ଏବ୍ରି 4 - New Testament in Pengo Parja Languageଈଶ୍ୱର ଜମ୍ନି ବାହାତାକେ ହାଞ୍ଜେଙ୍ଗ୍ ଉପାୟ୍ କିୟାଟ୍ 1 ଈଶ୍ୱର ନଙ୍ଗୟ୍ ପା ତା ଜମ୍ନି ବାହାତାକେ ହାଞ୍ଜେଙ୍ଗ୍ ପାର୍ମାଣ୍ କିତାନ୍ନା, ଆରେ ହେ ପାର୍ମାଣ୍କିତି ବାହାତାକେ ହାଞ୍ଜେଙ୍ଗ୍ ଇନେସ୍ ମି ବିତ୍ରେତାଙ୍ଗ୍ ଇନେର୍ ବାକିଆଜି ମାନୁଦେର୍, ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ପାଣ୍ଡ୍ରାଆଜି ଜାଗ୍ରତ୍ ଆଜି ମାନାସ୍। 2 ଇନେସ୍କି ଇସ୍ରାଏଲନି ମାନାୟାର୍ ଇନେସ୍ ଜମ୍ନି ବାହାତାକେ ହାନି ହାର୍ଦିକାବୁର୍ ୱେନ୍ଞ୍ଜି ମାଚାର୍, ହେଲେକେ ଆସେଙ୍ଗ୍ ପା ଯୀଶୁ ଖ୍ରୀଷ୍ଟନି ହାର୍ଦିକାବୁର୍ ୱେଚାସ୍ନା। ମାତର୍ ହେୱାର୍ ଈଶ୍ୱର ୱେଚ୍ଚି ଇ କାତାତିଙ୍ଗ୍ ପାର୍ତିକିୱି କାଜିଙ୍ଗ୍, ହେଦାଙ୍ଗ୍ ହେୱାର୍ କାଜିଙ୍ଗ୍ ଇନା ଲାବ୍ନି ବିଷୟ ଆୱାତାତ୍। 3 “ମାତର୍ ଈଶ୍ୱର ୱେଚ୍ଚି କାତାତିଙ୍ଗ୍ ଆସେଙ୍ଗ୍ ପାର୍ତିକିତି କାଜିଙ୍ଗ୍, ଆସେଙ୍ଗ୍ ଆପ୍କା ହେ ଜମ୍ନି ବାହାତାକେ ହଣ୍ଡେଙ୍ଗ୍ ଆଡ୍ନାସ୍। ଆରେ ପାର୍ତିକିୱି ମାନାୟ୍ କାଜିଙ୍ଗ୍ ଈଶ୍ୱର ୱେଚ୍ନାନ୍, ଆନେଙ୍ଗ୍ ରିସାତାଙ୍ଗ୍ ପାର୍ମାଣ୍ କିଜି ୱେଚ୍ଚାଙ୍ଗ୍, ହେୱାର୍ ନା ଜମ୍ନି ବାହାତାକେ ହଣ୍ଡେଙ୍ଗ୍ ଆଡୁର୍।” ଇନେସ୍କି ଆସେଙ୍ଗ୍ ପୁନାସ୍ ଯେ ପୁର୍ତିତିଙ୍ଗ୍ ରହ୍ନି ଆଗେ ତା ଜମ୍ନି ବାହା ରହିଆଜି ମାଚାତ୍। 4 ଇନେସ୍କି ସାତ୍ ନମ୍ୱର୍ଦିନ୍ତି ବିଷୟରେ ଈଶ୍ୱର ସାସ୍ତର୍ ଇଲେକେ ୱେଚ୍ଚାନ୍ନା, “ଈଶ୍ୱର ସାତ୍ ନମ୍ବର୍ ଦିନ୍ତ ତା ୱିଜୁ କାମାୟ୍ତାଙ୍ଗ୍ ଜମ୍ତାନ୍।” 5 ଆରେ ର ବାହାତାକେ ହେୱାନ୍ ୱେଚ୍ନାନ୍, “ହେୱାର୍ ନା ଜମ୍ନି ବାହାତାକେ ହଣ୍ଡେଙ୍ଗ୍ ଆଡୁର୍।” 6 ଇମ୍ଣି ଇସ୍ରାଏଲନି ମାନାୟାର୍ ପାର୍ତୁମ୍ ହାର୍ଦିକାବୁର୍ ଶୁଣାୟ୍ କିତାକା ୱେନ୍ଞ୍ଜି ମାଚାର୍, ହେୱାର୍ ହେ ଜମ୍ନି ବାହାତାକେ ହାଞ୍ଜେଙ୍ଗ୍ ଆଡ୍ୱାତାର୍, ଇନେସ୍କି ହେୱାର୍ ଈଶ୍ୱରତିଙ୍ଗ୍ ମାନି କିୱାତାର୍। ମାତର୍ ନଙ୍ଗୟ୍ ପା କେତେକ୍ ମାନାୟ୍ ଈଶ୍ୱର ଜମ୍ନି ବାହାତାକେ ହଣ୍ଡେଙ୍ଗ୍ ବାକି ମାନାର୍। 7 ଲାଗିଙ୍ଗ୍ ଈଶ୍ୱର ତା ଜମ୍ନିଦିନ୍ତ ହାଞ୍ଜେଙ୍ଗ୍ ଆରେ ର ସମୟ୍ ବାଚିକିତାନ୍, ଆରେ ହେ ସମୟ୍ ଆନାତା ନେଞ୍ଜେଙ୍ଗ୍ନି ଦିନ୍। ବେସି ବାର୍ହୁ ପାଚେ, ଦାଉଦ ରାଜା ବହିତାକେ ଈଶ୍ୱର ୱେଚ୍ଚାନ୍, “ନେଞ୍ଜେଙ୍ଗ୍ ଯଦି ଏପେଙ୍ଗ୍ ଈଶ୍ୱର ବେଣ୍ ୱେନାଦେର୍, ଏପେଙ୍ଗ୍ ତା କାତାତିଙ୍ଗ୍ ମାନି କିଦେଙ୍ଗ୍ ମୁନା କିମାଟ୍।” 8 ଆସେଙ୍ଗ୍ ପୁଚାସ୍ନା ଯେ ମା ଆକଦାଦିରିଙ୍ଗ୍ ଯିହଶୁୟ ଇମ୍ଣି କିଣାନ ଦେସ୍ତାକେ ହାଞ୍ଜେଙ୍ଗ୍ ହାଜି ଚଚ୍ଚାତାନ୍, ହେଦାଙ୍ଗ୍ ଈଶ୍ୱର ପାର୍ମାଣ୍କିତି ଜମ୍ନି ବାହା ଆକାୟ୍। ଯଦି କିଣାନ ଦେସ୍ ଜମ୍ନି ବାହା ଆଜି ମାଚିସ୍, ଲାଗିଙ୍ଗ୍ ଈଶ୍ୱର ପାଚେ ଜେକନି ଦିନ୍ତି ବେଣ୍ ୱେଚ୍ଚାୱାତାନ୍ମା। 9 ଲାଗିଙ୍ଗ୍ ଈଶ୍ୱର ଇନେସ୍ ପୁର୍ତିନି ୱିଜୁ ବିଷୟ ରସ୍ତି ସାତ୍ଦିନ୍ତ ଜମ୍ତାନ୍, ହେଲେକେ ଈଶ୍ୱରନି ମାନାୟାର୍ ଜମ୍ଦେଙ୍ଗ୍ ର ବାହା ରହିଆତାତ୍ନା। 10 ଈଶ୍ୱର ଇନେସ୍ ଜାର୍ କାମାୟ୍ତାଙ୍ଗ୍ ଜମ୍ତାନ୍, ହେଲେକେ ଇମ୍ଣି ମାନାୟ୍ ଈଶ୍ୱର ଜମ୍ନି ବାହାତାକେ ହାଚାନ୍ନା, ହେୱାନ୍ ତା ଜାର୍ କାମାୟ୍ତାଙ୍ଗ୍ ଜମ୍ନାନ୍। 11 ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ହେ ଜମ୍ନି ବାହାତାକେ ହଣ୍ଡେଙ୍ଗ୍ ଉପାୟ୍ କିନି ଦର୍କାର୍, ଇନେସ୍କି ଇସ୍ରାଏଲନି ମାନାୟାର୍ଲେକେ ଇମ୍ଣି ମାନାୟ୍ ଈଶ୍ୱରତିଙ୍ଗ୍ ମାନିକିଉର୍, ହେୱାନ୍ ଜମ୍ନି ବାହାତାକେ ହାଞ୍ଜେଙ୍ଗ୍ ଆଡୁର୍। 12 ଇନେସ୍କି ଈଶ୍ୱର କାତାତାକେ ଜିବୁନ୍ ଆରେ ଶାକ୍ତି ମାନାତ୍। ରିପଣ୍ଡାଙ୍ଗ୍ ଦାରା ମାନି ହୁରିତାଙ୍ଗ୍ ପା ଇଦାଙ୍ଗ୍ ଆଦିକ୍ ଦାରା ମାନାତ୍, ଆରେ ମାନ୍ ଆରେ ପାରାଣ୍, ଗାଟିଙ୍ଗ୍ ଆରେ ପେଣ୍ନି ରାସ୍ତିଙ୍ଗ୍ ଜେକ-ଜେକ କିଜି ବାଗ୍ କିନାତ୍। ଇଦାଙ୍ଗ୍ ମା ମାନ୍ତି ଚିନ୍ତା ଆରେ ବାବ୍ନାତିଙ୍ଗ୍ ଚଚ୍ଚାନାତ୍। 13 ଈଶ୍ୱର କାଣ୍କୁକାଙ୍ଗ୍ ଇମ୍ଣି ମାନାୟ୍ ପା ଡ଼ୁଗ୍ୱାତାର୍ନା। ଇନେସ୍କି ତା କାଣ୍କୁକାଙ୍ଗ୍ ୱିଜୁ ବିଷୟ ଚଞ୍ଜି ଆନାତ୍। ଆରେ ତା ମୁମ୍ଦ ମାଙ୍ଗେଙ୍ଗ୍ ୱିଜୁ କାତା ୱେଚ୍ଚେଙ୍ଗ୍ ଆନାତ୍ ଇନାକା ମା ଜିବୁନ୍ ମାନିହିଙ୍ଗ୍ କିତାସ୍ନା। ଯୀଶୁ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି 14 ଇମ୍ଣି ଯୀଶୁ ସରଗ୍ଜପି ହାଚାନ୍ନା, ହେୱାନ୍ ଈଶ୍ୱର ମେହି। ହେୱାନ୍ ମା ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି। ଲାଗିଙ୍ଗ୍ ଆସେଙ୍ଗ୍ ଇନାକା ପାର୍ତି କିତାସ୍ନା, ହେଦାଙ୍ଗ୍ ଷ୍ଟ୍ରଙ୍ଗ୍କିଜି ଆସ୍ତି ମାନାସ୍। 15 ଯୀଶୁ ଖ୍ରୀଷ୍ଟ ମା ପ୍ରଦାନ୍ ମୁଡ଼୍ଦି ପୁଜାରି ମା ଦୁର୍ବଲ୍ତିଙ୍ଗ୍ ପୁନାନ୍, ଶୟତାନ ମା ଲେକେ ଯୀଶୁଙ୍ଗ୍ ୱିଜୁ ବିଷୟରେ ପରିକ୍ଷା କିତାତ୍, ମାତର୍ ଯୀଶୁ ପାପ୍ କିୱାତାନ୍। 16 ଲାଗିଙ୍ଗ୍ ମା ଦୟା ମାନି ଈଶ୍ୱରନି ସିଂହାସନ୍ ଲାଗାୟ୍ ସାହାସ୍ ହୁଦାଙ୍ଗ୍ ହାନାସ୍। ଈଶ୍ୱର ମାଙ୍ଗେଙ୍ଗ୍ ଦୟା ଆରେ ଆଶ୍ରିବାଦ୍ କିଦ୍ନାନ୍ ଆରେ ମା ଦର୍କାର୍ ଆତିହିଙ୍ଗ୍ ହେୱାନ୍ ମାଙ୍ଗେଙ୍ଗ୍ ସାଇଜ କିଦ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation