ଏବ୍ରି 10 - New Testament in Pengo Parja Languageଯୀଶୁ ଖ୍ରୀଷ୍ଟ ରଗ ୱିଜାକାର୍ କାଜିଙ୍ଗ୍ ବଲିପୁଜା ଆତାନ୍ 1 ମୋଶା ନିୟମ୍ ସାସ୍ତର୍ ପାନି ରିତିନିତି ୱାନି ବିଷୟ ଆପ୍କା ରଞ୍ଜାଙ୍ଗ୍ ଡ଼ିଗା ଲେକେ ମାଚାତ୍। ଇମ୍ଣି ହାର୍ଦି ବିଷୟ ଖ୍ରୀଷ୍ଟ ମା କାଜିଙ୍ଗ୍ କିତାନ୍ନା ହେଲେକେ ଇ ରିତିନିତି ସତ୍ ହିଲାତାତ୍, ପାନି ନିୟମ୍ ଅନ୍ସାରେ ବାରମ୍-ବାରମ୍ ଆରେ ବାର୍ହେକ୍ତିଙ୍ଗ୍ ବାର୍ହେକ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ବଲିପୁଜା କିଦେଙ୍ଗ୍ ଦର୍କାର୍ ଆଜି ମାଚାତ୍। ଆତିସ୍ପା ହେବା କିନି ମାନାୟାରିଙ୍ଗ୍ ପୁରାପୁରି ବାବ୍ରେ ଟିକ୍ କିଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। 2 ଯଦି ଇ ନିୟମ୍ ମାନାୟାରିଙ୍ଗ୍ ପୁରାପୁରି ଟିକ୍କିଜି ମାଚିସ୍, ବଲିପୁଜା କିନାକା ବନ୍ଦ୍ ଆତାତ୍ମା। ଆରେ ହେବାକିନି ମାନାୟାର୍ ସତ୍ରେ ହେୱାର୍ ପାପ୍ତାଙ୍ଗ୍ ଟିକ୍ ଆତାର୍ମା ଆରେ ହେୱାର୍ ଆରେ ଦସି ଆତାଙ୍ଗ୍ନା ଇଞ୍ଜି ବାବି କିୱାତାର୍ମା। 3-4 ଇନେସ୍କି ବାଡ଼୍ଦୁ ଆରେ ଅଡାନି ନେତେର୍ ହେୱାର୍ ପାପ୍ତିଙ୍ଗ୍ ପିଣ୍ଜି ଅଦେଙ୍ଗ୍ ଆଡୁତ୍। ମାତର୍ ମାନାୟାର୍ କିନି ହେୱାର୍ ପାପ୍ତିଙ୍ଗ୍ ବାର୍ହେକ୍ତିଙ୍ଗ୍-ବାର୍ହେକ୍ ଇଦାଙ୍ଗ୍ ମାନ୍ତ ଏତୁ କିୟିକିନାତ୍। 5 ହେଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟ ଏଚେପାଦ୍ନା ପୁର୍ତିତାକେ ୱାତାନ୍, ହେୱାନ୍ ଈଶ୍ୱରତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ବଲିପୁଜା ଆରେ ଦାନ୍ ଡେକ୍ୱାଦାଙ୍ଗ୍ ମାଚାୟ୍। ମାତର୍ ନିଙ୍ଗେଙ୍ଗ୍ ଇନେସ୍ ଆନେଙ୍ଗ୍ ମାନି କିଦ୍ନାଙ୍ଗ୍, ଇଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା କିତ୍ତାୟ୍। 6 ବେଦିତାକେ ହୁଜ୍ତି ପଶୁନି ବଲିପୁଜାତାକେ କି ପାପ୍ତାଙ୍ଗ୍ କେମା ପାୟାଆନି ବଲିପୁଜାତାକେ ଏନେଙ୍ଗ୍ ୱାରି ହିଲ୍ୱାତାୟ୍। 7 ଲାଗିଙ୍ଗ୍ ଖ୍ରୀଷ୍ଟ ଈଶ୍ୱରତିଙ୍ଗ୍ ୱେଚ୍ଚାନ୍, ‘ହୁଡ଼ା, ସାସ୍ତର୍ତାକେ ନା ବିଷୟରେ ଲେକାଆତି ଲେକେ, ଏ ଈଶ୍ୱର, ନି ଇଚା ପୁରା କିନି କାଜିଙ୍ଗ୍ ଆନେଙ୍ଗ୍ ୱାତାଙ୍ଗ୍ନା’”। 8 ମୋଶା ଲେକିକିତି ନିୟମ୍ ସାସ୍ତର୍ ଅନ୍ସାରେ ବଲିପୁଜା, ଦାନ୍, ପଶୁତି ବଲିପୁଜା ବେଦିତାକେ କାଡିକିନାକା ଆରେ ପାପ୍ତାଙ୍ଗ୍ କେମା ପାୟାଆନି କାଜିଙ୍ଗ୍। ବଲିପୁଜା କିନାକା ଦର୍କାର୍ ଆତିସ୍ପା ଖ୍ରୀଷ୍ଟ ଈଶ୍ୱରତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଇ ୱିଜୁ ଇଚା କିୱାଦାଙ୍ଗ୍ ମାଚାୟ୍, ଆରେ ଇ ୱିଜୁତାଙ୍ଗ୍ ୱାରି ହିଲାତାୟ୍।” 9 ମାତର୍ ହେୱାନ୍ ୱେଚ୍ଚାନ୍, “ଏ ଈଶ୍ୱର, ନି ଇଚା ପୁରା କିଦେଙ୍ଗ୍ ଆନେଙ୍ଗ୍ ୱାତାଙ୍ଗ୍ନା।” ଈଶ୍ୱର ଦୁଇ ନମ୍ବର୍ ନିୟମ୍ ଆରମ୍ କିଦେଙ୍ଗ୍ ପାର୍ତୁମ୍ ନିୟମ୍ନି ବଲିପୁଜାତିଙ୍ଗ୍ ସେସ୍ କିତାନ୍। 10 ଇଦାଙ୍ଗ୍ କାଜିଙ୍ଗ୍, ରଗ ଯୀଶୁ ଖ୍ରୀଷ୍ଟତି ଗାଗାଡ଼୍ନି ବଲିପୁଜାତାଙ୍ଗ୍ ଆସେଙ୍ଗ୍ ୱିଜୁଦିନ୍ କାଜିଙ୍ଗ୍ ପବିତ୍ର ଆତାସ୍ନା। 11 ପାନି ନିୟମ୍ ଅନ୍ସାରେ, ୱିଜୁଦିନ୍ ଈଶ୍ୱରତିଙ୍ଗ୍ ହେବାକିନି ପୁଜାରି ବେଦି ମୁମ୍ଦ ନିଲ୍ଚି ହାମାନ୍ ବଲିପୁଜା ୱିଜୁଦିନ୍ ପୁଜା କିନାନ୍, ଆତିସ୍ପା ଇଦାଙ୍ଗ୍ ପାପ୍ତିଙ୍ଗ୍ ଇନେୱାଡ଼ାପା ଦେହା କିଦେଙ୍ଗ୍ ଆଡୁତ୍। 12 ମାତର୍ ମା ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଖ୍ରୀଷ୍ଟ, ୱିଜୁଦିନ୍ କାଜିଙ୍ଗ୍ ର ବଲିପୁଜା ଲେକେ ପାପ୍ନି କେମା କାଜିଙ୍ଗ୍ ହେୱାନ୍ ଜାର୍ତିଙ୍ଗ୍ ବଲିପୁଜା କିୟାଆତାନ୍। ଆରେ ହେୱାନ୍ ଈଶ୍ୱର ତିନାକେଇ ନିପ୍ଣି ବେସି ସନ୍ମାନ୍ ପାୟାଆନି ବାହାତାକେ କୁଚ୍ଚାନ୍ନା। 13-14 ହେ ରଞ୍ଜାଙ୍ଗ୍ ବଲିପୁଜାତାଙ୍ଗ୍, ଇମ୍ଣାକାର୍ ପବିତ୍ର ଆତାର୍ନା ଖ୍ରୀଷ୍ଟ ହେୱାରିଙ୍ଗ୍ ୱିଜୁଦିନ୍ କାଜିଙ୍ଗ୍ ପୁରାପୁରି ଟିକ୍ କିତାନ୍ନା। ତା ଶତ୍ରୁରିଙ୍ଗ୍ ତା କାଲ୍ପାନା ତାରେନ୍ ତାହିୱାନି ପାତେକ୍ ହେୱାନ୍ ହେବେ କାତାନ୍ନା। 15 ଆରେ ପବିତ୍ର ଆତ୍ମା ପା ମାଙ୍ଗେଙ୍ଗ୍ ହେ ବିଷୟରେ ସାକି ହିଦ୍ନାତ୍। ଇନେସ୍କି ମାପୃ ଇ କାତା ୱେଚ୍ଚାନାନ୍, 16 “ହେଦିନ୍ ଆନେଙ୍ଗ୍ ନା ମାନାୟାର୍ ହୁଦାଙ୍ଗ୍ ଇ ପୁନି ପାର୍ମାଣ୍ କିନାଙ୍ଗ୍। ହେଦାଙ୍ଗ୍ ଇଦାଙ୍ଗ୍, ‘ଆନେଙ୍ଗ୍ ହେୱାର୍ ଗରବ୍ତାକେ ନା ନିୟମ୍ ହିନାଙ୍ଗ୍, ଆରେ ହେୱାର୍ ହେଦାଙ୍ଗ୍ ବୁଜା ଆନାର୍। ଆରେ ଆନେଙ୍ଗ୍ ହେୱାର୍ ମାନ୍ତ ହେ ୱିଜୁ ଲେକିକିନାଙ୍ଗ୍, ଆରେ ହେୱାର୍ ହେ ୱିଜୁ ମାନିକିନାର୍’”। 17 ଇଦାଙ୍ଗ୍ ୱେଚ୍ଚି ପାଚେ ମାପୃ ୱେଚ୍ନାନ୍, “ହେୱାର୍ ପାପ୍ ଆରେ ହେୱାର୍ ଦସ୍ ୱିଜୁ ଆନେଙ୍ଗ୍ ଆରେ ମାନ୍ତ ଏତୁ କିଉଙ୍ଗ୍”। 18 ଈଶ୍ୱର ମା ପାପ୍ କେମା କିତ୍ତାନ୍ନା, ଲାଗିଙ୍ଗ୍ ବଲିପୁଜା କିନାକା ଆରେ ଦର୍କାର୍ ଆକାୟ୍। ଈଶ୍ୱର ଲାଗାୟ୍ ଆନାସ୍ 19 ଇଦାଙ୍ଗ୍ କାଜିଙ୍ଗ୍ ଏ ଟଣ୍ଡାର୍କାଦେର୍, ଆସେଙ୍ଗ୍ ସାହାସ୍ ହୁଦାଙ୍ଗ୍ ସରଗ୍ତାକେ ମାନି ବେସି ପବିତ୍ର ମନ୍ଦିର୍ତାକେ ହାଞ୍ଜେଙ୍ଗ୍ ଆଡ୍ନାସ୍, ଇନେସ୍କି ବଲିପୁଜା ଲେକେ ଯୀଶୁ ତା ନେତେର୍ ହିତାନ୍ନା। 20 ବଲିପୁଜା ଲେକେ ଯୀଶୁ ଖ୍ରୀଷ୍ଟ ଗାଗାଡ଼୍ତାକେ ହାଃତି କାଜିଙ୍ଗ୍, ସରଗ୍ନି ପବିତ୍ର କୁଡ଼ିଆନି ପାର୍ଦା ନିପଣ୍ ଖ୍ରୀଷ୍ଟ ହଟାନ୍ନା, ଆରେ ମାଙ୍ଗେଙ୍ଗ୍ ଜିବୁନ୍ ହିଦ୍ନି କାଜିଙ୍ଗ୍ ପୁନି ହାଜି ରସ୍ତାନ୍ନା। 21 ଆରେ ମା କାଜିଙ୍ଗ୍ ରକାନ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାନାନ୍, ହେୱାନ୍ ଈଶ୍ୱର ମାନାୟାର୍ ଜପି ସାସନ୍ କିନାନ୍। 22 ଖ୍ରୀଷ୍ଟ ତା ନେତେର୍ ତିର୍ପିସ୍, ମା ଗରବ୍ନି ଦସ୍ତିଙ୍ଗ୍ ଦେହା କିତାନ୍ନା, ହାର୍ଦି ଏଜୁଙ୍ଗ୍ତାଙ୍ଗ୍ ମା ଗାଗାଡ଼୍ତିଙ୍ଗ୍ ସପା କିଜି ମାଙ୍ଗେଙ୍ଗ୍ ରେଡି କିତାନ୍ନା। ଲାଗିଙ୍ଗ୍ ୱାଡ ଆସେଙ୍ଗ୍ ନଙ୍ଗୟ୍ ହାର୍ଦି ମାନ୍ତାଙ୍ଗ୍ ଆରେ ଷ୍ଟ୍ରଙ୍ଗ୍ ପାର୍ତିତାଙ୍ଗ୍ ଈଶ୍ୱର ଲାଗାୟ୍ ହାନାସ୍। 23 ଆସେଙ୍ଗ୍ ଇମ୍ଣି ଆହା ବିଷୟରେ ୱେଚ୍ନାସା, ହେଦାଙ୍ଗ୍ ବେସି ଷ୍ଟ୍ରଙ୍ଗ୍ ବାବ୍ରେ ଆସ୍ତି ମାନାଟ୍, ଇନେସ୍କି ଈଶ୍ୱର ଇନାକା ପାର୍ମାଣ୍ କିନାନ୍ ହେଦାଙ୍ଗ୍ କିନାନ୍ ଇଞ୍ଜି ଆସେଙ୍ଗ୍ ପାର୍ତି କିନାସା। 24 ଆରେ ଜାର୍-ଜାର୍ତିଙ୍ଗ୍ ଲାଡ୍ ଆରେ ହାର୍ଦି କାମାୟ୍ କିନି କାଜିଙ୍ଗ୍ ଜାର୍-ଜାର୍ତିଙ୍ଗ୍ ସାହାସ୍ କିଦେଙ୍ଗ୍ ଦିୟାନ୍ ହିନାସ୍। 25 ଜେକନିକାର୍ ଲେକେ ଆସେଙ୍ଗ୍ ମାପୃଙ୍ଗ୍ ରବେ ହେବା କିନାକା ବନ୍ଦ୍ କିଉସ୍। ମାତର୍ ଆସେଙ୍ଗ୍ ଜାର୍-ଜାର୍ତିଙ୍ଗ୍ ସାହାସ୍ କିଜି ଜାଗ୍ରତ୍ ଆନାସ୍, ଇନେସ୍କି ମାପୃ ଆରେରଗ ୱାନିଦିନ୍ ଲାଗେ ୱାନାତା। 26 ଇ ୱିଜୁ ବିଷୟ ଆସେଙ୍ଗ୍ କିନି ଦର୍କାର୍, ଇନେସ୍କି ଆସେଙ୍ଗ୍ ସତ୍ ବିଷୟରେ ପୁରା ଜ୍ଞାନ୍ ପାୟାଆତାସ୍ନା। ତାପାଚେ ଯଦି ଆସେଙ୍ଗ୍ ପୁନ୍ଞ୍ଜି-ପୁନ୍ଞ୍ଜି ପାପ୍ କିଜି ମାନାସ୍, ଲାଗିଙ୍ଗ୍ ଈଶ୍ୱର ଆସ୍ତି ଲେକେ ଆରେ ମା ଇ ପାପ୍ତିଙ୍ଗ୍ ଦେହା କିଦେଙ୍ଗ୍ ଆଡ଼୍ତି ଲେକେ ବଲିପୁଜା ଆରେ ଆକାୟ୍। 27 ମାତର୍ ଈଶ୍ୱର ବିଚାର୍କିନି ପାଣ୍ଡ୍ରୁତିଙ୍ଗ୍ କାନାକା ଆରେ ତା ଶତ୍ରୁରିଙ୍ଗ୍ ନଷ୍ଟ କିନି ନାଣିତାକେ ଦଣ୍ଡ୍ ପାୟାଆନାକା ନେ ମା କାଜିଙ୍ଗ୍ ବାକି ମାନାତ୍। 28 ଇନେର୍ ଯଦି ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନିକିୱିତିସ୍, ରିକାର୍ କି ତିନ୍ଜାଣ୍ ସାକିନି ପାର୍ମାଣ୍ତାକେ ହେୱାନିଙ୍ଗ୍ ଦୟା କିୱାଦାଙ୍ଗ୍ ହାଃନି ଦଣ୍ଡ୍ହିଜି ମାଚାର୍। 29 ଲାଗିଙ୍ଗ୍ ବାବିକିଜି ହୁଡ଼ାଟ୍, ଇମ୍ଣି ମାନାୟାର୍ ଈଶ୍ୱର ମେହିଙ୍ଗ୍ ଗିଣ୍କିଜି କାଲ୍ପାନା ତାରେନ୍ ଇଡ଼୍ତାନ୍ନା, ହେୱାର୍ ଦଣ୍ଡ୍ କେତେକ୍ ଆଦିକ୍ ଆଉତ୍। ଇନେସ୍କି ଈଶ୍ୱର ହେୱାରିଙ୍ଗ୍ ପବିତ୍ର କିନି କାଜିଙ୍ଗ୍ ଖ୍ରୀଷ୍ଟତି ଇମ୍ଣି ନେତେର୍ତାଙ୍ଗ୍ ପୁନି ପାର୍ମାଣ୍ତିଙ୍ଗ୍ ଆରମ୍ କିଜି ମାଚାନ୍, ହେ ନେତେର୍ତିଙ୍ଗ୍ ହେୱାର୍ ପବିତ୍ର ଇଞ୍ଜି ମାନି କିଉରା। ଆରେ ଇମ୍ଣି ପବିତ୍ର ଆତ୍ମାତାଙ୍ଗ୍ ହେୱାନ୍ ଦୟା ପାୟାଆତାର୍ନା ହେୱାନିଙ୍ଗ୍ ହେୱାର୍ ଅପ୍ମାନ୍ କିତାର୍ନା। 30 ଲାଗିଙ୍ଗ୍ ହେୱାର୍ ବେସି ଦଣ୍ଡ୍ ପାୟାଆନାର୍, ଇନେସ୍କି ଈଶ୍ୱର ଇ ଇମ୍ଣି କାତା ୱେଚ୍ଚାତାନ୍ନା, ହେୱାନିଙ୍ଗ୍ ଆସେଙ୍ଗ୍ ପୁନାସ୍ନା, “ଆନେଙ୍ଗ୍ ହେୱାରିଙ୍ଗ୍ ବଦ୍ଲା ଅନାଙ୍ଗ୍। ଆନେଙ୍ଗ୍ ହେୱାରିଙ୍ଗ୍ ଦଣ୍ଡ୍ ହିନାଙ୍ଗ୍।” ହେୱାନ୍ ଆରେ ୱେଚ୍ନାନ୍, “ମାପୃ ଜାର୍ ମାନାୟାରିଙ୍ଗ୍ ବିଚାର୍ କିନାନ୍।” 31 ଜିବୁନ୍ ମାନି ଈଶ୍ୱର କେଇଦ ଦଣ୍ଡ୍ ପାୟାଆନି ବୟଙ୍କାର୍ନି ବିଷୟ। 32 ଏପେଙ୍ଗ୍ ଇମ୍ଣିଦିନ୍ ଖ୍ରୀଷ୍ଟ ବିଷୟରେ ହିକା ଆତାଦେର୍ ହେ ସମୟ୍ତିଙ୍ଗ୍ ଇନାୱେଡ଼ାଙ୍ଗ୍ ବାଣା ଆମାଟ୍। ଦୁକ୍କଷ୍ଟ ଆତିସ୍ପା ଏପେଙ୍ଗ୍ ପାର୍ତିତାଙ୍ଗ୍ ତିର୍ଆଜି ମାନି ବିଷୟତିଙ୍ଗ୍ ମାନ୍ତ ଏତୁକିୟାଟ୍। 33 ହେପାଦ୍ନା ଏପେଙ୍ଗ୍ ୱିଜାକାର୍ ମୁମ୍ଦ ନିନ୍ଦା ପାୟାଆତାଦେର୍ ଆରେ ମାଡ୍ ଚିଚାଦେର୍, ଆରେ ଇମ୍ଣାକାର୍ ମି ଲେକେ କଷ୍ଟ ପାୟାଆଜି ମାଚିସ୍ ହେୱାରିଙ୍ଗ୍ ଏପେଙ୍ଗ୍ ସାଇଜ କିତାଦେର୍। 34 ଜଇଲ୍ ଇଞ୍ଜ ମାନି ମାନାୟାର୍ କଷ୍ଟ ହୁଦାଙ୍ଗ୍ ଏପେଙ୍ଗ୍ ମାହାଆଜି କଷ୍ଟ ପାୟାଆତାଦେର୍। ମି ଦନ୍ସମ୍ଫତି ମାନାୟାର୍ ଚର୍କିଜି ଅନିହିଙ୍ଗ୍, ଏପେଙ୍ଗ୍ ଇଦାଙ୍ଗ୍ତିଙ୍ଗ୍ ୱାରିତାଙ୍ଗ୍ ଆସ୍ତାଦେର୍। ଇନେସ୍କି ଈଶ୍ୱର ପାର୍ମାଣ୍କିତି ସମ୍ଫତି ବେସି ହାର୍ ଆରେ ୱିଜୁଦିନ୍ ମାନ୍ଗାନାତ୍ ଇଞ୍ଜି ଏପେଙ୍ଗ୍ ପୁଚାଦେର୍ନା। 35 ଲାଗିଙ୍ଗ୍ ଇନାକା ୱିଜୁ ଆତିସ୍ପା, ମାପୃତାକେ ପାର୍ତିକିନି ସାହାସ୍ତିଙ୍ଗ୍ ଏପେଙ୍ଗ୍ ପିହ୍ମାଟ୍। ହେବେ ଗାଜା ପୁରଷ୍କାର୍ ମାନାତ୍ ଇଞ୍ଜି ମାନ୍ତ ଇଟାଟ୍। 36 ଲାଗିଙ୍ଗ୍ ଏପେଙ୍ଗ୍ ଈଶ୍ୱର ଇଚା ଅନ୍ସାରେ କାମାୟ୍ କିଜି, ହେୱାନ୍ ଇନାକା ପାର୍ମାଣ୍ କିତାନ୍ନା ହେଦାଙ୍ଗ୍ ୱିଜୁ ଏପେଙ୍ଗ୍ ପାୟାଆନି କାଜିଙ୍ଗ୍, ମିଙ୍ଗେଙ୍ଗ୍ ନଙ୍ଗୟ୍ ସାହାସ୍ ଦର୍କାର୍ ମାନାତ୍। 37 ଇନେସ୍କି ସାସ୍ତର୍ତାକେ ଲେକା ମାନାତ୍, “ଆରେ ଅଲପ୍ ସମୟ୍ ପାଚେ, ଇନେର୍ ୱାନାକା ମାନାତ୍, ହେୱାନ୍ ୱାନାନ୍ ଆରେ ଲେଟ୍ କିଉନ୍। 38 ଆରେ ଦରମ୍ ମାନାୟ୍ ପାର୍ତିତାଙ୍ଗ୍ ଜିନାନ୍, ମାତର୍ ଇମ୍ଣି ମାନାୟ୍ ନାଙ୍ଗେଙ୍ଗ୍ ଆସ୍ତୁନ୍, ହେୱାନ୍ତାକେ ଆନେଙ୍ଗ୍ ୱାରି ଆଉଙ୍ଗ୍।” 39 ଇମ୍ଣାକାର୍ ଈଶ୍ୱରତିଙ୍ଗ୍ ଆହ୍ୱାଦାଙ୍ଗ୍ ନଷ୍ଟ ଆତାର୍ନା, ଆସେଙ୍ଗ୍ ହେୱାର୍ ଦଳ୍ ନିକାସ୍ ଆକାୟ୍। ମାତର୍ ଇମ୍ଣାକାର୍ ଈଶ୍ୱରତାକେ ପାର୍ତି କିଜି ଜାର୍ ଜିବୁନ୍ ଉଦାର୍ ପାୟାଆତାର୍ନା, ଆସେଙ୍ଗ୍ ହେୱାର୍ ଦଳ୍ ନିକାସ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation