ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍ 14 - New Testament in Pengo Parja Languageଜମ୍ନିଦିନ୍ ନାଞ୍ଜିଙ୍ଗ୍ ଯୀଶୁ ର ରଗ୍ଦାକାନିଙ୍ଗ୍ ହାର୍କିତାନ୍ 1 ଦିନେକ୍ ଜମ୍ନିଦିନ୍ ନାଞ୍ଜିଙ୍ଗ୍ ଯୀଶୁ ପାରୁସିଦଳ୍ନି ର ମୁଡ଼୍ଦି ପାରୁସି ଇଞ୍ଜ ତା ଲାହାଙ୍ଗ୍ ରବେ ଚିଞ୍ଜେଙ୍ଗ୍ ହାଚାନ୍। ହେବେ ମାନି ୱିଜାକାର୍ ଯୀଶୁଙ୍ଗ୍ ବୁଲ୍ ଆସ୍ତେଙ୍ଗ୍ ହୁଡ଼୍ଜି ମାଚାର୍। 2 ରକାନ୍ ତା କେଇ ଆରେ ତା କାଲ୍ ପୁଲାଆତି ମାନାୟ୍ ହେବେ ମାଚାନ୍। ହେ ରଗ୍ଦାକାନିଙ୍ଗ୍ ଯୀଶୁ ହାର୍କିତାନ୍। 3 ଯୀଶୁ ପାରୁସିଦଳ୍ ଆରେ ପଣ୍ଡିତାରିଙ୍ଗ୍ ୱେନ୍ବାତାର୍, “ଜମ୍ନିଦିନ୍ ନାଞ୍ଜିଙ୍ଗ୍ ହାର୍କିନାକା ଟିକ୍ କି ବୁଲ୍?” 4 ହେୱାର୍ ଚିମ୍ରା ଆଜି ମାଚାର୍, ଲାଗିଙ୍ଗ୍ ଯୀଶୁ ହେ ମାନାୟ୍ତିଙ୍ଗ୍ ଆସ୍ପିସ୍ ହାର୍କିତାନ୍। ଆରେ ହେୱାନିଙ୍ଗ୍ ହାଞ୍ଜେଙ୍ଗ୍ ୱେଚ୍ଚାନ୍। 5 ଯୀଶୁ ପଣ୍ଡିତ୍ ଆରେ ପାରୁସିଦଳ୍ ନିକାରିଙ୍ଗ୍ ୱେଚ୍ଚାନ୍, “ଯଦି ମି ହିମ୍ଣା କି ମି ବାଡ଼୍ଦୁ ଜମ୍ନିଦିନ୍ ନାଞ୍ଜିଙ୍ଗ୍ କୁଁକଡ଼ିତ ଆର୍ତିସ୍, ଲାଗିଙ୍ଗ୍ ଏପେଙ୍ଗ୍ ସାଙ୍ଗେ-ସାଙ୍ଗେ ହାଲ୍ଜି ବାର୍ତ ହପ୍ନାଦେର୍।” 6 ଯୀଶୁ ଇନାକା ୱେନ୍ବି ମାଚାନ୍, ହେଦାଙ୍ଗ୍ ହେୱାର୍ ୱେଚ୍ଚେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ଜାର୍ତିଙ୍ଗ୍ ଗାଜା ଇଞ୍ଜି ବାବିକିମାଟ୍ 7 ଯୀଶୁ ହୁଡ଼୍ତାନ୍ ଯେ କେତ୍ଜାଣ୍ ଗତାଙ୍ଗ୍ କୁଚ୍ନି କାଜିଙ୍ଗ୍ ମୁଡ଼୍ଦି ବାହାତିଙ୍ଗ୍ ଡେକ୍ଚି କୁଚ୍ଚି ମାଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁ ହେୱାରିଙ୍ଗ୍ କାତା ୱେଚ୍ନିଲେକେ କିଜି ୱେଚ୍ଚାନ୍। 8 “ରକାନ୍ ମିଙ୍ଗେଙ୍ଗ୍ ବିବାଇଞ୍ଜ କୁକ୍ତାନାନ୍, ଲାଗିଙ୍ଗ୍ ଏପେଙ୍ଗ୍ ୱିଜୁତାଙ୍ଗ୍ ମୁଡ଼୍ଦି ବାହାତାକେ କୁଚ୍ମାଟ୍। ଇନେସ୍କି ହେ ମାନାୟ୍ ମିତାଙ୍ଗ୍ ଆଦିକ୍ ଗାଜା ଲଗାଙ୍ଗ୍ ପା କୁକ୍ଚି ମାନ୍ଗାନାନ୍। 9 ଏପେଙ୍ଗ୍ ଯଦି ୱିଜୁତାଙ୍ଗ୍ ମୁଡ଼୍ଦି ବାହାତାକେ କୁକ୍ଚି ମାନାଦେର୍, ‘ଇ ମାନାୟ୍ତିଙ୍ଗ୍ ହେ ବାହା ହିୟାଟ୍।’ ତାପାଚେ ଏପେଙ୍ଗ୍ ହେବେତାଙ୍ଗ୍ ନିଙ୍ଗ୍ଞ୍ଜି ପାଚେନି ବାହାତାକେ ହାନାଦେର୍। ହେପାଦ୍ନା ମିଙ୍ଗେଙ୍ଗ୍ ଗାଜା ଅପ୍ମାନ୍ ଲାଗାଆଦ୍ନାତ୍। 10 ଲାଗିଙ୍ଗ୍ ଏଚେପାଦ୍ନା ରକାନ୍ ମାନାୟ୍ ମିଙ୍ଗେଙ୍ଗ୍ କୁକ୍ତିତିସ୍ ଏପେଙ୍ଗ୍ ର ହିରୁ ବାହାତାକେ କୁଚାଟ୍। ହେପାଦ୍ନା ମିଙ୍ଗେଙ୍ଗ୍ କୁକ୍ତିତି ମାନାୟ୍ ୱାଜି ଇଞ୍ଜ୍ନାନ୍, ‘ସାଙ୍ଗ ଏନେଙ୍ଗ୍ ଇବେ କୁଚ୍ୱାଦାଙ୍ଗ୍ ଅଲପ୍ ଆଗେ ୱାଜି ଇ ହାର୍ଦି ବାହାତାକେ କୁଚା।’ ଏଚେପାଦ୍ନା ଜେକନି କୁକିଆତାକାର୍ ମିଙ୍ଗେଙ୍ଗ୍ ସନ୍ମାନ୍ କିଦ୍ନାର୍। 11 ଇମ୍ଣାକାନ୍ ଆନେଙ୍ଗ୍ ଗାଜାକାଙ୍ଗ୍ ଇଞ୍ଜି ବାବିକିନାନ୍, ଈଶ୍ୱର ହେୱାନିଙ୍ଗ୍ ହିରୁ କିନାନ୍। ଇମ୍ଣାକାନ୍ ଆନେଙ୍ଗ୍ ହିରୁ ଇଞ୍ଜି ବାବିକିନାନ୍, ହେୱାନିଙ୍ଗ୍ ଈଶ୍ୱର ଗାଜା କିନାନ୍।” 12 ପାଚେ ଯୀଶୁ ହେୱାନିଙ୍ଗ୍ ହିର୍ବିତି ପାରୁସିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇନେରିଙ୍ଗ୍ ୱେଡ଼ା କି ମିକାଲିଙ୍ଗ୍ ଚିଞ୍ଜେଙ୍ଗ୍ କୁକ୍ତିହିଙ୍ଗ୍ ବାଇ କୁଟୁମ୍, ଆରେ ପାଡ଼୍ହା ଇଞ୍ଜାକାର୍ ଦନି ମାନାୟାରିଙ୍ଗ୍ କୁକ୍ମାଟ୍। ଇନେସ୍କି ଆରେ ରଦିନ୍ ପା ମିଙ୍ଗେଙ୍ଗ୍ ହେୱାନ୍ ହୁଦାଙ୍ଗ୍ ଚିଞ୍ଜେଙ୍ଗ୍ କୁକ୍ତାନାନ୍, ହେପାଦ୍ନା ଏନେଙ୍ଗ୍ ପା ହିଦେଙ୍ଗ୍ ଆନାତ୍। 13 ମାତର୍ ବଜି ହିନିହିଙ୍ଗ୍ ଗରିବ୍ ମାନାୟ୍, କୁବ୍ଡ଼ାରିଙ୍ଗ୍, ଚଟାରିଙ୍ଗ୍ ଆରେ କାଣାରିଙ୍ଗ୍ କୁକାଟ୍। 14 ଇ ମାନାୟାରିଙ୍ଗ୍ ଇନାକା ହିଲ୍ୱିତିଲେ ହେୱାର୍ ନିଙ୍ଗେଙ୍ଗ୍ ଦାନ୍ହିନି ବାଦୁଲ୍ ଇନାକା ହିତ୍ଦେଙ୍ଗ୍ ଆଡ଼୍ଦୁର୍। ଲାଗିଙ୍ଗ୍ ଇଦାଙ୍ଗ୍ ମି କାଜିଙ୍ଗ୍ ଆଶ୍ରିବାଦ୍ ପାୟାଆନାଦେର୍। ମାତର୍ ଏଚେପାଦ୍ନା ଦରମ୍ ମାନାୟାର୍ ହାଃତାକାର୍ତାଙ୍ଗ୍ ଆରେରଗ ଜିବୁନ୍ ଆନାର୍, ହେପାଦ୍ନା ଏପେଙ୍ଗ୍ ମି ପୁରଷ୍କାର୍ ପାୟାଆନାଦେର୍।” ଗାଜା ବଜିନି କାତା ( ମାଥି. ୨୨:୧-୧୦ ) 15 ଯୀଶୁ ହୁଦାଙ୍ଗ୍ କୁକ୍ଚି ତିନି ମାନାୟାର୍ ବିତ୍ରେତାଙ୍ଗ୍ ରକାନ୍ ମାନାୟ୍ ଇ ୱିଜୁବେଣ୍ ୱେନ୍ଞ୍ଜି ଯୀଶୁଙ୍ଗ୍ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜିତାକେ କୁକ୍ଚି ତିନିଲକ୍ ବେସି ୱାରି ଆନାର୍।” 16 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଦିନେକ୍ ରକାନ୍ ଗାଜାକାନ୍ ମିକାଲିଙ୍ଗ୍ ବଜି କିଜି ମାଚାନ୍। ହେୱାନ୍ ବେସିହେନି ମାନାୟ୍ତିଙ୍ଗ୍ କୁକ୍ଚି ମାଚାନ୍। 17 ତିନାକା ଆତିଲେ ହେୱାନ୍ ଗତାଙ୍ଗ୍ ଲାଗାୟ୍ ଇବେଣ୍ ୱେଚ୍ଚେଙ୍ଗ୍ ଜାର୍ ହଲିଆହିଙ୍ଗ୍ ପକ୍ତାନ୍, ‘ୱାଡୁ କାଦି ରେଡି ଆତାତେ, ଚିଞ୍ଜେଙ୍ଗ୍ ୱାଡୁ।’ 18 ମାତର୍ ୱିଜାକାର୍ କୁକିଆତାକାର୍ ୱେଚ୍ଚାର୍, ହେୱାର୍ ହାଞ୍ଜେଙ୍ଗ୍ ଆଡୁର୍। ୱିଜୁ ପର୍କାର୍ କାମାୟ୍ ଚଚ୍ଚି ହାଞ୍ଜେଙ୍ଗ୍ ମୁନା କିତାର୍। ପାର୍ତୁମ୍ ନିକାନ୍ ୱେଚ୍ଚାନ୍, ‘ଆନେଙ୍ଗ୍ ର ଜମି କଡ଼୍ତାଙ୍ଗ୍ନା। ହେ ଜମିତିଙ୍ଗ୍ ହୁଡ଼୍ଦେଙ୍ଗ୍ ଆନେଙ୍ଗ୍ ନଙ୍ଗୟ୍ ହାନାକା ମାନାତ୍। ନାଙ୍ଗେଙ୍ଗ୍ ଦୟାକିଜି କେମା କିଦା।’ 19 ଆରେ ରକାନ୍ ୱେଚ୍ଚାନ୍, ‘ଆନେଙ୍ଗ୍ ନଙ୍ଗୟ୍ ପାଞ୍ଚ୍ଆଡ଼୍ ବାଡ଼୍ଦୁଙ୍ଗ୍ କଡ଼୍ତାଙ୍ଗ୍ନା। ଆନେଙ୍ଗ୍ ହେୱେକାଙ୍ଗ୍ ଚେକ୍ କିଦେଙ୍ଗ୍ ହାନାଙ୍ଗ୍। ହେଦାଙ୍ଗ୍ କାଜିଙ୍ଗ୍ ବଜିତାକେ ୱାଦେଙ୍ଗ୍ ଆଡୁଙ୍ଗ୍।’ 20 ଆରେ ରକାନ୍ ୱେଚ୍ଚାନ୍, ‘ଆନେଙ୍ଗ୍ ନଙ୍ଗୟ୍ ବିବା ଆତାଙ୍ଗ୍ନା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱାଦେଙ୍ଗ୍ ଆଡୁଙ୍ଗ୍।’ 21 ଲାଗିଙ୍ଗ୍ ହଲିଆହି ଲେଉଟା ଆଜି ୱାତାନ୍। ଇନାକା ୱିଜୁ ଗଟାଆତାତ୍ ହେ ବିଷୟରେ ତା ମାଲିକ୍ତିଙ୍ଗ୍ ୱେଚ୍ଚାନ୍। ଇୱିଜୁ ମାଲିକ୍ ୱେନ୍ଞ୍ଜି ବେସି ରିସା ରିସାଆଜି, ଜାର୍ ହଲିଆହିରିଙ୍ଗ୍ ୱେଚ୍ଚାନ୍, ‘ବେଗି ହାଲ୍ଜି ସହର୍ ହାଜିତାଙ୍ଗ୍ ଗରିବ୍ରିଙ୍ଗ୍, କୁବ୍ଡ଼ାରିଙ୍ଗ୍, କାଣାରିଙ୍ଗ୍ ଆରେ ଚଟାରିଙ୍ଗ୍ ଇବେ କୁକ୍ଚି ତାସିୱାଡ।’ 22 ପାଚେ ହଲିଆହି ୱେଚ୍ଚାନ୍, ‘ଏ ମାଲିକ୍, ଏନେଙ୍ଗ୍ ଇନାକା ୱେଚ୍ଚାତାଇ ହେଦାଙ୍ଗ୍ ଆନେଙ୍ଗ୍ କିତାଙ୍ଗ୍ନା। ଆତିସ୍ପା ଆରେ ଆଦିକ୍ ମାନାୟାର୍ କାଜିଙ୍ଗ୍ ବାହା ଉବ୍ରା ଆତାତ୍ନା।’ 23 ହେବେତାଙ୍ଗ୍ ମାଲିକ୍ ହଲିଆହିଙ୍ଗ୍ ୱେଚ୍ଚାନ୍, ‘ରାଜାର୍ ହାକ୍ଡ଼ି ଆରେ ନାସ୍ ହାକ୍ଡ଼ିକାଙ୍ଗ୍ ହାଲାଟ୍ ହେବେ ମାନି ମାନାୟାରିଙ୍ଗ୍ ୱାଦେଙ୍ଗ୍ ୱେଚାଟ୍। ଇନେସ୍କି ନା ଇଲ୍ ବାର୍ତି ଆୟେତ୍।’ 24 ଅନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ଇମ୍ଣାକାରିଙ୍ଗ୍ ଆନେଙ୍ଗ୍ ପାର୍ତୁମ୍ କୁକ୍ଚି ମାଚାଙ୍ଗ୍, ହେୱାର୍ ବିତ୍ରେତାଙ୍ଗ୍ ରକାନ୍ ପା ନା ହୁଦାଙ୍ଗ୍ ଇନାୱେଡ଼ାଙ୍ଗ୍ ପା ବଜି ତିନୁର୍।’ ” ଯୀଶୁ ଚେଲା ଆଦେଙ୍ଗ୍ କଷ୍ଟ ( ମାଥି. ୧୦:୩୭-୩୮ ) 25 ଦିନେକ୍ ବେସିହେନି ମାନାୟ୍ ଯୀଶୁ ହୁଦାଙ୍ଗ୍ ହାଲ୍ଜି ମାଚାର୍। ହେୱାନ୍ ବୁଲାଆଜି ହେୱାରିଙ୍ଗ୍ ୱେଚ୍ଚାନ୍, 26 “ଯଦି ରକାନ୍ ନା ଲାଗାୟ୍ ୱାନାନ୍, ମାତର୍ ନାବେତାଙ୍ଗ୍ ଲାତ୍ରାହି, ତାଞ୍ଜିୟା, ଡକ୍ରୁହି, ହିମ୍ଣା, ଟଣ୍ଡାର୍ ତଣ୍ଦେଲିଙ୍ଗ୍, ଆରେ ତା ଜାର୍ ଜିବୁନ୍ତିଙ୍ଗ୍ ଆଦିକ୍ ଲାଡ୍ କିନାନ୍, ଲାଗିଙ୍ଗ୍ ହେୱାନ୍ ନା ଚେଲା ଆଦେଙ୍ଗ୍ ଆଡୁନ୍। ରକାନ୍ ତା ଜାର୍ତିଙ୍ଗ୍ ନାଙ୍ଗେଙ୍ଗ୍ ଆଦିକ୍ ଲାଡ୍ କିତ୍ଦେଙ୍ଗ୍ ଆନାତ୍। 27 ରକାନ୍ ନା ଦୁକ୍କଷ୍ଟ ପାୟାଆଜି କୃଶକାଟ୍ ପିଣ୍ଜି ନା ପାଚେ ୱାୱିତିସ୍, ହେୱାନ୍ ନା ଚେଲା ଆଦେଙ୍ଗ୍ ଆଡୁନ୍। 28 ଏପେଙ୍ଗ୍ ର ବିଲ୍ଡିଙ୍ଗ୍ ରହ୍ନାଙ୍ଗ୍ ଇଞ୍ଜି ଇଚାକିନାର୍, ଲାଗିଙ୍ଗ୍ ପାର୍ତୁମ୍ ଏପେଙ୍ଗ୍ ଚିନ୍ତା କିଦେଙ୍ଗ୍ ଆନାତ୍, ଇ ଇଲ୍ କାଜିଙ୍ଗ୍ ଏଚେକ୍ ଡାବୁଙ୍ଗ୍ ଖର୍ଚ ଆଦ୍ନିକ୍। ଏପେଙ୍ଗ୍ ଇସାବ୍ କିଜି ହୁଡ଼୍ନିକାତା, କାମାୟ୍ ୱିଜୁ ୱିଜ୍ନି ପାତେକ୍ ମି ଲାଗାୟ୍ ସମାନ୍ ଆନି ଡାବୁଙ୍ଗ୍ ମାନିକ୍ କି ଆକାୟ୍। 29 ହେଦାଙ୍ଗ୍ ଆୱିତିସ୍ ଏପେଙ୍ଗ୍ ପାଉଣ୍ଡେସେନ୍ କିଜି କାମାୟ୍ ଆରମ୍ କିନାଦେର୍, ମାତର୍ ୱିସ୍ତେଙ୍ଗ୍ ଆଡୁଦେର୍, ଯଦି ଏପେଙ୍ଗ୍ ହେ ଇଲ୍ଦିଙ୍ଗ୍ ୱିସ୍ତେଙ୍ଗ୍ ଆଡୁଦେର୍। ଲାଗିଙ୍ଗ୍ ଇଦାଙ୍ଗ୍ତିଙ୍ଗ୍ ହୁଡ଼୍ତି ମାନାୟ୍ ମିଙ୍ଗେଙ୍ଗ୍ ଗାଇଦାନାର୍। 30 ହେୱାର୍ ଇଞ୍ଜ୍ନାର୍, ‘ଇୱାନ୍ ବିଲ୍ଡିଙ୍ଗ୍ ଇଲ୍ ରସ୍ତେଙ୍ଗ୍ ଆରମ୍ କିତାନ୍, ମାତର୍ ୱିସ୍ତେଙ୍ଗ୍ ଆଡ୍ୱାତାନ୍।’ 31 ରକାନ୍ ରାଜା ଜେକନି ରାଜା ହୁଦାଙ୍ଗ୍ ଯୁଦ୍ କିଦେଙ୍ଗ୍ ହାନିହିଙ୍ଗ୍, ହେୱାନ୍ ପାର୍ତୁମ୍ କୁକ୍ଚି ଉପାୟ୍ କିନାକା ମାନାତ୍। ଯଦି ହେ ରାଜା ସେନାହିର୍ ଦସ୍ ହାଜାର୍ ମାନ୍ଗାନାର୍, ଲାଗିଙ୍ଗ୍ ହେୱାନ୍ କୁଡ଼େ ହାଜାର୍ ସେନାରିଙ୍ଗ୍ ଆସ୍ତି ୱାନି ରାଜାଙ୍ଗ୍ ଆରାୟ୍ କିଦେଙ୍ଗ୍ ଆଡୁର୍। 32 ଯଦି ହେୱାନ୍ ଜେକନି ରାଜାଙ୍ଗ୍ ଆରାଇ କିଦେଙ୍ଗ୍ ଆଡୁନ୍, ଲାଗିଙ୍ଗ୍ ହେ ବିରୁଦ୍ କିତି ରାଜା ବେସି ଦେହା ମାନିହିଙ୍ଗ୍ ନେ ର ହଲିଆଙ୍ଗ୍ ପକ୍ଚି ୱେଚ୍ନାନ୍, ଆସେଙ୍ଗ୍ ଜୁଜ୍ କିଉସ୍ ଶାନ୍ତିତାଙ୍ଗ୍ ମାନାସ୍। 33 ହେଲେକେ ଏପେଙ୍ଗ୍ ପାର୍ତୁମ୍ ଉପାୟ୍ କିନାଦେର୍। ଏପେଙ୍ଗ୍ ନା ପାଚେ ୱାଜି ନା ଚେଲା ଆଦେଙ୍ଗ୍ ମାନ୍କିତିସ୍ ମି ୱିଜୁ ବିଷୟ ପିହ୍ନାଦେର୍। ଏପେଙ୍ଗ୍ ଯଦି ଏଲେଙ୍ଗ୍ କିଦେଙ୍ଗ୍ ଆଡୁଦେର୍, ଲାଗିଙ୍ଗ୍ ନା ଚେଲା ଆଦେଙ୍ଗ୍ ଆଡୁଦେର୍। ହୱାଦ୍ ହିଲ୍ୱି ହର୍ ( ମାଥି. ୫:୧୩ ; ମାର୍କ. ୯:୫୦ ) 34 ହର୍ ଇନେସ୍ ଲେକେ କାଦିତିଙ୍ଗ୍ ହାର୍, ହେଲେକେନେ ମାନାୟାରିଙ୍ଗ୍ ଦୁଃକ୍ ପାୟଆନାକା ହାର୍। ଇନେସ୍କି ହର୍ତାକେ ହୱାଦ୍ ହିଲ୍ଗୁତ୍, ଲାଗିଙ୍ଗ୍ ତା ହୱାଦ୍ ଇନେସ୍ କିଜି ତାସିୱାନାତ୍। ଇନାୱେଡ଼ାଙ୍ଗ୍ ମିବେ ହର୍ନି ଗୁଣ୍ ମାନାତ୍, ଏପେଙ୍ଗ୍ ଜାର୍-ଜାର୍ ହୁଦାଙ୍ଗ୍ ଶାନ୍ତିତାଙ୍ଗ୍ ମାନାଟ୍। 35 ଇ ହର୍ତିଙ୍ଗ୍ ଏପେଙ୍ଗ୍ ଚିକ୍ଲା କାଜିଙ୍ଗ୍ କି ଗାତ୍ କାଜିଙ୍ଗ୍ ପା ବାଉରା ଆଦେଙ୍ଗ୍ ଆଡୁଦେର୍। ମାନାୟାର୍ ହେଦାଙ୍ଗ୍ତିଙ୍ଗ୍ ତୁସିହିନାର୍। ‘ଇମ୍ଣାକାର୍ ଇବେଣ୍ ୱେଚାଦେର୍ ଇ ବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।’ ” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation