ହତ୍ତି 13 - New Testament in Pengo Parja Languageର ପଶୁ ହାମ୍ଦୁର୍ତାଙ୍ଗ୍ ହତ୍ତାତ୍ 1 ତାପାଚେ ହାମ୍ଦୁର୍ ବିତ୍ରେତାଙ୍ଗ୍ ର ପଶୁ ହସି ୱାନାକା ଆନେଙ୍ଗ୍ ହୁଡ଼୍ତାଙ୍ଗ୍। ତାଙ୍ଗେଙ୍ଗ୍ ସାତ୍ଗଟା କାପ୍ଡ଼ାଙ୍ଗ୍ ଆରେ ଦଶ୍ଗଟା କମଙ୍ଗ୍ ମାଚିକ୍, ହେ ଦଶ୍ଗଟା କମକାଙ୍ଗ୍ ଦଶ୍ଗଟା ମୁକୁଟ୍ ମାଚିକ୍ ଆରେ ହେ ସାତ୍ଗଟା କାପ୍ଡ଼ାଙ୍ଗ୍ ଈଶ୍ୱରତିଙ୍ଗ୍ ନିନ୍ଦାକିନି ତର୍ ଲେକାଆଜି ମାଚାତ୍। 2 ହେ ପଶୁ ଚିତା ବୁର୍କା ଲେକେ ଚନ୍ଞ୍ଜି ମାଚାତ୍, ମାତର୍ ତାଙ୍ଗେଙ୍ଗ୍ ବାଲୁଲେକେ ପାନାଙ୍ଗ୍ ମାଚିକ୍ ଆରେ ତା ୱେଇ ସିଂହ ବୁର୍କା ଲେକେ ମାଚାତ୍। ହେ ପଶୁତିଙ୍ଗ୍ ହେ ଗାଜା ରାଚ୍ ଶୟତାନ୍ ତା ଜାର୍ ଶାକ୍ତିତିଙ୍ଗ୍, ତା ସିଙ୍ଗାସନ୍ତିଙ୍ଗ୍, ଆରେ ଗାଜା ଅଦିକାର୍ ହେ ପୁଶୁତିଙ୍ଗ୍ ହିତାତ୍। 3 ହେ ପଶୁତି ର କାପ୍ଡ଼ାତ ବେସି ମାଡ୍ ବାଜାଆତି ଗାଅଲେକେ ଚନ୍ଞ୍ଜି ମାଚାତ୍, ମାତର୍ ହେୱାନ୍ ହାର୍ ଆଜି ମାଚାନ୍। ହେ ପଶୁ ଗାଅତିଙ୍ଗ୍ ହାର୍ ଆନାକା ହୁଡ଼୍ଜି ପୁର୍ତିନି ୱିଜାର୍ ମାନାୟ୍ ଚାନିଆ ଆଜି ମାଚାର୍ ଆରେ ହେୱାର୍ ହେ ପଶୁନି ଚେଲାର୍ ଆତାର୍। 4 ୱିଜାର୍ ମାନାୟାର୍, ହେ ଗାଜା ରାଚ୍ ଶୟତାନ୍ତିଙ୍ଗ୍ ପୁଜା କିତାର୍, ଇନେସ୍କି ହେ ରାଚ୍ ଶୟତାନ୍ ହେ ପଶୁତିଙ୍ଗ୍ ହେଲେକେ ଶାକ୍ତି ହିଜିମାଚାତ୍। ହେୱାର୍ ହେ ପଶୁତିଙ୍ଗ୍ ପା ପୁଜା କିତାର୍। ହେୱାର୍ ୱେଚ୍ଚାର୍, “ଇ ପଶୁତିଙ୍ଗ୍ ଶାକ୍ତି ମାନିଲେକେ ଇନେରିଙ୍ଗ୍ ଶାକ୍ତି ହିଲେତ୍, ଆରେ ଇନେର୍ ପା ଇ ପଶୁ ହୁଦାଙ୍ଗ୍ ଯୁଜ୍ କିଦେଙ୍ଗ୍ ଆଡୁର୍।” 5 ତାପାଚେ ହେ ପଶୁ ଈଶ୍ୱରତିଙ୍ଗ୍ ବିରଦ୍ କିଜି ବେସି ନିନ୍ଦାକିଜି ୱେଚ୍ଚି ମାଚାତ୍, ହେଲେକେ କାମାୟ୍ କିନି କାଜିଙ୍ଗ୍ ଚାଳିଶ୍ ଦୁଇ ମାସ୍ ପାତେକ୍ ହେ ପଶୁତିଙ୍ଗ୍ ଅଦିକାର୍ ହିଜିମାଚାତ୍। 6 ହେ ପଶୁ ଈଶ୍ୱରତିଙ୍ଗ୍, ତା ତର୍ଦିଙ୍ଗ୍, ହେୱାନ୍ ମାନି ବାହାତିଙ୍ଗ୍ ଆରେ ସରଗ୍ତାକେ ମାନି ୱିଜାକାରିଙ୍ଗ୍ ଅବିଶାପ୍ ହିଜି ନିନ୍ଦା ହିଦେଙ୍ଗ୍ ଆରମ୍ କିତାତ୍। 7 ହେ ପଶୁତିଙ୍ଗ୍ ଈଶ୍ୱର ପବିତ୍ର ମାନାୟାର୍ ବିରୁଦ୍ତାକେ ଯୁଜ୍ କିଜି ଆରାୟ୍ କିଦେଙ୍ଗ୍ ଅଦିକାର୍ ହିଜି ମାଚାର୍। ଆରେ ପା ହେ ପଶୁତିଙ୍ଗ୍ ୱିଜୁ ଦେସ୍ତି ମାନାୟାରିଙ୍ଗ୍, ୱିଜୁ ଜାତିନି ମାନାୟାରିଙ୍ଗ୍, ୱିଜୁ ବାଷାନି ମାନାୟାରିଙ୍ଗ୍ ସାସନ୍ କିନି ଅଦିକାର୍ ହିଜି ମାଚାର୍। 8 ଆରେ ପୁର୍ତିନି ୱିଜାର୍ ମାନାୟାର୍ ହେ ପଶୁତିଙ୍ଗ୍ ପୁଜା କିତାର୍, ମାତର୍ ମେଣ୍ଢା ଇନେର୍କି ଯୀଶୁ ଜିବୁନ୍ ପାୟାଆନି ମାନାୟାର୍ ତର୍ ଲେକାଆତି ବହିତାକେ ଇମ୍ଣାକାର୍ ତର୍ ଲେକାଆଜି ମାଚାତ୍ ହେୱାର୍ ନେ ହେ ପଶୁତିଙ୍ଗ୍ ପୁଜା କିୱାତାର୍ନା। ହେ ମେଣ୍ଢା ଇନେର୍କି ଯୀଶୁ ନେ ପୁର୍ତି ଉବ୍ଜା ଆନିତାଙ୍ଗ୍ ହେୱାର୍ କାଜିଙ୍ଗ୍ ହାଃଜି ମାଚାନ୍। 9 ଇମ୍ଣାକାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା ହେୱାର୍ ଈଶ୍ୱର ଆତ୍ମା ଇନାକା ୱେଚ୍ଚାନାତା ହେଦାଙ୍ଗ୍ ଜାଗ୍ରତ୍ ଆଜି ୱେନି ଦର୍କାର୍। 10 ଇମ୍ଣି ମାନାୟାରିଙ୍ଗ୍ ଆଗେତାଙ୍ଗ୍ ଜଇଲ୍ ଇଞ୍ଜ ଇଡ଼୍ଦେଙ୍ଗ୍ ବାଚିକିତାର୍ନା। ହେୱାରିଙ୍ଗ୍ ବନ୍ଦିକିଜି ଜଇଲ୍ ଇଞ୍ଜ ଇଟ୍ନାର୍, ଆରେ ଇମ୍ଣି ମାନାୟାରିଙ୍ଗ୍ କାଣ୍ଡା ହୁଦାଙ୍ଗ୍ ମାର୍ନେ ଅସ୍ତେଙ୍ଗ୍ ବାଚି କିତାନ୍ନା ହେୱାରିଙ୍ଗ୍ କାଣ୍ଡା ହୁଦାଙ୍ଗ୍ ମାର୍ନେ ଅହ୍ନାର୍। ଲାଗିଙ୍ଗ୍ ଇମ୍ଣି ମାନାୟାର୍ ଈଶ୍ୱର ଲକ୍ ଆତାର୍ନା ହେୱାର୍ ଦୁଃକ୍ କଷ୍ଟ ସମ୍ବାଲି କିଜି ତାଙ୍ଗେଙ୍ଗ୍ ପାର୍ତି କିଜି ମାନି ଦର୍କାର୍। ଦୁଇ ନମ୍ବର୍ ପଶୁ ପୁର୍ତିତାଙ୍ଗ୍ ୱାନାକା ହୁଡ଼୍ତାଙ୍ଗ୍ 11 ତାପାଚେ ଆନେଙ୍ଗ୍ ଆରେ ର ପଶୁତିଙ୍ଗ୍ ପୁର୍ତିତାଙ୍ଗ୍ ନିଙ୍ଗ୍ଞ୍ଜି ୱାନାକା ହୁଡ଼୍ତାଙ୍ଗ୍, ତାଙ୍ଗେଙ୍ଗ୍ ମେଣ୍ଢାତିଙ୍ଗ୍ଲେକେ ରିଣ୍ଡାଙ୍ଗ୍ କମଙ୍ଗ୍ ମାଚିକ୍ ଆରେ ତା କାଟ୍ ଗାଜା ରାଚ୍ କାଟ୍ଲେକେ ମାଚାତ୍। 12 ହେୱାନ୍ ପାର୍ତୁମ୍ ପଶୁ ଶାକ୍ତି ହୁଦାଙ୍ଗ୍ କାମାୟ୍ କିତିଲେକେ ହେୱାନ୍ କିଜି ମାଚାନ୍। ହେୱାନ୍ ଇଚା କିଜି ମାଚାନ୍ ଯେ, ପୁର୍ତିନି ୱିଜାର୍ ମାନାୟାର୍ ହେ ପାର୍ତୁମ୍ ପଶୁତିଙ୍ଗ୍ ପୁଜାକିନି କାଜିଙ୍ଗ୍ ଜବର୍ ଦସ୍ତ୍ କିଜି ମାଚାନ୍ ଇନେରିଙ୍ଗ୍ ଆଗେ ଗାଅ ଆଜି ମାଚାତ୍ ମାତର୍ ପାଚେ ହାର୍ ଆଜି ମାଚାନ୍। 13 ହେୱାନ୍ ମାନାୟାର୍ ମୁମ୍ଦ ଚାନିଆ କାମାୟ୍ କିଜି ମାଚାନ୍, ହେ ଚାନିଆଆନି କାମାୟ୍ ଇଲେକେ ମାଚାତ୍ ଯେ, ୱିଜାର୍ ମାନାୟାର୍ ହୁଡ଼୍ତିହିଙ୍ଗ୍ ହେ ଦୁଇ ନମ୍ବର୍ ପଶୁ ବାଦାଡ଼୍ତାଙ୍ଗ୍ ପୁର୍ତିତାକେ ନାଣି ବାର୍ହା କିଜି ମାଚାତ୍। 14 ହେ ପାର୍ତୁମ୍ ପଶୁନି ବାଦୁଲ୍ତାଙ୍ଗ୍ ଦୁଇ ନମ୍ବର୍ ପଶୁତିଙ୍ଗ୍ ଚାନିଆ କାମାୟ୍ କିନି ଅଦିକାର୍ ଈଶ୍ୱର ହିଜିମାଚାନ୍। ହେ ପଶୁ ଚାନିଆଆନି କାମାୟ୍ କିଜି ପୁର୍ତିନି ୱିଜାର୍ ମାନାୟାରିଙ୍ଗ୍ ଟକାୟ୍ କିଜି ମାଚାତ୍। ହେ ପଶୁ ମାନାୟାରିଙ୍ଗ୍ ପାର୍ତୁମ୍ ପଶୁନି ମୁର୍ତି ରସ୍ତେଙ୍ଗ୍ ଆଦେସ୍ ହିତାନ୍, ଇମ୍ଣି ପାର୍ତୁମ୍ ପଶୁ କାଣ୍ଡାତାଙ୍ଗ୍ ହାଃଜି ମାଚାତ୍ ମାତର୍ ଆରେରଗ ଜିବୁନ୍ ଆତାତ୍ନା। 15 ହେ ଦୁଇ ନମ୍ବର୍ ପଶୁତିଙ୍ଗ୍ ପାର୍ତୁମ୍ ପଶୁ ମୁର୍ତିତିଙ୍ଗ୍ ଜିବୁନ୍ କିନି ଅଦିକାର୍ ଈଶ୍ୱର ହିଜିମାଚାନ୍। ଲାଗିଙ୍ଗ୍ ହେ ମୁର୍ତି ବେଣ୍କିଦେଙ୍ଗ୍ ଆଡ଼୍ତାତ୍ ଆରେ ହେ ମୁର୍ତି ୱିଜାର୍ ମାନାୟାରିଙ୍ଗ୍ ଆଦେସ୍ ହିନାତ୍ ଯେ, ତାଙ୍ଗେଙ୍ଗ୍ ପୁଜା କିୱି ମାନାୟାରିଙ୍ଗ୍ ମାର୍ନେ ଅହାଟ୍। 16 ହେ ପଶୁ ୱିଜୁ ଗାଜା ଆରେ, ହାଉକାର୍ ଆରେ ଗରିବ୍, ଚାକର୍ ଆରେ ଚାକର୍ ଆୱି ମାନାୟାର୍ ନିଦାଣ୍ତାକେ ନଇଲେ ତିନା କେଇଦ ର ଚିନା ଅଦେଙ୍ଗ୍ ଜବର୍ ଦସ୍ତ୍ କିନାତ୍। 17 ଆରେ, ହେ ଚିନା, ତିନା କେଇଦ କି ନିଦାଣ୍ତାକେ ଅୱାଦାଙ୍ଗ୍ ମାଚିସ୍ ଇନେର୍ ପା କଡ଼୍ଦେଙ୍ଗ୍ କି ପତେଙ୍ଗ୍ ଆଡୁର୍, ହେ ଚିନା ପଶୁ ତର୍ କି ନମ୍ବର୍ ଆଜି ମାନ୍ଙ୍ଗାନାତ୍। 18 ଇ ନମ୍ବର୍ତିଙ୍ଗ୍ ପୁଞ୍ଜେଙ୍ଗ୍ ବୁଦି ଦରକାର୍ ଆନାତ୍। ଲାଗିଙ୍ଗ୍ ଇନେରିଙ୍ଗ୍ ବୁଦି ମାନାତ୍, ଇ ପଶୁ ନମ୍ବର୍ତିଙ୍ଗ୍ ବୁଜା ଆଏନ୍, ଇନେସ୍କି ଇ ୬୬୬ ନମ୍ବର୍ ରଞ୍ଜାଙ୍ଗ୍ ମାନାୟ୍ ନମ୍ବର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation