ଜହନ୍ 8 - New Testament in Pengo Parja Languageଦାରି କାମାୟ୍ତାକେ ଦରାପାଡ଼ାଆତି କଗ୍ଲେ 1 ତାପାଚେ ଯୀଶୁ ଚେଲାହିର୍ ହୁଦାଙ୍ଗ୍ ଜିତ୍ମାର୍ ମାନି ମାଡ଼ିତାକେ ହାଚାନ୍। 2 ତା ଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ ଆରେରଗ ଈଶ୍ୱର ମାନି ମନ୍ଦିର୍ ପିଣ୍ଡାତାକେ ୱାତାନ୍। ଆରେ ହେବେ ବେସିହେନି ମାନାୟାର୍ ତା ଲାଗାୟ୍ ୱାତାର୍। ଆରେ ହେୱାନ୍ କୁଚ୍ଚି ମାନାୟାରିଙ୍ଗ୍ ହିକ୍ଷା ହିତାନ୍। 3 ପଣ୍ଡିତାର୍ ଆରେ ପାରୁସିଦଳ୍ ର କଗ୍ଲେଙ୍ଗ୍ ହେବେ ତାସିୱାତାର୍। ହେ କଗ୍ଲେ ଦାରି କାମାୟ୍ କିନିହିଙ୍ଗ୍ ଦରାପଡ଼ା ଆଜିମାଚାତ୍। ଯିହୁଦିର୍ ହେ କଗ୍ଲେଙ୍ଗ୍ ମାନାୟ୍ ଆଗେ ନିଲି କିତାର୍। 4 ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ଗୁରୁ, ଇ କଗ୍ଲେ ରଞ୍ଜେଲ୍ ଦାରି କାମାୟ୍ କିନିହିଙ୍ଗ୍ ଦରାପଡ଼ା ଆତାତ୍ନା। 5 ହେଲେକେ କାମାୟ୍ କିନି ମାନାୟାରିଙ୍ଗ୍ ଆପେଙ୍ଗ୍ କାଲ୍କୁ ଲାହାଙ୍ଗ୍ ଇଡ଼୍ଦେଙ୍ଗ୍ ମୋଶା ଲେକିକିତି ନିୟମ୍ନି ସାସ୍ତର୍ ଆଦେସ୍ହିଦ୍ନାତ୍। ମାତର୍ ଆସେଙ୍ଗ୍ ଇନାକା କିନାସ୍ ଇଞ୍ଜି ଏନେଙ୍ଗ୍ ଇଚା କିନାୟା?” 6 ହେୱାର୍ ଯୀଶୁଙ୍ଗ୍ ପରିକ୍ଷା କିଦେଙ୍ଗ୍ ହେଲେକେ ପ୍ରଶ୍ନ ୱେନ୍ବାତାର୍। ଇନେସ୍କି ହେୱାର୍ ଯୀଶୁଙ୍ଗ୍ ବୁଲ୍ ଆସ୍ତି ଦସି କିଦେଙ୍ଗ୍ ଇଚାକିଜି ମାଚାର୍। ମାତର୍ ଯୀଶୁ କାପ୍ଡ଼ା ତାରେନ୍ କିଜି ୱାଚ୍କା ହୁଦାଙ୍ଗ୍ ମେଦ୍ନି ଜପି ଇନାକା ଲେକିକିଦେଙ୍ଗ୍ ଲାଗାତାନ୍। 7 ହେୱାର୍ ହେୱାନିଙ୍ଗ୍ ବାରମ୍-ବାରମ୍ ପ୍ରଶ୍ନ ୱେନ୍ବାତାର୍। ଲାଗିଙ୍ଗ୍ ଯୀଶୁ କାପ୍ଡ଼ା ଜପିକିଜି ହେୱାରିଙ୍ଗ୍ ୱେଚ୍ଚାନ୍, “ମି ବିତ୍ରେ ଇନେର୍ ପାପ୍ କିୱାତାନ୍ନା ହେୱାନ୍ ଆଗେ ୱାଜି ଇ କଗ୍ଲେଙ୍ଗ୍ କାଲ୍ ହୁଦାଙ୍ଗ୍ ଇଡ଼େନ୍।” 8 ତାପାଚେ ଯୀଶୁ ଆରେରଗ କାପ୍ଡ଼ା ତାରେନ୍ କିଜି ମେଦ୍ନିତାକେ ଲେକିକିଦେଙ୍ଗ୍ ଲାଗାତାନ୍। 9 ଇମ୍ଣାକାର୍ ଯୀଶୁ ବେଣ୍ ୱେଚାର୍ ହେୱାର୍ ରକାର୍-ରକାର୍ ଆଜି ହାଞ୍ଜେଙ୍ଗ୍ ଲାଗାତାର୍। ପାର୍ତୁମ୍ ବୁଡ଼ାର୍ ହାଚାର୍, ଆରେ ଜେକନିକାର୍ ହାଚାର୍। ମାତର୍ ଯୀଶୁ ଆରେ ହେ କଗ୍ଲେ ନେ ହେବେ ମାଚାର୍। 10 ଯୀଶୁ କାପ୍ଡ଼ା ଜପିକିଜି ହେଦେଲିଙ୍ଗ୍ ୱେନ୍ବାତାନ୍, “ହେୱାର୍ ଇମେ ହାଚାର୍? ଇନାକା ନିଙ୍ଗେଙ୍ଗ୍ ଇନେର୍ ପା ଦଣ୍ଡ୍ ପାୟାଆନାତ୍ ଇଞ୍ଜି ବିଚାର୍ କିଦ୍ୱାତାର୍ କି?” 11 ହେ କଗ୍ଲେ ୱେଚ୍ଚାତ୍, “ଆକାୟ୍ ମାପୃ, ହେୱାର୍ ବିତ୍ରେତାଙ୍ଗ୍ ଇନେର୍ ପା ନାଙ୍ଗେଙ୍ଗ୍ ଦଣ୍ଡ୍ ପାୟାଆନାୟ୍ ଇଞ୍ଜି ବିଚାର୍ କିଦ୍ୱାତାର୍।” ତାପାଚେ ଯୀଶୁ ୱେଚ୍ଚାନ୍, “ଲାଗିଙ୍ଗ୍ ଆନେଙ୍ଗ୍ ପା ନିଙ୍ଗେଙ୍ଗ୍ ଦଣ୍ଡ୍ ପାୟାଆନାୟ୍ ଇଞ୍ଜୁଙ୍ଗା। ଏନେଙ୍ଗ୍ ନଙ୍ଗୟ୍ ହାଲା, ମାତର୍ ଆରେ ଇନାୱେଡ଼ାଙ୍ଗ୍ ପା ପାପ୍ କାମାୟ୍ କିମା।” ଯୀଶୁ ଆନାନା ପୁର୍ତିନି ଅଜଡ଼୍ 12 ପାଚେ ଯୀଶୁ ଆରେରଗ ହିକ୍ଷାହିଜି ୱେଚ୍ଚାନ୍, “ଆନେଙ୍ଗ୍ ପୁର୍ତିନି ଅଜଡ଼୍, ନା ପାଚେ ଇମ୍ଣାକାନ୍ ୱାନାନ୍, ହେୱାନ୍ ଇନାୱେଡ଼ାଙ୍ଗ୍ ପା ମାଜ୍ଗାତ ତାଙ୍ଗୁନ୍। ମାତର୍ ହେୱାନ୍ ଜିବୁନ୍ହିନି ଅଜଡ଼୍ ପାୟା ଆନାନ୍।” 13 ମାତର୍ ପାରୁସିଦଳ୍ ଯୀଶୁଙ୍ଗ୍ ୱେଚ୍ଚାର୍, “ଏନେଙ୍ଗ୍ ଏଚେପାଦ୍ନା ନି କାତା ୱେଚ୍ନାୟା, ହେପାଦ୍ନା ଏନେଙ୍ଗ୍ ହେ ୱିଜୁ କାତାତିଙ୍ଗ୍ ସତ୍ ଇଞ୍ଜି ଇନାୟା। ଲାଗିଙ୍ଗ୍ ନି ଇୱିଜୁ କାତାତିଙ୍ଗ୍ ଆପେଙ୍ଗ୍ ମାନି କିଉପ୍।” 14 ଯୀଶୁ ୱେଚ୍ଚାନ୍, “ଆନେଙ୍ଗ୍ ଯଦି ନା ବିଷୟରେ ୱେଚ୍ଚିତିସ୍ ପା ହେ କାତା ସତ୍। ଇନେସ୍କି ଆନେଙ୍ଗ୍ ଇମେତାଙ୍ଗ୍ ୱାତାଙ୍ଗ୍ନା ଆରେ ଆନେଙ୍ଗ୍ ଇମେତାକେ ହାନାଙ୍ଗ୍ ହେଦାଙ୍ଗ୍ ଆନେଙ୍ଗ୍ ପୁଚାଙ୍ଗ୍ନା। ମାତର୍ ଏପେଙ୍ଗ୍ ପୁନ୍ୱାତାଦେର୍ନା ଆନେଙ୍ଗ୍ ଇମେତାଙ୍ଗ୍ ୱାତାଙ୍ଗ୍ନା ଆରେ ଇମେତାକେ ହାନାଙ୍ଗା। 15 ପୁର୍ତିନି ମାନାୟାରିଙ୍ଗ୍ ବିଚାର୍ କିତିଲେକେ ଏପେଙ୍ଗ୍ ନାଙ୍ଗେଙ୍ଗ୍ ବିଚାର୍ କିଦ୍ନାଦେରା। ମାତର୍ ଆନେଙ୍ଗ୍ ଇନେରିଙ୍ଗ୍ ପା ବିଚାର୍ କିଦୁଙ୍ଗା। 16 ଆନେଙ୍ଗ୍ ଯଦି ବିଚାର୍ କିଦ୍ନାଙ୍ଗ୍, ନା ବିଚାର୍ ଟିକ୍ ଆନାତ୍। ଇନେସ୍କି ଆନେଙ୍ଗ୍ ରକାଙ୍ଗ୍ ବିଚାର୍ କିଉଙ୍ଗ୍, ମାତର୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱର ନା ହୁଦାଙ୍ଗ୍ ମାନାନ୍। 17 ମୋଶା ଲେକିକିତି ନିୟମ୍ନି ସାସ୍ତର୍ ୱେଚ୍ଚାନାତା, ରିକାର୍ ୱେଚ୍ଚି କାତା ସତ୍। 18 ଆନେଙ୍ଗ୍ ନା ଜାର୍ ବିଷୟରେ ରକାଙ୍ଗ୍ ସାକି, ଆରେ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱର ପା ଆରେ ରକାନ୍ ସାକି।” 19 ହେୱାର୍ ୱେନ୍ବାତାର୍, “ମିଞ୍ଜ୍ବା ଇମେନ୍?” ଯୀଶୁ ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ପୁଞ୍ଜ୍ୱାତାଦେର୍ନା ଆରେ ନା ଆବା ଈଶ୍ୱରତିଙ୍ଗ୍ ପା ପୁନ୍ୱାତାଦେର୍ନା। ଯଦି ଏପେଙ୍ଗ୍ ନାଙ୍ଗେଙ୍ଗ୍ ପୁନ୍ଞ୍ଚାଦେର୍ମା ଲାଗିଙ୍ଗ୍ ନା ଆବା ଈଶ୍ୱରତିଙ୍ଗ୍ ପା ପୁଚାଦେର୍ମା।” 20 ଯୀଶୁ ଈଶ୍ୱର ମାନି ମନ୍ଦିର୍ ପିଣ୍ଡା ଦଣ୍ଡ୍ ହିନି ବାହାତାକେ ନିଲ୍ଚି ହିକ୍ଷାହିଜି ଇ ୱିଜୁବେଣ୍ ୱେଚ୍ଚାନ୍। ମାତର୍ ଇମ୍ଣାକାର୍ ପା ହେୱାନିଙ୍ଗ୍ ବନ୍ଦି କିୱାତାର୍। ଇନେସ୍କି ତା ଦୁକ୍କଷ୍ଟ ପାୟାଆଜି ହାଃୱି ଦିନ୍ ୱାୱାଦାଙ୍ଗ୍ ମାଚାତ୍। 21 ଯୀଶୁ ଆରେରଗ ମାନାୟାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ପିସ୍ତି ହାଞ୍ଜ୍ନାଙ୍ଗ୍। ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତାନାଦେର୍ ମାତର୍ ଏପେଙ୍ଗ୍ ମି ପାପ୍ କାମାୟ୍ତାଙ୍ଗ୍ ହାଃନାଦେର୍। ଆନେଙ୍ଗ୍ ଇମ୍ଣି ବାହାତାକେ ହାନାଙ୍ଗା ଏପେଙ୍ଗ୍ ହେ ବାହାତାକେ ହାଞ୍ଜେଙ୍ଗ୍ ଆଡୁଦେର୍।” 22 ଲାଗିଙ୍ଗ୍ ଯିହୁଦି ନେତାର୍ ୱେଚ୍ପା-ୱେଚ୍ପି ଆତାର୍, “ଯୀଶୁ ଇନାକା ହାଃନାନ୍ କି? ହେଦାଙ୍ଗ୍ କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ୱେଚ୍ଚାତାନ୍, ଆନେଙ୍ଗ୍ ଇମେତାକେ ହାନାଙ୍ଗା ଏପେଙ୍ଗ୍ ହେବେ ୱାଦେଙ୍ଗ୍ ଆଡୁଦେର୍?” 23 ମାତର୍ ଯୀଶୁ ହେ ଯିହୁଦି ନେତାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ପୁର୍ତିତାଙ୍ଗ୍ ଜନମ୍ ଆତାଦେର୍ନା, ମାତର୍ ଆନେଙ୍ଗ୍ ସରଗ୍ତାଙ୍ଗ୍ ୱାତାଙ୍ଗ୍ନା। ଏପେଙ୍ଗ୍ ଇ ପୁର୍ତି ନିକାଦେର୍ ଆନେଙ୍ଗ୍ ମାତର୍ ପୁର୍ତି ନିକାଙ୍ଗ୍ ଆକାୟ୍। 24 ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍, ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ୱି କାଜିଙ୍ଗ୍ ଜାର୍ ପାପ୍ କାଜିଙ୍ଗ୍ ହାଃନାଦେର୍। ଆନେଙ୍ଗ୍ ହେ ମାନାୟ୍, ଇଦାଙ୍ଗ୍ ଯଦି ଏପେଙ୍ଗ୍ ପାର୍ତି କିୱିତିସ୍ ମି ଜାର୍-ଜାର୍ ପାପ୍ତାକେ ହାଃନାଦେର୍।” 25 ଯିହୁଦି ନେତାର୍ ହେୱାନିଙ୍ଗ୍ ୱେନ୍ବାତାର୍, “ଏନେଙ୍ଗ୍ ଇନେର୍, ମାଙ୍ଗେଙ୍ଗ୍ ୱେଚ୍ଚା।” ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନା ବିଷୟରେ ପାର୍ତୁମ୍ତାଙ୍ଗ୍ ୱେଚ୍ନାଙ୍ଗା, ଆନେଙ୍ଗ୍ ହେୱାନ୍। 26 ଆନେଙ୍ଗ୍ ମିଙ୍ଗେଙ୍ଗ୍ ବିଚାର୍ କିଦେଙ୍ଗ୍ କେତେକ୍ ବିଷୟ ୱେଚ୍ଚାନାକା ମାନାତ୍। ମାତର୍ ନାଙ୍ଗେଙ୍ଗ୍ ନା ଆବା ଈଶ୍ୱର ଇନାକା ୱେଚ୍ଚି ପକ୍ତାତାନ୍ନା, ହେଦାଙ୍ଗ୍ ଆନେଙ୍ଗ୍ ପୁର୍ତିନି ମାନାୟାରିଙ୍ଗ୍ ୱେଚ୍ଚାନାଙ୍ଗା, ଆରେ ହେୱାନ୍ ଇନାକା ୱେଚ୍ଚାତାନ୍ନା ହେଦାଙ୍ଗ୍ ସତ୍।” 27 ଯୀଶୁ ଇନେର୍ ବିଷୟରେ ୱେଚ୍ଚି ମାଚାନ୍, ଇ କାତା ମାନାୟାର୍ ବୁଜା ଆଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ଯୀଶୁ ଆବା ଈଶ୍ୱର ବିଷୟରେ ୱେଚ୍ଚି ମାଚାନ୍। 28 ଲାଗିଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ କୃଶକାଟ୍ତାକେ ଅହ୍ନାଦେର୍। ଲାଗିଙ୍ଗ୍ ଏପେଙ୍ଗ୍ ପୁନାଦେର୍ ଆନେଙ୍ଗ୍ ହେ ମାନାୟ୍, ଆନେଙ୍ଗ୍ ଇମ୍ଣି କାମାୟ୍ କିଜି ମାଚାଙ୍ଗ୍ ହେଦାଙ୍ଗ୍ ନା କାଜିଙ୍ଗ୍ କିୱାଦାଙ୍ଗ୍ ମାଚାଙ୍ଗ୍। ମାତର୍ ଇନେସ୍ ନା ଆବା ଈଶ୍ୱର ୱେଚ୍ଚି ମାନ୍ଞ୍ଚାନ୍, ଆନେଙ୍ଗ୍ ପା ହେଲେଙ୍ଗ୍ ୱେଚ୍ନାଙ୍ଗା। 29 ନାଙ୍ଗେଙ୍ଗ୍ ଇମ୍ଣି ଆବା ଈଶ୍ୱର ପକ୍ତାତାନ୍ନା, ହେୱାନ୍ ନା ହୁଦାଙ୍ଗ୍ ମାନାନ୍। ହେୱାନ୍ ନାଙ୍ଗେଙ୍ଗ୍ ରକାନ୍ କିଜି ପିସ୍ତି ହାଞ୍ଜ୍ୱାତାନ୍ନା। ହେୱାନ୍ ୱାରି ଆନି କାମାୟ୍ ୱିଜୁଦିନ୍ କିନାଙ୍ଗ୍।” 30 ଯୀଶୁ ଇ କାତା ୱେଚ୍ନିହିଙ୍ଗ୍ ବେସିହେନି ମାନାୟ୍ ହେୱାନିଙ୍ଗ୍ ପାର୍ତି କିତାର୍। ପାପ୍ କାମାୟ୍ତାଙ୍ଗ୍ ମୁକ୍ତି ପାୟାଆନି ବିଷୟରେ ଯୀଶୁ ୱେଚ୍ଚାନ୍ 31 ଯୀଶୁ ପାର୍ତିକିନି ଯିହୁଦିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଯଦି ନା ହିକ୍ଷାତିଙ୍ଗ୍ ମାନିକିନାଦେର୍, ଲାଗିଙ୍ଗ୍ ଏପେଙ୍ଗ୍ ନା ଚେଲାଆନାଦେର୍। 32 ଏପେଙ୍ଗ୍ ସତ୍ତିଙ୍ଗ୍ ପୁନାଦେର୍ ଆରେ ହେ ସତ୍ ମିଙ୍ଗେଙ୍ଗ୍ ରକ୍ଷା କିଦ୍ନାତ୍।” 33 ଯିହୁଦି ନେତାର୍ ହେୱାନିଙ୍ଗ୍ ୱେଚ୍ଚାର୍, “ଆପେଙ୍ଗ୍ ଅବ୍ରାହାମ୍ନି ଲାତ୍ରା, ଆପେଙ୍ଗ୍ ଇନାୱେଡ଼ାଙ୍ଗ୍ ପା ଇନେର୍ ହଲିଆ ଆୱାତାପ୍ନା। ଲାଗିଙ୍ଗ୍ ଆପେଙ୍ଗ୍ ମୁକ୍ତି ଆନାଦେର୍ ଇଞ୍ଜି ଇନେକିଦେଙ୍ଗ୍ ୱେଚ୍ଚାନାୟା?” 34 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ୱିଜୁ ପାପ୍ କାମାୟ୍ କିନାକାର୍, ହେୱାର୍ ୱିଜାକାର୍ ପାପ୍ନି ହଲିଆ। 35 ରକାନ୍ ହଲିଆ ର ପରିବାର୍ତାକେ ୱିଜୁଦିନ୍ ମାନ୍ଗୁନ୍। ମାତର୍ ର ହିମ୍ଣା ପରିବାର୍ ମାନାୟ୍ ଲେକେ ୱିଜୁଦିନ୍ ମାନ୍ଗାନାନ୍। 36 ଯଦି ହେ ହିମ୍ଣା ମିଙ୍ଗେଙ୍ଗ୍ ମୁକ୍ତି ହିଦ୍ନାନାନ୍, ଲାଗିଙ୍ଗ୍ ଏପେଙ୍ଗ୍ ହାତ୍ପା ମୁକ୍ତି ପାୟାଆନାଦେର୍। 37 ଆନେଙ୍ଗ୍ ପୁନାଙ୍ଗ୍ ଏପେଙ୍ଗ୍ ଅବ୍ରାହାମ୍ ଲାତ୍ରା ନିକାଦେର୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିନାଦେରା, ଇନେସ୍କି ଏପେଙ୍ଗ୍ ନା ହିକ୍ଷାତିଙ୍ଗ୍ ଆସ୍ତେଙ୍ଗ୍ ଇଚା କିଉଦେରା। 38 ଏଚେପାଦ୍ନା ଆନେଙ୍ଗ୍ ତା ହୁଦାଙ୍ଗ୍ ମାଚାଙ୍ଗ୍, ନାଙ୍ଗେଙ୍ଗ୍ ନା ଆବା ଈଶ୍ୱର ଇନାକା ଚଚ୍ଚାତାନ୍ନା, ହେଦାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ମାତର୍ ମି ଆକଦାଦିର୍ ଇନାକା ୱେଚ୍ଚାତାନ୍ନା ହେଦାଙ୍ଗ୍ ଏପେଙ୍ଗ୍ କିନାଦେରା।” ଶୟତାନ ମେହି 39 ଯିହୁଦି ନେତାର୍ ହେୱାନିଙ୍ଗ୍ ୱେଚ୍ଚାର୍, “ଅବ୍ରାହାମ ମାଞ୍ଜ୍ବା।” ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଯଦି ଅବ୍ରାହାମ୍ ମେହି କାଦେର୍, ଲାଗିଙ୍ଗ୍ ଏପେଙ୍ଗ୍ ଅବ୍ରାହାମ୍ କିତିଲେକେ କାମାୟ୍ କିୟାଟ୍। 40 ଆନେଙ୍ଗ୍ ମିଙ୍ଗେଙ୍ଗ୍ ଈଶ୍ୱରତାଙ୍ଗ୍ ୱେଚି ସତ୍ କାତା ୱେଚ୍ଚାନାଙ୍ଗା। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିନାଦେରା। ମାତର୍ ଅବ୍ରାହାମ୍ ହେଲେକେ କିୱାଦାଙ୍ଗ୍ ମାଚାନ୍। 41 ଏପେଙ୍ଗ୍ ମିଞ୍ଜ୍ବା କିତି କାମାୟ୍ ୱିଜୁ କିନାଦେରା।” ମାତର୍ ଯିହୁଦି ନେତାର୍ ହେୱାନିଙ୍ଗ୍ ୱେଚ୍ଚାର୍, “ଆପେଙ୍ଗ୍ ଦାରି କାମାୟ୍ କିତିତାଙ୍ଗ୍ ଜନମ୍ ଆୱାତାପ୍ନା। ମାତର୍ ଈଶ୍ୱର ନେ ମା ରକାନ୍ ଇଞ୍ଜି ଆବା।” 42 ଯୀଶୁ ହେ ଯିହୁଦି ନେତାରିଙ୍ଗ୍ ୱେଚ୍ଚାନ୍, “ଈଶ୍ୱର ଯଦି ମିଞ୍ଜ୍ବା ଆତାନ୍ମା, ଲାଗିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଲାଡ୍ କିତ୍ତାଦେର୍ମା। ଆନେଙ୍ଗ୍ ନିଜେ ୱାୱାତାଙ୍ଗ୍, ମାତର୍ ନାଙ୍ଗେଙ୍ଗ୍ ଈଶ୍ୱର ଇବେ ପକ୍ତାତାନ୍ନା। 43 ଆନେଙ୍ଗ୍ ଇନାକାପା ୱେଚ୍ଚାନାଙ୍ଗା, ହେଦାଙ୍ଗ୍ ଏପେଙ୍ଗ୍ ବୁଜା ଆଦେଙ୍ଗ୍ ଆଡୁଦେରା। ଆରେ ଏପେଙ୍ଗ୍ ନା ହିକ୍ଷାତିଙ୍ଗ୍ ଆସ୍ତେଙ୍ଗ୍ ଆଡୁଦେରା। 44 ଶୟତାନ୍ ଆନାନା ମିଞ୍ଜ୍ବା ଆରେ ଏପେଙ୍ଗ୍ ତା ମେହି କାଦେର୍। ଏପେଙ୍ଗ୍ ତା ଇଚାତାଙ୍ଗ୍ କାମାୟ୍ କିନାଦେରା। ହେୱାନ୍ ଆଗେତାଙ୍ଗ୍ ମାନାୟ୍ ମାରୁ, ଆରେ ହେୱାନ୍ ଇନାୱେଡ଼ାଙ୍ଗ୍ ପା ସତ୍ ୱେଚ୍ୱାତାନ୍ନା। ଇନେସ୍କି ହେୱାନ୍ ମିଚ୍ୱା। ଏଚେପାଦ୍ନା ହେୱାନ୍ ମିଚ୍ କାତା ୱେଚ୍ନାନ୍, ହେପାଦ୍ନା ହେୱାନ୍ ଜାର୍ତିଙ୍ଗ୍ ୱେଚ୍ନାନ୍। ଇନେସ୍କି ହେୱାନ୍ ମିଚ୍ ୱେଚ୍ନି ମାନାୟ୍, ଆରେ ହେୱାନ୍ ମିଚ୍ ୱେଚ୍ନାକାର୍ ତାଞ୍ଜିବା। 45 ଆନେଙ୍ଗ୍ ସତ୍ ୱେଚ୍ଚିତିଲେ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦୁଦେରା। 46 ଆନେଙ୍ଗ୍ ପାପି ଇଞ୍ଜି ମି ବିତ୍ରେତାଙ୍ଗ୍ ଇନେର୍ ପାର୍ମାଣ୍ କିଦେଙ୍ଗ୍ ଆଡ୍ନାନ୍? ଆନେଙ୍ଗ୍ ଯଦି ସତ୍ ୱେଚ୍ନାଙ୍ଗ୍, ନାଙ୍ଗେଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ ପାର୍ତି କିଦୁଦେରା? 47 ଇମ୍ଣାକାନ୍ ଈଶ୍ୱର ମାନାୟ୍, ହେୱାନିଙ୍ଗ୍ ଈଶ୍ୱର ଇନାକା ୱେଚ୍ନାନ୍ ହେଦାଙ୍ଗ୍ ୱେନାନ୍। ମାତର୍ ଏପେଙ୍ଗ୍ ଈଶ୍ୱର ମାନାୟ୍ କାଦେର୍ ଆକାୟ୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଈଶ୍ୱର କାତାତିଙ୍ଗ୍ ଆହୁଦେରା।” ଯୀଶୁ ତା ବିଷୟରେ ଆରେ ଅବ୍ରାହାମ୍ ବିଷୟରେ ୱେଚ୍ଚାନ୍ 48 ଯିହୁଦି ନେତାର୍ ଯୀଶୁଙ୍ଗ୍ ୱେଚ୍ଚାର୍, “ଏନେଙ୍ଗ୍ ରକାଇ ଶମିରଣିୟ ମାନାୟ୍। ନିଙ୍ଗେଙ୍ଗ୍ ରଞ୍ଜାଙ୍ଗ୍ ବୁତ୍ଆତ୍ମା ଡାଞ୍ଜ୍ଜାତାତ୍ନା। ଆପେଙ୍ଗ୍ ୱେଚ୍ନି ବେଣ୍ ଟିକ୍ ଆକାୟ୍କି?” 49 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ବୁତ୍ଆତ୍ମା ଡାଞ୍ଜ୍ଜାତାତ୍ନା। ଆନେଙ୍ଗ୍ ନା ଆବା ଈଶ୍ୱରତିଙ୍ଗ୍ ସନ୍ମାନ୍ ହିନାଙ୍ଗ୍। ମାତର୍ ନାଙ୍ଗେଙ୍ଗ୍ ଏପେଙ୍ଗ୍ ସନ୍ମାନ୍ ହିଦୁଦେରା। 50 ଆନେଙ୍ଗ୍ ନିଜେ ସନ୍ମାନ୍ ପାୟା ଆଦେଙ୍ଗ୍ ଉପାୟ୍ କିଉଙ୍ଗା। ମାତର୍ ରକାନ୍ ମାନାୟ୍ ମାନାନ୍ ହେୱାନ୍ ସନ୍ମାନ୍ ଆରେ ବିଚାର୍ କିଦେଙ୍ଗ୍ ଇଚାକିନାନ୍।” 51 ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଇନେର୍ ଯଦି ନା ହିକ୍ଷାତିଙ୍ଗ୍ ମାନିକିନାର୍, ଲାଗିଙ୍ଗ୍ ହେୱାନ୍ ଇନାୱେଡ଼ାଙ୍ଗ୍ ପା ହାଃଉନ୍।” 52 ଯିହୁଦି ନେତାର୍ ଯୀଶୁଙ୍ଗ୍ ୱେଚ୍ଚାର୍, “ନଙ୍ଗୟ୍ ଆପେଙ୍ଗ୍ ପୁଚାପ୍ ଯେ, ନି ବିତ୍ରେ ରଞ୍ଜାଙ୍ଗ୍ ବୁତ୍ଆତ୍ମା ଡାଞ୍ଜ୍ଜାତାତ୍ନା। ଇନେସ୍କି ଅବ୍ରାହାମ୍ ହାଃଜି ମାଚାନ୍ ଆରେ ଭବିଷ୍ଯତବକ୍ତାର୍ ପା ହାଃଜି ମାଚାର୍। ମାତର୍ ଏନେଙ୍ଗ୍ ୱେଚ୍ଚାନାୟା, ‘ନା ହିକ୍ଷାତିଙ୍ଗ୍ ମାନିକିନାକାର୍ ଇନାୱେଡ଼ାଙ୍ଗ୍ ପା ହାଃଉର୍।’ 53 ଏନେଙ୍ଗ୍ ଇନାକା ବାବିକିନାୟା ଯେ ମାଞ୍ଜ୍ବା ଅବ୍ରାହାମତାଙ୍ଗ୍ ପା ଗାଜା? ଅବ୍ରାହାମ୍ ତ ହାଃତାନ୍ ଆରେ ଭବିଷ୍ଯତବକ୍ତାର୍ ପା ହାଃତାରେ। ଏନେଙ୍ଗ୍ ଜାର୍ତିଙ୍ଗ୍ ଇନେର୍ ଇଞ୍ଜି ବାବିକିନାୟା?” 54 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଯଦି ନିଜେ-ନିଜେ ସନ୍ମାନ୍ କିୟା ଆନାଙ୍ଗା, ଏଲେଙ୍ଗ୍ କିତିସ୍ ନା ସନ୍ମାନ୍ ଅଲପ୍ପା ମୁଲ୍ୟ ଆକାୟ୍। ନା ଆବା ଈଶ୍ୱର ନାଙ୍ଗେଙ୍ଗ୍ ସନ୍ମାନ୍ କିଦ୍ନାନ୍, ହେୱାନିଙ୍ଗ୍ ଏପେଙ୍ଗ୍ ମା ଈଶ୍ୱର ଇଞ୍ଜି ଇନାଦେରା। 55 ମାତର୍ ହେୱାନିଙ୍ଗ୍ ଏପେଙ୍ଗ୍ ହାତ୍ପା ପୁନୁଦେରେ। ହେୱାନିଙ୍ଗ୍ ଆନେଙ୍ଗ୍ ପୁନାଙ୍ଗ୍। ଆନେଙ୍ଗ୍ ଯଦି ଇଞ୍ଜ୍ନାଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ପୁନୁଙ୍ଗ୍। ଲାଗିଙ୍ଗ୍ ଆନେଙ୍ଗ୍ ମି ଲେକେ ମିଚ୍ୱା ମାନାୟ୍ ଆନାଙ୍ଗ୍। ମାତର୍ ଆନେଙ୍ଗ୍ ହେୱାନିଙ୍ଗ୍ ହାତ୍ପା ପୁନାଙ୍ଗ୍। ହେୱାନ୍ ଇନାକା ଇଞ୍ଜ୍ନାନ୍ ଆନେଙ୍ଗ୍ ହେ ୱିଜୁ ମାନିକିନାଙ୍ଗା। 56 ନା ୱାନାକା ହୁଡ଼୍ଦେଙ୍ଗ୍ ଆଡ୍ନାଙ୍ଗ୍ ଇଞ୍ଜି ଆହାକିଜି ମିଞ୍ଜ୍ବା ଅବ୍ରାହାମ୍ ବେସି ଆହାକିଜି ମାଚାନ୍। ହେୱାନ୍ ହେ ଦିନ୍ ହୁଡ଼୍ତାନ୍ ଆରେ ବେସି ୱାରିଆ ଆତାନ୍।” 57 ହେବେତାଙ୍ଗ୍ ଯିହୁଦି ନେତାର୍ ଯୀଶୁଙ୍ଗ୍ ୱେଚ୍ଚାର୍, “ନି ବାର୍ହୁ ପଚାସ୍ ବାର୍ହୁ ପା ଆଉତେ, ଏନେଙ୍ଗ୍ ଇନାକା ଅବ୍ରାହାମତିଙ୍ଗ୍ ହୁଡ଼୍ତାଇନା?” 58 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଅବ୍ରାହାମ୍ ଜନମ୍ ଆୱିତି ଆଗେ ଆନେଙ୍ଗ୍ ମାନାଙ୍ଗ୍।” 59 ଯୀଶୁ ଇବେଣ୍ ୱେଚ୍ନିହିଙ୍ଗ୍ ମାନାୟାର୍ ହେୱାନିଙ୍ଗ୍ ଇଡ଼୍ଦେଙ୍ଗ୍ କାଲ୍କୁ ପେସ୍ତାର୍। ମାତର୍ ହେୱାନ୍ ଡ଼ୁଗ୍ତାନ୍ ଆରେ ଈଶ୍ୱର ମାନି ମନ୍ଦିର୍ ବିତ୍ରେ ହାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation