ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍ 8 - New Testament in Pengo Parja Languageଯୀଶୁଙ୍ଗ୍ ସାଇଜ କିଜିମାଚି କେତେକ୍ କଗ୍ଲେକ୍ 1 ତାପାଚେ ଯୀଶୁ ସହର୍ ଆରେ ନାସ୍କୁକାଙ୍ଗ୍ ବୁଲାଆଜି ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ମାନାୟାରିଙ୍ଗ୍ ଶୁଣାୟ୍ କିତାନ୍। ହେୱାନ୍ ହୁଦାଙ୍ଗ୍ ତା ବାଚିକିତି ବାରଜାଣ୍ ଚେଲାହିର୍ ପା ମାଚାର୍। 2 କେତେକ୍ କଗ୍ଲେକ୍ ପା ହେୱାନ୍ ହୁଦାଙ୍ଗ୍ ମାଚିକ୍। ହେୱେକିୟାକାଙ୍ଗ୍ ଯୀଶୁ ବୁତ୍ଆତ୍ମାତାଙ୍ଗ୍ ଆରେ ରଗ୍ତାଙ୍ଗ୍ ହାର୍ କିଜି ମାଚାନ୍। ହେୱେକ୍ ବିତ୍ରେତାଙ୍ଗ୍ ରଞ୍ଜେଲ୍ ତର୍ ମାଚାତ୍ ମରିୟମ। ହେଦେଲ୍ ମଗ୍ଦଲିନି ସହର୍ତାକେ ବାହାକିଜି ମାଚାତ୍। ହେଦେଲ୍ତାଙ୍ଗ୍ ଯୀଶୁ ସାତ୍ଗଟା ବୁତ୍ଆତ୍ମାକାଙ୍ଗ୍ ହପ୍ଚି ମାଚାନ୍। 3 କୁଜା ତର୍ଦାକାନ୍ ରକାନ୍ ମାଚାନ୍। ହେୱାନ୍ ହେରୋଦ ରାଜା ହଲିଆହି ମାଚାନ୍। ତା ଡକ୍ରୁହି ଯୋହନ, ଆରେ ଶୁସନ୍ନା ଆରେ ଜେକନି କଗ୍ଲେକ୍ ପା ଯୀଶୁ ଆରେ ତା ଚେଲାହିରିଙ୍ଗ୍ ହେୱେକ୍ ଡାବୁଙ୍ଗ୍ ହିଜି ସାଇଜ କିଜି ମାଚିକ୍। ବିୟାନ୍ ୱିତ୍ନି କାତା ( ମାଥି. ୧୩:୧-୯ ; ମାର୍କ. ୪:୧-୯ ) 4 ବେସିହେନି ମାନାୟ୍ ଯୀଶୁ ଲାଗାୟ ଜେକ ଜେକନି ସହର୍ ନିପ୍ଣାକାର୍ ୱାତାର୍। ହେୱାନ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ହିକ୍ଷାହିଜି ୱେଚ୍ଚାନ୍, 5 “ର ଚାଷି ତା ଜମିତ ବିୟାନ୍ ୱିତ୍ଦେଙ୍ଗ୍ ହାଚାନ୍। ହେୱାନ୍ ୱିତୁ-ୱିତୁ ଏଚେକ୍ ବିୟାନ୍ ହାଜ୍ଦ ଆର୍ତିକ୍, ହେଦାଙ୍ଗ୍ ତଗାୱିହା କିତାର୍ ଆରେ ବାଦାଡ଼୍ନି ପଟିଙ୍ଗ୍ ୱାଜି ଚିଚିକ୍। 6 ଆରେ କେତେକ୍ ବିୟାନ୍ ଅଲପ୍ ଚିକ୍ଲା ମାନି ରେଚ୍କି ବାହାତାକେ ଆର୍ତିକ୍, ଆରେ ଗାଜା ଆଜି ଏଜୁଙ୍ଗ୍ ହିଲ୍ୱିତିଲେ ହାତାତ୍। 7 ଆରେ କେତେକ୍ ବିୟାନ୍ ୱାଡ଼ି ମାର୍ ମାଦି ଆର୍ତିକ୍, ଆରେ ୱାଡ଼ି ମାର୍କୁ ନିଙ୍ଗ୍ଞ୍ଜି ହେ ପାଡ଼ାଜପି ଡାବାଇ କିତିକ୍, ହେବେତାଙ୍ଗ୍ ଇନାକାପା ପାଡ଼୍ ଆହ୍ୱାତାତ୍। 8 ମାତର୍ କେତେକ୍ ବିୟାନ୍ ହାର୍ ମେଦ୍ନିତ ଆର୍ତିକ୍, ହେ ୱିଜୁ ଗଜାଆଜି ଗାଜା ଆତିକ୍ ଆରେ ଶହେ ଗୁଣ୍ ପାତେକ୍ ପାଡ଼୍ ଆସ୍ତାତ୍।” ଆରେ ଯୀଶୁ ତା କାତା ୱେଚାକାରିଙ୍ଗ୍ ୱେଚ୍ଚାନ୍, “ଇମ୍ଣାକାର୍ ଇବେଣ୍ ୱେଚାଦେର୍ ହେବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।” ଯୀଶୁ ତା ଚେଲାହିରିଙ୍ଗ୍ କାତା ବୁଜାଇ କିତାନ୍ ( ମାଥି. ୧୩:୧୦-୧୭ ; ମାର୍କ. ୪:୧୦-୧୨ ) 9 ଯୀଶୁ ୱେଚ୍ଚି କାତାତିଙ୍ଗ୍ ତା ଚେଲାହିର୍ ବୁଜାଆୱାଦାଙ୍ଗ୍ ଆରେରଗ ବୁଜାଇ କିଦା ଇଞ୍ଜି ୱେଚ୍ଚାର୍। 10 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ତା ରାଜିନି ପୁନ୍ୱିତି କାତାତିଙ୍ଗ୍ ପୁଞ୍ଜେଙ୍ଗ୍ ଏପେଙ୍ଗ୍ ସୁଯଗ୍ ଗାଟାଆତାଦେର୍ନା। ମାତର୍ ଇମ୍ଣାକାର୍ ଈଶ୍ୱରତିଙ୍ଗ୍ ପୁନୁୱାତାର୍ନା ହେୱାରିଙ୍ଗ୍ ସୁଯଗ୍ ଗଟାଆୱାତାତ୍ନା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନାଙ୍ଗା। ଆନେଙ୍ଗ୍ ଇମ୍ଣାକା ବାଡାୟ୍ କିନାଙ୍ଗା ହେଦାଙ୍ଗ୍ ହୁଡ଼୍ନାର୍ ମାତର୍ ତା ଅର୍ତ ପୁନୁର୍। ଆରେ ଆନେଙ୍ଗ୍ ୱେଚ୍ଚି କାତାତିଙ୍ଗ୍ ୱେନାର୍ ମାତର୍ ବୁଜା ଆଉର୍।” ବିୟାନ୍ ୱିତ୍ନି କାତାନି ଅର୍ତ ( ମାଥି. ୧୩:୧୮-୨୩ ; ମାର୍କ. ୪:୧୩-୨୦ ) 11 ଯୀଶୁ ବିୟାନ୍ ୱିତ୍ନି କାତାନି ଅର୍ତ ବୁଜାଇକିଜି ୱେଚ୍ଚାନ୍, “ବିୟାନ୍ ଆନାତା ଈଶ୍ୱର କାତା। 12 ଈଶ୍ୱର କାତା ଆନାତା ୱିତ୍ତି ବିୟାନ୍ ଲେକେ। ମାନାୟାର୍ ଈଶ୍ୱର କାତାତିଙ୍ଗ୍ ୱେନାର୍ ମାତର୍ ଶୟତାନ୍ ୱାଜି ୱେଚି କାତାତିଙ୍ଗ୍ ବାଣାଇ କିନାତ୍, ଇନେସ୍କି ହେୱାର୍ ଈଶ୍ୱରତାକେ ପାର୍ତି କିମେର୍ ଆରେ ରକ୍ଷା ପାୟାଆମେର୍ ଇଞ୍ଜି ଶୟତାନ୍ ମାନ୍କିନାତ୍। ହେୱାର୍ ହାଜ୍ଦ ଆର୍ତି ବିୟାନ୍ ଲେକେ। 13 କେତେକ୍ ମାନାୟ୍ କାଲ୍କୁ କୁଡ଼ିନି ଜମିତ ଆର୍ତି ବିୟାନ୍ ଲେକେ, ହେୱାର୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ୱାରିତାଙ୍ଗ୍ ଆହ୍ନାର୍। ମାତର୍ ହେୱାର୍ ଗରବ୍ ବିତ୍ରେ ଈଶ୍ୱର କାତା ହାଲ୍ୱିତିଲେ ହେୱାର୍ ଈଶ୍ୱରତାକେ ଅଲପ୍ଦିନ୍ ପାର୍ତିକିନାର୍ ଆରେ ଈଶ୍ୱର କାତାକାଜିଙ୍ଗ୍ ଦୁଃକ୍ କଷ୍ଟ ୱାତିସ୍ ହେୱାର୍ ପାର୍ତିତିଙ୍ଗ୍ ପିହ୍ନାର୍। 14 ଆରେ କେତେକ୍ ମାନାୟ୍ ୱାଡ଼ି ମାର୍କୁକାଙ୍ଗ୍ ଆର୍ଜିମାଚି ବିୟାନ୍ ଲେକେ, ହେୱାର୍ ଈଶ୍ୱର କାତାତିଙ୍ଗ୍ ୱେନାର୍। ମାତର୍ ଦୁନିଆନି ଚିନ୍ତା, ହାଉକାର୍ ଆନି ଚିନ୍ତା, ଆରେ ବାରବିନି ଚିନ୍ତା ଇୱିଜୁ ଚିନ୍ତା ମାନ୍ତ ୱାତିସ୍ ଈଶ୍ୱର କାତାତିଙ୍ଗ୍ ଡାବାଇ କିନାତ୍। ହେଦାଙ୍ଗ୍ କାଜିଙ୍ଗ୍ ହେୱାର୍ ଈଶ୍ୱର କାତାତିଙ୍ଗ୍ ମାନିକିଉର୍। 15 ଇନେର୍ ଈଶ୍ୱର କାତାତିଙ୍ଗ୍ ୱେନ୍ଞ୍ଜି ହାର୍ଦାଙ୍ଗ୍ ମାନ୍ତ ଆହ୍ନାର୍, ହେୱାର୍ ହାଦ୍ଦାରୁମ୍ ଆଜି ଜିବୁନ୍ କାଟିକିନାର୍, ଆରେ ହେୱାର୍ ଈଶ୍ୱର କାତାତିଙ୍ଗ୍ ମାନିକିଜି ମାନାର୍। ହେୱାର୍ ହାର୍ଦି ମେଦ୍ନିତ ଆର୍ତି ବିୟାନ୍ ଲେକେ।” ମାଣ୍ ତାରେନ୍ ବଇଟାନି କାତା ( ମାର୍କ. ୪:୨୧-୨୫ ) 16 ଯୀଶୁ ଆରେରଗ କାତା ୱେଚ୍ନିଲେକେ କିଜି ୱେଚ୍ଚାନ୍, “ଇନେର୍ ବଇଟାତିଙ୍ଗ୍ ଆହିକିଜି ମାଣ୍ପାକ୍ଚି ଇଟୁର୍, କି କାଟେଲ୍ ତାରେନ୍ ଇଟୁର୍, ମାତର୍ ବଇଟା ଇଟ୍ନି ବାହାତାକେ ଇଟ୍ନାର୍ ଇନେସ୍କି ଇଲ୍ ବିତ୍ରେ ହଣାକାର୍ ଅଜଡ଼୍ ହୁଡ଼୍ନାର୍। 17 ମାତର୍ ମାନାୟାର୍ ନଙ୍ଗୟ୍ ପାତେକ୍ ଇମ୍ଣି ବିଷୟ ପୁନ୍ୱାତାର୍ନା ଈଶ୍ୱର ୱିଜୁ ବିଷୟ ପୁନିକିଦ୍ନାନ୍। ଆରେ ଇମ୍ଣି କାତା ପୁନ୍ୱାଦାଙ୍ଗ୍ ମାନାଦେର୍ ହେ ବିଷୟ ଈଶ୍ୱର ମିଙ୍ଗେଙ୍ଗ୍ ପୁନିକିଦ୍ନାନ୍। 18 ଲାଗିଙ୍ଗ୍ ଏପେଙ୍ଗ୍ ଇମ୍ଣି କାତା ୱେନାଦେର୍, ହେ ବିଷୟତାଙ୍ଗ୍ ପୁନ୍ଞ୍ଜି ମାନାଟ୍। ଇନେସ୍କି ଇମ୍ଣାକାର୍ ନା ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଇଚାକିନାର୍, ଈଶ୍ୱର ହେୱାନିଙ୍ଗ୍ ଆଦିକ୍ ବୁଜା ଆଦେଙ୍ଗ୍ ଶାକ୍ତି ହିନାନ୍। ମାତର୍ ଇମ୍ଣାକାର୍ ନା ହିକ୍ଷାତିଙ୍ଗ୍ ପୁଞ୍ଜେଙ୍ଗ୍ ମାନ୍କିଉର୍, ଈଶ୍ୱର ହେ ମାନାୟ୍ତି ପୁଚାକା ପା ଅନାନ୍।” ଯୀଶୁ ତେହି ଆରେ ଟଣ୍ଡାହିର୍ ( ମାଥି. ୧୨:୪୬-୫୦ ; ମାର୍କ. ୩:୩୧-୩୫ ) 19 ଯୀଶୁ ତେହି ଆରେ ଟଣ୍ଡାହିର୍ ଯୀଶୁଙ୍ଗ୍ ହୁଡ଼୍ଦେଙ୍ଗ୍ ୱାତାର୍। ମାତର୍ ମାନାୟ୍ ଗଉଲି କାଜିଙ୍ଗ୍ ତାଙ୍ଗେଙ୍ଗ୍ ହୁଡ଼୍ଦେଙ୍ଗ୍ ଆଡ୍ୱାତାର୍। 20 ହେ ମାନାୟ୍ ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ୱେଚ୍ଚାନ୍, “ନିଙ୍ଗେଙ୍ଗ୍ ମିଞ୍ଜିୟା, ଟଣ୍ଡାଦିର୍ ଆରେ ତଣ୍ଦେଦିକ୍ ବାର୍ତ ନିଲ୍ତାର୍ନା ନି ଲାହାଙ୍ଗ୍ ବେଣ୍କିଦେଙ୍ଗ୍ ମାନ୍ କିନାରା।” 21 ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣାକାର୍ ଈଶ୍ୱର କାତାତିଙ୍ଗ୍ ୱେନାର୍ ଆରେ ମାନିକିନାର୍, ହେୱାର୍ ନେ ମାଞ୍ଜିୟା ଆରେ ନା ଟଣ୍ଡାର୍।” ଯୀଶୁ ଦୁକା ବାର୍ହାତିଙ୍ଗ୍ ତିର୍କିତାନ୍ ( ମାଥି. ୮:୨୩-୨୭ ; ମାର୍କ. ୪:୩୫-୪୧ ) 22 ଦିନେକ୍ ଯୀଶୁ ଆରେ ତା ଚେଲାହିର୍ ହୁଦାଙ୍ଗ୍ ର ଡଙ୍ଗାତାକେ ଦୁମ୍ତାର୍, ଆରେ ତା ଚେଲାହିରିଙ୍ଗ୍ ୱେଚ୍ଚାନ୍, “ୱାଡ, ହାମ୍ଦୁର୍ ଆରେ ର ପାଡ଼୍କା ହାନାସ୍।” ହେବେତାଙ୍ଗ୍ ତା ଚେଲାହିର୍ ହାଚାର୍। 23 ହାମ୍ଦୁର୍ ନାନିହିଙ୍ଗ୍ ଯୀଶୁ ଡଙ୍ଗାତ ହୁନ୍ଞ୍ଜି ମାଚାନ୍ ହେଦାପ୍ରେ ତିପ୍କୁ ଜବର୍ଡ଼ୁଇ ଆତାତ୍, ଆରେ ଡଙ୍ଗାବିତ୍ରେ ଏଜୁଙ୍ଗ୍ ହଟିଲେ ଡଙ୍ଗା ମୁନ୍ଜେଙ୍ଗ୍ ହାଙ୍ଗ୍ତାତ୍। ହେଦାଙ୍ଗ୍ କାଜିଙ୍ଗ୍ ତା ଚେଲାହିର୍ ପାଣ୍ଡ୍ରା ଆତାର୍। 24 ଆରେ ଚେଲାହିର୍ ଯୀଶୁ ଲାଗାୟ୍ ହାଲ୍ଜି ନିକ୍ତାର୍ ଆରେ ୱେଚ୍ଚାର୍, “ଗୁରୁ ଏ ଗୁରୁ, ଡଙ୍ଗା ମୁଞ୍ଜ୍ନାତ୍ଦେ ଆସେଙ୍ଗ୍ ହାଃନାସ୍ଦେ।” ଯୀଶୁ ନିଙ୍ଗ୍ଞ୍ଜି ଡ଼ୁଇ ଆରେ ବେସି ଲଉଡ଼ିତିଙ୍ଗ୍ ଆଦେସ୍ ହିତାନ୍, ହେବେତାଙ୍ଗ୍ ଡ଼ୁଇଟେବା ଆତାତ୍ ଆରେ ଲଉଡ଼ି ତିର୍ ଆତାତ୍। 25 ଆରେ ଯୀଶୁ ଚେଲାହିରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ପାର୍ତି କିଦୁଦେରା?” ମାତର୍ ହେୱାର୍ ଚାନିଆଆତାର୍। ଆରେ ପାଣ୍ଡ୍ରାଆଜି ଜାର୍ ଜାର୍ବିତ୍ରେ ୱେଚ୍ପାଆତାର୍, “ଇୱାନ୍ ଇନେସ୍ ଲେଗ୍ଦି ମାନାୟ୍? ଡ଼ୁଇ ଆରେ ଲଉଡ଼ି ପା ତା କାତା ମାନିକିନିକା।” ଯୀଶୁ ବୁତ୍ ଡୁୟାଆତି ରକାନିଙ୍ଗ୍ ହାର୍କିତାନ୍ ( ମାଥି. ୮:୨୮-୩୪ ; ମାର୍କ. ୫:୧-୨୦ ) 26 ଯୀଶୁ ଆରେ ତା ଚେଲାହିର୍ ଗାଲିଲୀ ଜିଲ୍ଲାନି ହାମ୍ଦୁର୍ ହେ ପାଡ଼୍କା ଗରାଶିୟ ମାନାୟାର୍ ମାନି ନାଟ ହାଚାର୍। 27 ଯୀଶୁ ଡଙ୍ଗାତାଙ୍ଗ୍ ଜୁତିଦାପ୍ରେ ରକାନ୍ ବୁତ୍ଆତ୍ମା ଡୁୟାଆତାକାନ୍ ଗିଟାଆତାନ୍। ହେୱାନ୍ ବେସିଦିନ୍ ଇଞ୍ଜ ମାନ୍ୱାଦାଙ୍ଗ୍ ମାଚାନ୍ ଆରେ ତ୍ରିନାଗ୍ଡ଼ାଆଜି ବୁଲାଆଜି ମାଚାନ୍, ହେୱାନ୍ ଦୁଗେର୍ ବାହାତାକେ ମାଚାନ୍। 28 ଦେହାତାଙ୍ଗ୍ ଯୀଶୁଙ୍ଗ୍ ହୁଡ଼୍ଜି ହେୱାନ୍ ହନ୍ଚି ୱାଜି ଯୀଶୁଙ୍ଗ୍ ସନ୍ମାନ୍ ହିଦେଙ୍ଗ୍ ମୁଣ୍ଡିଆ ଇଡ଼୍ତାନ୍। ଚେରାଆଜି ୱେଚାନ୍, “ଏ ଈଶ୍ୱର ମେହି ଯୀଶୁ, ନା ଲାଗାୟ୍ ନିଦାଙ୍ଗ୍ ଇନା କାମାୟ୍ ମାନାତ୍? ନିଙ୍ଗେଙ୍ଗ୍ ଆନେଙ୍ଗ୍ ଗୁୱାରି କିଦ୍ନାଙ୍ଗା, ନାଙ୍ଗେଙ୍ଗ୍ କଷ୍ଟ ହିଦ୍ମା।” 29 ଇନେସ୍କି ଯୀଶୁ ବୁତ୍ଆତ୍ମାତିଙ୍ଗ୍ ଆଗେ ଆଦେସ୍ ହିଜି ୱେଚ୍ଚି ମାଚାନ୍, “ଏ ବୁତ୍ଆତ୍ମା ଇୱାନ୍ତାଙ୍ଗ୍ ହସିହାଲା!” ଇନେସ୍କି ହେ ବୁତ୍ଆତ୍ମା ଦିନେକ୍ ଡୁଜି ମାଚାତ୍। ହେଦାଙ୍ଗ୍ କାଜିଙ୍ଗ୍ ମାନାୟାର୍ ହେୱାନିଙ୍ଗ୍ ହିକ୍ଡ଼ିଙ୍ଗ୍ ହୁଦାଙ୍ଗ୍ ଗାଚ୍ଚି ମାଚାର୍, ମାତର୍ ହେୱାନ୍ ଗାଚ୍ଚି ହିକ୍ଡ଼ିଙ୍ଗ୍ ପା ନାଡ଼୍ଚି ମାଚାନ୍, ଆରେ ବୁତ୍ଆତ୍ମା ହେୱାନିଙ୍ଗ୍ ଟାଙ୍ଗ୍ରାବାହାତାକେ ଅଜି ମାଚାତ୍। 30 ଯୀଶୁ ହେୱାନିଙ୍ଗ୍ ୱେନ୍ବାତାନ୍, “ନି ତର୍ ଇନାକା?” ହେୱାନ୍ ଯୀଶୁଙ୍ଗ୍ ୱେଚ୍ଚାନ୍, “ମାତର୍ ବୁତ୍ଆତ୍ମାଙ୍ଗ୍ ଦଳ୍ ଇନେସ୍କି ଆପେଙ୍ଗ୍ ବେସିହେନି ମାନାପ୍।” 31 ହେୱାନ୍ ଯୀଶୁଙ୍ଗ୍ ଗୁୱାରି କିଜି ୱେଚ୍ଚାନ୍, ଇ ବାହାତାଙ୍ଗ୍ ପାତାଳ୍ତାକେ ମାଙ୍ଗେଙ୍ଗ୍ ପକ୍ତାମା। 32 ହେବେ କୁପ୍ଲି ତାରେନ୍ ର ପାଞ୍ଜି ମାନ୍ଦା ହାରା ଆଜି ମାଚିକ୍। ବୁତ୍ଆତ୍ମାଙ୍ଗ୍ ଯୀଶୁଙ୍ଗ୍ ଗୁୱାରି କିଜି ୱେଚ୍ଚିକ୍, ହେ ପାଞ୍ଜିଙ୍ଗ୍ ବିତ୍ରେ ହଣ୍ଡେଙ୍ଗ୍ ନାଙ୍ଗେଙ୍ଗ୍ ଆଦେସ୍ ହିଦା। 33 ଯୀଶୁ ହେ ବୁତ୍ଆତ୍ମାକାଙ୍ଗ୍ ଆଦେସ୍ ହିତାନ୍ ଆରେ ବୁତ୍ଆତ୍ମାଙ୍ଗ୍ ହେ ମାନାୟ୍ତାଙ୍ଗ୍ ୱିଜୁ ହସି ପାଞ୍ଜିଙ୍ଗ୍ ବିତ୍ରେ ହଟିକ୍। ହେଦାଙ୍ଗ୍ କାଜିଙ୍ଗ୍ ପାଞ୍ଜିଙ୍ଗ୍ ବେଗି-ବେଗି ହନ୍ଚି ହାଲ୍ଜି ଡେଙ୍ଗା କାଣ୍ଡିତାଙ୍ଗ୍ ହାମ୍ଦୁର୍ ବିତ୍ରେ ଆର୍ଜି ହାତିକ୍। 34 ପାଞ୍ଜିଙ୍ଗ୍ ହାରାୟ୍ କିନି ମାନାୟ୍ ହନ୍ଚି ହାଲ୍ଜି ସହର୍ ଆରେ କଚଣ୍ନି ନାସ୍କୁକାଙ୍ଗ୍ ଇବେଣ୍ ୱେଚ୍ଚାର୍। 35 ହେବେ ଇନାକା ଗଟାଆତାତ୍ନା ଇଞ୍ଜି ମାନାୟ୍ ହୁଡ଼୍ଦେଙ୍ଗ୍ ହାଚାର୍। ହେୱାର୍ ଯୀଶୁ ଲାଗାୟ୍ ୱାଜି ହୁଡ଼୍ତାର୍ ଇନେରିଙ୍ଗ୍ ଆଗେ ବୁତ୍ଆତ୍ମାଙ୍ଗ୍ ଡୁଜି ମାଚିକ୍, ହେୱାନିଙ୍ଗ୍ ହେନ୍ଦ୍ରା ଉସ୍ପି ହାଦ୍ଦାରୁମ୍ ଆଜି କୁଚ୍ଚାକା ହୁଡ଼୍ଜି ହେୱାର୍ ପାଣ୍ଡ୍ରା ଆତାର୍। 36 ବୁତ୍ ଡୁୟାଆତାକାନ୍ ଇନେସ୍ କିଜି ହାର୍ ଆତାନ୍। ଆରେ ପାଞ୍ଜିଙ୍ଗ୍ ଇନେସ୍କିଜି ହାତିକ୍, ହେ ୱିଜୁଗଟ୍ନା ହୁଡ଼୍ତି ମାନାୟ୍ ଜେକନି ମାନାୟାରିଙ୍ଗ୍ ୱେଚ୍ଚାର୍। 37 ମାତର୍ ଯୀଶୁ ହେୱାର୍ ଜିନିଷ୍ ନଷ୍ଟ କିନାନ୍ ଇଞ୍ଜି ବାବିକିଜି ତାଙ୍ଗେଙ୍ଗ୍ ଗରାଶିୟ ମାନାୟାର୍ ଆରେ ଜେକନି ମାନାୟାର୍ ଯୀଶୁଙ୍ଗ୍ ତା ହାନ୍ଦି ପିସ୍ତି ହାଲା ଇଞ୍ଜି ଗୁୱାରି କିତାର୍। ତାପାଚେ ଯୀଶୁ ର ଡଙ୍ଗାତ ଦୁମ୍ଜି ଆରେ ର ପାଡ଼୍କା ହାଚାନ୍। 38 ମାତର୍ ଇମ୍ଣି ମାନାୟ୍ତାଙ୍ଗ୍ ବୁତ୍ଆତ୍ମାଙ୍ଗ୍ ହସିହାଲ୍ଜି ମାଚିକ୍, ହେୱାନ୍ ଯୀଶୁ ଲାହାଙ୍ଗ୍ ମାଞ୍ଜେଙ୍ଗ୍ ଗୁୱାରି କିତାନ୍। 39 ମାତର୍ ଯୀଶୁ ହେୱାନିଙ୍ଗ୍ ପକ୍ଚି ଯୀଶୁ ୱେଚ୍ଚାନ୍, “ଏନେଙ୍ଗ୍ ମିଞ୍ଜ ଲେଉଟା ଆଜି ହାଲା। ଆରେ ଈଶ୍ୱର ନି କାଜିଙ୍ଗ୍ ଇନା-ଇନା କାମାୟ୍ କିତ୍ତାନ୍ନା ହେଦାଙ୍ଗ୍ୱିଜୁ ୱେଚ୍ଚିବୁଲା ଆ।” ହେବେତାଙ୍ଗ୍ ହେ ବୁତ୍ତାଙ୍ଗ୍ ରକ୍ଷା ପାୟଆତାକାନ୍ ହାଚାନ୍। ଆରେ ଯୀଶୁ ତା କାଜିଙ୍ଗ୍ ଇନା-ଇନା କାମାୟ୍ କିଜି ମାଚାନ୍, ହେ ବେଣ୍ ପାଡ଼୍ହା-ପାଡ଼୍ହି ସହର୍କୁକାଙ୍ଗ୍ ୱେଚ୍ଚି ବୁଲାଆତାନ୍। ଯୀଶୁ ଯାଇରସ୍ ଗାଡ଼୍ହିଙ୍ଗ୍ ଆରେ ବିଟାଡ଼୍ ରଗ୍ଦି କଗ୍ଲେଙ୍ଗ୍ ହାର୍କିତାନ୍ ( ମାଥି. ୯:୧୮-୨୬ ; ମାର୍କ. ୫:୨୧-୪୩ ) 40 ଯୀଶୁ ଆରେରଗ ଡଙ୍ଗାତାକେ ଗାଲିଲୀ ଜିଲ୍ଲାନି ହାମ୍ଦୁର୍ ନାସି ଆରେ ର ପାଡ଼୍କା ହାଚାନ୍। ହେ ହାମ୍ଦୁର୍ କାଣ୍ଡିତାକେ ବେସିହେନି ମାନାୟ୍ ଯୀଶୁଙ୍ଗ୍ ୱାରିତାଙ୍ଗ୍ ଆସ୍ତେଙ୍ଗ୍ ୱିଜାକାର୍ କାସି ମାଚାର୍। 41 ହେପାଦ୍ନା ଯାଇରସ୍ ଇଞ୍ଜି ର ମାନାୟ୍ ଯୀଶୁ ଲାଗାୟ୍ ୱାତାନ୍। ହେୱାନ୍ ଯିହୁଦିର୍ ପାର୍ତାନା ଇଲ୍ନି ମୁକ୍ୟା ମାଚାନ୍। ହେୱାନ୍ ଯୀଶୁଙ୍ଗ୍ କାଲ୍ ତାରେନ୍ ସାରାଣ୍ ଏନ୍ତାନ୍ ଆରେ ୱେଚ୍ଚାନ୍, “ମାଞ୍ଜ ୱା।” 42 ଇନେସ୍କି ତା ଗାଡ଼୍ହି ହାଃନିଲେକେ ଆଜି ମାଚାତ୍। ହେ ଗାଡ଼୍ଚେଙ୍ଗ୍ ବାର ବାହ୍ରୁ ଆଜି ମାଚାତ୍। ଇବେଣ୍ ୱେନ୍ଞ୍ଜି ଯୀଶୁ ଯିହୁଦିର୍ ପାର୍ତାନା ଇଲ୍ନି ମୁକ୍ୟା ଯାଇରସ୍ ଇଞ୍ଜ ହାନିହିଙ୍ଗ୍ ବେସିହେନି ମାନାୟ୍ ଯୀଶୁ ଚାରିବେଣ୍ତାଙ୍ଗ୍ ରୁଣ୍ଡାଆଜି ତା ଜପି ତିବ୍ଗା ତିବ୍ଗି ଆଜି ମାଚାର୍। 43 ହେ ମାନାୟ୍ ଗଉଲି ବିତ୍ରେ ର କଗ୍ଲେ ମାଚାତ୍ ହେଦେଲିଙ୍ଗ୍ ବାର ବାର୍ହୁ ପାତେକ୍ ବିଟାଡ଼୍ ରଗ୍ ଆସ୍ତି ମାଚାତ୍। ହେ କଗ୍ଲେ ଡାକ୍ଟର୍ ତାକେ ହାଲ୍ଜି ଡାବୁଙ୍ଗ୍ ୱିସ୍ତି ଚେକ୍ କିୟା ଆଜିମାନାତ୍। ମାତର୍ ହେଦେଲ୍ ହାର୍ ଆୱାଦାଙ୍ଗ୍ ମାଚାତ୍। 44 ହେ ବିଟାଡ଼୍ ରଗ୍ ଆହିଆତି କଗ୍ଲେ ଯୀଶୁ ମାନାୟାରିଙ୍ଗ୍ ହାର୍ କିତି କାମାୟ୍ନି ବେଣ୍ ୱେନ୍ଞ୍ଜି, ମାନାୟ୍ ଗଉଲି ତାକେ ପାଚ୍ବାଗାୟ୍ ୱାଜି ଯୀଶୁ ଉସ୍ପିତି ହେନ୍ଦ୍ରାତିଙ୍ଗ୍ ଆସ୍ପାତାତ୍। ଆରେ ହେଦେଲ୍ ଆସ୍ପିତି ଦାପ୍ରେ ତା ବିଟାଡ଼୍ ରଗ୍ତାଙ୍ଗ୍ ହାର୍ ଆତାତ୍। 45 ହେବେତାଙ୍ଗ୍ ଯୀଶୁ ୱେନ୍ବାତାନ୍, “ନା ହେନ୍ଦ୍ରା ଇନେର୍ ଆସ୍ପାତାର୍?” ଆନେଙ୍ଗ୍ ଆକାୟ୍ ଆନେଙ୍ଗ୍ ଆକାୟ୍ ଇଞ୍ଜି ମାନାୟାର୍ ୱେଚ୍ଚି ପାଚେ, ପିତର ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ ଏନେଙ୍ଗ୍ ତ ହୁଡ଼୍ନାୟା ମାନାୟ୍ ଗଉଲି ନି ଚାରିବେଣ୍ତାଙ୍ଗ୍ ତିବ୍ଗା ତିବ୍ଗି ଆନାରା।” 46 ମାତର୍ ଯୀଶୁ ୱେଚ୍ଚାନ୍, “ଇନେର୍ ରକାନ୍ ନାଙ୍ଗେଙ୍ଗ୍ ପୁନ୍ଞ୍ଜି ନେ ଆସ୍ପାଆତ୍ତାନ୍, ହେଦାଙ୍ଗ୍ ନାବେତାଙ୍ଗ୍ ଶାକ୍ତି ହସିହାଚାତ୍।” 47 ହେ କଗ୍ଲେ ପୁଚାତ୍ କି ଯୀଶୁ ସାକ୍ତିତାଙ୍ଗ୍ ଆନେଙ୍ଗ୍ ହାର୍ ଆତାଙ୍ଗ୍ନା। ହେଦାଙ୍ଗ୍ କାଜିଙ୍ଗ୍ ହେଦେଲ୍ ହେ ହାର୍ଆତି ବିଷୟତିଙ୍ଗ୍ ଡ଼ୁକ୍ତେଙ୍ଗ୍ ଆଡ୍ୱାଦାଙ୍ଗ୍, ଯୀଶୁ ଲାଗାୟ୍ ହାଲ୍ଜି ମେଣ୍ଡାକୁନ୍ଦି କିତାତ୍। ଆରେ ପାଣ୍ଡ୍ରୁତିଙ୍ଗ୍ ତ୍ରିଗ୍ଜି-ତ୍ରିଗ୍ଜି ଯୀଶୁଙ୍ଗ୍ ଆସ୍ପି ହାର୍ଆତି ୱିଜୁବେଣ୍ ମାନାୟାର୍ ମୁମ୍ଦ ୱେଚ୍ଚାତ୍। 48 ହେବେତାଙ୍ଗ୍ ଯୀଶୁ ହେ କଗ୍ଲେଙ୍ଗ୍ ୱେଚ୍ଚାନ୍, “ଏ କଇ ଏନେଙ୍ଗ୍ ନାଙ୍ଗେଙ୍ଗ୍ ପାର୍ତି କିତ୍ତାୟ୍ ହେ ପାର୍ତି ନିଙ୍ଗେଙ୍ଗ୍ ହାର୍ କିତ୍ତାତ୍। ଆରେ ଏନେଙ୍ଗ୍ ୱିଜୁ ରଗ୍ତାଙ୍ଗ୍ ହାର୍ ଆତାୟ୍, ନଙ୍ଗୟ୍ ଈଶ୍ୱର ନି ହୁଦାଙ୍ଗ୍ ମାନାନ୍ ଏନେଙ୍ଗ୍ ଶାନ୍ତିତାଙ୍ଗ୍ ହାଲା।” 49 ଯୀଶୁ ହେ କଗ୍ଲେ ହୁଦାଙ୍ଗ୍ ବେଣ୍କିନିହିଙ୍ଗ୍, ପାର୍ତାନା ଇଲ୍ନି ମୁକ୍ଯା ଯାଇରସ୍ ଇଞ୍ଜାଙ୍ଗ୍ ରକାନ୍ ୱାଜି ଯାଇରସ୍ ତିଙ୍ଗ୍ ୱେଚ୍ଚାନ୍, “ମିଞ୍ଜ୍କଇ ହାତାତେ, ଗୁରୁଙ୍ଗ୍ ଇନା କିଦେଙ୍ଗ୍ ଆରେ ହଇରାଣ୍ କିନାୟା?” 50 ମାତର୍ ଯୀଶୁ ହେ ବେଣ୍ ୱେଚି ପାଚେ ପାର୍ତାନା ଇଲ୍ନି ମୁକ୍ଯା ଯାଇରସ୍ ତିଙ୍ଗ୍ ୱେଚ୍ଚାନ୍, “ପାଣ୍ଡ୍ରାଆମା! ମାତର୍ ନାଙ୍ଗେଙ୍ଗ୍ ପାର୍ତି କିଦା, ମିଞ୍ଜ୍କଇ ଜିନାତ୍।” 51 ତାପାଚେ ଯୀଶୁ ଚେଲାହିର୍ ହୁଦାଙ୍ଗ୍ ଯାଇରସ୍ ଇଞ୍ଜ ଏକିତି ପାଚେ, ଯୀଶୁ ଯାଇରସ୍ ଆରେ ତା ଡକ୍ରୁହି ହୁଦାଙ୍ଗ୍ ପିତର, ଯାକୁବ ଆରେ ତା ଟଣ୍ଡାହି ଯୋହନତିଙ୍ଗ୍ ହାଞ୍ଜେଙ୍ଗ୍ ୱେଚ୍ଚାନ୍, ଆରେ ଇନେରିଙ୍ଗ୍ ପା ବିତ୍ରେ ୱାଦେଙ୍ଗ୍ ହିୱାତାନ୍। 52 ମାତର୍ ହେ ଗାଡ଼୍ଚେ କାଜିଙ୍ଗ୍ ମାନାୟାର୍ କାକୁଲ୍ତି ଆଜି ଆଡ଼୍ବି ମାଚାର୍। ଲାଗିଙ୍ଗ୍ ଯୀଶୁ ୱେଚ୍ଚାନ୍, “ଆଡ଼୍ବାମାଟ୍! ଇନେସ୍କି ଗାଡ଼୍ଚେ ହାଃୱାତାତ୍ନା, ମାତର୍ ହୁନ୍ଞ୍ଚାତ୍ନା।” 53 ମାତର୍ ହେୱାର୍ ଗାଡ଼୍ଚେ ହାଃତାତ୍ନା ଇଞ୍ଜି ପୁନ୍ଞ୍ଜି ମାଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁ ୱେଚ୍ଚି ବେଣ୍ତିଙ୍ଗ୍ ୱେନ୍ଞ୍ଜି କିଜ୍ରାଇ କିଜି ଗାଇତାର୍। 54 ମାତର୍ ଯୀଶୁ ଗାଡ଼୍ଚେ କେଇ ଆସ୍ତି ୱେଚ୍ଚାନ୍, “ଏ କଇ ନିଙ୍ଗା!” 55 ହେଦାପ୍ରେ ଗାଡ଼୍ଚେ ଜିବୁନ୍ଆଜି ନିଙ୍ଗ୍ତାତ୍। ଯୀଶୁ ତେହି ଲାତ୍ରାହିଙ୍ଗ୍ ୱେଚ୍ଚାନ୍, “ଗାଡ଼୍ଚେଙ୍ଗ୍ ଇନାକାପା ଚିଞ୍ଜେଙ୍ଗ୍ ହିୟାଟ୍।” ମାତର୍ ତେହି ଲାତ୍ରାହିର୍ କାବା ଆତାର୍। 56 ଯୀଶୁ ଗାଡ଼୍ଚେ ତେହି ଲାତ୍ରାହିଙ୍ଗ୍ ଆଦେସ୍ ହିଜି ୱେଚ୍ଚାନ୍ ହାଃତି ଗାଡ଼୍ଚେଙ୍ଗ୍ ଜିବୁନ୍ କିତାନ୍ ଇଞ୍ଜି ଇନେରିଙ୍ଗ୍ ପା ୱେଚ୍ମାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation