ହତ୍ତି 11 - New Testament in Pengo Parja Languageରିଣ୍ଡାଙ୍ଗ୍ ସାକିଙ୍ଗ୍ 1 ଲାଗିଙ୍ଗ୍ ନାଙ୍ଗେଙ୍ଗ୍ ର ଲାଚ୍ନି ବେଡ୍ଗା ହିତ୍ତାନ୍ ଆରେ ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, “ହାଲା ଆରେ ଈଶ୍ୱର ମନ୍ଦିର୍ ଆରେ ସରଗ୍ନି ବେଦିତିଙ୍ଗ୍ ଲାଚା, ଆରେ ଗାଣାକିୟା ଏଚେଜାଣ୍ ଈଶ୍ୱରତିଙ୍ଗ୍ ହେବା କିନାକାର୍ ମାନାର୍।” 2 ମାତର୍ ପିଣ୍ଡାତିଙ୍ଗ୍ ଲାଚ୍ମା, ଇନେସ୍କି ହେ ବାହା ଈଶ୍ୱରତିଙ୍ଗ୍ ପୁନ୍ୱିତି ମାନାୟାର୍ କାଜିଙ୍ଗ୍ ହିତାର୍ନା, ହେୱାର୍ ୪୨ ମାସ୍ ପାତେକ୍ ନା ପବିତ୍ର ସହର୍ତାକେ ସାସନ୍ କିନାର୍। 3 ଆରେ ଆନେଙ୍ଗ୍ ନା ରିଣ୍ଡାଙ୍ଗ୍ ସାକିକାଙ୍ଗ୍ ଶାକ୍ତି ହିନାଙ୍ଗ୍, ଆରେ ହେୱାର୍ ଗାଗାଡ଼୍ତାକେ ବାସ୍ତା ଉସ୍ପି ନାବେତାଙ୍ଗ୍ ୱେନ୍ଞ୍ଜି, ମାନାୟାରିଙ୍ଗ୍ ହେୱାର୍ ୧,୨୬୦ ଦିନ୍ ପାତେକ୍ ଶୁଣାୟ୍ କିନାର୍। 4 ଇ ରିୟାର୍ ଈଶ୍ୱରନି ସାକି ଆନାତା ଭବିଷ୍ଯତବକ୍ତାର୍, ହେୱାର୍ ପୁର୍ତିନି ମାପୃ ଈଶ୍ୱର ଆଗେ ମାନି ରିଣ୍ଡାଙ୍ଗ୍ ଜିତ୍ମାର୍ ଆରେ ବଇଟା ଇଟ୍ନି ଷ୍ଟାଣ୍ଡ୍ଲେକେ। 5 ଯଦି ଇନେର୍ ପା ହେ ଭବିଷ୍ୟତବକ୍ତାରିଙ୍ଗ୍ ଅସ୍ତେଙ୍ଗ୍ ଉପାୟ୍ କିନାର୍, ତା ସତୃର୍ ହାଃଜି ହାନାର୍ ଇନେସ୍କି ତା ୱେଇଦାଙ୍ଗ୍ ନାଣି ହସିମାନାତ୍, ଇଲେକେ ହେୱାର୍ ତାଙ୍ଗେଙ୍ଗ୍ ଅସ୍ତେଙ୍ଗ୍ ୱାନି ସତୃରିଙ୍ଗ୍ ମାର୍ନେ ଅହ୍ନାର୍। 6 ହେ ଦିନ୍ ହେୱାର୍ ଈଶ୍ୱର କାତା ଶୁଣାୟ୍ କିନାର୍, ଆରେ ଈଶ୍ୱର ହେୱାରିଙ୍ଗ୍ ବାଦାଡ଼୍ତାଙ୍ଗ୍ ବାର୍ହା ବନ୍ଦ୍ କିନି ଅଦିକାର୍ ହିନାନ୍, ଆରେ ପା ଈଶ୍ୱର ହେୱାରିଙ୍ଗ୍ ନାଗୁଡ଼୍ ଆରେ ହାମ୍ଦୁର୍ ଏଜୁକାଙ୍ଗ୍ ନେତେର୍ ଲେକେ ରାତା କିଦେଙ୍ଗ୍ ଅଦିକାର୍ ହିଜି ମାନାନ୍। ହେୱାର୍ ତା ଜାର୍ ଇଚା ଅନୁସାରେ ପୁର୍ତିତିଙ୍ଗ୍ ନଷ୍ଟ କିଦେଙ୍ଗ୍ ବିନ୍-ବିନ୍ ବିପତ୍ ହିନାର୍। 7 ଏଚେପାଦ୍ନା ହେ ରିଣ୍ଡାଙ୍ଗ୍ ସାକି ଈଶ୍ୱର କାତାତିଙ୍ଗ୍ ଶୁଣାୟ୍ କିନାକା ୱିଜ୍ନାତ୍, ପାତାଳ୍ କୁଣ୍ଡ୍ତାଙ୍ଗ୍ ରଞ୍ଜି ରାନ୍ତି ପଶୁ ହସି ୱାନାତ୍। ହେ ପଶୁ ତା ହୁଦାଙ୍ଗ୍ ଯୁଜ୍ କିଜି ଆରାୟ୍ କିନାତ୍ ଆରେ ହେ ରିଣ୍ଡାଙ୍ଗ୍ ସାକିକାଙ୍ଗ୍ ମାର୍ନେ ଆହ୍ନାତ୍। 8 ଆରେ ତା ହାଃତି ଗାଗାଡ଼୍ ଯିରୁଶାଲାମ ସହର୍ନି ରାସ୍ତାତାକେ ମାନ୍ଗାନାତ୍, ଇମ୍ଣି ଗାଜା ସହର୍ତାକେ ଯୀଶୁ ମାପୃଙ୍ଗ୍ କୃଶକାଟ୍ତାକେ ମାର୍ନେ ଅସ୍ତି ମାଚାର୍। ହେ ସହର୍ତିଙ୍ଗ୍ ସଦୋମ ଆରେ ମିସର୍ ଦେସ୍ଲେକେ ଇନ୍ୟା ଆନାତ୍, ଇନେସ୍କି ହେ ସହର୍ନି ମାନାୟାର୍ ସଦୋମ ଆରେ ମିସର୍ ଦେସ୍ନି ମାନାୟାର୍ଲେକେ କରାପ୍। 9 ୱିଜୁ ଦେସ୍ନି, ୱିଜୁ କୁଟୁମ୍ନି, ୱିଜୁ ଜାତିନି ମାନାୟାର୍ ହେ ରିୟାର୍ ହାଃତି ଗାଗାଡ଼୍ତିଙ୍ଗ୍ ତିନ୍ଦିନ୍ ଅଦା ପାତେକ୍ ୱାଜି ହୁଡ଼୍ନାର୍, ମାତର୍ ହେ ସହର୍ନି ମାନାୟାର୍ ଗାଗାଡ଼୍ତିଙ୍ଗ୍ ମୁଚ୍ଚେଙ୍ଗ୍ ହିଉର୍। 10 ହେ ରିୟାର୍ ଭବିଷ୍ୟତବକ୍ତାର୍ ହାଃତିଲେ, ଇ ପୁର୍ତିନି ମାନାୟାର୍ ୱାରି କିନାର୍, ଆରେ ଜାର୍-ଜାର୍ତିଙ୍ଗ୍ ପୁରଷ୍କାର୍ ହିବା ଆନାର୍, ଇନେସ୍କି ଇ ରିୟାର୍ ଭବିଷ୍ୟତ୍ବକ୍ତାର୍ ପୁର୍ତିନି ମାନାୟାରିଙ୍ଗ୍ ବେସି ହରିଆଣ୍ କିଜି ମାଚାର୍। 11 ମାତର୍ ତିନ୍ଦିନ୍ ଅଦା ପାଚେ ଜିବୁନ୍ଆନି ଆତ୍ମା ତା ବିତ୍ରେ ଈଶ୍ୱର ପକ୍ତାନ୍, ଆରେ ହେୱାର୍ ଜିବୁନ୍ଆଜି ନିଲ୍ତାର୍। ଆରେ ଏଚେଜାଣ୍ ହେ ରିୟାର୍ ହାଃତି ଭବିଷ୍ୟତ୍ବକ୍ତାର୍ ଆରେରଗ ଜିବୁନ୍ ଆନାକା ହୁଡ଼୍ଜି ହେୱାର୍ ପାଣ୍ଡ୍ରା ଆନାର୍। 12 ତାପାଚେ ହେୱାରିଙ୍ଗ୍ ସରଗ୍ତାଙ୍ଗ୍ ର ଗାଜାକାଟ୍ କିଜି ହିର୍ବାତାନ୍, “ଇବେ ନିଙ୍ଗ୍ଞ୍ଜି ୱାଡ” ଆରେ ହେୱାର୍ ବାଦାଡ଼୍ ହୁଦାଙ୍ଗ୍ ସରଗ୍ତାକେ ହାଚାର୍, ହେୱାର୍ ସରଗ୍ତାକେ ହାନାକା ତା ସତୃର୍ ହୁଡ଼୍ତାର୍। 13 ଆରେ ଏଚେପାଦ୍ନା ହେୱାର୍ ନିଙ୍ଗ୍ଞ୍ଜି ହାଚାର୍, ହେପାଦ୍ନା ପୁର୍ତିତାକେ ରଞ୍ଜି ବୟାଙ୍କାର୍ ବୁମିକମ୍ପ୍ ଆତାତ୍ ଆରେ ହେ ସହର୍ନି ୧୦ ବାଗ୍ତାଙ୍ଗ୍ ର ବାଗ୍ ବିନାସ୍ ଆତାତ୍। ହେ ବୁମିକମ୍ପ୍ ଆତି କାଜିଙ୍ଗ୍ ସାତ୍ ହାଜାର୍ ମାନାୟାର୍ ହାଃତାର୍, ଆରେ ଏଚେଜାଣ୍ ମାନାୟାର୍ ହାଃୱାଦାଙ୍ଗ୍ ମାଚାର୍ ହେୱାର୍ ପାଣ୍ଡ୍ରା ଆତାର୍, ଆରେ ସରଗ୍ତାକେ ମାନି ଈଶ୍ୱରତିଙ୍ଗ୍ ଗୌରବ କିତାର୍। 14 ଦୁଇ ନମ୍ବର୍ ବିପତ୍ ସେସ୍ ଆତାତ୍, ମାତର୍ ହୁଡ଼ାଟ୍ ତିନ୍ ନମ୍ବର୍ ବିପତ୍ ବେଗି ୱାନାତା। 15 ତାପାଚେ ଏଚେପାଦ୍ନା ସାତ୍ ନମ୍ବର୍ ଦୁତ୍ ମରି ତୁପ୍ତାତ୍, ଆରେ ସରଗ୍ତାକେ ଗାଜାକାଟ୍ କିଜି ୱେଚ୍ନାକା ଆନେଙ୍ଗ୍ ୱେଚାଙ୍ଗ୍। “ୱିଜୁ ପୁର୍ତିତିଙ୍ଗ୍ ମା ମାପୃ ଈଶ୍ୱର ସାସନ୍ କିଦେଙ୍ଗ୍ ରାଜି ଆତାନ୍ ଆରେ ତା ଖ୍ରୀଷ୍ଟଙ୍ଗ୍ ଅଦିକାର୍ ହିତାନ୍, ଆରେ ହେୱାନ୍ ଯୁଗ୍-ଯୁଗ୍ ପାତେକ୍ ସାସନ୍ କିନାନ୍।” 16 ତାପାଚେ ହେବେ ସିଙ୍ଗାସନ୍ତାକେ କୁଚ୍ଚି ମାଚି ଚବିଶ୍ ଜାଣ୍ ପ୍ରାଚିନାର୍ ମେଣ୍ଢାକୁନ୍ଦିକିଜି ଈଶ୍ୱରତିଙ୍ଗ୍ ମୁଣ୍ଡିଆ ଇଡ଼୍ଜି ପୁଜାକିଜି ୱେଚ୍ଚି ମାଚାର୍, 17 ହେ ମାପୃ, ୱିଜୁ ଶାକ୍ତିମାନି ଈଶ୍ୱର। ନଙ୍ଗୟ୍ ମାନାୟ୍ ଆରେ ଏନେଙ୍ଗ୍ ଆଗେତାଙ୍ଗ୍ ମାନାୟ୍, ନିଙ୍ଗେଙ୍ଗ୍ ଆପେଙ୍ଗ୍ ଦନ୍ଯବାଦ୍ ହିଦ୍ନାପା। ଇନେସ୍କି ନି ଜାର୍ ଶାକ୍ତିତାଙ୍ଗ୍ ସାସନ୍ କିଦେଙ୍ଗ୍ ଆରମ୍ କିତାୟ୍ନା। 18 ବିନ୍ଜାତିନି ମାନାୟାର୍ ନିଙ୍ଗେଙ୍ଗ୍ ରିସାଆଜି ମାନ୍ଞ୍ଚାର୍। ମାତର୍ ଏନେଙ୍ଗ୍ ହାଃତାକାରିଙ୍ଗ୍ ବିଚାର୍ କିନାକା, ଆରେ ନି ଦାସ୍ ଭବିଷ୍ଯତବକ୍ତାରିଙ୍ଗ୍, ଦରମ୍ ମାନାୟାରିଙ୍ଗ୍, ନିଙ୍ଗେଙ୍ଗ୍ ପାଣ୍ଡ୍ରାଆଜି ପାପ୍ କାମାୟ୍ କିୱାକାରିଙ୍ଗ୍ ଗାଜା ହିରୁ ୱିଜାରିଙ୍ଗ୍, ପୁରଷ୍କାର୍ ହିନି ଦିନ୍ ୱାତାତେ। ଆରେ ପୁର୍ତିତିଙ୍ଗ୍ ବିନାସ୍ କିନି ମାନାୟାରିଙ୍ଗ୍ ଏନେଙ୍ଗ୍ ବିନାସ୍ କିନାୟ୍। 19 ହେପାଦ୍ନା ସରଗ୍ତାକେ ମାନି ଈଶ୍ୱର ମନ୍ଦିର୍ନି କାପାଟ୍ ଜେୟା ଆତାତ୍, ଆରେ ହେ ମନ୍ଦିର୍ତାକେ ତା ନିୟମ୍ ପେଡ଼ି ମାନାକା ଚନ୍ଞ୍ଚାତ୍। ଆରେ ବିଜ୍ଲି ଚମ୍କା ଆନାକା, ବାରବିନି ସବଦ୍ ଆନାକା, ବାଦାଡ଼୍ ଗାର୍ଜାନ୍ ଆନାକା, ବୁମିକମ୍ପ୍ ଆନାକା ଆରେ ଗାଜା ଆଞ୍ଜ୍ଗା ବାର୍ହା ଆନାକା ଆନେଙ୍ଗ୍ ହୁଡ଼୍ତାଙ୍ଗ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation