ଜହନ୍ 10 - New Testament in Pengo Parja Languageଯୀଶୁ ହାର୍ଦି ମେଣ୍ଢାଗଡ଼ିଆ 1 ଯୀଶୁ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇମ୍ଣାକାନ୍ ଦୁୱେର୍ ନିପଣ୍ ଆଜି ମେଣ୍ଢାହାଡ଼ାତାକେ ହଣ୍ୱାଦାଙ୍ଗ୍ ଜେକନିପଣ୍ ବାଡ଼୍ ଗୁମ୍ଜି ହଣାନ୍, ହେୱାନ୍ ଚର୍ କି ଡାକୁ। 2 ମାତର୍ ଇମ୍ଣାକାନ୍ ମେଣ୍ଢାକାଙ୍ଗ୍ ଜାତୁନ୍ ଅନାନ୍, ହେୱାନ୍ ଦୁୱେର୍ ନିପଣ୍ ଆଜି ହାନାନ୍। ହେୱାନ୍ନେ ମେଣ୍ଢାଗଡ଼ିଆ। 3 ଦୁୱେର୍ ଜାଗୁୱାଡ଼ି ମେଣ୍ଢାଗଡ଼ିଆ କାଜିଙ୍ଗ୍ ଦୁୱେର୍ ଜେସି ହିନାନ୍। ମେଣ୍ଢାଙ୍ଗ୍ ଗଡ଼ିୟା କାତା ୱେନିକ୍। ଗଡ଼ିୟା ତା ମେଣ୍ଢାକାଙ୍ଗ୍ ତର୍ ଆସ୍ତି କୁକ୍ନାନ୍ ଆରେ ବାର୍ତ ହାରାଇ କିନାନ୍। 4 ହେୱାନ୍ ୱିଜୁ ମେଣ୍ଢାକାଙ୍ଗ୍ ବାର୍ତ ହପ୍ନାନ୍, ମେଣ୍ଢାଙ୍ଗ୍ ଆଗେ-ଆଗେ ତାଙ୍ଗ୍ନାନ୍ ଆରେ ୱିଜୁ ମେଣ୍ଢାଙ୍ଗ୍ ହେୱାନିଙ୍ଗ୍ ପୁନ୍ଞ୍ଜି ତାପାଚେ-ପାଚେ ହାନିକ୍। 5 ମାତର୍ ମେଣ୍ଢାଙ୍ଗ୍ ପୁନ୍ୱିତି ଲଗାଙ୍ଗ୍ ପାଚେ-ପାଚେ ହାଲୁକ୍। ହେୱେକ୍ ତା ଲାଗାୟ୍ତାଙ୍ଗ୍ ହନ୍ଚି ହାନିକ୍, ଇନେସ୍କି ତା ବେଣ୍ତିଙ୍ଗ୍ ହେୱେକ୍ ପୁନ୍ୱାଦାଙ୍ଗ୍ ମାନ୍ଗିନିକ୍।” 6 ଯୀଶୁ ମାନାୟାରିଙ୍ଗ୍ ଇ କାତା ୱେଚ୍ଚାନ୍। ମାତର୍ ମାନାୟାର୍ ତା କାତାନି ଅର୍ତ ବୁଜା ଆଦେଙ୍ଗ୍ ଆଡ୍ୱାତାର୍। 7 ଲାଗିଙ୍ଗ୍ ଯୀଶୁ ଆରେରଗ ୱେଚ୍ଚାନ୍, ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଆନେଙ୍ଗ୍ ଆନାଙ୍ଗା ମେଣ୍ଢାକାଙ୍ଗ୍ ଦୁୱେର୍। 8 ନା ଆଗେ ଇମ୍ଣାକାର୍ ୱାଜିମାଚାର୍, ହେୱାର୍ ଚର୍ ଆରେ ଡାକୁର୍। ମେଣ୍ଢାଙ୍ଗ୍ ହେୱାର୍ କାତାତିଙ୍ଗ୍ ୱେନ୍ୱିତିକ୍। 9 ଆନେଙ୍ଗ୍ ଆନାଙ୍ଗା ଦୁୱେର୍, ଇମ୍ଣାକାନ୍ ନା ଦୁୱେର୍ ନିପଣ୍ ଆଜି ହଣାନ୍, ହେୱାନ୍ ରକ୍ଷା ପାୟା ଆନାନ୍। ହେୱାନ୍ ବିତ୍ରେ ୱାଦେଙ୍ଗ୍ ଆଡ୍ନାନ୍ ଆରେ ବାର୍ତ ହାଞ୍ଜେଙ୍ଗ୍ ପା ଆଡ୍ନାନ୍। ହେୱାନିଙ୍ଗ୍ ଇନାକା ଦର୍କାର୍ ହେ ୱିଜୁ ପାୟା ଆନାନ୍। 10 ଚର୍ ମାନାୟ୍ ଚର୍କିଦେଙ୍ଗ୍, ଅସ୍ତେଙ୍ଗ୍ ଆରେ ନଷ୍ଟ କିଦେଙ୍ଗ୍ ୱାନାନ୍। ମାତର୍ ଆନେଙ୍ଗ୍ ହେୱାରିଙ୍ଗ୍ ହାର୍ଦି ଜିବୁନ୍ ହିଦେଙ୍ଗ୍ ୱାତାଙ୍ଗ୍ନା। 11 “ଆନେଙ୍ଗ୍ ହାର୍ଦି ମେଣ୍ଢାଗଡ଼ିଆ। ହାର୍ଦି ମେଣ୍ଢାଗଡ଼ିଆ ମେଣ୍ଢାକାଜିଙ୍ଗ୍ ଆନେଙ୍ଗ୍ ନା ଜିବୁନ୍ ହିନାଙ୍ଗ୍। 12 ମେଣ୍ଢାକାଙ୍ଗ୍ ହାରାଇ କିଦେଙ୍ଗ୍ ଇମ୍ଣି ହଲିଆଙ୍ଗ୍ ମାଲିକ୍ ଇଡ଼୍ଜି ମାନ୍ଗାନାନ୍, ହେୱାନ୍ ହୁଣ୍ଡେର୍ ୱାନାକା ହୁଡ଼୍ଜି ମେଣ୍ଢାକାଙ୍ଗ୍ ପିସ୍ତି ହନ୍ଚି ହାନାନ୍। ଇନେସ୍କି ମେଣ୍ଢାଙ୍ଗ୍ ଚିନ୍ବିନ୍ ଆନିକ୍। 13 ହେୱାନ୍ ହଲିଆ କାଜିଙ୍ଗ୍ ମେଣ୍ଢାକାଙ୍ଗ୍ ପିସ୍ତି ହାନାନ୍, ଆରେ ହେୱାନ୍ ମେଣ୍ଢାକାଙ୍ଗ୍ ଇନସ୍ତା କିଉନ୍। 14 ଆନେଙ୍ଗ୍ ହାର୍ଦି ମେଣ୍ଢାଗଡ଼ିଆ। ଆବା ଈଶ୍ୱର ନାଙ୍ଗେଙ୍ଗ୍ ଇନେସ୍ ପୁନ୍ଞ୍ଚାନ୍ନା, ଆନେଙ୍ଗ୍ ପା ହେଲେକେ ଆବା ଈଶ୍ୱରତିଙ୍ଗ୍ ପୁଚାଙ୍ଗ୍ନା। 15 ଆନେଙ୍ଗ୍ ହେଲେକେ ନା ମେଣ୍ଢାକାଙ୍ଗ୍ ପା ପୁନାଙ୍ଗ୍, ଆରେ ହେୱେକ୍ ପା ନାଙ୍ଗେଙ୍ଗ୍ ପୁଞ୍ଜ୍ନିକ୍। ଆନେଙ୍ଗ୍ ମେଣ୍ଢାକାଙ୍ଗ୍ ନା ଜିବୁନ୍ ହିଦେଙ୍ଗ୍ ପା ରାଜି ମାନାଙ୍ଗ୍। 16 ନା ଜେକନି ମେଣ୍ଢାଙ୍ଗ୍ ପା ମାନିକ୍, ହେୱେକ୍ ଇ ମାନ୍ଦାତାକେ ହିଲୁକ୍। ମାତର୍ ଆନେଙ୍ଗ୍ ହେୱେକିୟାଙ୍ଗ୍ ପା ତାନାଙ୍ଗ୍। ହେୱେକ୍ ନା ବେଣ୍ ୱେନିକ୍, ଆରେ ୱିଜୁଦିନ୍ତିଙ୍ଗ୍ ର ମାନ୍ଦାଆଜି ମାନ୍ଗିନିକ୍, ଆରେ ହେ ମାନ୍ଦାତିଙ୍ଗ୍ ଆନେଙ୍ଗ୍ ରକାଙ୍ଗ୍ ଗଡ଼ିୟା ଆନାଙ୍ଗ୍। 17 ଲାଗିଙ୍ଗ୍ ନା ଆବା ଈଶ୍ୱର ନାଙ୍ଗେଙ୍ଗ୍ ଲାଡ୍ କିଦ୍ନାନା, ଆନେଙ୍ଗ୍ ମେଣ୍ଢାଙ୍ଗ୍ କାଜିଙ୍ଗ୍ ନା ଜିବୁନ୍ ହିନାଙ୍ଗା, ଇନେସ୍କି ନା ଜିବୁନ୍ ଆରେରଗ ପାୟାଆନାଙ୍ଗ୍। 18 ଇନେର୍ ପା ନାବେତାଙ୍ଗ୍ ନା ଜିବୁନ୍ ଅଦେଙ୍ଗ୍ ଆଡୁର୍। ଆନେଙ୍ଗ୍ ନା ଇଚାରେ ଜିବୁନ୍ ହିନାଙ୍ଗ୍। ଆନେଙ୍ଗ୍ ନା ଜିବୁନ୍ ହିନାକା ଆଦିକାର୍ ମାନାତ୍। ଆରେ ନା ଜିବୁନ୍ ଆରେରଗ ପାୟାଆନି ଆଦିକାର୍ ପା ମାନାତ୍। ଆବା ଈଶ୍ୱର ନାଙ୍ଗେଙ୍ଗ୍ ଇ ଆଦେସ୍ ହିଜି ୱେଚ୍ଚାତାନ୍ନା।” 19 ଯିହୁଦି ନେତାର୍ ଇୱିଜୁ କାତା ଯୀଶୁତାଙ୍ଗ୍ ୱେଚି ପାଚେ ଆରେରଗ ବାଗ୍-ବାଗ୍ ଆଜି ୱେଚ୍ପା-ୱେଚ୍ପି ଆତାର୍। 20 ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଯିହୁଦି ନେତାର୍ ୱେଚ୍ଚାର୍, “ରଞ୍ଜାଙ୍ଗ୍ ବୁତ୍ଆତ୍ମା ତା ବିତ୍ରେ ହଟାତ୍ନା ଆରେ ତାଙ୍ଗେଙ୍ଗ୍ ପାଗଲ୍ କିତାତ୍ନା। ଇଲେଗ୍ଦି ମାନାୟ୍ତି କାତା ୱେଞ୍ଜେଙ୍ଗ୍ ଦରକାର୍ ଆକାୟ୍।” 21 ମାତର୍ ଜେକନି ଯିହୁଦିର୍ ୱେଚ୍ଚାର୍, “ଇୱିଜୁ କାତା ବୁତ୍ଆତ୍ମା ଆହିୟା ଆତାକାନ୍ତି ଆକାୟ୍, ର ବୁତ୍ଆତ୍ମା ଇନାୱେଡ଼ାଙ୍ଗ୍ ପା କାଣା ଲକାର୍ କାଣ୍କୁ ହାର୍କିଦେଙ୍ଗ୍ ଆଡୁତ୍।” ଯିହୁଦି ନେତାର୍ ଯୀଶୁଙ୍ଗ୍ ଅସ୍ତେଙ୍ଗ୍ ଉପାୟ୍ କିତାର୍ 22 ହେପାଦ୍ନା ପିନିମାସ୍ ଆଜି ମାଚାତ୍। ଯିରୁଶାଲାମ ସହର୍ନି ଈଶ୍ୱର ମାନି ମନ୍ଦିର୍ ପ୍ରତିଷ୍ଟା ପାର୍ବୁ ଆତାତ୍। 23 ଯୀଶୁ ଈଶ୍ୱର ମାନି ମନ୍ଦିର୍ତାକେ ଶଲମନ ରାଜାନି ମଣ୍ଡପ୍ତାକେ ବୁଲାଆଜି ମାଚାନ୍। 24 ଯିହୁଦି ନେତାର୍ ତା ଚାରିବେଣ୍ତାଙ୍ଗ୍ ରୁଣ୍ଡାଆତାର୍। ହେୱାର୍ ୱେନ୍ବାତାର୍, “ଏନେଙ୍ଗ୍ ଇନେର୍ ମାଙ୍ଗେଙ୍ଗ୍ ସତ୍ ୱେଚ୍ଚା, ଏନେଙ୍ଗ୍ ଯଦି ଖ୍ରୀଷ୍ଟ ଲାଗିଙ୍ଗ୍ ମାଙ୍ଗେଙ୍ଗ୍ ସତ୍ କିଜି ୱେଚ୍ଚା।” 25 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାତାଙ୍ଗ୍ନା, ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦୁଦେରା। ନାଙ୍ଗେଙ୍ଗ୍ ନା ଆବା ଈଶ୍ୱର ଆଦିକାର୍ ହିତ୍ତାନ୍ନା, ଇୱିଜୁ ଚାନିଆଆନି କାମାୟ୍ କିଦେଙ୍ଗ୍, ଆନେଙ୍ଗ୍ ଇମ୍ଣି-ଇମ୍ଣି କାମାୟ୍ କିନାଙ୍ଗା ଇୱିଜୁ ନା ବିଷୟରେ ୱେଚ୍ଚାନାନା। 26 ମାତର୍ ଏପେଙ୍ଗ୍ ପାର୍ତି କିଉଦେରା, ଇନେସ୍କି ଏପେଙ୍ଗ୍ ନା ମେଣ୍ଢାଙ୍ଗ୍ ଆକାୟ୍। 27 ନା ମେଣ୍ଢାଙ୍ଗ୍ ନା ବେଣ୍ ୱେନିକ୍। ଆନେଙ୍ଗ୍ ହେୱେକିୟାକାଙ୍ଗ୍ ପୁନାଙ୍ଗ୍ ଆରେ ହେୱେକ୍ ନା ପାଚେ ୱାନିକ୍। 28 ଆନେଙ୍ଗ୍ ନା ମେଣ୍ଢାକାଙ୍ଗ୍ ୱିଜ୍ୱି ଜିବୁନ୍ ହିନାଙ୍ଗ୍। ହେୱେକ୍ ଇନାୱେଡ଼ାଙ୍ଗ୍ ପା ହାଃଉକ୍, ହେୱାରିଙ୍ଗ୍ କେଇଦାଙ୍ଗ୍ ଇନେର୍ ପା ନାବେତାଙ୍ଗ୍ କିସ୍ତି ଅଦେଙ୍ଗ୍ ଆଡୁର୍। 29 ନା ଆବା ଈଶ୍ୱର ନାଙ୍ଗେଙ୍ଗ୍ ମେଣ୍ଢାକାଙ୍ଗ୍ ହିତ୍ତାନ୍ନା, ହେୱାନ୍ ୱିଜାକାର୍ତାଙ୍ଗ୍ ଗାଜାକାନ୍। ଆରେ ଆବା ଈଶ୍ୱର କେଇଦାଙ୍ଗ୍ ଇନେର୍ ପା ମେଣ୍ଢାକାଙ୍ଗ୍ ଚର୍କିଜି ଅଦେଙ୍ଗ୍ ଆଡୁନ୍। 30 ଆନେଙ୍ଗ୍ ଆରେ ନା ଆବା ଈଶ୍ୱର ରିୟାପ୍ ନେ ରକାପ୍।” 31 ଯିହୁଦି ନେତାର୍ ଯୀଶୁଙ୍ଗ୍ ଇଡ଼୍ଦେଙ୍ଗ୍ ଆରେରଗ କାଲ୍କୁ ପେସ୍ତାର୍। 32 ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନା ଆବା ଈଶ୍ୱରତାଙ୍ଗ୍ ବେସି ଚାନିଆଆନି କାମାୟ୍ କିତାଙ୍ଗ୍ନା। ଏପେଙ୍ଗ୍ ହେ ୱିଜୁ ହୁଡ଼୍ତାଦେର୍ନା। ଲାଗିଙ୍ଗ୍ ହେ ହାର୍ଦି କାମାୟ୍ କାଜିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଅସ୍ତେଦେଙ୍ଗ୍ ଉପାୟ୍ କିନାଦେରା କି?” 33 ଯିହୁଦି ନେତାର୍ ୱେଚ୍ଚାର୍, “ଆପେଙ୍ଗ୍ ଇମ୍ଣି ଚାନିଆଆନି କାମାୟ୍ କିତାକା ମାନିକିଉପା। ମାତର୍ ଏନେଙ୍ଗ୍ ଇନାକା ୱେଚ୍ନାୟା ହେଦାଙ୍ଗ୍ ଈଶ୍ୱର ନିନ୍ଦା ବିରୁଦ୍ତାକେ ୱେଚ୍ନାୟା। ଏନେଙ୍ଗ୍ ରକାଇ ମାନାୟ୍ ନେ, ମାତର୍ ଜାର୍ତିଙ୍ଗ୍ ଈଶ୍ୱର ଲାହାଙ୍ଗ୍ ହାମାନ୍ ଇଞ୍ଜି ଇନାୟା। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ନିଙ୍ଗେଙ୍ଗ୍ କାଲ୍ ହୁଦାଙ୍ଗ୍ ଅସ୍ତେଦେଙ୍ଗ୍ ଇଚା କିନାପା।” 34 ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମୋଶା ଲେକିକିତି ନିୟମ୍ନି ସାସ୍ତର୍ତାକେ ଲେକା ମାନାତ୍, ‘ଆପେଙ୍ଗ୍ ୱେଚ୍ଚାତାପ୍, ଏପେଙ୍ଗ୍ ଈଶ୍ୱର କାଦେର୍।’ 35 ଇ ଦରମ୍ ସାସ୍ତର୍ ୱେଚ୍ନାତ୍ ଯେ, ଇମ୍ଣାକାର୍ ଈଶ୍ୱର ବେଣ୍ ଆହ୍ନାର୍, ହେୱାର୍ ଈଶ୍ୱର ନିକାର୍। ଆରେ ଦରମ୍ ସାସ୍ତର୍ କାତା ସବୁୱେଡ଼ାଙ୍ଗ୍ ସତ୍। 36 ଲାଗିଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ ଇନାଦେରା, ଆନେଙ୍ଗ୍ ଇନାକା ଈଶ୍ୱର ନିନ୍ଦା ବିରୁଦ୍ତାକେ ୱେଚ୍ଚାନାଙ୍ଗା ଇଞ୍ଜି। ଇନେସ୍କି ଆନେଙ୍ଗ୍ ୱେଚ୍ଚାନାଙ୍ଗା, ‘ଆନେଙ୍ଗ୍ ଈଶ୍ୱର ମେହି।’ ନାଙ୍ଗେଙ୍ଗ୍ ଈଶ୍ୱର ବାଚି କିତ୍ତାନ୍ନା ଆରେ ପୁର୍ତିତାକେ ପକ୍ତାତାନ୍ନା। 37 ନା ଆବା ଈଶ୍ୱର ଇନାକା କିନାନ୍, ଆନେଙ୍ଗ୍ ଯଦି ହେଦାଙ୍ଗ୍ କିଉଙ୍ଗ୍, ଲାଗିଙ୍ଗ୍ ଆନେଙ୍ଗ୍ ଇନାକା ୱେଚ୍ଚାନାଙ୍ଗ୍ ହେଦାଙ୍ଗ୍ତିଙ୍ଗ୍ ପା ଏପେଙ୍ଗ୍ ପାର୍ତି କିମାଟ୍। 38 ନା ଆବା ଈଶ୍ୱର ଇନାକା କିନାନ୍, ହେଦାଙ୍ଗ୍ ଆନେଙ୍ଗ୍ କିନାଙ୍ଗ୍, ଲାଗିଙ୍ଗ୍ ଏପେଙ୍ଗ୍ ନା କିତି କାମାୟ୍ତିଙ୍ଗ୍ ପାର୍ତିକିନି ଦର୍କାର୍। ଲାଗିଙ୍ଗ୍ ଏପେଙ୍ଗ୍ ପୁନାଦେର୍ ଆରେ ବୁଜାଆନାଦେର୍ ଯେ ଆବା ଈଶ୍ୱର ନାବେ ମାନାନ୍ ଆରେ ଆନେଙ୍ଗ୍ ତାବେ ମାନାଙ୍ଗ୍।” 39 ଯିହୁଦି ନେତାର୍ ଯୀଶୁଙ୍ଗ୍ ଆସ୍ତେଙ୍ଗ୍ ଆରେରଗ ଉପାୟ୍ କିତାର୍, ମାତର୍ ହେୱାନିଙ୍ଗ୍ ଆସ୍ତେଙ୍ଗ୍ ଆଡ୍ୱାତାର୍। 40 ତାପାଚେ ଯୀଶୁ ଯର୍ଦ୍ଦନ ନାଗୁଡ଼୍ ଆରେ ର ପାଡ଼୍କା ହାଚାନ୍। ଆଗେ ଯୋହନ ଇମେତାକେ ଡୁବନ୍ହିଜି ମାଚାନ୍ ହେ ବାହାତାକେ ହାଚାନ୍, ଆରେ ହେବେ ମାଚାନ୍। 41 ହେୱାନ୍ ଲାଗାୟ୍ ବେସିହେନି ମାନାୟ୍ ୱାତାର୍। ମାନାୟାର୍ ୱେଚ୍ଚାର୍, “ଯୋହନ ଚାନିଆଆନି କାମାୟ୍ କିୱାଦାଙ୍ଗ୍ ମାଚାନ୍, ମାତର୍ ଇ ମାନାୟ୍ ବିଷୟରେ ଇନାକା ୱେଚ୍ଚି ମାନ୍ଞ୍ଚାନ୍, ହେଦାଙ୍ଗ୍ୱିଜୁ ସତ୍।” 42 ହେବେ ଯୀଶୁଙ୍ଗ୍ ବେସିହେନି ପାର୍ତି କିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation