ମାତିଉ 26 - New Testament in Pengo Parja Languageଯୀଶୁଙ୍ଗ୍ ବିରଦ୍ କିଜି ଅସ୍ତେଙ୍ଗ୍ ଉପାୟ୍ ( ମାର୍କ. ୧୪:୧-୨ ; ଲୁକ. ୨୨:୧-୨ ; ଯୋହନ. ୧୧:୪୫-୫୩ ) 1 ଇ ୱିଜୁବେଣ୍ ୱେଚ୍ଚି ପାଚେ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, 2 ରିଦିନ୍ ପାଚେ ନିସ୍ତାର୍ ପାର୍ବୁ ଆନାତ୍ ଇଦାଙ୍ଗ୍ ଏପେଙ୍ଗ୍ ପୁନାଟ୍। ଆରେ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା କୃଶକାଟ୍ତାକେ ହାଃନି କାଜିଙ୍ଗ୍ ଆହିୟା ଆନାଙ୍ଗ୍। 3 ହେପାଦ୍ନା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ମାନାୟାର୍ ପ୍ରାଚିନ୍ କୟାପା ତର୍ଦାକାନ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହୁଦାଙ୍ଗ୍ ପିଣ୍ଡାତ ରବେ ଆତାର୍। 4 ଆରେ ଯୀଶୁଙ୍ଗ୍ ଚାଲାକି କିଜି ଆସ୍ତି ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। 5 ମାତର୍ ହେୱାର୍ ୱେଚ୍ଚାର୍, “ଆସେଙ୍ଗ୍ ପାର୍ବୁ ତିନିହିଙ୍ଗ୍ ଇୱାନିଙ୍ଗ୍ ଆହୁସ୍। ଇନେସ୍କି ହେବେ ମାନାୟାର୍ ମାଙ୍ଗେଙ୍ଗ୍ ଗଣ୍ଡ୍ଗଲ୍ କିଦ୍ନାର୍।” ବେଥନିଆ ସହର୍ତ ଯୀଶୁ ୱାତାନ୍ ( ମାର୍କ. ୧୪:୩-୯ ; ଯୋହନ. ୧୨:୧-୮ ) 6 ହେପାଦ୍ନା ଯୀଶୁ ବେଥନିଆ ସହର୍ତାକେ ୱାତାନ୍। ଶିମୋନ ଇନେରିଙ୍ଗ୍ ଆଗେ କୁଷ୍ଟରଗ୍ତାଙ୍ଗ୍ ଯୀଶୁ ହାର୍ କିଜି ମାଚାନ୍, ତାଞ୍ଜ ଗତେନ୍ଲେକେ ଆଜି ମାନିହିଙ୍ଗ୍, 7 ର କଗ୍ଲେ ଡ଼ିଞ୍ଜ୍ନି କାଲ୍ତିଙ୍ଗ୍ ରସ୍ତି କଣ୍ଡିତ ବାର୍ତିକିଜି ବେସି ଦାମ୍କିୟା ବାସ୍ନା ଚିକାଣ୍ ଆସ୍ତି ତା ଲାଗାୟ୍ ତାସି ୱାତାତ୍। ଆରେ ଯୀଶୁ ଚିଞ୍ଜେଙ୍ଗ୍ କୁଚ୍ଚିହିଙ୍ଗ୍ ହେ ବାସ୍ନା ଚିକାଣ୍ ଯୀଶୁଙ୍ଗ୍ ସନ୍ମାନ୍ କିଦେଙ୍ଗ୍ ତା କାପ୍ଡ଼ାତ ଚିକାଣ୍ ୱିଜୁ ୱାକ୍ଚି ଇତ୍ପାତାତ୍। 8 ଚେଲାହିର୍ ଇଦାଙ୍ଗ୍ ହୁଡ଼୍ଜି ହେ କଗ୍ଲେଙ୍ଗ୍ ବେସି ରିସାଆଜି ୱେଚ୍ଚାର୍, ଇଦାଙ୍ଗ୍ ଇନେକିଦେଙ୍ଗ୍ ନଷ୍ଟ କିନାତା? 9 ଇ ଚିକାଣ୍ତ ବେସି ରେଟ୍ତିଙ୍ଗ୍ ପସି ହେ ଡାବୁଙ୍ଗ୍ ଗରିବ୍ନିକାରିଙ୍ଗ୍ ବାଟାକିଜି ହିୟାଆତାତ୍ମା। 10 ଯୀଶୁ ହେଦାଙ୍ଗ୍ ପୁନ୍ଞ୍ଜି ହେୱାରିଙ୍ଗ୍ ୱେଚ୍ଚାନ୍, “ଇନା କିଦେଙ୍ଗ୍ ଇ କଗ୍ଲେଙ୍ଗ୍ ହରିଆଣ୍ କିନାଦେରା? ହେଦେଲ୍ ନା କାଜିଙ୍ଗ୍ ର ବେସି ହାର୍ଦି କାମାୟ୍ କିତାନ୍ନା। 11 ଗରିବ୍ ନିକାର୍ ମି ଲାଗାୟ୍ ୱିଜୁଦିନ୍ ମାନ୍ଗାନାର୍, ମାତର୍ ଆନେଙ୍ଗ୍ ୱିଜୁଦିନ୍ ମିହୁଦାଙ୍ଗ୍ ମାନ୍ଗୁଙ୍ଗ୍। 12 ଇ କଗ୍ଲେ ନା ଗାଗାଡ଼୍ତିଙ୍ଗ୍ ବାସ୍ନା ଚିକାଣ୍ ଇତ୍ପାଆତ୍ତାନା। ନା ଗାଗାଡ଼୍ତିଙ୍ଗ୍ ମୁଚ୍ଚେଙ୍ଗ୍ ନାଙ୍ଗେଙ୍ଗ୍ ଆଗେ ଜାତୁନ୍ କିତାତ୍ନା। 13 ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ‘ପୁର୍ତିନି ୱିଜୁ ବାହାତାକେ ଇ ନା ହାର୍ଦିକାବୁର୍ ଶୁଣାୟ୍ କିନିହିଙ୍ଗ୍ ଇ କଗ୍ଲେ କିତି କାମାୟ୍ତିଙ୍ଗ୍ ପା ହେୱାର୍ ଶୁଣାୟ୍ କିନାର୍ ଆରେ ମାନ୍ତ ହେତୁକିନାର୍।’ ” ଯିହୁଦା ଯୀଶୁଙ୍ଗ୍ ଶତୃ କେଇଦ ଆହିକିଦେଙ୍ଗ୍ ରାଜି ଆତାନ୍ ( ମାର୍କ. ୧୪:୧୦-୧୧ ; ଲୁକ. ୨୨:୩-୬ ) 14 ହେପାଦ୍ନା ଯୀଶୁ ବାଚିକିତି ବାରଜାଣ୍ ଚେଲାହିର୍ ବିତ୍ରେତାଙ୍ଗ୍ ଇଷ୍କାରିତିୟ ଯିହୁଦା ତର୍ଦାକାନ୍ ରକାନ୍ ଚେଲାହି ମାଚାନ୍। ହେ ଚେଲାହି ଯୀଶୁଙ୍ଗ୍ ଆହିକିଦେଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ତାକେ ହାଲ୍ଜି ୱେଚ୍ଚାନ୍। 15 “ଆନେଙ୍ଗ୍ ମିଙ୍ଗେଙ୍ଗ୍ ଯୀଶୁଙ୍ଗ୍ ଚଚ୍ଚାନାଙ୍ଗ୍ ନାଙ୍ଗେଙ୍ଗ୍ ଇନାକା ହିଦ୍ନାଦେର୍?” ଯିହୁଦି ଦରମ୍ ମୁଡ଼୍ଦି ପୁଜାରିର୍ ଇଷ୍କାରିତିୟ ଯିହୁଦାଙ୍ଗ୍ ତିରିଶ୍ ଗଟା ରୁପା ଡାବୁଙ୍ଗ୍ ହିତାର୍। 16 ହେପାଦ୍ନାତାଙ୍ଗ୍ ଇଷ୍କାରିତିୟ ଯିହୁଦା ଯିହୁଦି ଦରମ୍ନି ମୁଡ଼୍ଦି ପୁଜାରିର୍ କେଇଦ ଯୀଶୁଙ୍ଗ୍ ଆହିକିଦେଙ୍ଗ୍ ହେୱାନ୍ ଉପାୟ୍ ଦାସ୍ତେଙ୍ଗ୍ ଲାଗାତାନ୍। ଚେଲାହିର୍ ହୁଦାଙ୍ଗ୍ ଯୀଶୁ ହାରିହାରା ବଜି ( ମାର୍କ. ୧୪:୧୨-୨୧ ; ଲୁକ. ୨୨:୭-୧୩-୨୧-୨୩ ; ଯୋହନ. ୧୩:୨୧-୩୦ ) 17 ରିଦିନ୍ ପାଚେ ସଡ଼ା ମେହାଆୱିତି ରୁଟି ପାର୍ବୁତ ପାର୍ତୁମ୍ ନାଞ୍ଜିଙ୍ଗ୍, ଚେଲାହିର୍ ଯୀଶୁ ଲାଗେ ୱାଜି ୱେନ୍ବାତାର୍, “ନିସ୍ତାର୍ ପାର୍ବୁ ମାନି କିଦେଙ୍ଗ୍ ଆପେଙ୍ଗ୍ ଇମେତାକେ ବଜି ତିନାସ୍ ଇଞ୍ଜି ମାନ୍ କିନାୟା?” 18 ଯୀଶୁ ୱେଚ୍ଚାନ୍, “ଏପେଙ୍ଗ୍ ଯିରୁଶାଲାମ ସହର୍ତାକେ ହାଲାଟ୍। ଆରେ ଟାଙ୍ଗାତ ଏଜୁଙ୍ଗ୍ ନିପିତ ପିଣ୍ଜି ହାନାକାନିଙ୍ଗ୍ ଏପେଙ୍ଗ୍ ହାଲ୍ଜି ୱେଚାଟ୍, ‘ଗୁରୁ ୱେନ୍ବାଆଦ୍ନାନା, ନା କାଡ଼୍ ପୁରା ଆତାତେ, ଆନେଙ୍ଗ୍ ନା ଚେଲାର୍ ହୁଦାଙ୍ଗ୍ ମିଞ୍ଜ ନିସ୍ତାର୍ ପାର୍ବୁ ମାନିକିନାପ୍।’ ” 19 ହେବେତାଙ୍ଗ୍ ଚେଲାହିର୍ ଯୀଶୁ ଆଦେସ୍ତିଙ୍ଗ୍ ମାନିକିଜି ଯୀଶୁ ହେୱାରିଙ୍ଗ୍ ଇନେସ୍ ଲେକେ ୱେଚ୍ଚି ମାଚାନ୍, ହେଲେକେ ଆତାର୍ ଆରେ ହେୱାର୍ ନିସ୍ତାର୍ ପାର୍ବୁନି ବଜି ରସ୍ତାର୍। 20 ମିକାହାରେସ୍ ଯୀଶୁ ଆରେ ତା ବାଚିକିତି ବାରଜାଣ୍ ଚେଲାହିର୍ ହୁଦାଙ୍ଗ୍ ଚିଞ୍ଜେଙ୍ଗ୍ କୁଚ୍ଚାର୍। 21 ହେୱାର୍ କୁଚ୍ଚି ତିନିହିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ‘ମି ବିତ୍ରେତାଙ୍ଗ୍ ରକାନ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍।’ ” 22 ଇବେଣ୍ ୱେନ୍ଞ୍ଜି ହେୱାର୍ ବେସି ଦୁଃକ୍ କିତାର୍। ୱିଜାର୍ ଚେଲାହିର୍ ଯୀଶୁଙ୍ଗ୍ ୱେନ୍ବାତାର୍, “ମାପୃ, ହାତ୍ପା ଆନେଙ୍ଗ୍ ଆକାୟ୍କି?” 23 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣାକାନ୍ ନା ହୁଦାଙ୍ଗ୍ ଗିନାତ ତା କେଇ ମେତ୍ନାନ୍। ହେୱାନ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍। 24 ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ନା ବିଷୟରେ ସାସ୍ତର୍ତାକେ ଇନେସ୍ ଲେକେ ଲେକା ମାନାତ୍, ହେଲେକେ ହେୱାନ୍ ହାଃନାକା ସତ୍। ମାତର୍ ଇମ୍ଣାକାନ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍। ହେୱାନିଙ୍ଗ୍ ବୟଙ୍କାର୍ ଦଣ୍ଡ୍ ଗାଟାଆନାତ୍। ହେୱାନ୍ ଜନମ୍ ଆୱାଦାଙ୍ଗ୍ ମାଚିସ୍ ହାର୍ ଆତାତ୍ମା।” 25 ଇବେତାଙ୍ଗ୍ ଇମ୍ଣାକାନ୍ ଇଷ୍କାରିତିୟ ଯିହୁଦା ଯୀଶୁଙ୍ଗ୍ ଶାତ୍ରୁ କେଇଦ ଆହିକିନାକାନ୍ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ଆନେଙ୍ଗ୍ ଇନାକା ହେୱାନ୍?” ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ତ ନିଜେ ୱେଚ୍ଚାତାଇନା।” ପ୍ରବୁବଜ୍ନି ନିୟମ୍ ( ମାର୍କ. ୧୪:୨୨-୨୬ ; ଲୁକ. ୨୨:୧୪-୨୦ ; ୧ କରି. ୧୧:୨୩-୨୫ ) 26 ହେୱାର୍ ତିନିହିଙ୍ଗ୍ ଯୀଶୁ ରୁଟି ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ କିତାନ୍ ଆରେ ରୁଟି ଡ୍ରିକ୍ଚି ଚେଲାହିରିଙ୍ଗ୍ ହିଜି ୱେଚ୍ଚାନ୍, “ଆହାଟ୍, ଆରେ ତିନାଟ୍ ଇଦାଙ୍ଗ୍ ନା ଗାଗାଡ଼୍।” 27 ଆରେ ଯୀଶୁ ଅଙ୍ଗୁର୍ ରାସ୍ ମାନିଗିଲାସ୍ ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ଚେଲାରିଙ୍ଗ୍ ହିଜି ୱେଚ୍ଚାନ୍, “ଇ ଗିଲାସ୍ ତାଙ୍ଗ୍ ୱିଜାକାଦେର୍ ଉଣାଟ୍। ଆରେ ହେବେତାଙ୍ଗ୍ ୱିଜାକାର୍ ହେ ଗିଲାସ୍ତ ଉଟାର୍।” 28 ଆରେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇ ଅଙ୍ଗୁର୍ ରାସ୍ ନା ନେତେର୍। ଇ ନେତେର୍ କାଜିଙ୍ଗ୍ ଈଶ୍ୱର ଆରେ ମାନାୟାର୍ ଲାହାଙ୍ଗ୍ ପୁନି ନିୟମ୍ ଆନାତ୍। ଆନେଙ୍ଗ୍ ଏଚେପାଦ୍ନା ହାଃନାଙ୍ଗ୍ ହେ ନେତେର୍ ୱିଜାକାର୍ ପାପ୍ କେମା କାଜିଙ୍ଗ୍ ବଡ଼ାଆନାତ୍। 29 ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ନା ଆବା ଈଶ୍ୱର ସାସନ୍ କିନି ରାଜିତାକେ ମିହୁଦାଙ୍ଗ୍ ପୁଃନି ଅଙ୍ଗୁର୍ ରାସ୍ ଉଣି ପାତେକ୍ ଆନେଙ୍ଗ୍ ଆରେ ଇନାୱେଡ଼ାଙ୍ଗ୍ ପା ଇ ଅଙ୍ଗୁର୍ ରାସ୍ ଉଣୁଙ୍ଗ୍।” 30 ଆରେ ଯୀଶୁ ତା ଚେଲାହିର୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ନିସ୍ତାର୍ ପାର୍ବୁନି କେର୍କଣ୍ କେର୍ତାର। ଆରେ ଯିରୁଶାଲାମ ସହର୍ ନିପଣ୍ ହସି ଜିତ୍ମାର୍ ମାନି ମାଡ଼ିତାକେ ହାଚାର୍। ପିତର ଯୀଶୁଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ନାନ୍ ( ମାର୍କ. ୧୪:୨୭-୩୧ ; ଲୁକ. ୨୨:୩୧-୩୪ ; ଯୋହନ. ୧୩:୩୬-୩୮ ) 31 ଯୀଶୁ ଆରେରଗ ଚେଲାହିରିଙ୍ଗ୍ ୱେଚ୍ଚାନ୍, “ନେଞ୍ଜେଙ୍ଗ୍ ମିକାଲିଙ୍ଗ୍ ଏପେଙ୍ଗ୍ ୱିଜାକାଦେର୍ ନାଙ୍ଗେଙ୍ଗ୍ ପିସ୍ତି ହାଞ୍ଜ୍ନାଦେର୍। ସାସ୍ତର୍ତାକେ ଇବେଣ୍ ଲେକା ମାନାତ୍, ‘ଆନେଙ୍ଗ୍ ମେଣ୍ଢା ଗଡ଼ିୟାଙ୍ଗ୍ ଅହ୍ନାଙ୍ଗ୍, ହେ ମେଣ୍ଢାଙ୍ଗ୍ ଅଲଗା ଆଜି ହାନିକ୍।’ 32 ମାତର୍ ଆନେଙ୍ଗ୍ କବର୍ବାଟାତାଙ୍ଗ୍ ଜିବୁନ୍ଆଜି ନିଙ୍ଗ୍ତି ପାଚେ ମି ଆଗେ ଗାଲିଲୀ ଜିଲ୍ଲାତ ହାନାଙ୍ଗ୍। ଆରେ ହେବେ ମିହୁଦାଙ୍ଗ୍ ମାହାଆଦ୍ନାଙ୍ଗ୍।” 33 ପିତର ଯୀଶୁଙ୍ଗ୍ ୱେଚ୍ଚାନ୍, “ୱିଜାକାର୍ ନିଙ୍ଗେଙ୍ଗ୍ ପିସ୍ତି ହାଞ୍ଜ୍ନାର୍ ହିନା ନିଙ୍ଗେଙ୍ଗ୍ ଆନେଙ୍ଗ୍ ଅଲପ୍ପା ପିସ୍ତି ହାଞ୍ଜୁଙ୍ଗ୍।” 34 ଯୀଶୁ ପିତରତିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ନେଞ୍ଜେଙ୍ଗ୍ ନାଣା ରିହା କୁଜୁ କେୱି ଆଗେ ଏନେଙ୍ଗ୍ ନାଙ୍ଗେଙ୍ଗ୍ ତିନ୍ହଟ୍ ପୁନୁଙ୍ଗ୍ ଇଞ୍ଜି ୱେଚ୍ନାଇ।” 35 ପିତର ଇବେଣ୍ ୱେନ୍ଞ୍ଜି ଯୀଶୁଙ୍ଗ୍ ୱେଚ୍ଚାନ୍, “ନି ହୁଦାଙ୍ଗ୍ ଆନେଙ୍ଗ୍ ହାଃନାଙ୍ଗ୍ ହିନା ମାତର୍ ଇନାୱେଡ଼ାଙ୍ଗ୍ ପା ନିଙ୍ଗେଙ୍ଗ୍ ପୁଞ୍ଜୁଙ୍ଗ୍ ଇଞ୍ଜି ୱେଚ୍ଚେଙ୍ଗ୍ ଆଡୁଙ୍ଗ୍।” ବାକି ଚେଲାହିର୍ ପା ହେଲେକେ ବେଣ୍ ଇଚାର୍। ଗେଥ୍ଶିମାନି ବଗିଚାତାକେ ଯୀଶୁ ପାର୍ତାନା ( ମାର୍କ. ୧୪:୩୨-୪୨ ; ଲୁକ. ୨୨:୩୯-୪୬ ) 36 ତାପାଚେ ଯୀଶୁ ତା ଚେଲାହିର୍ ହୁଦାଙ୍ଗ୍ ଗେଥ୍ଶିମାନି ବଗିଚାତାକେ ହାଲ୍ଜି ତା ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇବେ କୁଚ୍ଚି ମାନାଟ୍ ଆନେଙ୍ଗ୍ ଈଶ୍ୱରତାକେ ପାର୍ତାନା କିଦେଙ୍ଗ୍ ହାନାଙ୍ଗା।” 37 ଯୀଶୁ, ପିତର ଆରେ ଜେବଦି ମେହିର୍ ରିକାରିଙ୍ଗ୍ ତା ଲାହାଙ୍ଗ୍ ଅସାହାଚାନ୍। ତାପାଚେ ଯୀଶୁ ଦୁଃକ୍ ଆରେ କାକୁଲ୍ତି ଆଦେଙ୍ଗ୍ ଲାଗାତାନ୍। 38 ହେପାଦ୍ନା ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ବେସିଦୁକ୍ କଷ୍ଟତାକେ ମାନାଙ୍ଗ୍ ନାଙ୍ଗେଙ୍ଗ୍ ଜିବୁନ୍ ହସି ହାଃନିଲେକେ ହତ୍ନାତା। ଏପେଙ୍ଗ୍ ଇବେ ମାନ୍ଞ୍ଜି ନାଙ୍ଗେଙ୍ଗ୍ କାସି ମାଞ୍ଜାଟ୍।” 39 ହେୱାର୍ ତାକେତାଙ୍ଗ୍ ଅଲପ୍ ଦେହା ତାଙ୍ଗ୍ଜି ହାଚି ପାଚେ ମେଣ୍ଡାକୁନ୍ଦିକିଜି ପାର୍ତାନା କିତାନ୍, “ଏ ଆବା ନାଙ୍ଗେଙ୍ଗ୍ ଇ ଦୁଃକ୍କଷ୍ଟତାଙ୍ଗ୍ ଦେହାକିଦା। ନା ଇଚା ଆକାୟ୍ ମାତର୍ ନି ଇଚାଆଏତ୍।” 40 ଆରେ ଯୀଶୁ ୱାଜି ଚେଲାରିଙ୍ଗ୍ ହୁଞ୍ଚାକାରିଙ୍ଗ୍ ହୁଡ଼୍ତାନ୍। ଆରେ ଶିମୋନ ପିତରତିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନା କାଜିଙ୍ଗ୍ ର ଘଣ୍ଟା କାସିମାଞ୍ଜେଙ୍ଗ୍ ଆଡ଼୍ଦାୱାତାଦେର୍?” 41 ଆରେରଗ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ କାସି ମାଞ୍ଜାଟ୍, ଆରେ ଏପେଙ୍ଗ୍ ଇନେସ୍କି ପରିକ୍ଷାତାକେ ପଡ଼ାଆଉଦେର୍ ହେଦାଙ୍ଗ୍ କାଜିଙ୍ଗ୍ ପାର୍ତାନା କିୟାଟ୍, ମି ଆତ୍ମା ସତ୍ କିଦେଙ୍ଗ୍ ଇଚା କିନାତ୍, ମାତର୍ ମି ଗାଗାଡ଼୍ ବାଡ଼୍କାସ୍ ହିଲେତ୍।” 42 ଆରେରଗ ଯୀଶୁ ହାଚାନ୍, ଆରେ ପାର୍ତାନା କିତାନ୍, “ଏ ନା ଆବା, ଯଦି ଇ କଷ୍ଟନି ବାହା ନାବେତାଙ୍ଗ୍ ଦେହାଆୱିତିସ୍, ହେଲେକେ ଆୟେତ୍ ହେଦାଙ୍ଗ୍ ଆନେଙ୍ଗ୍ ଉଣାଙ୍ଗ୍। ଲାଗିଙ୍ଗ୍ ଆନେଙ୍ଗ୍ ପାର୍ତାନା କିନାଙ୍ଗା ଯେ, ଏନେଙ୍ଗ୍ ଇନାକା ଇଚା କିନାୟା ହେଦାଙ୍ଗ୍ନେ ଆଏତ୍।” 43 ଆରେ ଯୀଶୁ ୱାଜି ଆରେରଗ ହେୱାରିଙ୍ଗ୍ ହୁନ୍ଞ୍ଚାକା ହୁଡ଼୍ତାନ୍। ଇନେସ୍କି ହେୱାରିଙ୍ଗ୍ ହୁଚ୍କାଣ୍କୁ ଡାବାଇ କିଜି ମାଚିକ୍। ଆରେ ହେୱାର୍ କାଣ୍କୁ ପା ଜେତେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। 44 ଯୀଶୁ ଚେଲାହିରିଙ୍ଗ୍ ପିସ୍ତି ଆରେ ଲେଉଟା ଆଜି ତିନ୍ହଟ୍ ପାର୍ତାନା କିତାନ୍। ନଙ୍ଗୟ୍ ପା ଆଗେଲେକେନେ ହେ ର ବେଣ୍ ଇଚାନ୍। 45 ତାପାଚେ ଯୀଶୁ ଚେଲାହିର୍ ଲାଗେ ୱାଜି ହେୱାରିଙ୍ଗ୍ ୱେଚ୍ଚାନ୍, “ନଙ୍ଗୟ୍ ପାତେକ୍ ହୁନ୍ଞ୍ଚାଦେର୍ନା? ଏଚେକ୍ ଆତାତେ! ୱେନାଟ୍! ନା ସମୟ୍ ୱାତାତେ, ଆରେ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତଙ୍ଗ୍ ପାପିର୍ କେଇଦ ଆହିୟା ଆନାଙ୍ଗ୍। 46 ନିଙ୍ଗାଟ୍! ଆସେଙ୍ଗ୍ ହାନାସ୍, ହୁଡ଼ାଟ୍, ଇମ୍ଣି ମାନାୟ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍, ହେୱାନ୍ ୱାତାନେ।” ଯୀଶୁ ଶାତ୍ରୁ କେଇଦ ଆହିୟା ଆନାକା ( ମାର୍କ. ୧୪:୪୩-୫୦ ; ଲୁକ. ୨୨:୪୭-୫୩ ; ଯୋହନ. ୧୮:୨-୧୨ ) 47 ଯୀଶୁ ବେଣ୍ ୱେଚ୍ନିହିଙ୍ଗ୍ ବାରଜାଣ୍ ବିତ୍ରେତାଙ୍ଗ୍ ଇଷ୍କାରିତିୟ ଯିହୁଦା ତର୍ଦାକାନ୍ ରକାନ୍ ହେବେ ୱାତାନ୍। ହେୱାର୍ ହୁଦାଙ୍ଗ୍ ଟେଙ୍ଗା, କାଣ୍ଡାଙ୍ଗ୍ ଆସ୍ତି ର ମାନ୍ଦା ମାନାୟ୍ତିଙ୍ଗ୍ ତାହିୱାତାନ୍। ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ଆରେ ପ୍ରାଚିନ୍ନାର୍ ହେୱାରିଙ୍ଗ୍ ପକ୍ଚି ମାଚାର୍। 48 ଆରେ ଇଷ୍କାରିତିୟ ଯିହୁଦା ଯୀଶୁଙ୍ଗ୍ ଆହ୍ନାକାରିଙ୍ଗ୍ ଆଗେ ୱେଚିମାଚାନ୍। ଆନେଙ୍ଗ୍ ଇନେରିଙ୍ଗ୍ ଚୁମା ହିନାଙ୍ଗ୍ ହେୱାନ୍ ଇଞ୍ଜି ଏପେଙ୍ଗ୍ ପୁନାଟ୍। ହେୱାନିଙ୍ଗ୍ ଏପେଙ୍ଗ୍ ଆହାଟ୍। 49 ତାପାଚେ ଇଷ୍କାରିତିୟ ଯିହୁଦା ହେଦାପ୍ରେ ଯୀଶୁ ଲାଗେ ୱାଜି ୱେଚ୍ଚାନ୍, “ଏ ଗୁରୁ ଜୱାର୍,” ଇଞ୍ଜି ୱେଚ୍ଚି ଚୁମା ହିତାନ୍। 50 ମାତର୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏ ବନ୍ଦୁ, ଏନେଙ୍ଗ୍ ଇନାକା କିଦେଙ୍ଗ୍ ୱାତାଇନା, ହେଦାଙ୍ଗ୍ କିୟା।” ହେବେତାଙ୍ଗ୍ ହେୱାର୍ ଲାଗେ ୱାଜି ଯୀଶୁଙ୍ଗ୍ କେଇଦ ଆସ୍ତିଗାଚ୍ଚାର୍। 51 ଇମ୍ଣାକାର୍ ଯୀଶୁ ହୁଦାଙ୍ଗ୍ ମାଚାର୍, ହେୱାର୍ ବିତ୍ରେତାଙ୍ଗ୍ ରକାନ୍ ଚେଲାହି ତା କାଣ୍ଡା ହପ୍ଚି ଈଶ୍ଵରତିଙ୍ଗ୍ ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହଲିଆହିଙ୍ଗ୍ ହେବେ କିତୁଲ୍ ରଞ୍ଜି ହଣ୍ତାନ୍। 52 ହେବେତାଙ୍ଗ୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନି କାଣ୍ଡା ନାଳା ବିତ୍ରେ ଇଟା। ଇମ୍ଣି ମାନାୟ୍ କାଣ୍ଡା ହୁଦାଙ୍ଗ୍ ଅହ୍ନାନ୍ ହେୱାନ୍ ପା କାଣ୍ଡାତାଙ୍ଗ୍ ନେ ହାଃନାନ୍। 53 ଏପେଙ୍ଗ୍ ଇନାକା ବାବିକିନାଦେରା ଆନେଙ୍ଗ୍ ସରଗ୍ନି ଆବାଙ୍ଗ୍ ପାର୍ତାନା କିତିସ୍ ସାଙ୍ଗେସାଙ୍ଗେ, ନାଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍ ବାରଗଟାଦଳ୍ତାଙ୍ଗ୍ ଆଦିକ୍ ହେନି ଦୁତ୍କୁ ପକ୍ଚି ରକ୍ଷା କିଦେଙ୍ଗ୍ ଆଡ଼୍ଦୁନ୍ କି? 54 ମାତର୍ ଆନେଙ୍ଗ୍ ହେଦାଙ୍ଗ୍ କିତିସ୍ ଦରମ୍ ସାସ୍ତର୍ ଇନେସ୍ ଲେକେ ପୁରାଆନାତ୍? ୱିଜୁବେଣ୍ ହେଲେକେ ଗଟାଆନାତ୍ ଇଞ୍ଜି ସାସ୍ତର୍ତ ଲେକା ମାନାତ୍।” 55 ତାପାଚେ ଯୀଶୁ ମାନାୟାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ୱିଜାଦେର୍ ଡାକୁର୍ ବିରଦ୍ତାକେ ହାନିଲେକେ ଆଜି କାଣ୍ଡାଙ୍ଗ୍ ଆରେ କଣାଙ୍ଗ୍ ଆସ୍ତି ଏପେଙ୍ଗ୍ ଇନା କିଦେଙ୍ଗ୍ ନାଙ୍ଗେଙ୍ଗ୍ ଆସ୍ତି ଗାଚ୍ଚେଦେଙ୍ଗ୍ ୱାତାଦେର୍? ଆନେଙ୍ଗ୍ ୱିଜୁଦିନ୍ ମିହୁଦାଙ୍ଗ୍ ମାନ୍ଞ୍ଜି ଈଶ୍ୱର ମାନି ମନ୍ଦିର୍ନି ହାକ୍ଡ଼ିତ ହିକ୍ଷାହିଜି ମାନ୍ଚାଙ୍ଗ୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ଆସ୍ତିଗାଚ୍ଚା ୱାତାଦେର୍। 56 ମାତର୍ ଭବିଷ୍ଯତବକ୍ତାର୍ ଇନେସ୍ ଲେକେ ଲେକିକିଜି ମାଚାର୍। ହେଲେକେ ଆଦେଙ୍ଗ୍ ଇୱିଜୁ ଗାଟାଆତାତ୍।” ତାପାଚେ ୱିଜାର୍ ଚେଲାହିର୍ ଯୀଶୁଙ୍ଗ୍ ପିସ୍ତି ହନ୍ଚିହାଚାର୍। ଯିହୁଦିର୍ ମିଟିଙ୍ଗ୍ ଇଞ୍ଜ ଯୀଶୁଙ୍ଗ୍ ବିଚାର୍ କିଦେଙ୍ଗ୍ ଅତାର୍ ( ମାର୍କ. ୧୪:୫୩-୬୫ ; ଲୁକ. ୨୨:୫୪-୫୫-୬୩-୭୧ ; ଯୋହନ. ୧୮:୧୩-୧୪-୧୯-୨୪ ) 57 ଇମ୍ଣାକାର୍ ଯୀଶୁଙ୍ଗ୍ ଗାଚ୍ଚି ହେୱାର୍ ତାଙ୍ଗେଙ୍ଗ୍ ଈଶ୍ଵରତିଙ୍ଗ୍ ହେବାକିନି ପ୍ରଦାନ୍ ମୁଡ଼୍ଦି ପୁଜାରି କୟାପା ଇଞ୍ଜ ଅତାର୍। ହେବେ ପଣ୍ଡିତ୍ ଆରେ ପ୍ରାଚିନ୍ ରବେ ରୁଣ୍ଡାଆଜି ମାଚାର୍। 58 ମାତର୍ ପିତର ଅଲପ୍ ଦେହା ମାନ୍ଞ୍ଜି ହେୱାର୍ ପାଚେ-ପାଚେ ହାଚାନ୍। ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହାକ୍ଡ଼ି ପାତେକ୍ ହାଚାନ୍। ଆରେ ହେୱାନ୍ ମନ୍ଦିର ଜାଗୁୱାଡ଼ି ହୁଦାଙ୍ଗ୍ କୁଚ୍ଚି ନାଣି କାଇଜି ମାଚାନ୍। 59 ଇପାଦ୍ନା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ଦଳ୍ନି ବିଚାର୍କିନି ନେତାର୍ ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ମିଚ୍ ସାକି ଦାସ୍ତେଙ୍ଗ୍ ଲାଗାତାର୍। 60 ଆରେ କେତେକ୍ ମାନାୟ୍ ତା ବିରତାଙ୍ଗ୍ ମିଚ୍ ସାକି ହିତାର୍। ମାତର୍ ହେୱାନ୍ ସାକି ଆରେ ରକାନ୍ ସାକି ତାକେ ମେହାଆୱାଦାଙ୍ଗ୍ ମାଚାତ୍। ମାତର୍ ପାଚେ ରିୟାର୍ ନେ ମିଚ୍ ସାକି ହପ୍ତାର୍। 61 ଇୱାନ୍ତ ୱେଚ୍ଚି ମାନ୍ଞ୍ଚାନ୍, “ଆନେଙ୍ଗ୍ ଈଶ୍ୱର ରସ୍ତି ମନ୍ଦିର୍ତିଙ୍ଗ୍ ଡ୍ରିକ୍ଚି ତିନ୍ଦିନ୍ତାଙ୍ଗ୍ ଆନେଙ୍ଗ୍ ମାନାୟାର୍ ରହ୍ୱିତି ମନ୍ଦିର୍ତିଙ୍ଗ୍ ରହ୍ନାଙ୍ଗ୍।” 62 ହେବେତାଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ବିଚାର୍ ସବା ଆଗେ ନିଲ୍ଚି ଯୀଶୁଙ୍ଗ୍ ୱେନ୍ବାତାନ୍, ଏନେଙ୍ଗ୍ ଇନାକା ୱେଚୁୟା? ନି ବିରଦ୍ତାକେ ଇୱାର୍ ଇ ସାକି ହିଦ୍ନାରା ଇଦାଙ୍ଗ୍ ଇନାକା? 63 ମାତର୍ ଯୀଶୁ ଚିମ୍ରା ଆଜି ମାଚାନ୍। ହେବେତାଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହେୱାନିଙ୍ଗ୍ ୱେଚ୍ଚାନ୍, ଆପେଙ୍ଗ୍ ନିଙ୍ଗେଙ୍ଗ୍ ଜିବୁନ୍ ମାନି ଈଶ୍ୱର ତର୍ଦାଙ୍ଗ୍ ପାର୍ମାଣ୍ ହିଦ୍ନାଙ୍ଗା ମାଙ୍ଗେଙ୍ଗ୍ ୱେଚ୍ଚା, ଏନେଙ୍ଗ୍ ଇନାକା ଈଶ୍ୱର ମେହି ଯୀଶୁ ଖ୍ରୀଷ୍ଟ ତି? 64 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆଁ, ଆନେଙ୍ଗ୍ ଈଶ୍ୱର ମେହି ଖ୍ରୀଷ୍ଟ। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଯେ ଏପେଙ୍ଗ୍ ହାତ୍ପା ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ୱିଜୁତାଙ୍ଗ୍ ଶାକ୍ତିକାଟି ଈଶ୍ୱର ତିନିବାଗାଙ୍ଗ୍ କୁଚ୍ଚାକା ଆରେ ସରଗ୍ନି ବାଦାଡ଼୍ତାଙ୍ଗ୍ ୱାନାକା ହୁଡ଼୍ନାଦେର୍।” 65 ହେବେ ଯୀଶୁ ୱେଚ୍ଚି ବେଣ୍ତିଙ୍ଗ୍ ୱେନ୍ଞ୍ଜି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ରିସାଆଜି ଜାର୍ ଆଙ୍ଗିତିଙ୍ଗ୍ କେଚ୍ଚାନ୍, ଆରେ ହେୱାନ୍ ୱେଚ୍ଚାନ୍ “ଇୱାନ୍ ଇମ୍ଣି ୱିଜୁବେଣ୍ ୱେଚ୍ଚାତାନ୍ ତା କାଜିଙ୍ଗ୍ ଈଶ୍ୱରତିଙ୍ଗ୍ ନିନ୍ଦା କିନାନା। ଆରେ ମାଙ୍ଗେଙ୍ଗ୍ ସାକି ଦର୍କାର୍ ଆକାୟ୍। ଏପେଙ୍ଗ୍ ଈଶ୍ୱରତିଙ୍ଗ୍ ନିନ୍ଦାକିନାକା ୱେଚାଦେର୍। ଏପେଙ୍ଗ୍ ନଙ୍ଗୟ୍ ଇନାକା ଇନାଦେରା?” 66 ହେୱାର୍ ୱେଚ୍ଚାର୍, “ହେୱାନ୍ ଦସି। ତାଙ୍ଗେଙ୍ଗ୍ ହାଃନି ଦଣ୍ଡ୍ ପାୟାଆନି ଦର୍କାର୍।” 67 ତାପାଚେ ହେବେ ମାଚି ମାନାୟାର୍ ଯୀଶୁଙ୍ଗ୍ ମୁମ୍ଦ ଚୁପ୍ଜି ହେୱାନିଙ୍ଗ୍ ବିଧା ଇଡ଼୍ତାର୍। କେତ୍ଜାଣ୍ ଚାପ୍ଡ଼ା ହୁଦାଙ୍ଗ୍ ଇଡ଼୍ତାର୍। 68 ଖ୍ରୀଷ୍ଟ! ଏନେଙ୍ଗ୍ ଯଦି ର ଭବିଷ୍ଯତବକ୍ତାତି, ମାଙ୍ଗେଙ୍ଗ୍ ୱେଚ୍ଚା ତ, ଇନେର୍ ନିଙ୍ଗେଙ୍ଗ୍ ଇଡ଼୍ଦାତାର୍? ପିତର ଯୀଶୁଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ଚାନ୍ ( ମାର୍କ. ୧୪:୬୬-୭୨ ; ଲୁକ. ୨୨:୫୬-୬୨ ; ଯୋହନ. ୧୮:୧୫-୧୮-୨୫-୨୭ ) 69 ହେପାଦ୍ନା ପିତର ହାକ୍ଡ଼ି ମାଦି କୁଚ୍ଚି ମାଚାନ୍। ର ଚାକ୍ରାଣି ପିତର କଚଣ୍ତ ୱାତାତ୍। ହେଦେଲ୍ ୱେଚ୍ଚାତ୍, “ଏନେଙ୍ଗ୍ ପା ଗାଲିଲୀ ଜିଲ୍ଲାନି ଯୀଶୁ ହୁଦାଙ୍ଗ୍ ମାଚାୟ୍।” 70 ମାତର୍ ପିତର ଇବେଣ୍ ୱିଜାକାର୍ ମୁମ୍ଦ ଏନେଙ୍ଗ୍ ଇନାକା ଇଞ୍ଜ୍ନାୟା ଆନେଙ୍ଗ୍ ବୁଜା ଆଦେଙ୍ଗ୍ ଆଡୁଙ୍ଗା ଇଞ୍ଜି ଇଚାନ୍। ହେୱାନ୍ ୱେଚ୍ଚାନ୍, “ଏନେଙ୍ଗ୍ ଇନାକା ଇଞ୍ଜ୍ନାୟା ହେଦାଙ୍ଗ୍ ଆନେଙ୍ଗ୍ ପୁନୁଙ୍ଗ୍।” 71 ତାପାଚେ ହେୱାନ୍ ହାକ୍ଡ଼ିତାଙ୍ଗ୍ ହସି ୱାତାନ୍। ଚାକ୍ରାଣି ହେୱାନିଙ୍ଗ୍ ଗେଟ୍ତାକେ ହୁଡ଼୍ଜି ହେବେ ମାଚି ମାନାୟ୍ତିଙ୍ଗ୍ ୱିଜାରିଙ୍ଗ୍ ୱେଚ୍ଚାତ୍, “ଇ ମାନାୟ୍ ନାଜରିତିୟ ଯୀଶୁ ହୁଦାଙ୍ଗ୍ ମାଚାନ୍।” 72 ଆରେରଗ ପିତର ପୁନୁଙ୍ଗ୍ ଇଚାନ୍। ହେୱାନ୍ ୱେଚ୍ଚାନ୍, “ଆନେଙ୍ଗ୍ ଈଶ୍ୱର ତର୍ଦାଙ୍ଗ୍ ରାଣ୍ ଇଡ଼୍ଜି ୱେଚ୍ଚାନାଙ୍ଗା ଯେ ଆନେଙ୍ଗ୍ ଇ ମାନାୟ୍ତିଙ୍ଗ୍ ପୁନୁଙ୍ଗ୍।” 73 ଅଲପ୍ ହାଚି ପାଚେ ଲାଗେ ନିଲ୍ତି ମାନାୟାର୍ ପିତର କଚଣ୍ତ ୱାଜି ତାଙ୍ଗେଙ୍ଗ୍ ୱେଚ୍ଚାର୍, “ଆପେଙ୍ଗ୍ ପୁନାପା ଏନେଙ୍ଗ୍ ପା ରକାୟ୍ ତା ଚେଲାହିତି। ନି ବେଣ୍ତାଙ୍ଗ୍ ପୁନିୟାଆନାତା।” 74 ପିତର ଜାର୍ ରାଣ୍ତିନ୍ଞ୍ଜି ଆରେ ପାର୍ମାଣ୍ କିଜି ୱେଚ୍ଚେଙ୍ଗ୍ ଲାଗାତାନ୍, “ଆନେଙ୍ଗ୍ ହେୱାନିଙ୍ଗ୍ ପୁନୁଙ୍ଗ୍।” ହେପାଦ୍ନା କୁଜୁ କେତାତ୍। 75 ନଙ୍ଗୟ୍ ପିତରତିଙ୍ଗ୍ ଯୀଶୁ ଆଗେ ଇମ୍ଣିବେଣ୍ ୱେଚିମାଚାନ୍ ହେ ବେଣ୍ ତା ମାନ୍ତ ୱାତିଲେ, “କୁଜୁ କେୱି ଆଗେ ନାଙ୍ଗେଙ୍ଗ୍ ତିନ୍ହଟ୍ ପୁଞ୍ଜୁୟ୍ ଇଞ୍ଜି ୱେଚ୍ନାଇ।” ଲାଗିଙ୍ଗ୍ ପିତର ବେସିଦୁକ୍ ଆଜି ଆଡ଼୍ବାତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation