ମାର୍କ 7 - New Testament in Pengo Parja Languageପାରୁସିର୍ତି ନିତି ନିୟମ୍ ( ମାଥି. ୧୫:୧-୯ ) 1 ରଦିନ୍ କେତ୍ଜାଣ୍ ପାରୁସିଦଳ୍ ଆରେ ଯିହୁଦି ଦରମ୍ନି ପଣ୍ଡିତାର୍ ଯିରୁଶାଲାମ ସହର୍ତାଙ୍ଗ୍ ୱାଜି ଯୀଶୁ ବେଣ୍ ୱେଞ୍ଜେଙ୍ଗ୍ ରୁଣ୍ଡାଆତାର୍। 2 ହେପାଦ୍ନା ଯୀଶୁ ଚେଲାହିର୍ କେତ୍ଜାଣ୍ ଯିହୁଦିର୍ତି ନିତି ନିୟମ୍ତିଙ୍ଗ୍ ମାନିକିୱାଦାଙ୍ଗ୍ କେଇନୁଜ୍ୱାଦାଙ୍ଗ୍ ତିନାକା ହେୱାର୍ ହୁଡ଼୍ଜି ଯୀଶୁଙ୍ଗ୍ ୱେନ୍ବାତାର୍, 3-5 “ମା ଆଗେନି ମାନାୟ୍ ଇମ୍ଣି ବିଦି ହିକାଇ କିତାର୍ନା, ମି ଚେଲାର୍ ଇନା କିଦେଙ୍ଗ୍ ଇ ବିଦି ମାନି କିଉରା? ହେ ବିଦିତାଙ୍ଗ୍ ଇନା କିଦେଙ୍ଗ୍ ତିନିହିଙ୍ଗ୍ କେଇନୁଜ୍ୱାଦାଙ୍ଗ୍ ତିନାରା?” ଇନେସ୍କି ଆଗେନି ବିଦିତିଙ୍ଗ୍ ପାରୁସିଦଳ୍ନି ପଣ୍ଡିତାର୍ ଆରେ ୱିଜାର୍ ଯିହୁଦିର୍ କେଇ ନୁସ୍ଦି ନେ ତିନ୍ଞ୍ଜି ମାଚାର୍। ଏଲେଙ୍ଗ୍ନେ ହେୱାର୍ ଆଟ୍ବାଜାର୍ ହାଲ୍ଜି ୱାତିସ୍ ଏଜ୍ଗୁଡ଼୍ ଆୱାଦାଙ୍ଗ୍ ତିନ୍ୱାଦାଙ୍ଗ୍ ମାଚାର୍, ଆରେ ହେୱାର୍ ପିତାଡ଼୍ ଗାରିୟା ଆରେ ଗିନାକପେଲିଙ୍ଗ୍ ନୁଜ୍ନି ଏନେଙ୍ଗ୍ ଲେଗ୍ଦି ବିଦି ପା ମାନିକିଜି ମାଚାର୍। 6 ହେଦାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଦରମ୍ ଇଞ୍ଜି ପାଟ୍କାର୍ ମାନାୟ୍! ଇନେସ୍କି ଯିଶାୟ ଭବିଷ୍ଯତବକ୍ତା ମିଙ୍ଗେଙ୍ଗ୍ ଚଚ୍ଚି ୱେଚ୍ଚାତାନ୍, ‘ଏପେଙ୍ଗ୍ ନାଙ୍ଗେଙ୍ଗ୍ ଜପି-ଜପି ଲାଡ୍ କିଦ୍ନାଦେର୍ ମାତର୍ ମି ଗରବ୍ତାକେ ଲାଡ଼୍ କିଦୁଦେର୍, 7 ନାଙ୍ଗେଙ୍ଗ୍ ସନ୍ମାନ୍ ହିଦେଙ୍ଗ୍ ପୁଜା କିତାକା ହେଦାଙ୍ଗ୍ ପଲିଆ। ଇନେସ୍କି ହେୱାର୍ ମାନାୟ୍ ରସ୍ତି ବିଦିତିଙ୍ଗ୍ ମାପୃବିଦି ଇଞ୍ଜି ମାନାୟାରିଙ୍ଗ୍ ହିକାଇ କିନାରା।’ 8 ଏପେଙ୍ଗ୍ ଈଶ୍ୱର ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ଆଗେନି ମାନାୟ୍ ହିକାଇ କିତି ବିଦି ମାନି କିନାଦେରା।” 9 ଯୀଶୁ ଆରେରଗ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଈଶ୍ୱର ବିଦିପିସ୍ତି ଜାର୍-ଜାର୍ ବିଦିତିଙ୍ଗ୍ ମାନି କିନାଦେରା। 10 ଲାଗିଙ୍ଗ୍ ମୋଶା ଇ ଈଶ୍ୱର ବିଦି ହିତ୍ତାନ୍ନା, ‘ଯେ ଜାର୍-ଜାର୍ ଆୟାଆବାରିଙ୍ଗ୍ ମାନିକିଜି ମାନାଟ୍।’ ଆରେ ‘ଇନେର୍ ତା ତେହି ଲାତ୍ରାହିଙ୍ଗ୍ ଇନସ୍ତା କିନାନ୍ ହେୱାନ୍ ଜିବୁନ୍ତ ଦଣ୍ଡ୍ ପାୟା ଆନାନ୍।’ 11 ମାତର୍ ଏପେଙ୍ଗ୍ ମାନାୟାରିଙ୍ଗ୍ ଇଲେକେ ହିକ୍ଷାହିଜି ମାନାଦେର୍, ମି ଆୟାଆବାରିଙ୍ଗ୍ ଇନାଦେର୍ ‘ଆନେଙ୍ଗ୍ ମିଙ୍ଗେଙ୍ଗ୍ ସାଇଜ କିଦେଙ୍ଗ୍ ଆଡ଼୍ଦୁଙ୍ଗ୍। ଇନେସ୍କି ଆନେଙ୍ଗ୍ ଈଶ୍ୱରତିଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତାଙ୍ଗ୍ନା, ହେଦାଙ୍ଗ୍ ଆନେଙ୍ଗ୍ ଈଶ୍ୱରତିଙ୍ଗ୍ ନେ ହିନାଙ୍ଗ୍।’ 12 ଏପେଙ୍ଗ୍ ଏଲେଙ୍ଗ୍ ଇଞ୍ଜି ଜାର୍ ଆୟାଆବାରିଙ୍ଗ୍ ମାନି କିଦେଙ୍ଗ୍ ହିଉଦେରା। 13 ହେଲେକେ ଏପେଙ୍ଗ୍ ମାନାୟାରିଙ୍ଗ୍ ହିକ୍ଷା ହିନିହିଙ୍ଗ୍ ଈଶ୍ୱର ବିଦିତିଙ୍ଗ୍ ପିହ୍ନାଦେରା। ଆରେ ଆଗେନିକାର୍ ହିକାଇ କିତି ବିଦିତିଙ୍ଗ୍ ଏପେଙ୍ଗ୍ ମାନି କିନାଦେରା, ଏପେଙ୍ଗ୍ ଇ ବିଦିତିଙ୍ଗ୍ ମାନିକିଜି ବେସିବୁଲ୍ କିନାଦେରା।” ଇମ୍ଣାକା ମାନାୟାରିଙ୍ଗ୍ କରାପ୍ କିନାତ୍ ହେ ବିଷୟରେ ଯୀଶୁ ୱେଚ୍ଚାନ୍ ( ମାଥି. ୧୫:୧୦-୨୦ ) 14 ଯୀଶୁ ଆରେରଗ ମାନାୟାରିଙ୍ଗ୍ କୁକ୍ଚି ୱେଚ୍ଚାନ୍, “‘ନା ବେଣ୍ ୱେନାଟ୍,’ ଆରେ ‘ବୁଜାଆଡ।’ 15 ବାର୍ତି ଇମ୍ଣି ବିଷୟ ମାନାୟ୍ବିତ୍ରେ ହଣ୍ଜି ତାଙ୍ଗେଙ୍ଗ୍ କରାପ୍ କିଦେଙ୍ଗ୍ ଆଡୁତ୍, ମାତର୍ ଇମ୍ଣି ବିଷୟ ମାନାୟ୍ ତାକେଣ୍ଡାଙ୍ଗ୍ ବାର୍ତ ୱାନାତ୍, ହେଦାଙ୍ଗ୍ନେ ତାଙ୍ଗେଙ୍ଗ୍ କରାପ୍ କିଦ୍ନାତ୍। 16 ଇମ୍ଣାକାଦେର୍ ୱେଚାଦେର୍ ହେଦାଙ୍ଗ୍ ବୁଜା ଆଦେଙ୍ଗ୍ ଚେସ୍ଟାକିୟାଟ୍।” 17 ଯୀଶୁ ମାନାୟ୍ ଗଉଲି ବିତ୍ରେତାଙ୍ଗ୍ ୱାଜି ଇଞ୍ଜହଟି ପାଚେ ତା ଚେଲାହିର୍ ୱେନ୍ବାତାର୍, “ଏନେଙ୍ଗ୍ ୱେଚ୍ଚି କାତାନି ଅର୍ତ ଇନାକା।” 18 ଯୀଶୁ ଚେଲାହିରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ପୁନ୍ୱାତାଦେର୍ନା କି? ଇନେର୍ ପା କାଦି ଚିଚିସ୍ ତାଙ୍ଗେଙ୍ଗ୍ କରାପ୍ କିଉତ୍। 19 ଲାଗିଙ୍ଗ୍ ହେଦାଙ୍ଗ୍ ହେ କାଦି ଗରବ୍ତାକେ ହଣ୍ୱାଦାଙ୍ଗ୍ ପଟ ବିତ୍ରେ ହନାତ୍, ଆରେ ତାପାଚେ ଜିରା ଆଜି ବାର୍ତ ହସିହାନାତ୍।” ଏଲେଙ୍ଗ୍ନେ ଯୀଶୁ ପୁନିକିତାନ୍ ୱିଜୁ କାଦି ଏପେଙ୍ଗ୍ ଚିଚିସ୍ ମିଙ୍ଗେଙ୍ଗ୍ କରାପ୍ କିଦୁତ୍। 20 ଆରେ, ଯୀଶୁ ୱେଚ୍ଚାନ୍, “ଇନାକା ମାନାୟ୍ ଗରବ୍ ତାକେଣ୍ଡାଙ୍ଗ୍ ହନାତ୍, ହେଦାଙ୍ଗ୍ନେ ହେୱାନିଙ୍ଗ୍ କରାପ୍ କିଦ୍ନାତ୍। 21 ମାତର୍ ମାନାୟ୍ ଗରବ୍ତାଙ୍ଗ୍ ନେ କରାପ୍ ଚିନ୍ତା ହତ୍ନାତ୍ 22 ଦାରି, ଚର୍, ମାନାୟ୍ ଅହ୍ନାକା, ଦାରି, ଲବ୍ରା, ଚାପ୍କାର୍, ମିଚ୍ୱା, ଦାରି ଚିନ୍ତା, କାଣ୍କୁ ପକାୟ୍ କିନାକା, ନିନ୍ଦା, ଆକାର୍, ମୁର୍କ। 23 ଇୱିଜୁ କରାପ୍ କାମାୟ୍ ମାନାୟ୍ ଗରବ୍ତାଙ୍ଗ୍ ହସି ଈଶ୍ୱର ଆଗେ ଏପେଙ୍ଗ୍ କରାପ୍ ଆନାଦେର୍।” ର ବିନ୍ଜାତି କଗ୍ଲେ ଯୀଶୁଙ୍ଗ୍ ପାର୍ତି କିତାତ୍ ( ମାଥି. ୧୫:୨୧-୨୮ ) 24 ତାପାଚେ ଯୀଶୁ ହେ ବାହା ପିସ୍ତି ସୋର୍ ଆରେ ସିଦନ୍ ସହର୍ନି ଏରିଆତାକେ ହାଚାର୍। ଆରେ ଯୀଶୁ ର ଇଞ୍ଜ ହାଚାନ୍, ହେ ଇଞ୍ଜ ମାନାନ୍ ଇଞ୍ଜି ଇନେର୍ ପା ପୁନ୍ମେର୍ ଇଞ୍ଜି ଇଚାକିଜି ମାଚାନ୍, ମାତର୍ ଯୀଶୁ ଡ଼ୁଗ୍ଜି ମାଞ୍ଜେଙ୍ଗ୍ ଆଡ୍ୱାତାନ୍। 25 ହେଦାପ୍ରେ ର କଗ୍ଲେ ତା ଗାଡ଼୍ହିଙ୍ଗ୍ ବୁତ୍ଆତ୍ମା ଡୁଜି ମାଚାତ୍, ହେଦେଲ୍ ଯୀଶୁ ୱାତିବେଣ୍ ୱେନ୍ଞ୍ଜି, ତା କଚଣ୍ତ ୱାଜି ଯୀଶୁ କାଲ୍କୁ ତାରେନ୍ ଡାଣ୍ଡାହାରାଣ୍ ମାକ୍ତାତ୍। 26 ହେଦେଲ୍ ଗ୍ରୀକ୍ ଜାତିନି କଗ୍ଲେ ମାଚାତ୍। ହେଦେଲ୍ ସିରିୟା ଜିଲ୍ଲାନି ଫଇନିସିୟା ବାହାତାକେ ଜନମ୍ ଆଜି ମାଚାତ୍। ତା ଗାଡ଼୍ହିଙ୍ଗ୍ ବୁତ୍ଆତ୍ମା ପିହିକିନି କାଜିଙ୍ଗ୍ ହେ କଗ୍ଲେ ଯୀଶୁଙ୍ଗ୍ ଗୁୱାରି କିତାତ୍। 27 ମାତର୍ ଯୀଶୁ ହେଦିଲିଙ୍ଗ୍ ୱେଚ୍ଚାନ୍, “ଆଗେ ମା ଜାର୍ ଯିହୁଦି ଲଗାଙ୍ଗ୍ ହିୟାଆନାତ୍, ଇମ୍ଣାକା ହେୱାରିଙ୍ଗ୍ ଦର୍କାର୍, ନଇଲେ ହିମ୍ଣାଙ୍ଗ୍ କାଦି ନିକୁଡ଼ିକାଙ୍ଗ୍ ହିତିଲେକେ ଆନାତ୍।” 28 ହେ କଗ୍ଲେ ଯୀଶୁଙ୍ଗ୍ ୱେଚ୍ଚାତ୍, “ଆଁ ମାପୃ ହେଦାଙ୍ଗ୍ ସତ୍ନେ। ମାତର୍ ନିକୁଡ଼ିଙ୍ଗ୍ ପା ହିମ୍ଣାଙ୍ଗ୍ ସୁକ୍ଡ଼ି କାଦି ତାରେନ୍ ଆର୍ତିସ୍ ଟେବୁଲ୍ ତାରେନ୍ ମାନ୍ଞ୍ଜି ତିନିକ୍।” 29 ଯୀଶୁ ହେ କଗ୍ଲେଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଇ କାତା ପାର୍ତିତାଙ୍ଗ୍ ୱେଚ୍ଚିତିଲେ ନି ଗାଡ଼୍ଚେତାଙ୍ଗ୍ ବୁତ୍ଆତ୍ମା ହସି ହାଚାତ୍ନା। ନଙ୍ଗୟ୍ ଇଞ୍ଜ ହାଲ୍ଜି ହୁଡ଼ା।” 30 ହେଦେଲ୍ ଇଞ୍ଜ ହାଲ୍ଜି ଗାଡ଼୍ଚେଙ୍ଗ୍ କାଟେଲ୍ତ ହାର୍ ଆଜି ହୁଞ୍ଚାକା ହୁଡ଼୍ତାତ୍। ଇନେସ୍କି ହେ ଗାଡ଼୍ଚେଙ୍ଗ୍ ବୁତ୍ଆତ୍ମା ହସିହାଲ୍ଜି ମାଚାତ୍। ଯୀଶୁ ଗୁଲା ବଇରାରିଙ୍ଗ୍ ହାର୍କିତାନ୍ 31 ଆରେରଗ ଯୀଶୁ ସୋର୍ ସହର୍ନି ବାହାତାଙ୍ଗ୍ ସିଦନ୍ ସହର୍, ଆରେ ଦଶ୍ଗଟା ସହର୍ତିଙ୍ଗ୍ ଦେକାପଲି ଇନାର୍, ହେ ସହର୍ ନିପଣ୍ ହିଜି ଗାଲିଲୀନି ହାମ୍ଦୁର୍ କାଣ୍ଡିତ ୱାତାର୍। 32 ହେବେ କେତେକ୍ ମାନାୟ୍ ର ତତ୍ଲାବଇରାଙ୍ଗ୍ ଯୀଶୁ କଚଣ୍ତ ତାହିୱାତାର୍। ହେ ତତ୍ଲାବଇରାଙ୍ଗ୍, ତା ଜପି କେଇ ଇଡ଼୍ଜି ହାର୍କିଦେଙ୍ଗ୍ ଯୀଶୁଙ୍ଗ୍ ଗୁୱାରି କିତାର୍। 33 ଯୀଶୁ ହେ ତତ୍ଲାବଇରାଙ୍ଗ୍ ରକାନିଙ୍ଗ୍ ମାନାୟ୍ ଗଉଲିତାଙ୍ଗ୍ ଅଲପ୍ ଦେହା ଅସିହାଚାନ୍। ତା ରି କିତୁଲିକାଙ୍ଗ୍ ଯୀଶୁ ୱାଚ୍କା ଡୁପ୍ଚି, ଆରେ ତା ର ୱାଚ୍କାତ ଏଉଡ଼ିଙ୍ଗ୍ ଚୁପ୍ଜି ତା ୱେନ୍ଦୁଲ୍ତ ଆସ୍ପାତାନ୍, 34 ତାପାଚେ ସରଗ୍ ନିପଣ୍ ହୁଡ଼୍ଜି ଗାଜାପୁଣ୍ଡା କିଜି ୱେଚ୍ଚାନ୍, “ଇପ୍ଥା!” “ନି ଅର୍ତ ୱେନ୍ଦୁଲ୍ ପିଟା ଆ!” 35 ହେଦାପ୍ରେ ହେ ତତ୍ଲାବଇରା ମାନାୟ୍ ୱେଞ୍ଜେଙ୍ଗ୍ ଆଡ଼୍ତାନ୍, ଆରେ ଡାନ୍ଚି ୱେନ୍ଦୁଲ୍ ପିଟା ଆତାତ୍, ଆରେ ହେୱାନ୍ ହାର୍ କିଜି ବେଣ୍କିତାନ୍। 36 ଆରେ, ଇବିଷୟ ଇନେରିଙ୍ଗ୍ ପା ୱେଚ୍ୱି କାଜିଙ୍ଗ୍ ହେୱାରିଙ୍ଗ୍ ଆଦେସ୍ ହିଜି ୱେଚ୍ଚାନ୍, ମାତର୍ ଯୀଶୁ ହେୱାରିଙ୍ଗ୍ ଏଚେକ୍ ମୁନାକିତାନ୍, ହେୱାର୍ ହେଦାଙ୍ଗ୍ ଆଦିକ୍ ୱେଚ୍ଚିବୁଲାଆତାର୍। 37 ଇମ୍ଣାକାର୍ ଇବେଣ୍ ୱେଚାର୍, ମାନାୟାର୍ ଆଦିକ୍ କାବାଆଜି ୱେଚ୍ଚାର୍। “ହେୱାନ୍ ୱିଜୁ କାମାୟ୍ ହାର୍ କିନାନା, ହେୱାନ୍ ବଇରାରିଙ୍ଗ୍ ୱେନି ସାକ୍ତି ଆରେ ତତ୍ଲାଙ୍ଗ୍ ବେଣ୍ କିନି ସାକ୍ତି ପା ହିନାନ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation