ଜାକ୍ବ 4 - New Testament in Pengo Parja Languageଈଶ୍ୱରତାକେ ପାର୍ତି କିନାକାଦେର୍ ହାର୍ପି ଆଡ 1 ପାର୍ତି କିନାକାର୍ ବିତ୍ରେତାଙ୍ଗ୍ ମାଡ୍ଗଲ୍ ଆରେ ଜୁକ୍ତି ଇନାକିଦେଙ୍ଗ୍ ଆନାତା? ଇନେସ୍କି ମି ମାନ୍ ବିତ୍ରେ ଜାର୍ କାଜିଙ୍ଗ୍ ଚିନ୍ତା କିଜି କରାପ୍ କାମାୟ୍ କାଜିଙ୍ଗ୍ ନେ ଇଦାଙ୍ଗ୍ ଗଟାଆନାତ୍। 2 ଏପେଙ୍ଗ୍ ବେସି ଇଚା କିଜି ମାନାଦେର୍, ମାତର୍ ଏଚେପାଦ୍ନା ଏପେଙ୍ଗ୍ ପାୟା ଆଉଦେର୍, ଲାଗିଙ୍ଗ୍ ଏପେଙ୍ଗ୍ ଆକାର୍ ଆଜି ମାନାୟାରିଙ୍ଗ୍ ମାର୍ନେ ଅସ୍ତେଙ୍ଗ୍ କାନାଦେରା। ଏପେଙ୍ଗ୍ ଜେକନି ଜିନିଷ୍ତିଙ୍ଗ୍ ଆକାର୍ ଆନାଦେରା, ମାତର୍ ଏଚେପାଦ୍ନା ଏପେଙ୍ଗ୍ ହେଦାଙ୍ଗ୍ ପାୟା ଆଦେଙ୍ଗ୍ ଆଡୁଦେର୍ ଲାଗିଙ୍ଗ୍ ଏପେଙ୍ଗ୍ ଜୁକ୍ତି ଆରେ ମାଡ୍ଗଲ୍ ଆନାଦେରା। ମିଙ୍ଗେଙ୍ଗ୍ ଇନାକା ଦର୍କାର୍ ହେଦାଙ୍ଗ୍ ଗାଟାଆଦୁତା, ଇନେସ୍କି ଈଶ୍ୱରତିଙ୍ଗ୍ ହେଦାଙ୍ଗ୍ ଏନୁଦେରା ହେଦାଙ୍ଗ୍ କାଜିଙ୍ଗ୍ ହେଦାଙ୍ଗ୍ ଗାଟାଆଦୁତା। 3 ଏପେଙ୍ଗ୍ ଈଶ୍ୱରତିଙ୍ଗ୍ ଏନ୍ନାଦେରା, ମାତର୍ ଈଶ୍ୱରତାଙ୍ଗ୍ ଇନାକା ପାୟା ଆଉଦେରା। ଇନେସ୍କି ଜାର୍ କରାପ୍ ଇଚାତାଙ୍ଗ୍ ପୁରା କିଦେଙ୍ଗ୍ ଏପେଙ୍ଗ୍ ଏନ୍ନାଦେରା। 4 ଏପେଙ୍ଗ୍ ଈଶ୍ୱରତାକେ ବିସ୍ବାସ୍ ହିଲ୍ୱିତି ମାନାୟ୍ କାଦେର୍, ଇନେସ୍କି ପୁର୍ତିନି ବିଷୟତିଙ୍ଗ୍ ସାଙ୍ଗ ଆତିସ୍ ଈଶ୍ୱରତିଙ୍ଗ୍ ଶତ୍ରୁ ଆନାଦେର୍, ଇଦାଙ୍ଗ୍ ମିଙ୍ଗେଙ୍ଗ୍ ଇନାକା ଜାଣା ଆକାୟ୍ କି? ଲାଗିଙ୍ଗ୍ ଇମ୍ଣାକାନ୍ ପୁର୍ତିନି ବିଷୟତିଙ୍ଗ୍ ସାଙ୍ଗ ଆଦେଙ୍ଗ୍ ଇଚାକିନାନ୍, ହେୱାନ୍ ନିଜେ ଈଶ୍ୱରତିଙ୍ଗ୍ ଶତ୍ରୁ ଆନାନ୍। 5 ଦରମ୍ ସାସ୍ତର୍ତାକେ ଲେକେଆତି ଇ ବିଷୟତିଙ୍ଗ୍ ଏପେଙ୍ଗ୍ ବୁଲ୍ ଇଞ୍ଜି ବାବିକିନାଦେରା କି?, ସାସ୍ତର୍ତାକେ ଲେକାଆତାତ୍ନା, “ଈଶ୍ୱର ପବିତ୍ର ଆତ୍ମାତିଙ୍ଗ୍ ମା ବିତ୍ରେ ବାହା କିଦେଙ୍ଗ୍ ହିତ୍ତାନ୍ନା। ଆରେ ହେୱାନ୍ ମାଙ୍ଗେଙ୍ଗ୍ ପୁରା ଆଦିକାର୍ କିଦେଙ୍ଗ୍ ର ମାନ୍ କିତାନ୍ନା।” 6 ଈଶ୍ୱର ମାଙ୍ଗେଙ୍ଗ୍ ବେସି ଦୟା କିତ୍ତାନ୍ନା, ହେଦାଙ୍ଗ୍ କାଜିଙ୍ଗ୍ ସାସ୍ତର୍ତାକେ ଲେକା ମାନାତ୍, “ଆକାର୍ ଆନାକାରିଙ୍ଗ୍ ଈଶ୍ୱର ବିରଦ୍ କିନାନ୍। ମାତର୍ ସାଦୁ ମାନାୟ୍ତିଙ୍ଗ୍ ହେୱାନ୍ ଦୟା କିନାନ୍।” 7 ଲାଗିଙ୍ଗ୍ ଏପେଙ୍ଗ୍ ଈଶ୍ୱରତିଙ୍ଗ୍ ମାନିକିଜି ମାନାଟ୍, ଆରେ ଶୟତାନତିଙ୍ଗ୍ ବିରଦ୍ କିୟାଟ୍। ଲାଗିଙ୍ଗ୍ ହେ ଶୟତାନ ମି ଲାଗାୟ୍ତାଙ୍ଗ୍ ହନ୍ଚି ହାନାତ୍। 8 ଈଶ୍ୱର ଲାଗାୟ୍ ୱାଡ, ଲାଗିଙ୍ଗ୍ ହେୱାନ୍ ମି ଲାଗାୟ୍ ୱାନାନ୍। ଏ ପାପି ମାନାୟ୍ କାଦେର୍ ଏପେଙ୍ଗ୍ ପାପ୍ କାମାୟ୍ତାଙ୍ଗ୍ ଦେହାଆଡ, ଏ ରି ମାନ୍ୟା ମାନାୟ୍ ଆନାଦେର୍, ଏପେଙ୍ଗ୍ ମି ଗରବ୍ତିଙ୍ଗ୍ ଟିକ୍ କିୟାଟ୍। 9 ଏପେଙ୍ଗ୍ କିଜିମାଚି ପାପ୍ କାମାୟ୍ କାଜିଙ୍ଗ୍ ଦୁକ୍ଆଜି ଆଡ଼୍ବାଟ୍। ଲାଗିଙ୍ଗ୍ ଏପେଙ୍ଗ୍ ଗାୟ୍ନି ବାଦୁଲ୍ ଆଡ଼୍ବାଟ୍, ଆରେ ସୁକ୍ ଆନି ବାଦୁଲ୍ ଦୁଃକ୍ ଆଡ। 10 ମାପୃ ଲାଗାୟ୍ ଜାର୍ତିଙ୍ଗ୍ ହିରୁ କିୟାଟ୍, ଲାଗିଙ୍ଗ୍ ହେୱାନ୍ ମିଙ୍ଗେଙ୍ଗ୍ ଉନତି କିଦ୍ନାନ୍। ଟଣ୍ଡେନିଙ୍ଗ୍ ବିଚାର୍ କିମାଟ୍ 11 ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଜାର୍-ଜାର୍ବିତ୍ରେ ବିରଦ୍ତାକେ ଇନାକା ୱେଚ୍ମାଟ୍, ଇମ୍ଣାକାନ୍ ଟଣ୍ଡାହି ବିରଦ୍ତାକେ ଇନାକା ୱେଚ୍ନାନ୍। କି ଟଣ୍ଡାହିଙ୍ଗ୍ ବିଚାର୍ କିନାନ୍, ହେୱାନ୍ ଈଶ୍ୱର ନିୟମ୍ ବିରଦ୍ତାକେ ୱେଚ୍ନାନ୍, ଆରେ ଇ ନିୟମ୍ତିଙ୍ଗ୍ ବିଚାର୍ କିନାନା। ଏପେଙ୍ଗ୍ ଯଦି ନିୟମ୍ତିଙ୍ଗ୍ ବିଚାର୍ କିନାଦେର୍, ଏପେଙ୍ଗ୍ ହେ ନିୟମ୍ତିଙ୍ଗ୍ ହାତେନେ ବିଚାର୍କିନି ମାନାୟ୍ ଲେକେନେ ବିଚାର୍ କିନାଦେରା, ଆରେ ହେ ନିୟମ୍ତିଙ୍ଗ୍ ମାନି କିଉଦେରା। 12 ଈଶ୍ୱର ନେ ରକାନ୍ ନିୟମ୍ ହିଦ୍ନାକାନ୍ ଆରେ ବିଚାର୍ କିନାକାନ୍। ହେୱାନ୍ ନେ ରକ୍ଷା କିଦେଙ୍ଗ୍ ଆରେ ବୁଡାଇ କିଦେଙ୍ଗ୍ ଆଡ୍ନାନ୍। ଲାଗିଙ୍ଗ୍ ଏନେଙ୍ଗ୍ ଇନେର୍ ଯେ ନି ଟଣ୍ଡେନିଙ୍ଗ୍ ବିଚାର୍ କିନାୟା? ମାପୃତାକେ ପାର୍ତିକିୟାଟ୍ 13 ଇମ୍ଣା କାଦେର୍ ଇଲେକେ ୱେଚ୍ନାଦେରା ହେୱାର୍ ୱେନାଟ୍, “ନେଞ୍ଜେଙ୍ଗ୍ କି ୱିଗାଲିଙ୍ଗ୍ ଆସେଙ୍ଗ୍ ଅମ୍କ ସହର୍ତାକେ ହାନାସ୍, ଆରେ ହେବେ ର ବାର୍ହୁ ବେପାର୍ବାଟ୍ କିଜି ଲାବ୍ କିନାସ୍ ଇଞ୍ଜି ୱେଚ୍ନାଦେର୍।” 14 ମାତର୍ ୱିଗାଲିଙ୍ଗ୍ ଇନାକା ଗଟାଆନାତ୍, ହେଦାଙ୍ଗ୍ ତ ଏପେଙ୍ଗ୍ ପୁନୁଦେର୍। ମି ଜିବୁନ୍ ବିଷୟରେ ଚିନ୍ତା କିୟାଟ୍। ଦୁନ୍ଦ୍ରା ଲେକେ ମି ଜିବୁନ୍ ଇମ୍ଣାକା ଅଲପ୍ ସମୟ୍ ମାନ୍ଞ୍ଜି ଡ଼ୁଗ୍ନାତ୍। 15 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇଲେକେ ୱେଚ୍ନି ଦର୍କାର୍, “ମାପୃ ଇଚା ଆତିସ୍ ଆପେଙ୍ଗ୍ ଜିବୁନ୍ ମାନ୍ଞ୍ଜି ଇଦାଙ୍ଗ୍ କିନାସ୍କି ହେଦାଙ୍ଗ୍ କିନାସ୍।” 16 ମାତର୍ ଏପେଙ୍ଗ୍ ବାଟ୍ପାଣ୍ ଆଜି ମୁର୍କ ଲେକେ ୱେଚ୍ନାଦେରା। ଇଲେକେ ବାଟ୍ପାଣ୍ ଆଜି ୱେଚ୍ନାକା କରାପ୍ ବିଷୟ। 17 ଲାଗିଙ୍ଗ୍ ଇମ୍ଣାକାନ୍ ଟିକ୍ କାମାୟ୍ ପୁନ୍ଞ୍ଜି ହେଦାଙ୍ଗ୍ କିଉନ୍, ଲାଗିଙ୍ଗ୍ ହେୱାନ୍ ପାପ୍ କିନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation