ଏବ୍ରି 3 - New Testament in Pengo Parja Languageଯୀଶୁ ମୋଶାତାଙ୍ଗ୍ ଗାଜାକାନ୍ 1 ଇଦାଙ୍ଗ୍ କାଜିଙ୍ଗ୍ ଏ ଈଶ୍ୱର ମାନାୟାର୍ ଆରେ ତା ହୁଦାଙ୍ଗ୍ ସରଗ୍ତାକେ ମାହାଆଜି ମାଞ୍ଜେଙ୍ଗ୍ ବାଚିକିତି ମାନାୟାର୍, ଆସେଙ୍ଗ୍ ଯୀଶୁଙ୍ଗ୍ ଈଶ୍ୱର ଦୁତ୍ ଆରେ ପ୍ରଦାନ୍ ମୁଡ଼୍ଦି ପୁଜାରି ଇଞ୍ଜି ଶୁଣାୟ୍ କିନାସା ହେ ଯୀଶୁ ବିଷୟରେ ବାବିକିଜି ହୁଡ଼ାଟ୍। 2 ମୋଶା ଇନେସ୍ ଈଶ୍ୱର ପରିବାର୍ନି ମାନାୟାର୍ତାକେ ହେବା କିଦେଙ୍ଗ୍ ବିସ୍ବସ୍ତ ମାଚାର୍, ହେଲେକେ ଯୀଶୁ ତା ବାଚିକିତି ମାନାୟ୍ତାକେ ପା ବିସ୍ବସ୍ତ ମାଚାର୍। 3 ଇଲ୍ ତାଙ୍ଗ୍ ଇଲ୍ ଗାଚ୍ନି ମାନାୟ୍ ଇନେସ୍ ବେସି ସନ୍ମାନ୍ ପାୟାଆନାର୍, ହେଲେକେ ମୋଶାତାଙ୍ଗ୍ ଯୀଶୁ ଆଦିକ୍ ଗୌରବ ପାୟା ଆଦେଙ୍ଗ୍ ଯଗ୍ୟ ଇଞ୍ଜି ଗାଣାକିୟା ଆତାନ୍। 4 ଇନେସ୍କି ୱିଜୁ ଇଲ୍ ଇନେର୍ ନଇଲେ ଇନେର୍ ରସ୍ତି ମାନ୍ଗାନାର୍, ମାତର୍ ଈଶ୍ୱର ୱିଜୁ ବିଷୟତିଙ୍ଗ୍ ରହ୍ନି ମାନାୟ୍। 5 ମୋଶା ଈଶ୍ୱର ପରିବାର୍ନି ମାନାୟାର୍ତାଙ୍ଗ୍ ହେବା କିଦେଙ୍ଗ୍ ବିସ୍ବସ୍ତ ମାଚାନ୍। ଆରେ ଇମ୍ଣି ୱିଜୁ କାମାୟ୍ ମୋଶା କିତାନ୍ନା ହେଦାଙ୍ଗ୍ ଈଶ୍ୱର ବବିଷ୍ଯତରେ ୱେଚ୍ନି ବିଷୟରେ ପୁନିକିନାତା। 6 ମାତର୍ ଖ୍ରୀଷ୍ଟ ହିମ୍ଣା ଲେକେ ଆନି କାଜିଙ୍ଗ୍ ଈଶ୍ୱର ପରିବାର୍ନି ମାନାୟାର୍ ଜପି ବିସ୍ବସ୍ତ ମାନାନ୍। ଆରେ ଯଦି ଆସେଙ୍ଗ୍ ମା ସାହାସ୍ତିଙ୍ଗ୍ ଆରେ ଖ୍ରୀଷ୍ଟତାକେ ଇଡ଼୍ତି ଆହାତିଙ୍ଗ୍ କଣ୍ଟ୍ରୁଲ୍କିଜି ସେସ୍ ପାତେକ୍ ଆସ୍ତି ମାନାସ୍, ଲାଗିଙ୍ଗ୍ ଆସେଙ୍ଗ୍ ନିଜେ ହେ ପରିବାର୍ନି ମାନାୟ୍ ଆନାସ୍। ପାର୍ତିକିୱି ମାନାୟ୍ ଜମ୍ନି ଦେସ୍ତାକେ ହାଞ୍ଜେଙ୍ଗ୍ ଆଡୁର୍ 7 ଲାଗିଙ୍ଗ୍ ପବିତ୍ର ଆତ୍ମା ସାସ୍ତର୍ତାକେ ଇଲେକେ ୱେଚ୍ନାତା, “ଯଦି ନେଞ୍ଜେଙ୍ଗ୍ ଏପେଙ୍ଗ୍ ଈଶ୍ୱର ବେଣ୍ ୱେନାଦେର୍, 8 ଲାଗିଙ୍ଗ୍ ଟାଙ୍ଗ୍ରାବାହାତାକେ ପରିକ୍ଷା ଆନି ଦିନ୍ତ ଇନେସ୍ ମି ଆକଦାଦିର୍ ଈଶ୍ୱରତିଙ୍ଗ୍ ମାନିକିୱାଦାଙ୍ଗ୍ ମାଚାର୍। ହେଲେକେ ଏପେଙ୍ଗ୍ ଜାର୍-ଜାର୍ ଗରବ୍ତିଙ୍ଗ୍ ମାନ୍ ଆଟ୍ୱା କିମାଟ୍।” 9 “ହେ ଟାଙ୍ଗ୍ରାବାହାତାକେ ଚାଲିଶ୍ ବାର୍ହୁ ପାତେକ୍ ହେୱାର୍ ଆନେଙ୍ଗ୍ କିତି ଚାନିଆଆନି କାମାୟ୍ ହୁଡ଼୍ତି ପାଚେ ପା, ମି ଆକଦାଦିର୍ ନାଙ୍ଗେଙ୍ଗ୍ ପରିକ୍ଷା କିଜି ଚେକ୍ କିଜି ମାନ୍ଞ୍ଚାର୍।” 10 “ଲାଗିଙ୍ଗ୍ ଆନେଙ୍ଗ୍ ଇ ମାନାୟାରିଙ୍ଗ୍ ରିସାଆଜି ୱେଚ୍ଚାଙ୍ଗ୍, ହେୱାର୍ ନାଙ୍ଗେଙ୍ଗ୍ ଆସ୍ତୁର୍, ଆନେଙ୍ଗ୍ ଇନାକା ହେୱାରିଙ୍ଗ୍ କିଦେଙ୍ଗ୍ ଆଦେସ୍ ହିତାଙ୍ଗ୍ନା, ହେୱାର୍ ହେଦାଙ୍ଗ୍ କିଦେଙ୍ଗ୍ ମାନିକିଉର୍। 11 ଲାଗିଙ୍ଗ୍ ଆନେଙ୍ଗ୍ ରିସାତାଙ୍ଗ୍ ପାର୍ମାଣ୍ କିଜି ୱେଚ୍ଚାଙ୍ଗ୍, ହେୱାର୍ ନା ଜମ୍ନି ବାହାତାକେ ହଣ୍ଡେଙ୍ଗ୍ ଆଡୁର୍।” 12 ଲାଗିଙ୍ଗ୍ ଏ ପାର୍ତିକିନି ଟଣ୍ଡାର୍କାଦେର୍, ଜାଗ୍ରତ୍ ଆଜି ମାନାଟ୍, ମି ଗରବ୍ ଜିବୁନ୍ ମାନି ଈଶ୍ୱରତିଙ୍ଗ୍ ଆହ୍ୱାଦାଙ୍ଗ୍, କରାପ୍ ଆରେ ପାର୍ତିକିୱି ମାନାୟ୍ ଲେକେ ଆମେତ୍। 13 ଲାଗିଙ୍ଗ୍ ନେଞ୍ଜେଙ୍ଗ୍ ସୁଯଗ୍ ମାନୁ-ମାନୁ ୱିଜୁଦିନ୍ ଜାର୍-ଜାର୍ତିଙ୍ଗ୍ ସାହାସ୍ ହିୟାଟ୍। ଲାଗିଙ୍ଗ୍ ପାପ୍ ମିଙ୍ଗେଙ୍ଗ୍ ଟକାୟ୍ କିଦ୍ଦେଙ୍ଗ୍ ଆଡ଼୍ଦୁତ୍ ଆରେ ଏପେଙ୍ଗ୍ ଈଶ୍ୱର ବିରଦ୍ତାକେ ମାନ୍ତିଙ୍ଗ୍ ଆଟ୍ୱା କିଉଦେର୍। 14 ଇନେସ୍କି ଆଗେତାଙ୍ଗ୍ ମା ପାର୍ତି ଇନେସ୍ ଈଶ୍ୱର ଜପି ମାଚାତ୍, ହେଲେକେ ପାର୍ତି ଯଦି ଆସେଙ୍ଗ୍ ଜିଜି ମାନି ପାତେକ୍ ଷ୍ଟ୍ରଙ୍ଗ୍କିଜି ଆସ୍ତି ମାନାସ୍, ଲାଗିଙ୍ଗ୍ ଖ୍ରୀଷ୍ଟନି ୱିଜୁ ବିଷୟନି ବାଗ୍ ପାୟାଆନାସ୍। 15 ଲାଗିଙ୍ଗ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ନେଞ୍ଜେଙ୍ଗ୍ ଯଦି ଏପେଙ୍ଗ୍ ଈଶ୍ୱର ବେଣ୍ ୱେନାଦେର୍। ଲାଗିଙ୍ଗ୍ ଟାଙ୍ଗ୍ରାବାହାତାକେ ପରିକ୍ଷା ଦିନ୍ତ ଇନେସ୍ ମି ଆକଦାଦିର୍ ଈଶ୍ୱରତିଙ୍ଗ୍ ବିରଦ୍ କିଜି ମାନିକିୱାଦାଙ୍ଗ୍ ମାଚାର୍, ହେଲେକେ ଏପେଙ୍ଗ୍ ହେୱାନ୍ କାତା ମାନି କିଦେଙ୍ଗ୍ ମୁନା କିମାଟ୍।” 16 ଈଶ୍ୱର ବେଣ୍ ୱେଚି ପାଚେ ପା, ଇମ୍ଣାକାର୍ ହେୱାନିଙ୍ଗ୍ ବିରଦ୍ କିଜି ମାଚାର୍? ଇମ୍ଣି ଇସ୍ରାଏଲନି ମାନାୟାରିଙ୍ଗ୍ ମୋଶା ମିସର ଦେସ୍ତାଙ୍ଗ୍ ହପ୍ଚି ତାହିୱାତାନ୍, ହେ ମାନାୟାର୍ ହେୱାନିଙ୍ଗ୍ ବିରଦ୍ କିଜି ମାଚାର୍। 17 ଇମ୍ଣାକାର୍ ଈଶ୍ୱରତିଙ୍ଗ୍ ଚାଲିଶ୍ ବାର୍ହୁ ପାତେକ୍ ବିରଦ୍ କିଜି ମାଚାର୍? ହେ ଇସ୍ରାଏଲନି ମାନାୟାର୍ ଇନେର୍ ପାପ୍ କିତାର୍ ଆରେ ଟାଙ୍ଗ୍ରାବାହାତାକେ ହାଃଜି ମାଚାର୍। 18 ଇମ୍ଣାକାର୍ ବିରଦ୍ତାକେ ଈଶ୍ୱର ପାର୍ମାଣ୍ କିଜି ୱେଚ୍ଚି ମାଚାନ୍ ଯେ, ହେୱାର୍ ତା ଜମ୍ନି ବାହାତାକେ ହଣୁର୍? ଇମ୍ଣାକାର୍ ହେୱାନିଙ୍ଗ୍ ବିରଦ୍ କିଜି ମାଚାର୍, ହେୱାରିଙ୍ଗ୍ ହେୱାନ୍ ୱେଚ୍ଚାନ୍। 19 ନଙ୍ଗୟ୍ ଆସେଙ୍ଗ୍ ପୁଚାସ୍ ଯେ, ହେୱାର୍ ଈଶ୍ୱରତାକେ ପାର୍ତିକିୱି କାଜିଙ୍ଗ୍ ହେୱାର୍ ଜମ୍ନି ବାହାତାକେ ହାଞ୍ଜେଙ୍ଗ୍ ଆଡ୍ୱାତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation