ଏବ୍ରି 13 - New Testament in Pengo Parja Languageଈଶ୍ୱରତିଙ୍ଗ୍ ୱାରିକିନି ବଲିପୁଜା 1 ପାର୍ତିକିନି ଟଣ୍ଡେନ୍ ତଣ୍ଦେକ୍ତି ଲାଡ୍ ଲେକେ ଏପେଙ୍ଗ୍ ଲାଡ୍ତାଙ୍ଗ୍ ମାନାଟ୍। 2 ଏପେଙ୍ଗ୍ ପୁନ୍ୱିତି ପାର୍ତିକିନି ମାନାୟାରିଙ୍ଗ୍ ଗତାଙ୍ଗ୍ଲେକେ ବ୍ଯବହାର୍ କିନାକା ବାଣା ଆମାଟ୍। ଇନେସ୍କି ଇଦାଙ୍ଗ୍ ଗତାଙ୍ଗ୍ଲେକେ ବ୍ୟବହାର୍ କିତି କାଜିଙ୍ଗ୍ କେତେକ୍ ମାନାୟ୍ ସରଗ୍ ଦୁତ୍କୁକାଙ୍ଗ୍ ପା ପୁନ୍ୱାଦାଙ୍ଗ୍ ଗତାଙ୍ଗ୍ଲେକେ ବ୍ୟବହାର୍ କିଦେଙ୍ଗ୍ ଆଡ଼୍ତାର୍ନା। 3 ଯୀଶୁତାକେ ପାର୍ତିକିତି କାଜିଙ୍ଗ୍ ଇମ୍ଣାକାର୍ ଜଇଲ୍ ଇଞ୍ଜ ମାନାର୍, ହେୱାରିଙ୍ଗ୍ ବାଣା ଆମାଟ୍। ହେୱାର୍ ହୁଦାଙ୍ଗ୍ ହେବେ ମାନ୍ଞ୍ଜି ଦୁକ୍କଷ୍ଟ ପାୟାଆନାଦେରା ଇଞ୍ଜି ମାନ୍ତ ବାବିକିଜି ଏପେଙ୍ଗ୍ ପା କଷ୍ଟ ପାୟାଆନାଙ୍ଗା ଇଞ୍ଜି ମାନ୍ତ ବାବି କିୟାଟ୍। ଇମ୍ଣାକାର୍ ଅପ୍ମାନ୍ ପାୟାଆନାର୍, ହେୱାର୍ କଷ୍ଟ ପାୟାଆନାକା ମି ଗାଗାଡ଼୍ତ ପା ବାବି କିୟାଟ୍। 4 ଏପେଙ୍ଗ୍ ବିବାଆନି ଜିବୁନ୍ତିଙ୍ଗ୍ ସନ୍ମାନ୍ କିୟାଟ୍, ଆରେ ଏପେଙ୍ଗ୍ ବିବାଆତି ଜିବୁନ୍ତାକେ ଜାର୍-ଜାର୍ ପବିତ୍ର ଆଜି ମାନାଟ୍। ଇମ୍ଣାକାର୍ ଦାରୁଲା ଆରେ ଜେକନି ମାନାୟାରିଙ୍ଗ୍ ଆଦିକ୍ ଇଚା ଆନାର୍, ହେୱାରିଙ୍ଗ୍ ଈଶ୍ୱର ବିଚାର୍ କିନାନ୍। 5 ଦନ୍ ଲବ୍ରାତାଙ୍ଗ୍ ମି ଜିବୁନ୍ତିଙ୍ଗ୍ ଦେହା ଇଟାଟ୍। ମିଦାଙ୍ଗ୍ ଇନାକା ମାନାତ୍, ହେବେତାଙ୍ଗ୍ ୱାରିଆଜି ମାନାଟ୍। ଇନେସ୍କି ଈଶ୍ୱର ନିଜେ ୱେଚ୍ଚାତାନ୍ନା, “ଆପେଙ୍ଗ୍ ମିଙ୍ଗେଙ୍ଗ୍ ଇନାୱେଡ଼ାଙ୍ଗ୍ ପା ପିସ୍ତୁପ୍, ଆପେଙ୍ଗ୍ ମିଙ୍ଗେଙ୍ଗ୍ ଅଲପ୍ପା ପିସ୍ତୁଙ୍ଗ୍”। 6 ହେବେତାଙ୍ଗ୍ ଆସେଙ୍ଗ୍ ସାହାସ୍ ହୁଦାଙ୍ଗ୍ ୱେଚ୍ଚେଙ୍ଗ୍ ଆଡ୍ନାସ୍, “ମାପୃ ନାଙ୍ଗେଙ୍ଗ୍ ସାଇଜ କିଦ୍ନାକାନ୍, ଆନେଙ୍ଗ୍ ପାଣ୍ଡ୍ରା ଆଉଙ୍ଗ୍। ମାନାୟ୍ ନାଙ୍ଗେଙ୍ଗ୍ ଇନାକା କିଦ୍ନାର୍?” 7 ଇମ୍ଣାକାର୍ ମିଙ୍ଗେଙ୍ଗ୍ ଈଶ୍ୱର କାତା ୱେଚ୍ଚି ମାନ୍ଞ୍ଚାର୍, ହେ ନେତାରିଙ୍ଗ୍ ମାନ୍ତ ଏତୁକିୟାଟ୍। ହେୱାର୍ ଜିବୁନ୍ତାକେ ମାନି ହାର୍ଦି ଗୁଣ୍ ବିଷୟରେ ଚିନ୍ତା କିୟାଟ୍ ଆରେ ହେୱାର୍ ୱେଚ୍ଚିତି ଲେକେ ମାପୃତାକେ ପାର୍ତିକିୟାଟ୍। 8 ଯୀଶୁ ଖ୍ରୀଷ୍ଟ ୱିଗା, ନେଞ୍ଜେଙ୍ଗ୍ ଆରେ ୱିଜ୍ୱିଦିନ୍ ପାତେକ୍ ହାମାନ୍ ମାନ୍ଗାନାନ୍। 9 ଲାଗିଙ୍ଗ୍ ଏପେଙ୍ଗ୍ ପୁନ୍ୱିତି ପୁନି ହିକ୍ଷାତିଙ୍ଗ୍ ୱେଞ୍ଜେଙ୍ଗ୍ ଇଚା କିମାଟ୍। ଇନେସ୍କି ମି ଆତ୍ମିକ୍ ଜିବୁନ୍ ଈଶ୍ୱର ଦୟାତାଙ୍ଗ୍ ଶାକ୍ତି ଆନାତା, ତିନାକା ଉଣାକା ନିତି ନିୟମ୍ ମାନିକିତି କାଜିଙ୍ଗ୍ ଆକାୟ୍। ଇମ୍ଣାକାର୍ ହେ ନିୟମ୍ ମାନି କିନାରା, ହେଦାଙ୍ଗ୍ ଇନା ଲାବ୍ ଆଉତ୍। 10 ପୁର୍ତିନି ପୁଟ୍ କୁଡ଼ିଆତାକେ ହେବାକିନି ପୁଜାରିର୍ ଇମ୍ଣି ଦେବିନି ଜିନିଷ୍ ତିନି କାଜିଙ୍ଗ୍ ଆଦିକାର୍ ଆକାୟ୍, ମାଙ୍ଗେଙ୍ଗ୍ ପା ଇ ଲେଗ୍ଦି ରଞ୍ଜାଙ୍ଗ୍ ଦେବି ମାନାତ୍। 11 ଯିହୁଦିର୍ ନିୟମ୍ ଅନ୍ସାରେ, ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି। ପାପ୍ନି କେମା କାଜିଙ୍ଗ୍ ପଶୁନି ନେତେର୍ ମନ୍ଦିର୍ନି ବେସି ପବିତ୍ର ବାହାତାକେ ଅନାନ୍, ମାତର୍ ପଶୁନି ଗାଗାଡ଼୍ତିଙ୍ଗ୍ ମାନାୟାର୍ ମାନି ବାର୍ବାହାତାକେ କାଡିକିନାର୍। 12 ଇଦାଙ୍ଗ୍ କାଜିଙ୍ଗ୍ ଯୀଶୁ ପା ଜାର୍ ନେତେର୍ତାଙ୍ଗ୍ ମାନାୟାରିଙ୍ଗ୍ ପବିତ୍ର କିନି କାଜିଙ୍ଗ୍ ଯିରୁଶାଲାମ ସହର୍ ବାର୍ତ କଷ୍ଟ ପାୟାଆଜି ହାଃତାନ୍। 13 ଲାଗିଙ୍ଗ୍ ଆସେଙ୍ଗ୍ କୁଡ଼ିଆତାଙ୍ଗ୍ ବାର୍ତ ୱାଜି ତା ଲାଗାୟ୍ ହାନାସ୍ ଆରେ ତା ଲେକେ ନିନ୍ଦାତିଙ୍ଗ୍ ସମ୍ୱାଲିକିନି ଦର୍କାର୍। 14 ଇନେସ୍କି ଇ ପୁର୍ତିତାକେ ମା କାଜିଙ୍ଗ୍ ୱିଜୁଦିନ୍ ମାନି ଇଲ୍ ଆକାୟ୍, ମାତର୍ ସରଗ୍ତାକେ ମାନି ମା ସହର୍ତିଙ୍ଗ୍ ଆପେଙ୍ଗ୍ ଡେକ୍ନାପା, ହେ ସହର୍ ୱାନାକା ମାନାତ୍। 15 ଲାଗିଙ୍ଗ୍ ଯୀଶୁ ସାଇଜତାଙ୍ଗ୍, ଈଶ୍ୱର ତର୍ଦିଙ୍ଗ୍ ଗୌରବ କିଜି ମା ଜୟ୍-ଜୟ୍ନି ବଲିପୁଜା ହେୱାନିଙ୍ଗ୍ ୱିଜୁଦିନ୍ ହିନି ଦର୍କାର୍। 16 ହାର୍ଦି କାମାୟ୍ କିନାସ୍ ଆରେ ନାସ୍କିନି ମାନାୟାରିଙ୍ଗ୍ ଦାନ୍ କିନାକା ଏପେଙ୍ଗ୍ ବାଣା ଆମାଟ୍। ଇନେସ୍କି ଇଲେକେ ବିଲିପୁଜାତିଙ୍ଗ୍ ଈଶ୍ୱର ବେସି ୱାରି ଆନାନ୍। 17 ମି ଆତ୍ମିକ୍ ନେତାରିଙ୍ଗ୍ ମାନି କିୟାଟ୍ ଆରେ ହେୱାର୍ ଇନାକା ୱେଚ୍ଚାନାର୍ ହେଦାଙ୍ଗ୍ କିୟାଟ୍। ହେୱାର୍ କାମାୟ୍ ଆନାତା ମିଙ୍ଗେଙ୍ଗ୍ ଜାତୁନ୍ ଆନି କାଜିଙ୍ଗ୍ ଆରେ ହେୱାର୍ ଈଶ୍ୱର ଲାଗାୟ୍ ଇଲେକେ ହିଦେଙ୍ଗ୍ ଆନାତ୍ ଇଞ୍ଜି ହେୱାର୍ ପୁନାର୍। ହେୱାରିଙ୍ଗ୍ ଇଦାଙ୍ଗ୍ ୱାରିତାଙ୍ଗ୍ କିଦେଙ୍ଗ୍ ହିୟାଟ୍। ଇନେସ୍କି ହେୱାର୍ ଦୁକ୍ତାଙ୍ଗ୍ କିତାର୍, ମିଦାଙ୍ଗ୍ ଇନା ଲାବ୍ ଆଉତ୍। 18 ମା କାଜିଙ୍ଗ୍ ପାର୍ତାନା କିୟାଟ୍। ଇନେସ୍କି ମା ଆହା ମାନାତ୍ ଯେ, ମାଙ୍ଗେଙ୍ଗ୍ ହାର୍ଦି ବୁଦି ମାନାତ୍, ଆରେ ଆସେଙ୍ଗ୍ ସନ୍ମାନ୍ ହୁଦାଙ୍ଗ୍ ୱିଜୁକିଜି ଜିନି କାଜିଙ୍ଗ୍ ଇଚା କିନାସା। 19 ଆରେ ଆନେଙ୍ଗ୍ ଇନେସ୍ ବେଗି ମି ଲାଗାୟ୍ ୱାଦେଙ୍ଗ୍ ଆଡ୍ନାଙ୍ଗ୍, ଇଦାଙ୍ଗ୍ କାଜିଙ୍ଗ୍ ପାର୍ତାନା କିଦେଙ୍ଗ୍ ମିଙ୍ଗେଙ୍ଗ୍ ବିଷେସ୍କିଜି ଗୁୱାରି କିଦ୍ନାଙ୍ଗା। 20-21 ଇମ୍ଣି ଶାନ୍ତି ହିଦ୍ନି ଈଶ୍ୱର ମା ମାପୃ ଯୀଶୁଙ୍ଗ୍ ହାଃତାକାର୍ ବିତ୍ରେତାଙ୍ଗ୍ ନିକ୍ଚି ତାତାନ୍ନା, ହେୱାନ୍ ତା ଇଚା ପୁରା କିଦେଙ୍ଗ୍ ମିଙ୍ଗେଙ୍ଗ୍ ରେଡି କିଦେନ୍। ଯୀଶୁ ଖ୍ରୀଷ୍ଟତି ଶାକ୍ତିତାଙ୍ଗ୍ ଈଶ୍ୱରତିଙ୍ଗ୍ ୱାରି କିତିଲେକେ ଜିବୁନ୍ ହେୱାନ୍ ମିତାକେ ରେଡି କିଦେନ୍। ୱିଜୁଦିନ୍ ମାନି ପାର୍ମାଣ୍ତିଙ୍ଗ୍ ଯୀଶୁ ଖ୍ରୀଷ୍ଟ ତା ନେତେର୍ତାଙ୍ଗ୍ ସାଇନ୍ କିଜି, ମେଣ୍ଢାକାଙ୍ଗ୍ ହାରାଇକିନି ମୁଡ଼୍ଦାକାନ୍ ଆତାନ୍ନା। ଯୁଗ୍-ଯୁଗ୍ ହେୱାନ୍ତି ଗୌରବ ଆୟେତ୍, ଆମେନ୍। ସେସ୍ ଜୱାର୍ 22 ଏ ପାର୍ତିକିନି ଟଣ୍ଡାର୍କାଦେର୍, ଇ ହିରୁ ଚିଟିତାକେ ଆନେଙ୍ଗ୍ ମିଙ୍ଗେଙ୍ଗ୍ ଇନାକା ଲେକିକିତାଙ୍ଗ୍ନା, ଦୟାକିଜି ସାହାସ୍ ହୁଦାଙ୍ଗ୍ ୱେନାଟ୍। 23 ମା ଟଣ୍ଡେନ୍ ତିମତି ଜଇଲ୍ ଇଞ୍ଜାଙ୍ଗ୍ ମୁକ୍ତି ଆତାନ୍ନା। ଯଦି ହେୱାନ୍ ଇବେ ବେଗି ୱାନାନ୍, ଲାଗିଙ୍ଗ୍ ତା ହୁଦାଙ୍ଗ୍ ଆନେଙ୍ଗ୍ ମିହୁଦାଙ୍ଗ୍ ମାହାଆନି କାଜିଙ୍ଗ୍ ୱାନାଙ୍ଗ୍। 24 ହେବେ ମାନି ମି ୱିଜାକାର୍ ନେତା ଆରେ ପାର୍ତି କିନାକାରିଙ୍ଗ୍ ନା ଜୱାର୍ କିନାକା ୱେଚାଟ୍। ଇତାଲିଆ ଦେସ୍ତାଙ୍ଗ୍ ୱାଜିମାନି ପାର୍ତି କିନାକାର୍ ମିଙ୍ଗେଙ୍ଗ୍ ଜୱାର୍ କିଦ୍ନାରା। 25 ଈଶ୍ୱରତି ଦୟା ମିହୁଦାଙ୍ଗ୍ ମାନେତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation