ପିଲିପିୟ 2 - New Testament in Pengo Parja Languageଖ୍ରୀଷ୍ଟ ଦରମ୍ନି କାତା 1 ଏପେଙ୍ଗ୍ ଯଦି ଖ୍ରୀଷ୍ଟ ହୁଦାଙ୍ଗ୍ ମାହାଆଜି ଏକ୍ ଆତାଦେର୍ନା, ଲାଗିଙ୍ଗ୍ ଏପେଙ୍ଗ୍ ସାସ୍ ପାୟାଆନାଦେର୍। ଖ୍ରୀଷ୍ଟ ମିଙ୍ଗେଙ୍ଗ୍ ଲାଡ୍ କିଦ୍ନାନା ଲାଗିଙ୍ଗ୍ ଏପେଙ୍ଗ୍ ଶାନ୍ତି ପାୟାଆନାଦେର୍, ଈଶ୍ୱର ଆତ୍ମା ମା ହୁଦାଙ୍ଗ୍ ମାହାଆଜି ମାନାତା, ଆରେ ଖ୍ରୀଷ୍ଟ ମାଙ୍ଗେଙ୍ଗ୍ ଦୟା ଆରେ ଦରମ୍ କିଦ୍ନାନା। 2 ଲାଗିଙ୍ଗ୍ ଜାର୍-ଜାର୍ବିତ୍ରେ କାତା ମାନି କିୟାଟ୍, ଆରେ ଜାର୍-ଜାର୍ବିତ୍ରେ ଲାଡ୍ କିବା ଆଡ, ୱିଜାକାଦେର୍ ର ମାନ୍ ଆରେ ର ଆତ୍ମା ଆଜି ମାନାଟ୍। ଏପେଙ୍ଗ୍ ଇଲେକେ ମାଚିସ୍ ଆନେଙ୍ଗ୍ ବେସି ୱାରି ଆନାଙ୍ଗ୍। 3 ଜାର୍ ବିଷୟରେ ନେ ବାବିକିମାଟ୍। ଆରେ ବାଟ୍ପାଣିଆ ଆଜି ନିଜେ ଗାଜା ଇଞ୍ଜି ଚଚିୟା ଆମାଟ୍, ମାତର୍ ଜେକନି ମାନାୟାରିଙ୍ଗ୍ ସନ୍ମାନ୍ କିଜି ନିଜେ ହିରୁ ଆଜି ମାନାଟ୍। 4 ୱିଜାକାଦେର୍ ଜାର୍ ହାର୍ ଆନାଙ୍ଗ୍ ଇଞ୍ଜି ଚିନ୍ତା କିମାଟ୍, ମାତର୍ ଜେକନି ମାନାୟାର୍ ହାର୍ କାଜିଙ୍ଗ୍ ପା ଚିନ୍ତା କିୟାଟ୍। 5 ଯୀଶୁ ଖ୍ରୀଷ୍ଟଙ୍ଗ୍ ଇନେସ୍ ମାନ୍ ମାଚାତ୍, ହେଲେକେ ମି ମାନ୍ ପା ଆୟେତ୍। 6 ହେୱାନ୍ ଈଶ୍ୱର ମାଚାନ୍, ମାତର୍ ହେୱାନ୍ ପା ଈଶ୍ୱର ହୁଦାଙ୍ଗ୍ ହାମାନ୍ ଆନି କାଜିଙ୍ଗ୍ ଇଚା କିୱାତାନ୍। 7 ମାତର୍ ହେୱାନ୍ ଈଶ୍ୱର ଆନି ସୁଯଗ୍ତିଙ୍ଗ୍ ପିସ୍ତି ପୁର୍ତିତାକେ ଦାସ୍ ଲେକେ ମାନାୟ୍ ରୁପ୍ ଆଜି ୱାତାନ୍। 8 ଆରେ ହେୱାନ୍ ମାନାୟ୍ ରୁପ୍ ଆଜି ୱାତି ପାଚେ, ହେୱାନ୍ ଜାର୍ତିଙ୍ଗ୍ ହିରୁ କିତାନ୍ ଆରେ ଈଶ୍ୱର କାତାତିଙ୍ଗ୍ ମାନିକିଜି କୃଶକାଟ୍ ପାତେକ୍ ପା ହାଃନି କାଜିଙ୍ଗ୍ ଇଚା କିତାନ୍। 9 ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ୱିଜୁତାଙ୍ଗ୍ ଗାଜା ସନ୍ମାନ୍ ପାୟାଆନି ବାହା ହିତାନ୍। ଆରେ ହେୱାନିଙ୍ଗ୍ ୱିଜୁ ତର୍ଦାଙ୍ଗ୍ ସନ୍ମାନ୍ ଆରେ ଆଦିକାର୍ ତର୍ ହିତାନ୍। 10 ହେଦାଙ୍ଗ୍ କାଜିଙ୍ଗ୍ ୱିଜୁ ଜାତିନି ମାନାୟାର୍ ସରଗ୍ତାକେ, ପୁର୍ତିତାକେ ଆରେ ପାତାଡ଼୍ତାକେ ମାନାକାର୍ ଯୀଶୁଙ୍ଗ୍ ସନ୍ମାନ୍ ହିଦେଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିନାର୍। 11 ଆରେ ୱିଜାକାର୍ ଯୀଶୁ ଖ୍ରୀଷ୍ଟ ମାପୃ ଇଞ୍ଜି ୱେଚ୍ନାର୍, ଆରେ ଆବା ଈଶ୍ୱରତିଙ୍ଗ୍ ଗୌରବ କିନାର୍। ପାର୍ତି କିନାକାସ୍ ପୁର୍ତିତାକେ ଅଜଡ଼୍ଲେକେ ଆନାସ୍ 12 ହେଦାଙ୍ଗ୍ କାଜିଙ୍ଗ୍ ଏ ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ମାନିହିଙ୍ଗ୍ ଇନେସ୍ ୱିଜୁଦିନ୍ ଈଶ୍ୱର କାତାତିଙ୍ଗ୍ ମାନିକିଜି ମାଚାଦେର୍, ଲାଗିଙ୍ଗ୍ ଆନେଙ୍ଗ୍ ହିଲ୍ୱିହିଙ୍ଗ୍ ପା ଏପେଙ୍ଗ୍ ହେବେତାଙ୍ଗ୍ ଆଦିକ୍ ମାନି କିୟାଟ୍। ଈଶ୍ୱର ଇମ୍ଣାକାରିଙ୍ଗ୍ ଉଦାର୍ କିତାନ୍ନା ହେୱାର୍ କାଜିଙ୍ଗ୍ ଟିକ୍ ମାଚିଲେକେ କାମାୟ୍ ଏପେଙ୍ଗ୍ ପାଣ୍ଡ୍ରାଆଜି ତ୍ରିଗ୍ଜି କିନି ଦର୍କାର୍। 13 ଇନେସ୍କି ଈଶ୍ୱର ମିବେ ମାନ୍ଞ୍ଜି କାମାୟ୍ କିନାନା, ଲାଗିଙ୍ଗ୍ ହେୱାନ୍ ଇନାକା ଇଚା ହେଦାଙ୍ଗ୍ ପୁରା କିଦେଙ୍ଗ୍ ମିଙ୍ଗେଙ୍ଗ୍ ଇଚା କିୟି କିଦ୍ନାନା। ଆରେ ହେୱାନ୍ ମିଙ୍ଗେଙ୍ଗ୍ ସାଇଜ ପା କିଦ୍ନାନା। 14 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇନାକା କିନାଦେର୍ ହେଦାଙ୍ଗ୍ତିଙ୍ଗ୍ ଗୁଜ୍-ଗୁଜ୍ କିଜି ଜୁକ୍ତି ଆମାଟ୍। 15 ଲାଗିଙ୍ଗ୍ ଇନେର୍ ପା ମିଙ୍ଗେଙ୍ଗ୍ ଦସି ଇଞ୍ଜି ୱେଚ୍ଚେଙ୍ଗ୍ ଆଡ଼୍ଦୁର୍, ଆରେ ଏପେଙ୍ଗ୍ ଦରମ୍ ମାନାୟ୍ ଆନାଦେର୍। କରାପ୍ ମାନାୟାର୍ ବିତ୍ରେ ମାନ୍ଞ୍ଜି ପା ଏପେଙ୍ଗ୍ ଇନାକା କରାପ୍ କାମାୟ୍ କିୱାଦାଙ୍ଗ୍ ଏପେଙ୍ଗ୍ ଈଶ୍ୱର ହିମ୍ଣାଙ୍ଗ୍ ଲେକେ ଆଜି ମାନାଟ୍। ଏପେଙ୍ଗ୍ ଜିବୁନ୍ ହିଦ୍ନି କାତାତିଙ୍ଗ୍ ଆସ୍ତି ବାଦାଡ଼୍ନି ହୁକା ଲେକେ ଆଜି ହେୱାର୍ ବିତ୍ରେ ଅଜଡ଼୍ ଆଡ। 16 ଲାଗିଙ୍ଗ୍ ନା ଉପାୟ୍ କି କଷ୍ଟନି କାମାୟ୍ ବେକାରେ ହାଲ୍ୱାତାତ୍ନା ଇଞ୍ଜି ଆନେଙ୍ଗ୍ ପୁନାଙ୍ଗ୍, ଖ୍ରୀଷ୍ଟ ୱାନିଦିନ୍ ଆନେଙ୍ଗ୍ ବେସି ୱାରି ଆନାଙ୍ଗ୍। 17 ଆନେଙ୍ଗ୍ ଏଚେପାଦ୍ନା ମିଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦ୍ନାଙ୍ଗ୍ ହେପାଦ୍ନା ଏପେଙ୍ଗ୍ ମାପୃ ଯୀଶୁଙ୍ଗ୍ ପାର୍ତି କିତାଦେର୍, ଆରେ ତା ପୁଜା କିଦେଙ୍ଗ୍ ଏପେଙ୍ଗ୍ ଜାର୍ତିଙ୍ଗ୍ ହିୟାଆତାଦେର୍। ଲାଗିଙ୍ଗ୍ ନାଙ୍ଗେଙ୍ଗ୍ ଯଦି ହାର୍ଦିକାବୁର୍ ଶୁଣାୟ୍ କିଦ୍ନାନା ଇଞ୍ଜି ମାର୍ନେ ଅସ୍ତାନାର୍, ଆନେଙ୍ଗ୍ ୱାରି ଆନାଙ୍ଗ୍ ଆରେ ମିହୁଦାଙ୍ଗ୍ ୱାରି କିନାଙ୍ଗ୍। 18 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ପା ୱାରି ଆଡ ଆରେ ନା ହୁଦାଙ୍ଗ୍ ମେହାଆଜି ୱାରି କିୟାଟ୍। ତିମତି ଆରେ ଏପାଫ୍ରଦିତ 19 ଆନେଙ୍ଗ୍ ବେଗି ତିମତିତିଙ୍ଗ୍ ମି ଲାଗାୟ୍ ପକ୍ତେଦେଙ୍ଗ୍ ଆନେଙ୍ଗ୍ ମାପୃ ଯୀଶୁତାକେ ଆହା କିନାଙ୍ଗା। ଲାଗିଙ୍ଗ୍ ଆନେଙ୍ଗ୍ ମି ବିଷୟରେ ପୁନ୍ଞ୍ଜି ସାସ୍ ପାୟାଆନାଙ୍ଗ୍।। 20 ଇନେସ୍କି ତିମତି ନେ ସତ୍ତାଙ୍ଗ୍ ମି ବିଷୟରେ ଚିନ୍ତା କିନାନା। ହେୱାନିଙ୍ଗ୍ ପିସ୍ତି ହେଲେକେ ବାବିକିନି ମାନାୟ୍ ନା ଲାଗାୟ୍ ଇନେର୍ ପା ଆକାୟ୍। 21 ଇନେସ୍କି ୱିଜାକାର୍ ଯୀଶୁ ଖ୍ରୀଷ୍ଟ ଇଚା କିନାକା ପିସ୍ତି ଜାର୍ କାଜିଙ୍ଗ୍ ବେସି ଚିନ୍ତା କିନାରା। 22 ହେୱାନ୍ ରକାନ୍ ହାର୍ଦି ମାନାୟ୍ ଇଞ୍ଜି ଏପେଙ୍ଗ୍ ପୁଚାଦେର୍ନା। ର ହିମ୍ଣା ଲାତ୍ରାହି ହୁଦାଙ୍ଗ୍ କାମାୟ୍ କିତିଲେକେ ହେୱାନ୍ ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ନା ହୁଦାଙ୍ଗ୍ ହେବା କିନାନା। 23 ନାଙ୍ଗେଙ୍ଗ୍ ଇନାକା ଗଟା ଆଦ୍ନାତ୍ ହେଦାଙ୍ଗ୍ ପୁଚି ଦାପ୍ରେ ଆନେଙ୍ଗ୍ ହେୱାନିଙ୍ଗ୍ ମି ଲାଗାୟ୍ ପକ୍ତେଦେଙ୍ଗ୍ ଆହା କିନାଙ୍ଗା। 24 ଆନେଙ୍ଗ୍ ମାପୃଙ୍ଗ୍ ଆହା କିତାଙ୍ଗ୍ନା ଆନେଙ୍ଗ୍ ପା ମି ଲାଗାୟ୍ ବେଗି ୱାନାଙ୍ଗ୍। 25 ଆନେଙ୍ଗ୍ ମି ଲାଗାୟ୍ ଏଫାପ୍ରାଦିତତିଙ୍ଗ୍ ପକ୍ତେଦେଙ୍ଗ୍ ମାନ୍ କିତାଙ୍ଗ୍ନା, ହେୱାନ୍ ସତ୍ରେ ନା ଟଣ୍ଡେନ୍ ଲେକେ, ନା ହୁଦାଙ୍ଗ୍ ମାନିକିଜି କାମାୟ୍ କିନାକାନ୍, ଆରେ ନା ହୁଦାଙ୍ଗ୍ ସାହାସ୍ତାଙ୍ଗ୍ ମାନି ସେନା। ନାଙ୍ଗେଙ୍ଗ୍ ଦର୍କାର୍ଆନି ବିଷୟ ସାଇଜ କିଦ୍ଦେଙ୍ଗ୍ ଏପେଙ୍ଗ୍ ବାଚିକିଜି ପକ୍ତିତି ମାନାୟ୍। ଆନେଙ୍ଗ୍ ହେୱାନିଙ୍ଗ୍ ମି ଲାଗାୟ୍ ଆରେରଗ ପକ୍ତେଦେଙ୍ଗ୍ ବାବିକିନାଙ୍ଗା। 26 ହେୱାନ୍ ମିଙ୍ଗେଙ୍ଗ୍ ବେସି ହୁଡ଼୍ଦେଙ୍ଗ୍ ଇଚା କିନାନା। ହେୱାନ୍ ରଗ୍ତାକେ ମାନାନ୍ ଇଞ୍ଜି ଏପେଙ୍ଗ୍ ୱେଚି କାଜିଙ୍ଗ୍ ଆରେ ହେୱାନ୍ ବେସି ଚିନ୍ତାତାକେ ମାନାନ୍। 27 ହାତ୍ପା ହେୱାନ୍ ହାଃନିଲେକେ ବିଡ଼୍ ଆଜି ମାଚାନ୍। ମାତର୍ ଈଶ୍ୱର ହେୱାନିଙ୍ଗ୍ ଦୟା କିତାନ୍ ଆରେ ହାର୍କିତାନ୍। ନାଙ୍ଗେଙ୍ଗ୍ ଦୁକ୍ ଜପି ଦୁକ୍ ଇନେସ୍ ଗଟା ଆଦୁତ୍ ହେଦାଙ୍ଗ୍ କାଜିଙ୍ଗ୍ ଈଶ୍ୱର ନାଙ୍ଗେଙ୍ଗ୍ ପା ଦୟା କିତାନ୍। 28 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ମି ଲାଗାୟ୍ ବେଗି ପକ୍ତାନାଙ୍ଗା, ଇନେସ୍କି ଏପେଙ୍ଗ୍ ହେୱାନିଙ୍ଗ୍ ଆରେରଗ ହୁଡ଼୍ଜି ୱାରି ଆନାଦେର୍ ଆରେ ନା ଦୁକ୍ ପା ଅଲପ୍ କମା ଆନାତ୍। 29 ଲାଗିଙ୍ଗ୍ ହେୱାନିଙ୍ଗ୍ ୱାରିଆଜି ମାପୃ କାଜିଙ୍ଗ୍ ଆହାଟ୍, ଆରେ ହେଲେକେ ମାନାୟାରିଙ୍ଗ୍ ପା ସନ୍ମାନ୍ ହିୟାଟ୍। 30 ଇନେସ୍କି ହେୱାନ୍ ଯୀଶୁ ଖ୍ରୀଷ୍ଟନି କାମାୟ୍ କିଦେଙ୍ଗ୍ ତା ଜିବୁନ୍ ବିପତ୍ତାକେ ମାଚିହିଙ୍ଗ୍ ହେୱାନ୍ ମାନ୍ଞ୍ଜି ହାଃନିଲେକେ ଆଜି ମାଚାନ୍। ଏପେଙ୍ଗ୍ ନାଙ୍ଗେଙ୍ଗ୍ ଇମ୍ଣି ସାଇଜ କିଦେଙ୍ଗ୍ ଆଡ୍ୱାତାଦେର୍ ହେ ସାଇଜ ହେୱାନ୍ ନାଙ୍ଗେଙ୍ଗ୍ କିତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation