ଜାକ୍ବ 2 - New Testament in Pengo Parja Languageମାନାୟ୍ ହୁଡ଼୍ଜି ବ୍ଯବହାର୍ କିନାକା ପାପ୍ 1 ଏ ନା ପାର୍ତିକିନି ଟଣ୍ଡାର୍କାଦେର୍, ଆସେଙ୍ଗ୍ ଗୌରବମାନି ମାପୃ ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିନାପା ଇଞ୍ଜି ଏପେଙ୍ଗ୍ ମାନାୟ୍ ହୁଡ଼୍ଜି ବ୍ଯବହାର୍ କିମାଟ୍। 2 ମାନେ କିୟା ଯଦି ରକାନ୍ ମାନାୟ୍ ହନା ୱାତୁସ୍ ଆରେ ଦାମ୍କିୟା ହେନ୍ଦ୍ରା ଉସ୍ପି ମି ମଣ୍ଡ୍ଲିତାକେ ୱାଜି ମାନାନ୍, ଆରେ ରକାନ୍ ଗରିବ୍ ମାନାୟ୍ ସାସ୍ତା ହେନ୍ଦ୍ରା ଉସ୍ପିସ୍ ୱାଜି ମାନାନ୍। 3 ଆରେ ଏପେଙ୍ଗ୍ ଯଦି ଦାମ୍କିୟା ହେନ୍ଦ୍ରା ଉସ୍ପିତି ଲଗାଙ୍ଗ୍ ସନ୍ମାନ୍ ହିଜି ୱେଚ୍ନାଦେର୍ ୱା ଇ ହାର୍ଦି ବାହାତାକେ କୁଚା, ମାତର୍ ଗରିବ୍ ମାନାୟ୍ତିଙ୍ଗ୍ ୱେଚ୍ନାଦେର୍ ହେ ଲାଗାୟ୍ ନିଲା ନଇଲେ ନା କାଲ୍କୁ ଲାଗାୟ୍ କୁଚା। 4 ଏଲେଙ୍ଗ୍ କିତିସ୍ ଏପେଙ୍ଗ୍ ଜାର୍-ଜାର୍ବିତ୍ରେ ଗାଜା ହିରୁ ବାବିକିନାଦେରା। ଆରେ ଏପେଙ୍ଗ୍ ଅନ୍ୟାୟ୍ତାଙ୍ଗ୍ ବିଚାର୍ କିନାଦେରା। 5 ଏ ନା ପାର୍ତିକିନି ଟଣ୍ଡାର୍କାଦେର୍ ୱେନାଟ୍, ଈଶ୍ୱର ଗରିବ୍ ମାନାୟାରିଙ୍ଗ୍ ପାର୍ତିତାଙ୍ଗ୍ ହାଉକାର୍ ଆଦେଙ୍ଗ୍ ଇ ପୁର୍ତିତାଙ୍ଗ୍ ବାଚି କିତାନ୍ନା। ଆରେ ଈଶ୍ୱରତିଙ୍ଗ୍ ଲାଡ୍କିନି ମାନାୟାରିଙ୍ଗ୍ ଇମ୍ଣି ରାଜି ବିଷୟରେ ପାର୍ମାଣ୍ କିତାନ୍ନା, ଇ ମାନାୟାର୍ ହେ ରାଜିନି ଆଦିକାର୍ ଆନାର୍। 6 ଏପେଙ୍ଗ୍ ଗରିବ୍ ମାନାୟାରିଙ୍ଗ୍ ଇନସ୍ତା କିନାଦେରା। ମାତର୍ ହାଉକାର୍ ମାନାୟାର୍ ମିଙ୍ଗେଙ୍ଗ୍ ଅନ୍ୟାୟ୍ କିଦ୍ନାର୍ ଆରେ ମିଙ୍ଗେଙ୍ଗ୍ ହେୱାର୍ ବିଚାର୍କିନି ବାହାତାକେ ଜେଲ୍ଜି ଅସାହାଞ୍ଜ୍ନାର୍। 7 ଆସେଙ୍ଗ୍ ଯୀଶୁ ଖ୍ରୀଷ୍ଟ ନିପ୍ଣାକାପ୍, ଆରେ ତା ହାର୍ଦି ତର୍ଦିଙ୍ଗ୍ ହେ ହାଉକାର୍ ମାନାୟାର୍ ନିନ୍ଦା କିନାର୍। 8 “ଏପେଙ୍ଗ୍ ମି ପାଡ଼୍ହା ଇଞ୍ଜାକାରିଙ୍ଗ୍ ଲାଡ୍ କିୟାଟ୍,” ଏପେଙ୍ଗ୍ ଯଦି ନିୟମ୍ ସାସ୍ତର୍ତାକେ ଲେକାଆତି ଇ ଈଶ୍ୱର ନିୟମ୍ତିଙ୍ଗ୍ ମାନି କିୟାଟ୍, ଲାଗିଙ୍ଗ୍ ଏପେଙ୍ଗ୍ ଟିକ୍ କିତାଦେର୍ନା। 9 ମାତର୍ ଏପେଙ୍ଗ୍ ଯଦି ମାନାୟ୍ ହୁଡ଼୍ଜି ବ୍ଯବହାର୍ କିନାଦେରା, ଲାଗିଙ୍ଗ୍ ଏପେଙ୍ଗ୍ ପାପ୍ କିନାଦେରା। ଆରେ ହେ ନିୟମ୍ତିଙ୍ଗ୍ ବାଙ୍ଗାୟ୍ କିନି କାଜିଙ୍ଗ୍ ଏପେଙ୍ଗ୍ ଦସି ଆନାଦେର୍। 10 ଇନେର୍ ଯଦି ୱିଜୁ ନିୟମ୍ନି ମାନିକିଜି ର ବିଷୟତିଙ୍ଗ୍ ମାନିକିଉନ୍, ଲାଗିଙ୍ଗ୍ ହେୱାନ୍ ସାସ୍ତର୍ନି ୱିଜୁ ନିୟମ୍ତିଙ୍ଗ୍ ମାନିକିଉନା ଇଞ୍ଜି ଦସି ଆନାନ୍। 11 ଇନେସ୍କି ଈଶ୍ୱର ୱେଚ୍ଚାନ୍, “ଏପେଙ୍ଗ୍ ଦାରି କାମାୟ୍ କିମାଟ୍,” ଆରେପା ହେୱାନ୍ ୱେଚ୍ଚାନ୍, “ଏପେଙ୍ଗ୍ ମାନାୟ୍ ଅହ୍ମାଟ୍।” ଲାଗିଙ୍ଗ୍ ଏପେଙ୍ଗ୍ ଯଦି ଦାରି କାମାୟ୍ କିୱାଦାଙ୍ଗ୍ ମାନାୟ୍ ଅସ୍ତିସ୍, ଲାଗିଙ୍ଗ୍ ଏପେଙ୍ଗ୍ ନିୟମ୍ତିଙ୍ଗ୍ ବାଙ୍ଗାଇ କିନାକାଦେର୍ ଇଞ୍ଜି ଦସି ଆନାଦେର୍। 12 ମାଙ୍ଗେଙ୍ଗ୍ ମୁକ୍ତି ହିଦ୍ନି ନିୟମ୍ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ବିଚାର୍ କିଦ୍ନାନ୍। ଲାଗିଙ୍ଗ୍ ଏପେଙ୍ଗ୍ କାତା ୱେଚ୍ନିହିଙ୍ଗ୍ ଆରେ କାମାୟ୍ କିନିହିଙ୍ଗ୍ ଦୟାତାଙ୍ଗ୍ କିୟାଟ୍। 13 ଇମ୍ଣାକାନ୍ ଦୟା କିଉନ୍, ଈଶ୍ୱର ହେୱାନିଙ୍ଗ୍ ପା ଦୟା କିୱାଦାଙ୍ଗ୍ ବିଚାର୍ କିନାନ୍। ମାତର୍ ଇମ୍ଣାକାନ୍ ଦୟା କିନାନ୍ ହେୱାନିଙ୍ଗ୍ ଈଶ୍ୱର ବିଚାର୍ କିନିହିଙ୍ଗ୍ ଦୟା କିନାନ୍। କାମାୟ୍ କିୱାଦାଙ୍ଗ୍ ପାର୍ତି କିନାକା ବେକାରେ 14 ଏ ନା ପାର୍ତିକିନି ଟଣ୍ଡାର୍କାଦେର୍, ଇନେର୍ ଯଦି ନା ପାର୍ତି ମାନାତ୍ ଇଞ୍ଜି ୱେଚ୍ନାନ୍, ମାତର୍ ହେ ହିସାବ୍ରେ ହାର୍ଦି କାମାୟ୍ କିଉନ୍, ଲାଗିଙ୍ଗ୍ ହେଦାଙ୍ଗ୍ ଇନା ଲାବ୍ତିଙ୍ଗ୍ ଆକାୟ୍। ଆରେ ଇ ଲେକେ ପାର୍ତି କିତିସ୍ ହେୱାନ୍ ଉଦାର୍ ପାୟା ଆଉନ୍। 15 ମାନ୍ତ ବାବିକିୟା, ରକାନ୍ ଟଣ୍ଡେନ୍ କି ତଣ୍ଦେଲ୍ ଲାଗାୟ୍ ହେନ୍ଦ୍ରା ଆରେ ଚିଞ୍ଜେଙ୍ଗ୍ କାଦି ହିଲ୍ଗୁତ୍। 16 ଆରେ ମି ବିତ୍ରେତାଙ୍ଗ୍ ଇନେର୍ ହେୱାନିଙ୍ଗ୍ ବେସି ଦର୍କାର୍ଆନି ଜିନିଷ୍ ଇନାକାପା ହିୱାଦାଙ୍ଗ୍ ୱେଚ୍ନାନ୍, “ଟିକ୍ ମାନାତ୍ ଏନେଙ୍ଗ୍ ହାର୍ଦାଙ୍ଗ୍ ଆଜି ହାଲା।” ଏପେଙ୍ଗ୍ ହେୱାନିଙ୍ଗ୍ ସାଇଜ କିୱାଦାଙ୍ଗ୍ ହାଲା ଇଞ୍ଜି ୱେଚ୍ନାକା ଇନା ଲାବ୍? 17 ହେଲେକେ ହାର୍ଦି କାମାୟ୍ କିୱାଦାଙ୍ଗ୍ ପାର୍ତି କିତିସ୍ ହେଲେକେ ପାର୍ତି କିନାକା ହାଃତି ଲେକେ। 18 ମାତର୍ ରକାନ୍ ଯଦି ନାଙ୍ଗେଙ୍ଗ୍ ୱେଚ୍ନାନ୍, “ରକାଙ୍ଗ୍ ଯୀଶୁଙ୍ଗ୍ ପାର୍ତି କିନାଙ୍ଗା, ଆରେ ରକାଙ୍ଗ୍ ହାର୍ଦି କାମାୟ୍ କିନାଙ୍ଗା।” ଲାଗିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ୱେଚ୍ନାଙ୍ଗ୍, “ଏନେଙ୍ଗ୍ ହାର୍ଦି କାମାୟ୍ କିୱାଦାଙ୍ଗ୍ ଇନେସ୍ ଯୀଶୁତାକେ ପାର୍ତି କିନାୟା ହେଦାଙ୍ଗ୍ ନାଙ୍ଗେଙ୍ଗ୍ ଚଚ୍ଚା?, ଲାଗିଙ୍ଗ୍ ଆନେଙ୍ଗ୍ ହାର୍ଦି କାମାୟ୍ କିଜି ଯୀଶୁତାକେ ପାର୍ତି କିନାକା ଚଚ୍ଚେଦେଙ୍ଗ୍ ଆଡ୍ନାଙ୍ଗ୍।” 19 ରକାନ୍ ନେ ଈଶ୍ୱର ମାନାନ୍ ଇଞ୍ଜି ଏପେଙ୍ଗ୍ ପାର୍ତି କିନାକା ଟିକ୍, ମାତର୍ ବୁତ୍ଆତ୍ମାକ୍ ପା ପାର୍ତି କିଜି ପାଣ୍ଡ୍ରାଆଜି ତ୍ରିଗ୍ନିକା। 20 ଏ ବୁଦିହିଲ୍ୱି ମାନାୟାର୍, ହାର୍ଦି କାମାୟ୍ କିୱାଦାଙ୍ଗ୍ ପାର୍ତି କିନାକା ଇନା ଲାବ୍ ଆକାୟ୍, ଇଦାଙ୍ଗ୍ ଇନାକା ପୁଞ୍ଜେଙ୍ଗ୍ ଇଚା କିନାଦେରା? 21 ମା ଆକଦାଦି ଅବ୍ରାହାମ ବେଦିଜପି ଜାର୍ ହିମ୍ଣା ଇସାକତିଙ୍ଗ୍ ବଲିପୁଜା କିନି ୱେଡ଼ାଙ୍ଗ୍, ଈଶ୍ୱର ହେୱାନିଙ୍ଗ୍ ପାର୍ତି ଆରେ ତା ହାର୍ଦି କାମାୟ୍ ହୁଡ଼୍ଜି ଦରମ୍ ମାନାୟ୍ ଇଞ୍ଜି ଇଚାନ୍। 22 ଇବେତାଙ୍ଗ୍ ବୁଜାଆଡ ଯେ, ପାର୍ତି କିନାକା ଆରେ ତା କାମାୟ୍ କିନାକା ରିଣ୍ଡାଙ୍ଗ୍ ମାହାଆଜି ମାଚାତ୍, ଆରେ କାମାୟ୍ କାଜିଙ୍ଗ୍ ତା ପାର୍ତି କିନାକା ପୁରା ଆତାତ୍। 23 ଲାଗିଙ୍ଗ୍ ନିୟମ୍ ସାସ୍ତର୍ନି ଇ କାତା ପୁରା ଆତାତ୍, “ଅବ୍ରାହାମ ଈଶ୍ୱରତାକେ ପାର୍ତି କିତାନ୍, ଆରେ ତା ପାର୍ତି କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ଦରମ୍ ମାନାୟ୍ ଇଞ୍ଜି ଇଚାନ୍।” ଆରେ ଈଶ୍ୱର ଅବ୍ରାହାମତିଙ୍ଗ୍ ୱେଚ୍ଚାନ୍, “ହେୱାନ୍ ନା ସାଙ୍ଗ।” 24 ଲାଗିଙ୍ଗ୍ ଇଦାଙ୍ଗ୍ ଏପେଙ୍ଗ୍ ବୁଜାଆଡ ଯେ, ଆପ୍କା ପାର୍ତିକିନି କାଜିଙ୍ଗ୍ ମାନାୟ୍ ଦରମ୍ ଇଞ୍ଜି ଗାଣାକିୟା ଅଉନ୍। ମାତର୍ ତା କାମାୟ୍ କିନି କାଜିଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାନ୍। 25 ହେଲେକେ ରାହାବ ରଞ୍ଜେଲ୍ ଦାରି କାମାୟ୍ କିନି କଗ୍ଲେ ଇସ୍ରାଏଲନି ଇନ୍କାର୍ କିନି ଡାଣ୍ଡାସିରିଙ୍ଗ୍ ତାଞ୍ଜ ମାଞ୍ଜେଙ୍ଗ୍ ବାହା ହିତାତ୍, ଆରେ ହେଦେଲ୍ ହେୱାରିଙ୍ଗ୍ ଜେକନି ହାଜ୍ଦିଙ୍ଗ୍ ପକ୍ଚି ମାଚାତ୍। ଇ କାମାୟ୍ କାଜିଙ୍ଗ୍ ହେଦେଲ୍ ଦରମ୍ କଗ୍ଲେ ଇଞ୍ଜି ଗାଣାକିୟା ଆଜି ମାଚାତ୍। 26 ଲାଗିଙ୍ଗ୍ ଆତ୍ମା ହିଲ୍ୱିତିସ୍ ଗାଗାଡ଼୍ ଇନେସ୍ ହାଃତି ଲେକେ, ହେଲେକେ ନେ ହାର୍ଦି କାମାୟ୍ କିୱାଦାଙ୍ଗ୍ ପାର୍ତି କିନାକା ପା ହାଃତି ଲେକେ। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation