ଜହନ୍ 21 - New Testament in Pengo Parja Languageସାତ୍ଜାଣ୍ ଚେଲାହିଙ୍ଗ୍ ଯୀଶୁ ଚଞ୍ଜିଆତାନ୍ 1 ଗାଲିଲୀ ଜିଲ୍ଲାନି ତିବିରିଆ ହାମ୍ଦୁର୍ କାଣ୍ଡିତାକେ ଯୀଶୁ ଚେଲାହିର୍ ମୁମ୍ଦ ଚଞ୍ଜିଆତାନ୍। ହେୱାନ୍ ହେଲେକେ ଚଞ୍ଜିଆତାନ୍। 2 କେତ୍ଜାଣ୍ ଚେଲାହିର୍ ରବେଆଜି ମାଚାର୍, ହେୱାର୍ ଆତାର୍ ଶିମୋନ ପିତର, ଥୋମା, କୁକ୍ନି ତର୍ ଦିଦୁମ। ଗାଲିଲୀ ଜିଲ୍ଲାନି କାନ୍ନା ସହର୍ନି ନିତନିୟେଲ, ଜେବଦି ମେହିର୍, ଆରେ ରିକାର୍ ଜେକନି ଚେଲାହିର୍। 3 ଶିମୋନ ପିତର ୱେଚ୍ଚାନ୍, “ଆନେଙ୍ଗ୍ ମିନ୍କୁ ଆସ୍ତେଙ୍ଗ୍ ହାନାଙ୍ଗା।” ଜେକନି ଚେଲାହିର୍ ୱେଚ୍ଚାର୍, “ଆପେଙ୍ଗ୍ ପା ନି ହୁଦାଙ୍ଗ୍ ୱାନାପ୍।” ଲାଗିଙ୍ଗ୍ ୱିଜୁ ଚେଲାହିର୍ ହାଲ୍ଜି ଡଙ୍ଗାତାକେ କୁଚ୍ଚାର୍। ହେୱାର୍ ମିନ୍କୁ ଆସ୍ତେଙ୍ଗ୍ ହାର୍ତାନାଣା ଉପାୟ୍ କିତାର୍, ମାତର୍ ଅଲପ୍ପା ଆସ୍ତେଙ୍ଗ୍ ଆଡ୍ୱାତାର୍। 4 ତା ଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ ଯୀଶୁ ହାମ୍ଦୁର୍ କାଣ୍ଡିତାକେ ନିଲ୍ଚି ମାଚାନ୍। ମାତର୍ ଚେଲାହିର୍ ହେୱାନିଙ୍ଗ୍ ଯୀଶୁ ଇଞ୍ଜି ପୁନ୍ୱାଦାଙ୍ଗ୍ ମାଚାର୍। 5 ତାପାଚେ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ସାଙ୍ଗ କାଦେର୍, ଏପେଙ୍ଗ୍ ମିନ୍କୁ ଆସ୍ତାଦେର୍ନା କି?” ଚେଲାହିର୍ ୱେଚ୍ଚାର୍, “ଆକାୟ୍।” 6 ଯୀଶୁ ୱେଚ୍ଚାନ୍, “ମି ଜାଲ୍ ଡଙ୍ଗାନି ତିନାବାଗାୟ୍ନି ଏଜୁକାଙ୍ଗ୍ ଇଡ଼ାଟ୍। ଏପେଙ୍ଗ୍ ହେବେ ମିନ୍କୁ ଆହ୍ନାଦେର୍।” ଚେଲାହିର୍ ହେଲେକେ କିତାର୍। ହେୱାର୍ ଏଚେକ୍ ମିନ୍କୁ ଅସ୍ତାର୍ ଯେ, ହେୱାର୍ ଜାଲ୍ତିଙ୍ଗ୍ ଡଙ୍ଗା ଲାଗାୟ୍ ଜେଲ୍ଦେଙ୍ଗ୍ ଆଡ୍ୱାତାର୍। 7 ଯୀଶୁ ଇମ୍ଣି ଚେଲାହିଙ୍ଗ୍ ଲାଡ୍କିଜି ମାଚାନ୍, ହେୱାନ୍ ଶିମୋନ ପିତରତିଙ୍ଗ୍ ୱେଚ୍ଚାନ୍, “ଇୱାନ୍ତ ମାପୃ।” ଇଞ୍ଜି ପିତର ତା ଜପ୍ଣି କଟ୍ ରିକ୍ଚି ଇଡ଼୍ଜି ମାଚାନ୍, ହେ କଟ୍ତିଙ୍ଗ୍ ଉସ୍ପିସ୍ କାଣ୍ଡିତାକେ ଉମ୍ଜି ହାଞ୍ଜେଙ୍ଗ୍ ଏଜୁକାଙ୍ଗ୍ ଗୁମ୍ତାନ୍। 8 ଜେକନି ଚେଲାହିର୍ ଡଙ୍ଗା ହୁଦାଙ୍ଗ୍ କାଣ୍ଡିତାକେ ହାଚାର୍। ହେୱାର୍ ମିନ୍କୁ ବାର୍ତି ଆତି ଜାଲ୍ତିଙ୍ଗ୍ ଜେଲ୍ତାର୍। ହେୱାର୍ କାଣ୍ଡିତାଙ୍ଗ୍ ବେସି ଦେହା ହିଲ୍ୱାତାର୍, ମାତର୍ ଦୁଇଶ ଆତ୍ ଦେହା ମାଚାର୍। 9 ଚେଲାହିର୍ ଏଚେପାଦ୍ନା ଡଙ୍ଗାତାଙ୍ଗ୍ ଜୁଜି କାଣ୍ଡିତାକେ ଇକାତାର୍, ହେୱାର୍ ହେପାଦ୍ନା ଗଡାକାଙ୍ଗ୍ ନାଣି କାଚାଆନାକା ହୁଡ଼୍ତାର୍। ହେବେ ନାଣି ଜପି ମିନ୍ ମାଚାତ୍, ଆରେ ଇଚ୍କେ ରୁଟି ପା ମାଚାତ୍। 10 ତାପାଚେ ଯୀଶୁ ୱେଚ୍ଚାନ୍, “ଏପେଙ୍ଗ୍ ଆସ୍ତି କେତେକ୍ ମିନ୍କୁ ତାଡ।” 11 ଶିମୋନ ପିତର ଡଙ୍ଗାତାକେ ହାଚାନ୍, ଆରେ ମିନ୍କୁ ବାର୍ତି ଆତି ଜାଲ୍ତିଙ୍ଗ୍ କାଣ୍ଡିତାକେ ଜେଲ୍ତାନ୍। ହେ ଜାଲ୍ଦ ଗାଜା-ଗାଜା ମିନ୍କୁ ୧୫୩ ଗାଟା ମିନ୍କୁ ମାଚିକ୍। ମିନ୍କୁ ବେସି ଅଜନ୍ ମାଚିକ୍, ମାତର୍ ଜାଲ୍ କେଞ୍ଜ୍ୱାଦାଙ୍ଗ୍ ମାଚାତ୍। 12 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ୱାଡ ଆରେ ତିନାଟ୍।” ଚେଲାହିର୍ ବିତ୍ରେତାଙ୍ଗ୍ ଏନେଙ୍ଗ୍ ଇନେର୍ ଇଞ୍ଜି, “ୱେନ୍ବେଦେଙ୍ଗ୍ ଇନେର୍ ପା ଶାସ୍ କିୱାତାର୍?” ଇନେସ୍କି ହେୱାନ୍ନେ ମାପୃ ଇଞ୍ଜି ପୁନ୍ଞ୍ଜି ମାଚାର୍। 13 ଯୀଶୁ ହେୱାର୍ ଲାଗାୟ୍ ୱାଜି ଆଗେ ରୁଟି ହେୱାରିଙ୍ଗ୍ ବାଟାକିଜି ହିତାନ୍। ଆରେ ହେଲେକେ ମିନ୍କୁ ପା ହିତାନ୍। 14 ଯୀଶୁ ହାଃତିତାଙ୍ଗ୍ ଜିବୁନ୍ଆଜି ନିଙ୍ଗ୍ତି ପାଚେ ଚେଲାହିରିଙ୍ଗ୍ ଇ ତିନ୍ହଟ୍ ଚଞ୍ଜିଆତାନ୍। ଯୀଶୁ ପିତର ହୁଦାଙ୍ଗ୍ ବେଣ୍କିତାନ୍ 15 ହେୱାର୍ ଚିଚି ପାଚେ ଯୀଶୁ ଶିମୋନ ପିତରତିଙ୍ଗ୍ ୱେଚ୍ଚାନ୍, “ଯୋହନ ମେହି ଶିମୋନ। ଏନେଙ୍ଗ୍ ଇନାକା ନାଙ୍ଗେଙ୍ଗ୍ ଇୱାର୍ତାଙ୍ଗ୍ ଆଦିକ୍ ଲାଡ୍ କିଦ୍ନାୟା?” ପିତର ହେୱାନିଙ୍ଗ୍ ୱେଚ୍ଚାନ୍, “ଆଁ ମାପୃ, ଏନେଙ୍ଗ୍ ପୁନାଇ ଆନେଙ୍ଗ୍ ନିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା।” ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନା ମେଣ୍ଢାକାଙ୍ଗ୍ ହାରାଇ କିୟା।” 16 ତାପାଚେ ଯୀଶୁ ଆରେରଗ ହେୱାନିଙ୍ଗ୍ ୱେଚ୍ଚାନ୍, “ଯୋହନ ମେହି ଶିମୋନ, ଏନେଙ୍ଗ୍ ଇନାକା ନାଙ୍ଗେଙ୍ଗ୍ ଲାଡ୍ କିଦ୍ନାୟା?” ପିତର ୱେଚ୍ଚାନ୍, “ଆଁ ମାପୃ, ଏନେଙ୍ଗ୍ ପୁଚାଇନା ଯେ, ଆନେଙ୍ଗ୍ ନିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା।” ତାପାଚେ ଯୀଶୁ ୱେଚ୍ଚାନ୍, “ନା ମେଣ୍ଢାକାଙ୍ଗ୍ ଜାତୁନ୍ କିୟା।” 17 ଆରେ ତିନ୍ହଟ୍ ହେୱାନ୍ ହେୱାନିଙ୍ଗ୍ ୱେନ୍ବାତାନ୍, “ଯୋହନ ମେହି ଶିମୋନ, ଏନେଙ୍ଗ୍ ନାଙ୍ଗେଙ୍ଗ୍ ଲାଡ୍ କିଦ୍ନାୟା କି?” ପିତର ଦୁକ୍ ଆତାନ୍, ଇନେସ୍କି ଯୀଶୁ ହେୱାନିଙ୍ଗ୍ ତିନ୍ହଟ୍ ହେ ବେଣ୍ ୱେନ୍ବାତାନ୍, “ନାଙ୍ଗେଙ୍ଗ୍ ଲାଡ୍ କିଦ୍ନାୟା କି?” ପିତର ୱେଚ୍ଚାନ୍, “ମାପୃ, ଏନେଙ୍ଗ୍ ୱିଜୁ ବିଷୟ ପୁଚାଇନା। ଆନେଙ୍ଗ୍ ନିଙ୍ଗେଙ୍ଗ୍ ଲାଡ୍ କିଦ୍ନାନ୍ ଇଞ୍ଜି ଏନେଙ୍ଗ୍ ପୁଚାଇନା।” ଯୀଶୁ ପିତରତିଙ୍ଗ୍ ୱେଚ୍ଚାନ୍, “ନା ମେଣ୍ଢାକାଙ୍ଗ୍ ଚିଚ୍ପା। 18 ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏନେଙ୍ଗ୍ ଏଚେପାଦ୍ନା ବେଣ୍ଡିଆ ମାଚାଇ, ହେପାଦ୍ନା ଏନେଙ୍ଗ୍ ମେଙ୍ଗାକାଙ୍ଗ୍ ଜାର୍ ହେନ୍ଦ୍ରା ଗାଚ୍ଚି ମି ଇଚାତାଙ୍ଗ୍ ଇମ୍ଣି ବାହାତାକେ ପା ହାଲ୍ଜି ମାଚାଇ। ମାତର୍ ବୁଡ଼ା ଆତିଲେ ଏନେଙ୍ଗ୍ କେଇ ଲାମାୟ୍ କିନାଇ ଆରେ ଇମେନିପଣ୍ ମି ଇଚା ହିଲ୍ଗୁତ୍, ହେବେ ଜେକନିକାର୍ ମିଙ୍ଗେଙ୍ଗ୍ ଅସାହାଞ୍ଜ୍ନାର୍।” 19 ଈଶ୍ୱର ଜୟ୍-ଜୟ୍ କାଜିଙ୍ଗ୍ ପିତର ଇନେସ୍ ହାଃନାନ୍, ଇଦାଙ୍ଗ୍ ପୁନିକିଦେଙ୍ଗ୍ ଯୀଶୁ ହେଲେକେ ୱେଚ୍ଚି ମାଚାନ୍। ତାପାଚେ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନା ପାଚେ ୱା।” ଯୀଶୁ ଆରେ ତା ଲାଡ୍ ଚେଲାହି 20 ପିତର ମାସ୍ଜି ହୁଡ଼୍ତାନ୍ ଯେ, ଇମ୍ଣି ଚେଲାହିଙ୍ଗ୍ ଯୀଶୁ ଲାଡ୍କିଜି ମାଚାନ୍, ହେୱାନ୍ ହେୱାର୍ ପାଚେ ୱାନାନା। ହେ ମିକା ବଜି ତିନିହିଙ୍ଗ୍, ହେ ଚେଲାହି ଯୀଶୁ ଲାଗାୟ୍ ଆରେ ଅଲପ୍ ଗେଣ୍ଜି, ୱେନ୍ବିସ୍ ମାଚାନ୍, “ମାପୃ, ମା ବିତ୍ରେ ଇନେର୍ ନି ବିରୁଦ୍ତାକେ ହାନାପା?” 21 ହେ ଚେଲାହିଙ୍ଗ୍ ପାଚ୍ବାଗାୟ୍ ୱାନାକା ହୁଡ଼୍ଜି ପିତର ଯୀଶୁଙ୍ଗ୍ ୱେନ୍ବାତାନ୍, “ମାପୃ, ତା ବିଷୟରେ ଇନାକା ଆନାତ୍?” 22 ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଆରେରଗ ୱାନିଦିନ୍ ପାତେକ୍ ହେୱାନ୍ ଜିଜି ମାନେନ୍ ଇଞ୍ଜି ଯଦି ଆନେଙ୍ଗ୍ ଇଚା କିନାଙ୍ଗ୍, ଲାଗିଙ୍ଗ୍ ହେବେ ମିଦାଙ୍ଗ୍ ଇନାକା ମାନାତ୍? ଏପେଙ୍ଗ୍ ନା ପାଚେ ୱାଡ।” 23 ଲାଗିଙ୍ଗ୍ ଟଣ୍ଡାହିର୍ ବିତ୍ରେତାଙ୍ଗ୍ ଇ କାତା ୱେଚ୍ପାଆତାର୍। ହେୱାର୍ ୱେଚ୍ଚି ମାଚାର୍ ଯେ, ଯୀଶୁ ଇମ୍ଣି ଚେଲାହିଙ୍ଗ୍ ଲାଡ୍ କିନାନା, ହେ ଚେଲାହି ହାଃଉନ୍। ମାତର୍ ଯୀଶୁ ଇ କାତା ପିତରତିଙ୍ଗ୍ ୱେଚ୍ୱାଦାଙ୍ଗ୍ ମାଚାନ୍, ମାତର୍ ଜେକନି ଚେଲାହିର୍ ହାଃଉର୍, ଯଦି ଆନେଙ୍ଗ୍ ଇଚା କିନାଙ୍ଗ୍, ଲାଗିଙ୍ଗ୍ ହେବେ ମିଦାଙ୍ଗ୍ ଇନାକା ମାନାତ୍? 24 ହେ ଚେଲାହି ଇୱିଜୁ କାତା ୱେଚ୍ନାନା। ହେୱାନ୍ ଆନାନା ହେ ମାନାୟ୍ ଇନେର୍କି ଇୱିଜୁ କାତା ଲେକିକିତାନ୍ନା। ଆସେଙ୍ଗ୍ ପୁନାସ୍ନା, ହେୱାନ୍ ଇନାକା ୱେଚ୍ଚାତାନ୍ନା ହେଦାଙ୍ଗ୍ ସତ୍। ସେସ୍ କାତା 25 ଯୀଶୁ ଆରେ କେତେକ୍ କାମାୟ୍ କିଜି ମାଚାନ୍। ଆନେଙ୍ଗ୍ ମାନ୍ତ ବାବିକିନାଙ୍ଗା ଯେ, ଯୀଶୁନି ୱିଜୁ ବିଷୟ ଯଦି ସାସ୍ତର୍ତାକେ ଲେକାଆଜି ମାଚିସ୍, ଲାଗିଙ୍ଗ୍ ହେ ବହିଙ୍ଗ୍ ଇଡ଼୍ଦେଙ୍ଗ୍ ପୁର୍ତିତାକେ ପା ବାହା ହିଲ୍ୱାତାତ୍ମା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation