ଏବ୍ରି 8 - New Testament in Pengo Parja Languageଯୀଶୁ ଖ୍ରୀଷ୍ଟ ମା ପ୍ରଦାନ୍ ମୁଡ଼୍ଦି ପୁଜାରି 1 ଆସେଙ୍ଗ୍ ଇନାକା ୱେଚ୍ନାସା, ହେବେନି ମୁଡ଼୍ ବିଷୟ ଇଦାଙ୍ଗ୍, ମା କାଜିଙ୍ଗ୍ ଇଲେକେ ରକାନ୍ ପ୍ରଦାନ୍ ମୁଡ଼୍ଦି ପୁଜାରି ମାନାନ୍, ଇନେର୍ ସରଗ୍ତାକେ ଈଶ୍ୱର ତିନାବାଗାୟ୍ନି ବେସି ସନ୍ମାନ୍ନି ସିଂହାସନ୍ତାକେ କୁଚ୍ଚାନ୍ନା। 2 ସରଗ୍ତାକେ ମାନି ସତ୍ ପୁଟ୍ କୁଡ଼ିଆନି ସତ୍ ପବିତ୍ର ବାହାତାକେ ମା ପ୍ରଦାନ୍ ମୁଡ଼୍ଦି ପୁଜାରି ହେବା କିନାନା। ମାନାୟ୍ ଇଦାଙ୍ଗ୍ ରହ୍ୱାତାର୍ନା, ମାତର୍ ଈଶ୍ୱର ରସ୍ତାନ୍ନା। 3 ପାପ୍ତାଙ୍ଗ୍ କେମା ପାୟାଆନି କାଜିଙ୍ଗ୍ ଦାନ୍ ଆରେ ବଲିପୁଜା ୱିଜୁ ପ୍ରଦାନ୍ ମୁଡ଼୍ଦି ପୁଜାରିର୍ କିନାର୍। ଲାଗିଙ୍ଗ୍ ମା ପ୍ରଦାନ୍ ମୁଡ଼୍ଦି ପୁଜାରି ଯୀଶୁ ଖ୍ରୀଷ୍ଟ ଲାଗାୟ୍ ପା ବଲିପୁଜା କିନି କାଜିଙ୍ଗ୍ ଇନାକା ମାନି ଦର୍କାର୍ ମାଚାତ୍। 4 ଯୀଶୁ ଖ୍ରୀଷ୍ଟ ଯଦି ପୁର୍ତିତାକେ ମାଚିସ୍, ଲାଗିଙ୍ଗ୍ ହେୱାନ୍ ପୁଜାରି ପା ଆଦେଙ୍ଗ୍ ଆଡ୍ୱାତାନ୍ମା। ଇନେସ୍କି ମୋଶା ଲେକିକିତି ନିୟମ୍ ସାସ୍ତର୍ ଅନ୍ସାରେ ଈଶ୍ୱର ଲାଗାୟ୍ ଦାନ୍ ହିଦେଙ୍ଗ୍ ପୁଜାରିର୍ ମାନାର୍। 5 ଇ ପୁଜାରିର୍ ଇମ୍ଣି ମୁକ୍ଯ ପବିତ୍ର ମନ୍ଦିର୍ତାକେ ହେବା କିନାର୍, ହେଦାଙ୍ଗ୍ ସରଗ୍ତାକେ ମାନି ବିଷୟତିଙ୍ଗ୍ ର ନକ୍ଲି ଆରେ ଡ଼ିଗା ଲେକେ ଚନ୍ଞ୍ଚି ବିଷୟ। ହେଦାଙ୍ଗ୍ କାଜିଙ୍ଗ୍ ମୋଶା ଏଚେପାଦ୍ନା ପୁଟ୍ କୁଡ଼ିଆ ରସ୍ତେଙ୍ଗ୍ ରେଡି ଆଜି ମାଚାନ୍, ଈଶ୍ୱର ଜାଗ୍ରତ୍ କିୟିକିଜି ୱେଚ୍ଚାନ୍, “ସାବ୍ଦାନ୍, ଆନେଙ୍ଗ୍ ଇ ମାଡ଼ିତାକେ ନିଙ୍ଗେଙ୍ଗ୍ ଇମ୍ଣି ଡିଜେନ୍ ଚଚ୍ଚାତାଙ୍ଗ୍ନା, ହେଲେକେ ୱିଜୁ ରହା।” 6 ମାତର୍ ଜେକନି ପୁଜାରିର୍ ହେବାକିନି ପାଦ୍ତାଙ୍ଗ୍ ମା ପ୍ରଦାନ୍ ମୁଡ଼୍ଦି ପୁଜାରି ଖ୍ରୀଷ୍ଟ ହେବାକିନି ପାଦ୍ ବେସି ଗାଜା। ହାର୍ଦି ବିଷୟନି ପାର୍ମାଣ୍ ଅନ୍ସାରେ, ହେୱାନ୍ ନେ ଈଶ୍ୱର ହୁଦାଙ୍ଗ୍ ପୁନି ନିୟମ୍ନି ମାଦିନିକାନ୍। 7 ଇନେସ୍କି ପାର୍ତୁମ୍ ନିୟମ୍ତାକେ ଯଦି ଇନା ଦସ୍ ହିଲିତିସ୍, ଲାଗିଙ୍ଗ୍ ଦୁଇ ନମ୍ବର୍ ପାର୍ମାଣ୍ନି ବେଣ୍ ନିଙ୍ଗ୍ୱାତାତ୍ମା। 8 ଇନେସ୍କି ଈଶ୍ୱର ମାନାୟାର୍ ବିତ୍ରେ ଦସ୍ ଆସ୍ତି ହେୱାରିଙ୍ଗ୍ ୱେଚ୍ଚାନ୍, “ମାପୃ ୱେଚ୍ନାନା, ହୁଡ଼ାଟ୍, ସମୟ୍ ୱାନାତା। ଆନେଙ୍ଗ୍ ଇସ୍ରାଏଲ ଲାତ୍ରା ନିକାଙ୍ଗ୍ ଆରେ ଯିହୁଦା ଲାତ୍ରା ହୁଦାଙ୍ଗ୍ ରଞ୍ଜାଙ୍ଗ୍ ପୁନି ପାର୍ମାଣ୍ ରହ୍ନାଙ୍ଗ୍। 9 ଆନେଙ୍ଗ୍ ହେୱାର୍ ଆକାଦାଦିରିଙ୍ଗ୍ କେଇ ଆସ୍ତି ମିସର ଦେସ୍ତାଙ୍ଗ୍ ହପ୍ଚି ତାସିୱାତିହିଙ୍ଗ୍, ଇମ୍ଣି ପାର୍ମାଣ୍ ୱେଚ୍ଚି ମାନ୍ଞ୍ଚାଙ୍ଗ୍, ହେଲେକେ ଇ ପୁନି ପାର୍ମାଣ୍ ଆଉତ୍। ଇନେସ୍କି ହେୱାର୍ ଆନେଙ୍ଗ୍ ହିଜିମାଚି ନିୟମ୍ତିଙ୍ଗ୍ ମାନି କିୱାତାର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାର୍ କାଜିଙ୍ଗ୍ ଦିୟାନ୍ ହିୱାତାଙ୍ଗ୍, ଇଦାଙ୍ଗ୍ ମାପୃ ୱେଚ୍ନାନା। 10 ଆରେ ମାପୃ ୱେଚ୍ଚାନ୍, ସମୟ୍ ୱାନାତ୍ ଆନେଙ୍ଗ୍ ଇସ୍ରାଏଲନି ଲାତ୍ରା ହୁଦାଙ୍ଗ୍ ପୁନି ପାର୍ମାଣ୍ ରହ୍ନାଙ୍ଗ୍। ହେଦାଙ୍ଗ୍ ଇଦାଙ୍ଗ୍, ଆନେଙ୍ଗ୍ ହେୱାର୍ ମାନ୍ତ ନା ନିୟମ୍ ହିନାଙ୍ଗ୍, ଲାଗିଙ୍ଗ୍ ହେୱାର୍ ହେଦାଙ୍ଗ୍ ବୁଜା ଆନାର୍। ଆନେଙ୍ଗ୍ ହେୱାର୍ ଗରବ୍ତାକେ ନା ନିୟମ୍ ଲେକିକିନାଙ୍ଗ୍, ଲାଗିଙ୍ଗ୍ ହେୱାର୍ ହେଦାଙ୍ଗ୍ ମାନିକିନାର୍। ଆନେଙ୍ଗ୍ ହେୱାର୍ ଈଶ୍ୱର ଆନାଙ୍ଗ୍, ଆରେ ହେୱାର୍ ନାଲକ୍ ଆନାର୍। 11 ଆରେ, ‘ମାପୃଙ୍ଗ୍ ପୁନାଟ୍ ଇଞ୍ଜି ୱେଚ୍ଚି,’ ହେୱାର୍ ତା ସହର୍ତାକେ ମାନି ମାନାୟାରିଙ୍ଗ୍, କି ହେୱାର୍ ତା ହାଙ୍ଗ୍ଦାକାରିଙ୍ଗ୍ ହିକ୍ଷା ହିଉର୍। ଇନେସ୍କି ହିରୁତାଙ୍ଗ୍ ଗାଜା ପାତେକ୍ ହେୱାର୍ ୱିଜାକାର୍ ନାଙ୍ଗେଙ୍ଗ୍ ଈଶ୍ୱର ଇଞ୍ଜି ପୁଞ୍ଜ୍ନାର୍। 12 ଇନେସ୍କି ଆନେଙ୍ଗ୍ ହେୱାର୍ କରାପ୍ କାମାୟ୍ତିଙ୍ଗ୍ କେମା କିନାଙ୍ଗ୍, ଆରେ ଆନେଙ୍ଗ୍ ହେୱାର୍ ପାପ୍ ୱିଜୁ ଆରେ ମାନ୍ତ ଏତୁ କିଉଙ୍ଗ୍।” 13 ଈଶ୍ୱର ଇଦାଙ୍ଗ୍ତିଙ୍ଗ୍ “ପୁନି ପାର୍ମାଣ୍” ଇଞ୍ଜି ୱେଚ୍ନାନ୍, ଲାଗିଙ୍ଗ୍ ପାର୍ତୁମ୍ ନିୟମ୍ତିଙ୍ଗ୍ ହେୱାନ୍ ପାନାକା କିତାନ୍ନା। ଆରେ ଇନାକା ପାନାକା, ହେଦାଙ୍ଗ୍ ନଷ୍ଟ ଆଜି ଡ଼ୁଗ୍ନାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation