ଏବ୍ରି 2 - New Testament in Pengo Parja Languageଉଦାର୍ କିନି କାତା 1 ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଇମ୍ଣି ସତ୍ କାତା ୱେଚାସ୍ନା ହେଦାଙ୍ଗ୍ତିଙ୍ଗ୍ ଆସେଙ୍ଗ୍ ଆଦିକ୍ ମାନ୍ଦିୟାନ୍ ହିନି ଦର୍କାର୍, ନଇଲେ ଆସେଙ୍ଗ୍ ହାଜି ବାଣା ଆୟିଆନାତ୍। 2 ଈଶ୍ୱର ଦୁତ୍କୁତାଙ୍ଗ୍ ହିତ୍ତି ନିୟମ୍ତିଙ୍ଗ୍ ୱିଜୁଦିନ୍ ଟିକ୍ ଇଞ୍ଜି ପାର୍ମାଣ୍ କିଜି ଚଚିୟା ଆତାତ୍ନା। ଆରେ ହେ ନିୟମ୍ତିଙ୍ଗ୍ ୱେନ୍ୱି ଆରେ ମାନିକିୱି ମାନାୟାରିଙ୍ଗ୍ ଈଶ୍ୱର ଦଣ୍ଡ୍ ହିତାନ୍ନା। 3 ଲାଗିଙ୍ଗ୍ ମାପୃ ଯୀଶୁ ନିଜେ ଶୁଣାୟ୍ କିଜି ୱେଚ୍ଚାନ୍, ହାର୍ ଉଦାର୍ କିନି କାତାତିଙ୍ଗ୍ ମାନିକିୱିତିସ୍, ଆସେଙ୍ଗ୍ ଇନେସ୍ ରକ୍ଷା ପାୟାଆନାସ୍ ଇଞ୍ଜି ବାବିକିନାସା? ମାପୃ ଯୀଶୁ ୱେଚ୍ନିହିଙ୍ଗ୍ ପାର୍ତୁମ୍ ୱେଚି ଚେଲାହିର୍, ଇଦାଙ୍ଗ୍ ସତ୍ ଇଞ୍ଜି ମାବେ ଚଚ୍ଚାନ୍ନା। 4 ଏଚେପାଦ୍ନା ଈଶ୍ୱର ଇଦାଙ୍ଗ୍ କିନି କାଜିଙ୍ଗ୍ ଇଚା କିତାନ୍, ହେୱାନ୍ ପା ବେସି ଚିନା ଆରେ ଚାନିଆ କାମାୟ୍ ଆରେ ବିନ୍ ପର୍କାର୍ ଶାକ୍ତିନି କାମାୟ୍ତାଙ୍ଗ୍ ଆରେ ପବିତ୍ର ଆତ୍ମାନି ବର୍ଦାନ୍ ହିଜି ଚଚ୍ଚାତାନ୍ନା। ଖ୍ରୀଷ୍ଟ ଉଦାର୍ କିଦ୍ନାକାନ୍ 5 ଆସେଙ୍ଗ୍ ଇମ୍ଣି ବାବିକିନି ଜଗତ୍ ବିଷୟରେ ବେଣ୍ ୱେଚ୍ନାପା, ହେଦାଙ୍ଗ୍ ଈଶ୍ୱର ଦୁତ୍କୁକାଙ୍ଗ୍ କଣ୍ଟ୍ରୁଲ୍ କିଦେଙ୍ଗ୍ ହିୱାତାନ୍ନା, ମାତର୍ ହିମ୍ଣା ଯୀଶୁ ଖ୍ରୀଷ୍ଟଙ୍ଗ୍ ଅଦିକାର୍ ହିତାନ୍ନା। 6 ଇନେସ୍କି ସାସ୍ତର୍ ଇମ୍ଣି ବାହାତାକେ ଇନେର୍ ରକାନ୍ ଈଶ୍ୱରତିଙ୍ଗ୍ ଇଲେକେ ୱେଚ୍ନାନା, “ଇନେର୍ ମାନାୟ୍, ଯେ ଏପେଙ୍ଗ୍ ହେୱାନିଙ୍ଗ୍ ଚିନ୍ତା କିଜି ମାନାଦେର୍? ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଇନେର୍, ଯେ ଏପେଙ୍ଗ୍ ହେୱାନିଙ୍ଗ୍ ଜାତୁନ୍ ଅଜି ମାନାଦେର୍? 7 ଅଲପ୍ ସମୟ୍ କାଜିଙ୍ଗ୍ ଏପେଙ୍ଗ୍ ହେୱାନିଙ୍ଗ୍ ଦୁତ୍କୁତାଙ୍ଗ୍ ହିରୁ କିତାଦେର୍ନା। ମାତର୍ ଏପେଙ୍ଗ୍ ହେୱାନିଙ୍ଗ୍ ରାଜା ଲେକେ ଗୌରବ ଆରେ ସନ୍ମାନ୍ ହିତାଦେର୍ନା। 8 ଏପେଙ୍ଗ୍ ହେୱାନିଙ୍ଗ୍ ୱିଜୁ ବିଷୟରେ ଅଦିକାର୍ ହିତାଦେର୍ନା।” ଇଦାଙ୍ଗ୍ନି ଅର୍ତ ଯେ ଈଶ୍ୱର ମାନାୟ୍ନି କଣ୍ଟ୍ରୁଲ୍ତାକେ ୱିଜୁ ବିଷୟ ହିତାନ୍ନା। ଇଲେକେ ଇମ୍ଣି ବିଷୟ ହିଲେତ୍, ଇନାକାକି ତା କଣ୍ଟ୍ରୁଲ୍ତାକେ ଆକାୟ୍। ମାତର୍ ଆସେଙ୍ଗ୍ ହୁଡ଼୍ନାସା ଯେ ୱିଜୁ ବିଷୟ ନଙ୍ଗୟ୍ ପାତେକ୍ ମାନାୟାର୍ କଣ୍ଟ୍ରୁଲ୍ତାକେ ହିଲେତ୍। 9 ମାତର୍ ଆସେଙ୍ଗ୍ ଯୀଶୁଙ୍ଗ୍ ହୁଡ଼୍ନାସା! ଈଶ୍ୱର ଦୟାତାଙ୍ଗ୍ ଯୀଶୁ ଇନେସ୍ ୱିଜୁ ମାନାୟାର୍ କାଜିଙ୍ଗ୍ ହାଃନାନ୍, ଇଦାଙ୍ଗ୍ କାଜିଙ୍ଗ୍ ହେୱାନ୍ ଅଲପ୍ ସମୟ୍ କାଜିଙ୍ଗ୍ ଦୁତ୍କୁତାଙ୍ଗ୍ ହିରୁ ଆଜି ମାଚାନ୍। ହେୱାନ୍ ଦୁକ୍କଷ୍ଟ ଆରେ ହାଃତି କାଜିଙ୍ଗ୍, ଈଶ୍ୱର ହେୱାନିଙ୍ଗ୍ ଗୌରବ ଆରେ ସନ୍ମାନ୍ନି ମୁକୁଟ୍ ହିତାନ୍ନା। 10 ଇନେସ୍କି ଈଶ୍ୱର ୱିଜୁ ବିଷୟ ରସ୍ତାନ୍ନା ଆରେ ୱିଜୁ ବିଷୟ ହେୱାନ୍ତି। ହେୱାନ୍ ଇନେସ୍ ବେସିହେନି ମାନାୟାରିଙ୍ଗ୍ ତା ଗୌରବତାକେ ବାଗ୍କିଦେଙ୍ଗ୍ ଆଡ୍ନାନ୍। ଇଦାଙ୍ଗ୍ କାଜିଙ୍ଗ୍ ଈଶ୍ୱର ଲାଗାୟ୍ ଇଦାଙ୍ଗ୍ ନେ ଟିକ୍ ବିଚାର୍ ମାଚାତ୍ ଯେ, ମାପୃ ଯୀଶୁଙ୍ଗ୍ ଦୁକ୍କଷ୍ଟ କିୟିକିଜି ହେୱାନିଙ୍ଗ୍ ପୁରାପୁରି ଟିକ୍ ନେତା କିଦେଙ୍ଗ୍। ଇନେସ୍କି ଯୀଶୁ ନେ ହେୱାରିଙ୍ଗ୍ ଉଦାର୍ ପାୟାଆନି ହାଜ୍ଦିଙ୍ଗ୍ ଅସାହାନାନ୍। 11 ଇମ୍ଣି ମାନାୟ୍ ମାନାୟାର୍ ପାପ୍ ନୁଜ୍ନାନ୍ ଆରେ ଇମ୍ଣି ମାନାୟାର୍ ପାପ୍ ନୁଜିଆ ଆନାତ୍, ହେୱାର୍ ୱିଜାକାର୍ ରକାନ୍ ଆବା ଈଶ୍ୱର ମେହିକାସ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ହେୱାରିଙ୍ଗ୍ ଟଣ୍ଡାର୍ ଇଞ୍ଜି ୱେଚ୍ଚେଙ୍ଗ୍ ଲାଜା ଆଉନ୍। 12 ଲାଗିଙ୍ଗ୍ ଖ୍ରୀଷ୍ଟ ଈଶ୍ୱରତିଙ୍ଗ୍ ୱେଚ୍ନାନ୍, “ଆନେଙ୍ଗ୍ ନା ଟଣ୍ଡାର୍ ଲାଗାୟ୍ନି ତର୍ ୱେଚ୍ନାଙ୍ଗ୍, ହେୱାର୍ ସବାତାକେ ନିଙ୍ଗେଙ୍ଗ୍ ଜୟ୍-ଜୟ୍ କିଜି କେର୍ନାର୍।” 13 “ଆରେ ହେୱାନ୍ ୱେଚ୍ନାନ୍, ଆନେଙ୍ଗ୍ ହେୱାନ୍ତାକେ ନା ପାର୍ତି ଇଟ୍ନାଙ୍ଗ୍।” “ଆରେ ହେୱାନ୍ ୱେଚ୍ନାନ୍, ଏହେଁ ହୁଡ଼ାଟ୍, ଈଶ୍ୱର ନାଙ୍ଗେଙ୍ଗ୍ ହିଜି ମାନ୍ଞ୍ଚି ହିମ୍ଣାର୍ ହୁଦାଙ୍ଗ୍ ଆନେଙ୍ଗ୍ ମାନାଙ୍ଗ୍”। 14 ଇନେସ୍କି ଈଶ୍ୱର ହିମ୍ଣାର୍ ନେତେର୍ ଆରେ ଜେଇନି ମାନାୟାର୍, ଲାଗିଙ୍ଗ୍ ଯୀଶୁ ପା ନିଜେ ମାନାୟ୍ ରୁପ୍ ଆଜି ଜନମ୍ ଆଜି ନେତେର୍ ଜେଇନି ମାନାୟ୍ ଆତାନ୍। ଇନେସ୍କି ହେୱାନ୍ ମାନାୟ୍ ରୁପ୍ ଆତି କାଜିଙ୍ଗ୍ ନେ ହାଃଦେଙ୍ଗ୍ ଆଡ଼୍ତାନ୍, ଆରେ ହାଃତି କାଜିଙ୍ଗ୍ ନେ ହେୱାନ୍ ହାଃନିଲେକେ ମାନି ଆଦିକାର୍ନି ଶାକ୍ତି ଇଡ଼୍ଜି ମାଚି ଶୟତାନନି ଶାକ୍ତିତିଙ୍ଗ୍ ବିନାସ୍ କିଦେଙ୍ଗ୍ ଆଡ଼୍ତାନ୍। 15 ଇଲେକେ ହାଃଦେଙ୍ଗ୍ ପାଣ୍ଡ୍ରାଆଜି ଦାସ୍ ଲେକେ ଗାଚିଆ ଆତି ମାନାୟାରିଙ୍ଗ୍ ଯୀଶୁ ଉଦାର୍ କିତାନ୍। 16 ସତ୍ରେ ଯୀଶୁ ଦୁତ୍କୁକାଙ୍ଗ୍ ଜାତୁନ୍ ଅଦେଙ୍ଗ୍ ୱାୱାଦାଙ୍ଗ୍ ମାଚାନ୍, ମାତର୍ ଅବ୍ରାହାମନି ହିମ୍ଣାକାଙ୍ଗ୍ ଜାତୁନ୍ ଅଦେଙ୍ଗ୍ ୱାଜିମାଚାନ୍। 17 ଲାଗିଙ୍ଗ୍ ଇନେସ୍ ହେୱାନ୍ ଈଶ୍ୱର ଲାଗାୟ୍ ମା କାଜିଙ୍ଗ୍ ଦୟା ଆରେ ବିସ୍ବସ୍ତ ପ୍ରଦାନ୍ ମୁଡ଼୍ଦି ପୁଜାରି ଆଦେଙ୍ଗ୍ ଆଡ୍ନାନ୍। ଆରେ ମା ପାପ୍ତିଙ୍ଗ୍ ଦେହା କିଦେଙ୍ଗ୍ ହେୱାନ୍ ନିଜେ ଇନେସ୍ ବଲିପୁଜା କିଦେଙ୍ଗ୍ ଆଡ୍ନାନ୍, ହେଦାଙ୍ଗ୍ କାଜିଙ୍ଗ୍ ତା ଟଣ୍ଡାହିର୍ ଲେକେ ଯୀଶୁ ପା ୱିଜୁ ବିଷୟରେ ହାମାନ୍ ଆଦେଙ୍ଗ୍ ଦର୍କାର୍ ମାଚାତ୍। 18 ଇନେସ୍କି ହେୱାନ୍ ନିଜେ ପରିକ୍ଷା କିୟାଆଜି ଦୁକ୍କଷ୍ଟ ପାୟାଆଜି ମାଚିଲେ, ପରିକ୍ଷାତାକେ ପଡ଼ାଆତି ମାନାୟାରିଙ୍ଗ୍ ସାଇଜ କିଦେଙ୍ଗ୍ ଆଡ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation