ମାତିଉ 22 - New Testament in Pengo Parja Languageବିବା ବଜିନି କାତା ( ଲୁକ. ୧୪:୧୫-୨୪ ) 1 ଦିନେକ୍ ଯୀଶୁ କାତା ୱେଚ୍ନିଲେକେ କିଜି ମାନାୟାରିଙ୍ଗ୍ ହିକ୍ଷା ହିତାନ୍, 2 “ଈଶ୍ୱର ସାସନ୍ କିନି ରାଜି ରକାନ୍ ରାଜା ଲେକେ। ଆରେ ତା ମେହି କାଜିଙ୍ଗ୍ ବିବା ବଜି କିତାନ୍। 3 ବିବାବଜିତାକେ ୱାଦେଙ୍ଗ୍ କାବୁର୍ ହିତି ମାନାୟାରିଙ୍ଗ୍ ହିର୍ବିତାତେଙ୍ଗ୍ ହେୱାନ୍ ତା ହଲିଆହିରିଙ୍ଗ୍ ପକ୍ତାନ୍। ମାତର୍ ହେୱାର୍ ୱାଦେଙ୍ଗ୍ ଇଚା କିୱାତାର୍। 4 ରାଜା ଆରେରଗ ଜେକନି ହଲିଆହିରିଙ୍ଗ୍ ଇବେଣ୍ ୱେଚ୍ଚି ପକ୍ତାନ୍। ବିବାବଜିତାକେ ୱାଦେଙ୍ଗ୍ କାବୁର୍ ହିତାକାରିଙ୍ଗ୍ ୱେଚାଟ୍, ‘ହୁଡ଼ାଟ୍ ଆପେଙ୍ଗ୍ ମି କାଜିଙ୍ଗ୍ ବଜି ରସ୍ତାପ୍ନା। ମା ମେଣ୍ଢା ଆରେ ଲିଙ୍ଗା-ଲିଙ୍ଗା ପଶୁଙ୍ଗ୍ ଅସ୍ତି ୱିଜୁ ରେଡି ଆତାତ୍ନା। ଏପେଙ୍ଗ୍ ବିବାଇଞ୍ଜ ୱାଡ।’ 5 ମାତର୍ ହେୱାର୍ ହେଦାଙ୍ଗ୍ତିଙ୍ଗ୍ ଏଡ଼ାଆଜି। ଆରେ ଜାର୍-ଜାର୍ କାମାୟ୍ କିଦେଙ୍ଗ୍ ହାଚାର୍ ରକାନ୍ ତା ଜମିତ ହାଚାନ୍। ଆରେ ରକାନ୍ ଦୁକାଣ୍ତ ହାଚାନ୍। 6 ଆରେ କେତ୍ଜାଣ୍ ହଲିଆହିରିଙ୍ଗ୍ ଆସ୍ତି ଟ୍ରାକ୍ଚି-ଟ୍ରାକ୍ଚି ମାର୍ନେ ଅସ୍ତାର୍। 7 ମାତର୍ ରାଜା ହେ ହଲିଆରିଙ୍ଗ୍ ମାର୍ନେ ଅସ୍ତାକା ୱେନ୍ଞ୍ଜି ରିସାଆଜି ଜାର୍ ସେନାରିଙ୍ଗ୍ ପକ୍ତାନ୍। ହେୱାର୍ ହେ ମାନାୟ୍ ଅସ୍ତାକାରିଙ୍ଗ୍ ଜୁଜ୍କିଜି ହେୱାର୍ ସହର୍ତିଙ୍ଗ୍ ଡାହାୟ୍ କିତାର୍। 8 ତାପାଚେ ରାଜା ହଲିଆହିରିଙ୍ଗ୍ ହିର୍ବି ୱେଚ୍ଚାନ୍, ‘ବିବା ବଜି ରେଡି ଆତାତ୍ନା। ମାତର୍ ଆନେଙ୍ଗ୍ ହିର୍ବିମାଚି ମାନାୟାର୍ ଇବେ ହାମାନ୍ ଆକାୟ୍। 9 ନଙ୍ଗୟ୍ ରସ୍ତି ଚକ୍କୁକାଙ୍ଗ୍ ହାଲ୍ଜି ଏଚେକ୍ ମାନାୟ୍ତିଙ୍ଗ୍ ଗାଟା ଆନାଦେର୍, ୱିଜାରିଙ୍ଗ୍ ମା ବଜିତାକେ ହିର୍ବି ତାଡ।’ 10 ଲାଗିଙ୍ଗ୍ ସେନାର୍ ରାସ୍ତାନି ଚକ୍କୁକାଙ୍ଗ୍ ହାଲ୍ଜି ମୁର୍କିଆ ଆରେ ବାନ୍ଯା ମାନାୟ୍ ଏଚେଜାଣ୍ତିଙ୍ଗ୍ ହେୱାରିଙ୍ଗ୍ ହୁଡ଼୍ତାର୍, ୱିଜାରିଙ୍ଗ୍ ହିର୍ବି ତାତାର୍ ଆରେ ବିବାଇଞ୍ଜ ମାନାୟ୍ ବାର୍ତିଆତାର୍। 11 ରାଜା ଗତାକାଙ୍ଗ୍ ହୁଡ଼୍ଦେଙ୍ଗ୍ ୱାତାନ୍। ହେୱାନ୍ ହୁଡ଼୍ତାନ୍ ଯେ ହେୱାର୍ ବିତ୍ରେତାଙ୍ଗ୍ ରକାନ୍ ବିବାଆନି ଆଙ୍ଗି ଆର୍ପାୱାଦାଙ୍ଗ୍ ମାଚାନ୍। 12 ରାଜା ହେୱାନିଙ୍ଗ୍ ୱେନ୍ବାତାନ୍, ‘ଏ ବନ୍ଦୁ, ବିବାଇଞ୍ଜ ଆଙ୍ଗି ଆର୍ପାୱାଦାଙ୍ଗ୍ ଇବେ ଇନା କିଦେଙ୍ଗ୍ ୱାତାୟ୍ନା?’ ମାତର୍ ହେୱାନ୍ ଚିମ୍ରା ଆଜି ମାଚାନ୍। 13 ରାଜା ହଲିଆହିରିଙ୍ଗ୍ ୱେଚ୍ଚାନ୍, ‘ଇୱାନିଙ୍ଗ୍ ତା କେଇ କାଲ୍କୁ ଗାଚ୍ଚି ବାର୍ତ ତୁସିୟାଟ୍। ହେବେ ହେୱାନ୍ ଆଡ଼୍ବି-ଆଡ଼୍ବି ଟାଡାଙ୍ଗ୍ କାପ୍ଚି ମାନାନ୍।’ ” 14 ପାଚେ ଯୀଶୁ କାତା ୱେଚ୍ଚି ୱିସ୍ତି ପାଚେ ୱେଚ୍ଚାନ୍, “ବେସିହେନି ୱାତାର୍ନା। ମାତର୍ ଅଲପ୍ ହେନି ବାଚିକିତାକାର୍।” ସିସ୍ତୁ ହିନି କାତା ( ମାର୍କ. ୧୨:୧୩-୧୭ ; ଲୁକ. ୨୦:୨୦-୨୬ ) 15 କେତ୍ଜାଣ୍ ପାରୁସିଦଳ୍ନିକାର୍ ଯୀଶୁଙ୍ଗ୍ ପ୍ରଶ୍ନ ୱେନ୍ବିସ୍ ଯୀଶୁଙ୍ଗ୍ ଜାଲ୍ଦ ରାତ୍ଦେଙ୍ଗ୍ ଉପାୟ୍ କିତାର୍। 16 ତାପାଚେ ପାରୁସିଦଳ୍ ତା ଚେଲାହିରିଙ୍ଗ୍ ହେରୋଦ ନିପଣ୍ ଆନି ମାନାୟ୍ ହୁଦାଙ୍ଗ୍ ହିକାଇକିଜି ଯୀଶୁ ଲାଗାୟ୍ ପକ୍ତାର୍। ଆରେ ହେୱାର୍ ୱାଜି ଯୀଶୁଙ୍ଗ୍ ୱେନ୍ବାତାର୍, “ଏ ଗୁରୁ, ଆପେଙ୍ଗ୍ ପୁନାପ୍ ଏନେଙ୍ଗ୍ ସତ୍ ଆରେ ସତ୍ ଲେକେ ଈଶ୍ୱର ନିପଣ୍ ୱାନି ହାଜିନି ହିକ୍ଷା ହିନାୟା। ଆରେ ଇନେରିଙ୍ଗ୍ ପାଣ୍ଡ୍ରା ଆଉୟା, ଇନେସ୍କି ଏନେଙ୍ଗ୍ ମାନାୟାରିଙ୍ଗ୍ ହାମାନ୍ କିଜି ହୁଡ଼୍ନାୟା। 17 ଲାଗିଙ୍ଗ୍ ମାଙ୍ଗେଙ୍ଗ୍ ୱେଚ୍ଚା, ‘ନି ଇଚା ଇନାକା? ରୋମ୍ନି କାଇସର୍ ମହା ରାଜାଙ୍ଗ୍ ସିସ୍ତୁ ହିନାକା ମୋଶା ସାସ୍ତର୍ ତା ବିଦି ମାନାତ୍ କି ଆକାୟ୍?’ ” 18 ମାତର୍ ଯୀଶୁ ହେୱାର୍ ବାଟ୍ପାଣ୍ ପୁନ୍ଞ୍ଜି ୱେଚ୍ଚାନ୍, “ଏ ପାଟ୍କାର୍ କାଦେର୍ ଇନା କିଦେଙ୍ଗ୍ ନାଙ୍ଗେଙ୍ଗ୍ ପରିକ୍ଷା କିଦ୍ନାଦେରା? 19 ହେ କାସୁ ଡାବୁ ନାଙ୍ଗେଙ୍ଗ୍ ଚଚ୍ଚାଟ୍।” ହେବେତାଙ୍ଗ୍ ହେୱାର୍ ହେ ଡାବୁ ତାସି ଯୀଶୁଙ୍ଗ୍ ହିତାର୍। 20 ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଇ ଡାବୁତାକେ ଇନେର୍ ମୁର୍ତ୍ତି ଆରେ ଇନେର୍ ତର୍ ମାନାତ୍?” 21 ହେୱାର୍ ଯୀଶୁଙ୍ଗ୍ ୱେଚ୍ଚାର୍, “କାଇସର୍ ରୋମ୍ନି ରାଜାତି।” ହେବେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣାକା କାଇସର୍ ରାଜାତି ହେଦାଙ୍ଗ୍ କାଇସର୍ ମହା ରାଜାଙ୍ଗ୍ ହିଆଟ୍। ଆରେ ଇମ୍ଣାକା ଈଶ୍ୱରତି ହେଦାଙ୍ଗ୍ ଈଶ୍ୱରତିଙ୍ଗ୍ ହିଆଟ୍।” 22 ହେବେତାଙ୍ଗ୍ ହେୱାର୍ ଯୀଶୁ ବେଣ୍ ୱେନ୍ଞ୍ଜି ବେସି କାବାଆଜି ହେୱାନିଙ୍ଗ୍ ପିସ୍ତି ହାଚାର୍। ସାଦୁକିଦଳ୍ ପ୍ରଶ୍ନ ( ମାର୍କ. ୧୨:୧୮-୨୭ ; ଲୁକ. ୨୦:୨୭-୪୦ ) 23 ହେନାଞ୍ଜ୍ ଯିହୁଦି ଦର୍ମନି ସାଦୁକିଦଳ୍ନି କେତ୍ଜାଣ୍ ଯୀଶୁ କଚଣ୍ତ ୱାତାର୍। ସାଦୁକିର୍ ପାର୍ତି କିୱାଦାଙ୍ଗ୍ ମାଚାର୍। ହାଃଜି ଆରେରଗ ଜିବୁନ୍ ଆଉର୍। 24 ହେୱାର୍ ଯୀଶୁଙ୍ଗ୍ ୱେନ୍ବାତାର୍, “ଗୁରୁ, ମୋଶା ତା ସାସ୍ତର୍ତାକେ ଲେକିକିତାନ୍ନା। ଯଦି ଇନେର୍ ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃନାନ୍। ଲାଗିଙ୍ଗ୍ ତା ଟଣ୍ଡାହି ତା ରାଣ୍ଡି କଗ୍ଲେଙ୍ଗ୍ ବିବାଆଜି ତା ଟଣ୍ଡାହି ବଂଶ ବାଡାଇ କିନାନ୍। 25 ହୁଡ଼ାଟ୍, ମା ବିତ୍ରେ ସାତ୍ବାଇ ମାଚାର୍। ଗାଜାକାନ୍ ବିବାଆଜି ହିମ୍ଣାୱାକ୍ଡ଼ା ଆୱାଦାଙ୍ଗ୍ ହାଃତାନ୍। ଆରେ ହିମ୍ଣାୱାକ୍ଡ଼ା ମାନ୍ୱିତିଲେ ଜାର୍ ଟଣ୍ତେନେନ୍ କାଜିଙ୍ଗ୍ ଜାର୍ କଗ୍ଲେଙ୍ଗ୍ ପିସ୍ତାନ୍। 26 ରିୟାର୍ ତିନ୍ଜାଣ୍ ହାରିହାରା ସାତ୍ଜାଣ୍ ପା ହେୱାର୍ ହେଲେକେ ଆଜି ହାଃତାର୍। 27 ୱିଜାର୍ ୱିସ୍ତି ପାଚେ ହେ କଗ୍ଲେ ପା ହାଃତାତ୍।” 28 ଲାଗିଙ୍ଗ୍ “ହେ କଗ୍ଲେ ତ ସାତ୍ବାଇତିଙ୍ଗ୍ ପା ବିବାଆଜି ମାଚାତ୍। ହାଃତାକାର୍ ଆରେରଗ ଜିବୁନ୍ ଆତିସ୍ ହେଦେଲ୍ ଇନେର୍ ଡକ୍ରୁହି ଆନାତ୍?” ୱିଜାକାର୍ ତ ହେଦେଲିଙ୍ଗ୍ ବିବାଆଜି ମାଚାର୍। 29 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଦରମ୍ ସାସ୍ତର୍ତିଙ୍ଗ୍ ଆରେ ଈଶ୍ୱର ଶାକ୍ତି ବିଷୟରେ ପୁନ୍ୱାତାଦେର୍ନା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ବୁଲ୍ ବୁଜାଆନାଦେରା। 30 ଇନେସ୍କି ହାଃତାକାର୍ ଆରେରଗ ଜିବୁନ୍ଆତି ପାଚେ ବିବାକିଉର୍ କି ହାଃଉର୍। ମାତର୍ ସରଗ୍ନି ଦୁତ୍ ଲେକେ ଆଜି ମାନାର୍। 31 ମାତର୍ ଏପେଙ୍ଗ୍ ହାଃତାକାର୍ ଆରେରଗ ଜିବୁନ୍ ବିଷୟରେ ଈଶ୍ୱର ମିଙ୍ଗେଙ୍ଗ୍ ଇନାକା ୱେଚ୍ଚାତାନ୍ନା, ମୋଶା ଲେକିକିତି ସାସ୍ତର୍ ପଡ଼ି କିୱାତାଦେର୍ନା କି? 32 ଆସେଙ୍ଗ୍ ଅବ୍ରାହାମ୍ନି ଈଶ୍ୱର, ଇସାକନି ଈଶ୍ୱର ଆରେ ଯାକୁବନି ଈଶ୍ୱର। ହେୱାନ୍ ହାଃତାକାରିଙ୍ଗ୍ ଈଶ୍ୱର ଆକାୟ୍, ମାତର୍ ଜିତାକାର୍ତି ଈଶ୍ୱର।” 33 ମାନାୟାର୍ ଯୀଶୁ ହିକ୍ଷା ୱେନ୍ଞ୍ଜି କାବା ଆତାର୍। ମୁଡ଼୍ଆଦେସ୍ ( ମାର୍କ. ୧୨:୨୮-୩୪ ; ଲୁକ. ୧୦:୨୫-୨୮ ) 34 ଏଚେପାଦ୍ନା ପାରୁସିଦଳ୍ନିକାର୍ ୱେଚାର୍ ଯେ ଯୀଶୁ ଯିହୁଦି ଦର୍ମନି ସାଦୁକିଦଳ୍ ନିକାରିଙ୍ଗ୍ ଚିମ୍ରା କିଜି ମାଚାନ୍। ହେଦାଙ୍ଗ୍ କାଜିଙ୍ଗ୍ ହେୱାର୍ ରବେଆଜି ଯୀଶୁ କଚଣ୍ତ ୱାତାର୍, 35 ଆରେ ହେୱାର୍ ବିତ୍ରେତାଙ୍ଗ୍ ରକାନ୍ ପଣ୍ଡିତ୍ ଯୀଶୁଙ୍ଗ୍ ପରିକ୍ଷା କିଦେଙ୍ଗ୍ ୱେନ୍ବାତାନ୍। 36 ଏ ଗୁରୁ, ମୋଶା ଲେକିକିତି ନିୟମ୍ନି ସାସ୍ତର୍ତାଙ୍ଗ୍ ଇମ୍ଣି ଆଦେସ୍ ମୁଡ଼୍? 37 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ମି ମାପୃ ଈଶ୍ୱରତିଙ୍ଗ୍ ୱିଜୁ ଗରବ୍, ୱିଜୁ ଆତ୍ମା ଆରେ ୱିଜୁ ମାନ୍ ହିଜି ଲାଡ୍ କିୟାଟ୍। 38 ଇଦାଙ୍ଗ୍ ଆନାତା ୱିଜୁତିଙ୍ଗ୍ ମୁଡ଼୍ ଆରେ ହାର୍ଦି ଆଦେସ୍। 39 ଦୁଇ ନମ୍ବର୍ ହାର୍ଦି ଆଦେସ୍ ଆନାତା, ମି ପାଡ଼୍ହା ଇଞ୍ଜାକାରିଙ୍ଗ୍ ଯିବୁନ୍ଲେକେ ଲାଡ୍ କିୟାଟ୍। 40 ଇ ରିଣ୍ଡି ଆଦେସ୍ ମୋଶା ଲେକିକିତି ନିୟମ୍ନି ସାସ୍ତର୍। ଆରେ ଭବିଷ୍ଯତବକ୍ତାର୍ କାଜିଙ୍ଗ୍ ଇ ସାସ୍ତର୍ ଆତାତ୍ନା।” ଖ୍ରୀଷ୍ଟ ଇନେର୍ ହିମ୍ଣା? ( ମାର୍କ. ୧୨:୩୫-୩୭ ; ଲୁକ. ୨୦:୪୧-୪୪ ) 41 ପାରୁସିଦଳ୍ନି କେତ୍ଜାଣ୍ ଯୀଶୁ କଚଣ୍ତ ହାନିହିଙ୍ଗ୍ ଯୀଶୁ ହେୱାରିଙ୍ଗ୍ ୱେନ୍ବାତାନ୍। 42 ଖ୍ରୀଷ୍ଟ ବିଷୟତାଙ୍ଗ୍ ଏପେଙ୍ଗ୍ ଇନାକା ବାବିକିନାଦେରା? ହେୱାନ୍ ଇନେର୍ ବଂଶ? ହେୱାର୍ ହେୱାନିଙ୍ଗ୍ ୱେଚ୍ଚାର୍, ଦାଉଦ ରାଜାନି ବଂଶ। 43 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଲାଗିଙ୍ଗ୍ ଦାଉଦ ରାଜା ଇନେସ୍କିଜି ପବିତ୍ର ଆତ୍ମା କାଜିଙ୍ଗ୍ ତାଙ୍ଗେଙ୍ଗ୍ ମାପୃ ଇନାନ୍? 44 ଈଶ୍ୱର ନା ମାପୃଙ୍ଗ୍ ୱେଚ୍ଚାନ୍, ଆନେଙ୍ଗ୍ ମି ଶାତ୍ରୁରିଙ୍ଗ୍ ନି କାଲ୍କୁ ତାରେନ୍ ତାନି ପାତେକ୍ ଏନେଙ୍ଗ୍ ନା ତିନାବାଗାୟ୍ କୁଚା।” 45 ଦାଉଦ ରାଜା ପା ଖ୍ରୀଷ୍ଟଙ୍ଗ୍ ନା ମାପୃ ଇଞ୍ଜି ଇନାନା। ଲାଗିଙ୍ଗ୍ “ଇନେସ୍ କିଜି ରକ୍ଷାକିଦ୍ନାକାନ୍ ଦାଉଦ ରାଜା ମେହି ଆନାନ୍?” ୱିଜାକାର୍ ୱାରିତାଙ୍ଗ୍ ତା ବେଣ୍ ୱେନ୍ଞ୍ଜି ମାଚାର୍। 46 ହେବେତାଙ୍ଗ୍ ଇନେର୍ ପା ଯୀଶୁଙ୍ଗ୍ ରପାଦ୍ ପା ୱେଚ୍ଚେଙ୍ଗ୍ ଆଡ୍ୱାତାର୍। ଆରେ ହେଦିନ୍ତାଙ୍ଗ୍ ଇନେର୍ ପା ପ୍ରଶ୍ନ ୱେନ୍ବିସ୍ ଜାଲ୍ଦ ରାତ୍ତେଙ୍ଗ୍ ଉପାୟ୍ କିଦେଙ୍ଗ୍ ଶାସ୍ କିୱାତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation