ହତ୍ତି 12 - New Testament in Pengo Parja Languageର କଗ୍ଲେ ଆରେ ଗାଜା ରାଚ୍ନି ବିଷୟ 1 ଏଚେପାଦ୍ନା ହେଦାଙ୍ଗ୍ ୱିସ୍ତାତ୍, ବାଦାଡ଼୍ତାକେ ର ଚାନିଆଆନି ଚିନ୍ ଚନ୍ଞ୍ଚାତ୍। ହେଦାଙ୍ଗ୍ ଇଲେକେ ର କଗ୍ଲେ ଲେଞ୍ଜ୍ ଜପି ନିଲ୍ଚି ମାଚାତ୍ ଆରେ ୱେଡ଼ାଲେକେ ଚଞ୍ଜ୍ନି ହେନ୍ଦ୍ରା ଉସ୍ପି ମାଚାତ୍, ହେଦେଲ୍ ତା କାପ୍ଡ଼ାତ ର ମୁକୁଟ୍ ତୁସ୍ଦି ମାଚାତ୍ ହେ ମୁକୁଟ୍ତାକେ ବାରଗଟା ହୁକାଙ୍ଗ୍ ମାଚିକ୍। 2 ହେ କଗ୍ଲେ ପଟଆଜି ମାଚାତ୍ ଆରେ ହିମ୍ଣା ଜନମ୍କିନି ସମୟ୍ ଆଜି ମାଚାତ୍, ହେଦେଲ୍ ହିମ୍ଣା ଜନମ୍ କିଜିମାଚି କାଜିଙ୍ଗ୍ ନନାକାଦିଙ୍ଗ୍ କଷ୍ଟ ପାୟାଆଜି ମାଚାତ୍। 3 ହେଦାପ୍ରେ ବାଦାଡ଼୍ତାକେ ଆରେ ରଞ୍ଜାଙ୍ଗ୍ ଚାନିଆଆନି ଚିନ୍ ଆନେଙ୍ଗ୍ ହୁଡ଼୍ତାଙ୍ଗ୍। ହେବେ ରାତା କଲର୍ ର ଗାଜା ରାଚ୍ ମାଚାତ୍ ତାଙ୍ଗେଙ୍ଗ୍ ସାତ୍ଗଟା କାପ୍ଡ଼ାଙ୍ଗ୍ ଆରେ ଦଶ୍ଗଟା କମଙ୍ଗ୍ ମାଚିକ୍, ଆରେ ହେ ରାଚ୍ କାପ୍ଡ଼ାକାଙ୍ଗ୍ ସାତ୍ଗଟା ମୁକୁଟ୍ ମାଚିକ୍ ହେ ରାଚ୍ ନେ ଶୟତାନ୍। 4 ହେ ଗାଜା ରାଚ୍ ତା ନିଙ୍ଗୁଣ୍ ହୁଦାଙ୍ଗ୍ ବାଦାଡ଼୍ନି ତିନ୍ ବାଗ୍ନି ର ବାଗ୍ ହୁକାକାଙ୍ଗ୍ ପୁର୍ତିତାକେ ତୁସିହିତାତ୍। ହେ କଗ୍ଲେ ହିମ୍ଣା ଜନମ୍ କିତି ଦାପ୍ରେ ତିନାଙ୍ଗ୍ମା ଇଞ୍ଜି ହେ ରାଚ୍ ହେ କଗ୍ଲେତାକେ ୱାଜି ନିଲ୍ଚି ମାଚାତ୍। 5 ଟିକ୍ ସମୟ୍ ୱେଡ଼ାଙ୍ଗ୍ ହେ କଗ୍ଲେ କାଡ଼୍ଦେଙ୍ଗ୍ ଜନମ୍ କିତାତ୍, ହେଦାପ୍ରେ ହେ କାଡ଼୍ଦେଙ୍ଗ୍ ଈଶ୍ୱର ଆରେ ତା ସିଙ୍ଗାସନ କଚଣ୍ତାକେ ଜେଲ୍ଜି ଅତାର୍, ଆରେ ହେ ରାଚ୍ ହେ ଜନମ୍ ଆତି କାଡ଼୍ଦେଙ୍ଗ୍ ଚିଞ୍ଜେଙ୍ଗ୍ ଆଡ୍ୱାତାତ୍। ହେ କାଡ଼୍ଦେ ୱିଜୁ ଆଦିକାର୍ ହୁଦାଙ୍ଗ୍ ପୁର୍ତିନି ୱିଜୁ ଜାତିନି ମାନାୟାରିଙ୍ଗ୍ ଲୱା ବେଡ୍ଗା ହୁଦାଙ୍ଗ୍ ସାସନ୍ କିନାନ୍। 6 ଆରେ, ହେ କଗ୍ଲେ ଟାଙ୍ଗ୍ରାବାହାତାକେ ହନ୍ଞ୍ଚି ହାଚାତ୍, ଇମେତାକେ ଈଶ୍ୱର ୧,୨୬୦ ଦିନ୍ ପାତେକ୍ ହେ କଗ୍ଲେ ଡ଼ୁଗ୍ନି କାଜିଙ୍ଗ୍ ହେ ବାହା ରସ୍ତି ମାଚାନ୍। 7 ତାପାଚେ ସରଗ୍ତାକେ ମୀଖାୟେଲ ଆରେ ତା ଦୁତ୍କୁ ହେ ଗାଜା ରାଚ୍ ଆରେ ତା ଦୁତ୍କୁ ହୁଦାଙ୍ଗ୍ ଯୁଜ୍ କିତାର୍। 8 ହେ ଯୁଜ୍ତାକେ ହେ ରାଚ୍ ଆରେ ତା ଦୁତ୍କୁ ଆରା ଆତିକ୍, ହେୱାର୍ ଆରେ ସରଗ୍ତାକେ ମାଞ୍ଜେଙ୍ଗ୍ ଆଡ୍ୱିତିକ୍। 9 ଲାଗିଙ୍ଗ୍ ହେ ରାଚ୍ ଆରେ ତା ଦୁତ୍କୁକାଙ୍ଗ୍ ପୁର୍ତିତାକେ ତୁସିହିତାର୍, ହେ ରାଚ୍ତିଙ୍ଗ୍ ଆଗେ ପୁର୍ବେନି ଶୟତାନ୍ ଇନେର୍ ପୁର୍ତିନି ୱିଜୁ ମାନାୟାରିଙ୍ଗ୍ ଟକାୟ୍ କିନାତା। ହେୱାନ୍ ନେ ଗାଜା ରାଚ୍ ଲେକେ ଚଞ୍ଜ୍ନାତା। 10 ତାପାଚେ ସରଗ୍ତାକେ ଗାଜା କାଟ୍ତାଙ୍ଗ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍। ହେଦାଙ୍ଗ୍ ଇଲେକେ ମାଚାତ୍, “ନଙ୍ଗୟ୍ ମା ମାପୃ ଈଶ୍ୱର ତା ମାନାୟାରିଙ୍ଗ୍ ଉଦାର୍ କିନାନ୍, ନଙ୍ଗୟ୍ ମା ଈଶ୍ୱର ଜିତା ଆତାନ୍ନା। ନଙ୍ଗୟ୍ ହେୱାନ୍ ତା ଶାକ୍ତି ହୁଦାଙ୍ଗ୍ ରାଜା ଲେକେ ସାସନ୍ କିନାନ୍। ଆରେ ନଙ୍ଗୟ୍ ତା ଖ୍ରୀଷ୍ଟ ପୁର୍ତିନି ମାନାୟାର୍ ଜପି ତା ଅଦିକାର୍ ଚଚ୍ନାନ୍। ଇନେସ୍କି ଈଶ୍ୱର ଆଗେ ନିଲ୍ଚି ଇମ୍ଣି ଶୟତାନ୍ ମା ଟଣ୍ଡାର୍ ବିରୁଦ୍ତାକେ ଇଞ୍ଜି ମାଚାତ୍, ହେ ଶୟତାନ୍ ନଙ୍ଗୟ୍ ଈଶ୍ୱର ଆଗେ ହିଲେତ୍ ମାତର୍ ସରଗ୍ତାଙ୍ଗ୍ ପେସ୍ତାର୍। 11 ମା ପାର୍ତିକିନି ଟଣ୍ଡାର୍ ମେଣ୍ଢା ଇନେର୍କି ଯୀଶୁ ନେତେର୍ ଶାକ୍ତି ହୁଦାଙ୍ଗ୍, ଇନେର୍ ହେୱାର୍ ପାପ୍ କାଜିଙ୍ଗ୍ ହାଃଜି ମାଚାନ୍, ହେ ଶୟତାନ୍ତିଙ୍ଗ୍ ଆରାୟ୍ କିତାର୍। ହେୱାର୍ ତାଙ୍ଗେଙ୍ଗ୍ ଆରାୟ୍ କିତାର୍ ଇନେସ୍କି ହେୱାର୍ ଦୁଃକ୍ କଷ୍ଟ ପାୟାଆଜି ହାଃତିସ୍ ପା ହେ ମେଣ୍ଢା ଇନେର୍କି ଯୀଶୁଙ୍ଗ୍ ନେ ମା ମାପୃ ଇଞ୍ଜି ୱେଚ୍ଚି ମାଚାର୍। 12 ସରଗ୍ତାକେ ଏଚେକ୍ ହେନି ମାନାଦେର୍ ୱିଜାଦେର୍ ୱାରିକିନି ଦର୍କାର୍, ମାତର୍ ଇମ୍ଣି ମାନାୟାର୍ ପୁର୍ତି ଆରେ ହାମ୍ଦୁର୍ତାକେ ମାନାରା। ହେୱାର୍ ବେସି ଦୁଃକ୍ କଷ୍ଟ ପାୟାଆନାର୍, ଇନେସ୍କି ହେ ରାଚ୍ ଶୟତାନ୍ ବେସି ରିସାଆଜି ପୁର୍ତିତାକେ ହାଚାତ୍ନା ହେୱାନ୍ ପୁଚାନ୍ନା ଯେ, ତା ସେସ୍ଦିନ୍ ଇକାୱାତାତେ।” 13 ଆରେ ଏଚେକାଡ଼୍ଦ ହେ ଗାଜା ରାଚ୍ ଶୟତାନ୍ ଜାର୍ତିଙ୍ଗ୍ ପୁଞ୍ଜେଙ୍ଗ୍ ଆଡ଼୍ତାତ୍ ତାଙ୍ଗେଙ୍ଗ୍ ସରଗ୍ତାଙ୍ଗ୍ ପୁର୍ତିତାକେ ତୁସିହିତାର୍, ହେ ହିମ୍ଣା ଜନମ୍ କିଜିମାଚି ହେ କଗ୍ଲେଙ୍ଗ୍ ଦାସ୍ତି ବୁଲାଆତାତ୍। 14 ମାତର୍ ଈଶ୍ୱର ରସ୍ତି ଟାଙ୍ଗ୍ରାବାହାତାକେ ହେ ରାଚ୍ ୱେଇଦାଙ୍ଗ୍ ରକ୍ଷା ପାୟା ଆଦେଙ୍ଗ୍। ହେ କଗ୍ଲେଙ୍ଗ୍ ଗାଜା ମୁକ୍ରିଲେକେ ଉମ୍ଜି ହାଞ୍ଜେଙ୍ଗ୍ ରିଣ୍ଡାଙ୍ଗ୍ ଗାଜା ମାରାଙ୍ଗ୍ ହିଜିମାଚାନ୍, ଇମେତାକେ ହେ କଗ୍ଲେ ତିନ୍ ବାର୍ହୁ ଅଦା ପାତେକ୍ ଡ଼ୁଗ୍ଜି ମାନାତ୍ ଲାଗିଙ୍ଗ୍ ଶୟତାନ୍ ହେ କଗ୍ଲେ କଚଣ୍ତାକେ ଇକୁତ୍। 15 ତାପାଚେ ହେ ରାଚ୍ ନାଗୁଡ଼୍ଲେକେ ତା ୱେଇଦାଙ୍ଗ୍ ହେ କଗ୍ଲେଙ୍ଗ୍ ବଡ଼ାୟ୍ କିଜି ଅଦେଙ୍ଗ୍ ଏଜୁଙ୍ଗ୍ ତା ଜପି ୱାକ୍ତାତ୍। 16 ମାତର୍ ହେ କଗ୍ଲେଙ୍ଗ୍ ସାଇଜ କିନି କାଜିଙ୍ଗ୍, ହେ ଗାଜା ରାଚ୍ ୱାକ୍ତି ଏଜୁକାଙ୍ଗ୍ ମେଦ୍ନି ଜେଲ୍ତାତ୍। 17 ତାପାଚେ ହେ ଗାଜା ରାଚ୍ ହେ କଗ୍ଲେଙ୍ଗ୍ ବେସି ରିସାଆତାତ୍, ଆରେ ତା ମେହିର୍ ବିରୁଦ୍ତାକେ, ଇନେର୍ ଈଶ୍ୱର ଆଦେସ୍ତିଙ୍ଗ୍ ମାନିକିଜି ମାଚାର୍ ଆରେ ଆପେଙ୍ଗ୍ ଯୀଶୁର୍ ଲକ୍ ଇଞ୍ଜି ୱେଚ୍ଚି ମାଚାର୍ ହେୱାର୍ ହୁଦାଙ୍ଗ୍ ଯୁଜ୍ କିଦେଙ୍ଗ୍ ଆରମ୍ କିତାତ୍। 18 ତାପାଚେ ହେ ରାଚ୍ ହାମ୍ଦୁର୍ କାଣ୍ଡିତାକେ ନିଲ୍ତାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation