ଏବ୍ରି 11 - New Testament in Pengo Parja Languageପାର୍ତିତାଙ୍ଗ୍ ମାନି ମାନାୟାର୍ 1 ଇନାକା ଗଟାଆନାତ୍ ଇଞ୍ଜି ଆସେଙ୍ଗ୍ ଆହା କିନାସା, ହେ ଷ୍ଟ୍ରଙ୍ଗ୍ ଆହାତିଙ୍ଗ୍ ପାର୍ତି ୱେଚ୍ନାର୍। ଆରେ ଇନାକା ଆସେଙ୍ଗ୍ ହୁଡ଼୍ୱାତାସ୍ନା, ହେ ବିଷୟତିଙ୍ଗ୍ ଇଦାଙ୍ଗ୍ ସତ୍ ଇଞ୍ଜି ପାର୍ମାଣ୍ କିନାତ୍। 2 ମା ଆକଦାଦିର୍ ଇ ଲେକେ ପାର୍ତି ମାଚାତ୍। ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାର୍ତାକେ ୱାରିଆଜି ମାଚାନ୍। 3 ପାର୍ତିତାଙ୍ଗ୍ ଆସେଙ୍ଗ୍ ପୁନାସ୍ ଯେ, ଈଶ୍ୱର କାତାତାଙ୍ଗ୍ ପୁରା ପୁର୍ତି ରହିଆତାତ୍ନା। ନଙ୍ଗୟ୍ ଇନାକା ଆସେଙ୍ଗ୍ ହୁଡ଼୍ନାସା ହେଦାଙ୍ଗ୍ ଇନେର୍ ଇନାୱେଡ଼ାଙ୍ଗ୍ ହୁଡ଼୍ୱିତି ବିଷୟତାଙ୍ଗ୍ ଈଶ୍ୱର ରସ୍ତାନ୍ନା। 4 ପାର୍ତି କାଜିଙ୍ଗ୍ ଆଦମ ମେହି ହେବଲ ତା ଗାଜା ଟଣ୍ଡାହି କୟିନ ବାଦୁଲ୍ ହାର୍ଦି ବଲିପୁଜା ଈଶ୍ୱର ଲାଗାୟ୍ ତାହିୱାଜି ମାଚାନ୍। ହେ ବଲିପୁଜା କାଜିଙ୍ଗ୍ ଈଶ୍ୱର ହେବଲତିଙ୍ଗ୍ ଦରମ୍ ମାନାୟ୍ ଇଞ୍ଜି ସାକି ହିତାନ୍, ଇନେସ୍କି ଈଶ୍ୱର ତା ବଲିପୁଜାତାଙ୍ଗ୍ ୱାରିଆଜି ମାଚାନ୍। ହେବଲ ହାଃତି ପାଚେ ପା ହେୱାନ୍ତାଙ୍ଗ୍ ଆସେଙ୍ଗ୍ ହିକା ଆନାସା ଯେ ଈଶ୍ୱରତାକେ ଇନେସ୍ ପାର୍ତି କିଦେଙ୍ଗ୍ ଆନାତ୍। 5 ହନୋକ ପାର୍ତିକିତି କାଜିଙ୍ଗ୍, ଈଶ୍ୱର ହେୱାନିଙ୍ଗ୍ ଜିବୁନ୍ ମାନୁ-ମାନୁ ସରଗ୍ଜପି ଅତାନ୍। ହେଦାଙ୍ଗ୍ କାଜିଙ୍ଗ୍ ତା ହାଃତି ଗାଗାଡ଼୍ତିଙ୍ଗ୍ ଇନେର୍ ଆରେ ଗାଟା ଆୱାତାର୍। ଈଶ୍ୱର ହନୋକଙ୍ଗ୍ ସରଗ୍ଜପି ଅସାହାନି ଆଗେ, ତା ବିଷୟରେ ସାକି ହିଜି ୱେଚ୍ଚାନ୍ ଯେ ହନୋକ ହେୱାନିଙ୍ଗ୍ ୱାରି କିଜି ମାଚାନ୍। 6 ଲାଗିଙ୍ଗ୍ ଈଶ୍ୱରତାକେ ପାର୍ତି କିତିସ୍ ନେ, ଆସେଙ୍ଗ୍ ଈଶ୍ୱରତିଙ୍ଗ୍ ୱାରି କିଦେଙ୍ଗ୍ ଆଡ୍ନାସ୍। ଇନେସ୍କି ଇମ୍ଣାକାର୍ ତା ଲାଗାୟ୍ ୱାଦେଙ୍ଗ୍ ଇଚା କିନାର୍, ହେୱାର୍ ଈଶ୍ୱର ମାନାର୍ ଆରେ ହେୱାରିଙ୍ଗ୍ ହାର୍ଦି ମାନ୍ତାଙ୍ଗ୍ ଦାହ୍ନି ମାନାୟ୍ତିଙ୍ଗ୍ ହେୱାନ୍ ପୁରଷ୍କାର୍ ହିନାନ୍ ଇଞ୍ଜି ପାର୍ତିକିନି ଦର୍କାର୍। 7 ପାର୍ତି କାଜିଙ୍ଗ୍ ନୋହ ତା ପରିବାର୍ତିଙ୍ଗ୍ ବନ୍ୟାତାଙ୍ଗ୍ ଉଦାର୍ କିନି କାଜିଙ୍ଗ୍ ରଞ୍ଜାଙ୍ଗ୍ ଜାଜ୍ ରସ୍ତାନ୍। ହେପାଦ୍ନା ଇନାୱେଡ଼ାଙ୍ଗ୍ ଗଟାଆୱି ବନ୍ୟା ବିଷୟରେ ଈଶ୍ୱର ନୋହଙ୍ଗ୍ ୱେଚ୍ଚାନ୍, ଆରେ ହେୱାନ୍ ଈଶ୍ୱର କାତାତିଙ୍ଗ୍ ମାନି କିତାନ୍। ତା ହେ ପାର୍ତି କାଜିଙ୍ଗ୍, ଇ ପୁର୍ତିତାକେ ପାର୍ତିକିୱି ମାନାୟାରିଙ୍ଗ୍ ହେୱାନ୍ ଦସି କିତାନ୍ ଆରେ ଈଶ୍ୱର ହେୱାନିଙ୍ଗ୍ ଦରମ୍ ମାନାୟ୍ ଇଞ୍ଜି ସାକି ହିତାନ୍। 8 ପାର୍ତି କାଜିଙ୍ଗ୍ ଅବ୍ରାହାମ ଈଶ୍ୱର କାତାତିଙ୍ଗ୍ ମାନି କିତାନ୍, ଏଚେପାଦ୍ନା ଈଶ୍ୱର ହେୱାନିଙ୍ଗ୍ ତା ଇଲ୍ ପିସ୍ତି ଜେକନି ଦେସ୍ତାକେ ହାଞ୍ଜେଙ୍ଗ୍ କୁକ୍ତାନ୍। ଅବ୍ରାହାମତିଙ୍ଗ୍ ଈଶ୍ୱର ହେ ଦେସ୍ ଆଦିକାରି କିନି କାଜିଙ୍ଗ୍ ହିଦେଙ୍ଗ୍ ହାଲ୍ଜି ମାଚାନ୍। ମାତର୍ ହେୱାନ୍ ଇଦାଙ୍ଗ୍ ପୁନ୍ୱାଦାଙ୍ଗ୍ ମାଚାନ୍, ଆତିସ୍ପା ହେୱାନ୍ ହସିହାଚାନ୍। 9 ଆରେ ଏଚେପାଦ୍ନା ଅବ୍ରାହାମ ହେ ଦେସ୍ତାକେ ଇକାତାନ୍, ଈଶ୍ୱର ହେୱାନିଙ୍ଗ୍ ପାର୍ମାଣ୍ କିତାନ୍, ପାର୍ତି କାଜିଙ୍ଗ୍ ଅବ୍ରାହାମ ହେବେ ବିନ୍ ଦେସ୍ତି ମାନାୟ୍ ଲେକେ କୁଡ଼ିଆତାକେ ବାହା କିତାନ୍। ହେଲେକେ ତା ମାଜି ଇସାକ ଆରେ ନାତିହି ଯାକୁବ ଈଶ୍ୱରତାଙ୍ଗ୍ ହାମାନ୍ ପାର୍ମାଣ୍ ପାୟାଆଜି ପୁଟ୍ କୁଡ଼ିଆତାକେ ବାହାକିତାର୍। 10 ଅବ୍ରାହାମ ହେଲେକେ ବାହା କିତାନ୍, ଇନେସ୍କି ଈଶ୍ୱର ନିଜେ ରସ୍ତି ୱିଜୁଦିନ୍ ମାନି ପାଣ୍ଡୁସେନ୍ନି ସହର୍ତିଙ୍ଗ୍ ଅବ୍ରାହାମ କାସି ମାଚାନ୍। 11 ସାରା ଆରେ ଅବ୍ରାହାମ ବୁଡ଼୍ହି ଆଜି ମାଚାର୍ ଆରେ ହେୱାର୍ ବାଞ୍ଜ୍ଣି ଆଜି ମାଚିସ୍ ପା, ପାର୍ତି କାଜିଙ୍ଗ୍ ସାରା ଅବ୍ରାହାମ ହୁଦାଙ୍ଗ୍ ରଞ୍ଜାଙ୍ଗ୍ ମାଜି ଗାଟାଆନି କାଜିଙ୍ଗ୍ ଶାକ୍ତି ପାୟାଆତାନ୍। ଈଶ୍ୱର ତା ପାର୍ମାଣ୍ତିଙ୍ଗ୍ ପୁରା କିନାନ୍ ଇଞ୍ଜି ଅବ୍ରାହାମ ପାର୍ତି କିଜି ମାଚାନ୍। 12 ହିମ୍ଣା ଗାଟାଆନି କାଜିଙ୍ଗ୍ ଅବ୍ରାହାମ ବେସି ବୁଡ଼୍ହି ଆଜି ମାଚାନ୍। ମାତର୍ ଇ ରକାନ୍ ମାନାୟ୍ତାଙ୍ଗ୍ ର ଗାଜା ଜାତି ୱାଜି ମାଚାତ୍। ଇ ଜାତିନି ମାନାୟ୍ ଗାଣାକିଦେଙ୍ଗ୍ ଆଡ୍ୱିତି ବାଦାଡ଼୍ନି ହୁକା ଆରେ ହାମ୍ଦୁର୍ନି ବାଲିଆ ଲେକେ ମାଚାର୍। 13 ଈଶ୍ୱର ଇନାକା ପାର୍ମାଣ୍ କିଜି ମାଚାନ୍, ହେଦାଙ୍ଗ୍ ପାୟାଆୱାଦାଙ୍ଗ୍ ଇ ୱିଜୁ ପାର୍ତିକିନି ମାନାୟ୍ ହାଃତାର୍, ମାତର୍ ହେୱାର୍ ଈଶ୍ୱର ପାର୍ମାଣ୍ତିଙ୍ଗ୍ ଦେହାତାଙ୍ଗ୍ ହୁଡ଼୍ଜି ଆସ୍ତାର୍। ଲାଗିଙ୍ଗ୍ ହେୱାର୍ ଇ ପୁର୍ତିତାକେ ବିନେନି ଦେସ୍ତି ମାନାୟ୍ ଆରେ ଚିନ୍ କିୱିତି ମାନାୟ୍ ଲେକେ ଆଜି ମାଚାର୍। 14 ଆରେ ଇଲେକେ ୱେଚ୍ନି ମାନାୟାର୍ ହେୱାର୍ ଜାର୍ ଦେସ୍ତିଙ୍ଗ୍ ଦାସ୍ତି ମାଚାର୍ ଇଞ୍ଜି ହେୱାର୍ ପୁରାପୁରି ଟିକ୍ ବାବ୍ରେ ୱେଚ୍ନାର୍। 15 ଇମ୍ଣି ଦେସ୍ତାଙ୍ଗ୍ ହେୱାର୍ ହସି ୱାଜିମାଚାର୍, ଯଦି ହେୱାର୍ ସତ୍ରେ ହେୱାର୍ତି ଜାର୍ ଦେସ୍ ଇଞ୍ଜି ବାବିକିଜି ମାଚିସ୍, ଲାଗିଙ୍ଗ୍ ହେୱାର୍ ଲେଉଟା ଆଜି ହାଞ୍ଜେଙ୍ଗ୍ ହେୱାର୍ତି ସୁଯଗ୍ ମାଚାତ୍। 16 ମାତର୍ ହେୱାର୍ ରଞ୍ଜାଙ୍ଗ୍ ହାର୍ଦି ଦେସ୍ତିଙ୍ଗ୍ ଦାସ୍ତି ମାଚାର୍, ଇଦାଙ୍ଗ୍ନି ଅର୍ତ ହେୱାର୍ ସରଗ୍ତାକେ ମାନି ଦେସ୍ତିଙ୍ଗ୍ ଦାସ୍ତି ମାଚାର୍। ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାର୍ ଈଶ୍ୱର ଇଞ୍ଜି ୱେଚ୍ନି କାଜିଙ୍ଗ୍ ଲାଜା ଆୱାଦାଙ୍ଗ୍ ମାଚାନ୍, ଆରେ ହେୱାନ୍ ହେୱାର୍ କାଜିଙ୍ଗ୍ ରଞ୍ଜାଙ୍ଗ୍ ସହର୍ ସରଗ୍ତାକେ ରସ୍ତାନ୍ନା। 17-18 ଈଶ୍ୱର ଅବ୍ରାହାମତିଙ୍ଗ୍ ପାର୍ମାଣ୍ କିଜି ତା ମେହି ଇସାକ ବିଷୟରେ ୱେଚ୍ଚି ମାଚାନ୍, “ଇସାକତାଙ୍ଗ୍ ମି ଲାତ୍ରା ଗାଣା କିୟାଆନାତ୍।” ମାତର୍ ଅବ୍ରାହାମ ପାର୍ତି କାଜିଙ୍ଗ୍, ତା ରୱାନ୍ ଇଞ୍ଜି ମାଜି ଇସାକତିଙ୍ଗ୍ ବଲିପୁଜା କିନି କାଜିଙ୍ଗ୍ ରେଡି ମାଚାନ୍, ଏଚେପାଦ୍ନା ଈଶ୍ୱର ହେୱାନିଙ୍ଗ୍ ପରିକ୍ଷା କିତାନ୍। 19 ଇନେସ୍କି ଅବ୍ରାହାମତିଙ୍ଗ୍ ପାର୍ତି ମାଚାତ୍ ଯେ ଇସାକ ହାଃତିସ୍ ପା ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ନିକ୍ନି ଶାକ୍ତି ମାନାତ୍। ହେଲେକେ ଅବ୍ରାହାମ ତା ମାଜିଙ୍ଗ୍ ହାଃନିତାଙ୍ଗ୍ ଜିବୁନ୍ ପାୟାଆତାନ୍। 20 ପାର୍ତି କାଜିଙ୍ଗ୍ ଇସାକ ତା ରିକାର୍ ମାଜି ଯାକୁବ ଆରେ ଏଷୌଙ୍ଗ୍ ଆଶ୍ରିବାଦ୍ କିତାନ୍। ଈଶ୍ୱର ଇନାକା ନଙ୍ଗୟ୍ କିଦେଙ୍ଗ୍ ହାନାନା ହେବେତାଙ୍ଗ୍ ହେୱାନ୍ ପୁରା ଆହା କିଜି ମାଚାନ୍। 21 ପାର୍ତି କାଜିଙ୍ଗ୍ ଯାକୁବ ବୁଡ଼୍ହି ଆଜି ହାଃନି ସମୟ୍ତ ଯୋଷେପ ମେହିରିଙ୍ଗ୍ ଆଶ୍ରିବାଦ୍ କିତାନ୍। ଆରେ ହେୱାନ୍ ଈଶ୍ୱରତିଙ୍ଗ୍ ପୁଜାକିଜି ହେୱାନ୍ ଆସ୍ତି ତାଙ୍ଗ୍ନି ବେଡ୍ଗା ଜପି ଅଡ଼୍ଜା ଆଜି ଗୁର୍ତାନ୍। 22 ପାର୍ତି କାଜିଙ୍ଗ୍ ଯୋଷେପ ହାଃନିହିଙ୍ଗ୍ ପୁରା ଆହା ହୁଦାଙ୍ଗ୍ ୱେଚ୍ଚାନ୍ ଯେ ଈଶ୍ୱର ଇସ୍ରାଏଲନି ଦେସ୍ତି ମାନାୟାରିଙ୍ଗ୍ ମିସର ଦେସ୍ତାଙ୍ଗ୍ ହପ୍ଚି ତାସିୱାନାନ୍। ଆରେ ହେୱାର୍ ମିସର ଦେସ୍ ପିସ୍ତି ହାନିହିଙ୍ଗ୍, ତା ହାଃତି ଗାଗାଡ଼୍ନି ପେଣ୍ ହେୱାର୍ ହୁଦାଙ୍ଗ୍ ଅନି କାଜିଙ୍ଗ୍ ହେୱାନ୍ ହେୱାରିଙ୍ଗ୍ ଆଦେସ୍ ହିତାନ୍। 23 ପାର୍ତି କାଜିଙ୍ଗ୍ ମୋଶା ଆୟା ଆବାର୍ ରାଜା ଆଦେସ୍ତିଙ୍ଗ୍ ପାଣ୍ଡ୍ରା ଆୱାଦାଙ୍ଗ୍ ମାନି କିୱାତାର୍, ଆରେ ହେୱାର୍ ମୋଶା ଜନମ୍ ଆତି ପାଚେ ତିନ୍ମାସ୍ ଡ଼ୁକ୍ଚି ଇଡ଼୍ତାର୍। ଇନେସ୍କି ଈଶ୍ୱର ହେୱାରିଙ୍ଗ୍ ରଞ୍ଜାଙ୍ଗ୍ ହଲ୍ନି ହିମ୍ଣା ହିତ୍ତାନ୍ନା ଇଞ୍ଜି ହୁଡ଼୍ତାର୍। 24 ପାର୍ତି କାଜିଙ୍ଗ୍ ମୋଶା ଗାଜାଆତି ପାଚେ, ଫାର ଗାଡ଼୍ହିନି ହିମ୍ଣା ଆନାନ୍ ଇଞ୍ଜି କୁକ୍ନି କାଜିଙ୍ଗ୍ ମୁନା କିତାର୍। ଇନେସ୍କି ଫାରନି ଗାଡ଼୍ହି ହେୱାନିଙ୍ଗ୍ ହେବାକିଜି ଗାଜା କିଜି ମାଚାତ୍। 25 ଆରେ ମୋଶା ଅଲପ୍ ସମୟ୍ କାଜିଙ୍ଗ୍ ସୁକ୍ ପାୟାଆଜି ପାପ୍କିନି ବାଦୁଲ୍ ଈଶ୍ୱର ମାନାୟାର୍ ହୁଦାଙ୍ଗ୍ ଦୁକ୍କଷ୍ଟ ପାୟା ଆଦେଙ୍ଗ୍ ଇଚା କିତାନ୍। 26 ଆରେ ହେୱାନ୍ ମିସର ଦେସ୍ନି ଦନ୍ସମ୍ଫତି ବାଦୁଲ୍ ଖ୍ରୀଷ୍ଟ କାଜିଙ୍ଗ୍ ନିନ୍ଦା ପାୟାଆନାକା ୱିଜୁତାଙ୍ଗ୍ ଗାଜା ଦନ୍ ଇଞ୍ଜି ବାବିକିତାନ୍। ଇନେସ୍କି ଈଶ୍ୱର ହେୱାନିଙ୍ଗ୍ ଗାଜା ପୁରଷ୍କାର୍ ହିଦ୍ନାନ୍ ଇଞ୍ଜି ହେୱାନ୍ କାସି ମାଚାନ୍। 27 ପାର୍ତି କାଜିଙ୍ଗ୍ ମୋଶା ମିସର ଦେସ୍ ପିସ୍ତି ହାଲ୍ଜି ମାଚାନ୍। ରାଜା ରିସା ଆଦ୍ନାନ୍ ଇଞ୍ଜି ହେୱାନ୍ ପାଣ୍ଡ୍ରା ଆୱାଦାଙ୍ଗ୍ ମାଚାନ୍। ହେୱାନ୍ ଆରେ ମିସର ଦେସ୍ତାକେ ଲେଉଟା ଆଜି ୱାୱାତାନ୍, ଇନେସ୍କି ଚଞ୍ଜି ଆଦ୍ୱି ଈଶ୍ୱର ହେୱାନ୍ ହୁଦାଙ୍ଗ୍ ମାନାନ୍ ଇଞ୍ଜି ହେୱାନ୍ ପୁଚାନ୍। 28 ପାର୍ତି କାଜିଙ୍ଗ୍ ମୋଶା ଇସ୍ରାଏଲନି ମାନାୟାରିଙ୍ଗ୍ ନିସ୍ତାର୍ ପାର୍ବୁ ମାନିକିନି କାଜିଙ୍ଗ୍ ଆରେ ଦୁୱେର୍ ବାନ୍ଦାତାକେ ନେତେର୍ ଡ଼ଞ୍ଜ୍ନି କାଜିଙ୍ଗ୍ ଆଦେସ୍ ହିତାନ୍। ଲାଗିଙ୍ଗ୍ ଈଶ୍ୱର ପକ୍ଚିମାଚି ନଷ୍ଟ କିନି ଦୁତ୍ ହେୱାରିଙ୍ଗ୍ ଜନମ୍ ଆଜିମାଚି ପାଣ୍ୱା ହିମ୍ଣାକାଙ୍ଗ୍ ଅହୁନ୍। 29 ପାର୍ତି କାଜିଙ୍ଗ୍ ଇସ୍ରାଏଲନି ମାନାୟାର୍ ୱାଚ୍ଚି ହାଜିତିଙ୍ଗ୍ ହାନିଲେକେ ସୁପ ହାମ୍ଦୁର୍ ବିତ୍ରେ ଆଜି ହାଚାର୍। ମାତର୍ ହେୱାର୍ ପାଚେ ମିସର ଦେସ୍ନି ମାନାୟାର୍ ହାନିହିଙ୍ଗ୍, ମିସର ଦେସ୍ନି ମାନାୟାର୍ ଏଜୁକାଙ୍ଗ୍ ମୁନ୍ଞ୍ଜି ହାଃତାର୍। 30 ପାର୍ତି କାଜିଙ୍ଗ୍ ଇସ୍ରାଏଲନି ମାନାୟାର୍ ଯିରିହୋ ସହର୍ନି ବାଉଣ୍ଡେରିନି ଚାରିବେଣ୍ତାଙ୍ଗ୍ ସାତ୍ଦିନ୍ ପାତେକ୍ ବୁଲା ଆତାର୍, ଆରେ ଈଶ୍ୱର ୱେଚ୍ଚିଲେକେ ହେ ବାଉଣ୍ଡେରି ବାଡ଼୍ହା ଆତାତ୍। 31 ପାର୍ତି କାଜିଙ୍ଗ୍ ରାହାବ ଦାରୁଲା ଈଶ୍ୱରତିଙ୍ଗ୍ ମାନିକିୱି ମାନାୟାର୍ ହୁଦାଙ୍ଗ୍ ନଷ୍ଟ ଆୱାତାନ୍। ଇନେସ୍କି ହେୱାନ୍ ଇସ୍ରାଏଲନି ଡ଼ୁଗ୍ଜି ଚର୍ନାରିଙ୍ଗ୍ ଗତାଙ୍ଗ୍ ଲେକେକିଜି ଆସ୍ତି ମାଚାନ୍। 32 ପାର୍ତିକିନି ମାନାୟାର୍ ବିଷୟରେ ଆରେ ଏଚେକ୍ ୱେଚ୍ଚାନାଙ୍ଗ୍? ଗିଦିୟନ, ବାରକ, ଶାମ୍ଶୋନ୍, ଯିପ୍ତହ, ଦାଉଦ, ଶାମୁଏଲ ଆରେ ଭବିଷ୍ଯତବକ୍ତାର୍ ପାର୍ତି ବିଷୟରେ ଯଦି ଆନେଙ୍ଗ୍ ୱେଚ୍ଚାନାଙ୍ଗ୍, ଲାଗିଙ୍ଗ୍ ସମୟ୍ ଏକ୍ତୁତ୍। 33 ପାର୍ତି କାଜିଙ୍ଗ୍ ଇ ମାନାୟାର୍ ଦେସ୍କୁକାଙ୍ଗ୍ ଜିତା ଆତାର୍, ନ୍ୟାୟ୍ତାକେ ସାସନ୍ କିତାର୍, ଆରେ ଈଶ୍ୱର ଇନାକା ପାର୍ମାଣ୍ କିଜି ମାଚାନ୍ ହେଦାଙ୍ଗ୍ ପାୟାଆତାର୍। ସିଂହ ପାରାତାକେ ତୁସିହିତିଲେ ପା ହେୱାରିଙ୍ଗ୍ ତିନ୍ୱାତାତ୍, 34 ନାଣି ହେୱାରିଙ୍ଗ୍ କାଡିକିଦେଙ୍ଗ୍ ଆଡ୍ୱାତାତ୍, ଆରେ କାଣ୍ଡା ହେୱାରିଙ୍ଗ୍ ଅସ୍ତେଙ୍ଗ୍ ଆଡ୍ୱାତାତ୍। ଇମ୍ଣାକାର୍ ଦୁର୍ବଲ୍ ମାଚାର୍ ହେୱାର୍ ଶାକ୍ତି ଆଜି ଯୁଜ୍ତାକେ ଜିତା ଆତାର୍। ଆରେ ହେୱାର୍ ତା ଶତ୍ରୁନି ସେନାରିଙ୍ଗ୍ ପେସ୍ତାର୍। 35 କେତେକ୍ କଗ୍ଲେକ୍ ହେୱାର୍ ହାଃତି ମାନାୟାରିଙ୍ଗ୍ ଆରେରଗ ଜିବୁନ୍ ଗାଟାଆନିକ୍। ଈଶ୍ୱରତାଙ୍ଗ୍ ଦେହା ଆଜି ଜଇଲ୍ ଇଞ୍ଜାଙ୍ଗ୍ ମୁକ୍ତି ପାୟାଆନି ବାଦୁଲ୍ କେତେକ୍ ହେନି ମାନାୟ୍ ଈଶ୍ୱରତାକେ ପାର୍ତି କିଜି ଦୁକ୍କଷ୍ଟ ପାୟାଆଜି ହାଃଦେଙ୍ଗ୍ ଇଚାକିତାର୍। ଇନେସ୍କି ହାଃତିତାଙ୍ଗ୍ ଆରେରଗ ଜିବୁନ୍ଆଜି ନିଙ୍ଗ୍ନି ଜିବୁନ୍ ହାର୍ଦି ଜିବୁନ୍ ଇଞ୍ଜି ହେୱାର୍ ଆହା କିତାର୍। 36 ଈଶ୍ୱରତାକେ ପାର୍ତିକିନି କେତେକ୍ ମାନାୟ୍ ଅପ୍ମାନ୍ ପାୟାଆତାର୍ ଆରେ ହେୱାର୍ ଗାଗାଡ଼୍ କର୍ଡା ହୁଦାଙ୍ଗ୍ ଟ୍ରାକ୍ତି କାଜିଙ୍ଗ୍ ଗାଉ ଆଜି ମାଚାତ୍। ଆରେ କେତେକ୍ ମାନାୟ୍ ଗାଚିଆ ଆଜି ଜଇଲ୍ ଇଞ୍ଜ ବନ୍ଦି ଆତାର୍। 37 କେତେକ୍ ପାର୍ତିକିନି ମାନାୟ୍ କାଲ୍କୁ ହୁଦାଙ୍ଗ୍ ମାଡ୍ ତିନ୍ଞ୍ଜି ହାଃତାର୍, କେତେକ୍ ମାନାୟ୍ କରତ୍ ହୁଦାଙ୍ଗ୍ ରି ଗନ୍ଦା ଆତାର୍, ଆରେ କେତେକ୍ ମାନାୟ୍ କାଣ୍ଡାତାଙ୍ଗ୍ ହାଃତାର୍। ଆରେ କେତେକ୍ ପାର୍ତିକିନି ମାନାୟ୍ ମେଣ୍ଢା ଆରେ ଅଡାନି ତଲ୍ ନେ ଉସ୍ପିସ୍ ଇନିଆନି ବୁଲାଆଜି-ଆଜି ମାଚାର୍। ହେୱାର୍ ଲାଗାୟ୍ ଇନା ଡାବୁଙ୍ଗ୍ ହିଲିତିକ୍, ଆରେ ହେୱାର୍ ବେସି ଦୁକ୍କଷ୍ଟ ଆରେ ଅପ୍ମାନ୍ ବ୍ୟବହାର୍ ପାୟାଆତାର୍। 38 ହେୱାର୍ ରାନ୍ ଆରେ ମାଡ଼ିତାକେ ବୁଲାଆଜି-ଆଜି ମାଚାର୍, ପାରା ଆରେ କଦ୍ରାକାଙ୍ଗ୍ ଡ଼ୁଗ୍ଜି ମାଚାର୍। ଇ ପୁର୍ତିତାକେ ପାର୍ତି କିନାକାର୍ କାଜିଙ୍ଗ୍ ହାର୍ ହିଲାତାତ୍। 39 ଇ ପାର୍ତିକିନି ମାନାୟାର୍ତାଙ୍ଗ୍ ଈଶ୍ୱର ୱାରି ମାଚାନ୍, ଇନେସ୍କି ହେୱାର୍ ଈଶ୍ୱରତାକେ ପାର୍ତି କିତାର୍। ମାତର୍ ଈଶ୍ୱର ହେୱାରିଙ୍ଗ୍ ଇନାକା ପାର୍ମାଣ୍ କିଜି ମାଚାନ୍ ହେଦାଙ୍ଗ୍ ପାୟା ଆୱାତାର୍। 40 ଇନେସ୍କି ଈଶ୍ୱର ହେୱାର୍ କାଜିଙ୍ଗ୍ ଆପ୍କା ଗାଜା ଯଜ୍ନା କିୱାଦାଙ୍ଗ୍ ମାଚାନ୍, ମାତର୍ ମା କାଜିଙ୍ଗ୍ ପା ହେ ଯଜ୍ନା କିଜି ମାଚାନ୍। ମା ହୁଦାଙ୍ଗ୍ ହେୱାରିଙ୍ଗ୍ ଈଶ୍ୱର ପୁରା ଟିକ୍ କିଦେଙ୍ଗ୍ ଇଚାକିଜି ମାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation