ଜହନ୍ 7 - New Testament in Pengo Parja Languageଯୀଶୁ ଆରେ ତା ଟଣ୍ଡାହିର୍ 1 ଇଦାଙ୍ଗ୍ ପାଚେ ଯୀଶୁ ଗାଲିଲୀ ଜିଲ୍ଲାତାକେ ବୁଲାଆଦେଙ୍ଗ୍ ଲାଗାତାନ୍। ଯିହୁଦି ନେତାର୍ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଇଚାକିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାନ୍ ଯିହୁଦା ଜିଲ୍ଲାତ ହାଞ୍ଜେଙ୍ଗ୍ ଇଚା କିୱାଦାଙ୍ଗ୍ ମାଚାନ୍। 2 ଯିହୁଦି ଜାତିର୍ ପୁଟ୍ତ ବାହାକିନି ପାର୍ବୁ ସମୟ୍ ୱାତାତ୍। 3 ଲାଗିଙ୍ଗ୍ ଯୀଶୁ ଟଣ୍ଡାହିର୍ ହେୱାନିଙ୍ଗ୍ ୱେଚ୍ଚାର୍, “ଇବାହା ପିସ୍ତି ପାର୍ବୁଚିଞ୍ଜେଙ୍ଗ୍ ଯିହୁଦା ଜିଲ୍ଲାତାକେ ହାଲା। ଇନେସ୍କି ନି ଚେଲାର୍ ଏନେଙ୍ଗ୍ କିନି ଚାନିଆଆନି କାମାୟ୍ କିନାପ୍, ହେଦାଙ୍ଗ୍ ମି ଚେଲାର୍ ପା ହୁଡ଼୍ଦେଙ୍ଗ୍ ଆଡ୍ନାର୍।” 4 ଇମ୍ଣାକାନ୍ ଯଦି ଇଚାକିନାନ୍ କି ହେୱାନିଙ୍ଗ୍ ପୁନେର୍, ହେୱାନ୍ ଜାର୍ କାମାୟ୍ ଡ଼ୁକ୍ଚି ଇଟୁନ୍। ଏନେଙ୍ଗ୍ ଜାର୍ତିଙ୍ଗ୍ ଜଗତ୍ ଆଗେ ଚଚିୟା। ଏନେଙ୍ଗ୍ କିନି ଚାନିଆଆନି କାମାୟ୍ ୱିଜୁ ହେୱାରିଙ୍ଗ୍ ଚଚ୍ଚିହିୟା। 5 ତା ଟଣ୍ଡାହିର୍ ପା ହେୱାନିଙ୍ଗ୍ ପାର୍ତି କିୱାଦାଙ୍ଗ୍ ମାଚାର୍। 6 ଯୀଶୁ ତା ଟଣ୍ଡାହିରିଙ୍ଗ୍ ୱେଚ୍ଚାନ୍, “ନା କାଜିଙ୍ଗ୍ ସମୟ୍ ନଙ୍ଗୟ୍ ପାତେକ୍ ୱାଉତେ। ମାତର୍ ମି କାଜିଙ୍ଗ୍ ଏଚେପାଦ୍ନା ପା ହାଞ୍ଜେଙ୍ଗ୍ ଆଡ୍ନାଦେର୍। 7 ପୁର୍ତିନି ମାନାୟାର୍ ମିଙ୍ଗେଙ୍ଗ୍ ଗିଣ୍ କିଦେଙ୍ଗ୍ ଆଡ଼୍ଦୁର୍। ମାତର୍ ନାଙ୍ଗେଙ୍ଗ୍ ପୁର୍ତିନି ମାନାୟାର୍ ଗିଣ୍ କିଦ୍ନାର୍, ଇନେସ୍କି ଆନେଙ୍ଗ୍ ପୁର୍ତିନି ମାନାୟାରିଙ୍ଗ୍ ପାପ୍ କାମାୟ୍ କିନାଦେରା ଇଞ୍ଜି ୱେଚ୍ନାଙ୍ଗା। 8 ଲାଗିଙ୍ଗ୍ ଏପେଙ୍ଗ୍ ଇ ପାର୍ବୁଚିଞ୍ଜେଙ୍ଗ୍ ହାଲାଟ୍। ଆନେଙ୍ଗ୍ ନଙ୍ଗୟ୍ ପାର୍ବୁତିଙ୍ଗ୍ ହାଲୁଙ୍ଗ୍। ନା କାଜିଙ୍ଗ୍ ନଙ୍ଗୟ୍ ପାତେକ୍ ହାର୍ଦି ସମୟ୍ ପୁରା ଆଉତେ।” 9 ଇବେଣ୍ ହେୱାରିଙ୍ଗ୍ ୱେଚ୍ଚାନ୍ ଆରେ ଯୀଶୁ ଗାଲିଲୀ ଜିଲ୍ଲାତାକେ ମାନ୍ଗାତାନ୍। 10 ଲାଗିଙ୍ଗ୍ ଯୀଶୁ ଟଣ୍ଡାହିର୍ ପାର୍ବୁଚିଞ୍ଜେଙ୍ଗ୍ ହାଚାର୍। ହେୱାନ୍ ପା ମାନାୟାରିଙ୍ଗ୍ ଚଞ୍ଜିଆ ଆୱାଦାଙ୍ଗ୍ ଡ଼ୁଗ୍ଜି ହାଚାନ୍। 11 ହେ ଯିହୁଦିର୍ ପାର୍ବୁତାକେ ଯୀଶୁଙ୍ଗ୍ ଦାସ୍ତାର୍। ହେୱାର୍ ୱେନ୍ବାତାର୍, “ହେୱାନ୍ ୱାୱାତାନ୍ନା କି?” 12 ହେବେ ବେସିହେନି ମାନାୟାର୍ ମାଚାର୍। ହେୱାର୍ ବିତ୍ରେତାଙ୍ଗ୍ କେତେକ୍ ହେନି ଜାର୍-ଜାର୍ବିତ୍ରେ ଯୀଶୁ ବଷୟରେ ବେଣ୍କିବାଆଜି ମାଚାର୍, କେତ୍ଜାଣ୍ ୱେଚ୍ଚାର୍, “ହେୱାନ୍ ରକାନ୍ ହାର୍ଦି ମାନାୟ୍।” ମାତର୍ ଜେକନିକାର୍ ୱେଚ୍ଚି ମାଚାର୍, “ଆକାୟ୍, ହେୱାନ୍ ମାନାୟାରିଙ୍ଗ୍ ବୁଲ୍ ହାଜ୍ଦିଙ୍ଗ୍ ଅନାନା।” 13 ମାତର୍ ମାନାୟାର୍ ଯିହୁଦି ନେତାରିଙ୍ଗ୍ ପାଣ୍ଡ୍ରାଆଜି କୁଲାକୁଲି ତା ବିଷୟରେ ବେଣ୍ କିୱାଦାଙ୍ଗ୍ ମାଚାର୍। 14 ପାର୍ବୁ ଅଦା ସମୟ୍ ୱିଜ୍ଦି ମାଚାତ୍। ତାପାଚେ ଯୀଶୁ ଈଶ୍ୱର ମାନି ମନ୍ଦିର୍ତାକେ ହାଲ୍ଜି ହିକ୍ଷାହିଦେଙ୍ଗ୍ ଆରମ୍ କିତାନ୍। 15 ଯିହୁଦିର୍ ଚାନିଆ ଆଜି ହେୱାର୍ ୱେଚ୍ଚାର୍, “ଇୱାନ୍ ଦରମ୍ ସାସ୍ତର୍ ପଡ଼ିକିୱାଦାଙ୍ଗ୍, ଏଚେକ୍ ବିଷୟ ୱିଜୁ ଇନେସ୍କିଜି ହିକ୍ଷା ହିନାନା?” 16 ଯୀଶୁ ୱେଚ୍ଚାନ୍, “ଆନେଙ୍ଗ୍ ଇନାକା ହିକ୍ଷା ହିଦ୍ନାଙ୍ଗା, ହେଦାଙ୍ଗ୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରନି ହିକ୍ଷା। 17 ଇମ୍ଣାକାନ୍ ଆବା ଈଶ୍ୱର ଇଚାତାଙ୍ଗ୍ ପୁରା କିଦେଙ୍ଗ୍ ଇଚାକିନାନ୍। ହେୱାନ୍ନେ ପୁଞ୍ଜେଙ୍ଗ୍ ଆଡ୍ନାନ୍ ଇଦାଙ୍ଗ୍ ଈଶ୍ୱରନି ହିକ୍ଷା କି ନା ଜାର୍ ହିକ୍ଷା। 18 ଇମ୍ଣାକାନ୍ ତା ଜାର୍ କାତା ୱେଚ୍ନାନ୍, ହେୱାନ୍ ଜାର୍ କାଜିଙ୍ଗ୍ ସନ୍ମାନ୍ ଡେକ୍ନାନ୍। ମାତର୍ ଇନେର୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତିଙ୍ଗ୍ ସନ୍ମାନ୍ ହିଦେଙ୍ଗ୍ ଇଚାକିନାନ୍, ହେୱାନ୍ନେ ଦରମ୍ ମାନାୟ୍ ହେୱାନ୍ତାକେ ଇନାକାପା ଅଦରମ୍ ବେଣ୍ ହିଲୁତ୍। 19 ଇଦାଙ୍ଗ୍ ସତ୍ ମୋଶା ଲେକିକିତି ନିୟମ୍ନି ସାସ୍ତର୍ ମିଙ୍ଗେଙ୍ଗ୍ ହିତ୍ତାନ୍ନା। ମାତର୍ ମି ବିତ୍ରେତାଙ୍ଗ୍ ଇନେର୍ ପା ହେ ନିୟମ୍ତିଙ୍ଗ୍ ମାନି କିଉଦେରା। ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ଅସ୍ତେଦେଙ୍ଗ୍ ଉପାୟ୍ କିନାଦେରା?” 20 ମାନାୟାର୍ ୱେଚ୍ଚାର୍, “ନିଙ୍ଗେଙ୍ଗ୍ ବୁତ୍ଆତ୍ମା ଡୁତ୍ତାତ୍ନା। ଇନେର୍ ନିଙ୍ଗେଙ୍ଗ୍ ଅସ୍ତେଦେଙ୍ଗ୍ ଉପାୟ୍ କିଦ୍ନାରା?” 21 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ର ଚାନିଆଆନି କାମାୟ୍ କିତାଙ୍ଗ୍, ଆରେ ଏପେଙ୍ଗ୍ ୱିଜାକାଦେର୍ ଚାନିଆ ଆଜି ମାଚାଦେର୍। 22 ଭବିଷ୍ଯତବକ୍ତା ମୋଶା ମିଙ୍ଗେଙ୍ଗ୍ ସୁନତ କିନି ବିଦି ମାନି କିଦେଙ୍ଗ୍ ନିୟମ୍ ହିତ୍ତାନ୍, ମାତର୍ ମୋଶା ମିଙ୍ଗେଙ୍ଗ୍ ହିମ୍ଣାକାଙ୍ଗ୍ ସୁନତ କିନି ବିଷୟ ହିଦ୍ୱାତାନ୍ନା। ଇଦାଙ୍ଗ୍ ତ ମୋଶାତାଙ୍ଗ୍ ଆଗେ ମାଚି ମାନାୟାର୍ ତାକେଣ୍ଡାଙ୍ଗ୍ ୱାତାତ୍ନା। ଲାଗିଙ୍ଗ୍ ଏପେଙ୍ଗ୍ ହେପାଦ୍ନା ଜମ୍ନିଦିନ୍ ନାଞ୍ଜିଙ୍ଗ୍ ରକାନ୍ ହିମ୍ଣାତିଙ୍ଗ୍ ସୁନତ କିଜି ମାନାଟ୍। 23 ଇବେତାଙ୍ଗ୍ ପୁନିଆନାତ୍ ଯେ, ଇମ୍ଣାକାନିଙ୍ଗ୍ ମୋଶା ଲେକିକିତି ନିୟମ୍ନି ସାସ୍ତର୍ ମାନି କିଦେଙ୍ଗ୍ ଜମ୍ନିଦିନ୍ ନାଞ୍ଜିଙ୍ଗ୍ ସୁନତ କିନାର୍। ଲାଗିଙ୍ଗ୍ ଆନେଙ୍ଗ୍ ଜମ୍ନିଦିନ୍ ନାଞ୍ଜିଙ୍ଗ୍ ଇମ୍ଣାକାନିଙ୍ଗ୍ ୱିଜୁ ଗାଗାଡ଼୍ମୁଡ଼ି ହାର୍ କିତାଙ୍ଗ୍ ଲାଗିଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ ରିସା ଆଦ୍ନାଦେରା? 24 ଇମ୍ଣି ବିଷୟତିଙ୍ଗ୍ ପା ବାର୍ତ ହୁଡ଼୍ଜି ବିଚାର୍ କିମାଟ୍, ଇନାକା ଟିକ୍ ତା ଅନୁସାରେ ଏପେଙ୍ଗ୍ ବିଚାର୍ କିୟାଟ୍।” ଇୱାନ୍ ଇନାକା ଖ୍ରୀଷ୍ଟ? 25 ଯିରୁଶାଲାମ ସହର୍ତାକେ ବାହାକିତି କେତ୍ଜାଣ୍ ମାନାୟାର୍ ୱେଚ୍ଚାର୍, “ଇୱାନିଙ୍ଗ୍ ଯିହୁଦି ନେତାର୍ ମାର୍ନେ ଅସ୍ତେଙ୍ଗ୍ ଉପାୟ୍ କିଜି ମାଚାର୍, ଇୱାନ୍ ହେୱାନ୍ କି? 26 ମାତର୍ ହେୱାନ୍ ୱିଜାକାର୍ ୱେଚି ଲେକେ ଶୁଣାୟ୍ କିନାନା, ମାତର୍ ଇୱାନିଙ୍ଗ୍ ଇନାକା ୱେଚୁରା। ଇୱାନ୍ ଖ୍ରୀଷ୍ଟ ଇଞ୍ଜି ପୁଚାର୍? 27 ମାତର୍ ଆପେଙ୍ଗ୍ ପୁଚାପ୍ନା କି ଇୱାନ୍ ଇମେତାଙ୍ଗ୍ ୱାତାନ୍ନା। ମାତର୍ ଖ୍ରୀଷ୍ଟ ଏଚେପାଦ୍ନା ୱାନାନ୍, ହେୱାନ୍ ଇମେତାଙ୍ଗ୍ ୱାତାନ୍ନା ହେଦାଙ୍ଗ୍ ଇନେର୍ ପା ପୁନୁର୍।” 28 ଯୀଶୁ ଈଶ୍ୱର ମାନି ମନ୍ଦିର୍ତାକେ ହିକ୍ଷା ହିନିହିଙ୍ଗ୍ ଗାଜାକାଟ୍ କିଜି ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ପୁନ୍ଞ୍ଚାଦେର୍ନା, ଆରେ ଆନେଙ୍ଗ୍ ଇମେତାଙ୍ଗ୍ ୱାତାଙ୍ଗ୍ନା ହେଦାଙ୍ଗ୍ ପା ଏପେଙ୍ଗ୍ ପୁଚାଦେର୍ନା। ମାତର୍ ଆନେଙ୍ଗ୍ ନା ଆଦିକାର୍ତାଙ୍ଗ୍ ୱାୱାତାଙ୍ଗ୍ନା। ମାତର୍ ଏପେଙ୍ଗ୍ ହେୱାନିଙ୍ଗ୍ ପୁନୁଦେରେ। 29 ମାତର୍ ଆନେଙ୍ଗ୍ ହେୱାନିଙ୍ଗ୍ ପୁଚାଙ୍ଗ୍ନା। ଇନେସ୍କି ଆନେଙ୍ଗ୍ ହେୱାନ୍ତାଙ୍ଗ୍ ୱାତାଙ୍ଗ୍ନା, ଆରେ ହେୱାନ୍ ନାଙ୍ଗେଙ୍ଗ୍ ପକ୍ତାତାନ୍ନା।” 30 ଯୀଶୁ ଇବେଣ୍ ୱେଚ୍ନିହିଙ୍ଗ୍ ମାନାୟାର୍ ହେୱାନିଙ୍ଗ୍ ଆସ୍ତେଙ୍ଗ୍ ଉପାୟ୍ କିତାର୍। ମାତର୍ ଇନେର୍ ପା ହେୱାନିଙ୍ଗ୍ ଆସ୍ପେଦେଙ୍ଗ୍ ଆଡ୍ୱାତାର୍। ହେପାଦ୍ନା ପା ହେୱାନ୍ ହାଃନି ଟିକ୍ ସମୟ୍ ଆୱାଦାଙ୍ଗ୍ ମାଚାତ୍। 31 ବେସିହେନି ମାନାୟ୍ ଯୀଶୁଙ୍ଗ୍ ପାର୍ତି କିଜି ମାନାୟାର୍ ୱେଚ୍ଚାର୍, “ଇୱାନ୍ ଏଚେକ୍ କାମାୟ୍ କିତାନ୍ନା, ଖ୍ରୀଷ୍ଟ ୱାତିସ୍ ଇୱାନ୍ତାଙ୍ଗ୍ ଆଦିକ୍ ଚାନିଆଆନି କାମାୟ୍ କିଦେଙ୍ଗ୍ ଆଡ୍ନାନ୍ କି?” ଯୀଶୁଙ୍ଗ୍ ବନ୍ଦିକିଦେଙ୍ଗ୍ ଯିହୁଦି ନେତାର୍ ଉପାୟ୍ କିତାର୍ 32 ଯୀଶୁ ବିଷୟରେ ମାନାୟାର୍ ୱେଚ୍ନି ବେଣ୍ ପାରୁସିଦଳ୍ ୱେଚାର୍। ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ନି ମାନାୟାର୍ ଯୀଶୁଙ୍ଗ୍ ଆସ୍ତେଙ୍ଗ୍ କେତେକ୍ ହେନି ମନ୍ଦିର୍ନି ସେନାରିଙ୍ଗ୍ ପକ୍ତାର୍। 33 ତାପାଚେ ଯୀଶୁ ୱେଚ୍ଚାନ୍, “ଆନେଙ୍ଗ୍ ମିହୁଦାଙ୍ଗ୍ ଅଲପ୍ ସମୟ୍ ମାନ୍ଗାନାଙ୍ଗ୍। ନାଙ୍ଗେଙ୍ଗ୍ ଇନେର୍ ପକ୍ତାତାର୍ନା ଆନେଙ୍ଗ୍ ହେୱାନ୍ ଲାଗାୟ୍ ହାନାଙ୍ଗ୍। 34 ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତାନାଦେର୍, ମାତର୍ ନାଙ୍ଗେଙ୍ଗ୍ ଗାଟାଆଦୁଦେର୍। ଆରେ ଆନେଙ୍ଗ୍ ଇମେତାକେ ମାନ୍ଗାନାଙ୍ଗ୍, ହେବେ ଏପେଙ୍ଗ୍ ହାଞ୍ଜେଙ୍ଗ୍ ଆଡୁଦେର୍।” 35 ଯିହୁଦିର୍ ଜାର୍-ଜାର୍ ୱେଚ୍ପା ୱେଚ୍ପି ଆତାର୍, “ଇୱାନ୍ ଇମେତାକେ ହାନାନ୍ ଆସେଙ୍ଗ୍ ଇୱାନିଙ୍ଗ୍ ଗାଟାଆଉସ୍? ଇୱାନ୍ ଇନାକା ବିନ୍ଜାତିନି ନାସ୍କୁକାଙ୍ଗ୍ ହାଲ୍ଜି ହିକ୍ଷାହିଦେଙ୍ଗ୍ ହତାନ୍ନା କି? ଇମେତାକେ ମା ବିଚାଆତି ଲକ୍ବାକ୍ ମାନାର୍। 36 ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତାନାଦେର୍, ମାତର୍ ଗାଟାଆଦୁଦେର୍। ଆରେ ଆନେଙ୍ଗ୍ ଇମେତାକେ ମାନ୍ଗାନାଙ୍ଗ୍ ଏପେଙ୍ଗ୍ ହେବେ ୱାଦେଙ୍ଗ୍ ଆଡୁଦେର୍। ଇ କାତାନି ଅର୍ତ ଇନାକା?” ଯୀଶୁ ଜିବୁନ୍ ହିଦ୍ନି ଜାରିଆ 37 ପାର୍ବୁନି ସେସ୍ଦିନ୍ତ ଯୀଶୁ ନିଲ୍ଚି ଗାଜାକାଟ୍ କିଜି ୱେଚ୍ଚାନ୍, “ଇମ୍ଣାକାନ୍ ଯଦି ଏସ୍କି ଆନାନ୍, ହେୱାନ୍ ନା ଲାଗାୟ୍ ୱାଜି ଉଣେନ୍। 38 ଦରମ୍ ସାସ୍ତର୍ତାକେ ଲେକାଆତି ଲେକେ, ଇମ୍ଣାକାନ୍ ନାବେ ପାର୍ତିକିନାନ୍ ତା ଗରବ୍ତାଙ୍ଗ୍ ଜିବୁନ୍ ହିଦ୍ନି ଏଜୁଙ୍ଗ୍ ହନିକ୍।” 39 ଇମ୍ଣାକାର୍ ଯୀଶୁତାକେ ପାର୍ତି କିଜି ମାଚାର୍, ଆରେ ହେୱାର୍ ଈଶ୍ୱରଆତ୍ମା ପାୟାଆନାକା ମାଚାତ୍। ହେୱାରିଙ୍ଗ୍ ଚଚ୍ଚି ଯୀଶୁ ଇ କାତା ୱେଚ୍ଚାନ୍। ଇନେସ୍କି ଈଶ୍ୱର ଯୀଶୁଙ୍ଗ୍ ଅଜଡ଼୍ କିୱାଦାଙ୍ଗ୍ ମାଚିଲେ, ହେୱାର୍ ଈଶ୍ୱରଆତ୍ମା ପାୟାଆୱାଦାଙ୍ଗ୍ ମାଚାର୍। ଯୀଶୁ ବିଷୟରେ ମାନାୟାର୍ ବିନ୍-ବିନ୍ ବେଣ୍ ୱେଚ୍ଚାର୍ 40 ଯୀଶୁ ବେଣ୍ କେତେକ୍ ହେନି ମାନାୟାର୍ ୱେନ୍ଞ୍ଜି ୱେଚ୍ଚାର୍, “ଇୱାନ୍ ହାତ୍ପା ହେ ଭବିଷ୍ଯତବକ୍ତା।” 41 ଜେକନିକାର୍ ୱେଚ୍ଚାର୍, “ହେୱାନ୍ ଖ୍ରୀଷ୍ଟ।” ଆରେ ଜେକନିକାର୍ ୱେଚ୍ଚାର୍, “ଗାଲିଲୀ ଜିଲ୍ଲାତାଙ୍ଗ୍ ଖ୍ରୀଷ୍ଟ ୱାଉନ୍। 42 ଦରମ୍ ସାସ୍ତର୍ତାକେ ଲେକା ମାନାତ୍ ଯେ, ଖ୍ରୀଷ୍ଟ ଦାଉଦ ରାଜା ପରିବାର୍ତାଙ୍ଗ୍ ୱାନାନ୍। ଆରେ ଦରମ୍ ସାସ୍ତର୍ତାକେ ଲେକା ମାନାତ୍ ଖ୍ରୀଷ୍ଟ ଦାଉଦ ରାଜାମାନି ବାହାନି ବେତଲିହିମ୍ ନାଟାଙ୍ଗ୍ ୱାନାନ୍।” 43 ଲାଗିଙ୍ଗ୍ ମାନାୟାର୍ ଯୀଶୁ ବିଷୟରେ ବିନ୍-ବିନ୍ ବେଣ୍ ୱେଚ୍ଚାର୍। 44 ମାନାୟାର୍ ବିତ୍ରେତାଙ୍ଗ୍ କେତେକ୍ ହେନି ଯୀଶୁଙ୍ଗ୍ ବନ୍ଦିକିଦେଙ୍ଗ୍ ଇଚାକିତାର୍। ମାତର୍ ଇନେର୍ ପା ହେୱାନିଙ୍ଗ୍ ଆହ୍ୱାତାର୍। 45 ଈଶ୍ୱର ମାନି ମନ୍ଦିର୍ନି ସେନାର୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ ଲାଗାୟ୍ ଲେଉଟା ଆଜି ୱାତାର୍। ପୁଜାରିର୍ ଆରେ ପାରୁସିଦଳ୍ ହେୱାରିଙ୍ଗ୍ ୱେନ୍ବାତାର୍, “ଏପେଙ୍ଗ୍ ଯୀଶୁଙ୍ଗ୍ ଇନା କିଦେଙ୍ଗ୍ ବନ୍ଦିକିଜି ତାସିୱାୱାତାଦେର୍?” 46 ଈଶ୍ୱର ମାନି ମନ୍ଦିର୍ନି ସେନାର୍ ୱେଚ୍ଚାର୍, “ହେୱାନ୍ ଇନାକା ୱେଚ୍ଚାନାନା, ହେଦାଙ୍ଗ୍ ଜେକନିକାର୍ ଇନେର୍ ପା ୱେଚ୍ଚେଙ୍ଗ୍ ଆଡୁର୍।” 47 ପାରୁସିଦଳ୍ ହେୱାରିଙ୍ଗ୍ ୱେଚ୍ଚାର୍, “ଏଲେଙ୍ଗ୍ଇଚି ଯୀଶୁ ମିଙ୍ଗେଙ୍ଗ୍ ପା ବକୁଆ ରସ୍ତାତାନ୍ନା। 48 ମା ନେତାର୍ କି ପାରୁସିଦଳ୍ ବିତ୍ରେତାଙ୍ଗ୍ ଇନେର୍ ପା ହେୱାନିଙ୍ଗ୍ ପାର୍ତି କିତାର୍ନା କି? 49 ଇମ୍ଣି ମାନାୟାର୍ ମୋଶା ଲେକିକିତି ନିୟମ୍ନି ସାସ୍ତର୍ ବିଦି ବିଷୟରେ ଇନାକାପା ପୁନ୍ୱାତାର୍ନା, ଇୱାର୍ ଈଶ୍ୱରତାଙ୍ଗ୍ ଦଣ୍ଡ୍ ପାୟାଆତି ମାନାୟ୍ ଲେକେ।” 50 ମାତର୍ ହେ ଦଳ୍ତାକେ ନିକଦିମ ତର୍ଦାକାନ୍ ରକାନ୍ ପାରୁସି ମାଚାନ୍। ହେୱାନ୍ ଆଗେ ର ମିକା ହାଲ୍ଜି ଯୀଶୁଙ୍ଗ୍ ୱେନ୍ବିସ୍ ମାଚାନ୍। 51 ନିକଦିମ ୱେଚ୍ଚାନ୍, “ମୋଶା ଲେକିକିତି ନିୟମ୍ନି ସାସ୍ତର୍ତାଙ୍ଗ୍ ଇମ୍ଣାକାର୍ କାତା ୱେନ୍ୱାଦାଙ୍ଗ୍ ବିଚାର୍ କିଉର୍। ହେୱାନ୍ ଇନାକା କିତାନ୍ନା, ଆସେଙ୍ଗ୍ ପୁନ୍ୱାଦାଙ୍ଗ୍ ତା ବିଚାର୍ କିଦେଙ୍ଗ୍ ଆଡୁସ୍।” 52 ଯିହୁଦି ନେତାର୍ ୱେଚ୍ଚାର୍, “ଏନେଙ୍ଗ୍ ଇନାକା ଗାଲିଲୀ ଜିଲ୍ଲାନି ମାନାୟାର୍ ବିତ୍ରେତାଙ୍ଗ୍ ରକାଇ? ଏପେଙ୍ଗ୍ ଦରମ୍ ସାସ୍ତର୍ ପିଡ଼ିକିୟାଟ୍, ଲାଗିଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍, ଇମ୍ଣି ଭବିଷ୍ଯତବକ୍ତା ପା ଗାଲିଲୀ ଜିଲ୍ଲାତାଙ୍ଗ୍ ୱାଉନ୍।” 53 ତାପାଚେ ହେ ବାହା ପିସ୍ତି ୱିଜୁ ଯିହୁଦି ନେତାର୍ ଜାର୍-ଜାର୍ ଇଞ୍ଜ ହାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation