ଏବ୍ରି 12 - New Testament in Pengo Parja Languageଈଶ୍ୱର ସାସନ୍ କିଦ୍ନାକା ମା କାଜିଙ୍ଗ୍ ଟିକ୍ 1 ଏ ପାର୍ତିକିନି ମାନାୟ୍ କାଦେର୍, ହେୱାର୍ ଜିବୁନ୍ କାତାତାଙ୍ଗ୍ ପାର୍ତିନି ଅର୍ତ ଇନାକା ୱେଚ୍ନାର୍। ଇ ମାନାୟାର୍ ମା ଚାରିବେଣ୍ତାଙ୍ଗ୍ ସାକି ଲେକେ ଆଜି ମାନାରା। ଲାଗିଙ୍ଗ୍ ମାଙ୍ଗେଙ୍ଗ୍ ବେସି ସହଜ୍ରେ ବାଦାକିନି ପାପ୍ତିଙ୍ଗ୍ ନଙ୍ଗୟ୍ ୱିଜୁ ବିଷୟତିଙ୍ଗ୍ ଦେହାକିନି ଦର୍କାର୍। ଆରେ ଈଶ୍ୱର ମା କାଜିଙ୍ଗ୍ ଇମ୍ଣି ହାଜି ଇଡ଼୍ତାନ୍ନା, ହେବେ ସାହାସ୍ ହୁଦାଙ୍ଗ୍ ହନ୍ନି ଦର୍କାର୍। 2 ଯୀଶୁତାକେ ମା ଟାର୍ଗେଟ୍ ଇଡ଼୍ଜି ଇଦାଙ୍ଗ୍ କିନି ଦର୍କାର୍, ଇନେସ୍କି ହେୱାନ୍ ମା ପାର୍ତିନି ପୁରାପୁରି ଟିକ୍ ନେତା। କୃଶକାଟ୍ ଜପି ଲାଜା ପାୟାଆଜି ହାଃଦେଙ୍ଗ୍ ଯୀଶୁ ଇଚା କିତାନ୍, ଇନେସ୍କି ହେୱାନ୍ ପୁନ୍ଞ୍ଜି ମାଚାନ୍ ଯେ ଇଦାଙ୍ଗ୍ ପାଚେ ୱାରି ମାନାତ୍। ଲାଗିଙ୍ଗ୍ ନଙ୍ଗୟ୍ ହେୱାନ୍ ଈଶ୍ୱର ତିନାକେଇନି ବେସି ଗୌରବ ପାୟାଆନି ବାହାତାକେ କୁଚ୍ଚାନ୍ନା। 3 ଯୀଶୁ ବିଷୟରେ ଚିନ୍ତା କିଜି ହୁଡ଼ାଟ୍, ଏଚେପାଦ୍ନା ପାପି ମାନାୟାର୍ ହେୱାନିଙ୍ଗ୍ ବେସି କଷ୍ଟ ହିଜି ମାଚାର୍, ହେୱାନ୍ ସାହାସ୍ ଆସ୍ତି ମାଚାନ୍। ଲାଗିଙ୍ଗ୍ ଏପେଙ୍ଗ୍ ଇମ୍ଣି ବିଷୟରେ ଚିନ୍ତା କିୱାଦାଙ୍ଗ୍ ସାହାସ୍ ଆସ୍ତି ମାନାଟ୍। 4 ଏପେଙ୍ଗ୍ ପାପ୍ ବିରଦ୍ତାକେ ଯୁଜ୍ କିଜି, ଏପେଙ୍ଗ୍ ହାଃନି ପାତେକ୍ ଯୁଜ୍ କିୱାତାଦେର୍ନା। 5 ଈଶ୍ୱର ତା ମେହି ଲେକେ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚି କାତାତିଙ୍ଗ୍ ପୁରା ବାଣା ଆତାଦେର୍ନା। ହେୱାନ୍ ୱେଚ୍ଚାନ୍, “ଏ ନା ମାଜି, ମାପୃ ସାସନ୍ କିନିହିଙ୍ଗ୍ ମାନ୍ଦିୟାନ୍ ହିୟାଟ୍, ଆରେ ହେୱାନ୍ ମିଙ୍ଗେଙ୍ଗ୍ ଟିକ୍ କିଦ୍ନିହିଙ୍ଗ୍ ୱାହ୍ମାଟ୍, 6 ଇନେସ୍କି ମାପୃ ଇନେରିଙ୍ଗ୍ ଲାଡ୍ କିନାନ୍। ହେୱାନିଙ୍ଗ୍ ସାସନ୍ କିନାନ୍, ଆରେ ହେୱାନ୍ ଇନେରିଙ୍ଗ୍ ହିମ୍ଣାଇଞ୍ଜି ଆହ୍ନାନ୍, ହେୱାନିଙ୍ଗ୍ ହେୱାନ୍ ସାସ୍ତି ହିନାନ୍।” 7 ଈଶ୍ୱର କିଦ୍ନି ଇ ସାସନ୍ ଏପେଙ୍ଗ୍ ସମ୍ୱାଲି କିନିହିଙ୍ଗ୍ ମାନ୍ତ ଇଟାଟ୍ ଯେ ଈଶ୍ୱର ମିଙ୍ଗେଙ୍ଗ୍ ତା ଜାର୍ ହିମ୍ଣା ଲେକେ ବ୍ଯବହାର୍ କିଦ୍ନାନା। ଇଲେକେ ଇମ୍ଣି ହିମ୍ଣା ମାନାନ୍ ଯେ ଇନାୱେଡ଼ାଙ୍ଗ୍ ତା ଆବାତାଙ୍ଗ୍ ସାସନ୍ ପାୟାଆୱାତାନ୍ନା? 8 ଈଶ୍ୱର ତା ହିମ୍ଣାରିଙ୍ଗ୍ ସାସନ୍ କିତିଲେକେ ମିଙ୍ଗେଙ୍ଗ୍ ଯଦି ହେୱାନ୍ ସାସନ୍ କିଦୁନ୍, ଲାଗିଙ୍ଗ୍ ଏପେଙ୍ଗ୍ ତା ସତ୍ ହିମ୍ଣା ଆକାୟ୍ ଆରେ ଏପେଙ୍ଗ୍ ତା ମେହି କାଦେର୍ ଆକାୟ୍। 9 ଇ ପୁର୍ତିତାକେ ମାନି ଆବାରିଙ୍ଗ୍ ଆସେଙ୍ଗ୍ ସନ୍ମାନ୍ କିଜି ମାନାସ୍, ଇମ୍ଣାକାର୍ ମାଙ୍ଗେଙ୍ଗ୍ ସାସନ୍ କିଦ୍ନାର୍। ଲାଗିଙ୍ଗ୍ ସରଗ୍ତାକେ ମାନି ଆବାନି ସାସନ୍ତିଙ୍ଗ୍ ସନ୍ମାନ୍ କିଜି ୱିଜ୍ୱିଦିନ୍ ପାତେକ୍ ଜିନି ଦର୍କାର୍। 10 ମା ଇ ପୁର୍ତିନି ଆବାର୍ ଇନାକା ହାର୍ ଇଞ୍ଜି ପୁଚାର୍ନା, ହେ ହିସାବ୍ରେ ହେୱାର୍ ଅଲପ୍ ସମୟ୍ କାଜିଙ୍ଗ୍ ମାଙ୍ଗେଙ୍ଗ୍ ସାସନ୍ କିଦ୍ନାର୍। ମାତର୍ ଈଶ୍ୱର ଇନେସ୍ ପବିତ୍ର, ହେଲେକେ ଆସେଙ୍ଗ୍ ପବିତ୍ର ଆନି କାଜିଙ୍ଗ୍, ଈଶ୍ୱର ସାସନ୍ ୱିଜୁଦିନ୍ ଟିକ୍ ଆରେ ମା କାଜିଙ୍ଗ୍ ହେଦାଙ୍ଗ୍ ହାର୍। 11 ନଙ୍ଗୟ୍ ସାସନ୍ ପାୟାଆନିହିଙ୍ଗ୍ ଇନେର୍ ପା ୱାରିନି ବିଷୟ ଇଞ୍ଜି ବାବି କିୱାଦାଙ୍ଗ୍ ଦୁକ୍ତି ବିଷୟ ଇଞ୍ଜି ବାବିକିଜି ମାନ୍ଗାନାର୍। ମାତର୍ ଇମ୍ଣାକାର୍ ସାସନ୍ ପାୟାଆନାର୍, ହେୱାର୍ ଶାନ୍ତି ଆରେ ଟିକ୍ତାକେ ଜିନି ଜିବୁନ୍ନି ହିକ୍ଷା ପାୟାଆନାର୍। 12 ଲାଗିଙ୍ଗ୍ ଏପେଙ୍ଗ୍ ଦୁର୍ବଲ୍ କେଇଦିଙ୍ଗ୍ ବାଡ଼୍କାସ୍ କିୟାଟ୍ ଆରେ ତ୍ରିଗ୍ନି କାଲ୍ଦାଙ୍ଗ୍ ଗୁମ୍ଜି ନିଲାଟ୍। 13 ମି କାଲ୍ପାନା କାଜିଙ୍ଗ୍ ସିଦା ହାଜି ରହାଟ୍। ଲାଗିଙ୍ଗ୍ ମି ପାଚେ ୱାନି ଦୁର୍ବଲ୍ ଆରେ ଚଟା ମାନାୟାର୍ ଅଡ଼୍ଜା ଆଜି ଗୁରୁର୍, ମାତର୍ ହେୱାର୍ ଷ୍ଟ୍ରଙ୍ଗ୍ ଆନାର୍। ଈଶ୍ୱର ଆଦେସ୍ ମାନିକିନି ଦର୍କାର୍ 14 ୱିଜାକାର୍ ହୁଦାଙ୍ଗ୍ ଶାନ୍ତିରେ ମାଞ୍ଜେଙ୍ଗ୍ ଆରେ ପବିତ୍ର ଜିବୁନ୍ କାଟି କିଦେଙ୍ଗ୍ ଉପାୟ୍ କିୟାଟ୍। ଇନେସ୍କି ଇମ୍ଣାକାର୍ ପବିତ୍ର ଆକାୟ୍ ହେୱାର୍ ମାପୃଙ୍ଗ୍ ହୁଡ଼୍ଦେଙ୍ଗ୍ ଆଡୁର୍। 15 ଇନେସ୍ ଇନେର୍ ଈଶ୍ୱର ଦୟାତାଙ୍ଗ୍ ଜିୱାତାର୍ନା, ହେଦାଙ୍ଗ୍ କାଜିଙ୍ଗ୍ ଜାର୍-ଜାର୍ ସାଇଜ କିବା ଆଡ। ମି ବିତ୍ରେ ଇନେସ୍ ଇମ୍ଣି ଅବିସ୍ବାସ୍ନି କେନି ମାର୍ତି ଚିରାଙ୍ଗ୍ ଉବ୍ଜା ଆଉତ୍, ହେଦାଙ୍ଗ୍ କାଜିଙ୍ଗ୍ ଜାଗ୍ରତ୍ ଆଜି ମାନାଟ୍। ଇନେସ୍କି ଇଦାଙ୍ଗ୍ ଇନାୱେଡ଼ାଙ୍ଗ୍ ଉବ୍ଜା ଆନାତ୍, କେତେକ୍ ମାନାୟ୍ ଇ ବିଷୟତାଙ୍ଗ୍ କରାପ୍ ଆନାର୍। 16 ମି ବିତ୍ରେ ଇନେର୍ ଦାରି କି ଏଷୌ ଲେକେ ଅଦରମ୍ ମାନ୍ମେର୍। ଇନେସ୍କି ର ସମୟ୍ନି କାଦି କାଜିଙ୍ଗ୍ ଏଷୌ, ତା ଗାଜା ହିମ୍ଣା ପାୟାଆନି ଆଦିକାର୍ତିଙ୍ଗ୍ ଇନସ୍ତାକିଜି ପସି ମାଚାନ୍। 17 ତାପାଚେ ଲାତ୍ରାହିତାଙ୍ଗ୍ ଏଷୌ ଆଶ୍ରିବାଦ୍ ପାୟା ଆଦେଙ୍ଗ୍ ଇଚା କିଜି ମାଚାନ୍, ମାତର୍ ହେୱାନ୍ ପାୟା ଆଦେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ହେୱାନ୍ ବାବିକିଜି ବେସି ଆଡ଼୍ବିତି ପାଚେ ପା ହେୱାନ୍ ଆରେ ସୁଯଗ୍ ପାୟାଆୱାତାନ୍। 18 ସିନୟ ମାଡ଼ିତାକେ ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ତା ନିୟମ୍ ହିନି ଲେକେ, ଏପେଙ୍ଗ୍ ହୁଡ଼୍ନି ମାଡ଼ି ଆରେ କାଚାଆନି ନାଣି ଲାଗାୟ୍, ମାଜ୍ଗା ବାଦାଡ଼୍, ମାଜ୍ଗା, ଗୁର୍ନି ବାତ୍ଯା ଲାଗାୟ୍ ୱାୱାତାଦେର୍ନା। 19 ଇନେସ୍କି ଇସ୍ରାଏଲନି ମାନାୟାର୍ ର ମରିନି ସବଦ୍ ଆରେ ଈଶ୍ୱର କାତା ୱେନ୍ଞ୍ଜି ପାଣ୍ଡ୍ରା ଆତାର୍। ଆରେ ହେୱାର୍ ଈଶ୍ୱରତିଙ୍ଗ୍ ଆରେ ବେଣ୍ କିୱି କାଜିଙ୍ଗ୍ ଗୁୱାରି କିତାର୍। 20 ଇନେସ୍କି ଈଶ୍ୱରତି ଇ ଆଦେସ୍ କାଜିଙ୍ଗ୍ ହେୱାର୍ ପାଣ୍ଡ୍ରା ଆତାର୍, “ଯଦି ଇମ୍ଣି ପଶୁ ପା ଇ ମାଡ଼ି ଆସ୍ପାନାତ୍, ଲାଗିଙ୍ଗ୍ ହେ ପଶୁ କାଲ୍କୁ ହୁଦାଙ୍ଗ୍ ମାଡ୍ ତିନ୍ଜି ହାଃନାତ୍।” 21 ହେ ମାଡ଼ିତାକେ ଗଟାଆନି ବିଷୟ ମୋଶା ହୁଡ଼୍ଜି ନିଜେ ପା ୱେଚ୍ଚାନ୍, “ନାଙ୍ଗେଙ୍ଗ୍ ବେସି ପାଣ୍ଡ୍ରୁ ହତ୍ନାତା ଆରେ ଆନେଙ୍ଗ୍ ତ୍ରିଗ୍ନାଙ୍ଗା।” 22 ମାତର୍ ଏପେଙ୍ଗ୍ ସିୟୋନ ମାଡ଼ି ଆରେ ସରଗ୍ତାକେ ମାନି ଯିରୁଶାଲାମ ସହର୍ତାକେ ୱାତାଦେର୍ନା। ହେଦାଙ୍ଗ୍ ଜିବୁନ୍ ମାନି ଈଶ୍ୱର ସହର୍ ଆରେ ହେବେ ହାଜାର୍-ହାଜାର୍ ଦୁତ୍କୁ ୱାରିନି ପାର୍ବୁ ମାନିକିନିକ୍। 23 ସରଗ୍ତାକେ ଲେକାଆତି ଈଶ୍ୱରତି ପାର୍ତୁମ୍ ଜନମ୍ ଆତି ମଣ୍ଡ୍ଲି ଲାଗାୟ୍ ୱାତାଦେର୍ନା। ସରଗ୍ତାକେ ହେୱାର୍ ଆତ୍ମାନି ଦରମ୍ ମାନାୟ୍ ଆରେ ହେୱାର୍ ନଙ୍ଗୟ୍ ପୁରା ଟିକ୍ ଆତାର୍ନା, ଆରେ ଏପେଙ୍ଗ୍ ହେୱାର୍ ଲାଗାୟ୍ ୱାତାଦେର୍ନା। ୱିଜାକାରିଙ୍ଗ୍ ବିଚାର୍ କିଦ୍ନି ଈଶ୍ୱର ଲାଗାୟ୍ ଏପେଙ୍ଗ୍ ୱାତାଦେର୍ନା। 24 ଏପେଙ୍ଗ୍ ଯୀଶୁ ଲାଗାୟ୍ ୱାତାଦେର୍ନା, ହେୱାନ୍ ଈଶ୍ୱର ଆରେ ମାନାୟ୍ବିତ୍ରେ ମାନି ପୁନି ପାର୍ମାଣ୍ନି ମାଦିଆଜି କାମାୟ୍ କିନାକାନ୍। ବାଦ୍ଲା ଅନି କାଜିଙ୍ଗ୍ କୁକ୍ନି ହେବଲନି ନେତେର୍ ବାଦୁଲ୍ କେମା ହିନି କାତା ୱେଚ୍ନି ଖ୍ରୀଷ୍ଟତି ତିର୍ତି ନେତେର୍ ଲାଗାୟ୍ ଏପେଙ୍ଗ୍ ୱାତାଦେର୍ନା। 25 ଜାଗ୍ରତ୍ ଆଜି ମାନାଟ୍, ଇମ୍ଣି ଈଶ୍ୱର ମିହୁଦାଙ୍ଗ୍ ବେଣ୍ କିଦ୍ନାନା, ତା କାତା ଏପେଙ୍ଗ୍ ମାନି କିୟାଟ୍। ଇନେସ୍କି ଇ ପୁର୍ତିତାକେ ମୋଶା ଇସ୍ରାଏଲନି ମାନାୟାରିଙ୍ଗ୍ ଆଦେସ୍ ହିତାନ୍, ଆରେ ହେୱାର୍ ଅମାନ୍ୟା ଆତି କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ହିଜି ମାଚାନ୍। ସରଗ୍ତାଙ୍ଗ୍ ୱେଚ୍ଚିନି ଈଶ୍ୱର ଆଦେସ୍ତିଙ୍ଗ୍ ଯଦି ଆସେଙ୍ଗ୍ ଅମାନ୍ୟା କିନାସ୍, ଲାଗିଙ୍ଗ୍ ସତ୍ରେ ଆସେଙ୍ଗ୍ ଆଦିକ୍ ଦଣ୍ଡ୍ ପାୟାଆନାସ୍। 26 ଏଚେପାଦ୍ନା ଈଶ୍ୱର ସିୟୋନ ମାଡ଼ିତାଙ୍ଗ୍ ବେଣ୍କିତାନ୍, ତା କାଟ୍ ପୁର୍ତିତିଙ୍ଗ୍ ଜଲାଇ କିତାତ୍। ମାତର୍ ନଙ୍ଗୟ୍ ହେୱାନ୍ ଆରେ ର ପାର୍ମାଣ୍ କିତାନ୍ନା, “ଆନେଙ୍ଗ୍ ଆରେରଗ ଆପ୍କା ପୁର୍ତିତିଙ୍ଗ୍ କମ୍ପାୟ୍ କିଉଙ୍ଗ୍, ହେଦାଙ୍ଗ୍ ଆକାୟ୍, ମାତର୍ ବାଦାଡ଼୍ତିଙ୍ଗ୍ ପା କମ୍ପାୟ୍ କିନାଙ୍ଗ୍।” 27 ଇଦାଙ୍ଗ୍ନି ଅର୍ତ ଯେ ୱିଜ୍ୱିଦିନ୍ ପାତେକ୍ ମାନି ଜିନିଷ୍ ଇନେସ୍ ଇଡ଼୍ଦେଙ୍ଗ୍ ଆନାତ୍, ଇଦାଙ୍ଗ୍ କାଜିଙ୍ଗ୍ ପୁର୍ତିତାକେ ରହିୟାଆତି ୱିଜୁ ଜିନିଷ୍ କମ୍ପାୟ୍ କିଜି ଦେହା କିୟାଆନାତ୍। 28 ଆସେଙ୍ଗ୍ ଇମ୍ଣି ରାଜି ପାୟା ଆଦେଙ୍ଗ୍ ହାନାସା, ହେଦାଙ୍ଗ୍ କମ୍ପାୟ୍ କିଦେଙ୍ଗ୍ ଆଡି ଆଉତ୍। ଲାଗିଙ୍ଗ୍ ପାଣ୍ଡ୍ରୁ ଆରେ ବକ୍ତି ହୁଦାଙ୍ଗ୍ ଈଶ୍ୱରତିଙ୍ଗ୍ ପୁଜାକିଜି ହେୱାନିଙ୍ଗ୍ ୱାରି କିୟିକିନି ଦର୍କାର୍। 29 ଇନେସ୍କି ମା ଈଶ୍ୱର ନଷ୍ଟ କିଦ୍ନି ନାଣି ଲେକେ। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation