ଏବ୍ରି 5 - New Testament in Pengo Parja Languageଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ଈଶ୍ୱର ବାଚିକିନାନ୍ 1 ଈଶ୍ୱର ଇସ୍ରାଏଲନି ମାନାୟାର୍ ବିତ୍ରେତାଙ୍ଗ୍ ରକାନିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି କିଜି ବାଚିକିଜି ମାଚାନ୍। ହେ ମୁଡ଼୍ଦି ପୁଜାରି ମାନାୟାର୍ ବାଦୁଲ୍ତ ଈଶ୍ୱର ଲାଗାୟ୍ ହେବାକିଜି ମାଚାନ୍। ଆରେ ହେୱାନ୍ ମାନାୟାର୍ ଦାନ୍ ଆରେ ମାନାୟାର୍ ପାପ୍ତାଙ୍ଗ୍ କେମା ପାୟାଆନି କାଜିଙ୍ଗ୍ ବଲିପୁଜା କିଜି ମାଚାନ୍। 2 ହେ ପ୍ରଦାନ୍ ମୁଡ଼୍ଦି ପୁଜାରି ପା ରକାନ୍ ମାନାୟ୍ ଆତି କାଜିଙ୍ଗ୍, ହେୱାନିଙ୍ଗ୍ ପା ବୁଲ୍ବାଲ୍ ମାନ୍ଗାନାତ୍। ଇଦାଙ୍ଗ୍ କାଜିଙ୍ଗ୍ ବୁଦିହିଲ୍ୱି ଆରେ ବୁଲ୍ କିନି ମାନାୟାରିଙ୍ଗ୍ ହେୱାନ୍ ହାର୍ଦାଙ୍ଗ୍ ପୁନାନ୍। 3 ଲାଗିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାନାୟାର୍ କାଜିଙ୍ଗ୍ ବଲିପୁଜା କିନି ହୁଦାଙ୍ଗ୍, ତା ଜାର୍ ପାପ୍ତାଙ୍ଗ୍ କେମା ପାୟାଆନି କାଜିଙ୍ଗ୍ ପା ବଲିପୁଜା କିନି ଦର୍କାର୍ ଆଜି ମାଚାତ୍। 4 ଇନେର୍ ପା ଜାର୍ ପାଦ୍ନି ସନ୍ମାନ୍ ପାୟାଆନି କାଜିଙ୍ଗ୍ ପ୍ରଦାନ୍ ମୁଡ଼୍ଦି ପୁଜାରି ଆଉନ୍। ମାତର୍ ଈଶ୍ୱର ହାରଣଙ୍ଗ୍ ଇନେସ୍ କୁକ୍ଚି ପାର୍ତୁମ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି କିଜି ବାଚିକିତାନ୍, ହେଲେକେ ଜେକନିକାରିଙ୍ଗ୍ ପା ଈଶ୍ୱର କୁକ୍ଚି ମୁଡ଼୍ଦି ପୁଜାରି କିଜି ବାଚି କିତାନ୍ନା। ଖ୍ରୀଷ୍ଟ ମଲ୍କିଷେଦକ ଲେକେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି 5 ହେଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟ ପ୍ରଦାନ୍ ମୁଡ଼୍ଦି ପୁଜାରି ପାଦ୍ନି ସନ୍ମାନ୍ ନିଜେ ଡେକ୍ୱାଦାଙ୍ଗ୍ ମାଚାନ୍, ମାତର୍ ଈଶ୍ୱର ହେୱାନିଙ୍ଗ୍ ହେ ସନ୍ମାନ୍ନି ପାଦ୍ ହିଜିମାଚାନ୍। ଆରେ ଈଶ୍ୱର ଖ୍ରୀଷ୍ଟଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନା ମାଜି, ନେଞ୍ଜେଙ୍ଗ୍ ଆନେଙ୍ଗ୍ ନି ଆବା ଆତାଙ୍ଗ୍।” 6 ଜେକନି ବାହାତାକେ ଈଶ୍ୱର ଆରେ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ମଲ୍କିଷେଦକ ଲେକେ, ୱିଜୁଦିନ୍ କାଜିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରି।” 7 ଯୀଶୁ ଖ୍ରୀଷ୍ଟ ପୁର୍ତିତାକେ ମାନିହିଙ୍ଗ୍, ଇମ୍ଣି ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଉଦାର୍ କିଦେଙ୍ଗ୍ ଆଡ୍ନାନ୍, ତା ଲାଗାୟ୍ ହେୱାନ୍ ଗାଜା କାଟ୍ତାଙ୍ଗ୍ ଆଡ଼ାକୁକା ଆଜି ପାର୍ତାନା ଆରେ ଗୁୱାରି କିତାନ୍। ଈଶ୍ୱରତିଙ୍ଗ୍ ହେୱାନ୍ ବେସି ସନ୍ମାନ୍ ଆରେ ଜାର୍ତିଙ୍ଗ୍ ହିରୁ ଆନି କାଜିଙ୍ଗ୍, ଈଶ୍ୱର ହେୱାନ୍ କିତି ପାର୍ତାନାତିଙ୍ଗ୍ ୱେଚାନ୍। 8 ଯୀଶୁ ଖ୍ରୀଷ୍ଟ ଈଶ୍ୱର ମେହି ଆତିସ୍ପା, ହେୱାନ୍ ଦୁକ୍କଷ୍ଟ ପାୟାଆଜି ଈଶ୍ୱରତାକେ ମାନିକିଜି ମାନାକା ହିକାଆତାନ୍। 9 ଇଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ପୁରାପୁରି ଟିକ୍ ପ୍ରଦାନ୍ ମୁଡ଼୍ଦି ପୁଜାରି ଇଞ୍ଜି ଯଗ୍ୟ କିତାନ୍, ଆରେ ହେୱାନ୍ତାକେ ପାର୍ତିକିନି ମାନାୟାରିଙ୍ଗ୍ ହେୱାନ୍ ଯୁଗ୍-ଯୁଗ୍ କାଜିଙ୍ଗ୍ ଉଦାର୍ କିନାନ୍। 10 ଆରେ ଈଶ୍ୱର ହେୱାନିଙ୍ଗ୍ ମଲ୍କିଷେଦକ ଲେକେ ପ୍ରଦାନ୍ ମୁଡ଼୍ଦି ପୁଜାରି ଇଞ୍ଜି ତର୍ ହିତାନ୍। ପାର୍ତି କିନାକା ଦୁର୍ବଲ୍ କାଜିଙ୍ଗ୍ ଜାଗ୍ରତ୍ 11 ଆପେଙ୍ଗ୍ ଯୀଶୁ ଖ୍ରୀଷ୍ଟ ବିଷୟରେ ବେସି ୱେଚ୍ଚେଙ୍ଗ୍ ଇଚା କିନାପା, ମାତର୍ ଏପେଙ୍ଗ୍ ଈଶ୍ୱର କାତା ୱେନି କାଜିଙ୍ଗ୍ ବେସି ଆଡ଼୍ସିଆ ଆତିଲେ, ହେଦାଙ୍ଗ୍ ପୁରାପୁରି ବୁଜାୟ୍ କିନି କାଜିଙ୍ଗ୍ କଷ୍ଟ ଆଦ୍ନାତା। 12 ଏପେଙ୍ଗ୍ ବେସି ଦିନ୍ନି ଖ୍ରୀଷ୍ଟାନ୍ ମାନାୟ୍ କାଦେର୍, ଆରେ ଏପେଙ୍ଗ୍ ଜେକନିକାରିଙ୍ଗ୍ ହିକ୍ଷାହିନି ଦର୍କାର୍ ମାଚାତ୍। ମାତର୍ ମିଙ୍ଗେଙ୍ଗ୍ ଈଶ୍ୱର କାତାନି ମୁଡ଼୍ ବିଷୟ ଆରେରଗ ହିକାଇ କିଦ୍ଦେଙ୍ଗ୍ ଆରେ ରକାନ୍ ମାଷ୍ଟେର୍ ଦର୍କାର୍ ଆଦ୍ନାତା। ହିରୁ ହିମ୍ଣା ଇନେସ୍ କାଦି ଚିଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଁୟ୍ ଉଣ୍ଜି ମାନାନ୍, ହେଲେକେ ଏପେଙ୍ଗ୍ ହିରୁ ହିମ୍ଣା ଆତାଦେର୍ନା। 13 ଇମ୍ଣି ମାନାୟ୍ ନଙ୍ଗୟ୍ ପାତେକ୍ ମାଁୟ୍ ନେ ଉଣାନା, ହେୱାନ୍ ନଙ୍ଗୟ୍ ପାତେକ୍ ପା ହିରୁ ହିମ୍ଣା ଆଜି ମାନାନ୍। ଆରେ ଦରମ୍ ଜିବୁନ୍ କାଟିକିନି କାଜିଙ୍ଗ୍ ହେୱାନ୍ ପୁନୁନ୍। 14 ମାତର୍ ଇମ୍ଣାକାନ୍ ଅବ୍ୟାସ୍ତାଙ୍ଗ୍ ହାର୍ ଆରେ କରାପ୍ତିଙ୍ଗ୍ ଚିନ୍ କିଜି ଜେକ କିଦେଙ୍ଗ୍ ଆଡ୍ନାର୍ ଆରେ ଇନାକା ଟିକ୍ ହେଦାଙ୍ଗ୍ କିନାର୍, ଇଲେକେ ଗାଜା ମାନାୟାର୍ କାଜିଙ୍ଗ୍ ଆଟ୍ୱା କାଦି ଦର୍କାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation