ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍ 16 - New Testament in Pengo Parja Languageଚାତୁର୍ ମୁନ୍ସିନି କାତା 1 ଯୀଶୁ ଆରେରଗ ତା ଚେଲାହିରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନ୍, “ରକାନ୍ ଦନି ମାନାୟ୍ ମାଚାନ୍। ହେ ଦନି ମାନାୟ୍ ତା ଦନ୍ସମ୍ଫତି ବୁଜାସୁଜା କିଦେଙ୍ଗ୍ ର ମୁନ୍ସିଙ୍ଗ୍ ଇଡ଼୍ଜି ମାଚାନ୍। ପାଚେ ଦନି ମାନାୟ୍ ର ବେଣ୍ ୱେଚାନ୍ ଯେ, ମୁନ୍ସି ହେୱାନିଙ୍ଗ୍ ଟକାଇ କିଜି ମାଚାନ୍। 2 ଦନି ମାନାୟ୍ ମୁନ୍ସିଙ୍ଗ୍ କୁକ୍ଚି ୱେଚ୍ଚାନ୍, ‘ଆନେଙ୍ଗ୍ ନି ବିରୁଦ୍ତାକେ କେତେକ୍ କାତା ୱେଚାଙ୍ଗ୍ନା। ଏନେଙ୍ଗ୍ ଇନାକା ୱିଜୁ କିତାଇନା, ତା ହିସାବ୍ ନାଙ୍ଗେଙ୍ଗ୍ ହିଦା। ନଙ୍ଗୟତାଙ୍ଗ୍ ଏନେଙ୍ଗ୍ ଆରେ ନା ମୁନ୍ସି ଆଦେଙ୍ଗ୍ ଆଡୁଇ।’ 3 ହେ ମୁନ୍ସି ମାନେ-ମାନେ ବାବିକିତାନ୍, ‘ନଙ୍ଗୟ୍ ଆନେଙ୍ଗ୍ ଇନାକା କିନାଙ୍ଗ୍? ନା ମାଲିକ୍ ନାଙ୍ଗେଙ୍ଗ୍ ଚାକ୍ରି କାଟି କିତ୍ତାନ୍। କଡ଼ି କାର୍ତେଙ୍ଗ୍ ପା ନା ଗାଗାଡ଼୍ତ ସାକ୍ତି ହିଲେତ୍। ଆରେ ବିକ୍ ଏନ୍ତିସ୍ ଲାଜୁ ହତ୍ନାତ୍। 4 ଲାଗିଙ୍ଗ୍ ଆନେଙ୍ଗ୍ ଇନାକା କିନାଙ୍ଗ୍ ହେଦାଙ୍ଗ୍ ପୁଚାଙ୍ଗ୍ନା। ଏଚେପାଦ୍ନା ନା କାମାୟ୍ତାଙ୍ଗ୍ ମାଲିକ୍ ହପ୍ତାନାନ୍, ହେପାଦ୍ନା ମାନାୟାର୍ ନାଙ୍ଗେଙ୍ଗ୍ ତାଞ୍ଜ କୁକ୍ତାନାର୍। ଆରେ ହେୱାର୍ ନାଙ୍ଗେଙ୍ଗ୍ ର କାମାୟ୍ ହିଦ୍ନାର୍।’ 5 ଲାଗିଙ୍ଗ୍ ମୁନ୍ସି ମାଲିକ୍ତାଙ୍ଗ୍ ରୁଣ୍ ଅତି ୱିଜାକାରିଙ୍ଗ୍ କୁକ୍ତାନ୍। ଆରେ ହେୱାନ୍ ପାର୍ତୁମ୍ ରୁଣ୍ ଅତାକାନିଙ୍ଗ୍ ୱେନ୍ବାତାନ୍, ‘ନା ମାଲିକ୍ତାଙ୍ଗ୍ ଏନେଙ୍ଗ୍ ଏଚେକ୍ ରୁଣ୍ ଅତାଇନା?’ 6 ହେୱାନ୍ ୱେଚ୍ଚାନ୍, ‘ଶହେ ଡ୍ରାମ୍ ଅଲିବ୍ ଚିକାଣ୍।’ ଇଞ୍ଜି ରୁଣ୍ ଅତାକାନ୍ ହେୱାନିଙ୍ଗ୍ ୱେଚ୍ଚାନ୍, ‘ନି ହିସାବ୍ କିତି କାଗଜ୍ ଅୱା। କୁଚା ଆରେ ବେଗି ପଚାସ୍ ଡ୍ରାମ୍ ଇଞ୍ଜି ଜେକନି କାଗଜ୍ତାକେ ଲେକିକିଜି ହିଦା।’ 7 ତାପାଚେ ମୁନ୍ସି ଆରେ ରକାନ୍ ରୁଣ୍ ଅତାକାନିଙ୍ଗ୍ କୁକ୍ଚି ୱେନ୍ବାତାନ୍, ‘ନିଦାଙ୍ଗ୍ ଏଚେକ୍ ରୁଣ୍ ହୁଜା ଆନାକା ମାନାତ୍?’ ରୁଣ୍ ଅତାକାନ୍ ୱେଚ୍ଚାନ୍, ‘ଶହେ ବାସ୍ତା ଗହମ୍।’ ମୁନ୍ସି ହେୱାନିଙ୍ଗ୍ ୱେଚ୍ଚାନ୍, ‘ନି ହିସାବ୍ କାଗଜ୍ ଅୱା, ଆରେ ହେଦାଙ୍ଗ୍ତିଙ୍ଗ୍ କମ୍କିଜି ଅସେ ବାସ୍ତା ଇଞ୍ଜି ଜେକନି କାଗଜ୍ତାକେ ଲେକିକିୟା।’ 8 ତାପାଚେ ମାଲିକ୍ ହେ ଅସାଦୁ ମୁନ୍ସିତିଙ୍ଗ୍ ଆଶ୍ରିବାଦ୍ କିତାନ୍। ଇନେସ୍କି ମୁନ୍ସି ଚାତୁର୍ ଆଜି କାମାୟ୍ କିତାନ୍। ହେଲେକେ ଇ ଯୁଗ୍ନି କରାପ୍ ମାନାୟାର୍ ଜାର୍ କାମାୟ୍ତିଙ୍ଗ୍ ହାର୍ଦି ମାନାୟ୍ତାଙ୍ଗ୍ ଆଦିକ୍ ଚାତୁର୍ ଆଜି କାମାୟ୍ କିନାର୍।” 9 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ପୁର୍ତିନି ଦନ୍ ହିଜି ସାଙ୍ଗ ରହାଟ୍। ଏଚେକାଡ଼୍ଦ ଏପେଙ୍ଗ୍ ହାଃନାଦେର୍, ଈଶ୍ୱର ମିଙ୍ଗେଙ୍ଗ୍ ସରଗ୍ତାକେ ମାନି ଇଞ୍ଜ ଆସ୍ତାନାନ୍। 10 ହିରୁ କାମାୟ୍ତିଙ୍ଗ୍ ଯଦି ହାର୍ଦାଙ୍ଗ୍ କିନାନ୍, ଲାଗିଙ୍ଗ୍ ହେୱାନ୍ ଗାଜା କାମାୟ୍ତିଙ୍ଗ୍ ପା ହାର୍ଦାଙ୍ଗ୍ କିଦେଙ୍ଗ୍ ଆଡ୍ନାନ୍। ଇନେର୍ ଅଲପ୍ ଜିନିଷ୍ତିଙ୍ଗ୍ ପାର୍ତି କିୟିଆତାତ୍, ଲାଗିଙ୍ଗ୍ ହେୱାନିଙ୍ଗ୍ ଗାଜା ଜିନିଷତିଙ୍ଗ୍ ପା ପାର୍ତି କିୟାଆନାତ୍। 11 ଏପେଙ୍ଗ୍ ଯଦି ଇ ଯୁଗ୍ନି ଦନ୍ ସମ୍ପତି ହାର୍ଦି କାମାୟ୍ କାଜିଙ୍ଗ୍ ବାଉରା ଆୱିତିସ୍, ଈଶ୍ୱର ପା ସରଗ୍ନି ଦନ୍ ସମ୍ପତି ହିଦୁନ୍। 12 ଏପେଙ୍ଗ୍ ଜେକନିକାର୍ ଦନ୍ ସମ୍ପତିତିଙ୍ଗ୍ ହାର୍ଦାଙ୍ଗ୍ ବାଉରା ଆୱିତିସ୍, ଲାଗିଙ୍ଗ୍ ଇନେର୍ ମି କାଜିଙ୍ଗ୍ ଡାବୁଙ୍ଗ୍ ହିଦ୍ନାର୍? 13 ରକାନ୍ ହଲିଆ ରିକାର୍ ମାଲିକ୍ତିଙ୍ଗ୍ ହେବା କିଦେଙ୍ଗ୍ ଆଡୁନ୍। ଲାଗିଙ୍ଗ୍ ହେୱାନ୍ ରକାନିଙ୍ଗ୍ ଆକାର୍ ଆନାନ୍ ଆରେ ରକାନିଙ୍ଗ୍ ଲାଡ୍ କିନାନ୍। ଏଲେଙ୍ଗ୍ ଆୱିତିସ୍ ରକାନିଙ୍ଗ୍ ଇଚା ଆନାତ୍ ଆରେ ରକାନିଙ୍ଗ୍ ଗିଣ୍ କିନାନ୍। ଏପେଙ୍ଗ୍ ଈଶ୍ୱର ଆରେ ଦନ୍ ଇ ରିଣ୍ଡେକାଙ୍ଗ୍ ହେବା କିଦେଙ୍ଗ୍ ଆଡୁଦେର୍।” ମଶା ଲେକିକିତି ନିୟମ୍ ଆରେ ଈଶ୍ୱର ସାସନ୍ କିନି ରାଜି ( ମାଥି. ୧୧:୧୨-୧୩ ; ୫:୩୧-୩୨ ; ମାର୍କ. ୧୦:୧୧-୧୨ ) 14 ପାରୁସିଦଳ୍ନି ମାନାୟାର୍ ଡାବୁକାଙ୍ଗ୍ ବେସି ଲାଡ୍କିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ଇ ୱିଜୁବେଣ୍ ୱେନ୍ଞ୍ଜି ଯୀଶୁଙ୍ଗ୍ ଇନସ୍ତା କିତାର୍। 15 ଯୀଶୁ ପାରୁସିଦଳ୍ତିଙ୍ଗ୍ ୱେଚ୍ଚାନ୍, “ମାନାୟାର୍ ମୁମ୍ଦ ଏପେଙ୍ଗ୍ ଜାର୍ତିଙ୍ଗ୍ ବଲ୍ବଲାୟ୍ ଆନାଦେରା। ମାତର୍ ମି ଗରବ୍ତାକେ ଇନାକା ୱିଜୁ ମାନାତ୍ ଈଶ୍ୱରନେ ପୁନାନ୍। ଇମ୍ଣିୱିଜୁ ବିଷୟତିଙ୍ଗ୍ ମାନାୟାର୍ ବେସି ସନ୍ମାନ୍ କିନାର୍, ହେଦାଙ୍ଗ୍ ଈଶ୍ୱର କାଣ୍କୁକାଙ୍ଗ୍ ଗିଣ୍ନି ବିଷୟ। 16 ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତା ଲେକିକିତି ସାସ୍ତର୍ତାଙ୍ଗ୍ ମାନାୟାର୍ ଜିୟେର୍ ଇଞ୍ଜି ଈଶ୍ୱର ମାନ୍କିତାନ୍। ମାତର୍ ଡୁବନ୍ହିନି ଯୋହନ ୱାତିତାଙ୍ଗ୍ ଈଶ୍ୱର ସାସନ୍ କିନି ରାଜି ବିଷୟରେ ହାର୍ଦିକାବୁର୍ ଶୁଣାୟ୍ କିଜି ମାଚାର୍। ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ବେସିହେନି ମାନାୟ୍ ଉପାୟ୍ କିନାରା। 17 ବାଦାଡ଼୍ ଆରେ ପୁର୍ତି ବୁଡାଆନାତ୍, ମାତର୍ ମୋଶା ଲେକିକିତି ନିୟମ୍ନି ସାସ୍ତର୍ନି ଇମ୍ଣି ହିରୁଟି ବିଷୟ ପା ବୁଡା ଆଉତ୍।” 18 “ର ଆଣ୍ଡ୍ରେନ୍ ଯଦି ଜାର୍ କଗ୍ଲେଙ୍ଗ୍ ହେଲୱାଇ ନାଡ଼୍ଚି, ଜେକନି କଗ୍ଲେଙ୍ଗ୍ ବିବା ଆନାନ୍। ଲାଗିଙ୍ଗ୍ ହେୱାନ୍ କଗ୍ଲେ ବିରଦ୍ତାଙ୍ଗ୍ ଦାରୁଲାକିନି ପାପ୍ତାକେ ଦସି ଆନାନ୍। ଆରେ ଇମ୍ଣି ଆଣ୍ଡ୍ରେନ୍ ଚାଡ୍ରି କଗ୍ଲେଙ୍ଗ୍ ବିବା ଆନାନ୍, ହେୱାନ୍ ପା ଦାରୁଲାକିନି ପାପ୍ତାକେ ଦସି ଆନାନ୍।” ସାଉକାର୍ ମାନାୟ୍ ଆରେ ବିକାରି ଲାଜର୍ 19 ଆରେରଗ ଯୀଶୁ ୱେଚ୍ଚାନ୍, “ଦିନେକ୍ ର ସାଉକାର୍ ମାନାୟ୍ ସବୁୱେଡ଼ାଙ୍ଗ୍ ହାର୍ଦି-ହାର୍ଦି ହେନ୍ଦ୍ରାପାଟା ଉସ୍ପିସ୍ ମାଚାନ୍। ହେୱାନ୍ ଏଚେକ୍ ହାଉକାର୍ ମାଚାନ୍ ଯେ ୱିଜୁଦିନ୍ ର ଗାଜାବଜି ହିଦେଙ୍ଗ୍ ପା ତାବେ ଶାକ୍ତି ମାଚାତ୍। 20 ଲାଜର୍ ତର୍ଦାକାନ୍ ରକାନ୍ ବିକାରି ମାଚାନ୍। ତା ଗାଗାଡ଼୍ ଗାଉଦାଉ ବାର୍ତିଆଜି ମାଚାତ୍। ଲାଜର୍ ସବୁୱେଡ଼ାଙ୍ଗ୍ ହାଉକାର୍ ମାନାୟ୍ ଦୁୱେର୍ ଲାଗାୟ୍ ମାନ୍ଗାନାକା। 21 ଆରେ ନିକୁଡ଼ିଙ୍ଗ୍ ୱାଜି ତା ଗାଉତିଙ୍ଗ୍ ନାଗ୍ଜି ମାଚିସ୍ ପା, ସାଉକାର୍ ମାନାୟ୍ ତିନ୍ଞ୍ଜି ଉବ୍ରାଆତି ସକ୍ଡ଼ି କାଦି ପା ଚିଞ୍ଜେଙ୍ଗ୍ କାସି ମାନ୍ଗାନାକା। 22 ତାପାଚେ ଲାଜର୍ ହାଃତାନ୍। ସରଗ୍ଦୁତ୍କୁ ୱାତିକ୍ ଆରେ ମା ଆକଦାଦି ଅବ୍ରାହାମ୍ ଲାଗାୟ୍ ଅତିକ୍। ଆରେ କେତ୍ଦିନ୍ ପାଚେ ସାଉକାର୍ ମାନାୟ୍ ପା ହାଃତାନ୍ ଆରେ ହେୱାନିଙ୍ଗ୍ ମୁଚ୍ଚାର୍। 23 ହାଉକାର୍ ମାନାୟ୍ତିଙ୍ଗ୍ ନରକ୍ତାକେ ତୁସିହିତାର୍। ହେୱାନ୍ ନାଣିତାକେ ବେସି କଷ୍ଟ ପାୟାଆନିହିଙ୍ଗ୍, ଲାଜର୍ତିଙ୍ଗ୍ ଅବ୍ରାହାମ୍ ଲାଗାୟ୍ ନିଲ୍ତାକା ହେ ମାନାୟ୍ ହୁଡ଼୍ତାନ୍। 24 ନାଣିତାକେ ଆର୍ତି ହାଉକାର୍ ମାନାୟ୍ କୁକ୍ତାନ୍, ‘ଆବା ଅବ୍ରାହାମ୍, ନାଙ୍ଗେଙ୍ଗ୍ ଦୟାକିଦା। ନା ଲାଗାୟ୍ ଲାଜର୍ତିଙ୍ଗ୍ ପକ୍ତା। ହେୱାନ୍ ତା ୱାଚ୍କା ଏଜୁକାଙ୍ଗ୍ କୁକ୍ଚି ନା ୱେନ୍ଦୁଲ୍ ଟୁପା-ଟୁପା କିଜି ଏଜୁଙ୍ଗ୍ ହିଦେନ୍। ଆନେଙ୍ଗ୍ ଇ କାଚାଆନି ନାଣିତାକେ ମାନ୍ଞ୍ଜି ବେସି କଷ୍ଟ ପାୟାଆନାଙ୍ଗା।’ 25 ମାତର୍ ଅବ୍ରାହାମ୍ ୱେଚ୍ଚାନ୍, ‘ଏ ହିମ୍ଣା, ଏନେଙ୍ଗ୍ ଏଚେପାଦ୍ନା ଜିଜି ମାଚାଇ ହେପାଦ୍ନାନି କାତା ଅଲପ୍ ମାନ୍ତ ଏତ୍କିୟା। ନି ଜିବୁନ୍ତ ୱିଜୁ ବିଷୟ ପାୟାଆତାଇନା। ମାତର୍ ଲାଜର୍ କାଜିଙ୍ଗ୍ ୱିଜୁ କରାପ୍ ଜିନିଷ୍ ଗଟାଆତାତ୍ନା। ନଙ୍ଗୟ୍ ହେୱାନ୍ ଆରାମ୍ସେ ମାନାନା ଆରେ ଏନେଙ୍ଗ୍ କଷ୍ଟ ପାୟାଆନାୟା। 26 ହେଦାଙ୍ଗ୍ ପିସ୍ତି ମା ରିକାର୍ ମାଦି ର ଗାଜା କଡ଼ି ମାନାତ୍। ନିଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍ ହେ କଡ଼ି ନାସି ହାଞ୍ଜେଙ୍ଗ୍ ଇନେର୍ ପା ଆଡୁର୍। ଆରେ ହେ ବାହା ପିସ୍ତି ଇନେର୍ ଇବେ ୱାଦେଙ୍ଗ୍ ଆଡୁର୍।’ 27 ହେ ନାଣିତାକେ ତୁହିୟାଆତି ହାଉକାର୍ ୱେଚ୍ଚାନ୍, ‘ଏ ଆବା, ଦୟାକିଜି ଲାଜର୍ତିଙ୍ଗ୍ ପୁର୍ତିତାକେ ମାଞ୍ଜ୍ବା ମାନି ଇଞ୍ଜ ପକା। 28 ନା ପାଞ୍ଚ୍ଜାଣ୍ ଟଣ୍ଡାର୍ ମାନାର୍। ଲାଜର୍ ନା ଟଣ୍ଡାରିଙ୍ଗ୍ ଜାଗ୍ରତ୍ କିୟିକିନାନ୍। ଇଦାଙ୍ଗ୍ କାଜିଙ୍ଗ୍ ହେୱାର୍ ଇ କାଚାଆନି ନାଣିତାକେ ହେୱାର୍ ୱାମେର୍।’ 29 ମାତର୍ ଅବ୍ରାହାମ୍ ୱେଚ୍ଚାନ୍, ‘ନି ଟଣ୍ଡାଦିରିଙ୍ଗ୍ ଜାଗ୍ରତ୍ କିଦେଙ୍ଗ୍ ମୋଶା ଲେକିକିତି ନିୟମ୍ ଆରେ ଭବିଷ୍ଯତବକ୍ତାର୍ ଲେକିକିତି ବହିତିଙ୍ଗ୍ ପଡ଼ିକିଜି ହେୱାର୍ ହେବେତାଙ୍ଗ୍ ହିକାଆୟେର୍।’ 30 ହେ ନାଣିତାକେ କାଡ଼୍ତି ହାଉକାର୍ ମାନାୟ୍ ୱେଚ୍ଚାନ୍, ‘ଆକାୟ୍ ଆବା ଅବ୍ରାହାମ୍! ଯଦି ହାଃତାକାର୍ ବିତ୍ରେତାଙ୍ଗ୍ ଇନେର୍ ରକାନ୍ ହେୱାର୍ ଲାଗାୟ୍ ହାଚିସ୍, ହେୱାର୍ ପାର୍ତିକିନାର୍ ଆରେ ପାପ୍ କାମାୟ୍ ପିସ୍ତି ମାପୃତାକେ ୱାନାର୍।’ 31 ମାତର୍ ଅବ୍ରାହାମ ହେୱାନିଙ୍ଗ୍ ୱେଚ୍ଚାନ୍, ‘ଆକାୟ୍ ଯଦି ନି ଟଣ୍ଡାଦିର୍ ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତା ବେଣ୍ତିଙ୍ଗ୍ ଯଦି ୱେନୁର୍, ଲାଗିଙ୍ଗ୍ ହେୱାର୍ ହାଃଜି ଆରେରଗ ଜିବୁନ୍ ଆତାକାର୍ ବେଣ୍ ପା ୱେନୁର୍।’ ” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation