ଜହନ୍ 9 - New Testament in Pengo Parja Languageଯୀଶୁ ଜନମ୍ତାଙ୍ଗ୍ କାଣା ମାନାୟ୍ତିଙ୍ଗ୍ ହାର୍କିତାନ୍ 1 ଯୀଶୁ ତା ଚେଲାହିର୍ ହୁଦାଙ୍ଗ୍ ହାନିହିଙ୍ଗ୍ ରକାନ୍ କାଣା ମାନାୟ୍ତିଙ୍ଗ୍ ହୁଡ଼୍ତାନ୍। ହେୱାନ୍ ଜନମ୍ ଦିନ୍ତାଙ୍ଗ୍ କାଣା ମାଚାନ୍। 2 ଯୀଶୁ ଚେଲାହିର୍ ହେୱାନିଙ୍ଗ୍ ୱେନ୍ବାତାର୍, “ଏ ଗୁରୁ, ଇନେର୍ କିତି ପାପ୍ କାମାୟ୍ତାଙ୍ଗ୍ କାଣା ଆଜି ଜନମ୍ ଆତାନ୍? ଇଦାଙ୍ଗ୍ ତା ପାପ୍ କି ତେହି ଲାତ୍ରାହି କିତି ପାପ୍?” 3 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇଦାଙ୍ଗ୍ ତା ପାପ୍ କି ତେହି ଲାତ୍ରାହି ପାପ୍ କାମାୟ୍ତାଙ୍ଗ୍ କାଣା ଆୱାତାନ୍ନା। ଇୱାନ୍ କାଣା ଆଜି ଜନମ୍ ଆତାନ୍ନା, ଇନେସ୍କି ଈଶ୍ୱର ସାକ୍ତି ଇୱାନ୍ତାଙ୍ଗ୍ ଚଚିୟାଆୟେତ୍ ଇଞ୍ଜି ହେୱାନ୍ ନେଞ୍ଜେଙ୍ଗ୍ କାଣା ଆଜି ଜନମ୍ ଆତାନ୍। 4 ମାଙ୍ଗେଙ୍ଗ୍ ପକ୍ତାତାକାନ୍ ଆବା ଈଶ୍ୱର ଇମ୍ଣି କାମାୟ୍ କିଦେଙ୍ଗ୍ ହିତ୍ତାନ୍ନା ହେଦାଙ୍ଗ୍ତିଙ୍ଗ୍ ଆସେଙ୍ଗ୍ ବେଗି-ବେଗି ପୁରା କିନାକା ମାନାତ୍। ଇନେସ୍କି ଇନେର୍ ପା କାମାୟ୍ କିଦେଙ୍ଗ୍ ଆଡୁର୍ ହେଲେକେ ମାଜ୍ଗା ୱାନାତା। 5 ଆନେଙ୍ଗ୍ ପୁର୍ତିତାକେ ମାନି ପାତେକ୍ ପୁର୍ତି କାଜିଙ୍ଗ୍ ଅଜଡ଼୍ ଆରେ ୱିଜାକାରିଙ୍ଗ୍ ଅଜଡ଼୍ ହିଜି ମାନାଙ୍ଗ୍।” 6 ଯୀଶୁ ଇବେଣ୍ ୱେଚ୍ଚି ପାଚେ ମେଦ୍ନିତ ଏଉଡ଼ିଙ୍ଗ୍ ଚୁବ୍ଜି କାଦକିଜି, ହେ କାଦତିଙ୍ଗ୍ ଅଜି ହେୱାନ୍ ହେ କାଣାମାନାୟ୍ କାଣ୍କୁକାଙ୍ଗ୍ କାସ୍ତାନ୍। 7 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ହାଲା, ଶିଲୋହ ବାନ୍ଦ୍ତାକେ ନୁଜିଆ।” ଶିଲୋହ ଅର୍ତ “ପକ୍ତାନ୍।” ତାପାଚେ ହେ କାଣାମାନାୟ୍ ବାନ୍ଦ୍ତ ନୁଜିଆଜି ୱାତାନ୍। ହେୱାନ୍ ନଙ୍ଗୟ୍ ହୁଡ଼୍ଦେଙ୍ଗ୍ ଆଡ଼୍ଜି ମାଚାନ୍। 8 କେତେକ୍ ହେନି ମାନାୟାର୍ ଇୱାନିଙ୍ଗ୍ ପାର୍ତୁମ୍ ବିକ୍ ଏନ୍ନାକା ହୁଡ଼୍ଜି ମାଚାର୍। ହେ ମାନାୟାର୍ ଆରେ ହେୱାନ୍ ନି ପାଡ଼୍ହା ପାଡ଼୍ହି ଇଞ୍ଜାକାର୍ ହେୱାନିଙ୍ଗ୍ ହୁଡ଼୍ଜି ୱେଚ୍ଚାର୍, “ହୁଡ଼ାଟ୍, ଇନେର୍ ୱିଜୁଦିନ୍ କୁଚ୍ଚି ବିକ୍ ଏନ୍ଚିମାଚାନ୍ ଇୱାନ୍ ହେୱାନ୍ ଆକାୟ୍କି?” 9 କେତେକ୍ ହେନି ୱେଚ୍ଚାର୍, “ଆଁ, ଇୱାନ୍ ହେୱାନ୍।” ମାତର୍ ଜେକନିକାର୍ ୱେଚ୍ଚାର୍, “ଆକାୟ୍, ଇୱାନ୍ ହେୱାନ୍ ଆକାୟ୍। ଇୱାନ୍ ହେୱାନ୍ ଲେକେ ଚଞ୍ଜ୍ନାନା।” ମାତର୍ ହେ କାଣାମାନାୟ୍ ୱେଚ୍ଚାନ୍, “ଆନେଙ୍ଗ୍ ହେୱାନ୍ନେ।” 10 ମାନାୟାର୍ ହେୱାନିଙ୍ଗ୍ ୱେନ୍ବାତାର୍, “ଏନେଙ୍ଗ୍ ଇନେସ୍ କିଜି କାଣ୍କୁ ହୁଡ଼୍ତାୟ୍?” 11 ହେୱାନ୍ ୱେଚ୍ଚାନ୍, “ମାନାୟାର୍ ଇନେରିଙ୍ଗ୍ ଯୀଶୁ ଇଞ୍ଜି ଇନାରା, ହେୱାନ୍ ଏଉଡ଼ିଙ୍ଗ୍ ହୁଦାଙ୍ଗ୍ ଚିକ୍ଲାତିଙ୍ଗ୍ କାଦକିଜି ନା କାଣ୍କୁକାଙ୍ଗ୍ କାସ୍ଦାତାନ୍। ତାପାଚେ ହେୱାନ୍ ନାଙ୍ଗେଙ୍ଗ୍ ଶିଲୋହ ବାନ୍ଦ୍ତ ନୁଜ୍ଗିଆ ଇନ୍ଞ୍ଚାନ୍। ତାପାଚେ ଆନେଙ୍ଗ୍ ହେ ବାନ୍ଦ୍ତ ନୁଜିଆତି ପାଚେ ହୁଡ଼୍ଦେଙ୍ଗ୍ ଆଡ଼୍ତାଙ୍ଗ୍।” 12 ମାନାୟାର୍ ହେୱାନିଙ୍ଗ୍ ୱେନ୍ବାତାର୍, “ହେୱାନ୍ ଇମେତାକେ ମାନାନ୍?” ହେ କାଣାମାନାୟ୍ ୱେଚ୍ଚାନ୍, “ଆନେଙ୍ଗ୍ ପୁନୁଙ୍ଗ୍।” 13 ତାପାଚେ ମାନାୟାର୍ ହେ କାଣାତାଙ୍ଗ୍ ହାର୍ଆତି ମାନାୟ୍ତିଙ୍ଗ୍ ପାରୁସିଦଳ୍ ଲାଗାୟ୍ ଅତାର୍। 14 ଯୀଶୁ ଚିକ୍ଲାତିଙ୍ଗ୍ କାଦ କିତାନ୍ ଆରେ ହେୱାନ୍ କାଣ୍ଗା ହାର୍ କିଜି ମାଚାନ୍। ହେୱାନ୍ ଇ କାମାୟ୍ ଜମ୍ନିଦିନ୍ ନାଞ୍ଜିଙ୍ଗ୍ କିଜି ମାଚାନ୍। 15 ଲାଗିଙ୍ଗ୍ ପାରୁସିଦଳ୍ନି ମାନାୟାର୍ ପା ହେୱାନିଙ୍ଗ୍ ୱେନ୍ବାତାର୍, “ଏନେଙ୍ଗ୍ ଇନେସ୍କିଜି କାଣ୍କୁ ହୁଡ଼୍ତାୟ୍?” ହେୱାନ୍ ୱେଚ୍ଚାନ୍, “ହେୱାନ୍ ନା କାଣ୍କୁକାଙ୍ଗ୍ କାଦ ଡ଼ିସ୍ପା ଆତ୍ତାନ୍। ଆନେଙ୍ଗ୍ ନୁଜିଆ ଆତାଙ୍ଗ୍ ଆରେ ଆନେଙ୍ଗ୍ ହୁଡ଼୍ଦେଙ୍ଗ୍ ଆଡ଼୍ତାଙ୍ଗ୍।” 16 କେତ୍ଜାଣ୍ ପାରୁସିଦଳ୍ ୱେଚ୍ଚାର୍, “ଇୱାନ୍ ଜମ୍ନିଦିନ୍ନି ନିୟମ୍ତିଙ୍ଗ୍ ମାନିକିଉନା। ଲାଗିଙ୍ଗ୍ ହେୱାନ୍ ଈଶ୍ୱରତାକେଣ୍ଡାଙ୍ଗ୍ ୱାୱାତାନ୍ନା।” ଜେକନିକାର୍ ୱେଚ୍ଚାର୍, “ରକାନ୍ ପାପି ମାନାୟ୍ ଇନାୱେଡ଼ାଙ୍ଗ୍ ଇ ଲେକେ ଚାନିଆଆନି କାମାୟ୍ କିଦେଙ୍ଗ୍ ଆଡୁନ୍।” ଇଦାଙ୍ଗ୍ କାଜିଙ୍ଗ୍ ପାରୁସିଦଳ୍ ବିତ୍ରେ ବାଗ୍-ବାଗ୍ ଆତାର୍। 17 ଯିହୁଦି ନେତାର୍ ହେ କାଣା ମାନାୟ୍ତିଙ୍ଗ୍ ଆରେରଗ ୱେନ୍ବାତାର୍, “ଇୱାନ୍ ନିଙ୍ଗେଙ୍ଗ୍ ହାର୍ କିତ୍ତାନ୍ ଆରେ ଏନେଙ୍ଗ୍ ହୁଡ଼୍ଦେଙ୍ଗ୍ ଆଡ଼୍ତାଇ। ଏନେଙ୍ଗ୍ ତା ବିଷୟରେ ଇନାକା ଇନାୟା?” ହେ କାଣାତାଙ୍ଗ୍ ହାର୍ ଆତାକାନ୍ ୱେଚ୍ଚାନ୍, “ହେୱାନ୍ ରକାନ୍ ଭବିଷ୍ଯତବକ୍ତା।” 18 ହେୱାନ୍ ରକାନ୍ କାଣା ମାଚାନ୍, ଆରେ ହେୱାନ୍ ନଙ୍ଗୟ୍ ହୁଡ଼୍ଦେଙ୍ଗ୍ ଆଡ଼୍ତି ବିଷୟ କେତେକ୍ ଯିହୁଦି ନେତାର୍ ଅଲପ୍ପା ପାର୍ତି କିୱାତାର୍। ଏଚେପାଦ୍ନା ଲାତ୍ରାହି ତାଞ୍ଜିୟା କୁକ୍ଚି ୱେନ୍ବିନି ପାତେକ୍। 19 ଯିହୁଦି ନେତାର୍ ଲାତ୍ରାହି ତାଞ୍ଜିୟାରିଙ୍ଗ୍ ୱେନ୍ବାତାର୍, “ଇୱାନ୍ ମି ହିମ୍ଣା କି? ଇନେରିଙ୍ଗ୍ ଜନମ୍ ଦିନ୍ତାଙ୍ଗ୍ କାଣା ଇଞ୍ଜି ୱେଚ୍ଚି ମାଚାଦେର୍। ଲାଗିଙ୍ଗ୍ ଇୱାନ୍ ନଙ୍ଗୟ୍ ଇନେସ୍ କିଜି ହୁଡ଼୍ଦେଙ୍ଗ୍ ଆଡ୍ନାନା?” 20 ତେହି ଲାତ୍ରାହି ୱେଚ୍ଚାର୍, “ଇୱାନ୍ ମା ହିମ୍ଣା ଆରେ ଇୱାନ୍ ଜନମ୍ ଦିନ୍ତାଙ୍ଗ୍ କାଣା ଆଜି ଜନମ୍ ଆଜି ମାଚାନ୍। 21 ମାତର୍ ହେୱାନ୍ ନଙ୍ଗୟ୍ ଇନେସ୍ କିଜି ହୁଡ଼୍ଦେଙ୍ଗ୍ ଆଡ୍ନାନା ଆପେଙ୍ଗ୍ ପୁନୁପ୍? ଇୱାନିଙ୍ଗ୍ ଇନେର୍ ତା କାଣ୍କୁ ହାର୍ କିତାନ୍ନା, ହେଦାଙ୍ଗ୍ ଆପେଙ୍ଗ୍ ପୁନୁପ୍? ଏପେଙ୍ଗ୍ ହେୱାନିଙ୍ଗ୍ ୱେନ୍ବାଟ୍। ଜାର୍ କାତା ଜାର୍ ୱେଚ୍ଚେଙ୍ଗ୍ ତା ବୟସ୍ ଆତାତେ।” 22 ଯିହୁଦି ନେତାରିଙ୍ଗ୍ ପାଣ୍ଡ୍ରାଆଜି ତେହି ଲାତ୍ରାହି ହେଲେକେ ୱେଚ୍ଚାର୍। ମାତର୍ ହେୱାର୍ ଉପାଇକିଜି ୱିସ୍ତି ମାଚାର୍, ଇମ୍ଣାକାନ୍ ଯୀଶୁଙ୍ଗ୍ ଖ୍ରୀଷ୍ଟ ଇଞ୍ଜି ପାର୍ତିକିନାର୍, ହେୱାନିଙ୍ଗ୍ ପାର୍ତାନା ଇଞ୍ଜାଙ୍ଗ୍ ବାର୍ତ ହପ୍ନାର୍। 23 ଲାଗିଙ୍ଗ୍ ହେ ହିମ୍ଣା ତେହି ଲାତ୍ରାହି ୱେଚ୍ଚାର୍, “ତା ବୟସ୍ ଆତାତେ ହେୱାନିଙ୍ଗ୍ ୱେନ୍ବାଟ୍।” 24 ହେବେତାଙ୍ଗ୍ ଯିହୁଦି ନେତାର୍ ହେ ଜନମ୍ ଦିନ୍ତାଙ୍ଗ୍ କାଣା ମାଚି ମାନାୟ୍ତିଙ୍ଗ୍ ଆରେରଗ ହିର୍ବିସ୍ ୱେଚ୍ଚାର୍, “ଏନେଙ୍ଗ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିୟା। ହେୱାନ୍ ରକାନ୍ ପାପି ମାନାୟ୍ ଇଞ୍ଜି ଆପେଙ୍ଗ୍ ପୁନାପ୍।” 25 ହେ କାଣାତାଙ୍ଗ୍ ହାର୍ଆତି ମାନାୟ୍ ୱେଚ୍ଚାନ୍, “ହେୱାନ୍ ପାପି କି ଆକାୟ୍, ଆନେଙ୍ଗ୍ ହେଦାଙ୍ଗ୍ ପୁନୁଙ୍ଗ୍। ମାତର୍ ଆନେଙ୍ଗ୍ ର ବିଷୟ ପୁଚାଙ୍ଗ୍ନା, ଆନେଙ୍ଗ୍ କାଣା ମାଚାଙ୍ଗ୍, ନଙ୍ଗୟ୍ ଆନେଙ୍ଗ୍ ହୁଡ଼୍ଦେଙ୍ଗ୍ ଆଡ୍ନାଙ୍ଗା।” 26 ଯିହୁଦି ନେତାର୍ ୱେନ୍ବାତାର୍, “ହେୱାନ୍ ନିଙ୍ଗେଙ୍ଗ୍ ଇନାକା କିତ୍ତାନ୍? ହେୱାନ୍ ନି କାଣ୍କୁକାଙ୍ଗ୍ ଇନେସ୍ କିଜି ହାର୍କିତାନ୍?” 27 ହେ କାଣାତାଙ୍ଗ୍ ହାର୍ଆତି ମାନାୟ୍ ୱେଚ୍ଚାନ୍, “ଆନେଙ୍ଗ୍ ହେ ବେଣ୍ ମିଙ୍ଗେଙ୍ଗ୍ ଆଗେ ପା ୱେଚ୍ଚାତାଙ୍ଗ୍ନା। ମାତର୍ ଏପେଙ୍ଗ୍ ନା କାତା ୱେନୁଦେରା। ଏପେଙ୍ଗ୍ ଆରେରଗ ଇନା କିଦେଙ୍ଗ୍ ୱେଞ୍ଜେଙ୍ଗ୍ ମାନ୍ କିନାଦେରା? ଏପେଙ୍ଗ୍ ପା ଇନାକା ତା ଚେଲା ଆଦେଙ୍ଗ୍ ଇଚା କିନାଦେରା କି?” 28 ଯିହୁଦି ନେତାର୍ ରିସାଆଜି ହେୱାନିଙ୍ଗ୍ କେତ୍ତାର୍। ତାପାଚେ ହେୱାର୍ ୱେଚ୍ଚାର୍, “ଏନେଙ୍ଗ୍ ତା ଚେଲାହି। ମାତର୍ ଆପେଙ୍ଗ୍ ମୋଶା ଚେଲାହିକାପ୍। 29 ଈଶ୍ୱର ମୋଶା ହୁଦାଙ୍ଗ୍ କାତାବାର୍ତା ଆତାର୍ନା ଆପେଙ୍ଗ୍ ପୁନାପ୍। ମାତର୍ ଇୱାନ୍ ଇମେତାଙ୍ଗ୍ ୱାତାନ୍ନା, ହେଦାଙ୍ଗ୍ ଆପେଙ୍ଗ୍ ପୁନୁୱାତାପ୍ନା।” 30 ହେ କାଣାତାଙ୍ଗ୍ ହାର୍ଆତି ମାନାୟ୍ ୱେଚ୍ଚାନ୍, “ଇଦାଙ୍ଗ୍ ତ ଚାନିଆଆନି କାତା। ଯୀଶୁ ଇମେତାଙ୍ଗ୍ ୱାତାନ୍ନା ଏପେଙ୍ଗ୍ ପୁନୁଦେର୍। ମାତର୍ ହେୱାନ୍ ନାଙ୍ଗେଙ୍ଗ୍ କାଣ୍କୁ ହାର୍ କିତ୍ତାନ୍ନା। 31 ଆସେଙ୍ଗ୍ ୱିଜାକାସ୍ ପୁନାସ୍, ଈଶ୍ୱର ପାପି ନିକାର୍ କାତା ୱେନୁନ୍। ମାତର୍ ଇମ୍ଣାକାନ୍ ଈଶ୍ୱରତିଙ୍ଗ୍ ପୁଜା କିନାନ୍ ଆରେ ତା କାତାତିଙ୍ଗ୍ ମାନି କିନାନ୍ ଈଶ୍ୱର ତା କାତା ୱେନାନ୍। 32 ନେଞ୍ଜେଙ୍ଗ୍ତାଙ୍ଗ୍ ଇନେର୍ ଇନାୱେଡ଼ାଙ୍ଗ୍ ପା ଜନମ୍ ଦିନ୍ତାଙ୍ଗ୍ କାଣା ମାନାୟ୍ତିଙ୍ଗ୍ ହାର୍ କିୱାଦାଙ୍ଗ୍ ମାଚାର୍। 33 ଇୱାନ୍ ଈଶ୍ୱରତାଙ୍ଗ୍ ୱାତାନ୍ନା, ନଇଲେ ଇଲେଗ୍ଦି କାମାୟ୍ କିଦେଙ୍ଗ୍ ଆଡ୍ୱାତାନ୍ମା।” 34 ଯିହୁଦି ନେତାର୍ ୱେଚ୍ଚାର୍, “ଏନେଙ୍ଗ୍ ତ ୱିଜୁ ପାପ୍ତାଙ୍ଗ୍ ଜନମ୍ ଆତାଇନା। ଏନେଙ୍ଗ୍ ଇନାକା ମାଙ୍ଗେଙ୍ଗ୍ ହିକ୍ଷା ହିଦ୍ଦେଙ୍ଗ୍ ଉପାୟ୍ କିଦ୍ନାୟା?” ଏଲେଙ୍ଗ୍ ୱେଚ୍ଚାର୍ ଆରେ ଯିହୁଦିର୍ ପାର୍ତାନା ଇଞ୍ଜାଙ୍ଗ୍ ଜବର୍ଦସ୍ତିରେ ବାର୍ତ ହପ୍ତାର୍। 35 ଯୀଶୁ ୱେଚାନ୍ କି ଯିହୁଦି ନେତାର୍ ହେୱାନିଙ୍ଗ୍ ଜବର୍ଦସ୍ତିରେ ବାର୍ତ ହପ୍ତାର୍ନା। ଯୀଶୁ ହେୱାନିଙ୍ଗ୍ ଗିଟାଆଜି ହେୱାନିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକା ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ ପାର୍ତି କିନାୟା?” 36 ହେୱାନ୍ ଯୀଶୁଙ୍ଗ୍ ୱେନ୍ବାତାନ୍, “ଆଜ୍ଞା, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇନେର୍? ନାଙ୍ଗେଙ୍ଗ୍ ୱେଚ୍ଚା ଇନେସ୍କି ଆନେଙ୍ଗ୍ ହେୱାନ୍ତାକେ ପାର୍ତି କିଦେଙ୍ଗ୍ ଆଡ୍ନାଙ୍ଗ୍।” 37 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ହେୱାନିଙ୍ଗ୍ ହୁଡ଼୍ତାୟେ। ନି ହୁଦାଙ୍ଗ୍ ନଙ୍ଗୟ୍ ଇନେର୍ ବେଣ୍ କିଦ୍ନାରା, ହେୱାନ୍ନେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା।” 38 ହେବେତାଙ୍ଗ୍ ହେୱାନ୍ ୱେଚ୍ଚାନ୍, “ଆଁ, ମାପୃ ଆନେଙ୍ଗ୍ ପାର୍ତି କିଦ୍ନାଙ୍ଗା।” ହେୱାନ୍ ଯୀଶୁଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିତାନ୍। 39 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “କାଣାଲଗାଙ୍ଗ୍ ହୁଡ଼୍ଦେଙ୍ଗ୍ ଆଡ୍ନାର୍। ଆରେ ଇମ୍ଣାକାର୍ ହୁଡ଼୍ଦେଙ୍ଗ୍ ଆଡ୍ନାରା ହେୱାର୍ କାଣା ଆନାର୍। ଇ ବିଚାର୍ କିଦେଙ୍ଗ୍ ଆନେଙ୍ଗ୍ ପୁର୍ତିତାକେ ୱାତାଙ୍ଗ୍ନା।” 40 ଯୀଶୁ ଲାଗାୟ୍ କେତ୍ଜାଣ୍ ପାରୁସିଦଳ୍ ମାଚାର୍। ହେୱାର୍ ଯୀଶୁ କାତା ୱେନ୍ଞ୍ଜି ହେୱାନିଙ୍ଗ୍ ୱେଚ୍ଚାର୍, “ଏଲେଙ୍ଗ୍ଇଚି ଆପେଙ୍ଗ୍ ପା କାଣା କି?” 41 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଯଦି କାଣା ଆଜି ମାଚିସ୍, ଏପେଙ୍ଗ୍ ପାପ୍ କାମାୟ୍ କିୱାତାଦେର୍ମା। ମାତର୍ ଏପେଙ୍ଗ୍ ହୁଡ଼୍ନାପା ଇଞ୍ଜି ୱେଚ୍ଚି ମାଚିଲେ ଈଶ୍ୱର ମିଙ୍ଗେଙ୍ଗ୍ କେମା କିଦୁନ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation