ଜାକ୍ବ 1 - New Testament in Pengo Parja Languageଯାକୁବ ଜୱାର୍ କିତି ବିଷୟ 1 ଆନେଙ୍ଗ୍ ଯାକୁବ ଇ ଚିଟି ଲେକିକିନାଙ୍ଗା। ଆନେଙ୍ଗ୍ ରକାଙ୍ଗ୍ ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟନି ଦାସ୍। ପୁର୍ତିନି ଚାରିବେଣ୍ତାଙ୍ଗ୍ ଚିନ୍-ବିନ୍ ଆଜି ମାନି ଯିହୁଦି ଜାତିନି ବାର ଲାତ୍ରାନି ଖ୍ରୀଷ୍ଟାନାରିଙ୍ଗ୍ ଆନେଙ୍ଗ୍ ଜୱାର୍ କିନାଙ୍ଗା। ଦୁକ୍କଷ୍ଟ ଆତିହିଙ୍ଗ୍ ପା ଈଶ୍ୱରତାକେ ପାର୍ତିକିନି କାତା 2 ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଏଚେପାଦ୍ନା ୱିଜୁ ପର୍କାର୍ ଦୁକ୍କଷ୍ଟ ପାୟାଆତିହିଙ୍ଗ୍ ବେସି ୱାରି ଆଡ, 3 ଇନେସ୍କି ଏପେଙ୍ଗ୍ ପୁଚାଦେର୍ନା ଯେ, ଏଚେପାଦ୍ନା ମି ପାର୍ତିନି ପରିକ୍ଷା ଆନାତ୍ ଲାଗିଙ୍ଗ୍ ଏପେଙ୍ଗ୍ ବେସି ସାହାସ୍ ପାୟାଆନାଦେର୍। 4 ଏପେଙ୍ଗ୍ ଦୁକ୍କଷ୍ଟ ପାୟାଆତିହିଙ୍ଗ୍ ପା ଈଶ୍ୱରତାକେ ପାର୍ତି କିଜି ମାନାଟ୍। ଲାଗିଙ୍ଗ୍ ଈଶ୍ୱର ଇଚାକିନି ହାର୍ଦି ଗୁଣ୍ ପାୟାଆଜି ଟିକ୍ଟାକ୍ ଆଜି ମାନାଦେର୍, ଆରେ ରଞ୍ଜାଙ୍ଗ୍ ପା ହାର୍ଦି ବିଷୟତାଙ୍ଗ୍ ଉଣା ଆଉଦେର୍। 5 ମାତର୍ ମି ବିତ୍ରେ ଇନେରିଙ୍ଗ୍ ବୁଦି ହିଲ୍ଗୁତ୍ ହେୱାନ୍ ଈଶ୍ୱରତାକେ ପାର୍ତାନା କିୟେନ୍, ଲାଗିଙ୍ଗ୍ ଈଶ୍ୱର ହେୱାନିଙ୍ଗ୍ ବୁଦି ହିନାନ୍, ଇନେସ୍କି ହେୱାନ୍ ଇନେର୍ ଦସ୍ ପା ଆହ୍ୱାଦାଙ୍ଗ୍ ହିନାନ୍। 6 ମାତର୍ ଏଚେପାଦ୍ନା ହେୱାର୍ ଈଶ୍ୱରତାକେ ପାର୍ତାନା କିନିହିଙ୍ଗ୍ ଅଲପ୍ପା ଡାଉଟ୍ କିୱାଦାଙ୍ଗ୍ ପାର୍ତି କିନାକା ମାନାତ୍। ଇନେସ୍କି ହାମ୍ଦୁର୍ନି ଲଉଡ଼ି ଡ଼ୁଇ ୱାତିସ୍ ଇନେସ୍ ଇନିଆନି ଆନାତ୍ ହେଲେକେ ଡାଉଟ୍ କିନି ମାନାୟାର୍। 7 ହେୱାନ୍ ରକାନ୍ ରି ମାନ୍ୟା ମାନାୟ୍, ଆରେ ହେୱାନ୍ ଇନେର୍ ତାକେ ପା ଆହା କିଉନ୍। 8 ହେଲେକେ ମାନାୟ୍ ଇଶ୍ୱରତାଙ୍ଗ୍ ଇନାକା ପାୟାଆନାଙ୍ଗ୍ ଇଞ୍ଜି ଆହା କିମେନ୍। 9 ପାର୍ତିକିନି ଗରିବ୍ ମାନାୟାର୍ ୱାରି ଆନି ଦର୍କାର୍, ଇନେସ୍କି ହେୱାରିଙ୍ଗ୍ ଈଶ୍ୱର ସନ୍ମାନ୍ କିନାନ୍। 10 ଆରେ ପାର୍ତିକିନି ହାଉକାର୍ ମାନାୟାର୍ ୱାରି ଆନି ଦର୍କାର୍, ଏଚେପାଦ୍ନା ଈଶ୍ୱର ହେୱାରିଙ୍ଗ୍ ହିରୁ କିନାନ୍। ଇନେସ୍କି କାଚ୍ରାନି ପୁଇ ନଷ୍ଟ ଆନାତ୍, ହେଲେକେ ନେ ହାଉକାର୍ତି ଦନ୍ ନଷ୍ଟ ଆନାତ୍। 11 ଏଚେପାଦ୍ନା ୱେଡ଼ା ହସି କାରା ଜୁରା ଆତିସ୍ କାଚ୍ରାନି ପୁଇକୁ ୱାଚ୍ନିକ୍, ଆରେ ତା ହଲ୍ନାକା ପା ନଷ୍ଟ ଆନାତ୍। ହେଲେକେ ନେ ପାର୍ତିକିନି ହାଉକାର୍ ମାନାୟ୍ ପା ବୁଡା ଆନାନ୍। 12 ଇମ୍ଣି ମାନାୟ୍ ପରିକ୍ଷା ଆତିହିଙ୍ଗ୍ ପା ଈଶ୍ୱରତାକେ ପାର୍ତି କିଜି ମାନାନ୍, ହେୱାନ୍ ଆଶ୍ରିବାଦ୍ନି ମାନାୟ୍। ଇନେସ୍କି ଈଶ୍ୱରତିଙ୍ଗ୍ ଲାଡ୍କିନି ମାନାୟ୍ରିଙ୍ଗ୍ ଇମ୍ଣି ୱିଜ୍ୱି ଜିବୁନ୍ନି ମୁକୁଟ୍ ହିଦେଙ୍ଗ୍ ଈଶ୍ୱର ପାର୍ମାଣ୍ କିତାନ୍ନା। ପରିକ୍ଷାତାଙ୍ଗ୍ ଜିତାଆତି ପାଚେ ହେ ମାନାୟାରିଙ୍ଗ୍ ହେ ମୁକୁଟ୍ ଈଶ୍ୱର ହିନାନ୍। 13 ଲାଗିଙ୍ଗ୍ ଇମ୍ଣାକାନ୍ ପରିକ୍ଷାତାକେ ପଡ଼ାଆନାନ୍ ହେପାଦ୍ନା ହେୱାନ୍ ଈଶ୍ୱର ପରିକ୍ଷା କିୟିକିଦ୍ନାନ୍ ଇଞ୍ଜି ୱେଚ୍ମେନ୍, ଇନେସ୍କି ଈଶ୍ୱର ଇନେରିଙ୍ଗ୍ ପା କରାପ୍ କାମାୟ୍ କିଦେଙ୍ଗ୍ ୱେଚ୍ଚୁନ୍। ଆରେ ହେୱାନ୍ ନିଜେ ଇନେରିଙ୍ଗ୍ ପା ପରିକ୍ଷା କିଉନ୍। 14 ମାତର୍ ୱିଜୁ ମାନାୟାର୍ ଜାର୍ କରାପ୍ କାମାୟ୍ନି ଇଚା କାଜିଙ୍ଗ୍ ହେୱାର୍ ପରିକ୍ଷାତାକେ ପଡ଼ାଆନାର୍। 15 ଇନେସ୍କି ହେୱାନ୍ କରାପ୍ କାମାୟ୍ କିଦେଙ୍ଗ୍ ଚିନ୍ତା କିତି ପାଚେ, ହେୱାନ୍ ପାପ୍ କାମାୟ୍ କିନାନ୍। ଆରେ ଏଚେପାଦ୍ନା ପାପ୍ କାମାୟ୍ କିନାକା ଅବ୍ୟାସ୍ ଆତି ପାଚେ ହେୱାନ୍ ୱିଜୁଦିନ୍ ନି ହାଃନି ଦଣ୍ଡ୍ ପାୟା ଆନାନ୍। 16 ଏ ନା ପାର୍ତିକିନି ଟଣ୍ଡାର୍କାଦେର୍ ଏପେଙ୍ଗ୍ ଜାର୍ତିଙ୍ଗ୍ ଟକାଇ କିୟାଆମାଟ୍। 17 ଇନେସ୍କି ମା ଆବା ଈଶ୍ୱର ୱିଜୁ ପର୍କାର୍ ହାର୍ଦି ବର୍ଦାନ୍, ଆରେ ଟିକ୍ଟାକ୍ ବର୍ଦାନ୍ ହିଦ୍ନାନ୍। ହେୱାନ୍ ବାଦାଡ଼୍ନି ହୁକାଙ୍ଗ୍, ୱେଡ଼ା ଆରେ ଲେଞ୍ଜ୍ତିଙ୍ଗ୍ ରସ୍ତାନ୍ନା। ହେୱାନ୍ ଇନାୱେଡ଼ାଙ୍ଗ୍ ପା ଡ଼ିଗା ଲେକେ ବାଦ୍ଲା ଆଉନ୍, ୱିଜୁଦିନ୍ ହାମାନ୍ ମାନ୍ଗାନାନ୍। 18 ତାସ୍ନି ପାର୍ତୁମ୍ ପାଡ଼୍ଲେକେ ହେୱାନ୍ ରସ୍ତି ୱିଜୁ ଜିନିଷ୍ତାଙ୍ଗ୍ ମାଙ୍ଗେଙ୍ଗ୍ ପାର୍ତୁମ୍ ମାନାୟ୍ କିଦ୍ନି କାଜିଙ୍ଗ୍, ଆସେଙ୍ଗ୍ ତା ସତ୍ ହାର୍ଦିକାବୁର୍ତିଙ୍ଗ୍ ପାର୍ତି କିତିସ୍, ହେୱାନ୍ ମାଙ୍ଗେଙ୍ଗ୍ ପୁନି ଜିବୁନ୍ ହିଦ୍ନି କାଜିଙ୍ଗ୍ ଇଚା କିତାନ୍ନା। ୱେନା କାଦେର୍ ଆୱାଦାଙ୍ଗ୍ କାମାୟ୍ କିନାକାଦେର୍ ଆଡ 19 ଏ ନା ପାର୍ତିକିନି ଟଣ୍ଡାର୍କାଦେର୍, ଇଦାଙ୍ଗ୍ ଏପେଙ୍ଗ୍ ପୁନ୍ଞ୍ଜି ମାନାଟ୍ ଯେ, ୱିଜାକାଦେର୍ ୱେନି କାଜିଙ୍ଗ୍ ବେସି ଇଚା କିୟାଟ୍, ମାତର୍ ୱେଚ୍ଚେଙ୍ଗ୍ ଆରେ ରିସା ଆଦେଙ୍ଗ୍ ଦିରେ ଆଡ। 20 ଇନେସ୍କି ଏଚେପାଦ୍ନା ଏପେଙ୍ଗ୍ ରିସା ଆନାଦେର୍, ଈଶ୍ୱର ଇଚାକିତି ଇସାବ୍ରେ ଦରମ୍ ଜିବୁନ୍ କାଟି କିଦେଙ୍ଗ୍ ଆଡୁଦେର୍। 21 ହେଦାଙ୍ଗ୍ କାଜିଙ୍ଗ୍ ୱିଜୁ ପର୍କାର୍ କରାପ୍ କାମାୟ୍ କିନାକା ପିହାଟ୍, ଆରେ ୱିଜୁଦିନ୍ କିନି ଦୁଷ୍ଟ କାମାୟ୍ ବନ୍ଦ୍ କିୟାଟ୍। ଆରେ ମିବେ ମାନି ଈଶ୍ୱର କାତାତିଙ୍ଗ୍ ସଦ୍ଦରମ୍ ଆଜି ଆହାଟ୍ ହେଦାଙ୍ଗ୍ ମି ଜିବୁନ୍ତିଙ୍ଗ୍ ଉଦାର୍ କିଦ୍ଦେଙ୍ଗ୍ ଶାକ୍ତି ହିଦ୍ନାତ୍। 22 ଲାଗିଙ୍ଗ୍ ଏପେଙ୍ଗ୍ ଈଶ୍ୱର କାତାତିଙ୍ଗ୍ ନେ ୱେନ୍ଞ୍ଜି ମାନ୍ମାଟ୍, ମାତର୍ ଏପେଙ୍ଗ୍ ହେଦାଙ୍ଗ୍ତିଙ୍ଗ୍ ମାନି କିୟାଟ୍, ଆରେ ଏପେଙ୍ଗ୍ ଜାର୍ତିଙ୍ଗ୍ ଟକାଇ କିୟି ଆମାଟ୍। 23 ଇନେସ୍କି ଇମ୍ଣାକାନ୍ ଈଶ୍ୱର କାତାତିଙ୍ଗ୍ ୱେନାନ୍, ମାତର୍ ହେଦାଙ୍ଗ୍ତିଙ୍ଗ୍ ମାନିକିଉନ୍ ହେ ମାନାୟ୍ ଦାର୍ପାଣ୍ତାକେ ତା ମୁମ୍ ହୁଡ଼୍ତି ଲେକେ ଆନାତ୍। 24 ହେୱାନ୍ ନିଜେ ଦାର୍ପାଣ୍ତାକେ ହୁଡ଼ିଆତି ପାଚେ, ହେୱାନ୍ ଇନେସ୍ ଲେଗ୍ଦି ମାନାୟ୍ ମାଚାନ୍ ଚାନେକ୍ତିଙ୍ଗ୍ ବାଣା ଆନାନ୍। 25 ମାତର୍ ଇମ୍ଣାକାନ୍ ଜାଗ୍ରତ୍ ଆଜି ଈଶ୍ୱର ଟିକ୍ ନିୟମ୍ତିଙ୍ଗ୍ ପଡ଼ିକିଜି ମାନ୍ତ ଇଡ଼୍ଜି ମାନି କିନାନ୍, ହେୱାନ୍ ପାପ୍ କାମାୟ୍ତାଙ୍ଗ୍ ମୁକ୍ତି ଆନାନ୍, ଆରେ ହେୱାନ୍ ଇନାକା କିତିସ୍ ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିନାନ୍। 26 ଇମ୍ଣାକାନ୍ ଦରମ୍ ମାନାୟ୍ ଇଞ୍ଜି ଚଚିୟା ଆନାନ୍, ମାତର୍ ହେୱାନ୍ ୱେଚ୍ନି କରାପ୍ କାତା ୱେଚ୍ନି ୱେନ୍ଦୁଲ୍ତିଙ୍ଗ୍ କଣ୍ଟ୍ରୁଲ୍ କିଉନ୍। ଲାଗିଙ୍ଗ୍ ହେୱାନ୍ ନିଜେ ଟକାଇ କିୟି ଆନାନା ଆରେ ହେୱାନ୍ ନିଜେ ଦରମ୍ ଜିବୁନ୍ କାଟି କିନାକା ବେକାରେ ଆନାତ୍। 27 ଟୁରା ହିମ୍ଣା ଆରେ ରାଣ୍ଡି କଗ୍ଲେକାଙ୍ଗ୍ ଜାତୁନ୍ କିଦେଙ୍ଗ୍ ଆରେ ପୁର୍ତିନି କରାପ୍ କାମାୟ୍ତାଙ୍ଗ୍ ମାନ୍ୱାଦାଙ୍ଗ୍ ଜାର୍ତିଙ୍ଗ୍ କରାପ୍ ଆଜି ମାନ୍ଗୁନ୍, ହେଦାଙ୍ଗ୍ ନେ ମା ଆବା ଈଶ୍ୱର ମୁମ୍ଦ ନିର୍ମଲ୍ ଆରେ ଟିକ୍ଟାକ୍ ଦରମ୍ ଜିବୁନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation