ଜିହୁଦା 1 - New Testament in Pengo Parja Languageଜୱାର୍ 1 ଆନେଙ୍ଗ୍ ଯିହୁଦା ଯୀଶୁ ଖ୍ରୀଷ୍ଟତି ରକାନ୍ ଚେଲାହିତଙ୍ଗ୍ ଆରେ ଯାକୁବନି ହିରୁ ଟଣ୍ଡାହିତଙ୍ଗ୍। ଈଶ୍ୱରତାକେ ପାର୍ତିକିନି କାଜିଙ୍ଗ୍ ଇମ୍ଣାକାରିଙ୍ଗ୍ ହେୱାନ୍ କୁକ୍ତାନ୍ନା, ହେୱାର୍ ଲାଗାୟ୍ ଇ ଚିଟି ଲେକିକିନାଙ୍ଗା। ଆବା ଈଶ୍ୱର ମିଙ୍ଗେଙ୍ଗ୍ ଲାଡ୍ କିଦ୍ନାନ୍ ଆରେ ଯୀଶୁ ଖ୍ରୀଷ୍ଟତାକେ ମିଙ୍ଗେଙ୍ଗ୍ ହାର୍ଦାଙ୍ଗ୍ ଇଡ଼୍ଜି ମାଞ୍ଜ୍ନାନ୍। 2 ଆନେଙ୍ଗ୍ ମି କାଜିଙ୍ଗ୍ ପାର୍ତାନା କିନାଙ୍ଗା ଈଶ୍ୱର ମିଙ୍ଗେଙ୍ଗ୍ ଦୟା, ଶାନ୍ତି ଆରେ ଲାଡ୍ ବେସି ହିଦେନ୍। ଈଶ୍ୱର ହାତ୍ପା କରାପ୍ ମାନାୟାରିଙ୍ଗ୍ ଦଣ୍ଡ୍ ହିନାନ୍ 3 ନା ଲାଡ୍ନି ସାଙ୍ଗ କାଦେର୍, ଈଶ୍ୱର କିତ୍ତି ଉଦାର୍ ଆସେଙ୍ଗ୍ ଇମ୍ଣାକା ପାୟାଆତାସ୍ନା, ହେ ବିଷୟରେ ଆନେଙ୍ଗ୍ ମି ଲାଗାୟ୍ ଲେକିକିଦେଙ୍ଗ୍ ବେସି ଇଚା କିତାଙ୍ଗ୍। ଆରେ ଆସେଙ୍ଗ୍ ପାର୍ତିକିନି ସତ୍ ହିକ୍ଷା ନିପଣ୍, ଇନେସ୍ ଏପେଙ୍ଗ୍ ଜୁଜ୍ କିଦେଙ୍ଗ୍ ଆଡ୍ନାଦେର୍, ଇଦାଙ୍ଗ୍ କାଜିଙ୍ଗ୍ ମିଙ୍ଗେଙ୍ଗ୍ ସାସ୍ କିଦ୍ନି କାଜିଙ୍ଗ୍ ଇଦାଙ୍ଗ୍ ଆନେଙ୍ଗ୍ ଲେକିକିଦେଙ୍ଗ୍ ବାଦ୍ୟ ଆତାଙ୍ଗ୍। ଈଶ୍ୱର ତା ପବିତ୍ର ମାନାୟାରିଙ୍ଗ୍ ଇ ସତ୍ ୱିଜୁଦିନ୍ କାଜିଙ୍ଗ୍ ରଗ ହିତାନ୍ନା ଆରେ ଇଦାଙ୍ଗ୍ ବାଦ୍ଲା ଆଉତ୍। 4 ଈଶ୍ୱରତିଙ୍ଗ୍ ମାନିକିୱି ବୁଲ୍ ହିକ୍ଷାହିନି ମାଷ୍ଟେରାର୍ ଆସେଙ୍ଗ୍ ପୁନ୍ୱାଦାଙ୍ଗ୍ କେତେକ୍ ମା ବିତ୍ରେ ହଟାର୍ନା। ଇ ମାନାୟାର୍ ବିଷୟରେ ଈଶ୍ୱର ବେସି ବାହ୍ରୁ ଆଗେ ସାସ୍ତର୍ତାକେ ୱେଚ୍ଚାନ୍ନା ଯେ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। ହେୱାର୍ କରାପ୍ କାମାୟ୍ କିଜି ଜାର୍ତିଙ୍ଗ୍ ରକ୍ଷା କିନି କାଜିଙ୍ଗ୍, ହେୱାର୍ ମା ଈଶ୍ୱର ଦୟାନି କାତାତିଙ୍ଗ୍ ବିଗ୍ଡ଼ାୟ୍ କିତାର୍ନା। ମା ରକାନ୍ ଇଞ୍ଜି ମାଷ୍ଟେର୍ ଆରେ ମାପୃ ଯୀଶୁ ଖ୍ରୀଷ୍ଟଙ୍ଗ୍ ଆହୁର୍। 5 ଏପେଙ୍ଗ୍ ୱିଜୁ ବିଷୟ ପୁରାପୁରି ପୁନ୍ଞ୍ଜି ମାଚିସ୍ ପା, ଆନେଙ୍ଗ୍ ମିଙ୍ଗେଙ୍ଗ୍ ଏତୁକିୟି କିଦେଙ୍ଗ୍ ଇଚା କିନାଙ୍ଗା ଯେ, ମାପୃ ଇସ୍ରାଏଲନି ମାନାୟାରିଙ୍ଗ୍ ମିସର୍ ଦେସ୍ନି ଦାସ୍ କାମାୟ୍ତାଙ୍ଗ୍ ଉଦାର୍ କିତାନ୍। ମାତର୍ ଇମ୍ଣାକାର୍ ଟାଙ୍ଗ୍ରାବାହାତାକେ ହେୱାନିଙ୍ଗ୍ ପାର୍ତି କିୱାତାର୍, ପାଚେ ହେୱାରିଙ୍ଗ୍ ହେୱାନ୍ ନଷ୍ଟ କିତାନ୍। 6 ଆରେ ଈଶ୍ୱର ହିଜିମାଚି ପାଦ୍ତାଙ୍ଗ୍ ଇମ୍ଣି ଦୁତ୍କୁ ୱାରିଆଜି ମାନ୍ୱାଦାଙ୍ଗ୍, ହେୱାର୍ ମାନି ଇଲ୍ ସରଗ୍ତାକେ ପିସ୍ତାର୍ନା, ହେୱାର୍ ବିଷୟରେ ଏପେଙ୍ଗ୍ ବାବିକିଜି ହୁଡ଼ାଟ୍। ଈଶ୍ୱର ହେୱାରିଙ୍ଗ୍ ମାଜ୍ଗା ବାହାତାକେ ୱିଜୁଦିନ୍ କାଜିଙ୍ଗ୍ ହେୱାରିଙ୍ଗ୍ ଗାଜା ବିଚାର୍କିନି ଦିନ୍ତ ୱିଜ୍ୱି ଦଣ୍ଡ୍ ହିନି କାଜିଙ୍ଗ୍ ହେୱାରିଙ୍ଗ୍ ହିକ୍ଡ଼ିଙ୍ଗ୍ତାଙ୍ଗ୍ ଗାଚ୍ଚି ଇଡ଼୍ତାନ୍ନା। 7 ହେଲେକେ ସଦୋମ ଆରେ ଗମୋରା ସହର୍ ଆରେ ହେ ଲାଗାୟ୍ନି ସହର୍କୁ ବିଷୟରେ ବାବିକିଜି ହୁଡ଼ାଟ୍, ହେ ସହର୍ନି ମାନାୟାର୍ ଦାରି ଆରେ ଅପ୍ମାନ୍ ଲେକେ ବେସି କରାପ୍ କାମାୟ୍ କିଜି ମାଚାର୍। ଲାଗିଙ୍ଗ୍ ଈଶ୍ୱର ହେ ମାନାୟାରିଙ୍ଗ୍ ନାଣି ହୁଦାଙ୍ଗ୍ ନଷ୍ଟ କିତାନ୍। କରାପ୍ ମାନାୟାର୍ କାଜିଙ୍ଗ୍ ଇଦାଙ୍ଗ୍ ରଞ୍ଜାଙ୍ଗ୍ ଜାଗ୍ରତ୍ନି ବେଣ୍ ଯେ ହେୱାର୍ ପା ୱିଜୁଦିନ୍ କାଚାଆନି ନାଣିତାକେ ଦଣ୍ଡ୍ ପାୟାଆନାର୍। 8 ଇ ୱିଜୁ ବିଷୟରେ ଇ ବୁଲ୍ ହିକ୍ଷାହିନି ମାଷ୍ଟେରାର୍ ପୁଚିସ୍ ପା, ହେୱାର୍ ଦାରି କାମାୟ୍ ଲେକ କରାପ୍ କାମାୟ୍ କିଜି ଜାର୍ ଗାଗାଡ଼୍ତିଙ୍ଗ୍ କରାପ୍ କିଦେଙ୍ଗ୍। ହେୱାର୍ ଜପି ଇନେର୍ ଆଦିକାର୍ ହିଲ୍ୱି କାଜିଙ୍ଗ୍, ଆରେ ଗୌରବନି ଦୁତ୍କୁ ବିଷୟରେ ନିନ୍ଦା କାତା ୱେଚ୍ନି କାଜିଙ୍ଗ୍ ଈଶ୍ୱର କେଚ୍କଣ୍ତାକେ ୱେଚ୍ଚାତାନ୍ନା ଇଞ୍ଜି ୱେଚ୍ନାର୍। 9 ଈଶ୍ୱରତି ମୁଡ଼୍ ଦୁତ୍ ମୀଖାୟେଲ ଇ ବୁଲ୍ ହିକ୍ଷାହିନି ମାଷ୍ଟେରାର୍ତାଙ୍ଗ୍ ଗାଜାକାନ୍ ଆତିସ୍ପା, ଇୱାର୍ ଲେକେ ବ୍ଯବହାର୍ କିୱାଦାଙ୍ଗ୍ ମାଚାନ୍। ଏଚେପାଦ୍ନା ମୋଶା ଭବିଷ୍ୟତବକ୍ତା ହାଃତି ଗାଗାଡ଼୍ ବିଷୟରେ ଶୟତାନ ମୀଖାୟେଲ ହୁଦାଙ୍ଗ୍ ଜୁକ୍ତି କିବାଆଜି ମାଚାର୍। ମୀଖାୟେଲ ଶୟତାନତିଙ୍ଗ୍ ନିନ୍ଦା କାତା ୱେଚ୍ଚି ଦସି କିୱାଦାଙ୍ଗ୍ ମାଚାନ୍, ହେୱାନ୍ ଶୟତାନତିଙ୍ଗ୍ ଏଚେକ୍ ୱେଚ୍ଚାନ୍ ଯେ, “ମାପୃ ନିଙ୍ଗେଙ୍ଗ୍ ଦମକ୍ ହିଦେନ୍।” 10 ଇ ମାନାୟାର୍ ଇନାକା ବୁଜା ଆଦେଙ୍ଗ୍ ଆଡୁର୍, ହେ ବିଷୟତିଙ୍ଗ୍ ହେୱାର୍ ବିରଦ୍ କିଜି ନିନ୍ଦା କିନାର୍। ଆରେ ମୁର୍କ ପଶୁର୍ ଲେକେ, ହେୱାର୍ ଇନାକା ବୁଜା ଆନାର୍ ହେଦାଙ୍ଗ୍ ହେୱାର୍ କିନାର୍। ଇଲେକେ ପାପ୍ କାମାୟ୍ କିଜି ନିଜେ ନିଜେତିଙ୍ଗ୍ ନଷ୍ଟ କିନାରା। 11 ସତ୍ରେ ହେୱାର୍ ଆଦମ ହିମ୍ଣା କୟିନ ଲେକେ କରାପ୍ ବ୍ୟବହାର୍ କିନାର୍। ଡାବୁଙ୍ଗ୍ କମାୟ୍ କିଦେଙ୍ଗ୍ ଭବିଷ୍ୟତବକ୍ତା ବିଲିୟମ ଇନେସ୍ ମାନାୟାରିଙ୍ଗ୍ ପାପ୍ କାମାୟ୍ କିନି ହାଜ୍ଦିଙ୍ଗ୍ ଅସାହାଲ୍ଜି ମାଚାନ୍, ହେୱାର୍ ପା ହେଲେକେ ବୁଲ୍ ବେଗି କିନାର୍। ମୋଶାଙ୍ଗ୍ ବିରଦ୍ କିଜି ଇନେସ୍ କୋରହ ନଷ୍ଟ ଆଜି ମାଚାନ୍, ହେଲେକେ ଇ ମାନାୟାର୍ ପା ନଷ୍ଟ ଆନାର୍, ଇନେସ୍କି ହେୱାର୍ ମାପୃଙ୍ଗ୍ ବିରଦ୍ କିନାରା। 12 ମାପୃ ଲାଡ୍ତିଙ୍ଗ୍ ମାନ୍ତ ଏତୁକିନି ଲାଡ୍ନି ବଜିତାକେ ଏଚେପାଦ୍ନା ହେୱାର୍ ମିହୁଦାଙ୍ଗ୍ ତିନାର୍, ହେପାଦ୍ନା ଡଙ୍ଗାତିଙ୍ଗ୍ ମୁଚ୍ନି କାଜିଙ୍ଗ୍ ହାମ୍ଦୁର୍ ତାରେନ୍ ଡ଼ୁଗ୍ଜିମାଚି କାଲ୍ଲେକେ ହେୱାର୍ ବୟଙ୍କାର୍ ମାନାୟ୍। ହେୱାର୍ ଲାଜ୍ ହିଲ୍ୱି ମାନାୟ୍ ଲେକେ ଜାର୍-ଜାର୍ କାଜିଙ୍ଗ୍ ନେ ଚିନ୍ତା କିନାର୍। ହେୱାର୍ ମେଦ୍ନିତାକେ ବାହ୍ରା ୱାୱି ବାଦାଡ଼୍ ଲେକେ। କାଟା ବେଟାକିନି ସମୟ୍ନି ମାର୍କୁ ଲେକେ ହେୱାର୍ ପୁରାପୁରି ହାଃତାର୍ନା, ଇନେସ୍କି ହେୱାର୍ ପାଡ଼୍ ଆହୁର୍ ଆରେ ଦଲ୍ଦାଙ୍ଗ୍ ଜେଲି ଆତାର୍ନା। 13 ହାମ୍ଦୁର୍ନି ଗାଜା ଲଉଡ଼ି ଇନେସ୍ କରାପ୍ ପେପୁଲ୍ ରହ୍ନାତ୍, ହେଲେକେ ଇ ମାନାୟାର୍ ଲାଜାଆନି ବିଷୟ ୱିଜୁ କିନାର୍। କେତେକ୍ ହୁକାଙ୍ଗ୍ ଇନେସ୍ ହାଣ୍କୁ ହାଜ୍ଦିଙ୍ଗ୍ ହାଲୁକ୍, ହେଲେକେ ହେୱାର୍ ହାର୍ଦି ହାଜ୍ଦିଙ୍ଗ୍ ହାଲୁର୍। ମାପୃ ହେୱାର୍ କାଜିଙ୍ଗ୍ ରଞ୍ଜାଙ୍ଗ୍ ପୁରାପୁରି ମାଜ୍ଗା ବାହା ଇଡ଼୍ତାନ୍ନା ଆରେ ହେୱାର୍ ହେ ବାହାତାକେ ୱିଜୁଦିନ୍ କାଜିଙ୍ଗ୍ ମାନ୍ଗାନାର୍। 14 ଆଦମତାଙ୍ଗ୍ ସାତ୍ କୁଟୁମ୍ ଜନମ୍ ଆତି ପାଚେ ହନୋକ ଜନମ୍ ଆଜି ମାଚାନ୍। ହେୱାନ୍ ଇ ମାନାୟାର୍ ବିଷୟରେ ଈଶ୍ୱର କାତା ୱେନ୍ଞ୍ଜି ଶୁଣାୟ୍ କିଜି ୱେଚ୍ଚାନ୍। 15 “ହୁଡ଼ାଟ୍, ମାପୃ ୱିଜାକାରିଙ୍ଗ୍ ବିଚାର୍କିନି କାଜିଙ୍ଗ୍, ଆରେ ଅଦରମ୍ ୱିଜାକାର୍ ମାନାୟ୍ ଜାର୍-ଜାର୍ ଅଦରମ୍ତାଙ୍ଗ୍ ଇମ୍ଣି ୱିଜୁ ଅଦରମ୍ କାମାୟ୍ କିତାଦେର୍ନା ଆରେ ଅଦରମ୍ ପାପି ମାନାୟାର୍ ତା ବିରଦ୍ତାକେ ଇମ୍ଣି ୱିଜୁ କୁଟ୍ କାତା ୱେଚ୍ଚାର୍ନା। ହେ ୱିଜୁ ବିଷୟରେ ହେୱାରିଙ୍ଗ୍ ଦସି କିଜି ଦଣ୍ଡ୍ ହିନି କାଜିଙ୍ଗ୍ ହାଜାର୍-ହାଜାର୍ ସାଦୁ ମାନାୟାର୍ ହୁଦାଙ୍ଗ୍ ୱାନାନା।” 16 ଇ ଅସାଦୁ ମାନାୟାରିଙ୍ଗ୍ ଗିଟାଆନି ବିଷୟ କାଜିଙ୍ଗ୍ ଈଶ୍ୱରତିଙ୍ଗ୍ ବିରଦ୍ କିଜି ବେଣ୍ ଇନାର୍, ଆରେ ହେୱାର୍ ମାନ୍ ଇଚାରେ କରାପ୍ କାମାୟ୍ କିନାର୍। ହେୱାର୍ ଜାର୍ ବିଷୟରେ ଗାଜା-ଗାଜା ବେଣ୍ ୱେଚ୍ନାର୍, ଆରେ ଜେକନିକାର୍ତାଙ୍ଗ୍ ହେୱାର୍ ଇଚ୍କେ ଇନାକା ପାୟାଆନି କାଜିଙ୍ଗ୍ ହାର୍ଦି ବେଣ୍ ୱେଚ୍ନାର୍। ପାର୍ତିତାକେ ତିର୍ଆଜି ମାନାଟ୍ 17 ମାତର୍ ଏ ନା ଲାଡ୍ନି ସାଙ୍ଗ କାଦେର୍, ମା ମାପୃ ଯୀଶୁ ଖ୍ରୀଷ୍ଟତି ବାଚିକିତି ଚେଲା କାଦେର୍ ଆଗେ ଇମ୍ଣି ୱିଜୁବେଣ୍ ୱେଚ୍ଚି ମାଚାର୍, ହେ ୱିଜୁବେଣ୍ ମାନ୍ତ ଏତୁକିୟାଟ୍। 18 ବାଚିକିତି ଚେଲାର୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାର୍ ଯେ, ମା ମାପୃ ଯୀଶୁ ଖ୍ରୀଷ୍ଟ ଆରେରଗ ପୁର୍ତିତାକେ ୱାନି ଆଗେ, ମାନାୟାର୍ ମାପୃ ଆରେ ତା ମାନାୟାରିଙ୍ଗ୍ ନିନ୍ଦା କିନାର୍। ଇ ମାନାୟାର୍ କରାପ୍ ଇଚାରେ ଜିବୁନ୍ କାଟିକିନାର୍। 19 ଇ ମାନାୟାର୍ ମି ବିତ୍ରେ ବାଗ୍-ବାଗ୍ କିନାର୍। ହେୱାର୍ ତା ମାନ୍ ଇଚାରେ ଜିବୁନ୍ କାଟିକିନାର୍, ଇନେସ୍କି ହେୱାର୍ ବିତ୍ରେ ଈଶ୍ୱର ଆତ୍ମା ହିଲୁତ୍। 20 ମାତର୍ ଏ ନା ଲାଡ୍ନି ସାଙ୍ଗ କାଦେର୍, ମି ପବିତ୍ର ପାର୍ତିନି ପାଣ୍ଡୁସେନ୍ ଜପି ମି ଜିବୁନ୍ତିଙ୍ଗ୍ ରସ୍ତି ମାନାଟ୍। ଆରେ ଏପେଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ପାର୍ତାନା କିୟାଟ୍। 21 ମା ମାପୃ ଯୀଶୁ ଖ୍ରୀଷ୍ଟ ତା ଦୟାତାଙ୍ଗ୍ ୱିଜ୍ୱି ଜିବୁନ୍ ହିଦ୍ନାନ୍ ଇଞ୍ଜି ଏପେଙ୍ଗ୍ କାତାଦେର୍ନା, ହେଦାଙ୍ଗ୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଲାଡ୍ କିତ୍ତାନ୍ନା ଇଞ୍ଜି ପୁନ୍ଞ୍ଜି, ଏପେଙ୍ଗ୍ ହାର୍ଦାଙ୍ଗ୍ ଜିବୁନ୍ କାଟିକିୟାଟ୍। 22 ଇମ୍ଣାକାର୍ ପାର୍ତିତାକେ ତିର୍ ଆକାୟ୍ ହେୱାରିଙ୍ଗ୍ ଦୟା କିୟାଟ୍। 23 ଜେକନିକାରିଙ୍ଗ୍ ନାଣିନି ଦଣ୍ଡ୍ତାଙ୍ଗ୍ ହେଦାପ୍ରେ ଉନ୍ନ୍ଦି ଅତିଲେକେ ଉଦାର୍ କିୟାଟ୍। ଇଲେକେ କେତେକ୍ ମାନାୟ୍ ମାନାର୍, ହେୱାରିଙ୍ଗ୍ ଏପେଙ୍ଗ୍ ଦୟାକିନି ଦର୍କାର୍, ମାତର୍ ହେୱାର୍ତାଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍। ହେୱାର୍ ପାପ୍ନି କାମାୟ୍ ତା ହେନ୍ଦ୍ରାତିଙ୍ଗ୍ ତୁକେର୍ କିତାତ୍ନା, ଏପେଙ୍ଗ୍ ହେ ପାପ୍ନି ହେନ୍ଦ୍ରାତିଙ୍ଗ୍ ଗିଣ୍ କିୟାଟ୍। 24-25 ଈଶ୍ୱର ନେ ମିଙ୍ଗେଙ୍ଗ୍ ଉଜ୍ଦି ଗୁର୍ନିତାଙ୍ଗ୍ ଉଦାର୍ କିଦ୍ଦେଙ୍ଗ୍ ଆଡ୍ନାନ୍। ଆରେ ତା ଗୌରବନି ମୁମ୍ଦ ନିଲି କିଦ୍ଦେଙ୍ଗ୍ ଏଚେପାଦ୍ନା ହେୱାନ୍ ମିଙ୍ଗେଙ୍ଗ୍ ତାସିୱାଦ୍ନାନ୍, ହେପାଦ୍ନା ହେୱାନ୍ ମିଙ୍ଗେଙ୍ଗ୍ ପାପ୍ନି ଦସ୍ ହିଲ୍ୱି ମାନାୟ୍ ଲେକେ ଆରେ ୱାରି ହିଦ୍ଦେଙ୍ଗ୍ ଆଡ଼୍ଦାନାନ୍। ମା ମାପୃ ଯୀଶୁ ଖ୍ରୀଷ୍ଟ କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଉଦାର୍ କିତ୍ତାନ୍ନା। ଉବ୍ଜାଣ୍ ଆତି ଆରମ୍ତାଙ୍ଗ୍ ଗୌରବ, ଜୟ୍-ଜୟ୍ କିନାକା, ଶାକ୍ତି ଆରେ ଆଦିକାର୍ ହେୱାନ୍ତି, ଆରେ ନଙ୍ଗୟ୍ ପା ହେୱାନ୍ତି, ଆରେ ୱିଜ୍ୱିଦିନ୍ କାଜିଙ୍ଗ୍ ହେୱାନ୍ତି ମାନ୍ଗାନାତ୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation