ଜାକ୍ବ 5 - New Testament in Pengo Parja Languageହାଉକାର୍ ମାନାୟାରିଙ୍ଗ୍ ଜାଗ୍ରତ୍ କିତି କାତା 1 ଏ ପାର୍ତିକିୱି ହାଉକାର୍ ମାନାୟ୍ କାଦେର୍ ୱେନାଟ୍, ମିଙ୍ଗେଙ୍ଗ୍ ବିପତ୍ନି ଦିନ୍ ୱାନାତା, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ କାକୁଲ୍ତି ଆଜି ଆଡ଼୍ବାଟ୍। 2 ମି ଦନ୍ ନଷ୍ଟ ଆନାତ୍, ଆରେ ମି ହେନ୍ଦ୍ରା ପା ଲିମ୍ ତିନାତ୍। 3 ମି ହନା ଆରେ ରୁପାତିଙ୍ଗ୍ ପ୍ରାଲ୍ ତିନାତ୍। ଆରେ ପ୍ରାଲ୍ ମି ବିରଦ୍ତାକେ ସାକି ଆନିକ୍, ଆରେ ପ୍ରାଲ୍ ନାଣି ଲେକେ ମି ଗାଗାଡ଼୍ତିଙ୍ଗ୍ କାଡିକିନିକ୍। ଯୁଗ୍ସେସ୍ ଆନିହିଙ୍ଗ୍ ଏପେଙ୍ଗ୍ ଦନ୍ ରୁଣ୍ଡାଇ କିନାଦେରା। 4 ୱେନାଟ୍, ମି ଜମିତ କାମାୟ୍ କିୟିକିଜି ଇମ୍ଣାକାରିଙ୍ଗ୍ ଟକାଇ କିଜି ଡାବୁଙ୍ଗ୍ ହିୱାତାଦେର୍ନା, ହେୱାର୍ ଈଶ୍ୱର ଲାଗାୟ୍ ମି ବୁରଦ୍ତାକେ ଆଡ଼୍ବାନାରା। ଆରେ ୱିଜୁତାଙ୍ଗ୍ ଗାଜା ଈଶ୍ୱର ହେ କାମାୟ୍ କିନାକାର୍ ଆଡ଼୍ବାନାକା ୱେଚାନ୍ନା। 5 ପୁର୍ତିତାକେ ଏପେଙ୍ଗ୍ ସୁକ୍ ଆରେ ମି ଇଚାତାଙ୍ଗ୍ ଜିତାଦେର୍ନା। ଅସ୍ତେଙ୍ଗ୍ ଅନି ର ମଟାରଟା ପଶୁ ଲେକେ ଏପେଙ୍ଗ୍ ନିଜେ ବିଚାର୍ କିୟା ଆଦେଙ୍ଗ୍ ଇଚା କିନାଦେରା। 6 ଏପେଙ୍ଗ୍ ଦରମ୍ ମାନାୟ୍ତିଙ୍ଗ୍ ଦସି କିଜି ଅସ୍ତାଦେର୍ନା, ମାତର୍ ହେୱାନ୍ ମିଙ୍ଗେଙ୍ଗ୍ ବିରଦ୍ କିଦ୍ୱାତାନ୍ନା। ଦୁକ୍କଷ୍ଟ ଆତିହିଙ୍ଗ୍ ସାସ୍ ଆସ୍ତି ମାନାଟ୍ 7 ହେଦାଙ୍ଗ୍ କାଜିଙ୍ଗ୍ ଏ ପାର୍ତିକିନି ଟଣ୍ଡାର୍କାଦେର୍, ମାପୃ ୱାନି ପାତେକ୍ ସାସ୍ ଆସ୍ତି ମାନାଟ୍। ତାସି ବିଷୟରେ ବାବିକିଜି ହୁଡ଼ାଟ୍, ତାସ୍ତାଙ୍ଗ୍ ହାର୍ଦି ପାଡ଼୍ ପାୟା ଆଦେଙ୍ଗ୍ ଆହା କିଜି ପାର୍ତୁମ୍ ଆରେ ପାଚେନି ବାର୍ହା ଆନି ପାତେକ୍ ସାସ୍ ଆସ୍ତି ମାନାନ୍। 8 ହେଲେକେ ଏପେଙ୍ଗ୍ ପା ସାସ୍ ଆସ୍ତି ମାନାଟ୍ ଆରେ ଆହା କିଜି ମାନାଟ୍, ଇନେସ୍କି ମାପୃ ୱାନିଦିନ୍ ଲାଗେ ମାନାତ୍। 9 ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଇନେସ୍ ଦଣ୍ଡ୍ ପାୟା ଆଉଦେର୍, ହେଦାଙ୍ଗ୍ କାଜିଙ୍ଗ୍ ଜାର୍-ଜାର୍ବିତ୍ରେ ଦସ୍ ହିଜି ୱେଚ୍ପା ଆମାଟ୍। ଇନେସ୍କି ଗାଜା ବିଚାର୍ କିନାକାନ୍ ଲାଗେ ମାନାନ୍। 10 ଏ ପାର୍ତିକିନି ଟଣ୍ଡାର୍କାଦେର୍, ମାପୃ ତର୍ଦାଙ୍ଗ୍ ବେଣ୍ ୱେଚ୍ଚି ମାନ୍ଞ୍ଚି ଭବିଷ୍ଯତବକ୍ତାର୍ ଦୁକ୍କଷ୍ଟ ପାୟାଆଜି ମାଚାର୍, ମାତର୍ ହେୱାର୍ ସାସ୍ ଆସ୍ତି ମାଚାର୍। ଲାଗିଙ୍ଗ୍ ଏପେଙ୍ଗ୍ ପା ହେୱାର୍ ଲେକେ ବାବିକିଜି ସାସ୍ ଆସ୍ତି ମାନାଟ୍। 11 ଏପେଙ୍ଗ୍ ପୁଚାଦେର୍ନା ଯେ, ଇମ୍ଣାକାନ୍ ଦୁକ୍କଷ୍ଟ ଆତିହିଙ୍ଗ୍ ପା ଦରମ୍ଆଜି ମାନାନ୍, ହେୱାନିଙ୍ଗ୍ ଆପେଙ୍ଗ୍ ଆଶ୍ରିବାଦ୍ନି ମାନାୟ୍ ଇଞ୍ଜି ୱେଚ୍ଚି ମାନାସ୍। ଏପେଙ୍ଗ୍ ଆୟୁବନି ଦରମ୍ ବିଷୟରେ ୱେଚାଦେର୍ନା, ଆରେ ମାପୃ ହେୱାନିଙ୍ଗ୍ ଆଶ୍ରିବାଦ୍ କିତାକା ପା ହୁଡ଼୍ତାଦେର୍ନା। ଲାଗିଙ୍ଗ୍ ମାପୃ ବେସି ଲାଡ୍ ଆରେ ଦୟା କିଦ୍ନାନ୍। 12 ଏ ନା ପାର୍ତିକିନି ଟଣ୍ଡାର୍କାଦେର୍ ସେସ୍ କାତା ୱେନାଟ୍, ପାର୍ମାଣ୍ କିମାଟ୍, ସରଗ୍ନି ପାର୍ମାଣ୍ ଆୟେତ୍ କି ପୁର୍ତିନି ପାର୍ମାଣ୍ ଆୟେତ୍, କି ଜେକନି ଇମ୍ଣି ପାର୍ମାଣ୍ ଆୟେତ୍। ମାତର୍ ମିଦାଙ୍ଗ୍ ଆଁ ବେଣ୍ ଆଁ ଆୟେତ୍, ଆକାୟ୍ ବେଣ୍ ଆକାୟ୍ ଆୟେତ୍। ଲାଗିଙ୍ଗ୍ ଏପେଙ୍ଗ୍ ବିଚାର୍ ଦିନ୍ତ ଦଣ୍ଡ୍ ପାୟା ଆଉଦେର୍। ପାର୍ତିତାଙ୍ଗ୍ ପାର୍ତାନା କିୟାଟ୍ 13 ଯଦି ମି ବିତ୍ରେତାଙ୍ଗ୍ ଇନେର୍ ଦୁକ୍ତାକେ ମାନାନ୍, ହେୱାନ୍ ଈଶ୍ୱରତାକେ ପାର୍ତାନା କିୟେନ୍। ଯଦି ଇନେର୍ ୱାରିତାଙ୍ଗ୍ ମାନାର୍, ହେୱାନ୍ କେର୍କଣ୍ କେର୍ଜି ଈଶ୍ୱରତିଙ୍ଗ୍ ଜୟ୍-ଜୟ୍ କିୟେନ୍। 14 ଯଦି ମି ବିତ୍ରେତାଙ୍ଗ୍ ଇନେର୍ ବେମାର୍ ମାନ୍ଗାନାନ୍, ହେୱାନ୍ ମଣ୍ଡ୍ଲିନି ପ୍ରାଚିନାରିଙ୍ଗ୍ କୁକେନ୍। ଲାଗିଙ୍ଗ୍ ପ୍ରାଚିନାର୍ ହେୱାନିଙ୍ଗ୍ କାପ୍ଡ଼ାତାକେ ଚିକାଣ୍ ଇତ୍ପି ମାପୃ ତର୍ଦାଙ୍ଗ୍ ପାର୍ତାନା କିନାର୍। 15 ପାର୍ତିତାଙ୍ଗ୍ ପାର୍ତାନା କିତିସ୍ ହେ ବେମାର୍ ମାନାୟ୍ ହାର୍ ଆନାନ୍। ଇନେସ୍କି ମାପୃ ହେୱାନିଙ୍ଗ୍ ହାର୍କିନାନ୍, ଆରେ ଯଦି ହେୱାନ୍ ପାପ୍ କିଜିମାଚିସ୍, ଈଶ୍ୱର ହେୱାନିଙ୍ଗ୍ କେମା କିନାନ୍। 16 ଲାଗିଙ୍ଗ୍ ଜାର୍-ଜାର୍ବିତ୍ରେ କିତି ପାପ୍ତିଙ୍ଗ୍ ୱେଚ୍ପାଆଡ, ଆରେ ବେମାର୍ତାଙ୍ଗ୍ ହାର୍ଆନି କାଜିଙ୍ଗ୍ ଜାର୍-ଜାର୍ କାଜିଙ୍ଗ୍ ପାର୍ତାନା କିବା ଆଡ। ଦରମ୍ ମାନାୟ୍ନି ପାର୍ତାନା କିତାକା ୱିଜୁ କାମାୟ୍ ପୁରାଆନାତ୍। 17 ଏଲିୟ ଭବିଷ୍ଯତବକ୍ତା ବିଷୟରେ ବାବିକିଜି ହୁଡ଼ାଟ୍, ହେୱାନ୍ ପା ମା ଲେକେ ର ମାନାୟ୍ ମାଚାନ୍। ମାତର୍ ହେୱାନ୍ ଏଚେପାଦ୍ନା ର ମାନ୍ଆଜି ବାର୍ହା ଆୱି କାଜିଙ୍ଗ୍ ପାର୍ତାନା କିତାନ୍, ଲାଗିଙ୍ଗ୍ ତିନ୍ ବାର୍ହୁ ଚଅ ମାସ୍ ପାତେକ୍ ଇସ୍ରାଏଲ ଦେସ୍ତ ବାର୍ହା ଆୱାତାତ୍। 18 ମାତର୍ ହେୱାନ୍ ଆରେରଗ ପାର୍ତାନା କିତିଲେ, ବାଦାଡ଼୍ତାଙ୍ଗ୍ ବାର୍ହା ଆତାତ୍। ଆରେ ମେଦ୍ନିତାକେ ତାସ୍ ଆଜି ପାଡ଼୍ ଆତାତ୍। 19 ଏ ନା ପାର୍ତିକିନି ଟଣ୍ଡାର୍କାଦେର୍, ମି ବିତ୍ରେତାଙ୍ଗ୍ ଇନେର୍ ଯଦି ସତ୍ ହାଜ୍ଦିଙ୍ଗ୍ ବାଣା ଆନାନ୍, ଆରେ ଇନେର୍ ପା ହେୱାନିଙ୍ଗ୍ ସତ୍ ହାଜ୍ଦିଙ୍ଗ୍ ତାସି ୱାଦେଙ୍ଗ୍ ସାଇଜ କିନାନ୍। 20 ଲାଗିଙ୍ଗ୍ ଏପେଙ୍ଗ୍ ପୁନାଟ୍ ଯେ, ହେ ମାନାୟ୍ ପାପି ମାନାୟ୍ତିଙ୍ଗ୍ ବାଣାଆତି ହାଜ୍ଦାଙ୍ଗ୍ ଲେଉଟାଇ କିଜି ତାସିୱାନାନା। ହେୱାନ୍ ହେୱାନିଙ୍ଗ୍ ହାଃନିତାଙ୍ଗ୍ ଜିବୁନ୍ତିଙ୍ଗ୍ ଉଦାର୍ କିନାନ୍ ଆରେ ବେସି ପାପ୍ କିୟିକିଦେଙ୍ଗ୍ ହିଉନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation