ଜହନ୍ 16 - New Testament in Pengo Parja Language1 ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ କାତା ୱେଚ୍ଚାତାଙ୍ଗ୍ନା, “ଇନେସ୍ ଲେକେ ମାନାୟାର୍ ମି ପାର୍ତି କିନାକା ବାନ୍ୟା କିଦେଙ୍ଗ୍ ଆଡ଼୍ଦୁର୍। 2 ମିଙ୍ଗେଙ୍ଗ୍ ମାନାୟାର୍ ହେୱାର୍ ପାର୍ତାନା ଇଞ୍ଜାଙ୍ଗ୍ ହପ୍ତାନାର୍। ଆଁ, ହେଲେକେ ସମୟ୍ ୱାନାତା, ଏଚେପାଦ୍ନା ମାନାୟାର୍ ବାବିକିନାର୍ ଯେ, ମିଙ୍ଗେଙ୍ଗ୍ ଆହ୍ନି କାଜିଙ୍ଗ୍ ହେୱାର୍ ଈଶ୍ୱରତିଙ୍ଗ୍ ହେବାକିନାରା। 3 ହେୱାର୍ ହେଲେକେ କିନାର୍, ହେଦାଙ୍ଗ୍ କାଜିଙ୍ଗ୍ ନା ଆବା ଈଶ୍ୱରତିଙ୍ଗ୍ ପୁନୁରେ, ଆରେ ହେୱାର୍ ନାଙ୍ଗେଙ୍ଗ୍ ପା ପୁଞ୍ଜୁରେ। 4 ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ କାତା ନଙ୍ଗୟ୍ ୱେଚ୍ଚାତାଙ୍ଗ୍ନା, ଲାଗିଙ୍ଗ୍ ଏଚେପାଦ୍ନା ଇୱିଜୁ ଗଟାଆନିଦିନ୍ ୱାନାତ୍, ହେପାଦ୍ନା ଏପେଙ୍ଗ୍ ମାନ୍ତ ଏତୁ କିନାଦେର୍, ଆନେଙ୍ଗ୍ ଆଗେତାଙ୍ଗ୍ ଇୱିଜୁ କାତା ମିଙ୍ଗେଙ୍ଗ୍ ୱେଚ୍ୱାଦାଙ୍ଗ୍ ମାନ୍ଞ୍ଚାଙ୍ଗ୍। ଇନେସ୍କି ଆନେଙ୍ଗ୍ ମିହୁଦାଙ୍ଗ୍ ମାଚାଙ୍ଗ୍।” ପବିତ୍ର ଆତ୍ମାତି କାମାୟ୍ 5 ନଙ୍ଗୟ୍ ଆନେଙ୍ଗ୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱର ଲାଗାୟ୍ ହାନାଙ୍ଗା। ଲାଗିଙ୍ଗ୍ ଏପେଙ୍ଗ୍ ୱେନ୍ବାଆଦୁଦେରା ଏନେଙ୍ଗ୍ ଇମେ ହାନାୟା। 6 ମି ଗରବ୍ନି ଦୁକ୍ତାକେ ବାର୍ତି ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ ୱେଚ୍ଚାତାଙ୍ଗ୍। 7 ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଆନେଙ୍ଗ୍ ଇବେତାଙ୍ଗ୍ ହାନାକା ମି କାଜିଙ୍ଗ୍ ହାର୍। ଇନେସ୍କି ଆନେଙ୍ଗ୍ ହାଚି ପାଚେ ଆନେଙ୍ଗ୍ ହେ ସାଇଜ କିଦ୍ନାକାନିଙ୍ଗ୍ ପକ୍ତାନାଙ୍ଗ୍। ମାତର୍ ଆନେଙ୍ଗ୍ ଯଦି ହାଲୁଙ୍ଗ୍, ଲାଗିଙ୍ଗ୍ ସାଇଜ କିଦ୍ନାକାନ୍ ୱାଉନ୍। 8 ଏଚେପାଦ୍ନା ହେୱାନ୍ ୱାନାନ୍, ହେୱାନ୍ ପାପ୍, ଦରମ୍ ଆରେ ବିଚାର୍କିନି ବିଷୟରେ ପୁର୍ତିନି ମାନାୟାରିଙ୍ଗ୍ ଚଚ୍ନାନ୍। 9 ଆରେ ପାପ୍ ବିଷୟରେ ୱେଚ୍ନାନ୍, ଇନେସ୍କି ହେୱାର୍ ନାବେ ପାର୍ତି କିଉରା। 10 ଦରମ୍ ବିଷୟ କାଜିଙ୍ଗ୍ ଆନେଙ୍ଗ୍ ଆବା ଈଶ୍ୱରତାକେ ହାନାଙ୍ଗା, ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦେଙ୍ଗ୍ ଆଡ଼୍ଦୁଦେର୍। 11 ନ୍ୟାୟ୍ ବିଚାର୍ ବିଷୟରେ ପୁର୍ତିତିଙ୍ଗ୍ ଚଚ୍ନାନ୍, ଇନେସ୍କି ପୁର୍ତିନି ସାସନ୍ କିନି ଶୟତାନ୍ ବିଚାର୍ ଆତାନେ। 12 ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚେଦେଙ୍ଗ୍ ବେସି କାତା ମାନାତ୍। ମାତର୍ ନଙ୍ଗୟ୍ ଏପେଙ୍ଗ୍ ବୁଜା ଆଦେଙ୍ଗ୍ ଆଡୁଦେର୍। 13 ମାତର୍ ଏଚେପାଦ୍ନା ଈଶ୍ୱରଆତ୍ମା ୱାନାତ୍, ହେପାଦ୍ନା ହେୱାନ୍ ମିଙ୍ଗେଙ୍ଗ୍ ୱିଜୁ ସତ୍ ହାଜ୍ଦିଙ୍ଗ୍ ଅସାହାଞ୍ଜ୍ନାନ୍। ହେୱାନ୍ ତା ଜାର୍ କାତା ୱେଚ୍ଚୁନ୍। ଈଶ୍ୱର ହେୱାନିଙ୍ଗ୍ ଇନାକା ୱେଚ୍ନାନ୍, ହେଦାଙ୍ଗ୍ ହେୱାନ୍ ୱେଚ୍ଚାନାନ୍। ହେୱାନ୍ ନଙ୍ଗୟ୍ୱାନି ଗଟ୍ନା ବିଷୟରେ ୱେଚ୍ଚାନାନ୍। 14 ଈଶ୍ୱରଆତ୍ମା ନା ଜୟ୍-ଜୟ୍ କିଦ୍ନାତ୍। ହେୱାନ୍ ଇନାକା ନାବେତାଙ୍ଗ୍ ୱେନ୍ଞ୍ଜି ହେ ସତ୍ ବିଷୟ ମିଙ୍ଗେଙ୍ଗ୍ ୱେଚ୍ଚାନାନ୍। 15 ଇନାକା ଆବା ଈଶ୍ୱରତି ହେଦାଙ୍ଗ୍ ନାଦି। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା, ଈଶ୍ୱରଆତ୍ମା ନାବେତାଙ୍ଗ୍ ୱିଜୁ କାତା ୱେନ୍ଞ୍ଜି ମିଙ୍ଗେଙ୍ଗ୍ ୱେଚ୍ଚାନାନ୍।” ଦୁକ୍ ସୁକ୍ତାକେ ବାଦ୍ଲା ଆନାତ୍ 16 ଆରେରଗ ଯୀଶୁ ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଅଲପ୍ ସମୟ୍ ହାଚି ପାଚେ ହୁଡ଼୍ଦୁଦେର୍। ତାପାଚେ ଆରେ ଅଲପ୍ ସମୟ୍ ହାଚି ପାଚେ ଏପେଙ୍ଗ୍ ନାଙ୍ଗେଙ୍ଗ୍ ଆରେ ହୁଡ଼୍ଦାନାଦେର୍।” 17 କେତ୍ଜାଣ୍ ଚେଲାହିର୍ ଜାର୍-ଜାର୍ବିତ୍ରେ ୱେଚ୍ପାଆତାର୍, “ଯୀଶୁ ଇଲେକେ ୱେଚ୍ନି ଅର୍ତ ଇନାକା? ଏପେଙ୍ଗ୍ ନାଙ୍ଗେଙ୍ଗ୍ ଅଲପ୍ ସମୟ୍ ହାଚି ପାଚେ ହୁଡ଼୍ଦୁଦେର୍। ତାପାଚେ ଆରେ ଅଲପ୍ ସମୟ୍ ହାଚି ପାଚେ ଏପେଙ୍ଗ୍ ନାଙ୍ଗେଙ୍ଗ୍ ଆରେ ହୁଡ଼୍ଦାନାଦେର୍। ଇନେସ୍କି ଆନେଙ୍ଗ୍ ନା ଆବା ଈଶ୍ୱର ଲାଗାୟ୍ ହାନାଙ୍ଗା।” 18 ହେଦାଙ୍ଗ୍ କାଜିଙ୍ଗ୍ ଚେଲାହିର୍ ୱେନ୍ବାତାର୍, “ଅଲପ୍ ସମୟ୍ ଅର୍ତ ଇନାକା?” ହେୱାନ୍ ଇଲେକେ ଇନାକା ୱେଚ୍ଚାନାନା, “ଆପେଙ୍ଗ୍ ଅଲପ୍ପା ବୁଜାଆଉପା।” 19 ଯୀଶୁ ପୁଚାନ୍ ଯେ, ଚେଲାହିର୍ ହେୱାନିଙ୍ଗ୍ ଇ ବିଷୟରେ ୱେନ୍ବେଦେଙ୍ଗ୍ ଇଚା କିନାରା। ଲାଗିଙ୍ଗ୍ ହେୱାନ୍ ଚେଲାହିରିଙ୍ଗ୍ ୱେଚ୍ଚାନ୍, “ଅଲପ୍ ସମୟ୍ ହାଚି ପାଚେ ନାଙ୍ଗେଙ୍ଗ୍ ହୁଡ଼୍ଦେଦେଙ୍ଗ୍ ଆଡ଼୍ଦୁଦେର୍, ଆରେ ଅଲପ୍ ସମୟ୍ ହାଚି ପାଚେ ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦାନାଦେର୍।” ଇ ବେଣ୍ତିଙ୍ଗ୍ ଏପେଙ୍ଗ୍ ୱେନ୍ବାଆନାଦେରା କି? 20 ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଏପେଙ୍ଗ୍ ଆଡ଼୍ବାନାଦେର୍, ଆରେ ଦୁକ୍ଆନାଦେର୍, ମାତର୍ ପୁର୍ତିନି ମାନାୟାର୍ ୱାରି ଆନାର୍। ଏପେଙ୍ଗ୍ ଦୁକ୍ଆନାଦେର୍, ମାତର୍ ମି ଦୁକ୍ ସୁକ୍ତାକେ ବାଦ୍ଲା ଆନାତ୍। 21 ଏଚେପାଦ୍ନା ର କଗ୍ଲେ ର ହିମ୍ଣାତିଙ୍ଗ୍ ଜନମ୍ କିନିହିଙ୍ଗ୍ ନନାକା ଆହି ଆନାତ୍, ଇନେସ୍କି ତା ଜନମ୍କିନି ସମୟ୍ ୱାଜି ମାନ୍ଗାନାତ୍। ମାତର୍ ତା ହିମ୍ଣାତିଙ୍ଗ୍ ଜନମ୍ ହିତି ପାଚେ ହେଦେଲ୍ ନନାକାଦିଙ୍ଗ୍ ବାଣା ଆନାତ୍। ପୁର୍ତିତାକେ ହିମ୍ଣା ଜନମ୍ ଆତିଲେ ହେଦେଲ୍ ନଙ୍ଗୟ୍ ୱାରି ଆନାତ୍। 22 ହେଲେକେ ଏପେଙ୍ଗ୍ ନଙ୍ଗୟ୍ ଦୁକ୍ ପାୟା ଆତାଦେର୍ନା। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ଆରେ ଗିଟା ଆଦ୍ନାଙ୍ଗ୍, ଆରେ ଏପେଙ୍ଗ୍ ୱାରିଆ ଆନାଦେର୍। ଆରେ ମି ୱାରି ଆନାକାଦିଙ୍ଗ୍ ଇନେର୍ କିସ୍ତି ଅଦେଙ୍ଗ୍ ଆଡୁର୍। 23 ହେ ଦିନ୍ ୱାତିସ୍ ଏପେଙ୍ଗ୍ ନାଙ୍ଗେଙ୍ଗ୍ ଇନାକା ଏନ୍ତୁଦେର୍। ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ନା ତର୍ଦାଙ୍ଗ୍ ଏପେଙ୍ଗ୍ ଆବା ଈଶ୍ୱରତିଙ୍ଗ୍ ଇନାକା ଏନ୍ନାଦେର୍, ହେୱାନ୍ ହେଦାଙ୍ଗ୍ ହିଦ୍ନାନ୍। 24 ନଙ୍ଗୟ୍ ପାତେକ୍ ଏପେଙ୍ଗ୍ ନା ତର୍ଦାଙ୍ଗ୍ ଇନାକା ଏନୁଦେରେ। ଲାଗିଙ୍ଗ୍ ଆବା ଈଶ୍ୱରତିଙ୍ଗ୍ ଏନାଟ୍, ଏପେଙ୍ଗ୍ ପାୟାଆନାଦେର୍, ଆରେ ଏପେଙ୍ଗ୍ ୱାରି ଆନାଦେର୍।” ଯୀଶୁ ପୁର୍ତିତିଙ୍ଗ୍ ଜିତାଆତାନ୍ 25 ଆରେରଗ ଯୀଶୁ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ କାତା ଲେକେକିଜି ଇୱିଜୁ ବିଷୟ ୱେଚ୍ଚାନାଙ୍ଗା। ମାତର୍ ସମୟ୍ ୱାନାତା, ହେପାଦ୍ନା ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ କାତା ୱେଚ୍ନିଲେକେ କିଜି ୱେଚ୍ଚୁଙ୍ଗ୍। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ଆବା ଈଶ୍ୱର ବିଷୟରେ ପୁରା ୱେଚ୍ଚାନାଙ୍ଗ୍। 26 ଏପେଙ୍ଗ୍ ହେ ଦିନ୍ ଆବା ଈଶ୍ୱରତିଙ୍ଗ୍ ନା ତର୍ଦାଙ୍ଗ୍ କେତେକ୍ ବିଷୟ ପାର୍ତାନା କିଜି ଏନ୍ନାଦେର୍। ଆନେଙ୍ଗ୍ ୱେଚ୍ଚାନାଙ୍ଗା, ମି କାଜିଙ୍ଗ୍ ନାଙ୍ଗେଙ୍ଗ୍ ଆବା ଈଶ୍ୱରତିଙ୍ଗ୍ ଇନାକା ୱେଚ୍ଚେଙ୍ଗ୍ ଦର୍କାର୍ ପଡ଼ାଆଦୁତ୍। 27 ଆବା ଈଶ୍ୱର ମିଙ୍ଗେଙ୍ଗ୍ ଲାଡ୍ କିଦ୍ନାନ୍। ହେୱାନ୍ ମିଙ୍ଗେଙ୍ଗ୍ ଲାଡ୍ କିଦ୍ନାନ୍, ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ଲାଡ୍ କିତ୍ତାଦେର୍ନା। ହେୱାନ୍ ମିଙ୍ଗେଙ୍ଗ୍ ଲାଡ୍ କିଦ୍ନାନ୍, ଇନେସ୍କି ଆନେଙ୍ଗ୍ ଆବା ଈଶ୍ୱରତାଙ୍ଗ୍ ୱାତାଙ୍ଗ୍ନା ଇଞ୍ଜି ଏପେଙ୍ଗ୍ ପାର୍ତି କିତ୍ତାଦେର୍ନା। 28 ଆନେଙ୍ଗ୍ ଇ ପୁର୍ତିତିଙ୍ଗ୍ ଆବା ଈଶ୍ୱରତାଙ୍ଗ୍ ୱାତାଙ୍ଗ୍ନା। ନଙ୍ଗୟ୍ ଆନେଙ୍ଗ୍ ଇ ପୁର୍ତି ପିସ୍ତି ଆବା ଈଶ୍ୱରତାକେ ହାନାଙ୍ଗ୍।” 29 ଯୀଶୁ ଚେଲାହିର୍ ୱେଚ୍ଚାର୍, “ଏନେଙ୍ଗ୍ ୱିଜାକାରିଙ୍ଗ୍ ହାର୍ଦାଙ୍ଗ୍ ୱେଚ୍ନାୟା। ବୁଜା ଆୱିତିଲେକେ କଷ୍ଟ ବେଣ୍ ଏନେଙ୍ଗ୍ ୱେଚ୍ଚୁୟା। 30 ଆପେଙ୍ଗ୍ ନଙ୍ଗୟ୍ ବୁଜା ଆଦେଙ୍ଗ୍ ଆଡ୍ନାପା, ଆରେ ଏନେଙ୍ଗ୍ ମା ପ୍ରଶ୍ନ କାଜିଙ୍ଗ୍ ଇନେରିଙ୍ଗ୍ ୱେନ୍ବିନି ଦର୍କାର୍ ଆକାଇ, ଇନେସ୍କି ଆପେଙ୍ଗ୍ ପାର୍ତି କିନାପା, ଏନେଙ୍ଗ୍ ଆବା ଈଶ୍ୱରତାଙ୍ଗ୍ ୱାତାଇନା।” 31 ଯୀଶୁ ୱେଚ୍ଚାନ୍, “ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ପାର୍ତି କିନାଦେରା? 32 ୱେନାଟ୍! ସମୟ୍ ୱାନାତା, ଏଚେପାଦ୍ନା ଏପେଙ୍ଗ୍ ଚିନ୍-ବିନ୍ ଆନାଦେର୍। ମି ବିତ୍ରେତାଙ୍ଗ୍ ୱିଜାକାର୍ ଜାର୍-ଜାର୍ ଇଲ୍ ବିତ୍ରେ ଚିନ୍-ବିନ୍ ଆଜି ହନ୍ନାଦେର୍। ହେ ସମୟ୍ ୱାଜି ଏକାୱାତାତେ। ଏପେଙ୍ଗ୍ ରକାଙ୍ଗ୍ ନାଙ୍ଗେଙ୍ଗ୍ ପିସ୍ତାନାଦେର୍। ଆନେଙ୍ଗ୍ ରକାଙ୍ଗ୍ ମାନ୍ଗାନାଙ୍ଗ୍। ମାତର୍ ଆନେଙ୍ଗ୍ ରକାଙ୍ଗ୍ ଆକାୟ୍, ଇନେସ୍କି ଆବା ଈଶ୍ୱର ନା ହୁଦାଙ୍ଗ୍ ମାନାନ୍। 33 ନାବେ ଏପେଙ୍ଗ୍ ଇନେସ୍ ଶାନ୍ତି ପାୟାଆନାଦେର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱିଜୁ କାତା ୱେଚ୍ଚାତାଙ୍ଗ୍ନା। ଇ ପୁର୍ତିତାକେ ଏପେଙ୍ଗ୍ କଷ୍ଟ ପାୟାଆନାଦେର୍। ଲାଗିଙ୍ଗ୍ ଶାସ୍ ଆଡୁ, ଆନେଙ୍ଗ୍ ପୁର୍ତିତିଙ୍ଗ୍ ଜିତା ଆତାଙ୍ଗ୍ନା।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation