ଏବ୍ରି 9 - New Testament in Pengo Parja Languageପୁର୍ତିନି କୁଡ଼ିଆନି ପୁଜାକିନି ବିଷୟରେ ନିତି ନିୟମ୍ 1 ଈଶ୍ୱର ପାର୍ତୁମ୍ ପାର୍ମାଣ୍, ପୁଜା ଆରେ ପବିତ୍ର ପୁଟ୍ କୁଡ଼ିଆ ପୁର୍ତିତାକେ ରହ୍ନି ବିଷୟରେ ନିତି ନିୟମ୍ ଇସ୍ରାଏଲନି ମାନାୟାରିଙ୍ଗ୍ ହିଜିମାଚାନ୍। 2 ଇ ପୁଟ୍ କୁଡ଼ିଆ ପଶୁନି ତଲ୍ଦାଙ୍ଗ୍ ରହିଆଜି ମାଚାତ୍ ଆରେ ପୁଟ୍ କୁଡ଼ିଆ ମାଦି ପାର୍ଦା ଡ଼ସି ରି ବାଗ୍କିଜି ମାଚାତ୍। ଆରେ କୁଡ଼ିଆନି ବାର୍ତ ପାର୍ତୁମ୍ ବାହାତିଙ୍ଗ୍ ପବିତ୍ର ବାହା ଇଞ୍ଜି ୱେଚ୍ନାର୍। ହେବେ ବଇଟା ଇଟ୍ନି ଷ୍ଟେଣ୍ଟ୍ ଆରେ ଈଶ୍ୱରତାକେ ପୁଜାକିତି ରୁଟି ଟେବୁଲ୍ ଜପି ଇଡ଼୍ଜି ମାଚାର୍। 3 ଆରେ ପୁଟ୍ କୁଡ଼ିଆତାକେ ଡ଼ୟିକିତି ପାର୍ଦା ବିତ୍ରେନି ଆରେ ର ବାକ୍ରାତିଙ୍ଗ୍ ବେସି ପବିତ୍ର ବାହା ଇଞ୍ଜି ଇନାର୍। 4 ହେ ବାହାତାକେ, ହନାତାକେ ରସ୍ତି ଦୁପ୍ ବେଦି ଆରେ ଚାରିବେଣ୍ତାଙ୍ଗ୍ ହନାତାଙ୍ଗ୍ ହୁର୍ପିଆତି ନିୟମ୍ ପେଡ଼ି ମାଚାତ୍। ଇ ନିୟମ୍ ପେଡ଼ି ବିତ୍ରେ ମାନ୍ନା ତର୍ଦି ର ଜିନିଷ୍ ଇଡ଼୍ଜି ମାଚି ର ହନାନି ଗିନା, ହାରଣ ଈଶ୍ୱର ହେବାକିନି ମୁଡ଼୍ଦି ପୁଜାରିନି ଗଜା ହସିମାଚି ବେଡ୍ଗା ଆରେ ଈଶ୍ୱର ହିଜିମାନ୍ଚି ଦଶ୍ଗଟା ଆଦେସ୍ ଲେକାଆତି ରିଣ୍ଡାଙ୍ଗ୍ କାଲ୍ ପାଟା ମାଚିକ୍। 5 ଆରେ ଈଶ୍ୱର ହେବେ ମାନାନ୍ ଇଞ୍ଜି ଚିନ୍ କିନି କାଜିଙ୍ଗ୍ ନିୟମ୍ ପେଡ଼ି ଜପି ଈଶ୍ୱରତି ଗୌରବ ଚଚ୍ନି କାଜିଙ୍ଗ୍ ରିଣ୍ଡାଙ୍ଗ୍ କିରୁବ ମାଚିକ୍। ଆରେ ଈଶ୍ୱରତାଙ୍ଗ୍ ପାପ୍ କେମା ପାୟାଆନି କାଜିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଇମ୍ଣି ବାହାତାକେ ୱାଜି ପାର୍ତାନା କିନାନ୍, ହେ ୱିଜୁ ବାହା ହେ କିରୁବ ମାରାତାକେ ଡାବା ଆତାତ୍ନା। ମାତର୍ ଇୱିଜୁ ବିଷୟରେ ନଙ୍ଗୟ୍ ଆସେଙ୍ଗ୍ ପୁରା ୱେଚ୍ଚେଙ୍ଗ୍ ଆଡୁସ୍। 6 ପୁଟ୍ କୁଡ଼ିଆନି ରିଣ୍ଡାଙ୍ଗ୍ ବାକ୍ରାଙ୍ଗ୍ ୱିଜୁ ବିଷୟ ଇଲେକେ ହେୱାର୍ ରସ୍ତି ମାଚାର୍। ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ହେୱାର୍ ରିତିନିତି କାମାୟ୍ କିନି କାଜିଙ୍ଗ୍ କୁଡ଼ିଆନି ବାର୍ ବାକ୍ରାତାକେ ୱିଜୁଦିନ୍ ହାଲ୍ଜି ମାଚାର୍। 7 ମାତର୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ନେ ବାହ୍ରେକ୍ତିଙ୍ଗ୍ ରଗ ବେସି ପବିତ୍ର ବାହାତାକେ ହାଲ୍ଜି ମାଚାନ୍। ହେୱାନ୍ ବିତ୍ରେ ହାନିହିଙ୍ଗ୍, ୱିଜୁଦିନ୍ ପଶୁନି ନେତେର୍ ଅଜି ହାଲ୍ଜି ମାଚାନ୍। ହେୱାନ୍ ଜାର୍ ପାପ୍ କାଜିଙ୍ଗ୍ ଆରେ ପୁନ୍ୱାଦାଙ୍ଗ୍ କିଜିମାଚି ମାନାୟାର୍ ପାପ୍ତାଙ୍ଗ୍ କେମା ପାୟାଆନି କାଜିଙ୍ଗ୍, ହେୱାନ୍ ଈଶ୍ୱର ଲାଗାୟ୍ ହେ ନେତେର୍ତିଙ୍ଗ୍ ପୁଜାକିଜି ମାଚାନ୍। 8 ଇ ରିତିନିତି ମାନିକିନି କାଜିଙ୍ଗ୍ ପବିତ୍ର ଆତ୍ମା ମାଙ୍ଗେଙ୍ଗ୍ ବୁଜାଇ କିଦ୍ନାତା ଯେ, ଇ ପୁର୍ତିତାକେ ଏଚେପାଦ୍ନା ପାତେକ୍ ପୁଟ୍ କୁଡ଼ିଆ ଆରେ ହେବେନି ରିତିନିତି ମାନିକିନି। ଲାଗିଙ୍ଗ୍ ଈଶ୍ୱରତି ସରଗ୍ନି ବେସି ପବିତ୍ର ମନ୍ଦିର୍ତାକେ ହାନି କାଜିଙ୍ଗ୍ ନଙ୍ଗୟ୍ ପାତେକ୍ ହାଜି ଜେୟା ଆୱାତାତ୍ନା। 9 ଇ ୱିଜୁ ବିଷୟ ର ଚିନା ଲେକେ, ଆରେ ହେଦାଙ୍ଗ୍ ୱିଜୁ ନଙ୍ଗୟ୍ ଯୀଶୁ ଖ୍ରୀଷ୍ଟତାଙ୍ଗ୍ ପୁରା ଆତାତ୍ନା। ଈଶ୍ୱରତିଙ୍ଗ୍ ହେବାକିନି ମାନାୟାର୍ ଇମ୍ଣି ଦାନ୍ ଆରେ ବଲିପୁଜା କିଜି ମାଚାର୍, ହେଦାଙ୍ଗ୍ ମାନାୟାର୍ ବୁଦି ଆରେ ମାନ୍ତିଙ୍ଗ୍ ଟିକ୍ କିଦେଙ୍ଗ୍ ଆଡ୍ୱାଦାଙ୍ଗ୍ ମାଚାତ୍। 10 ଇନେସ୍କି ପାନି ନିୟମ୍ ଆପ୍କା, ରକାନ୍ ଇନାକା ତିନାନ୍ ଆରେ ଉଣାନ୍ ଆରେ ଜେକନି ଶୁଚି ରିତିନିତି ବିଷୟରେ ୱେଚ୍ଚି ମାନାତ୍। ଇ ନିତି ନିୟମ୍ ରକାନ୍ ଗରବ୍ତିଙ୍ଗ୍ ବାଦ୍ଲାୟ୍କିନି କାଜିଙ୍ଗ୍ ଇନା ସମ୍ପର୍କ ଆକାୟ୍। ପୁନି ନିୟମ୍ ହିଦ୍ୱି ପାତେକ୍ ହେଦାଙ୍ଗ୍ ମାନିକିନି କାଜିଙ୍ଗ୍ ହିୟାଆଜି ମାଚାତ୍। ଯୀଶୁ ନେତେର୍ତାଙ୍ଗ୍ ମୁକ୍ତି ଗାଟାଆଦ୍ନାତ୍ 11 ଲାଗିଙ୍ଗ୍ ଖ୍ରୀଷ୍ଟ ନଙ୍ଗୟ୍ ୱିଜୁ ହାର୍ଦି ବିଷୟ ଜପି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଆତାନ୍ନା। ସରଗ୍ତାକେ ମାନି ଗାଜା ଆରେ ପୁରାପୁରି ଟିକ୍ କୁଡ଼ିଆତାକେ ହେୱାନ୍ ହଟାନ୍ନା, ହେ କୁଡ଼ିଆ ମାନାୟ୍ତାଙ୍ଗ୍ ରହି ଆୱାତାତ୍ନା ଆରେ ଇ ଜଗତ୍ନି ରସ୍ତି ବାଗ୍ ଆକାୟ୍। 12 ହେୱାନ୍ ମେଣ୍ଢା କି ଅଡା ନେତେର୍ ଆସ୍ତି ସରଗ୍ତାକେ ମାନି କୁଡ଼ିଆନି ବେସି ପବିତ୍ର ବାହାତାକେ ହାଲ୍ୱାତାନ୍ନା, ମାତର୍ ହେୱାନ୍ ତା ଜାର୍ ନେତେର୍ ଆସ୍ତି ୱିଜୁଦିନ୍ କାଜିଙ୍ଗ୍ ରଗ ହାଚାନ୍ନା। ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ୱିଜ୍ୱି ମୁକ୍ତି ପାୟାଆତାସ୍ନା। 13 ପାନି ନିୟମ୍ ଅନ୍ସାରେ, ରିତିନିତି ଅନ୍ସାରେ ଇମ୍ଣାକାର୍ ଅଶୁଚି, ହେୱାର୍ ଜପି ଅଡା ଆରେ ବାଳ୍ଦୁନି ନେତେର୍ ଆରେ ବଲିପୁଜା କିତାକା ପିସ୍ତି ବାଚାତିଙ୍ଗ୍ କାଡିକିତି ନିସ୍ ଡ଼ଞ୍ଜ୍ଜି ମାଚାର୍। ଇଦାଙ୍ଗ୍ ହେୱାର୍ ବାର୍ତି ଗାଗାଡ଼୍ତିଙ୍ଗ୍ ଶୁଚି କିଜି ମାଚାତ୍। 14 ମାତର୍ ଏପେଙ୍ଗ୍ ଇଦାଙ୍ଗ୍ ବାବି କିୟାଟ୍ ଯେ ହାଃନି ହାଜ୍ଦିଙ୍ଗ୍ ଅଦ୍ନି କାମାୟ୍ତାଙ୍ଗ୍ ଖ୍ରୀଷ୍ଟ ନେତେର୍ ଆଦିକ୍ କିଜି ମା ଗରବ୍ତିଙ୍ଗ୍ ଶୁଚି କିଦ୍ନାତ୍, ଆରେ ଆସେଙ୍ଗ୍ ଜିବୁନ୍ ମାନି ଈଶ୍ୱରତିଙ୍ଗ୍ ହେବା କିଦେଙ୍ଗ୍ ଆଡ୍ନାସ୍। ଇନେସ୍କି ୱିଜ୍ୱି ଆତ୍ମାନି ଶାକ୍ତିତାଙ୍ଗ୍, ମା ପାପ୍ କାଜିଙ୍ଗ୍ ଖ୍ରୀଷ୍ଟ ତା ଜାର୍ ଜିବୁନ୍ତିଙ୍ଗ୍ ଈଶ୍ୱର ଲାଗାୟ୍ ର ପୁରାପୁରି ଟିକ୍ ବଲିପୁଜା କିତାନ୍ନା। 15 ଈଶ୍ୱର ଇମ୍ଣାକାରିଙ୍ଗ୍ କୁକ୍ଚି ୱିଜ୍ୱି ଆଶ୍ରିବାଦ୍ ହିନି କାଜିଙ୍ଗ୍ ପାର୍ମାଣ୍ କିତାନ୍ନା, ହେୱାର୍ ଇନେସ୍ ହେଦାଙ୍ଗ୍ ଆହ୍ନାର୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ଆରେ ମାନାୟାର୍ ହୁଦାଙ୍ଗ୍ ଖ୍ରୀଷ୍ଟ ମାଦିଆଜି ର ପୁନି ନିୟମ୍ କିତାନ୍ନା। ଇଦାଙ୍ଗ୍ ପୁରା ଆଦେଙ୍ଗ୍ ଆଡ୍ନାତ୍, ଇନେସ୍କି ହେୱାର୍ ପାର୍ତୁମ୍ ନିୟମ୍ନି ତାରେନ୍ ମାନ୍ଞ୍ଜି କିଜିମାଚି ପାପ୍ନି ଦଣ୍ଡ୍ତାଙ୍ଗ୍, ଖ୍ରୀଷ୍ଟ ହେୱାରିଙ୍ଗ୍ ମୁକ୍ତିକିନି କାଜିଙ୍ଗ୍ ହାଃତାନ୍ନା। 16 ଇନେସ୍କି ଆସେଙ୍ଗ୍ ପୁନାସ୍ ଯେ ରକାନ୍ ମାନାୟ୍ ହାଃତି ପାଚେ ତା ଦନ୍ସମ୍ଫତି ବାଗ୍ କିନି କାଜିଙ୍ଗ୍ ଲେକିକିତି ଏଗ୍ରିମେଣ୍ଟ୍ ହେଏଚେପାଦ୍ନା ପୁରାଆନାତ୍, ଏଚେପାଦ୍ନା ହେ ଏଗ୍ରିମେଣ୍ଟ୍ ଲେକିକିତି ମାନାୟ୍ ହାଃତାନ୍ନା ଇଞ୍ଜି ପୁନିୟା ଆନାତ୍। 17 ଇନେସ୍କି ଏଚେପାଦ୍ନା ହେୱାନ୍ ସମ୍ଫତିନି ମାଲିକ୍ ଜିଜି ମାନାନ୍, ହେ ଏଗ୍ରିମେଣ୍ଟ୍ନି ଇନା ମୁଲ୍ଯ ହିଲ୍ଗୁତ୍। ଏଚେପାଦ୍ନା ହେ ଏଗ୍ରିମେଣ୍ଟ୍ନି ମାଲିକ୍ ହାଃନାନ୍, ହେ ଏଗ୍ରିମେଣ୍ଟ୍ନି ମୁଲ୍ଯ ଆନାତ୍। 18 ଇଦାଙ୍ଗ୍ କାଜିଙ୍ଗ୍ ଈଶ୍ୱର ପାର୍ତୁମ୍ ପାର୍ମାଣ୍ ହିନିହିଙ୍ଗ୍ ପା, ହେ ପାର୍ମାଣ୍ତିଙ୍ଗ୍ ଟିକ୍କିନି କାଜିଙ୍ଗ୍ ରଞ୍ଜାଙ୍ଗ୍ ନେତେର୍ନି ବିଲିପୁଜା କିଜି ମାଚାନ୍। 19 ପାର୍ତୁମ୍ ମୋଶା ମାନାୟାର୍ ଲାଗାୟ୍ ନିୟମ୍ନି ୱିଜୁ ଆଦେସ୍ ୱେଚ୍ଚାନ୍। ପାଚେ ହେୱାନ୍ ମେଣ୍ଢା ଆରେ ଅଡା ନେତେର୍ ଅଜି ଜମିତାକେ ମାହାଇ କିତାନ୍ ଆରେ ରାତା କଲର୍ ଉଲ୍ ଆରେ ଏଜବ୍ ମାର୍ତି ଡାଡ଼୍ ଅଜି ନିୟମ୍ ସାସ୍ତର୍ ଆରେ ୱିଜୁ ମାନାୟାର୍ ଜପି ତିର୍ପାତାନ୍। 20 ଇଦାଙ୍ଗ୍ କିନିହିଙ୍ଗ୍ ମୋଶା ମାନାୟାରିଙ୍ଗ୍ ୱେଚ୍ଚାନ୍, “ଈଶ୍ୱର ମିଙ୍ଗେଙ୍ଗ୍ ଇମ୍ଣି ପାର୍ମାଣ୍ ମାନି କିଦେଙ୍ଗ୍ ହିତ୍ତାନ୍ନା, ହେ ପାର୍ମାଣ୍ତିଙ୍ଗ୍ ଇ ନେତେର୍ ଟିକ୍ କିନାତ୍।” 21 ଆରେ ହେୱାନ୍ ପବିତ୍ର ପୁଟ୍ କୁଡ଼ିଆ ଆରେ ହେବା କିନିହିଙ୍ଗ୍ ୱିଜୁ ଜିନିଷ୍ ଜପି ହେଲେକେ ନେତେର୍ ତିର୍ପାତାର୍। 22 ଆରେ ମୋଶା ଲେକିକିତି ନିୟମ୍ ସାସ୍ତର୍ ଅନ୍ସାରେ ୱିଜୁ ବିଷୟ ନେତେର୍ତାଙ୍ଗ୍ ଶୁଚି ଆନାତ୍। ଆରେ ନେତେର୍ ବଡ଼ା ଆୱିତିସ୍, ଈଶ୍ୱର ମାନାୟାରିଙ୍ଗ୍ ପାପ୍ କେମା କିଉନ୍। ଖ୍ରୀଷ୍ଟ ବଲିପୁଜା ଆନି କାଜିଙ୍ଗ୍ ପାପ୍ କେମା ଗାଟାଆଦ୍ନାତ୍ 23 ଲାଗିଙ୍ଗ୍ ପଶୁନି ନେତେର୍ତାଙ୍ଗ୍ ଇ ପୁର୍ତିନି କୁଡ଼ିଆ ଆରେ ହେବେ ମାନି ୱିଜୁ ବିଷୟ ଶୁଚି ଆନି ଦର୍କାର୍ ମାଚାତ୍। ଆରେ ଇ ୱିଜୁ ବିଷୟ ସରଗ୍ତାକେ ମାନି ବିଷୟନି ନକ୍ଲି। ମାତର୍ ସରଗ୍ତାକେ ମାନି ବିଷୟ ଇ ପଶୁନି ନେତେର୍ତାଙ୍ଗ୍ ବେସି ଗାଜା ବଲିପୁଜାତାଙ୍ଗ୍ ଶୁଚି ଆନି ଦର୍କାର୍ ମାଚାତ୍। 24 ଇଦାଙ୍ଗ୍ କାଜିଙ୍ଗ୍ ମାନାୟାର୍ ରସ୍ତି ର ପୁଟ୍ କୁଡ଼ିଆନି ପବିତ୍ର ବାହାତାକେ ଖ୍ରୀଷ୍ଟ ହାଲ୍ୱାତାନ୍, ଇନେସ୍କି ଇଦାଙ୍ଗ୍ ସତ୍ ବିଷୟନି ରଞ୍ଜାଙ୍ଗ୍ ନକ୍ଲି କପି ମାଚାତ୍। ମାତର୍ ମା ନିପଣ୍ ଆଜି ଈଶ୍ୱର ମୁମ୍ଦ ନିଲ୍ନି କାଜିଙ୍ଗ୍ ଖ୍ରୀଷ୍ଟ ସରଗ୍ଜପି ହାଚାନ୍। 25-26 ଆରେ ବାରମ୍-ବାରମ୍ ଜାର୍ତିଙ୍ଗ୍ ବଲିପୁଜା କିନି କାଜିଙ୍ଗ୍ ଖ୍ରୀଷ୍ଟ ସରଗ୍ଜପି ହାଲ୍ୱାତାନ୍ନା, ଇନେସ୍କି ପୁର୍ତିନି ଆରମ୍ତାଙ୍ଗ୍ ବେସିହଟ୍ ହାଃଦେଙ୍ଗ୍ ଆତାତ୍ମା। ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ୱିଜୁ ବାହ୍ରୁ ରଞ୍ଜାଙ୍ଗ୍ ପଶୁନି ନେତେର୍ ଆସ୍ତି ବେସି ପବିତ୍ର ବାହାତାକେ ହାନାନ୍। ମାତର୍ ଇ ସେସ୍ ସମୟ୍ତ ଖ୍ରୀଷ୍ଟ ଜାର୍ତିଙ୍ଗ୍ ବଲିପୁଜା କିୟା ଆଦେଙ୍ଗ୍ ରଗ ୱାତାନ୍ନା ଆରେ ପାପ୍ତିଙ୍ଗ୍ ସେସ୍ କିତାନ୍ନା। 27 ୱିଜାକାର୍ ମାନାୟ୍ ରଗ ନେ ହାଃନାର୍। ହାଃତି ପାଚେ, ଈଶ୍ୱର ୱିଜୁ ମାନାୟାରିଙ୍ଗ୍ ବିଚାର୍ କିନାନ୍। 28 ହେଲେକେ ଖ୍ରୀଷ୍ଟ ପା ମାନାୟାର୍ ପାପ୍ତିଙ୍ଗ୍ ଦେହାକିନି କାଜିଙ୍ଗ୍ ରଗ ଜାର୍ତିଙ୍ଗ୍ ବଲିପୁଜା କିତାନ୍ନା। ଲାଗିଙ୍ଗ୍ ଏଚେପାଦ୍ନା ହେୱାନ୍ ଆରେରଗ ୱାନାନ୍, ମାନାୟାର୍ ପାପ୍ କାଜିଙ୍ଗ୍ ଜାର୍ତିଙ୍ଗ୍ ବଲିପୁଜା କିନି କାଜିଙ୍ଗ୍ ୱାଉନ୍, ମାତର୍ ଇମ୍ଣି ମାନାୟାର୍ ହେୱାନିଙ୍ଗ୍ କାତାର୍ନା, ହେୱାରିଙ୍ଗ୍ ଉଦାର୍ କିନି କାଜିଙ୍ଗ୍ ୱାନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation