ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍ 4 - New Testament in Pengo Parja Languageଶୟତାନ୍ ଯୀଶୁଙ୍ଗ୍ ପରିକ୍ଷା କିତାତ୍ ( ମାଥି. ୪:୧-୧୧ ; ମାର୍କ. ୧:୧୨-୧୩ ) 1 ଯୀଶୁ ଈଶ୍ୱର ଆତ୍ମାତାଙ୍ଗ୍ ପୁରାଆଜି ଯର୍ଦ୍ଦନ ନାଗୁଡ଼୍ତାଙ୍ଗ୍ ଲେଉଟା ଆଜି ୱାତାନ୍। ପବିତ୍ର ଆତ୍ମା ଯୀଶୁଙ୍ଗ୍ ଟାଙ୍ଗ୍ରାବାହାତ ଅଶାହାଚାତ୍। 2 ହେବେ ଶୟତାନ ଚାଲିଶ୍ ଦିନ୍ ପାତେକ୍ ଯୀଶୁଙ୍ଗ୍ ପରିକ୍ଷା କିଜି ମାଚାତ୍। ହେପାଦ୍ନା ଯୀଶୁ ଇନାକା ତିନ୍ୱାଦାଙ୍ଗ୍ ଉଣ୍ୱାଦାଙ୍ଗ୍ ଉପାସ୍ ମାଚାନ୍। ଆରେ ହେୱାନ୍ ହାରିହାରା ନାଞ୍ଜ୍ ବେସି ନାସ୍କି ଆତାନ୍। 3 ଶୟତାନ ଯୀଶୁଙ୍ଗ୍ ପରିକ୍ଷା କିଦେଙ୍ଗ୍ ତା କଚଣ୍ତ ୱାଜି ୱେଚ୍ଚାତ୍, “ଏନେଙ୍ଗ୍ ଯଦି ଈଶ୍ୱର ମେହିତି, ଲାଗିଙ୍ଗ୍ ଇ କାଲ୍କୁକାଙ୍ଗ୍ ରୁଟି ଆଦେଙ୍ଗ୍ ଆଦେସ୍ ହିୟା।” 4 ଇଦାଙ୍ଗ୍ ୱେନ୍ଞ୍ଜି ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଦରମ୍ ସାସ୍ତର୍ତାକେ ଲେକା ମାନାତ୍, ମାନାୟ୍ ଆପ୍କା ରୁଟିଲାହାଙ୍ଗ୍ ଜିଦେଙ୍ଗ୍ ଆଡୁର୍।” 5 ତାପାଚେ ଶୟତାନ ଯୀଶୁଙ୍ଗ୍ ର ପାନ୍ତି ମାଡ଼ିଜପି ଅସାହାଲ୍ଜି ରଞ୍ଜେମାଡ୍ ପୁର୍ତିନି ୱିଜୁ ରାଜି ଚଚ୍ଚି ହିତାତ୍। 6 ଶୟତାନ ଯୀଶୁଙ୍ଗ୍ ୱେଚ୍ଚାତ୍, “ଆନେଙ୍ଗ୍ ଇୱିଜୁ ରାଜି ଆରେ ହେବେନି ୱିଜୁ ଦନ୍ସମ୍ଫତିନି ହଲ୍ନାକା ନିଙ୍ଗେଙ୍ଗ୍ ହିଦ୍ନାଙ୍ଗ୍। ହେ ୱିଜୁ ନା ଆଦିକାର୍ତାକେ ମାନାତ୍। ଆନେଙ୍ଗ୍ ଇନେରିଙ୍ଗ୍ ମାନ୍ କିନାଙ୍ଗ୍, ହେୱାନିଙ୍ଗ୍ ଇୱିଜୁ ହିଦେଙ୍ଗ୍ ଆଡ୍ନାଙ୍ଗ୍। 7 ଯଦି ଏନେଙ୍ଗ୍ ନାଙ୍ଗେଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିତ୍ତିସ୍, ଲାଗିଙ୍ଗ୍ ଆନେଙ୍ଗ୍ ଇୱିଜୁ ନିଙ୍ଗେଙ୍ଗ୍ ହିଦ୍ନାଙ୍ଗ୍।” 8 ଯୀଶୁ ୱେଚ୍ଚାନ୍, “ଦରମ୍ ସାସ୍ତର୍ତାକେ ଲେକା ମାନାତ୍, ଏପେଙ୍ଗ୍ ଜାର୍ ଈଶ୍ୱରତିଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିନାଦେର୍, ଆରେ ହେୱାନିଙ୍ଗ୍ନେ ହେବା କିନାଦେର୍।” 9 ତାପାଚେ ଶୟତାନ ଯୀଶୁଙ୍ଗ୍ ଯିରୁଶାଲାମ ସହର୍ତାକେ ଅଜି ଈଶ୍ୱର ମାନି ମନ୍ଦିର୍ନି ଚାତ୍ ଜପି ନିଲି କିତାତ୍। ହେ ଶୟତାନ ଯୀଶୁଙ୍ଗ୍ ୱେଚ୍ଚାତ୍, “ଯଦି ଏନେଙ୍ଗ୍ ଈଶ୍ୱର ମେହିତି, ଲାଗିଙ୍ଗ୍ ଇବେତାଙ୍ଗ୍ ତାରେନ୍ ଗୁମା। 10 ଇନେସ୍କି ଦରମ୍ ସାସ୍ତର୍ତାକେ ଲେକା ମାନାତ୍, ‘ନିଙ୍ଗେଙ୍ଗ୍ ରକ୍ଷା କିଦ୍ଦେଙ୍ଗ୍ ଈଶ୍ୱର ତା ଦୁତ୍କୁକାଙ୍ଗ୍ ନିଙ୍ଗେଙ୍ଗ୍ ଜାତୁନ୍ ଅଦେଙ୍ଗ୍ ଆଦେସ୍ ହିଦ୍ନାନ୍।’ 11 ଆରେ ପା ଲେକା ମାନାତ୍, ‘ନି କାଲ୍ପାନା ଇନେସ୍ କାଲ୍କୁକାଙ୍ଗ୍ ଉଜୁତ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ନିଙ୍ଗେଙ୍ଗ୍ ଆସ୍ତିନିକ୍।’ ” 12 ଯୀଶୁ ଶୟତାନତିଙ୍ଗ୍ ୱେଚ୍ଚାନ୍, “ଦରମ୍ ସାସ୍ତର୍ତାକେ ଇ କାତା ପା ଲେକା ମାନାତ୍, ‘ଏପେଙ୍ଗ୍ ଜାର୍ ମାପୃ ଈଶ୍ୱରତିଙ୍ଗ୍ ଇନାୱେଡ଼ାଙ୍ଗ୍ ପା ପରିକ୍ଷା କିମାଟ୍।’ ” 13 ଶୟତାନ ଯୀଶୁଙ୍ଗ୍ ୱିଜୁ ପର୍କାର୍ ପରିକ୍ଷା କିତାତ୍। ଆରେରଗ ପରିକ୍ଷା କିଦେଙ୍ଗ୍ ସୁଯଗ୍ ୱାନି ପାତେକ୍ ହେ ଶୟତାନ ଯୀଶୁଙ୍ଗ୍ ପିସ୍ତି ହାଚାତ୍। ଯୀଶୁ ହେବା କାମାୟ୍ ଆରମ୍ କିତାନ୍ ( ମାଥି. ୪:୧୨-୧୭ ; ମାର୍କ. ୧:୧୪-୧୫ ) 14 ପବିତ୍ର ଆତ୍ମାତାଙ୍ଗ୍ ଶାକ୍ତି ପାୟାଆଜି ଯୀଶୁ ଗାଲିଲୀ ଜିଲ୍ଲାତାକେ ହାଚାନ୍। ଗାଲିଲୀ ଜିଲ୍ଲାନି ଚାରିବେଣ୍ତାଙ୍ଗ୍ ଯୀଶୁ ବିଷୟରେ ବିଚାଆତାତ୍। 15 ଯୀଶୁ ହେୱାର୍ ପାର୍ତାନା ଇଲ୍କୁକାଙ୍ଗ୍ ହିକ୍ଷାହିଦେଙ୍ଗ୍ ଆରମ୍ କିତାନ୍। ହେବେ ୱିଜାକାର୍ ହେୱାନିଙ୍ଗ୍ ଜୟ୍-ଜୟ୍ କିତାର୍। ନାଜରିତ ସହର୍ତାକେ ଯୀଶୁଙ୍ଗ୍ ମାନ୍କିୱାତାର୍ ( ମାଥି. ୧୩:୫୩-୫୮ ; ମାର୍କ. ୬:୧-୬ ) 16 ତାପାଚେ ଯୀଶୁ ଇମ୍ଣି ସହର୍ତାକେ ଗାଜା ଆଜି ମାଚାନ୍ ଆରେରଗ ହେ ନାଜରିତ ସହର୍ତାକେ ୱାତାନ୍। ୱିଜୁଦିନ୍ ଲେକେ ହେୱାନ୍ ଜମ୍ନିଦିନ୍ ଯିହୁଦିର୍ ପାର୍ତାନା ଇଞ୍ଜ ହାଚାନ୍। ଆରେ ହେୱାନ୍ ଦରମ୍ ସାସ୍ତର୍ ପଡ଼ିକିଦେଙ୍ଗ୍ ନିଲ୍ତାନ୍। 17 ଭବିଷ୍ଯତବକ୍ତା ଯିଶାୟ ସାସ୍ତର୍ ହେୱାନିଙ୍ଗ୍ ରକାନ୍ ହିତାନ୍। ଯୀଶୁ ସାସ୍ତର୍ ଉନ୍ନ୍ଦି ଇମ୍ଣି ବାହାତାକେ ଇଦାଙ୍ଗ୍ ଲେକା ମାନାତ୍ ହେଦାଙ୍ଗ୍ ଗାଟାଆତାନ୍। 18 “ପବିତ୍ର ଆତ୍ମା ନାବେ ମାନାତ୍। ଗରିବ୍ ନିକାର୍ତାକେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ବାଚିକିତ୍ନ୍ନା। ଆରେ ଶୟତାନ ଜାଲ୍ଦ ମାନାକାରିଙ୍ଗ୍ ରକ୍ଷା କିଦେଙ୍ଗ୍, ଆରେ କାଣାର୍ ମାନାୟାରିଙ୍ଗ୍ ହୁଡ଼୍ଦେଙ୍ଗ୍ ସାଇଜ କିଦେଙ୍ଗ୍, ଆରେ ଦୁକ୍କଷ୍ଟ ପାୟାଆନାକାରିଙ୍ଗ୍ ରକ୍ଷା କିଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ପକ୍ତାତାନ୍ନା। 19 ନଙ୍ଗୟ୍ ଈଶ୍ୱର ମାନାୟାରିଙ୍ଗ୍ ଦୟା କିନାନ୍ ଇଞ୍ଜି ଶୁଣାୟ୍ କିଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ପକ୍ତାତାନ୍ନା।” 20 ତାପାଚେ ଯୀଶୁ ସାସ୍ତର୍ ବନ୍ଦ୍ କିଜି ପାର୍ତାନା ଇଞ୍ଜି ଚାଲାଣ୍ତିଙ୍ଗ୍ ହିତାନ୍, ତାପାଚେ ହେୱାନ୍ ହିକ୍ଷାହିଦେଙ୍ଗ୍ କୁଚ୍ଚାନ୍। ଯିହୁଦିର୍ ପାର୍ତାନା ଇଞ୍ଜ ମାନି ୱିଜାକାର୍ ଯୀଶୁଙ୍ଗ୍ ମାନ୍ଦିୟାନ୍ କିଜି ହୁଡ଼୍ଜି ମାଚାର୍। 21 ଯୀଶୁ ହେୱାରିଙ୍ଗ୍ ହିକ୍ଷାହିଦେଙ୍ଗ୍ ଲାଗାତାନ୍, “ନେଞ୍ଜେଙ୍ଗ୍ ସାସ୍ତର୍ନି ଇନାକା ଆନେଙ୍ଗ୍ ପଡ଼ିକିତାଙ୍ଗ୍ ହେଦାଙ୍ଗ୍ ଏପେଙ୍ଗ୍ ୱେଚିଲେଙ୍ଗ୍ ହେ ସାସ୍ତର୍ନି କାତା ପୁରା ଆତାତ୍।” 22 ଏଚେଜାଣ୍ ତା ହିକ୍ଷାତିଙ୍ଗ୍ ୱେନ୍ଞ୍ଜି ୱିଜାକାର୍ ୱେଚ୍ଚେଙ୍ଗ୍ ଲାଗାତାର୍, “ଇୱାନ୍ ହିକ୍ଷା ବେସି ବଡ଼ିଆ।” ଆରେ ତା ହାର୍ଦି ବେଣ୍ ୱେନ୍ଞ୍ଜି ଚାନିଆଆତାର୍। ଆରେ ହେୱାର୍ ୱେଚ୍ପା ୱେଚ୍ପି ଆଜି ୱେଚ୍ଚାର୍, “ଇୱାନ୍ତ ଯୋଷେପ୍ ମେହି।” 23 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଆଗେନିକାର୍ ୱେଚ୍ନି କାତା ୱେଚ୍ନାଦେର୍ ଇଞ୍ଜି ଆନେଙ୍ଗ୍ ପୁଚାଙ୍ଗ୍ନା, ‘ଡାକ୍ଟର୍, ଆଗେ ଏନେଙ୍ଗ୍ ହାର୍ ଆ।’ କପୁର୍ନାହୁମ୍ ସହର୍ତାକେ ଇମ୍ଣି ଚାନିଆଆନି କାମାୟ୍ କିତାକା ଆପେଙ୍ଗ୍ ୱେଚାପ୍ନା, ହେ ଲେଗ୍ଦି କାମାୟ୍ ନଙ୍ଗୟ୍ ଜାର୍ ସହର୍ତାକେ କିୟା ଇଞ୍ଜି ଏପେଙ୍ଗ୍ ଇଚା କିନାଦେରା।” 24 ତାପାଚେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା ଯେ ଇମ୍ଣି ଭବିଷ୍ଯତବକ୍ତା ଜାର୍ ସହର୍ତାକେ ସନ୍ମାନ୍ ପାୟା ଆଉନ୍।” 25 ଏପେଙ୍ଗ୍ ଇ ବିଷୟରେ ବାବିକିଜି ହୁଡ଼ାଟ୍, “ଭବିଷ୍ଯତବକ୍ତା ଏଲିୟ ୱେଡ଼ାଲିଙ୍ଗ୍ ତିନ୍ ବାର୍ହୁ ଚଅ ମାସ୍ ପାତେକ୍ ସରଗ୍ତାଙ୍ଗ୍ ବାର୍ହା ଆୱାଦାଙ୍ଗ୍ ବେସି ଗାଜା ମାର୍ଡି ଆତାତ୍। ହେପାଦ୍ନା ଇସ୍ରାଏଲ ଦେସ୍ତ ବେସିହେନି ରାଣ୍ଡିକ୍ ମାଚିକ୍। 26 ମାତର୍ ଭବିଷ୍ଯତବକ୍ତା ଏଲିୟଙ୍ଗ୍ ଈଶ୍ୱର ଇସ୍ରାଏଲ ଦେସ୍ତି ରାଣ୍ଡିକ୍ ଲାଗାୟ୍ ପକ୍ୱାତାନ୍। ମାତର୍ ଏଲିୟଙ୍ଗ୍ ସିଦନ୍ ସହର୍ନି ସାରିପତ ବାହାତାକେ ମାନି ର ବିନ୍ଜାତିନି ରାଣ୍ଡି ଲାଗାୟ୍ ପକ୍ତାନ୍। 27 ଆରେ ପା ଭବିଷ୍ଯତବକ୍ତା ଇଲିଶାୟ ୱେଡ଼ାଲିଙ୍ଗ୍ ଇସ୍ରାଏଲ ଦେସ୍ତ ବେସି କୁଷ୍ଟରଗ୍ଦାର୍ ମାଚାର୍। ମାତର୍ ଈଶ୍ୱର ହେୱାର୍ ବିତ୍ରେତାଙ୍ଗ୍ ଇନେରିଙ୍ଗ୍ ହାର୍ କିୱାଦାଙ୍ଗ୍ ମାଚାନ୍। ମାତର୍ ଈଶ୍ୱର ସୁରିଆ ଦେସ୍ନି ବିନ୍ଜାତିନି ନାମାନ୍ ତର୍ଦି କୁଷ୍ଟରଗ୍ଦି ମାନାୟ୍ତିଙ୍ଗ୍ ନେ ହାର୍ କିଜି ମାଚାନ୍।” 28 ଯିହୁଦିର୍ ପାର୍ତାନା ଇଞ୍ଜ ମାନି ୱିଜୁ ମାନାୟାରିଙ୍ଗ୍ ଯୀଶୁଙ୍ଗ୍ ଇବେଣ୍ ୱେନ୍ଞ୍ଜି ବେସି ରିସାଆତାର୍। 29 ହେଦାଙ୍ଗ୍ କାଜିଙ୍ଗ୍ ମାନାୟାର୍ ନିଙ୍ଗ୍ତାର୍ ଆରେ ଜବର୍ଦସ୍ତିରେ ଯୀଶୁଙ୍ଗ୍ ସହର୍ତାଙ୍ଗ୍ ହପ୍ତାର୍। ଆରେ ହେୱାନିଙ୍ଗ୍ ମାଡ଼ିଜପି ମାନି ର ସହର୍ ଲାଗାୟ୍ ଯୀଶୁଙ୍ଗ୍ ଅତାର୍। ହେୱାର୍ ହେବେତାଙ୍ଗ୍ ତାରେନ୍ ହେମ୍ଲାଇ କିଜି ପାଗ୍ଦେଙ୍ଗ୍ ମାନ୍ କିଜି ମାଚାର୍। 30 ମାତର୍ ଯୀଶୁ ହେୱାର୍ ଗଉଲି ବିତ୍ରେତାଙ୍ଗ୍ ହସିହାଚାନ୍। ଯୀଶୁ ବୁତ୍ ଆସ୍ତି ମାନାୟ୍ତିଙ୍ଗ୍ ହାର୍କିତାନ୍ ( ମାର୍କ. ୧:୨୧-୨୮ ) 31 ଯୀଶୁ ଗାଲିଲୀ ଜିଲ୍ଲାନି କପୁର୍ନାହୁମ୍ ସହର୍ତାକେ ୱାତାନ୍। ହେୱାନ୍ ଜମ୍ନିଦିନ୍ତ ମାନାୟାରିଙ୍ଗ୍ ହିକ୍ଷାହିଦେଙ୍ଗ୍ ଲାଗାତାନ୍। 32 ମାନାୟାର୍ ହେୱାନ୍ ହିକ୍ଷା ୱେନ୍ଞ୍ଜି କାବା ଆତାର୍। ଇନେସ୍କି ହେୱାନ୍ ଆଦିକାର୍ ପାୟାଆତି ମାନାୟ୍ ଲେକେ ହେୱାରିଙ୍ଗ୍ ହିକ୍ଷାହିଜି ମାଚାନ୍। 33 ହେ ଯିହୁଦିର୍ ପାର୍ତାନା ଇଞ୍ଜ ବୁତ୍ଆତ୍ମା ଡୁୟାଆତାକାନ୍ ମାଚାନ୍। ହେୱାନ୍ ଚେରାଆଜି ୱେଚ୍ଚାନ୍, 34 “ଏ ନାଜରିତ ସହର୍ନି ଯୀଶୁ, ନି ଲାହାଙ୍ଗ୍ ମାବେ ଇନାକା ମାନାତ୍? ଏନେଙ୍ଗ୍ ଇନାକା ମାଙ୍ଗେଙ୍ଗ୍ ବୁଡାୟ୍ କିଦେଙ୍ଗ୍ ୱାତାୟନା? ଆନେଙ୍ଗ୍ ପୁଞ୍ଚାଙ୍ଗ୍ନା ଏନେଙ୍ଗ୍ ଇନାକାୟ୍, ‘ଏନେଙ୍ଗ୍ ଈଶ୍ୱରତାଙ୍ଗ୍ ୱାତି ପବିତ୍ର ମାନାୟ୍।’ ” 35 ଯୀଶୁ ତାଙ୍ଗେଙ୍ଗ୍ ଦମ୍କାଇକିଜି ୱେଚ୍ଚାନ୍, “ଚିମ୍ରାଆ! ଇୱାନ୍ତାଙ୍ଗ୍ ହସିହାଲା!” ହେବେତାଙ୍ଗ୍ ହେ ବୁତ୍ଆତ୍ମା ହେୱାନିଙ୍ଗ୍ ଗାଉଦାଉ କିୱାଦାଙ୍ଗ୍ ମାନାୟ୍ ମାଦି ଗୁତ୍ତି ହେୱାନ୍ତାଙ୍ଗ୍ ହସିହାଚାତ୍। 36 ପାଚେ ହେ ପାର୍ତାନା ଇଞ୍ଜ ମାଚି ମାନାୟାର୍ ହେଦାଙ୍ଗ୍ ହୁଡ଼୍ଜି କାବା ଆତାର୍! ଆରେ ହେୱାର୍ ବେଣ୍କିଦେଙ୍ଗ୍ ଲାଗାତାର୍, “ଇଦାଙ୍ଗ୍ ଇନେସ୍ ଲେଗ୍ଦି ହିକ୍ଷା? ହେୱାନ୍ ଶାକ୍ତି ଆରେ ଆଦିକାର୍ ହୁଦାଙ୍ଗ୍ ବୁତ୍ଆତ୍ମାକାଙ୍ଗ୍ ଦମ୍କାୟ୍ କିଜି ୱେଚ୍ଚି ଦାପ୍ରେ, ବୁତ୍କୁ ତା ଆଦେସ୍ ମାନିକିଜି ହସିହାନିକା।” 37 ହେ ସହର୍ନି ଚାରିବେଣ୍ତି ନାସ୍କୁକାଙ୍ଗ୍ ଯୀଶୁ କିତି କାମାୟ୍ ବିଚାଆତାତ୍। ଯୀଶୁ ବାରବିନି ରଗିଆରିଙ୍ଗ୍ ହାର୍କିତାନ୍ ( ମାଥି. ୮:୧୪-୧୭ ; ମାର୍କ. ୧:୨୯-୩୪ ) 38 ଯୀଶୁ ଯିହୁଦିର୍ ପାର୍ତାନା ଇଞ୍ଜାଙ୍ଗ୍ ହସି ଶିମୋନ ପିତର ଇଞ୍ଜ ହାଚାନ୍। ଶିମୋନ ପଦାହି ବେସି ନଚ୍ନାକା ମାଗ୍ଜି ମାଚାତ୍। ଆରେ ହେବେ ମାଚି ମାନାୟାର୍ ପିତର ପଦାହିଙ୍ଗ୍ ହାର୍ କିୟା ଇଞ୍ଜି ଯୀଶୁଙ୍ଗ୍ ୱେଚ୍ଚାର୍। 39 ହେବେତାଙ୍ଗ୍ ହେୱାନ୍ ପିତର ପଦାହି ଲାଗେ ନିଲ୍ଚି ନମେର୍ତିଙ୍ଗ୍ ଦମ୍କାଇ କିତାନ୍, ଆରେ ତାଙ୍ଗେଙ୍ଗ୍ ନମେର୍ ପିସ୍ତାତ୍। ହେଦେଲ୍ ହେଦାପ୍ରେ ନିଙ୍ଗ୍ଞ୍ଜି ଯୀଶୁ ଆରେ ତା ଚେଲାହିରିଙ୍ଗ୍ ହେବା କିଦେଙ୍ଗ୍ ଲାଗାତାତ୍। 40 ଯିହୁଦିର୍ ଜମ୍ନିଦିନ୍ ମିକାହାରେସ୍ ୱେଡ଼ାହାଚିହିଙ୍ଗ୍ ବାରବିନି ରଗ୍ ଆହିଆତାକାରିଙ୍ଗ୍ ତା ଲକ୍ବାକ୍ ଯୀଶୁ ଲାଗାୟ୍ ତାହିୱାତାର୍। ଯୀଶୁ ତା କେଇ ଇଡ଼୍ଜି ରଗିୟାରିଙ୍ଗ୍ ହାର୍କିତାନ୍। 41 ଆରେ ହେୱାନ୍ ବୁତ୍ଆତ୍ମା ଡୁୟାଆତାକାରିଙ୍ଗ୍ ପା ପିହିକିତାନ୍। ହେୱାର୍ତାଙ୍ଗ୍ ବୁତ୍ଆତ୍ମାକ୍ ପିସ୍ତି ହାନିହିଙ୍ଗ୍ ଯୀଶୁଙ୍ଗ୍ ଚେରାଆଜି ୱେଚ୍ଚି ମାଚିକ୍, “ଏନେଙ୍ଗ୍ ଈଶ୍ୱର ମେହି ଇଞ୍ଜି।” ବୁତ୍ଆତ୍ମାକ୍ ପୁନ୍ଞ୍ଜି ମାଚିକ୍ ଯେ ଯୀଶୁ ନେ ଖ୍ରୀଷ୍ଟ। ମାତର୍ ହେୱାନ୍ ବୁତ୍କୁକାଙ୍ଗ୍ ବେଣ୍ କିୱେଦେଙ୍ଗ୍ ଦମ୍କାଇକିଜି ମାଚାନ୍। ଯୀଶୁ ଯିହୁଦି ପାର୍ତାନା ଇଲକୁକାଙ୍ଗ୍ ହାଲ୍ଜି ଶୁଣାୟ୍ କିତାନ୍ ( ମାର୍କ. ୧:୩୫-୩୯ ) 42 ଆର୍କାତ୍ ନାଞ୍ଜ୍ କୁଜୁ କେତିହିଙ୍ଗ୍ ଯୀଶୁ ହସି ର ଟାଙ୍ଗ୍ରାବାହାତ ପାର୍ତାନା କିଦେଙ୍ଗ୍ ହାଚାନ୍। ମାନାୟାର୍ ଯୀଶୁଙ୍ଗ୍ ଦାସ୍ତି-ଦାସ୍ତି ତା ଲାଗାୟ୍ ୱାତାର୍। ଆରେ ହେୱାନିଙ୍ଗ୍ ମାଙ୍ଗେଙ୍ଗ୍ ପିସ୍ତି ହାଲ୍ମା ଇଞ୍ଜି ଟେବାଇ କିଦେଙ୍ଗ୍ ଉପାଇକିଜି ମାଚାର୍। 43 ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ୱାଡ, ଆସେଙ୍ଗ୍ ବିନ୍ବିନ୍ ସହରକୁକାଙ୍ଗ୍ ପା ହାନାସ୍, ଆନେଙ୍ଗ୍ ହେବେ ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ଶୁଣାୟ୍ କିନାଙ୍ଗ୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱାତାଙ୍ଗ୍ନା।” 44 ହେଲେକେ ଯୀଶୁ ଯିହୁଦା ଜିଲ୍ଲାନି ଯିହୁଦିର୍ ପାର୍ତାନା ଇଲ୍କୁକାଙ୍ଗ୍ ହାଲ୍ଜି ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଲାଗାତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation