ଏବ୍ରି 7 - New Testament in Pengo Parja Languageମଲ୍କିଷେଦକ ଅବ୍ରାହାମତାଙ୍ଗ୍ ଗାଜା 1-3 ଇ ମଲ୍କିଷେଦକ ଶାଲେମ ସହର୍ନି ରାଜା ମାଚାନ୍, ଆରେ ହେୱାନ୍ ଗାଜା ଈଶ୍ୱରନି ପୁଜାରି ମାଚାନ୍। ତା ତର୍ନି ଅର୍ତ “ନ୍ୟାୟ୍ତାଙ୍ଗ୍ ବିଚାର୍କିନି ରାଜା” ଆରେ ଶାଲେମ ରାଜାନି ଅର୍ତ “ଶାନ୍ତିନି ରାଜା।” ତା ଆୟା ଆବାର୍ ବିଷୟରେ କି, ତା ଲାତ୍ରା ବିଷୟରେ କି, ତା ଜନମ୍ କି ମାରାଣ୍ ବିଷୟରେ ଇନାକା ପା ଦରମ୍ ସାସ୍ତର୍ତାକେ ଲେକାଆୱାତାତ୍ନା। ହେୱାନ୍ ୱିଜୁଦିନ୍ କାଜିଙ୍ଗ୍ ପୁଜାରି। ହେଦାଙ୍ଗ୍ କାଜିଙ୍ଗ୍ ହେୱାନ୍ ରକାନ୍ ଈଶ୍ୱର ମେହି ଲେକେ। ଅବ୍ରାହାମ ଏଚେପାଦ୍ନା ଚାରି ଜାଣ୍ ରାଜାରିଙ୍ଗ୍ ମାର୍ନେ ଅସ୍ତି ୱାଜିମାଚାନ୍, ହେପାଦ୍ନା ମଲ୍କିଷେଦକ ହେୱାନିଙ୍ଗ୍ ଗିଟାଆଜି ଆଶ୍ରିବାଦ୍ କିଜି ମାଚାନ୍। ଅବ୍ରାହାମ ଯୁଜ୍ତାକେ ଜିତାଆଜି ଇନାକା ପାୟାଆଜି ମାଚାନ୍ ହେବେତାଙ୍ଗ୍ ୱିଜୁ ଜିନିଷ୍ତିଙ୍ଗ୍ ମଲ୍କିଷେଦକଙ୍ଗ୍ ଦଶମାଂଶ ହିଜିମାଚାନ୍। 4 ଇ ମଲ୍କିଷେଦକ କେତେକ୍ ଗାଜା ମାନାୟ୍ ମାଚାନ୍, ଇଦାଙ୍ଗ୍ ବାବିକିଜି ହୁଡ଼ାଟ୍! ଅବ୍ରାହାମ ଇସ୍ରାଏଲନି ଆକଦାଦି ଆତିସ୍ପା, ହେୱାନ୍ ମଲ୍କିଷେଦକଙ୍ଗ୍ ଗାଜାକାନ୍ ଇଞ୍ଜି ବାବିକିଜି ଯୁଜ୍ତାଙ୍ଗ୍ ତାସିୱାତି ୱିଜୁ ଜିନିଷ୍ତାଙ୍ଗ୍ ଦଶମାଂଶ ହିଜିମାଚାନ୍। 5 ମୋଶା ଲେକିକିତି ନିୟମ୍ ସାସ୍ତର୍ ହିକ୍ଷା ହିଦ୍ନାତା ଯେ ଲେବିନି ଲାତ୍ରାର୍ତାଙ୍ଗ୍ ଇମ୍ଣାକାର୍ ପୁଜାରି ପାଦ୍ ପାୟାଆନାର୍, ହେୱାର୍ ଇସ୍ରାଏଲନି ମାନାୟାର୍ତାଙ୍ଗ୍ ଦଶମାଂଶ ଆହ୍ନି ଦର୍କାର୍। ପୁଜାରିର୍ ଇସ୍ରାଏଲନି ମାନାୟାର୍ ଟଣ୍ଡାହିର୍ ମାଚାର୍, ଇନେସ୍କି ହେୱାର୍ ୱିଜାକାର୍ ଅବ୍ରାହାମ ଲାତ୍ରାନି ମାନାୟ୍ ମାଚାର୍। 6 ଇ ମଲ୍କିଷେଦକ ଲେବି ଲାତ୍ରାନି ମାନାୟ୍ ହିଲାତାନ୍, ମାତର୍ ହେୱାନ୍ ଅବ୍ରାହାମତାଙ୍ଗ୍ ଦଶମାଂଶ ଆସ୍ତି ମାଚାନ୍। ଅବ୍ରାହାମ ଈଶ୍ୱରତି ପାର୍ମାଣ୍ ପାୟାଆଜି ମାଚିସ୍ ପା, ମଲ୍କିଷେଦକ ହେୱାନିଙ୍ଗ୍ ଆଶ୍ରିବାଦ୍ କିତାନ୍। 7 ଇଦାଙ୍ଗ୍ ଆସେଙ୍ଗ୍ ଟିକ୍ ବାବ୍ରେ ପୁନାସ୍ ଯେ ଇମ୍ଣି ମାନାୟ୍ ଆଶ୍ରିବାଦ୍ ପାୟା ଆନାନ୍ ହେୱାନ୍ତାଙ୍ଗ୍ ଆଶ୍ରିବାଦ୍ କିନି ମାନାୟ୍ ଗାଜା। 8 ପୁଜାରିର୍ ମାନାୟ୍ ଆତିସ୍ପା ଦଶମାଂଶ ଆହ୍ନାର୍, ମାତର୍ ହେୱାର୍ କେତେକ୍ ଦିନ୍ ଜିନାର୍ ଆରେ ପାଚେ ହାଃନାର୍। ମାତର୍ ଦରମ୍ ସାସ୍ତର୍ ୱେଚ୍ଚାନାତା ଯେ ମଲ୍କିଷେଦକ ଅବ୍ରାହାମତାଙ୍ଗ୍ ଦଶମାଂଶ ଆସ୍ତାନ୍, ଆରେ ହେୱାନ୍ ନଙ୍ଗୟ୍ ପାତେକ୍ ଜିବୁନ୍ ମାନାନ୍। 9-10 ଇମ୍ଣି ଲେବି ଲାତ୍ରାନି ମାନାୟାର୍ ଜେକନି ମାନାୟାର୍ତାଙ୍ଗ୍ ଦଶମାଂଶ ଆହ୍ନାର୍, ହେୱାର୍ ଅବ୍ରାହାମନି ର ଲାତ୍ରା ମାଚାର୍। ଲାଗିଙ୍ଗ୍ ଅବ୍ରାହାମ ଏଚେପାଦ୍ନା ମଲ୍କିଷେଦକଙ୍ଗ୍ ଗିଟାଆଜି ଦଶମାଂଶ ହିଜିମାଚାନ୍, ଲାଗିଙ୍ଗ୍ ଲେବି ପା ଅବ୍ରାହାମତାଙ୍ଗ୍ ମଲ୍କିଷେଦକଙ୍ଗ୍ ଦଶମାଂଶ ହିଜିମାଚାନ୍ ଇଞ୍ଜି ଆସେଙ୍ଗ୍ ୱେଚ୍ଚେଙ୍ଗ୍ ଆଡ୍ନାସ୍। ଯୀଶୁ ମଲ୍କିଷେଦକ ଲେକେ 11 ଲେବି ଗଷ୍ଟିନି ହାରଣ ଲାତ୍ରାତାକେ ଇମ୍ଣାକାର୍ ପୁଜାରି ଆଜି ମାଚାର୍, ହେୱାର୍ ତାରେନ୍ ମାନାୟାର୍ ମୋଶା ଲେକିକିତି ନିୟମ୍ ସାସ୍ତର୍ ପାୟାଆଜି ମାଚାର୍। ହେୱାର୍ ତାରେନ୍ ପୁରାପୁରି ଟିକ୍ ଆଦେଙ୍ଗ୍ ଆଡ୍ୱାତାର୍। ହେଦାଙ୍ଗ୍ କାଜିଙ୍ଗ୍ ହାରଣ ପୁଜାରିର୍ ଲେକେ ଆରେ ପୁଜାରିର୍ ଦର୍କାର୍ ହିଲାତାତ୍, ମାତର୍ ମଲ୍କିଷେଦକ ଲେକେ ରକାନ୍ ପୁଜାରିଙ୍ଗ୍ ଦର୍କାର୍ ମାଚାତ୍। 12 ଆରେ ଏଚେପାଦ୍ନା ପୁଜାରି ଆନାକା ଚେଞ୍ଚ୍ ଆତାତ୍, ଲାଗିଙ୍ଗ୍ ମୋଶା ନିୟମ୍ ସାସ୍ତର୍ତାକେ ପା ଚେଞ୍ଚ୍ ଆନାତ୍। 13 ଆସେଙ୍ଗ୍ ଖ୍ରୀଷ୍ଟ ବିଷୟରେ ଇ ୱିଜୁ ୱେଚ୍ନାସା, ହେୱାନ୍ ରକାନ୍ ଅଲ୍ଗା ଲାତ୍ରାନି ମାନାୟ୍। ତା ଲାତ୍ରାତାଙ୍ଗ୍ ଇନେର୍ ପା ପୁଜାରି ଆଜି ବେଦିତାକେ ହେବା କିଉରେ। 14 ଆସେଙ୍ଗ୍ ୱିଜାକାସ୍ ଇଦାଙ୍ଗ୍ ପୁଚାସ୍ନା ଯେ, ମା ମାପୃ ଯୀଶୁ ଖ୍ରୀଷ୍ଟ ଯିହୁଦା ଲାତ୍ରାନି ମାନାୟ୍। ଇ ଲାତ୍ରାତାଙ୍ଗ୍ ଇନେର୍ ପା ପୁଜାରି ଆନାର୍ ଇଞ୍ଜି ମୋଶା ୱେଚ୍ୱାତାନ୍ନା। 15 ନଙ୍ଗୟ୍ ଆସେଙ୍ଗ୍ ପୁରା କିଲେର୍ ବାବ୍ରେ ବୁଜା ଆନାସା ଯେ, ଅଲ୍ଗା ରକାନ୍ ପୁଜାରି ଆତି କାଜିଙ୍ଗ୍ ନିୟମ୍ ବାଦ୍ଲା ଆନାତା, ଆରେ ହେ ପୁଜାରି ମଲ୍କିଷେଦକ ଲେକେ। 16 ଲେବି ଲାତ୍ରାନି ନିତି ନିୟମ୍ ଅନ୍ସାରେ ଯୀଶୁ ପୁଜାରି ଆୱାତାନ୍ନା, ମାତର୍ ହେୱାନ୍ ତା ୱିଜ୍ୱି ଜିବୁନ୍ନି ଶାକ୍ତି କାଜିଙ୍ଗ୍ ପୁଜାରି ଆତାନ୍ନା। 17 ଇନେସ୍କି ତା ବିଷୟରେ ଈଶ୍ୱର ସାସ୍ତର୍ତାକେ ୱେଚ୍ଚାନାନା, “ଏପେଙ୍ଗ୍ ମଲ୍କିଷେଦକ ଲେକେ ୱିଜୁଦିନ୍ କାଜିଙ୍ଗ୍ ପୁଜାରି।” 18 ପୁଜାରି ଆନି କାଜିଙ୍ଗ୍ ମୋଶା ଲେକିକିତି ନିୟମ୍ ଇନାକା କିନି ଦର୍କାର୍ ହେଦାଙ୍ଗ୍ କିଦେଙ୍ଗ୍ ଆଡ଼୍ତି କାଜିଙ୍ଗ୍ ଆରେ ଇନା ମୁଲ୍ୟ ହିଲ୍ୱି କାଜିଙ୍ଗ୍, ଇଦାଙ୍ଗ୍ତିଙ୍ଗ୍ ବାଦ୍ଲାୟ୍ କିତାର୍ନା। 19 ଇନେସ୍କି ମୋଶା ଲେକିକିତି ନିୟମ୍ ସାସ୍ତର୍ ଇମ୍ଣି ବିଷୟ ପା ପୁରାପୁରି ଟିକ୍କିଜି ଆଡ୍ୱାଦାଙ୍ଗ୍ ମାଚାତ୍। ମାତର୍ ନଙ୍ଗୟ୍ ଆପେଙ୍ଗ୍ ଯୀଶୁ ଖ୍ରୀଷ୍ଟତାକେ ହାର୍ ଆହା ଇଡ଼୍ତାପ୍ନା, ଆରେ ହେୱାନ୍ କାଜିଙ୍ଗ୍ ଆପେଙ୍ଗ୍ ଈଶ୍ୱର ଲାଗାୟ୍ ଆଦେଙ୍ଗ୍ ଆଡ୍ନାପା। ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମା କାଜିଙ୍ଗ୍ ଈଶ୍ୱର ଲାଗାୟ୍ ଗୁୱାରି କିନାନା 20 ଆରେ ଈଶ୍ୱର ପାର୍ମାଣ୍ କିଜି ଯୀଶୁଙ୍ଗ୍ ପୁଜାରି କିତାନ୍। ମାତର୍ ହାରଣ ଲାତ୍ରାନି ପୁଜାରିର୍ ଶପତ୍ କିୱାଦାଙ୍ଗ୍ ପୁଜାରି ଆତାର୍। 21 ଯୀଶୁ ବିଷୟରେ ଶପତ୍ କିଜି, ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଈଶ୍ୱର ଇ ଶପତ୍ କିତାଙ୍ଗ୍ନା, ଆରେ ଆନେଙ୍ଗ୍ ନା ମାନେ ପାଚିକିତି କାତାତିଙ୍ଗ୍ ବାଦ୍ଲାୟ୍ କିଉଙ୍ଗ୍। ‘ଏପେଙ୍ଗ୍ ୱିଜୁଦିନ୍ କାଜିଙ୍ଗ୍ ପୁଜାରି।’” 22 ଈଶ୍ୱରକିତି ଇ ଶପତ୍ କାଜିଙ୍ଗ୍, ଇ ବେସି ହାର୍ଦି ନିୟମ୍ ଲାବ୍ନି ବିଷୟ ଇଞ୍ଜି ଯୀଶୁ ନେ ଗେରେଣ୍ଟି ହିଦ୍ନାନ୍। 23 ଆରେ ରଞ୍ଜାଙ୍ଗ୍ ଅଲ୍ଗା ବିଷୟ ଆତାତ୍ ଯେ ପାନି ନିୟମ୍ ଅନ୍ସାରେ କେତେକ୍ ପୁଜାରିର୍ ମାଚାର୍, ମାତର୍ ହେୱାର୍ ୱିଜାକାର୍ ହାଃତାର୍ ଆରେ ହେୱାର୍ ପୁଜାରି କାମାୟ୍ ୱିଜୁଦିନ୍ କାଜିଙ୍ଗ୍ କିଦେଙ୍ଗ୍ ଆଡ୍ୱାତାର୍। 24 ମାତର୍ ଯୀଶୁ ପୁଜାରି ଆଜି ୱିଜୁଦିନ୍ ମାନି କାଜିଙ୍ଗ୍, ହେୱାନ୍ ବାହାତାକେ ଆରେ ଇନେର୍ ପା ପୁଜାରି ଆଦେଙ୍ଗ୍ ଆଡୁର୍। 25 ଲାଗିଙ୍ଗ୍ ଯୀଶୁତାଙ୍ଗ୍ ଇମ୍ଣାକାର୍ ଈଶ୍ୱର ଲାଗାୟ୍ ୱାନାର୍, ହେୱାନ୍ ହେୱାରିଙ୍ଗ୍ ୱିଜୁଦିନ୍ କାଜିଙ୍ଗ୍ ଉଦାର୍ କିଦେଙ୍ଗ୍ ଆଡ୍ନାନ୍। ଇନେସ୍କି ଈଶ୍ୱର ଲାଗାୟ୍ ହେୱାର୍ ନିପଣ୍ ଆଜି ଗୁୱାରି କିନି କାଜିଙ୍ଗ୍ ହେୱାନ୍ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନାନ୍। 26 ଇନେସ୍କି ଯୀଶୁ ଲେକେ ପ୍ରଦାନ୍ ମୁଡ଼୍ଦି ପୁଜାରି ମା କାଜିଙ୍ଗ୍ ଦର୍କାର୍। ହେୱାନ୍ ରକାନ୍ ପବିତ୍ର ମାନାୟ୍, ଇନା ଦସ୍ ହିଲ୍ୱି ମାନାୟ୍, ପୁରାପୁରି ଟିକ୍ ମାନାୟ୍, ପାପି ମାନାୟାର୍ ପାପ୍ କାମାୟ୍ତାଙ୍ଗ୍ ଦେହା ମାନି ମାନାୟ୍ ଆରେ ହେୱାନ୍ ସରଗ୍ତାକେ ୱିଜୁତାଙ୍ଗ୍ ଗାଜା ସନ୍ମାନ୍ ପାୟାଆନି ବାହାତାକେ ମାନି ମାନାୟ୍। 27 ହାରଣ ଲାତ୍ରାନି ପ୍ରଦାନ୍ ମୁଡ଼୍ଦି ପୁଜାରିର୍ ଲେକେ, ଯୀଶୁଙ୍ଗ୍ ୱିଜୁଦିନ୍ ବଲିପୁଜା କିନି ଦର୍କାର୍ ଆକାୟ୍। ହେୱାର୍ ପାର୍ତୁମ୍ ଜାର୍ ପାପ୍ କାଜିଙ୍ଗ୍ ଆରେ ପାଚେ ମାନାୟାର୍ ପାପ୍ କାଜିଙ୍ଗ୍ ବଲିପୁଜା କିଜି ମାଚାର୍। ମାତର୍ ଯୀଶୁ ରଞ୍ଜେମାଡ୍ ୱିଜାକାର୍ ପାପ୍ କାଜିଙ୍ଗ୍ ଜାର୍ ଜିବୁନ୍ତିଙ୍ଗ୍ କୃଶକାଟ୍ ଜପି ବଲିପୁଜା କିତାନ୍ନା। 28 ମୋଶା ଲେକିକିତି ନିୟମ୍ ସାସ୍ତର୍ ଅନ୍ସାରେ ଇମ୍ଣାକାର୍ ପ୍ରଦାନ୍ ମୁଡ଼୍ଦି ପୁଜାରି ମାଚାର୍, ହେୱାର୍ ମାନାୟ୍ ଆତି କାଜିଙ୍ଗ୍ ଇନାକା କିନି ଦର୍କାର୍ ହେଦାଙ୍ଗ୍ କିଦେଙ୍ଗ୍ ଆଡ୍ୱାତାର୍। ମାତର୍ ମୋଶା ଲେକିକିତି ସାସ୍ତର୍ ପାଚେ, ଈଶ୍ୱର ତା ମେହିଙ୍ଗ୍ ଶପତ୍ କିଜି ପ୍ରଦାନ୍ ମୁଡ଼୍ଦି ପୁଜାରି କିଜି ବାଚିକିତାନ୍। ଆରେ ତା ମେହି ୱିଜୁଦିନ୍ କାଜିଙ୍ଗ୍ ପୁରାପୁରି ଟିକ୍ ପ୍ରଦାନ୍ ମୁଡ଼୍ଦି ପୁଜାରି ଆତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation