ଜହନ୍ 11 - New Testament in Pengo Parja Languageଲାଜାର ହାଃତି କାତା 1 ଲାଜର ତର୍ଦାକାନ୍ ବେସି ବେମାର୍ ମାଚାନ୍। ହେୱାନ୍ ବେଥନିଆ ନାସ୍ ବାହାକିଜି ମାଚାନ୍। ହେବେ ମରିୟମ ଆରେ ତା ତଣ୍ଦେହି ମାର୍ଥା ପା ବାହାକିଜି ମାଚିକ୍। 2 ଇ ମରିୟମ ରଗ ମାପୃ ଯୀଶୁ କାଲ୍ପାନାତାକେ ଦାମ୍କିୟା ବାସ୍ନା ଚିକାଣ୍ ୱାକ୍ଚି କାପ୍ଡ଼ା ତେମୁଲ୍ ହୁଦାଙ୍ଗ୍ କାଲ୍ପାନା ନେନ୍ନ୍ଦି ମାଚାତ୍। ହେୱେକ୍ ଟଣ୍ଡାହି ଲାଜର ବେମାର୍ତ ମାଚାନ୍। 3 ଲାଗିଙ୍ଗ୍ ମରିୟମ ଆରେ ମାର୍ଥା ଯୀଶୁଙ୍ଗ୍ ୱେଚ୍କେଦେଙ୍ଗ୍ ରକାନିଙ୍ଗ୍ ପକ୍ତିକ୍। ହେୱେକ୍ ୱେଚ୍ଚି ପକ୍ତିକ୍, “ମାପୃ, ନି ଲାଡ୍ ସାଙ୍ଗଦି ଲାଜାର ବେସି ବେମାର୍ତାକେ ମାନାନ୍।” 4 ଯୀଶୁ ଇ କାତା ୱେନ୍ଞ୍ଜି ୱେଚ୍ଚାନ୍, “ଇ ବେମାର୍ତାଙ୍ଗ୍ ଲାଜାର ହାଃଉନ୍। ମାତର୍ ଇ ବେମାର୍ ଈଶ୍ୱର କାଜିଙ୍ଗ୍ ଜୟ୍-ଜୟ୍, ଆରେ ଈଶ୍ୱର ମେହି ଇଦାଙ୍ଗ୍ ଜୟ୍-ଜୟ୍ ପାୟା ଆନାନ୍।” 5 ଯୀଶୁ, ମାର୍ଥା ତା ତଣ୍ଦେହିଙ୍ଗ୍ ଆରେ ଲାଜରତିଙ୍ଗ୍ ବେସି ଲାଡ୍କିଜି ମାଚାନ୍। 6 ହେୱାନ୍ ଲାଜାର ବେମାର୍ ବିଷୟ ୱେନ୍ଞ୍ଜି ଇମେତାକେ ମାଚାନ୍, ହେବେ ଆରେ ହେୱାନ୍ ରିଦିନ୍ ମାନ୍ଗାତାନ୍। 7 ତାପାଚେ ଯୀଶୁ ତା ଚେଲାରିଙ୍ଗ୍ ୱେଚ୍ଚାନ୍, “ଜାଡ, ଆସେଙ୍ଗ୍ ଆରେରଗ ଯିହୁଦା ଜିଲ୍ଲାତାକେ ହାନାସ୍।” 8 ଚେଲାହିର୍ ୱେଚ୍ଚାର୍, “ଗୁରୁ, ଯିହୁଦା ଜିଲ୍ଲାତାକେ ତ ନିଙ୍ଗେଙ୍ଗ୍ କେତେଦିନ୍ ଆଗେ କାଲ୍କୁ ହୁଦାଙ୍ଗ୍ ଇଡ଼୍ଦେଦେଙ୍ଗ୍ ଯିହୁଦି ନେତାର୍ ଉପାୟ୍ କିଜି ମାନ୍ଞ୍ଚାର୍। ଏନେଙ୍ଗ୍ ଆରେ ହେବେ ହାଞ୍ଜେଙ୍ଗ୍ ମାନ୍ କିନାୟା।” 9 ଯୀଶୁ ୱେଚ୍ଚାନ୍, “ର ଦିନ୍ତିଙ୍ଗ୍ ବାର ଘଣ୍ଟା ଅଜଡ଼୍ ମାନ୍ଗାନାତ୍। ରକାନ୍ ମାନାୟ୍ ୱେଡ଼ାଲିଙ୍ଗ୍ ତାଙ୍ଗ୍ତିସ୍ ହେୱାନ୍ ଅଜୁନ୍ କି ଗୁରୁନ୍, ଇନେସ୍କି ପୁର୍ତିନି ଅଜଡ଼୍ତାକେ ହେୱାନ୍ ହୁଡ଼୍ଦେଙ୍ଗ୍ ଆଡ୍ନାନ୍। 10 ମାତର୍ ମିକାଲିଙ୍ଗ୍ ରକାନ୍ ମାନାୟ୍ ଅଜ୍ନାନ୍, ଇନେସ୍କି ମିକାଲିଙ୍ଗ୍ ହେୱାନିଙ୍ଗ୍ ହୁଡ଼ିକିଦେଙ୍ଗ୍ ଅଜଡ଼୍ ହିଲ୍ଗୁତ୍।” 11 ଯୀଶୁ ଇ କାତା ୱେଚ୍ଚି ୱିସ୍ତି ପାଚେ, ୱେଚ୍ଚାନ୍, “ମା ସାଙ୍ଗ ଲାଜର ନଙ୍ଗୟ୍ ହୁନ୍ଞ୍ଚାନ୍ନା। ମାତର୍ ଆନେଙ୍ଗ୍ ହେୱାନିଙ୍ଗ୍ ନିକ୍ତେଙ୍ଗ୍ ହେବେ ହାନାଙ୍ଗା।” 12 ଚେଲାହିର୍ ହେୱାନିଙ୍ଗ୍ ୱେଚ୍ଚାର୍, “ମାପୃ, ହେୱାନ୍ ଯଦି ହୁନ୍ଞ୍ଚାନ୍ନା, ଲାଗିଙ୍ଗ୍ ହେୱାନ୍ ହେ ବେମାର୍ତାଙ୍ଗ୍ ହାର୍ ଆନାନ୍।” 13 ଯୀଶୁ ତା ଚେଲାହିଙ୍ଗ୍ ୱେଚ୍ନି ଅର୍ତ ଇଦାଙ୍ଗ୍ ମାଚାତ୍ କି ଲାଜାର ହାଃତାନେ। ମାତର୍ ତା ଚେଲାହିର୍ ଏଲେଙ୍ଗ୍ ହୁଞ୍ଜ୍ନି ବିଷୟରେ ୱେଚ୍ଚାନାନା ଇଞ୍ଜି ବାବିକିଜି ମାଚାର୍। 14 ଲାଗିଙ୍ଗ୍ ଯୀଶୁ ଚେଲାହିରିଙ୍ଗ୍ ହାର୍ଦାଙ୍ଗ୍ ୱେଚ୍ଚାନ୍, “ଲାଜର ହାଃତାନେ, 15 ଆନେଙ୍ଗ୍ ହେବେ ହିଲାତାଙ୍ଗ୍, ଆନେଙ୍ଗ୍ ମି କାଜିଙ୍ଗ୍ ୱାରି କିନାଙ୍ଗା, ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ନାଦେର୍। ଜାଡ, ନଙ୍ଗୟ୍ ଆସେଙ୍ଗ୍ ତା ଲାଗାୟ୍ ହାନାସ୍।” 16 ତାପାଚେ ଥୋମା ଇନେରିଙ୍ଗ୍ କି ଦିଦୁମ ଇଞ୍ଜିମାଚାର୍, ହେୱାନ୍ ଜେକନି ଚେଲାହିଙ୍ଗ୍ ୱେଚ୍ଚାନ୍, “ଜାଡ ଆସେଙ୍ଗ୍ ପା ଯୀଶୁ ହୁଦାଙ୍ଗ୍ ଯିହୁଦା ଜିଲ୍ଲାତାକେ ହାଃଦେଙ୍ଗ୍ ହାନାସ୍।” ଯୀଶୁ ହାଃତି ଲାଜାରତିଙ୍ଗ୍ ଜିବୁନ୍ କିତାନ୍ 17 ଯୀଶୁ ବେଥନିଆ ନାଟ ଏକିତି ପାଚେ ରକାନ୍ ହେୱାନିଙ୍ଗ୍ ୱେଚ୍ଚାନ୍, ଲାଜାର ହାଃଜି ଦୁଗେର୍ ମୁଚ୍ଚି ଚାରିଦିନ୍ ଆତାତେ। 18 ବେଥନିଆ ନାଟାଙ୍ଗ୍ ଯିରୁଶାଲାମ ସହର୍ ତିନ୍ କିଲମିଟର୍ ଦେହା। 19 ବେସିହେନି ଯିହୁଦି ନେତାର୍ ମାର୍ଥା ଆରେ ମରିୟମ ଲାଗାୟ୍ ୱାତାର୍। ହେୱାର୍ ମାର୍ଥା ଆରେ ମରିୟମତିଙ୍ଗ୍ ତା ଟଣ୍ଡାହି ଲାଜାର କାଜିଙ୍ଗ୍ ବୁଜାଇ କିଦେଙ୍ଗ୍ ୱାଜିମାଚାର୍। 20 ଯୀଶୁ ୱାନାନା ଇଞ୍ଜି ମାର୍ଥା ୱେଚାତ୍। ହେଦେଲ୍ ଯୀଶୁଙ୍ଗ୍ ଗିଟାଆଦେଙ୍ଗ୍ ହାଚାତ୍। ମାତର୍ ମରିୟମ ଇଞ୍ଜ କୁଚ୍ଚି ମାଚାତ୍। 21 ମାର୍ଥା ଯୀଶୁଙ୍ଗ୍ ୱେଚ୍ଚାତ୍, “ମାପୃ, ଏନେଙ୍ଗ୍ ଯଦି ଇବେ ମାଚିସ୍, ନା ଟଣ୍ଡେନ୍ ହାଃୱାତାନ୍ମା। 22 ମାତର୍ ନଙ୍ଗୟ୍ ପା ଆନେଙ୍ଗ୍ ପୁନାଙ୍ଗ୍ ଯେ, ଏନେଙ୍ଗ୍ ଇନାକା ଏନ୍ନାଇ, ଈଶ୍ୱର ହେଦାଙ୍ଗ୍ ନିଙ୍ଗେଙ୍ଗ୍ ହିଦ୍ନାନ୍।” 23 ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ମି ଟଣ୍ଡାଦି ଆରେରଗ ଜିବୁନ୍ଆଜି ନିଙ୍ଗ୍ନାନ୍।” 24 ମାର୍ଥା ହେୱାନିଙ୍ଗ୍ ୱେଚ୍ଚାତ୍, “ଆନେଙ୍ଗ୍ ପୁନାଙ୍ଗ୍, ଆରେରଗ ଜିବୁନ୍ଆଜି ନିଙ୍ଗ୍ନି ଦିନ୍ତ ହେପାଦ୍ନା ୱିଜାକାର୍ ହାଃତିତାଙ୍ଗ୍ ଜିବୁନ୍ଆଜି ନିଙ୍ଗ୍ନାର୍, ହେପାଦ୍ନା ହେୱାନ୍ ପା ହାଃତିତାଙ୍ଗ୍ ନିଙ୍ଗ୍ନାନ୍।” 25 ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଇନେର୍ ଯଦି ନାବେ ପାର୍ତି କିନାକାର୍, ହେୱାନ୍ ହାଃତିସ୍ ପା ଆରେରଗ ଜିବୁନ୍ ଆନାନ୍, ଆରେ ଜିବୁନ୍ ମାନ୍ଗାନାର୍। 26 ନାବେ ମାନାକାର୍ ଆରେ ନାବେ ପାର୍ତି କିନାକାର୍ ଇନାୱେଡ଼ାଙ୍ଗ୍ ପା ହାଃଉର୍। ମାର୍ଥା, ଏନେଙ୍ଗ୍ ଇନାକା ଇଦାଙ୍ଗ୍ତିଙ୍ଗ୍ ପାର୍ତି କିନାୟା କି?” 27 ମାର୍ଥା ୱେଚ୍ଚାତ୍, “ଆଁ ମାପୃ, ଆନେଙ୍ଗ୍ ନିଙ୍ଗେଙ୍ଗ୍ ଖ୍ରୀଷ୍ଟ ଇଞ୍ଜି ପାର୍ତି କିଦ୍ନାଙ୍ଗା। ଏନେଙ୍ଗ୍ ଈଶ୍ୱର ମେହି। ଇନେର୍ ଇ ପୁର୍ତିତାକେ ୱାନାକା ମାଚାତ୍, ଏନେଙ୍ଗ୍ ହେୱାଇ।” ଯୀଶୁ ଆଡ଼୍ବାତାନ୍ 28 ମାର୍ଥା ଇୱିଜୁ କାତା ୱେଚ୍ଚି ପାଚେ ତଣ୍ଦେଲ୍ ମରିୟମତିଙ୍ଗ୍ କୁକ୍ତେଙ୍ଗ୍ ହାଚାତ୍। ହେଦେଲ୍ ମରିୟମ ହୁଦାଙ୍ଗ୍ କାତାବାର୍ତା ଆତାତ୍। ହେଦେଲ୍ ୱେଚ୍ଚାତ୍, “ଇବେ ଗୁରୁ ମାନାନ୍, ହେୱାନ୍ ନିଙ୍ଗେଙ୍ଗ୍ ଦାସ୍ତାନାନା।” 29 ମରିୟମ ଇବେଣ୍ ୱେନ୍ଞ୍ଜି ଯୀଶୁ ଲାଗାୟ୍ ସାଙ୍ଗେ-ସାଙ୍ଗେ ୱାତାତ୍। 30 ଯୀଶୁ ହେ ସମୟ୍ ପାତେକ୍ ନାଟ ୱାୱାଦାଙ୍ଗ୍ ମାଚାନ୍। ମାର୍ଥା ହେୱାନିଙ୍ଗ୍ ଇମ୍ଣି ବାହାତାକେ ହୁଡ଼୍ଜି ମାଚାତ୍, ହେପାଦ୍ନା ପାତେକ୍ ହେୱାନ୍ ହେବାହାତାକେ ମାଚାନ୍। 31 ଯିହୁଦି ନେତାର୍ ମରିୟମ ହୁଦାଙ୍ଗ୍ ଇଞ୍ଜ କୁଚ୍ଚି ମାଚାର୍। ହେୱାର୍ ହେଦେଲିଙ୍ଗ୍ ବୁଜାଇକିଜି ମାଚାର୍। ହେୱାର୍ ହେଦାପ୍ରେ ମରିୟମତିଙ୍ଗ୍ ତର୍ବର୍ ଆଜି ବାର୍ତ ହାନାକା ହୁଡ଼୍ତାର୍। ହେ ଯିହୁଦି ମାନାୟାର୍ ବାବିକିତାର୍ ଯେ, ହେଦେଲ୍ ହେ ଲାଜାର ଦୁଗେର୍ତାକେ ଆଡ଼୍ବେଦେଙ୍ଗ୍ ହାନାତା। ଲାଗିଙ୍ଗ୍ ହେୱାର୍ ପା ତାପାଚେ-ପାଚେ ହାଚାର୍। 32 ମରିୟମ ଯୀଶୁ ମାନି ବାହାତାକେ ହାଚାତ୍। ଯୀଶୁଙ୍ଗ୍ ହୁଡ଼୍ଜି ତା କାଲ୍କୁ ତାରେନ୍ ଡାଣ୍ଡାହାରାଣ୍ ମାଗ୍ଜି ୱେଚ୍ଚାତ୍, “ମାପୃ, ଏନେଙ୍ଗ୍ ଯଦି ଇବେ ମାଚିସ୍, ନା ଟଣ୍ଡେନ୍ ହାଃୱାତାନ୍ମା।” 33 ଯୀଶୁ ମରିୟମ ଆରେ ଯିହୁଦି ମାନାୟାରିଙ୍ଗ୍ ତା ହୁଦାଙ୍ଗ୍ ଆଡ଼୍ବାନାକା ହୁଡ଼୍ତାନ୍। ଯୀଶୁ ହେୱାର୍ ଆଡ଼୍ବାନାକା ହୁଡ଼୍ଜି ବେସିଦୁକ୍ କିତାନ୍, ଆରେ ହେୱାନିଙ୍ଗ୍ ଗରବ୍ତାକେ ବେସି କଷ୍ଟ ଆତାତ୍। 34 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଲାଜାରତିଙ୍ଗ୍ ଇମେତାକେ ଇଡ଼୍ତାଦେର୍ନା?” ହେୱାର୍ ୱେଚ୍ଚାର୍, “ମାପୃ, ୱାଜି ହୁଡ଼ା।” 35 ତାପାଚେ ଯୀଶୁ ଆଡ଼୍ବାତାନ୍। 36 ଲାଗିଙ୍ଗ୍ ଯିହୁଦି କେତେକ୍ ମାନାୟାର୍ ୱେଚ୍ଚାର୍, “ହୁଡ଼ା, ଯୀଶୁ ଲାଜାରତିଙ୍ଗ୍ ଏଚେକ୍ ଲାଡ୍କିଜି ମାଚାନ୍।” 37 ମାତର୍ କେତ୍ଜାଣ୍ ଯିହୁଦିର୍ ୱେଚ୍ଚାର୍, “ଯୀଶୁ କାଣାଲଗାଙ୍ଗ୍ କାଣ୍ଗାତିଙ୍ଗ୍ ହାର୍ କିଜି ମାଚାନ୍। ଲାଗିଙ୍ଗ୍ ହେୱାନ୍ ଲାଜାରତିଙ୍ଗ୍ ହାଃନିତାଙ୍ଗ୍ ଜିବୁନ୍ କିଦେଙ୍ଗ୍ ଇନାକା ଆଡ୍ୱାତାନ୍?” ଯୀଶୁ ହାଃତି ଲାଜାରତିଙ୍ଗ୍ ଜିବୁନ୍ କିତାନ୍ 38 ଲାଗିଙ୍ଗ୍ ଯୀଶୁ ଆରେରଗ ଗରବ୍ତାକେ ଦୁକ୍ଆଜି ଲାଜାର ଦୁଗେର୍ ଲାଗାୟ୍ ୱାତାନ୍। ହେ ଦୁଗେର୍ ରଞ୍ଜାଙ୍ଗ୍ ପାରା ଲେକେ ମାଚାତ୍, ଆରେ ହେ ପାରା ମୁମ୍ଦ ର ଗାଜାକାଲ୍ ଡାବାଇ କିଜି ମାଚାର୍। 39 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇ କାଲ୍ତିଙ୍ଗ୍ ଗୁଚାଇ କିୟାଟ୍।” ମାର୍ଥା ହାଃତି ଲାଜାର ତଣ୍ଦେହି ଯୀଶୁଙ୍ଗ୍ ୱେଚ୍ଚାତ୍, “ମାପୃ, ହେୱାନ୍ ହାଃଜି ଚାରିଦିନ୍ ଆତାତେ। ଲାଗିଙ୍ଗ୍ ବେସି ବାସ୍ନା ଆଜି ମାନ୍ଗାନାତ୍।” 40 ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ଇନାକା ୱେଚ୍ଚି ମାନ୍ଞ୍ଚାଙ୍ଗ୍, ହେଦାଙ୍ଗ୍ ମାନ୍ତ ଏତୁ କିୟା। ଏନେଙ୍ଗ୍ ଯଦି ନାଙ୍ଗେଙ୍ଗ୍ ପାର୍ତି କିତିସ୍, ଈଶ୍ୱର ଗୌରବ କିନାକା ହୁଡ଼୍ଦେଙ୍ଗ୍ ଆଡ୍ନାଇ।” 41 ଲାଗିଙ୍ଗ୍ ହେୱେକ୍ ହେ ମୁମ୍ଦ ଡାବାଇ କିତି କାଲ୍ତିଙ୍ଗ୍ ଗୁଚାଇ କିତିକ୍। ତାପାଚେ ଯୀଶୁ ବାଦାଡ଼୍ଜପି ମୁମ୍କିଜି ୱେଚ୍ଚାନ୍, “ଏ ନା ଆବା ଈଶ୍ୱର, ନିଙ୍ଗେଙ୍ଗ୍ ଦନ୍ଯବାଦ୍ ହିଦ୍ନାଙ୍ଗା, ଇନେସ୍କି ଏନେଙ୍ଗ୍ ନା କାତା ୱେଚାଇ। 42 ଆନେଙ୍ଗ୍ ପୁଚାନାଙ୍ଗ୍ନା ଏନେଙ୍ଗ୍ ୱିଜୁଦିନ୍ ନା କାତା ୱେନାୟା। ମାତର୍ ଏନେଙ୍ଗ୍ ନାଙ୍ଗେଙ୍ଗ୍ ପକ୍ତାତାଇନା ଇଞ୍ଜି ଇବେ ନିଲ୍ତି ମାନାୟାର୍ ଇନେସ୍ କିଜି ପାର୍ତି କିଦ୍ନାର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଏଲେଙ୍ଗ୍ ୱେଚ୍ଚାଙ୍ଗ୍।” 43 ତାପାଚେ ଯୀଶୁ ଗାଜାକାଟ୍ କିଜି କୁକ୍ତାନ୍, “ଲାଜର, ବାର୍ତ ୱା।” 44 ହାଃଜି ମାଚି ଲାଜାର ବାର୍ତ ୱାତାନ୍। ହେୱାନ୍ କେଇଦ ଆରେ କାଲ୍କୁକାଙ୍ଗ୍ କାଦିଆ ହୁର୍ପି ଆଜି ମାଚାତ୍। ଆରେ ତା ମୁମ୍ଦ ର କାଦିଆ ହୁର୍ପି ଆଜି ମାଚାତ୍। ଯୀଶୁ ମାନାୟାରିଙ୍ଗ୍ ୱେଚ୍ଚାନ୍, “ହେ ହୁର୍ପିତି କାଦିଆ ଉନ୍ଦାଟ୍, ଆରେ ଇୱାନିଙ୍ଗ୍ ହାଞ୍ଜେଙ୍ଗ୍ ହିୟାଟ୍।” ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଯିହୁଦି ନେତାର୍ ଉପାୟ୍ କିତାର୍ ( ମାଥି. ୨୬:୧-୫ ; ମାର୍କ. ୧୪:୧-୨ ; ଲୁକ. ୨୨:୧-୨ ) 45 ଯିହୁଦି ବେସିହେନି ମାନାୟାର୍ ହେବେ ମରିୟମ ତାକେ ୱାଜିମାଚାର୍। ହେୱାର୍ ୱିଜାକାର୍ ଯୀଶୁ କିତି କାମାୟ୍ ହୁଡ଼୍ତାର୍। ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଯିହୁଦି ମାନାୟାର୍ ହେୱାନିଙ୍ଗ୍ ପାର୍ତି କିତାର୍। 46 ମାତର୍ କେତ୍ଜାଣ୍ ଯିହୁଦିର୍ ପାରୁସିଦଳ୍ ତାକେ ହାଚାର୍। ହେୱାର୍ ଯୀଶୁ କିତି କାମାୟ୍ତିଙ୍ଗ୍ ପାରୁସିଦଳ୍ ନିକାରିଙ୍ଗ୍ ୱେଚ୍ଚାର୍। 47 ତାପାଚେ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ ବିଚାର୍ କିଜି ମିଟିଙ୍ଗ୍ କିତାର୍। ଆରେ ହେୱାର୍ ୱେଚ୍ଚାର୍, “ଆସେଙ୍ଗ୍ ଇନାକା କିନି ଦର୍କାର୍? ଇୱାନ୍ ବେସି ଚାନିଆଆନି କାମାୟ୍ କିନାନା। 48 ଆସେଙ୍ଗ୍ ଯଦି ହେୱାନିଙ୍ଗ୍ ହେଲେକେ କାମାୟ୍ କିଦେଙ୍ଗ୍ ପିସ୍ତି ହିନାସ୍, ହେୱାନିଙ୍ଗ୍ ୱିଜାକାର୍ ପାର୍ତିକିନାର୍। ତାପାଚେ ରୋମ ଦେସ୍ତାକାର୍ ୱାଜି ମା ମନ୍ଦିର୍ତିଙ୍ଗ୍ ଆରେ ମା ଜାତିରିଙ୍ଗ୍ ନଷ୍ଟ କିନାର୍।” 49 ହେୱାର୍ ବିତ୍ରେତାଙ୍ଗ୍ ରକାନ୍ କୟାପା ତର୍ଦାକାନ୍ ମାଚାନ୍। ହେୱାନ୍ ହେ ବାର୍ହୁତିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାଚାନ୍। କୟାପା ୱେଚ୍ଚାନ୍, “ଏପେଙ୍ଗ୍ ଇନାକା ପୁନୁଦେରେ? 50 ଆସେଙ୍ଗ୍ ୱିଜୁଜାତି ହାଃନି ବାଦୁଲ୍ ରକାନ୍ ହାଃନାକା ହାର୍। ମାତର୍ ଏପେଙ୍ଗ୍ ହେଦାଙ୍ଗ୍ ମାନ୍ତ ଏତୁ କିଉଦେରା।” 51 କୟାପା ହେୱାନ୍ ନିଜେ ହେ କାତା ବାବିକିଦେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ହେୱାନ୍ ହେ ବାର୍ହୁତିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାଚିଲେ, ଇ କାତା ତା ୱେଇଦାଙ୍ଗ୍ ହସିମାଚାତ୍। ଯୀଶୁ ଯିହୁଦି ଜାତିର୍ କାଜିଙ୍ଗ୍ ଜିବୁନ୍ ହିନାନ୍। 52 ଆଁ ଯିହୁଦି ଜାତିର୍ କାଜିଙ୍ଗ୍, ଇସ୍ରାଏଲ ଜାତିନି ମାନାୟାର୍ କାଜିଙ୍ଗ୍ ଆରେ ଇମ୍ଣାକାର୍ ପୁର୍ତି ଚାରିବେଣ୍ତାଙ୍ଗ୍ ଈଶ୍ୱରତାଙ୍ଗ୍ ଚିନ୍ବିନ୍ ଆତାକାରିଙ୍ଗ୍ ପା ୱିଜାକାରିଙ୍ଗ୍ ଏକ୍ କିଦେଙ୍ଗ୍ ଯୀଶୁ ହାଃନାନ୍। 53 ଲାଗିଙ୍ଗ୍ ହେଦିନ୍ତାଙ୍ଗ୍ ଯିହୁଦିର୍ ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। 54 ଲାଗିଙ୍ଗ୍ ଯୀଶୁ ଯିହୁଦିର୍ ଲାଗାୟ୍ ଚଞ୍ଜିଆଆଜି ବୁଲାଆୱାତାନ୍, ହେୱାନ୍ ଯିରୁଶାଲାମ ସହର୍ ପିସ୍ତି ଟାଙ୍ଗ୍ରାବାହା ଲାଗାୟ୍ ମାନି ର ଏପ୍ରିୟିମ୍ ସହର୍ତାକେ ହାଚାନ୍। ଆରେ ତା ଚେଲାହିର୍ ହୁଦାଙ୍ଗ୍ ମାଚାନ୍। 55 ଯିହୁଦିର୍ ନିସ୍ତାର୍ ପାର୍ବୁ ଲାଗେ ଏକିୱାତାତ୍। ବେସିହେନି ମାନାୟାର୍ ନିସ୍ତାର୍ ପାର୍ବୁ ଆୱି ଆଗେ ନାଟାଙ୍ଗ୍ କେତ୍ଦିନ୍ ଆଗେ ଯିରୁଶାଲାମ ସହର୍ତାକେ ୱାତାର୍, ହେୱାର୍ ପାର୍ବୁ କାଜିଙ୍ଗ୍ ଜାର୍ତିଙ୍ଗ୍ ପବିତ୍ର କିଦେଙ୍ଗ୍ କେତେକ୍ କାମାୟ୍ କିଦେଙ୍ଗ୍ ହାଚାର୍। 56 ହେୱାର୍ ଯୀଶୁଙ୍ଗ୍ ଦାସ୍ତାର୍, ଆରେ ହେୱାର୍ ଈଶ୍ୱର ମାନି ମନ୍ଦିର୍ ପିଣ୍ଡାତାକେ ୱେଚ୍ପା-ୱେଚ୍ପି ଆତାର୍, “ଏପେଙ୍ଗ୍ ଇନାକା ବାବିକିନାଦେରା? ହେୱାନ୍ ଇନାକା ନିସ୍ତାର୍ ପାର୍ବୁତିଙ୍ଗ୍ ୱାନାନା?” 57 ମାତର୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ ଯୀଶୁ ବିଷୟରେ ର ଆଦେସ୍ ହିଜି ମାଚାର୍। ହେୱାର୍ ୱେଚ୍ଚି ମାଚାର୍ ଯେ, ଯୀଶୁ ଇମେତାକେ ମାନାନ୍ ଇଦାଙ୍ଗ୍ ପୁଚାକାର୍ ସାଙ୍ଗେ-ସାଙ୍ଗେ ୱାଜି ମାଙ୍ଗେଙ୍ଗ୍ ୱେଚ୍ଚାନାର୍। ଲାଗିଙ୍ଗ୍ ଆପେଙ୍ଗ୍ ଯୀଶୁଙ୍ଗ୍ ଆସ୍ତି ବନ୍ଦିକିଦେଙ୍ଗ୍ ଆଡ୍ନାପ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation