ଜାକ୍ବ 3 - New Testament in Pengo Parja Languageପାର୍ତିକିନି ମାନାୟାର୍ ଜାଗ୍ରତ୍ତାଙ୍ଗ୍ କାତା ଆନି ଦର୍କାର୍ 1 ଏ ନା ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ମଣ୍ଡ୍ଲିତାକେ ୱିଜାକାଦେର୍ ମାଷ୍ଟେର୍ ଆମାଟ୍। ଇନେସ୍କି ପୁଚାଦେର୍ନା ଯେ, ଈଶ୍ୱର ମାଷ୍ଟେରାରିଙ୍ଗ୍ ବେସି ଷ୍ଟିଟ୍କିଜି ବିଚାର୍ କିନାନ୍। 2 ଇନେସ୍କି ଆପେଙ୍ଗ୍ ୱିଜାକାପ୍ ଇମ୍ଣି ବିଷୟରେ ପା ବୁଲ୍ କିଜି ମାନାପା। ମାତର୍ ଇନେର୍ ଯଦି ୱେଚ୍ନି କାତାତାଙ୍ଗ୍ ବୁଲ୍ କିଉନ୍, ଲାଗିଙ୍ଗ୍ ହେୱାନ୍ ଟିକ୍ ମାନାୟ୍। ଆରେ ହେୱାନ୍ ତା ୱିଜୁ କାମାୟ୍ତିଙ୍ଗ୍ କଣ୍ଟ୍ରୁଲ୍ କିଦେଙ୍ଗ୍ ଆଡ୍ନାନ୍। 3 ଆପେଙ୍ଗ୍ ଗଡ଼ାକାଙ୍ଗ୍ କଣ୍ଟ୍ରୁଲ୍ କିଦେଙ୍ଗ୍ ତା ୱେଇଦ ରଞ୍ଜାଙ୍ଗ୍ ଲଗାମ୍ ଗାଚ୍ଚି ମାନାସ୍, ଆରେ ହେଦାଙ୍ଗ୍ କାଜିଙ୍ଗ୍ ତାଙ୍ଗେଙ୍ଗ୍ କଣ୍ଟ୍ରୁଲ୍ କିଦେଙ୍ଗ୍ ଆଡ୍ନାସା। 4 ଆରେ ଜାହାଜ୍ନି ବିଷୟରେ ହୁଡ଼ାଟ୍, ଜାଜ୍ ବେସି ଗାଜା ଆରେ ଦୁକାତାଙ୍ଗ୍ ଚାଲା ଆନାତ୍। ମାତର୍ ହିରୁ ଡଙ୍ଗା ହାଟ୍ୱାତାଙ୍ଗ୍ ଇମେନିପଣ୍ ଇଚା ଆନି ବୁଲାଇ କିଦେଙ୍ଗ୍ ଆଡ୍ନାସ୍। 5 ହେଲେକେ ୱେନ୍ଦୁଲ୍ ପା ରଞ୍ଜାଙ୍ଗ୍ ଗାଗାଡ଼୍ନି ହିରୁ ଜିନିଷ୍। ମାତର୍ ବେସି ବାଟ୍ପାଣ୍ କାତା ୱେଚ୍ନାତ୍। ଏପେଙ୍ଗ୍ ହିରୁ ନାଣି ପିସ୍କି ବିଷୟରେ ବାବିକିଜି ହୁଡ଼ାଟ୍, ଇ ନାଣିତାଙ୍ଗ୍ ଗାଜା ରାନ୍ତିଙ୍ଗ୍ କାଡିକିଦେଙ୍ଗ୍ ଆଡ୍ନାତ୍। 6 ହେଲେକେ ମା ୱେନ୍ଦୁଲ୍ ପା ନାଣି ପିସ୍କି ଲେକେ। ଇଦାଙ୍ଗ୍ ମା ଗାଗାଡ଼୍ନି ଜିନିଷ୍ ବିତ୍ରେ ଇଦାଙ୍ଗ୍ ରଞ୍ଜାଙ୍ଗ୍ ବେସି କରାପ୍ ଜିନିଷ୍ନି ମୁକ୍ଯ, ଇଦାଙ୍ଗ୍ ୱିଜୁ ଗାଗାଡ଼୍ତିଙ୍ଗ୍ କରାପ୍ କିନାତ୍। ହେଦାଙ୍ଗ୍ ରଞ୍ଜାଙ୍ଗ୍ ନରକ୍ନି ନାଣି ଲେକେ ଜିବୁନ୍ତିଙ୍ଗ୍ ନଷ୍ଟ କିଦ୍ନାତ୍। 7 ୱିଜୁ ପର୍କାର୍ ପଶୁ, ପଟିଙ୍ଗ୍, ପଟତାଙ୍ଗ୍ ରାଙ୍ଗା ଆନି ପଶୁ ଆରେ ଏଜୁକାଙ୍ଗ୍ ମାନି ପଶୁକାଙ୍ଗ୍ କଣ୍ଟ୍ରୁଲ୍ କିଜି ଇଡ଼୍ଦେଙ୍ଗ୍ ଆଡ୍ନାର୍, ଆରେ କଣ୍ଟ୍ରୁଲ୍ କିଜି ପା ଇଡ଼୍ତାର୍ନା। 8 ମାତର୍ ୱେନ୍ଦୁଲ୍ତିଙ୍ଗ୍ ଇନେର୍ ପା କଣ୍ଟ୍ରୁଲ୍ କିଜି ଇଡ଼୍ଦେଙ୍ଗ୍ ଆଡୁର୍, ଇଦାଙ୍ଗ୍ ରଞ୍ଜାଙ୍ଗ୍ ବେସି କରାପ୍ ଜିନିଷ୍ ଆରେ ଇଦାଙ୍ଗ୍ତିଙ୍ଗ୍ କଣ୍ଟ୍ରୁଲ୍ କିଜି ଇଡ଼୍ଦେଙ୍ଗ୍ ଆଡି ଆଉତ୍। ଇଦାଙ୍ଗ୍ ରଞ୍ଜାଙ୍ଗ୍ ବିସ୍ ମାଚି ରାଚ୍ ଲେକେ। 9 ଇ ୱେନ୍ଦୁଲ୍ତାଙ୍ଗ୍ ନେ ଆସେଙ୍ଗ୍ ମାପୃ ଆରେ ଆବା ଈଶ୍ୱରତିଙ୍ଗ୍ ଦନ୍ଯବାଦ୍ କିନାସା, ଆରେ ଈଶ୍ୱର ତା ଲେକେ ରସ୍ତି ମାନାୟ୍ତିଙ୍ଗ୍ ଇ ୱେନ୍ଦୁଲ୍ତାଙ୍ଗ୍ ନେ ଅବିଶାପ୍ ହିନାସା। 10 ଇ ୱେଇଦାଙ୍ଗ୍ ନେ ଆସେଙ୍ଗ୍ ଦନ୍ଯବାଦ୍ ଆରେ ଅବିଶାପ୍ ହିନାସା। ଏ ନା ପାର୍ତିକିନି ଟଣ୍ଡାର୍କାଦେର୍, ଇ ଲେକେ ଆନାକା ହାର୍ ଆକାୟ୍। 11 ର ଜାରାଣ୍ତାଙ୍ଗ୍ ରକଣ୍ଡାଙ୍ଗ୍ କେନିକିଙ୍ଗ୍ ଆରେ ଆଣ୍କିନି ଏଜୁଙ୍ଗ୍ ହତ୍ନିକ୍ କି? 12 ହେଲେକେ ଏ ନା ପାର୍ତିକିନି ଟଣ୍ଡାର୍କାଦେର୍, ତଗାମାର୍ତାଙ୍ଗ୍ ଜିତ୍ ପାଡ଼୍ ଆସ୍ତେଙ୍ଗ୍ ଆଡ୍ନାତ୍ କି? ଆରେ ଅଙ୍ଗୁର୍ହାସ୍ତାକେ ତଗାପାଡ଼୍ ଆସ୍ତେଙ୍ଗ୍ ଆଡ୍ନାତ୍ କି? ହେଲେକେ ଇମ୍ଣି ଜାରାଣ୍ତାକେ ହର୍ ଏଜୁଙ୍ଗ୍ ହତ୍ନିକା, ହେବେ ହୱାଦ୍ ଏଜୁଙ୍ଗ୍ ହତେଙ୍ଗ୍ ଆଡ଼୍ଦୁକ୍। ଈଶ୍ୱର ବୁଦିନି କାତା 13 ମି ବିତ୍ରେତାଙ୍ଗ୍ ରକାନ୍ ଜ୍ଞାନ୍ ଆରେ ବୁଦିକାଟାକାନ୍ ଇନେର୍ ମାନାନ୍ କି? ହେୱାନ୍ ସାଦୁ ଆରେ ହାର୍ଦି ଜିବୁନ୍ କାଟିକିଜି ତା ଜ୍ଞାନ୍ତିଙ୍ଗ୍ ଚଚେନ୍। 14 ଯଦି ବେସି ଆକାର୍ ଆନାକା ଆରେ ଜାର୍ ବିଷୟତିଙ୍ଗ୍ ଚିନ୍ତା କିନାକା ମି ମାନ୍ ବିତ୍ରେ ମାଚିସ୍, ଲାଗିଙ୍ଗ୍ ଏପେଙ୍ଗ୍ ଜ୍ଞାନ୍ ମାନାତ୍ ଇଞ୍ଜି ବାଟ୍ପାଣ୍ ଆମାଟ୍ ଆରେ ହେଲେକେ ପା ମିଚ୍ କାତା ୱେଚ୍ମାଟ୍। 15 ଈଶ୍ୱର ଇ ଲେକେ ଜ୍ଞାନ୍ ହିଦୁନ୍। ମାତର୍ ଇ ଲେକେ ଜ୍ଞାନ୍ ଇ ପୁର୍ତିନି ମାନାୟ୍, ଲବ୍ରା ମାନାୟ୍ ଆରେ ଶୟତାନ୍ତାଙ୍ଗ୍ ୱାନାତ୍। 16 ଇନେସ୍କି ଇମ୍ଣି ବାହାତାକେ ଆକାର୍ ଆରେ ଜାର୍ ବିଷୟତିଙ୍ଗ୍ ନେ ଚିନ୍ତା କିନାକା ମାଚିସ୍, ହେ ବାହାତାକେ ୱିଜୁ ପର୍କାର୍ କରାପ୍ କାମାୟ୍ ମାନ୍ଗାନାତ୍। 17 ମାତର୍ ଈଶ୍ୱରତାଙ୍ଗ୍ ପାୟାଆତି ଜ୍ଞାନ୍ ପାର୍ତୁମ୍ ହେୱାନ୍ ପବିତ୍ର ଆଜି ମାନାନ୍। ରି ନମ୍ବର୍ ତାକେ ହେୱାନ୍ ଶାନ୍ତିଆଜି ମାଞ୍ଜେଙ୍ଗ୍ ଇଚାକିନାନ୍, ସାଦୁ ଆଜି ମାନାନ୍, କାତା ମାନିକିଜି ମାନାନ୍, ୱିଜୁଦିନ୍ ହାର୍ଦି କାମାୟ୍ କିଜି ଦୟା କିନାନ୍, ବାଟ୍ପାଣିଆ ଆୱାଦାଙ୍ଗ୍ ଆରେ ମାନାୟ୍ ହୁଡ଼୍ଜି ପା ବ୍ଯବହାର୍ କିଉନ୍। 18 ରକାନ୍ ଚାଷି ବିୟାନ୍ ୱିତ୍ତି ଇନେସ୍ ପାଡ଼୍ ରୁଣ୍ଡାଇ କିନାନ୍, ହେଲେକେ ଶାନ୍ତିତାଙ୍ଗ୍ ମାଞ୍ଜେଙ୍ଗ୍ ଇଚାକିନି ମାନାୟ୍ ଦରମ୍ ଜିବୁନ୍ନି କାମାୟ୍ ନେ କିନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation