ମାତିଉ 23 - New Testament in Pengo Parja Languageସାଦୁକି ଆରେ ପାରୁସିଦଳ୍ କାଜିଙ୍ଗ୍ ସାତ୍ଗଟା ଅବିଶାପ୍ ( ମାର୍କ. ୧୨:୩୮-୩୯ ; ଲୁକ. ୧୧:୪୩-୪୬ ; ୨୦:୪୫-୪୬ ) 1 ଯୀଶୁ ହେପାଦ୍ନା ମାନାୟାରିଙ୍ଗ୍ ଆରେ ଜାର୍ ଚେଲାହିରିଙ୍ଗ୍ ୱେଚ୍ଚାନ୍। 2 ପଣ୍ଡିତ୍ ଆରେ ପାରୁସିଦଳ୍ନିକାର୍ ମୋଶା କିତି ନିୟମ୍ନି ବେଣ୍ ୱେଚ୍ଚେଙ୍ଗ୍ ଆଦିକାର୍ ପାୟାଆତାର୍ନା। 3 ଲାଗିଙ୍ଗ୍ ହେୱାର୍ ଇନାକା କିଦେଙ୍ଗ୍ ୱେଚ୍ଚାନାରା, ହେଦାଙ୍ଗ୍ କିୟାଟ୍। ମାତର୍ ହେୱାର୍ କାରୁମ୍ ଅନୁସାତାଙ୍ଗ୍ କାରୁମ୍ କିମାଟ୍। ଇନେସ୍କି ହେୱାର୍ ଜାର୍ ହିଜିମାନି ହିକ୍ଷା ଅନୁସାରେ କାମାୟ୍ କିଉର୍। 4 ମାନି କିଦେଙ୍ଗ୍ କଷ୍ଟ ଆତିସ୍ପା ହେୱାର୍ ମାନାୟାର୍ କାଜିଙ୍ଗ୍ ଆବ୍ଡ଼ୁ ନିୟମ୍ ରହ୍ନାର୍। ହେ ନିୟମ୍ ମାନି କିଦେଙ୍ଗ୍ ମାନାୟାରିଙ୍ଗ୍ ଜବର୍ ଦସ୍ତ୍ କିନାର୍, ମାତର୍ ହେୱାର୍ ଜାର୍ ଇନାୱେଡ଼ାଙ୍ଗ୍ ପା ହେ ନିୟମ୍ତିଙ୍ଗ୍ ରଞ୍ଜି ପା ମାନି କିଦେଙ୍ଗ୍ ମାନ୍କିଉର୍। 5 “ମାତର୍ ହେୱାର୍ ମାନାୟ୍ତିଙ୍ଗ୍ ଚଚ୍ଚେଙ୍ଗ୍ ୱିଜୁ ହାର୍ କାମାୟ୍ କିନାର୍। ହୁଡ଼ାଟ୍, ଜାର୍ତିଙ୍ଗ୍ ଦରମ୍ ଚଚିୟାଆନି କାଜିଙ୍ଗ୍ ଗାଜାଗାଜା ଡଙ୍ଗ୍ରୁ ମାରାତ ଗାଚିଆ ଆନାର୍, ଆରେ ଜାର୍ ପାର୍ତାନା କିନିହିଙ୍ଗ୍ ଉସ୍ପିତି ହେନ୍ଦ୍ରା ବେସି ଲାମାୟ୍ କିନାର୍। 6 ଆରେ ବଜି ତିନି ମୁଡ଼୍ଦି ବାହା ଆରେ ଯିହୁଦିର୍ ପାର୍ତାନା ଇଞ୍ଜ ସନ୍ମାନ୍ ପାୟାଆନି ବାହା, 7 ଆରେ, ଆଟ୍ ବାଜାର୍ତାକେ ଜୁଆର୍ ପାୟା ଆଦେଙ୍ଗ୍ ଆରେ ମାନାୟାର୍ ଗୁରୁ ଇଞ୍ଜେର୍ମା ଇଞ୍ଜି କୁଚ୍ଚେଙ୍ଗ୍ ଇଚାକିନାର୍। 8 ମାତର୍ ଏପେଙ୍ଗ୍ ଗୁରୁ ଇଞ୍ଜି ହିର୍ବାନାକା ଉଚିତ୍ ଆକାଇ, ଇନେସ୍କି ଏପେଙ୍ଗ୍ ୱିଜାଦେର୍ ଟଣ୍ଡାର୍ ଆରେ ମି ଗୁରୁ ଆପ୍କା ରକାନ୍। 9 ଆରେ ପୁର୍ତିତାକେ ଇନେରିଙ୍ଗ୍ ଆଁ ଆବା ଇଞ୍ଜି ହିର୍ବାନାକା ଉଚିତ୍ ଆକାଇ। ଇନେସ୍କି ମି ଆବା ଆପ୍କା ରକାନ୍ ହେୱାନ୍ ସରଗ୍ତାକେ ମାନାନ୍। 10 ମିଙ୍ଗେଙ୍ଗ୍ ମାପୃ ଇଞ୍ଜି ଇନେର୍ ପା ହିର୍ବାଆଦ୍ମେର୍, ଇନେସ୍କି ରକାନ୍ ମାତର୍ ମାପୃ ଆନାନା ଖ୍ରୀଷ୍ଟ। 11 ଇମ୍ଣି ମାନାୟ୍ ହଲିଆ ଲେକେ ମିଙ୍ଗେଙ୍ଗ୍ ହେବା କିଦ୍ନାନ୍, ହେ ମାନାୟ୍ ୱିଜାକାର୍ତାଙ୍ଗ୍ ଗାଜାକାନ୍ ଆନାନ୍। 12 ଇମ୍ଣାକାନ୍ ଆନେଙ୍ଗ୍ ଗାଜାକାଙ୍ଗ୍ ଇନାନ୍, ହେୱାନିଙ୍ଗ୍ ହିରୁ କିୟାଆନାତ୍। ଇମ୍ଣାକାନ୍ ଆନେଙ୍ଗ୍ ହିରୁ ଇଞ୍ଜି ବାବିକିନାନ୍, ହେୱାନିଙ୍ଗ୍ ଗାଜା କିୟାଆନାତ୍।” ଦରମ୍ ନାୟକ୍ ଆରେ ପାରୁସିତି ବନ୍ୟା ( ମାର୍କ. ୧୨:୪୦ ; ଲୁକ. ୧୧:୩୯-୪୨-୪୪-୫୨ ; ୨୦:୪୭ ) 13 ଏ ପଣ୍ଡିତ୍ ଆରେ ପାରୁସିଦଳ୍ନି ମାନାୟ୍ କାଦେର୍, ଇନେସ୍କି ଏପେଙ୍ଗ୍ ସେସ୍ଦିନ୍ କେତେକ୍ ବୟଙ୍କାର୍! ଆରେ ହାନି ପାଟ୍କାର୍ ମାନାୟ୍, ଈଶ୍ୱର ସାସନ୍ କିନି ରାଜିତାକେ ହାନି ହାଜି ବନ୍ଦ୍ କିତାଦେର୍ନା। ଜାର୍ ହେବେ ହାଲୁଦେରା ଆରେ ଇମ୍ଣାକାର୍ ହାଞ୍ଜେଙ୍ଗ୍ ଉପାୟ୍ କିନାରା, ହେୱାରିଙ୍ଗ୍ ହାଞ୍ଜେଙ୍ଗ୍ ହିଉଦେରା। 14 ହାୟ୍, ଦଣ୍ଡ୍ନି ବାହା କୁଟ୍କିନାକାର୍ ଯିହୁଦି ଦରମ୍ନି ପଣ୍ଡିତାର୍ ଆରେ ମୁକ୍ୟା ପାରୁସିର୍, ମାତର୍ ଏପେଙ୍ଗ୍ ମାନାୟାରିଙ୍ଗ୍ ବଲ୍ବଲାୟ୍ ଆଦେଙ୍ଗ୍ ଡେଙ୍ଗା ପାର୍ତାନା କିତି ପାଚେ ରାଣ୍ଡିକ୍ ଇଞ୍ଜାକା ୱିଜୁ ବୁଡାଇ କିନାର୍। ଲାଗିଙ୍ଗ୍ ଏପେଙ୍ଗ୍ ବେସି ଗାଜା ଦଣ୍ଡ୍ ପାୟାଆନାଦେର୍। 15 ହାୟ୍, ଦଣ୍ଡ୍ନି ବାହା ପାଟ୍କାର୍ ପଣ୍ଡିତ୍ ଆରେ ପାରୁସିଦଳ୍ନିକାର୍, ଇନେସ୍କି ଏପେଙ୍ଗ୍ ରକାନିଙ୍ଗ୍ ମି ଦରମ୍ତିଙ୍ଗ୍ ହେବା କିଦେଙ୍ଗ୍ ଦାସ୍ତି ବୁଲାଆନାଦେରା। ମାତର୍ ହେଲେକେ ରକାନିଙ୍ଗ୍ ଗାଟାଆତିସ୍, ତାଙ୍ଗେଙ୍ଗ୍ ନରକ୍ତାକେ ହାନି କାଜିଙ୍ଗ୍ ମି ତାକେତାଙ୍ଗ୍ ଦୁଇଗୁଣ୍ ଆଦିକ୍ କାଇ କିନାଦେରା। 16 ଏ କାଣାରିଙ୍ଗ୍ ହାଜି ଚଚ୍ନାକାଦେ ମିଙ୍ଗେଙ୍ଗ୍ ହାୟ୍, ଏପେଙ୍ଗ୍ ୱେଚ୍ନାଦେରା ଯେ ଇନେର୍ ଈଶ୍ୱର ମାନି ଇଲ୍ ପାର୍ମାଣ୍ କିନାନ୍ ଲାଗିଙ୍ଗ୍ ହେ ପାର୍ମାଣ୍ ଇଟ୍ନି ଦର୍କାର୍ ଆକାୟ୍। ମାତର୍ ଇମ୍ଣାକାନ୍ ଈଶ୍ୱର ମାନି ମନ୍ଦିର୍ନି ହନା ତର୍ଦାଙ୍ଗ୍ ରାଣ୍ ଇଡ଼୍ଜି ପାର୍ମାଣ୍ କିନାନ୍। ଲାଗିଙ୍ଗ୍ ହେୱାନ୍ ହେ ପାର୍ମାଣ୍ ରକ୍ଷା କିୟେନ୍। 17 ଏପେଙ୍ଗ୍ କାଣା ଆରେ ବକ୍ଆ ଆଦିକ୍ ଗାଜାକା ଇମ୍ଣାକା? ହନା କି ଈଶ୍ୱର ମାନି ମନ୍ଦିର୍, ହେ ମନ୍ଦିର୍ନି ହନାତିଙ୍ଗ୍ ପବିତ୍ର କିନାତ୍ ଲାଗିଙ୍ଗ୍ ହେ ମନ୍ଦିର୍ ବେସି ଗାଜା। 18 ଆରେ ୱେଚ୍ଚି ମାନାଦେର୍, ଇନେର୍ ବେଦିତ ପାର୍ମାଣ୍ କିତାର୍ ହେଦାଙ୍ଗ୍ ଇଚୁକ୍ ଆକାୟ୍, ମାତର୍ ଯେ ଇନେର୍ ବେଦିଜପି ମାନି ଜିନିଷ୍ତିଙ୍ଗ୍ ପାର୍ମାଣ୍ କିନାନ୍, ହେୱାନ୍ ରକ୍ଷା କିୟାଆନାନ୍। 19 ଏପେଙ୍ଗ୍ କାଣାକାଦେର୍ ଇନାକା ବୁଜାଆଉଦେରା। ଗାଜାକାନ୍ ଇନେର୍? ବେଦି କି ପୁଜା? ବେଦି ପୁଜାତିଙ୍ଗ୍ ପବିତ୍ର କିଜି ମାନ୍ଗାନାତ୍। ଲାଗିଙ୍ଗ୍ ବେଦି ଗାଜା। 20 ଲାଗିଙ୍ଗ୍ ଯଦି ଇନେର୍ ବେଦି ତର୍ଦାଙ୍ଗ୍ ପାର୍ମାଣ୍ କିନାନ୍ ଲାଗିଙ୍ଗ୍ ହେୱାନ୍ ବେଦି ହୁଦାଙ୍ଗ୍ ବେଦିଜପି ଇନାକା ଇଡ଼୍ଜି ମାଚାର୍। ହେୱାନ୍ ୱିଜୁ ତର୍ଦାଙ୍ଗ୍ ପାର୍ମାଣ୍ କିଜି ମାନାନ୍। 21 ଇମ୍ଣି ମାନାୟ୍ ଈଶ୍ୱର ମାନି ମନ୍ଦିର୍ ତର୍ଦାଙ୍ଗ୍ ପାର୍ମାଣ୍ କିନାନ୍। ହେୱାନ୍ ଈଶ୍ୱର ମାନି ଇଞ୍ଜ ରକାନ୍ ଇନେର୍ ମାନାନ୍। ହେୱାନ୍ ତର୍ଦାଙ୍ଗ୍ ପାର୍ମାଣ୍ କିଜି ମାନାନ୍। 22 ଆରେ ଇନେର୍ ସରଗ୍ତିଙ୍ଗ୍ ପାର୍ମାଣ୍ କିଜି ମାନାନ୍। ହେୱାନ୍ ଈଶ୍ୱରତି ସିଂହାସନ୍ ଜପି ଇନେର୍ ମାନ୍ଗାନାନ୍ ହେୱାନ୍ ତର୍ଦାଙ୍ଗ୍ ପା ପାର୍ମାଣ୍ କିଜି ମାନାନ୍। 23 ଏ ପାଟ୍କାର୍ ପଣ୍ଡିତ୍ ଆରେ ପାରୁସିଦଳ୍, ମିଙ୍ଗେଙ୍ଗ୍ ମି ବାଡ଼୍ଦ ଇନାକା ମାନାତ୍, କାଟିଙ୍ଗ୍, ବିରି, କାନ୍ଦୁଲ୍ ଇୱିଜୁ ଦସ୍ ବାଗ୍ତାଙ୍ଗ୍ ର ବାଗ୍ ଏପେଙ୍ଗ୍ ଈଶ୍ୱରତିଙ୍ଗ୍ ହିନାଦେରା। ମାତର୍ ଏପେଙ୍ଗ୍ ମୋଶା ନିୟମ୍ ବିଦିତାଙ୍ଗ୍ ନ୍ୟାୟ୍ ବିଚାର୍ ଦୟା କି ପାର୍ତି କିଉଦେରା। ମାତର୍ ଇୱିଜୁ ଏପେଙ୍ଗ୍ ମାନିକିନାକା ଆରେ ଜେକନିକା ୱିଜୁ ଏପେଙ୍ଗ୍ ମାନିକିନି କାତା। 24 ଏ କାଣା ହାଜ୍ଦିଙ୍ଗ୍ ଅନାକାଦେର୍। ମାତର୍ ଏପେଙ୍ଗ୍ ୱିଜୁତିଙ୍ଗ୍ ମାନି କିନିଲେକେ ହିରୁ ନିୟମ୍ତିଙ୍ଗ୍ ମାନିକିନାଦେର୍ ଆରେ ଉଟ୍ତିଙ୍ଗ୍ ଗୁସ୍ତି ଲେକେ ଗାଜାଗାଜା ନିୟମ୍ତିଙ୍ଗ୍ ମାନି କିଉଦେରା। 25 ଏ ପାଟ୍କାର୍ ପଣ୍ଡିତ୍ ଆରେ ପାରୁସିଦଳ୍ ଏପେଙ୍ଗ୍ ଆଦିକ୍! ଏପେଙ୍ଗ୍ ମି ତାଡ଼ିଆ ଗିନାନି ବାର୍ତ ହାର୍ଦାଙ୍ଗ୍ ନୁଜ୍ନାଦେରା। ମାତର୍ ମି ଗରବ୍ ବିତ୍ରେ ଜେକନିକାରିଙ୍ଗ୍ ଟକାଇ କିନି ବୁଦି କିନାଦେରା। 26 ଏ କାଣା ପାରୁସିଦଳ୍, ପାର୍ତୁମ୍ ଗିନାନି ବିତ୍ରେନିକା ନୁଜ୍ଜି ହାର୍କିନାଦେରା। ମାତର୍ ହାତ୍ପା ଗିନାନି ବିତ୍ରେନିକା ସପା ମାଚିସ୍, ବାର୍ତ ପା ସପା ଆଦେଙ୍ଗ୍ ଆଡ୍ନାତ୍। 27 ଏ ପାଟ୍କାର୍ ପଣ୍ଡିତ୍ ଆରେ ପାରୁସିଦଳ୍? ମିଙ୍ଗେଙ୍ଗ୍ ଦିକ! ଏପେଙ୍ଗ୍ ୱିଜୁ ଡ଼ିଞ୍ଜ୍ନି ରଙ୍ଗ୍ତାଙ୍ଗ୍ ଦୁଗେର୍ ଲେକେ। ଇ ଦୁଗେର୍ ବିତ୍ରେ ହାଃତି ଲକାର୍ତି ପେକୁଙ୍ଗ୍ ମାନ୍ଗିନିକ୍। ୱିଜୁ ପର୍କାର୍ ବାନ୍ୟା ଜିନିଷ୍ ତା ବିତ୍ରେ ମାନ୍ଗିନିକ୍। 28 ହେଲେକେ ଏପେଙ୍ଗ୍ ପା ହାର୍ ଇଞ୍ଜି ବାଟ୍ପାଣ୍ ଆନାଦେରା। ମାତର୍ ମି ବିତ୍ରେ ବାଟ୍ପାଣ୍ ବୁଦି ଆରେ ପାପ୍ ମାନ୍ଗାନାତ୍। ବାଟ୍ପାଣ୍ ପଣ୍ଡିତ୍ ଆରେ ପାରୁସିରିଙ୍ଗ୍ ଦଣ୍ଡ୍ ୱାନାକା ଆଗେ ୱେଚ୍ଚାନ୍ ( ଲୁକ. ୧୧:୪୭-୫୧ ) 29 ଆରେରଗ ଯୀଶୁ ହେୱାରିଙ୍ଗ୍ ୱେଚ୍ଚାନ୍, ଏ ପାଟ୍କାର୍ ପଣ୍ଡିତାର୍ ଆରେ ପାରୁସିଦଳ୍, ଏପେଙ୍ଗ୍ ଭବିଷ୍ଯତବକ୍ତା ଦୁଗେର୍ ରହ୍ନାଦେରା। ଇମ୍ଣି ମାନାୟ୍ ହାର୍ଦି ଯିବୁନ୍ କାଟିକିଜି ମାଚାର୍, ଏପେଙ୍ଗ୍ ତା ଦୁଗେର୍ତିଙ୍ଗ୍ ହାର୍ଦାଙ୍ଗ୍ ରହ୍ନାଦେରା। 30 ଆରେ ଏପେଙ୍ଗ୍ ୱେଚ୍ନାଦେରା ଯେ, ଆପେଙ୍ଗ୍ ପା ଆକଦାଦିର୍ ଲେକେ ଆଜି ମାଚିସ୍, ଲାଗିଙ୍ଗ୍ ହେୱାର୍ ଲେକେ କାମାୟ୍ କିୱାତାପ୍ମା ମାତର୍ ଭବିଷ୍ଯତବକ୍ତାରିଙ୍ଗ୍ ମାର୍ନେ ଅହ୍ୱାତାଦେର୍ମା। 31 ଏପେଙ୍ଗ୍ ଚଚିୟା ଆନାଦେରା ଏପେଙ୍ଗ୍ ହେ ମାନାୟାର୍ ଲାତ୍ରା ଇମ୍ଣାକାର୍ ଭବିଷ୍ଯତବକ୍ତାରିଙ୍ଗ୍ ମାର୍ନେ ଅସ୍ତାର୍। 32 ମି ଆକଦାଦିର୍ ଇମ୍ଣି ପାପ୍ କାମାୟ୍ ଆରମ୍ କିଜି ମାଚାର୍, ହେଦେଲିଙ୍ଗ୍ ଏପେଙ୍ଗ୍ ସେସ୍ କିନାଦେର୍। 33 ଏପେଙ୍ଗ୍ ରାଚ୍ ଲେକେ। ଏପେଙ୍ଗ୍ ବିଶ୍ ଆସ୍ତି ରାଚ୍ ଲାତ୍ରାତାଙ୍ଗ୍ ଜନମ୍ ଆତାଦେର୍ନା। ଏପେଙ୍ଗ୍ ଈଶ୍ୱରତାଙ୍ଗ୍ ରକ୍ଷା ପାୟା ଆଉଦେର୍। ଏପେଙ୍ଗ୍ ୱିଜାକାରିଙ୍ଗ୍ ଦସି ଇଞ୍ଜି ବିଚାର୍ କିନାଦେର୍। ଆରେ ଏପେଙ୍ଗ୍ ନରକ୍ତାକେ ହାନାଦେର୍। 34 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଆନେଙ୍ଗ୍ ମିଙ୍ଗେଙ୍ଗ୍ ଭବିଷ୍ଯତବକ୍ତା, ପଣ୍ଡିତାର୍ ଆରେ ଯିହୁଦି ଦରମ୍ନି ନିୟମ୍ ଗୁରୁର୍ ଲାଗାୟ୍ ପକ୍ତାନାଙ୍ଗା। ଏପେଙ୍ଗ୍ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ତିଙ୍ଗ୍ ଅହ୍ନାଦେର୍, କୃଶକାଟ୍ତାକେ ଦୁପ୍ଚି କେତ୍ଜାଣ୍ତିଙ୍ଗ୍ ଅହ୍ନାଦେର୍। ମି ପାର୍ତାନା ଇଞ୍ଜ କେତ୍ଜାଣ୍ତିଙ୍ଗ୍ କର୍ଡା ଇଡ଼୍ନାଦେର୍। ସହର୍ତାଙ୍ଗ୍ ସହର୍ ଏପେଙ୍ଗ୍ ହେୱାର୍ ପାଚେ-ପାଚେ ହାଲ୍ଜି କେତ୍ଜାଣ୍ତିଙ୍ଗ୍ ଦୁକ୍କଷ୍ଟ ହିନାଦେର୍, 35 ଲାଗିଙ୍ଗ୍ ଦରମ୍ ମାନାୟ୍ ହେବଲତାଙ୍ଗ୍ ଆରମ୍ କିଜି ବେରିକିୟ ମେହି ଯିକରିୟ ପାତେକ୍ ଇ ପୁର୍ତିତାକେ ହାର୍ଦି ମାନାୟ୍ତିଙ୍ଗ୍ ମାର୍ନେ ଅସ୍ତାର୍ନା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଦସି ଇନିୟା ଆନାଦେର୍। ବେରିକିୟ ମେହି ଜିକରିୟତିଙ୍ଗ୍ ଈଶ୍ୱର ମାନି ମନ୍ଦିର୍ ଆରେ ବେଦିତାକେ ଏପେଙ୍ଗ୍ ଅସ୍ତି ମାଚାଦେର୍। 36 ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ନଙ୍ଗୟ୍ ମିହୁଦାଙ୍ଗ୍ ଜିବୁନ୍ ମାନି ମାନାୟାର୍ କାଜିଙ୍ଗ୍ ଇ ୱିଜୁଗଟ୍ନା ଗଟାଆନାତ୍। ଯିରୁଶାଲାମ୍ ସହର୍ନି ମାନାୟ୍ କାଜିଙ୍ଗ୍ ଯୀଶୁ ଆଡ଼୍ବାତାନ୍ ( ଲୁକ. ୧୩:୩୪-୩୫ ) 37 “ଏ ଯିରୁଶାଲାମ ସହର୍ନି ମାନାୟ୍ କାଦେର୍ ଏପେଙ୍ଗ୍ ଇ ଭବିଷ୍ଯତବକ୍ତାରିଙ୍ଗ୍ ଅସ୍ତାଦେର୍ନା। ଈଶ୍ୱର ଇମ୍ଣି ଭବିଷ୍ଯତବକ୍ତାରିଙ୍ଗ୍ ପକ୍ଚି ମାଚାନ୍, ଏପେଙ୍ଗ୍ ହେୱାରିଙ୍ଗ୍ କାଲ୍କୁ ହୁଦାଙ୍ଗ୍ ଟ୍ରାକ୍ଚି ପାଗ୍ତାଦେର୍ନା। ଆନେଙ୍ଗ୍ ମିଙ୍ଗେଙ୍ଗ୍ ବେସି ସାଇଜ କିଦେଙ୍ଗ୍ ଇଚାକିଜି ମାଚାଙ୍ଗ୍। ଇନେସ୍କି ର କୁଜୁ ତା ହିମ୍ଣାକାଙ୍ଗ୍ ଜାର୍ ମାରାଙ୍ଗ୍ ତାରେନ୍ ରୁଣ୍ଡାଇ କିନାତ୍, ହେଲେକେ ମିଙ୍ଗେଙ୍ଗ୍ ୱିଜୁ ହିମ୍ଣାକାଙ୍ଗ୍ ଇନେକିଦେଙ୍ଗ୍ ଆନେଙ୍ଗ୍ ବେସିହଟ୍ ମାନ୍ କିଜି ମାଚାଙ୍ଗ୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ହେଦାଙ୍ଗ୍ କିଦେଙ୍ଗ୍ ହିଦ୍ୱାତାଦେର୍। 38-39 ନଙ୍ଗୟ୍ ମି ଇଲ୍ ୱିଜୁ ମେଲାକିଜି ହିୟିଆନାତ୍। ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନାୱେଡ଼ାଙ୍ଗ୍ ପାତେକ୍ ଏପେଙ୍ଗ୍ ଇବେଣ୍ ୱେଚୁଦେର୍, ‘ମାପୃ ତର୍ଦାଙ୍ଗ୍ ଇମ୍ଣି ମାନାୟ୍ ୱାନାନ୍, ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିୟେନ୍, ହେପାଦ୍ନା ପାତେକ୍ ଏପେଙ୍ଗ୍ ନାଙ୍ଗେଙ୍ଗ୍ ଆରେରଗ ହୁଡ଼୍ଦୁଦେର୍।’ ” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation