ଫିଲୀମୋନ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଇ ଚିଟି ଲେକିକିତାଙ୍ଗ୍ନା। ଆନେଙ୍ଗ୍ ଯୀଶୁ ଖ୍ରୀଷ୍ଟ ବିଷୟରେ ଶୁଣାୟ୍ କିନି କାଜିଙ୍ଗ୍ ନଙ୍ଗୟ୍ ଆନେଙ୍ଗ୍ ଜଇଲ୍ ଇଞ୍ଜ ମାନାଙ୍ଗ୍। ଫିଲୀମୋନ, ଆନେଙ୍ଗ୍ ଆରେ ମା ପାର୍ତିକିନି ଟଣ୍ଡାର୍ ତିମତି ନିଙ୍ଗେଙ୍ଗ୍ ଜୱାର୍ କିଦ୍ନାପା। ଏନେଙ୍ଗ୍ ମା ଲାଡ୍ନି ସାଙ୍ଗ ମା ହୁଦାଙ୍ଗ୍ ମାନ୍ଞ୍ଜି କାମାୟ୍ କିନାକାୟ୍। 2 ଆରେ ମା ପାର୍ତିକିନି ତଣ୍ଦେଲ୍ ଆପିୟା, ଆରେ ସେନାର୍ ଲେକେ ମାପୃତିଙ୍ଗ୍ ହେବାକିନି ଆର୍କିପ, ଆରେ ମିଞ୍ଜ ପାର୍ତାନା କିଦେଙ୍ଗ୍ କୁଚ୍ନି ପାର୍ତିକିନି ମଣ୍ଡ୍ଲିନି ମାନାୟାରିଙ୍ଗ୍ ପା ମା ଜୱାର୍। 3 ମା ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଆଶ୍ରିବାଦ୍ କିଦେନ୍ ଆରେ ଶାନ୍ତି ହିଦେନ୍। ଫିଲୀମୋନ ଲାଡ୍ ଆରେ ପାର୍ତି 4 ଫିଲୀମୋନ, ଏନେଙ୍ଗ୍ ମାପୃ ଯୀଶୁଙ୍ଗ୍ ପାର୍ତି କିନାକା ଆରେ ଈଶ୍ୱର ମାନାୟାରିଙ୍ଗ୍ ଲାଡ୍ କିନାକା ଆନେଙ୍ଗ୍ ୱେଚାଙ୍ଗ୍ନା। 5 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱିଜୁଦିନ୍ ନି କାଜିଙ୍ଗ୍ ପାର୍ତାନା କିଜି ଈଶ୍ୱରତିଙ୍ଗ୍ ଦନ୍ଯବାଦ୍ କିନାଙ୍ଗା। 6 ଈଶ୍ୱର ମାଙ୍ଗେଙ୍ଗ୍ ହିଜି ମାନ୍ଞ୍ଚି ହାର୍ଦି ବିଷୟତିଙ୍ଗ୍ ହିକାଆ, ଆରେ ଏନେଙ୍ଗ୍ ପାର୍ତି କିନାକାର୍ ହୁଦାଙ୍ଗ୍ ହାର୍ଦାଙ୍ଗ୍ ମାହାଆଜି ମାନା। ଖ୍ରୀଷ୍ଟଙ୍ଗ୍ ସନ୍ମାନ୍ ଆନି କାଜିଙ୍ଗ୍ ଇଦାଙ୍ଗ୍ କିୟା ଇଞ୍ଜି ଆନେଙ୍ଗ୍ ପାର୍ତାନା କିନାଙ୍ଗା। 7 ଇନେସ୍କି ଏନେଙ୍ଗ୍ ଜେକନିକାରିଙ୍ଗ୍ ଲାଡ୍ କିତି କାଜିଙ୍ଗ୍ ଆନେଙ୍ଗ୍ ବେସି ୱାରି ଆରେ ସାହାସ୍ ପାୟାଆତାଙ୍ଗ୍। ହେଦାଙ୍ଗ୍ କାଜିଙ୍ଗ୍ ଏ ଟଣ୍ଡେନ୍ ଏନେଙ୍ଗ୍ ଈଶ୍ୱର ମାନାୟାରିଙ୍ଗ୍ ସାହାସ୍ କିତାଇନା। ଅନିସିମ କାଜିଙ୍ଗ୍ ପାଉଲ ଗୁୱାରି କିତି ବିଷୟ 8-9 ଏନେଙ୍ଗ୍ ଇମ୍ଣି ହାର୍ଦି ବିଷୟ କିଦେଙ୍ଗ୍ ଦର୍କାର୍ ମାନାତ୍ ହେ କାମାୟ୍ କିଦେଙ୍ଗ୍ ଆନେଙ୍ଗ୍ ୱେଚ୍ଚାତାଙ୍ଗ୍ନା। ଖ୍ରୀଷ୍ଟ ନାଙ୍ଗେଙ୍ଗ୍ ହିତ୍ତି ଅଦିକାର୍ତାଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଚଚ୍ଚି ଇ କାମାୟ୍ କିୟିକିତ୍ତାଙ୍ଗ୍ମା, ମାତର୍ ଆନେଙ୍ଗ୍ ହେଲେକେ କିଉଙ୍ଗା। ଇନେସ୍କି ଆସେଙ୍ଗ୍ ଈଶ୍ୱର ମାନାୟ୍ ଆରେ ଜାର୍-ଜାର୍ବିତ୍ରେ ଲାଡ୍କିନି କାଜିଙ୍ଗ୍, ଆନେଙ୍ଗ୍ ପାଉଲ ବୁଡ଼ା ଆତିଲେ ଆରେ ଯୀଶୁ ଖ୍ରୀଷ୍ଟଙ୍ଗ୍ ହେବାକିଜି ଜଇଲ୍ ଇଞ୍ଜ ମାନି କାଜିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଇଦାଙ୍ଗ୍ କିୟା ଇଞ୍ଜି ୱେଚ୍ଚାନାଙ୍ଗା। 10 ଆନେଙ୍ଗ୍ ନିଙ୍ଗେଙ୍ଗ୍ ଅନିସିମ କାଜିଙ୍ଗ୍ ଗୁୱାରି କିଦ୍ନାଙ୍ଗା, ହେୱାନ୍ ରକାନ୍ ନା ହିମ୍ଣା ଲେକେ। ଆନେଙ୍ଗ୍ ଜଇଲ୍ ଇଞ୍ଜ ବନ୍ଦି ଆଜି ମାଚିହିଙ୍ଗ୍ ପା ହେୱାନ୍ ଖ୍ରୀଷ୍ଟଙ୍ଗ୍ ପାର୍ତିକିନି କାଜିଙ୍ଗ୍ ନା ହିମ୍ଣା ଆତାନ୍ନା। 11 ଆଗେ ଅନିସିମ ବେକାରିଆ ମାନାୟ୍ ମାଚାନ୍, ମାତର୍ ନଙ୍ଗୟ୍ ହେୱାନ୍ ମା କାଜିଙ୍ଗ୍ ଉପ୍କାର୍ନି ମାନାୟ୍ ଆନାନ୍। 12 ଆନେଙ୍ଗ୍ ଅନିସିମଙ୍ଗ୍ ବେସି ଲାଡ୍ କିତିସ୍ ପା ନଙ୍ଗୟ୍ ଆନେଙ୍ଗ୍ ନି ଲାଗାୟ୍ ହେୱାନିଙ୍ଗ୍ ପକ୍ତାନାଙ୍ଗା। 13 ଆନେଙ୍ଗ୍ ପୁଚାଙ୍ଗ୍ନା ଯେ ଏନେଙ୍ଗ୍ ନାଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍ ଇଚା କିଦ୍ନାୟା। ଲାଗିଙ୍ଗ୍ ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିଜି ଜଇଲ୍ ଇଞ୍ଜି ମାନିହିଙ୍ଗ୍ ହେୱାନ୍ ନି ବାଦୁଲ୍ତ ଇବେ ମାନ୍ଞ୍ଜି ନାଙ୍ଗେଙ୍ଗ୍ ସାଇଜ କିଦେନ୍ ଇଞ୍ଜି ଆନେଙ୍ଗ୍ ବାବିକିନାଙ୍ଗା। 14 ମାତର୍ ଏନେଙ୍ଗ୍ ରାଜି ଆୱି ପାତେକ୍ ଆନେଙ୍ଗ୍ ହେୱାନିଙ୍ଗ୍ ଇବେ ଇଡ଼୍ଦେଙ୍ଗ୍ ଇଚା କିଉଙ୍ଗା। ମାତର୍ ଇଦାଙ୍ଗ୍ ୱାରିଆଜି କିୟା, ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାନାଙ୍ଗା ଇଞ୍ଜି ଜବର୍ଦସ୍ତିରେ କିମା। 15 ହେୱାନ୍ ଇନେସ୍ ଖ୍ରୀଷ୍ଟତାକେ ପାର୍ତିକିନାନ୍ ଆରେ ମିବେ ୱାଜି ୱିଜୁଦିନ୍ କାଜିଙ୍ଗ୍ ମାଞ୍ଜେଙ୍ଗ୍ ଆଡ୍ନାନ୍। ଇଦାଙ୍ଗ୍ କାଜିଙ୍ଗ୍ କାତେ ଈଶ୍ୱର ଇଚାତାଙ୍ଗ୍ ଅନିସିମ ମିବେତାଙ୍ଗ୍ ଅଲପ୍ଦିନ୍ କାଜିଙ୍ଗ୍ ହନ୍ଚି ମାଚାନ୍। 16 ନଙ୍ଗୟ୍ ଏନେଙ୍ଗ୍ ହେୱାନିଙ୍ଗ୍ ଚାକର୍ ନେ ଇଞ୍ଜି ବାବିକିମା, ହେୱାନ୍ ର ଦାସ୍ତାଙ୍ଗ୍ ପା ଗାଜାକାନ୍। ମାତର୍ ହେୱାନ୍ ରକାନ୍ ମା ଲେକେ ପାର୍ତିକିନି ଟଣ୍ଡେନ୍, ହେଦାଙ୍ଗ୍ କାଜିଙ୍ଗ୍ ହେୱାନିଙ୍ଗ୍ ଏନେଙ୍ଗ୍ ଲାଡ୍ କିୟା। ଆନେଙ୍ଗ୍ ହେୱାନିଙ୍ଗ୍ ଲାଡ୍ କିନାଙ୍ଗ୍ ମାତର୍ ଏନେଙ୍ଗ୍ ହେୱାନିଙ୍ଗ୍ ନି ଦାସ୍ ଆରେ ଖ୍ରୀଷ୍ଟତାକେ ପାର୍ତିକିନି ଟଣ୍ଡେନ୍ ଆତି କାଜିଙ୍ଗ୍ ଏନେଙ୍ଗ୍ ନାବେତାଙ୍ଗ୍ ଆଦିକ୍ ଲାଡ୍ କିୟା। 17 ଏନେଙ୍ଗ୍ ଯଦି ନାଙ୍ଗେଙ୍ଗ୍ ନି ହାଙ୍ଗ୍ଦାକାନ୍ ଇଞ୍ଜି ବାବିକିଦ୍ନାୟା, ଲାଗିଙ୍ଗ୍ ନାଙ୍ଗେଙ୍ଗ୍ ଇନେସ୍ ବ୍ଯବହାର୍ କିଦ୍ନାୟା ହେଲେକେ ନେ ଅନିସିମ ୱାତିସ୍ ପା ହେଲେକେ ବ୍ଯବହାର୍ କିୟା। ମା ହୁଦାଙ୍ଗ୍ ମାହାଆଜି ଏନେଙ୍ଗ୍ ଇନେସ୍ ଦେକାଶୁଣା କିଦ୍ଦେଙ୍ଗ୍ ଇଚା କିଦ୍ନାଇ ହେଲେକେ ନେ ଅନିସିମ ନି ଲାଗାୟ୍ ୱାତିସ୍ ପା ଦେକାଶୁଣା କିୟା। 18 ହେୱାନ୍ ଯଦି ନିଦାଙ୍ଗ୍ ଇନାକା ବୁଡାଇ କିଜି ମାନ୍ଗାନାନ୍, କି ନିଙ୍ଗେଙ୍ଗ୍ ଇନାକା ବାକି ମାନ୍ଗାନାତ୍, ଲାଗିଙ୍ଗ୍ ହେଦାଙ୍ଗ୍ ୱିଜୁ ଆନେଙ୍ଗ୍ ହିଦ୍ନାଙ୍ଗ୍। 19 ଆନେଙ୍ଗ୍ ପାଉଲ ନିଜେ ଲେକିକିଜି ଆନେଙ୍ଗ୍ ନିଙ୍ଗେଙ୍ଗ୍ ହିଦ୍ନାଙ୍ଗ୍, ଆନେଙ୍ଗ୍ ହେଦାଙ୍ଗ୍ ହୁଜାଆଦ୍ନାଙ୍ଗ୍। ଏନେଙ୍ଗ୍ ପୁଚାଇନା ଯେ ଆନେଙ୍ଗ୍ ଯଦି ନିଙ୍ଗେଙ୍ଗ୍ ଖ୍ରୀଷ୍ଟ ବିଷୟରେ ୱେଚ୍ଚାୱାଦାଙ୍ଗ୍ ମାନ୍ଞ୍ଚିସ୍ ଈଶ୍ୱର ନିଙ୍ଗେଙ୍ଗ୍ ରକ୍ଷା କିଦ୍ୱାତାନ୍ମା, ଇଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ନାବେ ବେସି ବାକି ଆତାଇନା। 20 ଲାଗିଙ୍ଗ୍ ଏ ନା ଟଣ୍ଡେନ୍ ନି କାଜିଙ୍ଗ୍ ନାଙ୍ଗେଙ୍ଗ୍ ମାପୃତାକେ ଲାବ୍ ଆଦେତ୍, ଖ୍ରୀଷ୍ଟତାକେ ର ପାର୍ତିକିନି ଟଣ୍ଡେନ୍ ଲେକେ ଆଜି ନାଙ୍ଗେଙ୍ଗ୍ ସାସ୍ କିଦା। 21 ଆନେଙ୍ଗ୍ ୱେଚ୍ଚି କାତା ଏନେଙ୍ଗ୍ ୱେନାଇ ଇଞ୍ଜି ପୁନ୍ଞ୍ଜି ଇ ଚିଟି ଲେକିକିନାଙ୍ଗା, ଆନେଙ୍ଗ୍ ଇନାକା ୱେଚ୍ଚାତାଙ୍ଗ୍ନା ହେବେତାଙ୍ଗ୍ ଆଦିକ୍ କିନାଇ ଇଞ୍ଜି ଆନେଙ୍ଗ୍ ପୁଚାଙ୍ଗ୍ନା। 22 ଆନେଙ୍ଗ୍ ନିଙ୍ଗେଙ୍ଗ୍ ଆରେ ର ବିଷୟ ୱେଚ୍ଚାନାଙ୍ଗା, ଆନେଙ୍ଗ୍ ମିଞ୍ଜ ମାଞ୍ଜେଙ୍ଗ୍ ଏନେଙ୍ଗ୍ ର ବାକ୍ରା ରେଡି କିଜି ମାନା। ଇନେସ୍କି ଆନେଙ୍ଗ୍ ଆହା କିନାଙ୍ଗା ଯେ ଈଶ୍ୱର ମି ପାର୍ତାନା ୱେନ୍ଞ୍ଜି ନାଙ୍ଗେଙ୍ଗ୍ ମି ଲାଗାୟ୍ ୱାଜି ଗିଟାଆଦେଙ୍ଗ୍ ସୁଯଗ୍ ହିଦ୍ନାନ୍। ଜେକନିକାର୍ ଫିଲୀମୋନତିଙ୍ଗ୍ ଜୱାର୍ କିତି ବିଷୟ 23 ଯୀଶୁ ଖ୍ରୀଷ୍ଟ ବିଷୟରେ ଶୁଣାୟ୍ କିନି କାଜିଙ୍ଗ୍ ନା ହୁଦାଙ୍ଗ୍ ଜଇଲ୍ ଇଞ୍ଜ ବନ୍ଦି ଆଜି ମାନି ଏପାଫ୍ରା ନିଙ୍ଗେଙ୍ଗ୍ ଜୱାର୍ କିଦ୍ନାନା। 24 ଆରେ ନା ହୁଦାଙ୍ଗ୍ ମାନ୍ଞ୍ଜି ମାପୃ କାମାୟ୍ କିନି ମାର୍କ, ଆରିସ୍ତାର୍ଖ, ଦୀମା ଆରେ ଲୁକ ନିଙ୍ଗେଙ୍ଗ୍ ଜୱାର୍ କିଦ୍ନାରା। 25 ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ୱିଜାକାରିଙ୍ଗ୍ ଆଶ୍ରିବାଦ୍ କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation