କିଜି ୱେଚ୍ଚାତ୍, “ପୁର୍ତିନି ତାସ୍ ହେନ୍ତାତେ ଆରେ ତାସ୍ ରୁଣ୍ଡାୟ୍ କିନି ଦିନ୍ ୱାତାତେ ଲାଗିଙ୍ଗ୍ କୱେସ୍ ବ୍ୟବହାର୍ କିୟାଟ୍।” 16 ହେଦାଙ୍ଗ୍ କାଜିଙ୍ଗ୍ ହେ ବାଦାଡ଼୍ତାକେ କୁଚ୍ଚାକାର୍ କୱେସ୍ତାଙ୍ଗ୍ ପୁର୍ତିନି ୱିଜୁ ତାସ୍ତିଙ୍ଗ୍ ତେସ୍ଦି ରୁଣ୍ଡାୟ୍ କିତାର୍। 17 ତାପାଚେ ସରଗ୍ନି ମନ୍ଦିର୍ତାଙ୍ଗ୍ ଆରେ ରଞ୍ଜି ଦୁତ୍ ହସି ୱାତାତ୍, ତା କେଇଦ ପା ରଞ୍ଜାଙ୍ଗ୍ ଦାରା କୱେସ୍ ମାଚାତ୍। 18 “ତାପାଚେ ପୁର୍ତିତିଙ୍ଗ୍ ନାଣି ହୁଦାଙ୍ଗ୍ ବିନାସ୍ କିନି ସରଗ୍ନି ବେଦିତାକେ ମାନି ଦୁତ୍ ଗାଜାକାଟ୍ କିଜି କୱେସ୍ ଆସ୍ତି ଦୁତ୍ତିଙ୍ଗ୍ ୱେଚ୍ଚାତ୍ କୱେସ୍ ବ୍ୟବହାର୍ କିଜି ପୁର୍ତିନି ଅଙ୍ଗୁର୍ ମାର୍ତି ୱିଜୁ ହେନ୍ତି ଅଙ୍ଗୁର୍ ପାଡ଼୍ ହଣ୍ଡାଟ୍। ଇନେସ୍କି ଅଙ୍ଗୁର୍ ୱିଜୁ ହେନ୍ତାତେ।” 19 ଲାଗିଙ୍ଗ୍ ହେ ଦୁତ୍ କୱେସ୍ ବ୍ୟବହାର୍ କିଜି ପୁର୍ତିନି ୱିଜୁ ଅଙ୍ଗୁର୍ ମାର୍ତି ପାଡ଼୍ତିଙ୍ଗ୍ ହଣ୍ତାତ୍, ଆରେ ହେ ୱିଜୁ ଅଙ୍ଗୁର୍ ଈଶ୍ୱର ଦଣ୍ଡ୍ ହିନି ଅଙ୍ଗୁର୍ କୁଣ୍ଡ୍ତାକେ ଅଙ୍ଗୁର୍ ଉହ୍ନି କାଜିଙ୍ଗ୍ ପକାୟ୍ କିତାତ୍। 20 ହେ ଅଙ୍ଗୁର୍ ୱିଜୁ ସହର୍ ବାର୍ତ୍ ମାନି ଈଶ୍ୱର ଦଣ୍ଡ୍ ହିନି ଅଙ୍ଗୁର୍ କୁଣ୍ଡ୍ତାକେ ଉସ୍ତାର୍, ଆରେ ହେ କୁଣ୍ଡ୍ତାଙ୍ଗ୍ ହସିମାଚି ନେତେର୍ ତିନିଶହ କିଲମିଟର୍ ଆରେ ଗଡ଼ାଙ୍ଗ୍ ଲାଗାମ୍ ପାତେକ୍ ନେତେର୍ ବାର୍ତି ଆତାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation