ମାତିଉ 25 - New Testament in Pengo Parja Languageଦଶ୍ଜାଣ୍ ଗାଡ଼୍ଚେକ୍ତି କାତା 1 ହେପାଦ୍ନା ଯୀଶୁ କାତା ୱେଚ୍ନିଲେକେ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଲେକେ ଦଶ୍ଜାଣ୍ ଗାଡ଼୍ଚେକ୍ ବଇଟା ଆସ୍ତି ଜାର୍-ଜାର୍ ବରଙ୍ଗ୍ ଡେକ୍ନି ଲେକେ ଆନାତ୍। 2 ହେୱେକ୍ ବିତ୍ରେତାଙ୍ଗ୍ ପାଞ୍ଚ୍ଜାଣ୍ ଗାଡ଼୍ଚେକାଙ୍ଗ୍ ବୁଦି ହିଲିକିକ୍। ଆରେ ପାଞ୍ଚ୍ଜାଣ୍ ଗାଡ଼୍ଚେକ୍ ଚାଲାକି ମାଚିକ୍। 3 ବୁଦିହିଲି ହେ ପାଞ୍ଚ୍ଜାଣ୍ ଗାଡ଼୍ଚେକ୍ ହେୱେକ୍ ହୁଦାଙ୍ଗ୍ ବଇଟା ହିନା ଅଜିମାଚିକ୍। ମାତର୍ ବଇଟା କାଚାୟ୍ କିଦେଙ୍ଗ୍ ଆଗ୍ଡ଼ା ଚିକାଣ୍ ତାୱାଦାଙ୍ଗ୍ ମାଚିକ୍। 4 ଚାଲାକି ମାନି ପାଞ୍ଚ୍ଜାଣ୍ ଗାଡ଼୍ଚେକ୍ ବଇଟା ତ ଅଜିମାଚିକ୍। ହେଦାଙ୍ଗ୍ ପିସ୍ତି କାଚ୍ତାକେ ଆଗ୍ଡ଼ା ଆଦିକ୍ ଚିକାଣ୍ ଅଜିମାଚିକ୍। 5 ବର ୱାଦେଙ୍ଗ୍ ଲେଟ୍ ଆତାତ୍। ୱିଜୁ ଗାଡ଼୍ଚେକ୍ ୱାସ୍ତି ପାଚେ ହୁନ୍ଚିକ୍। 6 ମାଦିମାଦାନାଣା ରକାନ୍ ଇନେର୍ ଶୁଣାୟ୍ କିତାନ୍, ‘ବର ୱାନାନା ବାର୍ତ ହାଲ୍ଜି ତାଙ୍ଗେଙ୍ଗ୍ ମାହାଆଡ।’ 7 ଇବେଣ୍ ୱେନ୍ଞ୍ଜି ୱିଜୁ ଗାଡ଼୍ଚେକ୍ ନିଙ୍ଗ୍ଞ୍ଜି ଜାର୍-ଜାର୍ ବଇଟାତିଙ୍ଗ୍ ସଜାଇ କିଦେଙ୍ଗ୍ ଲାଗିତିକ୍। 8 ବୁଦିହିଲ୍ୱି ଗାଡ଼୍ଚେକ୍ ଚାଲାକି ଗାଡ଼୍ଚେକାଙ୍ଗ୍ ୱେଚ୍ଚିକ୍, ‘ଏପେଙ୍ଗ୍ ମି ଚିକାଣ୍ ମାଙ୍ଗେଙ୍ଗ୍ ଇଚ୍କେ ହିଦାଟ୍ ମା ବଇଟାନି ଚିକାଣ୍ ୱିଜ୍ନାତ୍ଦେ।’ 9 ଚାଲାକି ଗାଡ଼୍ଚେକ୍ ୱେଚ୍ଚିକ୍, ‘ଆକାୟ୍ ମା ଚିକାଣ୍ ମାଙ୍ଗେଙ୍ଗ୍ ଉଣା ଆଦ୍ନାତ୍। ଆପେଙ୍ଗ୍ ମିଙ୍ଗେଙ୍ଗ୍ ହିତ୍ଦେଙ୍ଗ୍ ଆଡ଼୍ଦୁପ୍ ଏପେଙ୍ଗ୍ ଦୁକାଣ୍ତ ହାଲ୍ଜି ଜାର୍ କାଜିଙ୍ଗ୍ ଇଚ୍କେ ଚିକାଣ୍ କଡ଼୍ଜିତାଡ।’ 10 ଲାଗିଙ୍ଗ୍ ପାଞ୍ଚ୍ଜାଣ୍ ବୁଦିହିଲି ଗାଡ଼୍ଚେକ୍ ଚିକାଣ୍ କଡ଼୍ଦେଙ୍ଗ୍ ହାଚିକ୍। ହେୱେକ୍ ହାଚି ପାଚେ ବର ୱାତାନ୍। ଇମ୍ଣି ଚାଲାକି ଗାଡ଼୍ଚେକ୍ ଜାଗ୍ରତ୍ ମାଚିକ୍, ହେୱେକ୍ ବର ହୁଦାଙ୍ଗ୍ ବିବାବଜିତାକେ ହାଚିକ୍। ତାପାଚେ କାପାଟ୍ତ କୁଚି ଆହିକିତିକ୍। 11 ହେପାଦ୍ନା ବୁଦିହିଲି ଗାଡ଼୍ଚେକ୍ ଏକିୱାତିକ୍। ହେୱେକ୍ ୱେଚ୍ଚିକ୍, ‘ମାପୃ-ମାପୃ! କାପାଟ୍ ଜେତା। ଇନେସ୍କିଜି ଆପେଙ୍ଗ୍ ବିତ୍ରେ ୱାନାପ୍।’ 12 ମାତର୍ ବର ୱେଚ୍ଚାନ୍, ‘ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଆନେଙ୍ଗ୍ ମିଙ୍ଗେଙ୍ଗ୍ ପୁଞ୍ଜୁଙ୍ଗ୍।’ 13 ଲାଗିଙ୍ଗ୍ ଏପେଙ୍ଗ୍ ପାର୍ତାନାତାକେ ଜାଗ୍ରତ୍ ଆଜି ମାନାଟ୍। ଲାଗିଙ୍ଗ୍ ଏପେଙ୍ଗ୍ ହେ ଦିନ୍ ଇନାୱେଡ଼ାଙ୍ଗ୍ ଇ ଗଟ୍ନା ଏକିୱାନାତ୍ ହେଦାଙ୍ଗ୍ ଏପେଙ୍ଗ୍ ପୁନୁଦେର୍।” ତିନ୍ଜାଣ୍ ହଲିଆନି କାତା ( ଲୁକ. ୧୯:୧୧-୨୭ ) 14 ଯୀଶୁ କାତା ୱେଚ୍ନିଲେକେ ଆରେରଗ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଇଲେକେ, ର ମାନାୟ୍ ୱିଜୁ ଦନ୍ ସମ୍ପତି ତା ହଲିଆରିଙ୍ଗ୍ କୁକ୍ଚି ଜାତୁନ୍ କିଦେଙ୍ଗ୍ ସାର୍ପି କିଜି ହିତାନ୍। 15 ଇମ୍ଣି ହଲିଆହି ଏଚେକ୍ ଦାୟିତ୍ପ ଅଦେଙ୍ଗ୍ ଆଡ୍ନାନ୍, ହେ କାତା ହେୱାନ୍ ପୁଚାନ୍। ହେୱାନ୍ ରକାନିଙ୍ଗ୍ ପାଞ୍ଚ୍ ହାଜାର୍ ରୁପାଡାବୁ ହିତାନ୍। ଆରେ ରକାନିଙ୍ଗ୍ ଦୁଇହାଜାର୍ ରୁପାଡାବୁ, ଆରେ ରକାନିଙ୍ଗ୍ ରହାଜାର୍ ରୁପାଡାବୁ ହିତାନ୍। ହଲିଆରିଙ୍ଗ୍ କିନି ଶାକ୍ତି ହୁଡ଼୍ଜି ହେୱାରିଙ୍ଗ୍ କାମାୟ୍ ବାଟାକିଜି ହିତାନ୍ ଆରେ ହେୱାନ୍ ବୁଲାଆଦେଙ୍ଗ୍ ହାଚାନ୍। 16 ଇମ୍ଣି ହଲିଆହି ପାଞ୍ଚ୍ ହାଜାର୍ ରୁପାଡାବୁ ଅଜି ମାଚାନ୍, ହେୱାନ୍ ବେଗି ହେ ଡାବୁଙ୍ଗ୍ ବେପାର୍ବାଟ୍ କିନି କାମାୟ୍ତାକେ ଲାଗାୟ୍ କିତାନ୍। ହେୱାନ୍ ଆରେ ପାଞ୍ଚ୍ ହାଜାର୍ ରୁପାଡାବୁ ଆର୍ଜା ଆତାନ୍। 17 ହେଲେକେ ଇମ୍ଣି ହଲିଆହି ଦୁଇହାଜାର୍ ରୁପାଡାବୁ ଅଜି ମାଚାନ୍, ହେୱାନ୍ ପା ଡାବୁଙ୍ଗ୍ ବେପାର୍ବାଟ୍ କିନି କାମାୟ୍ତାକେ ଲାଗାୟ୍ କିତାନ୍ ଆରେ ଦୁଇହାଜାର୍ ରୁପାଡାବୁ ଆର୍ଜା ଆତାନ୍। 18 ମାତର୍ ଇମ୍ଣି ହଲିଆହି ଆପ୍କା ରହାଜାର୍ ରୁପାଡାବୁ ଅଜି ମାଚାନ୍, ହେୱାନ୍ ହାଲ୍ଜି ତା ମାଲିକ୍ ଦନ୍ତିଙ୍ଗ୍ ଅଜି ମେଦ୍ନିତ ର କଡ଼ି କାର୍ଚି ହେବେ ଡ଼ୁକ୍ଚି ଇଡ଼୍ତାନ୍। 19 ବେସିଦିନ୍ ପାଚେ ମାଲିକ୍ ଇଞ୍ଜ ୱାତାନ୍। ହେ ହଲିଆହିରିଙ୍ଗ୍ କୁକ୍ତାନ୍, ଆରେ ତା ଡାବୁଙ୍ଗ୍ ହୁଦାଙ୍ଗ୍ ଇନାକା କିତାର୍, ହେଦାଙ୍ଗ୍ ହେୱାରିଙ୍ଗ୍ ୱେନ୍ବାତାନ୍। 20 ଇମ୍ଣି ହଲିଆହି ପାଞ୍ଚ୍ ହାଜାର୍ ରୁପାଡାବୁ ଅଜି ମାଚାନ୍, ହେ ହଲିଆହି ମାଲିକ୍ ଲାଗାୟ୍ ଆରେ ଆଦିକ୍ ପାଞ୍ଚ୍ ହାଜାର୍ ରୁପାଡାବୁ ତାସିୱାଜି ୱେଚ୍ଚାନ୍, ‘ଏନେଙ୍ଗ୍ ନାଙ୍ଗେଙ୍ଗ୍ ପାଞ୍ଚ୍ ହାଜାର୍ ରୁପାଡାବୁ ହିଜି ମାନ୍ଞ୍ଚାୟ୍। ଆନେଙ୍ଗ୍ ହେ ପାଞ୍ଚ୍ ହାଜାର୍ ରୁପାଡାବୁ ଅଜି ଆରେ ପାଞ୍ଚ୍ ହାଜାର୍ ରୁପାଡାବୁ ଆର୍ଜା ଆତାଙ୍ଗ୍ନା।’ 21 ମାଲିକ୍ ୱେଚ୍ଚାନ୍, ‘ବଡ଼ିଆ ଏନେଙ୍ଗ୍ ବେସି ହାର୍, ଆରେ ନିଙ୍ଗେଙ୍ଗ୍ ପାର୍ତି କିୟାଆନାତ୍। ଏନେଙ୍ଗ୍ ଉଣା ଡାବୁଙ୍ଗ୍ତାଙ୍ଗ୍ ହାର୍ଦି କାମାୟ୍ କିତାଇନା। ଲାଗିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଗାଜା ବିଷୟରେ ଦାୟିତ୍ପ ହିଦ୍ନାଙ୍ଗ୍। ୱା ଆସେଙ୍ଗ୍ ୱାରି କିନାସ୍।’ 22 ତାପାଚେ ଦୁଇହାଜାର୍ ରୁପା ଡାବୁଙ୍ଗ୍ ଅଜି ମାଚାନ୍ ହେ ହଲିଆହି ମାଲିକ୍ ଲାଗାୟ୍ ୱାଜି ୱେଚ୍ଚାନ୍, ‘ଏନେଙ୍ଗ୍ ନାଙ୍ଗେଙ୍ଗ୍ ଦୁଇହାଜାର୍ ରୁପାଡାବୁଙ୍ଗ୍ନି ଦାୟିତ୍ପ ହିଜି ମାଞ୍ଚାଇ। ଆନେଙ୍ଗ୍ ଆରେ ଦୁଇହାଜାର୍ ରୁପା ଡାବୁଙ୍ଗ୍ ଆର୍ଜା ଆଦେଙ୍ଗ୍ ନି ଦୁଇହାଜାର୍ତିଙ୍ଗ୍ କାମାୟ୍ତାକେ ଲାଗାୟ୍ କିତାଙ୍ଗ୍ନା।’ 23 ମାଲିକ୍ ୱେଚ୍ଚାନ୍, ‘ବଡ଼ିଆ ଏନେଙ୍ଗ୍ ବେସି ହାର୍, ଆରେ ନିଙ୍ଗେଙ୍ଗ୍ ପାର୍ତି କିୟାଆନାତ୍। ଏନେଙ୍ଗ୍ ଉଣା ଡାବୁଙ୍ଗ୍ତାଙ୍ଗ୍ ହାର୍ଦି କାମାୟ୍ କିତାଇନା। ଲାଗିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଗାଜା ବିଷୟରେ ଦାୟିତ୍ପ ହିଦ୍ନାଙ୍ଗ୍। ୱା ଆସେଙ୍ଗ୍ ୱାରି କିନାସ୍।’ 24 ତାପାଚେ ରହାଜାର୍ ରୁପା ଡାବୁଙ୍ଗ୍ ଅତି ହଲିଆହି ମାଲିକ୍ ଲାଗାୟ୍ ୱାଜି ୱେଚ୍ଚାନ୍, ‘ମାଲିକ୍ ଆନେଙ୍ଗ୍ ପୁନାଙ୍ଗ୍ ଯେ ଏନେଙ୍ଗ୍ ରକାୟ୍ ମଡ଼ି ମାନାୟ୍, ଜମିତାକେ ତାସ୍ ୱିତ୍ୱାଦାଙ୍ଗ୍ ପା ଏନେଙ୍ଗ୍ ତାସ୍ ତେଜ୍ନାୟ୍। ବିୟାନ୍ ୱିତ୍ୱାଦାଙ୍ଗ୍ ପା ତାସ୍ ରବେ କିନାୟ୍। 25 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ପାଣ୍ଡ୍ରାଆଜି। ଆନେଙ୍ଗ୍ ହାଲ୍ଜି ମେଦ୍ନିତ ଏନେଙ୍ଗ୍ ହିତ୍ତି ରୁପା ଡାବୁଙ୍ଗ୍ ମୁଚ୍ଚାଙ୍ଗ୍। ହେୱାନ୍ ତାଙ୍ଗେଙ୍ଗ୍ ହିତି ହାଜାର୍ ରୁପା ଡାବୁଙ୍ଗ୍ ହିତାନ୍।’ 26 ତା ମାଲିକ୍ ତାଙ୍ଗେଙ୍ଗ୍ ୱେଚ୍ଚାନ୍, ‘ଏନେଙ୍ଗ୍ ରକାୟ୍ ଆଡ଼୍ସାୟ୍ ଆରେ ବାନ୍ଯା ହଲିଆ। ଏନେଙ୍ଗ୍ ପୁଚାୟ୍ନା ଯେ ଆନେଙ୍ଗ୍ ଇମେତାକେ ଉବ୍ଜା ଆତାଙ୍ଗ୍ନା ହେବେ ପା ଆନେଙ୍ଗ୍ ତେଜ୍ନାଙ୍ଗ୍, ଆରେ ଇମେତାକେ ତାସ୍ ୱିତ୍ୱାଦାଙ୍ଗ୍ ପା ହେବେ ତାସ୍ ରୁଣ୍ଡାଇ କିନାଙ୍ଗ୍। 27 ଲାଗିଙ୍ଗ୍ ନା ଡାବୁଙ୍ଗ୍ ବେଙ୍କ୍ତାକେ ଇଟ୍ନି କାତା ମାଚାତ୍। ଏଲେଙ୍ଗ୍ କିତିସ୍ ଆନେଙ୍ଗ୍ ଇଞ୍ଜ ୱାତି ପାଚେ ନା ଡାବୁଙ୍ଗ୍ କନ୍ତର୍ ହୁଦାଙ୍ଗ୍ ନାଙ୍ଗେଙ୍ଗ୍ ଗାଟାଆତିକ୍ମା।’ 28 ତାପାଚେ ମାଲିକ୍ ତା ଜେକନି ହଲିଆରିଙ୍ଗ୍ ୱେଚ୍ଚାନ୍, ‘ହେ ହଲିଆତାଙ୍ଗ୍ ଡାବୁଙ୍ଗ୍ ଜାଲିଆ ଅଜି, ଇନେରିଙ୍ଗ୍ ଦସ୍ ହାଜାର୍ ରୁପା ଡାବୁଙ୍ଗ୍ ମାନିକ୍ ହେୱାନିଙ୍ଗ୍ ହିୟାଟ୍। 29 ଇନେସ୍କି ଇମ୍ଣାକାର୍ ନା ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଇଚାକିନାର୍। ଈଶ୍ୱର ହେୱାନିଙ୍ଗ୍ ଆଦିକ୍ ବୁଜା ଆଦେଙ୍ଗ୍ ହିନାନ୍, ମାତର୍ ଇମ୍ଣାକାର୍ ନା ହିକ୍ଷାତିଙ୍ଗ୍ ପୁଞ୍ଜେଙ୍ଗ୍ ମାନ୍କିଉର୍। ମାତର୍ ଇମ୍ଣି ମାନାୟ୍ ତା ଲାଗାୟ୍ ମାନି ଦର୍କାର୍ଆନି ଜିନିଷ୍ତିଙ୍ଗ୍ ବାଉରା ଆଉନା। ତାବେ ଇନାକାପା ମାନାତ୍, ୱିଜୁ ଜେଲ୍ଜି ଅନାର୍।’ 30 ତାପାଚେ ମାଲିକ୍ ୱେଚ୍ଚାନ୍, ‘ହେୱାନ୍ ଦର୍କାର୍ଆୱି ହଲିଆହିଙ୍ଗ୍ ବାର୍ତ ମାଜ୍ଗାତ ତୁହିହିୟାଟ୍। ହେବେ ମାନାୟାର୍ ଆଡ଼୍ବାନାର୍ ଆରେ କଷ୍ଟତାଙ୍ଗ୍ ଟାଡାଙ୍ଗ୍ କାପ୍ନାର୍।’ ଯୀଶୁ ହାରିହାରା ୱିଜାକାରିଙ୍ଗ୍ ବିଚାର୍ କିନାନ୍ ( ମାଥି. ୧୬:୨୭ ; ୧୯:୨୮ ) 31 ଏଚେପାଦ୍ନା ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଆରେରଗ ହେୱାନ୍ ଗୌରବ ହୁଦାଙ୍ଗ୍ ୱାନାନ୍। ହେୱାନ୍ ହୁଦାଙ୍ଗ୍ ସରଗ୍ନି ଦୁତ୍କୁ ୱାନିକ୍। ହେୱାନ୍ ରାଜା ଆନାନ୍ ଆରେ ତା ଗାଜା ସିଂହାସନ୍ ଜପି ୱିଜାକାରିଙ୍ଗ୍ ବିଚାର୍ କିଦେଙ୍ଗ୍ କୁଚ୍ନାନ୍। 32 ଆନେଙ୍ଗ୍ ୱାୱି ଆଗେ ପୁର୍ତିନି ୱିଜୁ ମାନାୟ୍ ଜାତି ରବେ ଆନାର୍। ତାପାଚେ ର ଗଡ଼ିୟା ଇନେସ୍ ଅଡାଙ୍ଗ୍ ବିତ୍ରେତାଙ୍ଗ୍ ମେଣ୍ଢାକାଙ୍ଗ୍ ଅଲ୍ଗା କିନାନ୍। ହେଲେକେ ଆନେଙ୍ଗ୍ ୱିଜୁ ଦରମ୍ମାନାୟ୍ତାଙ୍ଗ୍ ଅଦରମ୍ ମାନାୟ୍ତିଙ୍ଗ୍ ଅଲ୍ଗା କିନାଙ୍ଗ୍। 33 ଆନେଙ୍ଗ୍ ଦରମ୍ ମାନାୟାରିଙ୍ଗ୍ ନା ତିନାବାଗାୟ୍ ଇଟ୍ନାଙ୍ଗ୍ ଆରେ ଅଦରମ୍ ମାନାୟାରିଙ୍ଗ୍ ନା ଡେବା ବାଗାୟ୍ ଇଟ୍ନାଙ୍ଗ୍। 34 ଆନେଙ୍ଗ୍ ରାଜା ତା ତିନାବାଗାୟ୍ ମାନି ମାନାୟାରିଙ୍ଗ୍ ୱେଚ୍ନାଙ୍ଗ୍, ୱାଡ ନା ସରଗ୍ନି ଆବା ମିଙ୍ଗେଙ୍ଗ୍ ଆଶ୍ରିବାଦ୍ କିତ୍ତାନ୍ନା। ଈଶ୍ୱର ମିଙ୍ଗେଙ୍ଗ୍ ଇମ୍ଣି ରାଜି ହିଦ୍ଦେଙ୍ଗ୍ ଇଚା କିତ୍ତାନ୍ନା। ହେଦାଙ୍ଗ୍ ଏପେଙ୍ଗ୍ ପାୟାଆଡୁ। ପୁର୍ତି ଉବ୍ଜା ଆନି ପାଦ୍ନା ମି କାଜିଙ୍ଗ୍ ହେ ରାଜି ରହିଆତାତ୍ନା। 35 ଏପେଙ୍ଗ୍ ଇ ରାଜି ପାୟାଆନାଦେର୍ ଇନେସ୍କି ଆନେଙ୍ଗ୍ ଏଚେପାଦ୍ନା ନାସ୍କି ମାଚାଙ୍ଗ୍। ହେପାଦ୍ନା ଏପେଙ୍ଗ୍ ନାଙ୍ଗେଙ୍ଗ୍ ଚିଞ୍ଜେଙ୍ଗ୍ ହିଜି ମାନ୍ଞ୍ଚାଦେର୍। ନାଙ୍ଗେଙ୍ଗ୍ ଏସ୍କି ହତ୍ନିହିଙ୍ଗ୍ ନାଙ୍ଗେଙ୍ଗ୍ ଇଚୁଡ଼ିଙ୍ଗ୍ ଇନାକା ଉଣ୍ଡେଙ୍ଗ୍ ହିତ୍ତାଦେର୍ନା। ଆନେଙ୍ଗ୍ ଇଞ୍ଜାଙ୍ଗ୍ ଦେହା ରକାଙ୍ଗ୍ ମାଚାଙ୍ଗ୍। ଏପେଙ୍ଗ୍ ନାଙ୍ଗେଙ୍ଗ୍ ମିଞ୍ଜ କୁକ୍ତାତାଦେର୍। 36 ନାଙ୍ଗେଙ୍ଗ୍ ହନ୍ଦ୍ରାପାଟା ହିଲ୍ୱାଦାଙ୍ଗ୍ ମାଚାତ୍, ଆରେ ଏପେଙ୍ଗ୍ ନାଙ୍ଗେଙ୍ଗ୍ ହେନ୍ଦ୍ରା ଉସ୍ପେଦେଙ୍ଗ୍ ହିଜି ମାନ୍ଞ୍ଚାଦେର୍। ଆନେଙ୍ଗ୍ ବେମାର୍ତାକେ ମାଚାଙ୍ଗ୍। ଏପେଙ୍ଗ୍ ନାଙ୍ଗେଙ୍ଗ୍ ଜାତୁନ୍ କିତ୍ତାଦେର୍, ଆନେଙ୍ଗ୍ ଜଇଲ୍ ଇଞ୍ଜ ମାଚାଙ୍ଗ୍। ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦେଙ୍ଗ୍ ୱାଜି ମାଚାଦେର୍। 37 ହେପାଦ୍ନା ଦରମ୍ ମାନାୟାର୍ ୱେଚ୍ଚାନାର୍, ଏ ମାପୃ! ଆପେଙ୍ଗ୍ ଏଚେପାଦ୍ନା ନିଙ୍ଗେଙ୍ଗ୍ ନାସ୍କି ମାନାକା ହୁଡ଼୍ଜି ଚିଞ୍ଜେଙ୍ଗ୍ ହିଜି ମାନ୍ଞ୍ଚାପ୍? ଏଚେପାଦ୍ନା ଆପେଙ୍ଗ୍ ନିଙ୍ଗେଙ୍ଗ୍ ଏସ୍କି ଆନାକା ହୁଡ଼୍ଜି ଉଣ୍ଡେଙ୍ଗ୍ ଇନାକା ଇଚ୍କେ ହିଜି ମାନ୍ଞ୍ଚାପ୍? 38 ଏଚେପାଦ୍ନା ଆପେଙ୍ଗ୍ ନିଙ୍ଗେଙ୍ଗ୍ ଇଞ୍ଜାଙ୍ଗ୍ ଦେହା ମାନାକା ହୁଡ଼୍ଜି ମାଞ୍ଜ ହିର୍ବିସ୍ ମାନ୍ଞ୍ଚାପ୍? ଏଚେପାଦ୍ନା ନିଙ୍ଗେଙ୍ଗ୍ ଆପେଙ୍ଗ୍ ହେନ୍ଦ୍ରା ହିଲ୍ୱିତିହିଙ୍ଗ୍ ହୁଡ଼୍ଦାତାପ୍ ଆରେ ଉସ୍ପେଦେଙ୍ଗ୍ ହେନ୍ଦ୍ରା ହିଜି ମାନ୍ଞ୍ଚାପ୍? 39 ଏଚେପାଦ୍ନା ନିଙ୍ଗେଙ୍ଗ୍ ଆପେଙ୍ଗ୍ ବେମାର୍ କି ଜଇଲ୍ ଇଞ୍ଜ ହୁଡ଼୍ଜି ନିଙ୍ଗେଙ୍ଗ୍ ଜାତୁନ୍ କିଜି ମାନ୍ଞ୍ଚାପ୍? 40 ଏଚେପାଦ୍ନା ଆନେଙ୍ଗ୍ ରାଜା ୱେଚ୍ଚାନାଙ୍ଗ୍, ‘ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ଏପେଙ୍ଗ୍ ନାବେ ପାର୍ତିକିନି ଟଣ୍ଡାର୍ ବିତ୍ରେତାଙ୍ଗ୍ ରକାନିଙ୍ଗ୍ ଇନାକା କିତାଦେର୍ନା। ହେଦାଙ୍ଗ୍ ଏପେଙ୍ଗ୍ ନା କାଜିଙ୍ଗ୍ କିତାଦେର୍ନା।’ 41 ତାପାଚେ ରାଜା ତା ଡେବା ବାଗାୟ୍ ମାନି ମାନାୟାରିଙ୍ଗ୍ ୱେଚ୍ନାନ୍, ‘ନାବେତାଙ୍ଗ୍ ହାଲାଟ୍। ଈଶ୍ୱର ମି କାଜିଙ୍ଗ୍ ଦଣ୍ଡ୍ ବାଚି କିତାନ୍ନା। ଏପେଙ୍ଗ୍ ୱିଜୁଦିନ୍ କାଚାଆନି ନାଣିତାକେ ହାନାଦେର୍। ଇନେସ୍କି ଶୟତାନ ଆରେ ତା ଦୁତ୍କୁକାଜିଙ୍ଗ୍ ରହିଆତାତ୍ନା।’ 42 ଲାଗିଙ୍ଗ୍ ଆନେଙ୍ଗ୍ ନାସ୍କି ମାଚାଙ୍ଗ୍ ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ଇଚ୍କେ ତିନାକା ହିଦ୍ୱାଦାଙ୍ଗ୍ ମାଚାଦେର୍। 43 ଆନେଙ୍ଗ୍ ଏସ୍କି ମାଚାଙ୍ଗ୍ ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ଇଚ୍କେ ଇନାକା ଉଣ୍ଡେଙ୍ଗ୍ ହିଦ୍ୱାଦାଙ୍ଗ୍ ମାନ୍ଞ୍ଚାଦେର୍। ଆନେଙ୍ଗ୍ ରକାଙ୍ଗ୍ ଇଞ୍ଜାଙ୍ଗ୍ ଦେହା ମାଚାଙ୍ଗ୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ଇଲ୍ ବିତ୍ରେ ହିର୍ବାଆଦ୍ୱାତାଦେର୍, ନାଙ୍ଗେଙ୍ଗ୍ ଉସ୍ପେଦେଙ୍ଗ୍ ହେନ୍ଦ୍ରାପାଟା ହିଲ୍ୱାତାତ୍। ଏପେଙ୍ଗ୍ ନାଙ୍ଗେଙ୍ଗ୍ ଉସ୍ପେଦେଙ୍ଗ୍ ଇନାକା ଇଚ୍କେ ହିଦ୍ୱାଦାଙ୍ଗ୍ ମାନ୍ଞ୍ଚାଦେର୍। ଆନେଙ୍ଗ୍ ବେମାର୍ତ ମାଚାଙ୍ଗ୍। ଆରେ ଜଇଲ୍ ଇଞ୍ଜ ମାଚାଙ୍ଗ୍। ଆରେ ଏପେଙ୍ଗ୍ ନା କାଜିଙ୍ଗ୍ ଚିନ୍ତା କିୱାଦାଙ୍ଗ୍ ମାଚାଦେର୍। 44 ତାପାଚେ ହେୱାର୍ ପା ୱେଚ୍ଚାନାର୍, ‘ମାପୃ, ନିଙ୍ଗେଙ୍ଗ୍ ଏଚେପାଦ୍ନା ଆପେଙ୍ଗ୍ ନାସ୍କି କି ଏସ୍କି ଆତାକା ହୁଡ଼୍ଦାତାପ୍ନା? ଆପେଙ୍ଗ୍ ଏଚେପାଦ୍ନା ନିଙ୍ଗେଙ୍ଗ୍ ରକାନିଙ୍ଗ୍ ଇଞ୍ଜାଙ୍ଗ୍ ଦେହା ମାନାକା ହୁଡ଼୍ଦାତାପ୍? ଏଚେପାଦ୍ନା ନିଙ୍ଗେଙ୍ଗ୍ ଆପେଙ୍ଗ୍ ହେନ୍ଦ୍ରାପାଟା ହିଲ୍ୱିହିଙ୍ଗ୍ କି ବେମାର୍ ଆତିହିଙ୍ଗ୍ କି ଜଇଲ୍ ଇଞ୍ଜ ହୁଡ଼୍ଦାତାପ୍? ଇନାୱେଡ଼ାଙ୍ଗ୍ ଇୱିଜୁ ଆପେଙ୍ଗ୍ ହୁଡ଼୍ଜି ମାନ୍ଞ୍ଚାପ୍ ଆରେ ନିଙ୍ଗେଙ୍ଗ୍ ସାଇଜ କିଦ୍ୱାତାପ୍ନା?’ 45 ତାପାଚେ ଆନେଙ୍ଗ୍ ହେୱାରିଙ୍ଗ୍ ୱେଚ୍ନାଙ୍ଗ୍, ‘ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏଚେପାଦ୍ନା ଇବେ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତିକିନି ମାନାୟାର୍ ବିତ୍ରେତାଙ୍ଗ୍ ଇମ୍ଣି ମାନାୟ୍ତିଙ୍ଗ୍ ପା ସାଇଜ କିଦେଙ୍ଗ୍ ମୁନା କିତିସ୍। ହେଲେକେ ଏପେଙ୍ଗ୍ ନାଙ୍ଗେଙ୍ଗ୍ ସାଇଜ କିଦେଙ୍ଗ୍ ମୁନା କିତାଦେର୍!’ 46 ତାପାଚେ ଇ ମାନାୟାର୍ ହସି ହାନାର୍। ଅଦରମ୍ ମାନାୟାରିଙ୍ଗ୍ ୱିଜ୍ୱି ଦଣ୍ଡ୍ ପାୟା ଆଦେଙ୍ଗ୍ ଆନାତ୍। ମାତର୍ ହାର୍ଦି ମାନାୟାର୍ ୱିଜ୍ୱି ଜିବୁନ୍ ପାୟାଆନାର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation