ଏବ୍ରି 6 - New Testament in Pengo Parja Languageପାର୍ତିତାଙ୍ଗ୍ ବାଡାଆନି ଦର୍କାର୍ 1 ଲାଗିଙ୍ଗ୍ ଖ୍ରୀଷ୍ଟ ବିଷୟରେ ଆସେଙ୍ଗ୍ ପାର୍ତୁମ୍ ହିକାଆତି ବିଷୟତିଙ୍ଗ୍ ବାର୍ମ୍-ବାରମ୍ ହିକାଆୱାଦାଙ୍ଗ୍, ପାର୍ତିତାଙ୍ଗ୍ ବାଡାଆନି ହିକ୍ଷାତିଙ୍ଗ୍ ହିକାଆନି ଦର୍କାର୍। ପାପ୍ କାମାୟ୍ ପିସ୍ତି ଈଶ୍ୱର ଲାଗାୟ୍ ୱାନି ହିକ୍ଷା, ଈଶ୍ୱରତାକେ ପାର୍ତିକିନି ହିକ୍ଷା, 2 ବାରବିନିନି ଡୁବନ୍ ବିଷୟନି ହିକ୍ଷା, କାପ୍ଡ଼ା ଜପି କେଇ ଇଟ୍ନି ବିଷୟନି ହିକ୍ଷା। ହାଃତି ମାନାୟାର୍ ଆରେରଗ ଜିବୁନ୍ଆଜି ନିଙ୍ଗ୍ନି ବିଷୟନି ହିକ୍ଷା, ୱିଜ୍ୱି ଦଣ୍ଡ୍ନି ବିଚାର୍ନି ହିକ୍ଷା, ଇୱିଜୁ ମୁଡ଼୍ ହିକ୍ଷା ମାଙ୍ଗେଙ୍ଗ୍ ଆରେ ଦର୍କାର୍ ଆକାୟ୍। 3 ଈଶ୍ୱର ଇଚା କିତିସ୍, ଆନେଙ୍ଗ୍ ମିଙ୍ଗେଙ୍ଗ୍ ପାର୍ତିତାଙ୍ଗ୍ ବାଡାଆନି ହିକ୍ଷା ବିଷୟରେ ହିକ୍ଷା ହିଦ୍ନାଙ୍ଗ୍। 4 ଇମ୍ଣାକାର୍ ହେୱାର୍ ପାର୍ତିତିଙ୍ଗ୍ ପିସ୍ତାର୍ନା, ହେୱାରିଙ୍ଗ୍ ଆରେରଗ ପାପ୍ କାମାୟ୍ତାଙ୍ଗ୍ ଲେଉଟାଇ କିଜି ତାସିୱାନାକା ବେସି କଷ୍ଟ। ଇନେସ୍କି ହେୱାର୍ ରଗ ଈଶ୍ୱର ସତ୍ ବିଷୟତିଙ୍ଗ୍ ଚିନ୍ କିତାର୍ନା ଆରେ ସରଗ୍ତାଙ୍ଗ୍ ଦାନ୍ ପାୟାଆତାର୍ନା, ଆରେ ହେୱାର୍ ଜେକନିକାର୍ ଲେକେ ପବିତ୍ର ଆତ୍ମା ପାୟାଆତାର୍ନା। 5 ଈଶ୍ୱର କାତା ହାର୍ ଇଞ୍ଜି ହେୱାର୍ ପୁଚାର୍ନା ଆରେ ୱାନି ଯୁଗ୍ନି ଶାକ୍ତି ବିଷୟରେ ହେୱାର୍ ପୁଚାର୍ନା। 6 ହେୱାର୍ ଯଦି ଈଶ୍ୱରତାଙ୍ଗ୍ ଅଲ୍ଗା ହାଜ୍ଦିଙ୍ଗ୍ ହାନାର୍, ଲାଗିଙ୍ଗ୍ ହେୱାରିଙ୍ଗ୍ ଆରେରଗ ଲେଉଟାଇ କିଜି ତାସି ୱାଦେଙ୍ଗ୍ ବେସି କଷ୍ଟ ଆନାତ୍। ଇନେସ୍କି ହେୱାର୍ ଈଶ୍ୱର ମେହିତିଙ୍ଗ୍ ଆରେରଗ କୃଶକାଟ୍ତାକେ ଅହ୍ନାରା ଆରେ ହେୱାର୍ ମାନାୟାର୍ ମୁମ୍ଦ ଖ୍ରୀଷ୍ଟଙ୍ଗ୍ ଅପ୍ମାନ୍ କିନାରା। 7 ଇନେସ୍କି ଇମ୍ଣି ମାନାୟ୍ ହାର୍ଦି ହିକ୍ଷା ଆହ୍ନାନ୍, ହେୱାନ୍ ଆଦିକ୍ ବାହ୍ରା ପଡିଆନି ମେଦ୍ନି ଲେକେ। ଯଦି ମେଦ୍ନି ହାର୍ ମାନାତ୍, ଲାଗିଙ୍ଗ୍ ହେଦାଙ୍ଗ୍ ତାସି ମାନାୟ୍ତିଙ୍ଗ୍ ହାର୍ଦି ତାସ୍ ହିନାତ୍ ଆରେ ହେଦାଙ୍ଗ୍ ଈଶ୍ୱରତାଙ୍ଗ୍ ଆଶ୍ରିବାଦ୍ ପାୟାଆଜି ମାନ୍ଗାନାତ୍। 8 ମାତର୍ ଜେକନି ମାନାୟାର୍ ୱାଡ଼ି ମାର୍ ଆରେ କାଚ୍ରା ମାର୍ ଲେକେ, ହେଦାଙ୍ଗ୍ ଇନା କାମାୟ୍ତାକେ ଯଗ୍ଯ ଆକାୟ୍। ହେଦାଙ୍ଗ୍ ଈଶ୍ୱରତାଙ୍ଗ୍ ଅବିଶାପ୍ ପାୟାଆନାତ୍ ଆରେ ନାଣିତାକେ ନଷ୍ଟ ଆନାତ୍। 9 ମାତର୍ ଏ ଲାଡ୍ନି ଟଣ୍ଡାର୍କାଦେର୍, ଆସେଙ୍ଗ୍ ଇଲେକେ ୱେଚ୍ଚିସ୍ପା, ଇଦାଙ୍ଗ୍ ମି କାଜିଙ୍ଗ୍ ଦର୍କାର୍ ଆକାୟ୍ ଇଞ୍ଜି ଷ୍ଟ୍ରଙ୍ଗ୍କିଜି ପାର୍ତି କିନାସା। ଉଦାର୍ ପାୟାଆନି ହାର୍ଦି ବିଷୟ ୱିଜୁ ଏପେଙ୍ଗ୍ ପୁଚାଦେର୍ନା ଇଞ୍ଜି ଆପେଙ୍ଗ୍ ପାର୍ତି କିନାପା। 10 ଈଶ୍ୱର ନ୍ୟାୟ୍ ବିଚାର୍ କିନାକାନ୍। ଏପେଙ୍ଗ୍ କିଜିମାଚି କାମାୟ୍ ଆରେ ହେୱାନିଙ୍ଗ୍ ଲାଡ୍କିଜି ଜେକନିକାନିଙ୍ଗ୍ ସାଇଜ କିଜିମାଚି କାମାୟ୍ତିଙ୍ଗ୍, ହେୱାନ୍ ବାଣାଆଉନ୍। ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ପାତେକ୍ ହେୱାରିଙ୍ଗ୍ ସାଇଜ କିନାଦେରା ଇଞ୍ଜି ହେୱାନ୍ ମାନ୍ତ ଏତୁ କିଦ୍ନାନ୍। 11 ଏପେଙ୍ଗ୍ ଆହାକିନି ବିଷୟ ସତ୍ ଆନି କାଜିଙ୍ଗ୍, ଏପେଙ୍ଗ୍ ଜିଜି ମାନି ପାତେକ୍ ଇଲେକେ ଲାଡ୍ନି କାମାୟ୍ କିୟାଟ୍ ଇଞ୍ଜି ମା ବେସି ଇଚା ମାନାତ୍। 12 ଲାଗିଙ୍ଗ୍ ଏପେଙ୍ଗ୍ ଆଡ଼୍ସିଆ ଆଉଦେର୍। ଆରେ ଇମ୍ଣାକାର୍ ପାର୍ତି ଆରେ ସାହାସ୍ ହୁଦାଙ୍ଗ୍ ଈଶ୍ୱରତି ପାର୍ମାଣ୍ନି ଆଦିକାରି ଆଦେଙ୍ଗ୍ ହାନାରା, ହେୱାର୍ ଲେକେ ଏପେଙ୍ଗ୍ ଆନାଦେର୍। ଈଶ୍ୱରକିତି ପାର୍ମାଣ୍ 13 ଈଶ୍ୱର ଏଚେପାଦ୍ନା ଅବ୍ରାହାମ ଲାଗାୟ୍ ପାର୍ମାଣ୍ କିଜି ମାଚାନ୍। ଶପତ୍ କିଦେଙ୍ଗ୍ ଈଶ୍ୱର ହେୱାନ୍ତାଙ୍ଗ୍ ଆରେ ଗାଜା ତର୍ ଗାଟାଆୱିତି କାଜିଙ୍ଗ୍। ହେୱାନ୍ ତା ଜାର୍ ତର୍ଦାଙ୍ଗ୍ ଶପତ୍ କିଜି ୱେଚ୍ଚାନ୍, 14 “ଆନେଙ୍ଗ୍ ହାତ୍ପା ନିଙ୍ଗେଙ୍ଗ୍ ଆଶ୍ରିବାଦ୍ କିଦ୍ନାଙ୍ଗ୍ ଆରେ ଆନେଙ୍ଗ୍ ମି ଲାତ୍ରାତିଙ୍ଗ୍ ଗାଣାକିୟା ଆୱିଲେକେ ବେସି କିନାଙ୍ଗ୍।” 15 ଅବ୍ରାହାମ ବେସି ବାହ୍ରୁ ସାହାସ୍ ଆସ୍ତିମାଚି ପାଚେ, ଈଶ୍ୱର ଇନାକା ପାର୍ମାଣ୍ କିଜି ମାଚାନ୍ ହେୱାନ୍ ହେଦାଙ୍ଗ୍ ପାୟାଆଜି ମାଚାନ୍। 16 ମାନାୟାର୍ ଏଚେପାଦ୍ନା ଶପତ୍ କିନାର୍, ହେପାଦ୍ନା ମାନାୟାର୍ତାଙ୍ଗ୍ ଗାଜା ମାନାୟ୍ ତର୍ଦାଙ୍ଗ୍ ଶପତ୍ କିଜି ମାନ୍ଗାନାର୍। ହେୱାର୍ ତା ଶପତ୍ତିଙ୍ଗ୍ ହାତ୍ପା ପୁରା କିଦେଙ୍ଗ୍ ଇଲେକେ କିଜିମାନାର୍। ଆରେ ହେୱାରିଙ୍ଗ୍ ଇନେର୍ପା ଜୁକ୍ତି କିଦେଙ୍ଗ୍ ଆଡୁର୍। 17 ହେଦାଙ୍ଗ୍ କାଜିଙ୍ଗ୍ ଈଶ୍ୱର ଶପତ୍ କିଜି ପାର୍ମାଣ୍ କିତାନ୍। ଇମ୍ଣାକାର୍ ପାର୍ମାଣ୍ ପାୟାଆତାର୍ନା ଇଦାଙ୍ଗ୍ କାଜିଙ୍ଗ୍ ହେୱାନ୍ କିଲେର୍ କିଜି ଚଚ୍ନି କାଜିଙ୍ଗ୍ ଇଚାକିନାନ୍ ଯେ ହେୱାନ୍ ଇନା ପାର୍ମାଣ୍ କିତାନ୍ନା, ହେଦାଙ୍ଗ୍ ହାତ୍ପା କିନାନ୍। 18 ଲାଗିଙ୍ଗ୍ ଈଶ୍ୱର ରଞ୍ଜାଙ୍ଗ୍ ପାର୍ମାଣ୍ ହିତ୍ତାନ୍ନା ଆରେ ହେୱାନ୍ ରଞ୍ଜାଙ୍ଗ୍ ଶପତ୍ କିତାନ୍ନା। ଇ ରିଣ୍ଡାଙ୍ଗ୍ ବିଷୟ ଚେଞ୍ଚ୍ ଆଉତ୍, ଇନେସ୍କି ଈଶ୍ୱର ଇନାୱେଡ଼ାଙ୍ଗ୍ ପା ମିଚ୍ କାତା ୱେଚୁନ୍। ଆସେଙ୍ଗ୍ ତା ଲାଗାୟ୍ ରକ୍ଷା ପାୟାଆନି କାଜିଙ୍ଗ୍ ୱାତାସ୍ନା, ଲାଗିଙ୍ଗ୍ ମା ମୁମ୍ଦ ମାନି ଆହାତିଙ୍ଗ୍ ଆହ୍ନି କାଜିଙ୍ଗ୍ ସାହାସ୍ ଆଡ। 19 ଲଙ୍ଗର୍ ଇନେସ୍ ଡଙ୍ଗାତିଙ୍ଗ୍ ଷ୍ଟ୍ରଙ୍ଗ୍ ଆରେ ମଜ୍ବୁତ୍ କିଜି ଆସ୍ତି ମାନାତ୍, ହେଲେକେ ଇ ଆହା ମା ଜିବୁନ୍ତିଙ୍ଗ୍ ଷ୍ଟ୍ରଙ୍ଗ୍ ଆରେ ମଜ୍ବୁତ୍ କିଜି ଆସ୍ତି ମାଞ୍ଜ୍ନାତ୍। ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଯୀଶୁତାକେ ମା ଆହା ଇଡ଼୍ତାସ୍ନା। ପବିତ୍ର ପୁଟ୍ କୁଡ଼ିଆନି ପାର୍ଦା ଆନି ମାନି ଈଶ୍ୱରତି ବେସି ପବିତ୍ର ବାହାତାକେ ଯୀଶୁ ହାଚାନ୍ନା। 20 ଯୀଶୁ ମା ଆଗେ ହାଚାନ୍ନା ଆରେ ମା କାଜିଙ୍ଗ୍ ହେୱାନ୍ ସରଗ୍ତାକେ ହାଚାନ୍ନା। ହେୱାନ୍ ମଲ୍କିଷେଦକ ଲେକେ ୱିଜ୍ୱିଦିନ୍ନି ପ୍ରଦାନ୍ ମୁଡ଼୍ଦି ପୁଜାରି ଆତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation