ହତ୍ତି 1 - New Testament in Pengo Parja Language1 “ଈଶ୍ୱର ୱିଜୁ ଡ଼ୁକ୍ତି ବିଷୟତିଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ଚଚ୍ଚାନ୍ ହେ ୱିଜୁ ବିଷୟ ବେଗି ଗଟାଆନାତ୍, ଇନେସ୍କି ହେୱାନ୍ ତା ଦାସ୍ରିଙ୍ଗ୍ ପୁନିକିଦେଙ୍ଗ୍ ଆଡ୍ନାନ୍। ଲାଗିଙ୍ଗ୍ ଯୀଶୁ ତା ଦାସ୍ ଯୋହନତିଙ୍ଗ୍ ଇ ୱିଜୁ ବିଷୟ ଚଚ୍ନି କାଜିଙ୍ଗ୍ ହେୱାନ୍ ତା ଦୁତ୍ତିଙ୍ଗ୍ ପକ୍ତାତାନ୍। 2 ଲାଗିଙ୍ଗ୍ ହେ ଯୋହନ ଈଶ୍ୱର ୱେଚ୍ଚି ୱିଜୁ କାତା ଆରେ ଯୀଶୁ ଖ୍ରୀଷ୍ଟ ୱେଚ୍ଚି ୱିଜୁ କାତା ଆରେ ହେୱାନ୍ ହୁଡ଼୍ତି ୱିଜୁ ବିଷୟତିଙ୍ଗ୍ ଇ ବହିତାକେ ଲେକିକିତାନ୍ନା।” 3 ଏଚେଜାଣ୍ ଇ ଈଶ୍ୱର କାତାତିଙ୍ଗ୍ ଜେକନିକାର୍ ଆଗେ ପଡ଼ିକିନାର୍। ହେୱାର୍ ଆଶ୍ରିବାଦ୍ ପାୟାଆନାର୍ ୱିଜୁ ୱେନାକାରିଙ୍ଗ୍ ଆରେ ମାନି କିନାକାରିଙ୍ଗ୍ ଈଶ୍ୱର ହେ ୱିଜାରିଙ୍ଗ୍ ଆଶ୍ରିବାଦ୍ କିନାନ୍, ଇନେସ୍କି ଇ ୱିଜୁ ବିଷୟ ବେଗି ଗଟାଆନାତ୍। ଯୋହନ ସାତ୍ଗଟା ମଣ୍ଡ୍ଲିନି ମାନାୟାରିଙ୍ଗ୍ ଜୱାର୍ କିତି ବିଷୟ 4 ଆନେଙ୍ଗ୍ ଯୋହନ ଏସିଆ ଦେସ୍ତାକେ ମାନି ସାତ୍ଗଟା ମଣ୍ଡ୍ଲିନି ମାନାୟାର୍ କାଜିଙ୍ଗ୍ ଆନେଙ୍ଗ୍ ଇ ଚିଟି ଲେକିକିନାଙ୍ଗା। ଆନେଙ୍ଗ୍ ପାର୍ତାନା କିନାଙ୍ଗା ଯେ, ଈଶ୍ୱର ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। ଇନେର୍ ଆଗେ ମାଚାନ୍, ଇନେର୍ ନଙ୍ଗୟ୍ ମାନାନ୍ ଆରେ ଇନେର୍ ପାଚେ ସାତ୍ଗଟା ଆତ୍ମାଙ୍ଗ୍ ହୁଦାଙ୍ଗ୍ ଈଶ୍ୱରନି ସିଙ୍ଗାସନ୍ତାକେ ୱାନାନ୍। 5 ଆରେ, ଯୀଶୁ ଖ୍ରୀଷ୍ଟତାଙ୍ଗ୍ ଇନେର୍କି ଈଶ୍ୱର କାତାତିଙ୍ଗ୍ ସାକି ହିନାନା ଆରେ ତା କାତାତିଙ୍ଗ୍ ପାର୍ତି କିୟାଆନାତ୍, ହେୱାନ୍ ନେ ପାର୍ତୁମ୍ ମାରାଣ୍ତାଙ୍ଗ୍ ଜିବୁନ୍ ଆତାନ୍ନା ଆରେ ପୁର୍ତିନି ୱିଜୁ ରାଜାରିଙ୍ଗ୍ ସାସନ୍ କିନି ମାନାୟ୍ ଆତାନ୍ନା। ହେୱାନ୍ ମାଙ୍ଗେଙ୍ଗ୍ ଲାଡ୍ କିଦ୍ନାନା। ହେୱାନ୍ ମା କାଜିଙ୍ଗ୍ ଜାର୍ ନେତେର୍ ବଡ଼ାଇ କିଜି ହାଃତାନ୍ ଆରେ ଆସେଙ୍ଗ୍ କିତି ପାପ୍ନି ଦଣ୍ଡ୍ତିଙ୍ଗ୍ କେମା କିତାନ୍ନା। 6 ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ର କୁଟମ୍ନି ମାନାୟାର୍ ଆଜି ତା ଲାତ୍ରାହି ଈଶ୍ୱରତିଙ୍ଗ୍ ହେବା କିନି ପୁଜାରି ଆତାସ୍ନା ହେୱାନ୍ ସନ୍ମାନ୍ ଆରେ ଶାକ୍ତି ୱିଜୁଦିନ୍ ପାୟା ଆଏନ୍। ଆମେନ୍। 7 ହୁଡ଼ାଟ୍ ହେୱାନ୍ ସରଗ୍ତାଙ୍ଗ୍ ବାଦାଡ଼୍ ହୁଦାଙ୍ଗ୍ ମାହାଆଜି ୱାନାନ୍। ଆରେ ୱିଜାକାର୍ ହେୱାନିଙ୍ଗ୍ ହୁଡ଼୍ନାର୍, ଆରେ ପା ତାଙ୍ଗେଙ୍ଗ୍ ବାଲା ହୁଦାଙ୍ଗ୍ କୁନ୍ତାକାର୍ ହୁଡ଼୍ନାର୍। ଆରେ ଇ ପୁର୍ତିନି ୱିଜୁ ଦେସ୍ନି ମାନାୟାର୍ ତା କାଜିଙ୍ଗ୍ ଆଡ଼୍ବାନାର୍। ଆମେନ୍। 8 ମା ମାପୃ ଈଶ୍ୱର ଇଲେକେ ୱେଚ୍ନାନା, “ଆନେଙ୍ଗ୍ ଆଲ୍ପା ଆରେ ଅମେଗା,” ଇ ଅର୍ତ ଆନେଙ୍ଗ୍ ଇ ୱିଜୁ ବିଷୟତିଙ୍ଗ୍ ଆରମ୍ କିତାଙ୍ଗ୍ ଆରେ ଆନେଙ୍ଗ୍ ୱିଜୁ ବିଷୟତିଙ୍ଗ୍ ସେସ୍ କିଦେଙ୍ଗ୍ ଆଡ୍ନାଙ୍ଗ୍। “ଆନେଙ୍ଗ୍ ନେ ୱିଜୁ ଶାକ୍ତିମାନି ଈଶ୍ୱରତଙ୍ଗ୍ ଇନେର୍ ଆଗେ ମାଚାନ୍, ନଙ୍ଗୟ୍ ମାନାନ୍ ଆରେ ପାଚେ ମାନାନ୍।” ଯୋହନ ମାନାୟ୍ ମେହିଙ୍ଗ୍ ହୁଡ଼୍ତି କାତା 9 ଆନେଙ୍ଗ୍ ଯୋହନ ମି ଟଣ୍ଡେନ୍ତଙ୍ଗ୍, ଆନେଙ୍ଗ୍ ଯୀଶୁ ହୁଦାଙ୍ଗ୍ ମାହାଆଜି ମାଚି କାଜିଙ୍ଗ୍ ଆନେଙ୍ଗ୍ ପା ମି ଲେକେ ତା ଦୁଃକ୍ କଷ୍ଟତାକେ, ଈଶ୍ୱର ସାସନ୍ କିନି ରାଜିତାକେ, ଆରେ ୱିଜୁ ସମ୍ବାଲି କିନି ଶାକ୍ତିତାକେ ମାହା ଆତାଙ୍ଗ୍ନା। ଆନେଙ୍ଗ୍ ଈଶ୍ୱର ହାର୍ଦିକାବୁର୍ ଆରେ ଖ୍ରୀଷ୍ଟ ୱେଚ୍ଚି ସତ୍ କାତାତିଙ୍ଗ୍ ଶୁଣାୟ୍ କିତିଲେ, ଖ୍ରୀଷ୍ଟଙ୍ଗ୍ ବିରଦ୍ କିନି ମାନାୟାର୍ ନାଙ୍ଗେଙ୍ଗ୍ ପାତ୍ମ ତର୍ଦି ଦ୍ୱିପ୍ତାକେ ବନ୍ଦିକିଜି ମାନ୍ଞ୍ଚାର୍। 10 ରଇବାର୍ ନାଞ୍ଜିଙ୍ଗ୍ ଆନେଙ୍ଗ୍ ଈଶ୍ୱରତିଙ୍ଗ୍ ଆରାଦାନା କିନିହିଙ୍ଗ୍ ପବିତ୍ର ଆତ୍ମା ନା ଜପି ୱାଜି ନାଙ୍ଗେଙ୍ଗ୍ କଣ୍ଟ୍ରୁଲ୍ ହିତ୍ତାତ୍। ଏଚେପାଦ୍ନା ପବିତ୍ର ଆତ୍ମା ନା ଜପି ୱାତାତ୍ ଆନେଙ୍ଗ୍ ନା ପାଚ୍ବାଗାୟ୍ ମରି ତୁପ୍ତିଲେକେ ଗାଜା କାଟ୍ତିଙ୍ଗ୍ ୱେଚାଙ୍ଗ୍। 11 ହେଦାଙ୍ଗ୍ ଇଲେକେ ସବଦ୍ ଆତାତ୍, “ଏପେଙ୍ଗ୍ ଇନାକା ହୁଡ଼୍ନାଦେରା ହେଦାଙ୍ଗ୍ ର ସାସ୍ତର୍ତାକେ ଲେକିକିଜି ଇଟାଟ୍ ଆରେ ଏପିସ, ସ୍ମର୍ଣ୍ଣା, ପର୍ଗମ, ଥୁୟତିରା, ସାର୍ଦ୍ଦୀ, ଫିଲାଦେଲ୍ଫିଆ ଆରେ ଲାଅଦିକିଆ ଇ ସାତ୍ଗଟା ମଣ୍ଡ୍ଲିତାକେ ପକାଟ୍।” 12 ଏଚେପାଦ୍ନା ଆନେଙ୍ଗ୍ ଇଦାଙ୍ଗ୍ ଇନେର୍ ୱେଚ୍ଚାନାରା ଇଞ୍ଜି କିନ୍ଦ୍ରା ଆଜି ହୁଡ଼୍ତାଙ୍ଗ୍ ହେପାଦ୍ନା ଆନେଙ୍ଗ୍ ହନାତାଙ୍ଗ୍ ରସ୍ତି ସାତ୍ଗଟା ବଇଟାଙ୍ଗ୍ ଇଟ୍ନାକା ହୁଡ଼୍ତାଙ୍ଗ୍। 13 ଆରେ, ର ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇନେର୍କି ଯୀଶୁ ହେ ସାତ୍ଗଟା ବଇଟାଙ୍ଗ୍ ଇଟ୍ନି ମାଦି ନିଲ୍ଚି ମାଚାନ୍। ହେୱାନ୍ କାଲ୍ ପାନାତାଙ୍ଗ୍ ଆନି ଡେଙ୍ଗା ଲାଲ୍ଚି ଉସ୍ପି ମାଚାନ୍ ଆରେ ପା ନେଞ୍ଜାଡାକିତାକେ ହନାତାଙ୍ଗ୍ ରସ୍ତି ବେଲ୍ଟ୍ ଉସ୍ପି ମାଚାନ୍। 14 ତା କାପ୍ଡ଼ାନି ତେମୁଲ୍ ରୁୱା ଲେକେ ଡ଼ିଞ୍ଜ୍ଜି ମାଚାତ୍ ଆରେ ତା କାଣ୍କୁ ନାଣି ଲେକେ ଚମ୍କା ଆଜିମାଚିକ୍। 15 ଆରେ ତା କାଲ୍ପାନା ନାଣିତାକେ ଦେସ୍ତି ପିତାଡ଼୍ ଲେକେ ଚମ୍କା ଆଜି ମାଚାତ୍ ଆରେ ଏଚେପାଦ୍ନା ହେୱାନ୍ ୱେଚ୍ଚାନ୍, ର ଗାଜା ଜାରାଣ୍ ଏଜୁଙ୍ଗ୍ ସବଦ୍ ଲେକେ ତା ସବଦ୍ ମାଚାତ୍। 16 ହେୱାନ୍ ତା ତିନି କେଇଦ ସାତ୍ଗଟା ହୁକାଙ୍ଗ୍ ଆସ୍ତି ମାଚାନ୍, ଆରେ ତା ୱେଇଦାଙ୍ଗ୍ ରିକଣ୍ଡାଙ୍ଗ୍ ଦାରା ମାନି ଯୁଜ୍ କିନି କାଣ୍ଡା ହସିମାଚାନ୍, ଆରେ ୱେଡ଼ା ବାର୍ଟାନି କାରାଲେକେ ତା ମୁମ୍ ଅଜଡ଼୍ଆଜି ମାଚାତ୍। 17 ଏଚେପାଦ୍ନା ଆନେଙ୍ଗ୍ ହେୱାନିଙ୍ଗ୍ ହୁଡ଼୍ତାଙ୍ଗ୍ ହେଦାପ୍ରେ ଆନେଙ୍ଗ୍ ତା ପାନାତାକେ ଜୁୱାର୍ କିତାଙ୍ଗ୍, ହେପାଦ୍ନା ଆନେଙ୍ଗ୍ ହାଃତି ଲେକେ ଆତାଙ୍ଗ୍। ମାତର୍ ହେୱାନ୍ ତା ତିନିକେଇ ନା ଜପି ଇଡ଼୍ତାନ୍ ଆରେ ୱେଚ୍ଚାତାନ୍, “ପାଣ୍ଡ୍ରାଆମା ଆନେଙ୍ଗ୍ ନେ ପାର୍ତୁମ୍ ଆରେ ସେସ୍। 18 ଆନେଙ୍ଗ୍ ନେ ହାଃତାକାଙ୍ଗ୍ ନଙ୍ଗୟ୍ ଜିବୁନ୍ ମାନାଙ୍ଗ୍, ଆନେଙ୍ଗ୍ ରଗ ହାଃଜି ମାଚାଙ୍ଗ୍ ମାତର୍ ନଙ୍ଗୟ୍ ଆନେଙ୍ଗ୍ ଜିବୁନ୍ ମାନାଙ୍ଗ୍ ଆରେ ନଙ୍ଗୟ୍ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନ୍ଗାନାଙ୍ଗ୍। ନାବେ ମାରାଣ୍ତିଙ୍ଗ୍ ଆରେ ପାତାଳ୍ତିଙ୍ଗ୍ ଆରେ ହାଃତାକାରିଙ୍ଗ୍ ଆରେରଗ ଜିବୁନ୍ କିନି ଅଦିକାର୍ ମାନାତ୍। 19 ଆରେ ଏନେଙ୍ଗ୍ ଇନା ଇନାକା ହୁଡ଼୍ତାଇନା ଇମ୍ଣାକା ନଙ୍ଗୟ୍ ଗଟାଆନାତା ଆରେ ଇମ୍ଣାକା ପାଚେ ଗଟାଆନାତ୍ ହେ ୱିଜୁ ବିଷୟ ଏନେଙ୍ଗ୍ ଲେକିକିୟା। 20 ନା କେଇଦ ମାନି ସାତ୍ଗଟା ହୁକାଙ୍ଗ୍ ଆରେ ସାତ୍ଗଟା ହନାତାଙ୍ଗ୍ ରସ୍ତି ବଇଟା ଇଟ୍ନି ବିଷୟନି ଅର୍ତ ଇଲେକେ। ସାତ୍ଗଟା ହୁକାଙ୍ଗ୍ନି ଅର୍ତ ସାତ୍ଗଟା ମଣ୍ଡ୍ଲିନି ସାତ୍ଗଟା ଦୁତ୍କୁ, ଆରେ ସାତ୍ଗଟା ହନାତାଙ୍ଗ୍ ରସ୍ତି ବଇଟା ଇଟ୍ନି ବିଷୟନି ଅର୍ତ ସାତ୍ଗଟା ମଣ୍ଡ୍ଲି।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation