ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍ 17 - New Testament in Pengo Parja Languageବାଦାହିନି ପାପ୍ ଆରେ କେମା ହିତାନ୍ ( ମାଥି. ୧୮:୬-୭-୨୧-୨୨ ; ମାର୍କ. ୯:୪୨ ) 1 ଦିନେକ୍ ଯୀଶୁ ତା ଚେଲାରିଙ୍ଗ୍ ୱେଚ୍ଚାନ୍, “ଇମ୍ଣିୱିଜୁ ପରିକ୍ଷା କାଜିଙ୍ଗ୍ ମାନାୟାର୍ ପାପ୍ କାମାୟ୍ କିନାର୍। ମାତର୍ ହେ ୱିଜୁ ହାତ୍ପା ଆନାତ୍। ମାତର୍ ଇନେର୍ ଇ ପାପ୍ କାମାୟ୍ନି ଦାୟି ଆନାନ୍। ସେସ୍ଦିନ୍ତ ହେୱାନ୍ ବେସି ଦଣ୍ଡ୍ ପାୟା ଆନାନ୍। 2 ଇନେର୍ ପା ଦରମ୍ ମାନାୟ୍ତିଙ୍ଗ୍ ଆରେ ପାର୍ତି କିନାକାରିଙ୍ଗ୍ ବାଦା ହିଜି ତା ପାର୍ତିତିଙ୍ଗ୍ ବାଙ୍ଗାୟ୍ କିନାର୍। ହେୱାନିଙ୍ଗ୍ ଏଲେଙ୍ଗ୍ ଦଣ୍ଡ୍ ଆନି ଦର୍କାର୍ ଯେ, ତା ହାକ୍ତ ଗାଜାଟି ଜାତାକାଲ୍ ଗାଚ୍ଚି ତାଙ୍ଗେଙ୍ଗ୍ ହାମ୍ଦୁର୍ତାକେ ତୁଇତିସ୍ ତା କାଜିଙ୍ଗ୍ ହାର୍ ଆତାତ୍ମା। 3 ଲାଗିଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍। ମି ଟଣ୍ଡାଦି ଯଦି ପାପ୍ କାମାୟ୍ କିନାନା, ଲାଗିଙ୍ଗ୍ ୱେଚାଟ୍ ଏନେଙ୍ଗ୍ ବୁଲ୍ କିନାୟା। ହେୱାନ୍ ଯଦି ଦୁକ୍ ପାୟାଆନାଙ୍ଗା ଇଞ୍ଜି ପୁନ୍ଞ୍ଜି ଆରେ ପାପ୍ କାମାୟ୍ କିୱିତିସ୍ ହେୱାନିଙ୍ଗ୍ କେମା ହିୟାଟ୍। 4 ଯଦି ନି ଟଣ୍ଡାଦି ଦିନେକ୍ତିଙ୍ଗ୍ ମି କାଜିଙ୍ଗ୍ ସାତ୍ହଟ୍ ଅନ୍ୟାୟ୍ କିଦ୍ନାନ୍, ଆରେ ସବୁହଟ୍ ୱାଜି ୱେଚ୍ଚାନାନ୍ ଯେ, ହେୱାନ୍ ଇଦାଙ୍ଗ୍ କାଜିଙ୍ଗ୍ ଦୁକ୍ ଆନାନ୍, ଲାଗିଙ୍ଗ୍ ହେୱାନିଙ୍ଗ୍ ଏପେଙ୍ଗ୍ କେମା କିୟାଟ୍।” ମିବେ ହାର୍ହୁ ମାଞ୍ଜି ଲେକେ ପାର୍ତି ମାନି ଦର୍କାର୍ 5 ବାଚିକିତି ଚେଲାହିର୍ ମାପୃଙ୍ଗ୍ ୱେଚ୍ଚାର୍, “ମାଙ୍ଗେଙ୍ଗ୍ ଆଦିକ୍ ପାର୍ତି କିନାକା ବାଡାୟ୍ କିଦା।” 6 ମାପୃ ଚେଲାରିହିଙ୍ଗ୍ ୱେଚ୍ଚାନ୍, “ଇନେରିଙ୍ଗ୍ ଯଦି ର ହାର୍ହୁ ମାଞ୍ଜି ଲେକେ ମି ପାର୍ତି ମାନ୍ଗାନାତ୍, ଲାଗିଙ୍ଗ୍ ଚିଟିପାଡ଼୍ ମାର୍ତିଙ୍ଗ୍ ଏନେଙ୍ଗ୍ ଚିରାଙ୍ଗ୍ ଲାହାଙ୍ଗ୍ ଜେଲିଆଜି ହାମ୍ଦୁର୍ତାକେ ରୁଜିଆ ଇଞ୍ଜି ୱେଚ୍ଚିସ୍, ହେଦାଙ୍ଗ୍ ମି କାତା ମାନିକିନାତ୍।” ର ହଲିଆହି ଦାଇତ୍ପନି କାମାୟ୍ 7 ଯୀଶୁ ଆରେରଗ କାତା ୱେଚ୍ନିଲେକେ କିଜି ୱେଚ୍ଚାନ୍, “ହଲିଆ ଏଚେପାଦ୍ନା ମି ଜିମିତ ଆଡ଼୍ ଡ଼ୁଦେଙ୍ଗ୍ ୱାନାନା କି ମେଣ୍ଢାକାଙ୍ଗ୍ ଜାତୁନ୍ କିଜି ହାନିହିଙ୍ଗ୍, ମି ବିତ୍ରେ ଇନେର୍ ମାନାଦେର୍ କି ଏପେଙ୍ଗ୍ ହେୱାନିଙ୍ଗ୍ ଚିଞ୍ଜେଙ୍ଗ୍ ୱା ଇଞ୍ଜି ହିର୍ବାନାଦେର୍ କି? 8 ଇନେର୍ ପା ଏଲେଙ୍ଗ୍ ଇନୁଦେର୍। ମାତର୍ ଏପେଙ୍ଗ୍ ମି ହଲିଆଙ୍ଗ୍ ୱେଚ୍ନାଦେର୍, ‘ନା କାଜିଙ୍ଗ୍ ଇଚ୍କେ ତିନାକା ରହା, ଆରେ ବାଟାକିଜି ହିଦା। ଆନେଙ୍ଗ୍ ଚିଞ୍ଜେଙ୍ଗ୍ ଉଣ୍ଡେଙ୍ଗ୍ ଆଡ଼୍ତିସ୍ ଏନେଙ୍ଗ୍ ତିନାୟ୍ ଆରେ ଉଣାୟ୍।’ 9 ହଲିଆ ମାଲିକ୍ତି ୱିଜୁ କାତା ମାନିକିଜି କାମାୟ୍ କିତିସ୍ପା, ହେ ହଲିଆଙ୍ଗ୍ ଦନ୍ଯବାଦ୍ ପା ହିଉନ୍। 10 ହେଲେକେ ଏପେଙ୍ଗ୍ ପା ୱିଜୁ ଆଦେସ୍ତିଙ୍ଗ୍ ମାନିକିଜି କାମାୟ୍ କିତିସ୍ ପା, ଏପେଙ୍ଗ୍ ଇଲେକେ ୱେଚ୍ନାକା ମାନାତ୍, ‘ଆପେଙ୍ଗ୍ ତ ର ହଲିଆକାପ୍, ମା କାମାୟ୍ ଆପେଙ୍ଗ୍ କିନାପା।’ ” ଯୀଶୁ ଦଶ୍ଜାଣ୍ତିଙ୍ଗ୍ କୁଷ୍ଟରଗ୍ତାଙ୍ଗ୍ ହାର୍କିତାନ୍ 11 ଦିନେକ୍ ଯୀଶୁ ଆରେ ତା ଚେଲାହିର୍ ଯିରୁଶାଲାମ ସହର୍ତାକେ ହାନି ହାଜ୍ଦ, ଶମିରଣିୟ ଆରେ ଗାଲିଲୀ ଜିଲ୍ଲାନି ହାନ୍ଦିତିଙ୍ଗ୍ ହାଚାର୍। 12 ହେୱାନ୍ ର ନାସ୍ ୱାତାନ୍। ହେବେ ହେୱାନିଙ୍ଗ୍ ଦାସ୍ ଜାଣ୍ କୁଷ୍ଟରଗ୍ଦାକାର୍ ଗିଟାଆତାର୍। 13 ହେୱାର୍ ଅଲପ୍ ଦେହା ନିଲ୍ଚି ହେୱାର୍ ଯୀଶୁଙ୍ଗ୍ ଚେରାଆଜି କୁକ୍ତାର୍, “ଏ ଯୀଶୁ, ଏ ଗୁରୁ! ମାଙ୍ଗେଙ୍ଗ୍ ଦୟାକିଦା।” 14 ଯୀଶୁ ମାନାୟାରିଙ୍ଗ୍ ହୁଡ଼୍ଜି ୱେଚ୍ଚାନ୍, “ଏପେଙ୍ଗ୍ ହାଲ୍ଜି ଜାର୍ ଗାଗାଡ଼୍ତିଙ୍ଗ୍ ଈଶ୍ୱର ହେବାକିନି ପୁଜାରିର୍ ତାକେ ଚଚାଟ୍।” ହେ ଦାସ୍ ଜାଣ୍ କୁଷ୍ଟରଗ୍ଦାକାର୍ ପୁଜାରିର୍ ତାକେ ହାନିହିଙ୍ଗ୍ ହାର୍ଆତାର୍। 15 ରକାନ୍ ଜାର୍ତିଙ୍ଗ୍ ହାର୍ଆତାକା ହୁଡ଼୍ଜି ଯୀଶୁ ଲାଗାୟ୍ ଲେଉଟା ଆଜି ୱାତାନ୍। ହେୱାନ୍ ଗାଜାକାଟ୍ କିଜି ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍। 16 ହେୱାନ୍ ଯୀଶୁଙ୍ଗ୍ ସନ୍ମାନ୍ ହିଦେଙ୍ଗ୍ ତା କାଲ୍ପାନା ତାରେନ୍ ଜୱାର୍ କିତାନ୍, ଆରେ ହେୱାନିଙ୍ଗ୍ ଦନ୍ଯବାଦ୍ ହିତାନ୍। ଇୱାନ୍ ଶମିରଣିୟ୍ନି ବିନ୍ଜାତିନି ମାନାୟ୍ ମାଚାନ୍। 17 ହେବେତାଙ୍ଗ୍ ଯୀଶୁ ୱେଚ୍ଚାନ୍, “ଦାସ୍ ଜାଣ୍ ମାନାୟ୍ କୁଷ୍ଟରଗ୍ତାଙ୍ଗ୍ ହାର୍ଆତାର୍, ଆରେ ନଅଜାଣ୍ ଇମେ ହାଚାର୍? 18 ହେୱାର୍ ହାର୍ଆତି ପାଚେ ଆରେ ଲେଉଟା ଆଜି ଈଶ୍ୱରତିଙ୍ଗ୍ ଦନ୍ଯବାଦ୍ କିନି କାଜିଙ୍ଗ୍ ଇନାକା ଇ ରକାନ୍ ଶମିରୋଣ ବିନ୍ଜାତିନି ମାନାୟ୍ ମାଚାନ୍?” 19 ତାପାଚେ ଯୀଶୁ ହେୱାନିଙ୍ଗ୍ ୱେଚାଚାନ୍, “ନିଲା ଏନେଙ୍ଗ୍ ନଙ୍ଗୟ୍ ହାଲା। ଏନେଙ୍ଗ୍ ନାଙ୍ଗେଙ୍ଗ୍ ପାର୍ତି କିତ୍ତିଲେ ଈଶ୍ୱର ନିଙ୍ଗେଙ୍ଗ୍ କୁଷ୍ଟରଗ୍ତାଙ୍ଗ୍ ଉଦାର୍ କିତ୍ତାନ୍ନା।” ଯୀଶୁ ଈଶ୍ୱର ସାସନ୍ କିନି ରାଜିନି ବିଷୟ ହିକ୍ଷା ହିତାନ୍ ( ମାଥି. ୨୪:୨୩-୨୮ , ୩୭-୪୧ ) 20 ପାରୁସିଦଳ୍ନି କେତ୍ଜାଣ୍ ମାନାୟ୍ ୱାଜି ଯୀଶୁଙ୍ଗ୍ ୱେନ୍ବାତାର୍, “ଈଶ୍ୱର ସାସନ୍ କିନି ରାଜି ଇନାୱେଡ଼ାଙ୍ଗ୍ ୱାନାତ୍?” ହେୱାରିଙ୍ଗ୍ ଯୀଶୁ ୱେଚ୍ଚାନ୍, “ଏପେଙ୍ଗ୍ କାଣ୍କୁ ଲାହାଙ୍ଗ୍ ହୁଡ଼୍ଜି ବୁଜାଆନିଲେକେ ଈଶ୍ୱର ସାସନ୍ କିନି ରାଜି ୱାଉତ୍। 21 ଏହେଁ ହୁଡ଼ାଟ୍! ଈଶ୍ୱର ସାସନ୍ କିନି ରାଜି ଇବେ ମାନାତ୍! କି ହେବେ ମାନାତ୍! ମାନାୟାର୍ ୱେଚ୍ଚେଙ୍ଗ୍ ଆଡୁର୍। ମାତର୍ ଈଶ୍ୱର ସାସନ୍ କିନି ରାଜି ମି ବିତ୍ରେ ମାନାତ୍।” 22 ତାପାଚେ ଯୀଶୁ ତା ଚେଲାରିଙ୍ଗ୍ ୱେଚ୍ଚାନ୍, “ଏଲେଙ୍ଗ୍ ରଦିନ୍ ୱାନାତ୍, ଏଚେପାଦ୍ନା ଏପେଙ୍ଗ୍ ଆନେଙ୍ଗ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତଙ୍ଗ୍ ଆରେରଗ ୱାନି ଦିନ୍ତିଙ୍ଗ୍ ହୁଡ଼୍ଦେଙ୍ଗ୍ ଇଚା କିନାଦେର୍। ମାତର୍ ହେଦାଙ୍ଗ୍ ହୁଡ଼୍ଦେଙ୍ଗ୍ ଆଡୁଦେର୍। 23 ମାନାୟାର୍ ମିଙ୍ଗେଙ୍ଗ୍ ଇଞ୍ଜ୍ନାର୍, ‘ହୁଡ଼ାଟ୍! ରକ୍ଷାକିଦ୍ନାକାନ୍ ହେବେ ମାନାନ୍! ଆରେ ଇବେ ମାନାନ୍!’ ମାତର୍ ଏପେଙ୍ଗ୍ ଇମେତାକେ ମାନାଦେର୍ ହେବେ ମାନାଟ୍। ମାତର୍ ଏପେଙ୍ଗ୍ ହେୱାର୍ କାତା ୱେନ୍ମାଟ୍ କି ହେୱାର୍ ପାଚେ-ପାଚେ ହାଲ୍ମାଟ୍। 24 ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ୱାନାକା ଏପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍। ହେୱାନ୍ ଇମ୍ଣିଦିନ୍ ୱାନାନ୍, ହେ ଦିନ୍ ବାଦାଡ଼୍ତାଙ୍ଗ୍ ଅଜଡ଼୍ ଇ ହାନ୍ଦିତାଙ୍ଗ୍ ଆରେ ଜେକନି ହାନ୍ଦିପାତେକ୍ ବିଜ୍ଲି ଜିଲ୍-ଜାଲ୍ ଆନିଲେକେ ଚନ୍ଞ୍ଜାନାତ୍। 25 ମାତର୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ପାର୍ତୁମ୍ କେତେକ୍ ଦୁକ୍ ପାୟା ଆନାନ୍। ଆରେ ଇ ଯୁଗ୍ନି ମାନାୟାର୍ ହେୱାନିଙ୍ଗ୍ ଗିଣ୍ କିନାର୍। 26 ମା ଆକଦାଦି ନୋହ ମାନି ପାଦ୍ନା ଇନେସ୍ ଗଟାଆଜି ମାଚାତ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ୱାନିହିଙ୍ଗ୍ ପା ହେଲେକେ ନେ ଗଟାଆନାତ୍। 27 ମା ଆକଦାଦି ନୋହ ଏଜୁଙ୍ଗ୍ ଜାଜ୍ବିତ୍ରେ ହଣି ପାତେକ୍ ମାନାୟାର୍ ତିନାକା ଉଣାକା। ଆରେ ବିବାପାତି ଇୱିଜୁ କିଜି ମାଚାର୍। ମାତର୍ ବାତ୍ୟା ଆଜି ୱିଜାକାରିଙ୍ଗ୍ ବୁଡାଇ କିତାତ୍। 28 ଈଶ୍ୱର ଲୋଟ ମାନି ୱେଡ଼ାଲିଙ୍ଗ୍ ସଦୋମ ଦେସ୍ ବୁଡାଇ କିତିହିଙ୍ଗ୍ ଇନାକା ଗଟାଆତାତ୍, ନଙ୍ଗୟ୍ ପା ହେ କାତା ଗଟାଆନାତ୍। ହେ ମାନାୟାର୍ ହେପାଦ୍ନା ତିନ୍ଞ୍ଜି ଉଣ୍ଜି, ବେପାର୍ବାଟ୍ କିଜି ମାଚାର୍। ମାର୍କୁ ରୁଜ୍ଦି ମାଚାର୍ ଆରେ ଜାର୍ କାଜିଙ୍ଗ୍ ଇଲ୍କୁ ରସ୍ତି ମାଚାର୍। 29 ଏଚେପାଦ୍ନା ପାତେକ୍ ଲୋଟ ସଦୋମ ସହର୍ ପିସ୍ତି ହାନିପାତେକ୍ ପା ମାନାୟାର୍ ଇୱିଜୁ କାମାୟ୍ କିଜି ମାଚାର୍। ତାପାଚେ ସରଗ୍ତାଙ୍ଗ୍ ନାଣି ଆରେ ଗନ୍ଦକ, ବାର୍ହା ଆତାତ୍ ଆରେ ହେଦାଙ୍ଗ୍ ୱିଜାକାରିଙ୍ଗ୍ ବୁଡାଇ କିତାତ୍। 30 ଏଚେପାଦ୍ନା ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ୱାନାଙ୍ଗ୍, ହେପାଦ୍ନା ହେଲେକେ ଗଟାଆନାତ୍। 31 ହେ ଦିନ୍ ଏପେଙ୍ଗ୍ ଇଲ୍ ଚାତ୍ ଜପି ମାନିହିଙ୍ଗ୍ ତାରେନ୍ ଜୁଜି ହନ୍ଚିହାଲାଟ୍, ମାତର୍ ଏପେଙ୍ଗ୍ ମି ଇଞ୍ଜ ଜିନିଷ୍ ତାକେଦେଙ୍ଗ୍ ହାଲ୍ମାଟ୍। ହେଲେକେ ଇମ୍ଣାକାନ୍ ଜମିତାକେ ମାନ୍ଗାନାନ୍, ହେୱାର୍ ଲେଉଟା ଆଜି ହାଲ୍ମେର୍। 32 ଲୋଟ ଡକ୍ରୁହି ଇନାକା ଆଜି ମାଚାତ୍, ହେ କାତାତିଙ୍ଗ୍ ମାନ୍ତ ବାବି କିୟାଟ୍। 33 ଇମ୍ଣାକାନ୍ ଜାର୍ ଜିବୁନ୍ ରକ୍ଷା କିଦେଙ୍ଗ୍ ଉପାୟ୍ କିନାନ୍, ହେୱାନ୍ ହେଦାଙ୍ଗ୍ ଆରାଇ କିନାନ୍। ମାତର୍ ଇମ୍ଣାକାନ୍ ନା କାଜିଙ୍ଗ୍ ତା ଜିବୁନ୍ତିଙ୍ଗ୍ ଆରାଇ କିନାନ୍, ହେୱାନ୍ ହେଦାଙ୍ଗ୍ ରକ୍ଷା କିନାନ୍। 34 ଆନେଙ୍ଗ୍ ଆରେରଗ ୱାନିହିଙ୍ଗ୍ ର କାଟେଲ୍ତାକେ ରିକାର୍ ହୁନ୍ଞ୍ଜି ମାନ୍ଗାନାର୍, ଇ ରିକାର୍ ବିତ୍ରେତାଙ୍ଗ୍ ରକାନିଙ୍ଗ୍ ଈଶ୍ୱର ଇଚାକିଜି ଅନାନ୍। ଆରେ ରକାନିଙ୍ଗ୍ ଇଚା କିୱାଦାଙ୍ଗ୍ ପିସ୍ତି ହାନାନ୍। 35 ରିଣ୍ଡେକ୍ କଗ୍ଲେକ୍ ର ଜାତାତାକେ ଡେରାଙ୍ଗ୍ ନୁଜ୍ନିହିଙ୍ଗ୍ ରଞ୍ଜେଲିଙ୍ଗ୍ ଈଶ୍ୱର ଇଚାକିଜି ଅନାନ୍, ଆରେ ରଞ୍ଜେଲିଙ୍ଗ୍ ଇଚା କିୱାଦାଙ୍ଗ୍ ପିସ୍ତି ହାନାନ୍। 36 ରିକାର୍ ଜିମିତ ମାନିହିଙ୍ଗ୍ ରକାନିଙ୍ଗ୍ ଈଶ୍ୱର ଇଚାକିଜି ଅନାନ୍, ଆରେ ରକାନିଙ୍ଗ୍ ପିସ୍ତି ହାନାନ୍।” 37 ହେବେତାଙ୍ଗ୍ ଚେଲାହିର୍ ଯୀଶୁଙ୍ଗ୍ ୱେନ୍ବାତାର୍, “ଇ ଗଟ୍ନା ଇମେତାକେ ଗଟାଆନାତ୍ ମାପୃ?” ଯୀଶୁ ୱେଚ୍ଚାନ୍, “ଇମେତାକେ ମାଡ଼ା ମାନ୍ଗାନାତ୍ ହେବେ ରାମାଣିଙ୍ଗ୍ ରୁଣ୍ଡା ଆନିକ୍। ହେଦାଙ୍ଗ୍ କାଜିଙ୍ଗ୍ ମାନାୟାର୍ ପୁଞ୍ଜେଙ୍ଗ୍ ଆଡ୍ନାର୍ କି ଇବେ ର ମାଡ଼ା ମାନାତ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation